SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 3

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 3

***************************************

Zan dar 8 a ri dawn tawh a, Ethana te unau pawh an reh leh thiap tawh mai. Ethana chu sitting room tukverh bulah chuan thu in a inngaihtuah nasa hle a, tlai lama a nau May-i leh a thianpa Thantea inkawm lai a zui ru kher te chu a inthiam lo nasa tulh tulh mai. Chutih lai chuan May-i chu a room atang chuan a rawn chhuak a, phone a hmang mek a.

A tawng mawlh mawlh pah chuan tui chu a thli a, a in khawlh khawlh a. Kil khat atang chuan Ethana chuan a lo en reng a, a inthiam loh em avang chuan inzep lova a thil tih te chu hrilh hriat thlap chu a duh a. May-i chu room a let leh a tum a, "may, lo kal lawk teh." tiin Ethana chuan a lo ko ding a.

May-i pawh chu dingin, "Thante, nakinah ka lo be leh ang che." tiin phone chu a dah a. A u Ethana bulah chuan a va kal a, "Enge ni ta?" tiin a hma zawn takah chuan a thu a. Ethana chu a lo khi deuh suk a, "Thantea maw a hming?" tiin a lo zawt a. May-i chuan hrethiam lo tak chuan, "Maw? Enge awmzia?" a lo ti huk mai.

Ethana chu a han ngawi vang vang a, "Englo ania, vawiin tlai khan ka hmu che u a...i thianpa nen khan." a han ti chu May-i chu a meng phawk deuh hru mai. A han thu tha deuh va, "Chu chu ngati nge?" tiin a zawt leh a. Inthiam loh hmel tak hian, "Aa... englo, ihh... ka zui che u a, a chhan chu khapa kha ka la hmu ngai si lova. Thianpa emaw ngaihzawng i neih thu min hrilh ngai si lo nen, i him ka duh vang mai chauh ania." tiin a han insawifiah phawt a.

May-i chu a hmel atang chuan a lawm vak lo tih a hriat kher mai, "Min zui ru maw, U... ngatinge?" tiin a lo zawt nghal a. Ethana pawh chu a kun deuh ngal a, "Nia, min ngaihdan tur chu ka hria alawm. Ka han hlauthawng mai mai mawle, buaina i tawh ka hlau em a. Keipawh khatia ka zui ru che u kha tul ka ti kher lo, mahse ka lo mangang hman thin a ni." tiin thupha chu a chawi nghal mawlh mawlh a.

ZA vak lo chuan May-i chu a nui lui sak a, "Ka lawm, ni e.. kan upa ber inia, kan nu leh pa nih i fawm a. Ka hrethiam che alawm, mahse hmunruak tlem min pek ve angai a ni." tiin a chhang deuh hmuk mai. Ethana chuan a lu a bu deuh nghat a, "Ka inthiam loh thu sawi tur chauhvin ania ka koh che, ka hrethiam alawm." a ti dam deuh thlup a.

May-i pawh chu a inthiam leh chiah bik lo, "U.. min ngaihtuah tih ka hria, kan unau tan i theih tawp i chhuah thin tih pawh tuman kan hai lo. Ka lawm takzet, ka himna tur i ngaihtuah a." tiin a kut chu ava vuan a. Ethana erawh chuan chhang lovin a khi suk ringawt a, room ah chuan a luhsan ta a.

********************************************

Room chhungah chuan Ethana chu a ingaihtuah nasa ngei mai, a hma zana a nau Lawma nena an inhauhna te, LAwma tawngkam zawng zawng te chu a ngaihtuah let a. Zawhna a inzawt mawlh mawlh a, "Keipawh hi ka over mah mah em mawni le, ka strict mah mah em ni? Nula tlangval an ni ve tawh a, ka mangang hma lutuk nge?" tiin a inngaihtuah nasa mai.

