SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 2

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 2

***************************************

Zan dar 6:30 a pel tawh a, Sangtei, May-i leh Lawma te chu an unau thum chuan zanriah an kil mek a. Ethana erawh a lo la haw lo, May-i chuan a nau Lawma hmai a hliam chu a en leh vang vang thin a. LAwma erawh ngawi rengin chaw chu a ei mial mial a, "Lawma, engtin chiah maw i tih nat a, i hmai chu?" tiin May-i chuan a han zawt a.

Lawma lah chuan nin hmel tak hian a lo chek hlur a, "Ka tlu ka tih mawlh mawlh kha, ka sawi hnem tawh." a lo ti nghal hlur mai. May-i chu a khi suk a, "KA awih nek love, insualnaah te hian tel tel ve suh, nep awm ropui si." a lo ti ve ngat mai. Lawma chu a thinrim hmel kher mai, "Ka tlu ka tih chuan ka tlu a nimai, tluk vang nilo se ka sawi em em ang." tih pah chuan a kham nghal deuh hmak a.

A room lamah chuan lutin kawngka a khar ri leh bur mai, a unaunu te pahnih pawh chu an kham ve nghal titih a. Hmun hma vel an tih fai lai chuan Ethana chu a rawn haw a, "I van rei em em, khawnge i kal a?" tiin May-i chuan hmun phiah pah chuan a lo zawt vat a. Sangtei pawh chuan thleng lo laksakin, "Chaw ei ka siam nghal ang che aw?" a lo ti ve bawk.

Ethana chuan a kut a sil nghal sawk sawk a, "Angai lo, keimahin ka lo insiam ve mai ang. In tih lai kha tih chhunzawm zawk rawh u, chuan khawnge Lallawmzuala hi a awm?" a han tih zawm nghal zat a. "Room ah." SAngtei chuan a lo ti nghal vat a. Tichuan Ethana pawh chuan chaw chu a ei ve ta a, "Min la chhang miah lo, khawiah maw i kal a?" tiin May-i chuan a han zawt nawn leh a.

Chaw bar mawlh mawlh pah chuan, "Bakery ah thil ka theihnghilh a, ka va lam leh a..ke in ka rawn haw a, ka rei ta deuh a nih kha." tiin Ethana chuan a chhang a. Chutih lai tak chuan Lawma chu inchei angreng deuh hian a room atang chuan a rawn chhuak a, "U, ka chhuak lawk dawn ania." tiin chhuah mai chu a tum a.

Mahse Ethana chuan lo ko dingin, "Khawnge i kal dawn?" a lo ti nghal khur khur mai. Thawk deuh hak pah chuan Lawma chu a ding a, "KA thiante nen kan inkawm dawn, engmah assignment tih tur pawh a awm chuang lo." tiin a chhang a. En miah lo chuan Ethana chuan, "Kal lovang, chhuak suh." a lo ti nghal hmak mai.

Lungawi lo tak chuan, "Ka lo haw har dawn hleinem, kar tluanin zan chhuahna hun pawh awm lovin in lamah ka buai a, assignment neih loh zan ania, ka chhuak harh ve lawk duh alawm." tiin a phun nuah nuah a. Ethana chuan zawi te hian, "Chhuak lovang." a tih ringawta chhan pah chuan a kham a, a kut chu a silfai a.

LAwma chu a lungawi tawh bik lo kher mai, "Intih thawven, chhuah harh te pawh ka duh ve a...enge maw i phal loh tlat bik thin le?" tiin a aw key chu a san ve lek lek mai. Chutah Ethana chu a sa zak mai, ava pan hnai a. Vin lek lek hian, "Chhuah thawven a? I thawven em avang a nih kha i mit pawh a duk chur ni, a hnektu che pawh ka hria. Manuna tiraw? College ah, ka hre vek, miin min hrilh vek." a ti deuh khur khur mai.

