SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 5

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 5

*********************************

A tuk ah chuan Lawma te college ah chuan function neih mek a ni a, motivational speech sawi tura an sawm lah chu Pu Jacob-a fapa, Victor-a a lo la ni zui. Auditorium ah chuan zirlaite chu an thu thap a, an ri deuh mur mur bawk. Item eng eng emaw an neih zawh hnu chuan host chuan Victor-a chu thusawi tur chuan a sawm ta a, Lawma erawh chuan a ngaithla lo reng reng, a melh ngai a melh vung vung ringawt.

"Hei hi hre reng rawh u, hlawhtlinna hi rim taka thawh tauh tauh ringawt hi a ni lo ania. Kan kawng te hi kan sial chawp ve angai a, kan chance neihchhun ang te te hi kan hmanthiam angai. Chuzawng chu ni rawh se, ka lawm e." tiin Victor-a pawh chuan a thusawi chu a ti tawp ta a.

Zirlaite chuan kut an beng dur dur mai, function chu a zo ta a. LAwma leh a thianpa Biaka te chu pawn lamah chuan an chhuak nghal a. College ground ah chuan kal nghalin meizial an zu a, Lawma hmel chu a ngui em em a. Biaka pawh chuan a lo hmuh hmaih hauh lo, "A sawi tha tiraw?" tiin Lawma chu a han nghawk zeuh va.

Lawma lah chuan a lu a lo bu nghut ringawt, "A sawi ang khan thil hi awlsam takin han thleng zung zung thei se chuan khawvel hi ka rorelna hnuaiah a awm tawh ang mawle." tiin Biaka bawk chu a han nui bawk bawk a. Lawma chu a lo khi suka , "A sawi tha alawm, mahse ka rilru ah thildang daih a awm. KA awm a nuam thei lo, a hrehawm ka ti." a ti chuai raih mai.

Biaka chuan a thianpa chu a han en vang vang a, "Engthil nge a?" tiin a zawt a. Lawma chu a thaw hak a, "Nizan khan, kan unau kan inhau leh vak a." tiin a chhang a. Phawk deuh hru hian Biaka chuan a melh a, "Eng a? Nizan chuan kan bulah i awm reng kha, i haw hnuah tihna em ni?" tiin a lo zawt leh a.

"AW ni e, ka haw hnu khan kan inhau leh hrep alawm."

"Khai aw, kan drinks hnem angreng sia, i rui ropui sia, buaina i va siam ringawt a ni lo maw?"

"Rui reng e, mahse ka rilru a na ve alawm. Min ngaihsak lo leh hlawm lutuk a, engatan mah min ngai lo ang mai hian ka hria."

"Eng thil chiah nge thleng a, han sawi la?"

"KA chhuah dawn khan ka u Ethana ka dil a, mahse min chhang duh miah lova. Vawi tam tak ka chhuak thei angem tia ka dil hnuah pawh lungpui biak ang chauh a ni, a melh pawh min melh duh lo. Ka chhuak lui ta tho va, chuan kan drinks hnu khan ka kai haw lutuk a. Lo rui pawr ve tawh nen, ka u May-i'n min hau ta hrep a. Ka insum zo lova, ka beng ta a nih kha. Enteh Biaka, rui lo ila chu ka beng miah lovang."

An inbiak lai chuan a sira zun in bulah chuan Victor-a chu a lo awm reng a, an thusawi chu a lo ngaithla ru vek a. Biaka chuan a lu a dawm vawng vawng a, "Khai leh...MAwla, engati nge i ben kher a?" tiin a lo chek tlawk tlawk mai. Lawma chu a thaw leh deuh hluai a, "Ka hria alawm, mahse ka u Ethana ber hi ania, mi hi a control leh lutuk a, ka insum zo bik thin lo a ni." tiin a chhang a.