Chutih lai tak chuan a room kawngka chu a rawn inkik dat dat a, Sangtei chu a rawn lut a. Ethana chuan zaidam tak hian, "Enge ni, BAwihi?" tiin a lo zawt nghal vat a. Sangtei chu a zam hmel takzet, room kawngka chu kharin inthlahrun hmel tak chuan a u Ethana bulah chuan ava thu a.

Ethana pawh chuan a nau hmela zamna leh inthlahrunna awm chu a hmuh hmaih hauh lo, "Engthil nge i chungah thleng a, buaina i nei em ni?" tiin a zawt nawn leh a. Sangtei chuan a chil a lem dawk a, "Ihh, thil hrilh che ka duh a." a ti tham tiak mai. Ethana chu a thin a phu nghal dup dup mai, "Eng thil nge, BAwihi?" tiin miin an tibuai turah a ngai nghal leh ringawt tawh.

Sangtei chuan thawk a han la te te a, "Ihh.. Vawiinah Miss Kate-i'n min kova, fee chungchangah a nia. Kan pek vat loh chuan thil a buaithlak vek dawn a tia, thla hnih chhung kan pe tawh lova." tiin inthlahrung tak chuan thil awmzia chu a hrilh ta vek a. Ethana chuan mak a ti kher mai, "Thla hnih maw? NGatinge, ka ve hre ve lo ve?" a ti deuh hu mai a.

"Nia, ka hrilh ngam thin lo che a. I buai thei sia, sum lamah kan harsa bawk si nen. I rilru hahna ti belhchhahtu nih ka duh lo alawm, chuvangin ka sawi ta lo mai a nih kha." tiin tap lek lek chuan Sangtei chuan a chhang a. Ethana chu a ngawi deuh vang vang a, "Min hrilh tur a alawm, i u ka nih hi. In unau thum hian in buaina chu engpawh nise, ka mawhphurhna vek ania, min hrilh zel tawh ang che." tiin a hrilh a.

Sangtei chuan a lu chu a bu nghauh nghauh va, "Awle U.... e chuan, naktukah Miss Kate-i chuan a hmu duh bawk che a, dar 10 leh a chanve ah rawn thlen hman tum se a tia." a han ti leh a. Ethana pawh chuan zaidam tak hian, "Umm, a nih chu. Ka rawn kal ang, fee pawh kan pe em em ang, in miss chu ka lo be dawnnia." tiin a chhang a.

SAngtei chu chhuah a tum a, "Leh lawk, BAwihi. A lehpekah chuan eng buaina pawh tawk la, min hrilh thlap thlap zel ang che aw..." a han ti leh a. Sangtei pawh chuan a lu a lo bu leh nghat a. Tichuan a chhuahsan ta a, Ethana rilru hahna pawh a zual leh ta, a tam tham ve si a. A tuka Sangtei zirtitute hmuh pawh chu a hurphurh ve ngang mai, mahse a ngai miau bawk si.

**************************************************

A tuk ah chuan Sophie te class chuan class test an nei mek a, an ziak sap sap hlawm a. An zirtirtu Sir John-a chu a tei kual reng bawk, chutih lai chuan entawn tur zawng reng reng a Sir John-a hmuhloh laia lo phe buai ve sek lah an awm bawk. Chung zinga mi langsar zualte chu an class hmeichhe inla thu leh kawlh sen ve tak Nanu-i leh a thian kawm ngeih em em, amah zui rengtu pahnih Lucy leh Maengi te an ni.

MAengi chuan a entawn tur ziah sa chu a copy zawh veleh chuan Lucy chu ava pass zeuh va, Lucy chuan a lo copy veleh char char a. A mit sir chuan chung zawng zawng chu Sangtei chuan a hmu vek a, mahse a test paper chauh chu a ngaihtuah avang chuan a enzui lem lo. Lucy-i chuan a copy zo va, Nanu-i chu ava pe leh a.