Lawma pawh chuan mak a ti angreng hle a, "Ihh..Biaka kut a thlak a, ka chhan a nimai lawm. A hming pawh ka lo hre reng reng hleinem, kut pawh ka thlak let ve lo hrim hrim. Chubakah...ngaihtuah em em rual pawh ka ni tawh lo, tlangval ka ni ve tawh, ka inbuaipui thei." tiin a lo chhang ve leh a.

Ethana chuan a lu a thing a, "I chhuak lovang, Lallawmzual. Kha aia na kha i tuar thei tih hre rawh, chubakah zaninah chhang ur tur a awm. Kan sumdawnna neih chhun a nih hi, kan inhralh theih loh lai a ni bawk si. I u te hi pui rawh, kei pawh ka indaih loh em hi." tiin a phal ta tlat lo mai.

LAWma chu a thinrim bawk si, a u chu a hlau ve deuh bawk si. A insehruh nasa kher mai, "Anih chuan...tiang hian jail ang maiin inah ka awm reng dawn tihna mi, naupang pawh ka nih tawh bik loh hi?" tap lek lek chuan a han ti a. Ethana chuan a han en vang vang a, "Naupang i la ni ka ti reng reng lo, mahse kan chhungkaw tan i mawhphurhna i hriat a ngai." tiin a lo chhang a.

Lawma chu a ngawi thei mai bik lo, "Ka u i ni tih ka hria, mahse maw.... i lak atang hian zalenna chhe te tal chu ka mamawh ve a ni, zan khat lek ka len chhuah chu enge, a pawi viau a mi?" tiin a han ngen leh hram a. Ethana chuan thawk a han la hluai a, "I tih tur i hriat fiah hunah leh i taksa leh kum chauh ni lo, i rilru a puitlin hunah zalenna chu i nei em em ang." tiin a lo chhang leh a.

Sangtei leh May-i te unau chuan ngawi reng hian sitting room lam atang chuan an lo en reng ringawt a, Lawma pawh chuan a chhang let tawh lem lo. Thinrim ru tak chung si, a u chhang let ngam tawh bawk si lo chu lungawi lo tih hrait tak chuan a room lam chu a pan a, kawngka chu a khar ri leh bur mai.

Inchhung boruak chu a reh nghal diak a, "Mahni room kawngka khar rik bur bur bak thiam dang nei lo." tiin Ethana chu a phun sup a, a chaw ei thleng chu amah chuan a sil a. SAngtei chu va kalin, "Khawi u, keiman ka lo sil ang." a rawn ti vat a. Mahse Ethana chuan a lo phal lo, "Chhang ur tur a tam, lo inbuatsaih zawk rawh u." a lo ti a.

****************************************

Ethana te vengah hian sumdawng hausa deuh mai, Pu Jacob-a te chhungkua chu an rawn awm thar a. Project puitham tak, dawr thar tam tak hawn a, a company tih zauh zel a duh vanga ram lei tum a rawn awm a ni deuh ber a, location tha chu a zawng kual nghal chiam a. Zing dar 9 leh a chanve a ni a, Pu Jacob-a leh a assistant Jessica-i te chu location enin an kal kual mek a.

Jessica-i'n information kimchang a pek mek lai chuan ral khata Ethana te bakery, Sunrise Sweets tih intar vang mai chu a thlek deuh reng a. A aw a han thian kharh kharh a, "Jessica, enteh. Sawlai a, Sunrise Sweets tih bakery saw i hre ngai em?" tiin a zawt deuh thut mai. Jessica-i pawh chuan ava en ve a, "Aw hria e, Pu Marema te dawr a nih saw. A rei tawh mai, a lun ve angreng lutuk asin." tiin a lo chhang a.

Pu Jacob-a chu a han ngawi deuh vang vang a, "A hmun hma vel saw ka awt khawp mai, chubakah a remchang ka ti. Mi veivah tamna lai ania, office bang emaw, school leh college zirlaite haw kawng, a kawn lai tak a ni bawk si nen. Kan company Blackwood Enterprise hmingin bakery aiah sawn Cafe emaw restaurant siam nan a tha dawn em asin, i ti ve lo mi?" a han ti ban deuh charh charh a.