Victor-a chuan Ethana nau a ni tih a hre nghal a, a hman tangkai theih ringin a hlim ru kher mai. An bulah chuan ava kal a, "Thiante u, khawimaw in lighter ka lo hmang lawk." tiin ava nui vel deuh sen sen a. Lawma chuan a lo hman tir ve mai bawk a, "Ka sawi tha ve tho tiraw?" Victor-a bawk chuan a han ti leh a.

Lawma chu za lo tak chuan lo nui lui sakin, "I sawi tha khawp mai." tiin a lo chhang a. Victor-a chuan a aw a han thian kharh kharh a, "I thusawi kha ka lo hre vuai vuai a, tunlai chu chhungkua in buai deuh animaw?" tiin LAwma chu a zawt a. LAwma pawh chuan zawite hian, "Nia, chhungkaw buaina satliah mai mai mawle." a lo ti sap a.

Victor-a chuan a lu a bu nghauh nghauh va, "Anih chu mawle, a chang chuan han inleihbuak bawrh bawrh te hi a ngai thin ania. Kan pai reng chuan a hrehawm thin a, kan thinrimna leh lungawilohte hi han sawi chhuah hian kan thawl ve hawk thin ania." a han ti leh luam a. Lawma pawh chu a khi suk a, "Aa... chutia thil serious em em pawh a ni lo. Ka u Ethana hi, a inla thu ve thei lutuk a, chuvang mai mai mawle." tiin a lo chhang leh a.

Victor-a chuan a card chu phawrh chhuakin, "Hei hi ka card ania, i duh hun hunah min lo call la, ka titi pui thei reng che ania. Engpawh nise, ka kal phawt ange." tiin a kalsan ta a, a hlim ru kher mai. Lawma lah chuan card chu a la ve mai bawk a, Biaka nen chuan an haw zui ve ta nghal a.

****************************************

ZAn a ni a, Lawma chu a leng chhuak leh a. MAhse lenna tur pawh a hre chuang lo, khawlaiah chuan a tei a tei kual ringawt a. Victor-a chuan ral khat atang chuan a lo hmu fuh leh hlauh mai, "Ava remchang dawn em ve aw..." tih nuah nuah pah chuan ava pan hnai a. Ring tak hian, "Ehe thianpa, khawnge i kal dawn a?" tiin ava bia a.

Lawma chu ava hawi let a, "Nang i ni maw, U Victor? Hei ka tei kual mai mai a, chaw eikham walk a nih hi." tiin a han khi suk a. Victor-a chuan nelawm hmel tak hian, "I hming pawh ka la hre ve miah lo, tunge khah?" a han ti kual vel a. Lawma chuan a hming chu a lo hrilh ve mai bawk a, "A nih tak chu, i rilru ava hah hmel reng reng ve a, chhungkaw buaina bawk em ni?" tiin Victor-a bawk chuan a zawt leh a.

Lawma chuan a lu a lo bu nghat a, "Nia, ka tawt up up mai tunlai chu.." tiin a lo chhang a. Victora chu a khi sak a, "Beer ka nei nual asin, kan dawm dun lawk dawn em ni?" a ti deuh thut mai. Lawma pawh chuan a melh hru a, "Aaa.. ka hrelo le.." tiin a tawng bah nuai mai. Victor-a lah chuan, "Lo kal rawh, ka car chhungah kan dawm dun dawnnia. I duh duh sawi rawh, i zang huai mai ang." tiin a thlem char char a.

A tawp a tawpah chuan LAwma chuan a remti a, car chhungah chuan an lut dun ta a. Beer chu an in dun a, "Eng ber chuan nge i rilru ti hah? Min hrilh vek rawh, ka sawi chhuak lovang." a han ti vel a. Lawma chuan beer chu a in khawlh khawlh a, "Kan unau hi pali kan nia, kan upa ber hi Ethana ania. Naupang ang mai hian min la treat a, ka ning thin lutuk a." tih pah chuan a in leh a.