MAhse chutih lai tak chuan Sir John-a chu a rawn leh hawi thut a, Nanu-i lah chuan paper them chu a lo ban hman tawh si. A hlauthawng tih ngaihna hre bawk si lo chuan a theh phei ta ringawt a, chutah Sangtei ke zawnah tak chuan a la tla zui. A lam pana lo phei mek, Sir John-a chuan Sangtei ke bula paper chu a hmu nghal chat bawk.

Sangtei chu va panin a hma zawnah chuan a ding a, "SAngte, stand up." a han ti a. Hrilhhai tak chuan Sangtei chu a ding a, Sir John-a chuan a ke bul chu a kawk a. Sangtei'n paper them a hmuh chuan a thin a phu nghal dup dup mai, Nanu-i te ta a ni tih pawh a hre nghal. A chil a lem dawk a, "Sir, ka ta a nilo." a ti zawi sap a.

Class pum chuan an en thap mai, Sir John-a chuan paper chu chharin a han en chiang a. A student ngainat em em leh a duat em em, thiam thei tak leh exam apianga top 3 ni zat zat thin Sangtei hand writing a ni lo tih chu a hre nghal chat mai. SAngtei bawk chuan, "Sir, ka ta a ni lo tak tak." a lo ti leh a.

Sir Johna chuan Sangtei test paper-a  a hand writing chu a zu en a, a in ang lo chiang hle bawk. Chutih rual chuan a class te hi a hrechiang thawkhat bawk a, tu hand writing diktak nge a ni tih pawh a hre vek bawk. Sangtei chu a en a, "Ka hria alawm, i hand writing a ni lo. I thu thei ang, chuan... hei hi tu ta nge a ni tih pawh ka hria." a ti nghal zat a.

A melh kual hlawm a, Maengi bulah chuan ava kal a. Paper them chu dawhkanah chuan a dah a, "Maeng, he hi i hand writing a ni tiraw?" tih pah chuan a test paper chu a en chiang nhgal a, hand writing pawh a lo inang chiah chiah mai. Maengi chuan tih ngaihna a hre lo, "Yes Sir." a ti zawi sap ringawt a.

Sir John-a chu a thaw deuh hak a, "Ka hmu daih tawh che u, mahse ka hmu lo der char char che u. I copy hmasa ber a, tichuan Lucy i va pe phei lai pawh kha ka hmu hman reng. Chuan Lucy-i hian Nanu-i ava pe leh a. Sangtei ke bulah i va vawm phei a ni tiraw, a dik em?" a ti ta hmiah hmiah mai le.

Nanu-i te thian thum chuan insawifiah ngaihna reng an hre lo, an pathum chuan a din tir a. "Class lak lai pawhin a beng chheng chheng, a nui ring ring in ni. Zirtirtute runluih zawng leh luhlul zawnga awm hrat ber ber in ni bawk, in hahthlak khawp mai. Tun tum test bikah hi chuan ka ngaidam che u anga, in mark erawh ka cut ang. Mahse test zawh veleh Principal roomah lo kal ang che u, in pathumin." tiin a hau zui a.

Class test chu an chhunzawm leh a, Sangtei a thaw huai mai. Mahse a ruilru chu a nuam chiah lo, zawi muang chuan Nanu-i te lam chu ava hawi a. An ni lah chuan an lo melh rum nasa mai, a mitmeng atang chuan a kawchhung zawng zawng nena hai fai sak vek duh hmel hi an pu a, Sangtei pawh chuan a hlau ru ve khawp mai.

**********************************

Chutih lai chuan school ah vek chuan Ethana chu a nau fee pe tur chuan a lo thleng ve chiah a, office ah chuan a lut a. Zirtirtu pakhat hi a lo awm a, "Enge i duh le?" tiin a lo zawt a. Inthlahrung tak hian Ethana chuan, "Sangtei u ka nia, sangtei school fee thla hnih chhung ka pe tawh lova. Kan tlai deuh va, chumi pe tur chuan ka lo kal a." tiin a chhang a.