Jessica-i chu a nui deuh suk a, "Tha ti ve tho ve, mahse i chiang amaw? Bakery dawr satliah mai ania, a dawr lah a te ve angreng sia?" tiin a lo zawt let a. Pu Jacob-a chu a han khi deuh vun vun a, "Bakery dawr ai mah saw chuan maw, a hmun hma saw a ni. Ka future plan engkim ka hmu nghal thei hialin ka hria, chubakah a area saw a zauh belh theih dawn bawk a." tiin a chhang a.

"KA hrethiam e, Sir. Tun aia hriat chian ka lo tum ange, hmun dang kan en leh hrim hrim duh angem?" tiin Jessica-i chuan a han zawt leh a. "En dawn e, mahse saw saw chu ka hual angah ngai tawp rawh, a neitute lam biak pawh dan tur lo ngaihtuah bawk ang che." Pu Jacob-a chuan a ti leh a, an kal ta a.

**********************************************

May-i thawnhna painting school lamah pawh chuan MAy-i chuan a student te chu an lemziak a lo enpui leh mek bawk a, a student te zinga mi, nutling lam deuh tawh, Pi Thiangi lem ziah chu a va hmuh chuan nalh a ti angreng phian a. Va kal hnaiin, "Pi Thingi chu hma i va sawn ve, chhum pawh kha a tak a ang tawp." tiin a han fak vei luam a.

Chutih lai chuan Thantea, a thawhpui chu a rawn lut a. May-i chu va panin, "Khai a, i zirtir nasa bawk aniang, i kutzung tang zawng zawng pawh i chei tel vek animaw?" tiin a rawn fiam a. May-i chuan Thantea a hmu chu a lai lek lek mai, a chhan chu a thawh tirh atanga hmeltha a tih tawh kha a nia, a lo nui deuh sen sen a.

A kuta rawng kai chu a apron hren laiah chuan a tat deuh nawk nawk a, "Lal Thante, han ti ve chhin la i hre mai ang, t(r)an a nat tak tak tawh hi chuan kan hmaiah te thleng hian a kai nuai zel mai mawle." tiin nui chung chuan a lo chhang a. Thantea chuan a han nui deuh sak a, "Min zirtir la, private-in tuition lak dan te a awm lo mi?" a han ti vel deuh kher a.

"Hmmm....inla zei vel, i talent kha midang bulah va hmang zawk teh."

"Aw..mi kan inla zei ve a. Anih leh dinner ei chhuah dun te, sap ho style in?"

A ruk tak chuan May-i chuan a chak takzet, mahse han aw nghal tawp chu a zak ve deuh bawk si nen. Za lo taka nui lui suk chung hian, "I mi sawmna ah chuan ka lawm viau nangin, nidangah a nimai aw...kan chhungkua kan buai thei sia, min hrethiam mai teh." tiin a hnial lui a.

Thantea'n a tawng leh tur chiah chu zirlai zinga mi chuan, "Miss May, helai hi min lo chei that sak lawk, ka ti chhe vekah tih ka hlau tlat." a rawn ti a. May-i pawh chu ava kal a, a va chei that sak a. Beidawng rilru deuh tak chung chuan Thantea pawh chu a chhuak ve leh mai a, May-i chuan a sana chu a han bih a.

"Le... duhtawk phawt ang u, minute 15 vel tal chawl ila, chuan kan tan leh nghal dawn nia." a han ti lauh lauh va, amah pawh chu class room atang chuan chhuakin bathroom lam a pan a. A kut chu a sil fai a, a chhuak leh chiah chu kawngka bulah chuan DAvid-a a lo ding run mai, a phu nasa em em lehnghal.

David-a lah chuan hnai set sawt hian May-i chu a en a, "May, nimin khan nidangah i tia, vawiin hi nidang chu kan nih tir thei tawh mai angem?" tiin a rawn sawm leh ta a. May-i chuan en pawh a en tha peih lo, "Aa...vawiin pawh ka hman chuang lo, min hrethiam rawh, ka buai emai." tiin a hnial leh a.