Victor-a lah chuan fuihpawrh zelin beer pawh chu a cane hnihna an in leh dawn nghal der mai, Lawma titi lai chuan a beer in turah chuan zu pangngai a pawlh ru keuh va, Lawma chuan a in hnem telh telh a, a rui tawh kher mai. A sawi zawm zel a, "Nizan pawn chhuah ka dil a, min la chhang duh miah lo zui. Ka haw a, ka rui deuh tawh nen. KA u May-i nen kan inhniala , ka tum loh deuhvin ka beng ta a nih kha." tiin a hnuk te chu a ulh t(r)an nghal der a.

"A va zialo ve, mahse ka fuihpawrh che nilovin...kan u te hi chu an ninawm ve thin alawm. Tlangval nih ve tawh phei chuan, an lo over ve thin a. An inla upa ve lutuk thin hi a buaithlak alawm, ka hrethiam lutuk che. I u Ethana pawh chu a ti awm ang lo ve anih chu, a inla fing ve hle dawn anih chu." Victor-a'n a han ti chiah chu Lawma pawh a thinrim zual kher mai.

A han tlak leh pup a, "Ni chiah e mawle, mi hi a ringlo ve khanglang a. Pawisa lah nise mi pai tlem thei si, a zahthlak thei si. Tunah chuan hei, chhungkua zawng zawng a chawk buai ta vek a nih hi." tiin a rui tawh lutuk chu a meng sen rum tawh mai. Victor-a erawh nuam a ti tan dawn chauh, a motor seat chu a han ngheng ar ar a.

"Enge thleng zel, sawi vek law law teh, LAwma." tiin a fuihpawrh zel a. LAwma lah a rui tawh si, "SAwi sen pawh a ni lo, U Victor. Ka dinhmun hrehawm zia hi e, kan rethei bawk si. Kan dawr neihchhun bakery ve saw, hralh mai se tha tur. Chhungkaw inrochun chuti khati, ka phallo ve eke bal e, a ti kual a. Pawisa kan hmuh tam phah lo kan bakery vang hian, mahse Au Ethana chuan a phal tlat lo. A hrelo der ka ti dawn nge, a inla engemaw ve khanglang a." tiin a ang zui buan buan a.

Victor-a chuan bakery chungchang a sawi thleng ta chu a meng kawk mai, a rukin a phone chu a phawrh zal zal a. Lawma rui ang buan buan chu a rukin video chuan a record ta a, LAwma erawh chuan a hre hauh lo. A tawng tui telh telh a, "Kan chhang zawrh ho te saw maw, ka hrilh tawp ang che. A thar kan lei ngai awm pawh ka hre lo, a expire bak a hmang lova nge, Ethana sawn.." te a ti ta hial mai a.

Victor-a lawm lutuk chu a nui ru ver ver mai, ti fuh a inti hle bawk. Ethana te hian chhang expire pakhat mah an hmang ngai lova, Lawma thinrim rui bawk si chuan thil dik ni miah lo leh a tum ni miah lo thleng chuan a sawi chhuak ta tlat mai. Victor-a chuan video in a record mek tih a hre der mai si lo, "A fair lo ve bawk a nih chu, i dinhmun chu a hahthlak khawp ang." tiin a fuih pawrh belh zel a.

Lawma chuan a tlak leh pap a, "Hahthlak deuh mai asin, ka chan hi... unau zinga upa ber a nih avang hian pawisa zawng zawng a kawl vek a, a ta ang mai hian...thiante zinga ka retheih bik zia te hi a hre hlawl lo." tiin a la tawng tui nasa mai. Victor-a chuan video chu a off a, "Hawh teh, Lawma. I rui mah mah dawn tlat, ka thlah haw ang che aw..." tiin seat belt chu a hren sak a.

An in thlen hma chiah chuan a ding a, "Khai le, LAwma. In in pawh kan thleng tawh e, chhuk tawh rawh le." tiin Victor-a chuan Lawma chu a sawi harh a. Lawma pawh chu a phu deuh zuk a, "Thianpa, ka lawm e aw.." tiin a han kuah vel leh phawt a. Tichuan a chhuk a, kawngka bula lo en rengtu, a nau haw hun lo nghak rengtu Ethana chu a lo ding ngawi reng a.