Zirtirtu chuan polite tak hian, "E, a nih chu. Lo thu rawh, an class teacher chu Miss Kate-i a nia. Sangtei chhungte an lo kal dawn a tia, min hrilh lawk alawm. Thil sawipui nghal ka duh an lo thlen hunah min lo call rawh atia, class a la mek a, kan call lawk ange." tiin a lo chhang a.

Reilote hnuah chuan Miss Kate-i pawh chu a rawn thleng a, Ethana nen chuan an thu dun a. Ethana chuan envelope chu pe in, "KAn tlai deuh va, a pawi ka ti khawp mai. Min lo hrethiam hram hram teh, tunlai chu kan chhungkua sum lamah kan harsa deuh va." tiin ngaihdam a dil nghal mawlh mawlh a.

Miss KAte-i chuan pawisa chu a han chhiar a, "Awle, ka dik thlap e. Engpawh nise, thianpa. Fee hi a hun diktaka pek thlap thlap hian buaina a awm lo ber a, harsatna neih chuan sawi tur kan ti thin a. Sangtei hian engmah a sawi si lova, a ngawisan reng bawk si nen. I lo kal hial a ngai a, a pawi ka ti khawp mai." tiin a hrilh a.

Ethana chuan a lu a bu nghauh va, "Ka hrethiam alawm, kan tihpalh tak zet zet a ni. A lehpekah chuan a hunah tak pek kan rawn tum tawh ang, min hriathiam avangin ka lawm takzet." tiin a lo chhang a. Miss Kate-i chu a ngawi vang vang a, "Sangtei hi zirlai fel leh nungchang mawi tak a ni a. Lehkha a thiam thei a, chuvang chuan nangpawhin tha taka i zirtir a ngai ania." tiin a chah zui a.

******************************************************

Ethana chu school office atang chuan a chhuak a, cooler bula Sangtei tui lo inzo chiah chu ava hmu a. Sangtei chuan a rawn hmu ve bawk, "Ehe U, in zo tawh ami?" tiin a lo zawt a. Ethana chuan nui sang chung hian, "Aw fee pawh ka pe fel tawh e, enge vawiin test i an? I ti tha em?" tiin a lo zawt ve nghal a.

SAngtei chu a nui deuh suk a, "Um, ti tha a nimai. DAwr ah tunge awm a, i hawng lo tihna em ni?" tiin a lo zawt veleh a. "Hawng e, i u May-i a chawl a. Ka nghah tir, mahse chhuahna tur ka nei atia, ka va thlak leh vat chu a ngai." tiin a chhang a. Sangtei pawh chuan nui chung hian, "Kar leh ah chawlh vawi hnih lai kan nei a, ka lo nghak ve ang." a han ti ve leh a.

Ethana pawh chu nui sukin, "A nih chuan ka kal phawt ange aw, ban veleh khawiah mah peng kawi lovin i lo haw tlang dawnnia." tiin a chah a, a kalsan ta a. Sangtei pawh chu class room-ah chuan a let leh a, mahse kil khat atang chun an unaua an inbe lai chu an lo en reng a lo ni.

Ethana kal liam chu Lucy chuan a en vang vang a, "Awi a han dan kha a mawi tawk chiah, a sang reuh si. Lalsangzuali chu a hmel en aiin u ava nei chhe lo reuh e, ka vei nghal riau mai." tiin a lo khi sung a. Rum zet hian Nanu-i chuan a lo melh a, "I lerh lutuk, chutiang sawi hun a ni lo. Lalsangzuali saw chu ka huatna a rei tawh, inla fel extra lutuk mai." tiin a lo khak zek mai.

Maengi pawh chuan thinrim hmel tak hian, "Amah vangin Principal pawn min hau hrep a, anu te koh ala ngai dawn zui. Ka va han beng chak tak, Sir John-a lah hi a tlawn thiam ropui si." tiin a lo phun ve nuah nuah bawk. Inla misual boss tak hian Nanu-i chu a han nui der var var a, "Ala hre dawn khawp alawm, ka la sawisa khawp ang." a ti khur khur mai.