Motor changkang leh nalh tak mai atanga a nau Lawma lo chhuak chu mak a ti angreng kher mai, a ngaih a tha lo hle bawk. Lawma chu a rawn kal hnai a, "Khawnge i kal a, i va lo haw har ve?" tiin Ethana chuan a lo ti ding a. Lawma chuan zamna nei miah lo hian a u chu a en ang ren rawn a, "KA leng ve a ni mai lawm, him dam taka ka lo haw hi lawm hle rawh." a tih khum hmak mai.

Mahse Ethana chu a insum hram hram a, a rui a ni tih a hrethiam nghal bawk. A thaw hak a, "Tu motor atangin nge i lo chhuk a, rawn thlahtu che kha tunge?" tiin a zawt leh a. Lawma chu a khi suk a, "Thianpaaa.. thianpa mai mai mawle." tiin rui tih hriat tak chuan inchhungah chuan a pai lut nasa mai a, a room ah chuan a lut tlang nghal daih mai.

*********************************************

Victor-a pawh chu a haw tlang nghal a, phur tak chuan inchhungah chuan a lut a. Pu JAcob-a pawh a sumdawnna chungchang vang chuan a lo la mu bik lo, dawhkana papaer inchhawp hnawk nuai chuan a lo la buai nasa mai a. Victor-a chu a rawn lut a, "Ehe Bawiha, i va rawn lut tlai ve?" tiin sana chu a en a.

Phur hmel tak hian Victor-a chuan a phone a phawrh a, "Pa, thil enge maw hmuh tir tur che ka nei a, i lawm zawng a nih ngei pawh ka ring." tih pah chuan a han nui sak a. A pa chu a phone pe in Lawma zu rui tawng, an bakery chhang atan expire tawh an hman thu a sawi zawng zawngte chu a en tir ta vek a.

Pu Jacob-a chu a nui ver ver mai, "Ekhai aw, ava tha dawn ve. Chhang expire maw? A tha dawn e, i ti tha hle mai." tiin a han bu nghat nghat a. Victor-a chuan intithei tak hian, "I lawm zawng a ni ang ka tih reng kha, Lawma hian tunge ka nih a hre lo hrim hrim. Ka kawm nel a, zanin lawka thil thleng a nih kha." a ti vei ham ham a.

Pu Jacob-a chu a han thu tha sauh sauh va, "I ti tha hle mai, kan mamawh tak a ni he video hi. I fing khawp mai, Ethana chuan duhthlan tur dang a nei tawh hauh lovang le." tiin a fapa chu chhuan hmel tak chuan a en a. Victor-a pawh chu lo nui sakin, "Ka lawm e, ka pa. Nangmah atanga ka zir a lawm, nangmah vang chauhva fing ka nih hi. Tunah chuan he video hi ka ti viral anga, Ethana chuan hralhna tur a zawng chuk tawh mai ang." tiin a chhang a.

Pu JAcob-a chu a ding a, "Ka chhuang hle mai che, ka fapa. I thluak pawh a tha e, sumdawnna ah hi chuan tianga chet a ngaih chang te hi a awm ve ania. Tunah chuan video kha post darh a pawimawh, Ethana pawh kan offer hi a hnial tawh lohna turin lo be leh ang che." tiin a fapa darah chuan a beng thak thak a. 

Victor-a chuan a lu bu nghatin, "Awle ka pa, ka hrethiam e." tiin a chhang a, kal a tum chu apa chuan a lo ko ding leh a. "Chuan hei hi hre reng rawh, Bawiha. HEi hi a bul tanna chauh a ni, hmelma min beitu chu kan nei reng dawn. MAhse hetianga a bul tanna a fuh a nih chuan, tuma lakah kan tlawm ngai lovang." tiin a chah nawn leh a, Victor-a chu a chhuak ta a.

****************************************

A tukah chuan Lawma chu luna bur leh peihlo tak chuan college chu a kal leh hnak hnak a, campus chhung a lut chiah chu an en deuh sap sap hlawm hian a hria a. A hre dik reng bawk, zirlaite chuan an en leh zuk zuk thin a, a va melh veleh an hawi sawn leh daih zel a. Mak a ti angreng kher mai, "Tinge maw min en sup sup le?" tiin a phun nuah nuah a.

Chutia a kal mek lai chuan a thianpa Biaka chuan a rawn pawt hrang a, "Lawma, enge thil awmzia?" tiin a mangan hmel kher mai. Lawma chuan hrethiam lo tak hian, "Eng chu maw? Enge i hriat a?" a lo ti hu mai. Biaka chuan a phone a phawrh a, video viral mek chu a entir ve ta a.

Lawma chuan video chu a en a, a meng kawk kawk mai. A u Ethana a sawichhiatna zawng zawngte, an chhang hman lai expire a nih thu a sawite chu a hmu ve ta. A tawng hlei thei lo, "Hei hi, eng...engtik ami nge?" a ti bah nuai mai a. Biaka chuan zawi sap hian, "Nizanah tu emawni nen in spot dun a, a record ru che a ni. Tunge nizanah i awmpui a, tukin zing atang khan he video hi a viral nasa lutuk tih i hria em?" tiin a lungawi loh hmel kher mai.

Lawma chu a thlan fim a tla bawrh bawrh a, "Ka hre lo, engmah ka hre tawh lo. KA rui lutuk a, enge thleng ka hre lo." tiin a buai nasa mai a. A kut te chu a khur hial a, "Enge, enge awmzia?" tiin amah leh amah chu a inbe thul. Biaka chuan lainat hmel tak hian a en ngawih ngawih a, "Hmu an tam tawh lutuk, comment-na lamah pawh tawngkam an duhtui lo hlawm khawp mai." a ti zawi leh sap a.

Lawma chu a thaw halh halha , "Nilo..ka...ka kal angai." tih leh tlan chu a rual a, Biaka chuan a ko vak vak a. MAhse Lawma chu college campus atang chuan a tlan chhuak nghal a, midang ho chuan an en zui sap sap hlawm mai. Thenkhat chuan an sawi zui nak nak hlawm a, video-a lo la an awm bawk.

Lawma chu college thlanga mau hmun zau takah chuan a tlan lut a, hla deuh tak a thlen hnu chuan a ding a. A khup dawmin a thaw halh halh a, a thingthi hnawk mai. A mittui chu a rawn tla a, "Eng thil... engthil phiangsen nge ka tih tak?" tiin a au vak vak a. A tap zawih zawih mai, "Ka va han mawl tak, ka va han mawl tak em." tiin a hmai chu a hup a.

A tap khur zawih zawih a, "Au Ethan, min... min ngaidam rawh, khawngaih takin min ngaidam rawh." tiin a kun ngawih ngawih a. Chutah a mitthla ah chuan a hma zana Victor-a nen an inbiakna te chu a rawn lang zuai zuai a, "Kha... kha mi tenawm kha, khapa khan min lo record amaw?" tiin a phone chu a phawrh a.

Victor-a'n card a pek chu a la chhuak a, a call nghal a. MAhse a tlang thei ta hauh lo mai, vawi 10 vel a try hnu pawh chuan a tlang thei chuang hauh lo. A thinrim bawk si, zak bawk si leh inthiam lo bawk si chu a tei kual a tei kual ringawt a. A au leh vak vak thul, "Ni lo, ka insawifiah angai." tiin a tlan leh deuh thut a.