*********************************************

May-i pawh bakery ah chuan dawr chu a lo nghak ve mek a, inhralh a har ngang bawk aniang, a reh thuap mai. A phone chu a khawih melh melh a, rawn lut thawm a hria a. En mang lo chuan, "Lo leng rawh, enge i duh le?" tia a han hawi chho chu a tawng tawp chiang kher mai.

A rin loh lutukin DAvid-a bawk a lo ni a, an mood a off nghal rawih rawih mai. David-a lah chuan a la rawn nuih vel zui, "Ehe...he hi em ni bakery dawr kan nei i tih thin chu?" a la rawn ti lut ham ham zui. Phur lo tih hriat tak hian, "Lo leng thu rawh, enge i duh ve mial a?" tiin May-i chuan a lo zawt let a.

DAvid-a chu a bul hnai setah chuan a va thu kher a, "PAwn atang khan ka hmu che a, mak ka ti lutuk a. Mahse bakery in neih thu i sawi thin kha ka hrechhuak zawk a, ka rawn lut a nih hi." tiin a chhang a. May-i chu a nui lui leh suk a, "Anih chu." tih ringawt chuan a chhang a. David-a chu a han thu tha te te a, "Nilengin em ni i nghah dawn?" tiin a han zawt leh a.

En pawh en lo chuan, "Aih, chawhnuah ka u in min rawn thlak ang." tiin a chhang leh hmuk mai. David-a chuan sana chu a en a, "Hei, dar 1 chu a ri mai dawn a. I u chu a lo thleng tep tawh tho ang tiraw, chawhnu lam chu coffee indun chu kan ti ve tawh dawn em ni? I hman angem?" tiin a sawm leh ta talh mai.

Maya-i chuan a ning takzet, "Coffee i in duh chuan kan zuar reng alawm, no khat cheng 10 ania. Lei la, ka bulah hian in la, a in ang reng alawm." a ti deuh zek mai a. Mahse DAvid-a chu a la tlawm duh chuang lo, "Hmmmph, Thantea chu nise i aw ran dawn tehreng nen. Keichu i buai thu hlir min hrilh a, ka hlauhawm viau em mawnile?" a ti nuah nuah a.

Lungawiloh hmel tak chuan May-i chuan a melh deuh hraw a, "Enge Thantea chu i rawn sawi chhuah kher a?" a ti deuh khur khur mai. David-a chu a nui hak hak a, "Thinrima sawi ka ni lo ania, engtin mah ka tina dawn hleinem che. Ka hmeichhe ngainat zawng i nia, chhuah pui ve che ka chak a nimai alawm." tiin a lo chhang leh a.

MAhse MAy-i chuan a chhang lo, a ngawi reng a. Chutah David-a bawk chuan, "Kan inhriatna pawh a rei ve tawh a, thian anga han chhuah dun ve kha ka chak a. Chutia i thin tih rim pawh ka tum lo, chubakah mi hlauhawm ka ni hleinem." a tih lai chuan kawngka chu a rawn inhawng a, mi pakhat hi a rawn lut a.

Chupa DAvid-a'n a han en chu a tawng lai chu a tawp chiang kher mai, phawk hru hian a en a. Ethana a lo ni a, May-i pawhin a u a hmu chiah chu a thaw huai mai. Ethana chuan DAvid-a a hmu chiah chu a melh rum leh ngang mai, a chhan chu a hma pawhin an in kawta May-i a lo enthla ru reng lai a hmuh tawh vang a ni.

DAvid-a pawh chuan May-i u a ni tih hre hauh lo mahse, Ethana chu a hmuh hnu a nih avang chuan a zam ru hle a. Chutah May-i'n, "Ehe Ka u, i va rawn let leh hma si ve a?" a lo ti chiah phei chuan a hlauhna a ti zual ngei mai, a thlan a tla deuh nghal bawrh bawrh a. A ding deuh thut a, "E.. hei... hei hi maw i u chu. Aa, englo... ka kal tawh mai ange, nidangah kan inbe leh dawn nia." a ti bah deuh nuai a.