*********************************************

Victor-a te pafa pawh office ah chuan an awmdun mek a, an video tih viral chungchangte chu an sawi a. A nihna takah chuan Victor-a post darh a ni lova, Pu Jacob-a post darh pawh a ni bawk hek lo. Post darh turin an hnuaia hnathawk zinga mi an tih tir mai chauh a ni, anmahniin an post chuan mipuiin ngaihdan hrang an nei dawn tih an hriat lawk vang a ni.

Victor-a chu a nui hak hak a, "An comment-na hi a rapthlak hlawm khawp mai, Ethana chuan hralh loh a ngam tawh hauh lovang." tiin a confi hmel kher mai. MAhse Pu Jacob-a erawh a nui tawi tak mai, "Ethana hi mi luhlul tak a ni a, a duh tawh ngei ngei ang tih erawh ka sawi fak ngam hrih chuang lo." a lo ti daih thung a.

Victor-a chu a lo ner deuh sak a, "A hralh phal tawh awm emai, an hmingchhe vek tawh alawm." tiin Victor-a chuan a lo hnial a. Pu JAcob-a chu a han thu tha sauh sauh va, "Ethana ila hmu ve lo, Bawiha. NAng chuan a nau a tak, Lawma zawk chauh kha ila hmu a. Kei chuan vawi hnih lai ka hmu tawh, luhlul ngan ngan tak a ni." tiin a chhang a.

"Min ring tawp rawh, ka pa. Mipuiin an bei nasa tawh lutuk, saw an bakery tereuhte hlawk mang hlei lo saw miin ti khawp hian tunah an sawisel ania. Lawma tawngkam zawng zawng nen khan khawiah Ethana hi a luhlul rei tawh lovang, a hralh em em ang."

"Eng emaw kawng chu a dap leh duh tho maithei a ni, chutia tlawm mai maik chi niin ka hre lo. An chhungkaw tan a pawimawh a tih avangin sum tam tak pawh a hnial a nia, hausakna tham lawh a ni lehgnghal. Tuna kan thil tih pawh hi a la tawk lo cheu maithei ania, Ethana hi ngainep ngawt suh."

Victor-a chu a khi suka , "I ngaihdan kha paih daih rawh, ka pa. A luhlulna sawn pawisa a pe dawn lo, chuan he video viral hi a luhlulna sawn a tih reh phah dawn lo bawk. Lo ngai reng rawh, Ethana chuan keini hi min rawn pan em em ang." tiin a la confi khawp mai. Pu Jacob-a pawh chu a khi suk ringawt a, "Engpawh nise i ti tha e, ka chhuang khawp mai che." tiin a ding hluai a.

Victor-a pawh chu a ding ve nghal a, "Ka lawm e, ka pa. Lawma kha ka hmuh tirh atang khan ka bum thei dawn tih ka hre sa vek alawm, tunah chuan rei kan nghah a ngai tawh lovang." tiin a chhang a. "MAhse ka sawi kha hre reng la, Ethana hi ngainep ngawt suh. Min do let hi a la tum fan maithei ania, kan inrin reng tho angai." Pu Jacob-a chuan a la ti hram a.

Victor-a chu a nui sak a, "Ka hria alawm, Ethana hi ka ngainep reng reng lo. Mahse min hneh thei chuang lovang, min rawn bei let a nih pawhin engkim ka plan lawk sa leh diam tawh alawm." tiin thawk a han la deuh hak a, "Ka kal phawt ange." tiin a chhuak a, chhuan hmel tak hian apa chuan a en zui vawng vawng mai.

*************************************************

Chawhnu lam a ni a, May-i leh Sangtei te unau chuan lemziah an inzirtir mek a. An unaupa LAwma video viral thu pawh engmah an lo la hre ve lo, "Tikhan lo ziah chhunzawm rawh aw, i thiam lutuk ania. Ka tui chhuan saw ka va en lawk ang, tikhan lo ziah chhunzawn rawh." tiin May-i chuan choka lamah chuan a phei san a.