Hmanhmawh tak leh Ethana melh deuh zuk zuk pah chuan a chhuak nghal vat a, Ethana chuan a en zui reng a. May-i chu a thaw huai a, "Awwii ka van lawm tak, i lo thleng hma hlauh chu. Kha mihring pa ka hne zia kha, ninawm lutuk." tiin a ang nghal bawrh bawrh mai. Ethana chu a thu a, "Tunge a?" tiin a zawt a.

"Painting school ami, ka thawhpui a nih kha. Min hel reng a, chhuak dun ang. Coffee in ang, chuti khati a ti reng a. Chhuanlam siam tur pawh ka hre zozai tawh lo, mi hi an atchilh a ni tawp mai." tiin May-i chuan a lo chhang a.

Ethana chu a khi suk a, "Mawihnai taka hnarin awmzia a nei lo a ni maw, nge a hrethiam lo zawk." tiin a han fiamthu pah nghal a. May-i chu a nui huk mai, "A hrethiam thlawt lo niin a lang, a hahthlak ania." a lo ti ve bawk a. Ethana chuan a lu a han bu nghat nghat a, "A tih buai leh che chuan min hrilh hre vat dawnnia." a ti chang deuh fak a.

Chuti khawp chuan a u in a veng a, a ngaihtuah hle a ni tih a hriat nawn leh chuan May-i chu a lawm rilru kher mai, a hma zana a tawngkhum dan te avang chuan a inthiamlo hnuhnawh hle a. Mahse engmah chu a sawi chuang lo, customer ho lo kal Ethana a be lai te chu a eng ngawih ngawih mai.

*********************************************

Tlai a ni a, Sangtei chu ke in an in lam pan chuan a haw hnak hnak a. Mahse a hnungah chuan Nanu-i, Lucy leh Maengi te chuan an zui ru mek tih a hre hauh lo. A kal zel a, Nanu-i te thianho pawh chuan bihruk deuh zuk zuk pah chuan an zui zel a. Chutah kawng reh deuh lai an thleng ta tih ah chuan an va pan ta, Sangtei pawh chuan a hnunga pen thawm chu a lo hre ve chat bawk.

A leh hawi a, Nanu-i te chu a hmu ta. Hmuhsit hmel tak hian Lucy chuan, "I va hlim awm vel ve a, Lalfelfamkim em em biknu." a han ti deuh kher a. Sangtei chu a ding a, "Enge in duh a?" tiin a zawt a. Nanu-i chuan thinrim hmel tak hian a en a, "Nang mihring inla fel leh a ruka lerh lutuk vang hian Principal-i'n min ankhum hrep tih i hria em? Nangmah vangin kan nu leh pate naktukah school ah an rawn kal a ngai bawk, khatia Sir John-a hma a min tih mualpho vel kha a nuam viau ami?" tiin a vin hrep mai a.

Sangtei chu a lungawi lo kher mai, "Enge keimah vang a nihna?" a lo ti let ve deuh hmak a. Nanu-i chuan ngeiawm tak hian a nuih vel a, "Nangmah vang a ni lo maw? Sir John-a laka i mark that nan hian eng eng emaw chu i ti chiang alawm, kan hai bik lo. A rukin i tlawn, in inzui hial lo maw?" a ti deuh kher a.

Sangtei pawh a thinrim ve ta, "Khati kha chuan min ti kher suh aw...Nanu, i pawi ka sawi lo. Test naah khan in entawn a, Sir khan a man mai che u a ni. Ka ke bulah i la rawn vawm phei zui a, mahse engtin mah pawh ka tih ve loh che hi...i rilru a va chhe ve, hremna in duh loh te chuan tha takin entawn ngai lovin zir ve mai te che u." tiin a chhanglet ve ta sak sak mai. 

Nanu-i thinrim chu a insum zo ta lo, "Eng a? Tha ber ah i inngai animaw?" tiin a vin hian a vin tuar tuar tawh mai. Mahse zai sap hian, "Inngai love, i ngaihdan diklo kha thlak rawh ka tihna mai ania." tiin Sangtei chuan a lo chhang ve leh a. Nanu-i chuan va panin, "Khanglang chuan le.." tih pah chuan ben a tum ta mai a.

A kut chu lek kangin a tin uai hman a, Sangtei hlau pawh a lo maimitchhing tawp. Mahse Nanu-i kut chu ban tha chak tak hian a lo man chat mai, Ethana a lo ni. Rum em em hian Nanu-i chu a melh a, "Ka nau hi lo tibuai tawh suh ang che, anih loh chuan i inchhir viau ang." tiin a thinrim lutuk chu a khur dar dar thei hial a.

Nanu-i chuan Ethana chu a melh rum ve a, "Ka ban hi thlah nghal rawh." a han ti ve hlur a. MAhse Ethana chuan a thlah lo nasa mai, "Ka sawi chu i hria em? Min chhang rawh, vawikhat pawh i lo tibuai leh a nih chuan hmeichhia i nihna theihnghilh thak khawpin ka sawisa ang che." a ti leh khur khur a.

NAnu-i pawh chuan a hlau ve deuh ta, a thiante pahnih chu puihna beisei tak chuan ava en a. Lucy leh Maengi lah chuan ngawi reng hian an lo en ringawt, "Min... min thlah rawh." tap lek lek chuan a han ti leh a. Ethana chuan a aia nghet chuan a th(r)am a, "Min chhang rawh, anih loh chuan i kut ruh hi ka ti tliak ang." a ti ta hial mai.

Nanu-i chu a mittui a parawl kuang tawh a, "Awle, a tha alawm. Ka tibuai tawh lovang, min thlah rawh." a ti leh a. Ethana pawh chuan a thlah ta, lungawi lo leh zak tak chung chuan Nanu-i te thian ho chu an kal ta a. Ethana chuan a nau chu ava en a, a lo tap deuh pur mai. A va kal hnai a, "Hlau suh, i u ka awm alawm." tih pah chuan a kuah a.

Sangtei chuan tap chung hian, "Ka lawm e, U...engkimah ka lawm e." tiin a mittui a tla zawih zawih mai. Ethana chuan duat tak hian a samah a chul sak a, "Lungngai suh, i himna chu ka mawhphurhna alawm." tiin a lo hnem a. Sangtei pawh chuan chuti khawpa a u in a ngaihtuah zia leh a hmangaih zia a hmuh chuan a lawm takzet, chutiang khawpa unaupa rintlak a nei chu vannei a inti thar leh hle bawk.

******************************************************

Sangtei chu inchhungah chuan a lut a, Lawma chu inah chuan a lo awm der tawh a. SAngtei chu a tah a la chhuak deuh va, "Ehe Au LAwmte, in bang hma ami a?" tiin tah aw deuh tuau chuan a zawt a. Lawma chuan a lo hai mawlh lo, Sangtei chu ava melh nghal. A tahna a la rei lo nen, sangtei mit sen rum leh bui chuk mai a hmuh chuan a tap zo hlim a ni tih a hrethiam nghal a, "Tinge a? I tap elaw?" tiin a zawt nghal a.

Sangtei chuan lehlam a hawi a, "Tap lo ve, ka mit ana." tih pah chuan fridge chu hawngin tui a in khawlh khawlh a, mahse Lawma chuan a awih hauh lo. Ava pan a, "Sawi mai mai teh, tunge vel tap che a?" tiin a kut chu a han hum ruh nghal em em ringawt a. Sangtei chuan dawt a sawi vel peih ta lova, Nanu-i te thian hovin an tihdan zawng zawng leh Ethana'n a rawn chhan dan zawng zawng te chu a hrilh ta vek a.