Sangtei chuan lem chu a ziah chhunzawm mawlh mawlh a, chutih lai chuan a phone chu a rawn ri a. Number hriat loh hi a lo ni a, "Ehe, tunge mawni le?" tih pah chuan a chhang a. "AW HEllo, aw ni e.....eng maw?" tiin a meng phar awn awn mai. Phone chu a dah a, May-i pawh chuan a lo en ve reng a.

"Tinge a, Sangte? Tunge ni a?" tiin a lo zawt nghal vat a. Sangtei chuan mak tih hmel tak hian, "Au Lawma thiante zinga mi angin a insawi a, ka hre bik lo." a tih lai chuan message a dawng a. Rang takin a en a, Lawma video viral mek chu a dawng ve ta. A en a, a meng kawk kawk mai.

MAy-i ngaihtha lo chu a rawn kal a, "Enge a? Engthil nge a, Sangte?" tiin a rawn zawt leh nghal a. Video chu an unau chuan an en dun ta, mak an tiin an thin a phu dup dup mai. Engmah an sawi lo, ngawi reng chuan video chu an en reng ringawt. Chutih lai chuan Ethana chu a rawn haw deuh thut a, a inkhar hma chu lo niin.

Inchhung a lut chiah chu sitting room lama a unaunute pahnihin phone an lo bih dun mek chu ava hmu a, an hmel atang chuan engemaw dik lo a awm tih pawh chu a hre thei nghal. A va pan hnai a, "Enge in en a, thil dik lo a awm em ni?" tiin a zawt a. NGawi reng chuan May-i chuan phone chu a pe a, Ethana chuan video chu a en ve ta a.

Ethana pawh chu a meng phawk nasa kher mai, a thin chu a phu dup dup a. A thinrim chu a so bulh bulh bawk, "A viral mek, an post darh nasa tawh lutuk a ni awm e." May-i chuan a ti zawi sap a. Ethana chuan engmah a sawi thei lo, mit khap lek lo chuan video chu a en reng ringawt a.

Chutah Lawma chu inchhungah chuan a rawn lut thut a, a unaute chuan an lo en thap mai. Lawma chuan inthiam loh hmel tak hian Ethana chu ava pan a, "U..Au..Au Ethan, ka.. ka tihpalh a ni." tiin en pawh a en tha ngam lo.Ethana chu ala ngawi reng a, "KA, ka rui a... khapa khan, min bum a. Ka tihpalh, ka tum a ni miah lo." tiin a tap tuau mai a.

Chutah Ethana chu a insum zo ta lo, na em em hian LAwma bekah chuan a hnek ri ta chawk mai. Lawma pawh a hawi sawk a, a thal chiang ngei mai. Tap chung hian Sangtei chuan Ethana chu a lo dang nghal a, "A u, duhtawk rawh, khawngaihin." tiin a lo kuah bet nghal a. May-i chuan rum taka Lawma melh chung hian, "Engthil nge i tih hi, enge i ngaihtuahnaah khan awm a?" tiin a vin hrep mai.

Lawma tawng hma hma chuan Ethana chuan vin zet hian, "I thil tih pawi tur zia hi i hria em? Engkim....engkimk i ti chhe vek a nih hi." tiin a an khum hrep mai a. Lawma chu a tap zawih zawih a, "Ka tih tum a ni bik lo asin." tiin a hmai hupin a kun tlawk tlawk mai. Ethana chu a thaw rang telh telh a, "Mimawl nau ka nei che hi ka kham tawh takzet." tiin pawnah chuan a tlan chhuak nghal a.

Lawma pawh tap chung chuan a room ah chuan a lut nghal bawk, Sangtei leh MAy-i chu an in en reng ringawt a. An mittui chu an inhruk chhawk mawlh mawlh hi a ni ber mai, May-i chuan Sangtei chu a kuah a, "Lungngai suh, PAthianin min pui dawn alawm." tiin a nau chu a hnem a, Sangtei erawh a ngawi reng thung.