Chutah le, Lawma chu a sa kher mai. A kut a hum ruh a, a insehruh teuh va. A vei kual ang thuak thuak a, "Khanglang hlawm chuan le, tute nge? Tu fate nge? Naupang te te si..zirtirna pek hlak an ngai a nih chu." a ti lung lung mai a. SAngtei chuan lo khapin, "A tul lo, hun kal tawh alawm. I a thei pung pung lutuk, va tih chhunzawm angai tawh lo." a lo ti nghal vat a.

Mahse Lawma chu a lungawi thei lo, "Khatia i tih zel chuan an zuam tulh tulh mai ang che, an nu leh pa te tal chu ka va zawng chhuak awm e aw? Nanu-i maw a hming i tih kha?" a han ti leh pung pung a. Chutih lai chuan Ethana chu inchhungah chuan a rawn lut a, "Engati pung pung nge a, Lawma?" tiin a zawt nghal a.

Lawma chuan Ethana chu va panin, "SAngtei tibuai tute saw ka ngawihsan mai mai dawn lo, kutthlak an tum tihna ania. Va chhan hman lo ta la, na a tuar dawn asin." tiin a lo thinrim nasa mai a. Ethana chuan zaidam tak hian, "A mawl thlak emai, chutia va tih chhunzawm angai tawh lo. Thinrima va an vak khan kan mualpho thei, hun kal tawh alawm." tiin a lo hrilh fiah a.

Mahse LAwma chu ala pawr nasa mai, "Hetia kan inngaihdam zel vang alawm min itsiktute hian min zuam tawlh tawlh ni, ka nau hi kutthlak theihna dan an nei lo hrim hrim." tiin a la phun nasa mai a. Ethana chuan chiang fek fawk hian, "Kut an thlak lo, chuan nangpawhin anni saw kutthlak theihna dan i nei bik lo. Chubakah mipa i nih kha, insum rawh. Sangtei pawh hei a him a, tleirawl lai te chuan tiangte chu a thleng chawk alawm." tiin a hrilh leh a.

Lawma pawh chu a inbeng dai ve ta deuh va, a han thaw deuh halh halh a. Sangtei chu enin, "BAwihte, an tihbuai leh che chuan keimah min hrilh hmasa ber tawh ang che." tiin a roomah chuan a lut ta daih a. Sangtei leh Ethana chu an inen deuh vung vung a, an nui rual dun huk mai.

SAngtei pawh chu a room lamah chuan a phei a, a inthlak a. A u Ethana chu a tan chuan a hlut zia te chu a ngaihtuah a, a hlim kher mai. Chutiang bawkin BAkery lama dawr la nghak mek, MAy-i pawh chuan chhun lama a u in David-a laka a rawn chhanhim dante leh, 'A tihbuai leh che chuan min hrilh vat dawn nia.' tia a hrilh lai te chu a bengah chuan a ri nawn awn awn a.

Lawma erawh a u thatna leh ngaihtuahna a la hmu thiam ve chiah lo thung, a thiante lahin a diklo zawngin an lo sawi pui ve chhen thin bawk nen. Chutih rual chuan Ethana pawh a rilru a hah khawp mai, an inhralh chhe tulh tulh mai bawk si nen. A pa thuthiam chu a zah viau, mahse Pu Jacob-a offer chu a theihnghilh thei bik lo.

Sangtei fee atan tiin an inhralhna awmchhun zawng zawng deuh thaw chu a sen ral a ngai leh ta bawk si nen, a unaute chu mi nau te ang an phak loh a hlau ve bawk si. Hei vang tak hian nupui pawh a neih ngam loh phah a, chubakah Jenny, a middle school crush chu ala duh reng vang a ni ve pakhat bawk.

A ipte atang chuan Pu Jacob-a'n a business card a pek chu a la chhuak a, a en vang vang a. Pawisa a offer zat te chu a hrechhuak a, pawisa tam tham tak a ni tih chu a hre ve reng. A phone la chhuakin call chu a han tum uk a, mahse a pa hnena a thutiam chu hre chhuak lehin car chu a hum khawr vek a, a paih ta daih a.

************************************

TO BE CONTINUE