***************************************

Hun a kal zel a, video chu ala viral reng tho. Social media ah an post darh nasa em em a, whatsapp, facebook leh ig lamah pawh a lar takzet. Chu mai nilovin an vengah pawh dawrtu an kiam nasa em em a, Ethana pawh chuan customer tumah a hmu tawh ngaih mang lo. Khawlai kal thenkhatte lah chuan thla an la rawn la zeuh zeuh hlawm thin lehnghal a, an chhungkua chuan mualpho tak an ni.

LAwma tan pawh hrehawm tak a ni, college ah lah an hmuh apiangin an sawi sep sep reng a. A chang phei chuan a hre pha hial thin, Biaka takngial pawhin a chang chuan a hmu lo der thin bawk. Chutiang bawkin Sangtei pawh school lamah chuan an sawi sap sap reng a, hrehawm a ti thin hle.

May-i pawh principal chuan an chhungkaw dinhmunin a zir rih loh em avang chuan chawlh la rih mai turin a ti a, zak tak leh inthlahrung tak chung chuan a pawm ve mai bawk. Comment-na zawng zawngte an lo chhiar ve lo thei thin si lova, tawngkam an duh tui lo hlawm bawk nen.

Hrehawm ti tak chung chuan an tuar zel a, Ethana pawh a upa ber a nih angin a unaute hrehawmna chu a hrethiam tak zet a. A rilru a hah in enge tih ber tur a hre lo, ni engemaw zat a inngaihtuah hnu chuan an bakery chu khar rih mai a tum ta a. Customer an nei ngai lova, an chhang lah an dah chhe mai mai dawn bawk si.

Thuthlukna chu a siam fel ta a, zanreiah chuan an dawr lam panin dawr chu a khar a. 'CLOSE UNTIL FURTHER NOTICE' tih chu tar kuau vin a en vang vang a, a maimitchhing a. Tap teuh chung chuan, "Nu, pa... min ngaidam hram rawh u. Hun ka mamawh a ni, ka tiam a che u. He dawr hi ka hawng leh ngei ang, engkim ka siam tha leh ang." tiin a phun sap a.

Ethana chuan tu thil tih nge a nih tih chu a hrethiam nghal vek, Pu Jacob-a ruahmanna bak a ni dawn lo tih chu a man thiam nghal vek a. Chuvang chuan a bakery chu hralh chu sawi loh, Pu Jacob-a chu va contact a la tum chuang lo bur a ni. Engtin nge hma a lak dawn, enge a tih dawn chu a hre chuang lo, mahse engkim siam that ngei chu a tum nghet bur thung.

Chutih rual chuan LAwma pawhin hrehawm a ti em em a, amah vang vek a ni tih chu a hre ve bawk si. Victor-a chu a huat hian a haw so bawrh bawrh am chutih rual chuan mawl a inti hle bawk. Zankhat lek a ruih sual avangin an chhungkaw mualphona a thlen ringawt mai chu ania, chutih lai karin an bakery neih ve chhun ngawih ngawih pawh khar a la ngaih phah zui.

An unau li chuan an inbe ngai meuh lo, inchhung boruak pawh nuam lo thei tak a ni. Chaw an ei hova, chuzawng chu an thut khawm awmchhun a nimai. Ethana pawh a zia a dang tulh tulh a, tawng tlem sa nak alaiin tunah phei chuan a tawng ngai tawh lo ang hial a ni. Sangtei leh May-i te unau erawh an la inbe zeuh zeuh thin a, mahse chupawh khat tak a ni.

Chutih lai chuan Victor-a leh Pu Jacob-a te pafa pawh an mangang tan a, thla khat dawn video viral hnuah pawh Ethana chuan a la rawn be eih lo mai chu Victor-a ber pawh a mangang tan ta hle mai. Pu Jacob-a pawh a hlauh ang ngei ngeiin thil a thleng dawn niin a hria a, a mangang ru ve hle bawk.

************************************************

TO BE CONTINUE