David-a chu a han ner nung a, "Amak e, May... coffee reilote indun a, han chhuah dun ve zawk kha a nimai a. Kan titi anga, a rei dawn hleinem." tiin a din hnaih leh deuh hret a, May-i chu a tawlh hnung ve zel bawk a. A thinrim chu insum hram hramin, "David, ka thei lo ka tih kha. Ka buai, chubakah chutiang mood ah ka awm rih lo." a han ti deuh hmak a.

David-a lah ala tlawm duh lo, "I buai reng mai a, nang hi zawng. Han chawlh hahdam ve chu i mamawh a ni, vawiin chiah a nimai." a han ti leh hram a. May-i chu a insum zo tawh lo, vin hrep mai chu a duh tawh a. MAhse chutih lai chuan Thantea chu a rawn kal thut mai, "Ehe, May.. hetah animaw i lo awm, ka zawng char char che a. Hawh, canteen-ah chuan zu kal ila, i hman nghal em?" a rawn ti a.

May-i chuan a tir chuan a hrethiam mai lo, mahse Thantea chuan a rawn chhanhim a ni tih hrethiam leh nghal vatin a nui sak a. Ngeiawm deuh hian David-a chu mit sir zeuh pah hian, "Aw nia, ka hman alawm, kal ila." tiin Thantea banah chuan a kuah lui deuh kher a. Thantea lah chuan DAvid-a chu a en a, "Enteh thianpa, May-i hi maw... tunlai chu a chau thei lutuk a, awm tir ve mai mai teh. HEi, hna chungchang sawi tur kan ngah tlat, kan kal phawt mai aw.." a han ti ve leh deuh kher bawk.

David-a chu lungawi lovin thinrim viau mahse a insum hram hram a, "Nia, a dik alawm. Anih ka kal phawt ange, MAy... nakinah kan inbe leh dawnnia." ti leh hramin a kal ta a. DAvid-a a kal chiah chu May-i pawh a thaw huai mai, "Ka lawm lutuk ania aw, Thante...ka insum hman lo tep a ni, hepa ka nin zia hi chu." a ti nuah nuah a.

Thantea chu a lo nui a, "Lungngai reng reng suh, ka awm alawm...hehe. Chuan, canteen ah chuan kan kal tak tak dawn tho em?" tiin a han fiam leh zauh va. May-i pawh chu a lo nui ve a, "Min sawm ta sa sa, kal mai ang." tiin a chhang a. An kal ta a, mahse bang phen atang chuan thinrim hmel tak hian DAvid-a chuan a lo la enthla reng a.

*************************************************

Chhun dar 1 a pel deuh hret tawh a, Ethana chuan a customer te chu a lo buaipui mek a. Chutah a la hmuh ngaih miah loh, patling kum 55-60 vel tur ni awm tak, coat suit nena ri zaih mai leh en reng reng pawh a hausa ve tak a ni tih hriat em em mai chu a dawrah chuan a rawn lut a.

Chutia ani ang mi smart tak leh officer pian ruih mai, a dawr chhe te a a rawn lut ve mai chu mak a ti angreng hle. Chupa chu tudang nilovin Pu Jacob-a ngei kha a lo ni a, amah ngei ina Ethana va biak chu a duh a ni. Ethana chuan polite tak hian, "LO leng rawh, ka pu. Enge i duh le?" tiin a lo chhawn vat a.

Nui sang chung hian Pu Jacob-a chuan, "Englo ania, thil sawi pui duh che ka nei a. Ka hming chu Jacob Lalramdinthara a ni a, in dawr chungchang hi ka hrechiang duh a." tiin a lo chhang chu mak tih hmel tak hian Ethana chuan a lo en hu a, "Enga tan maw?" tiin a lo zawt deuh hu mai.

"Business proposition lam thil ania, in manager emaw, a dawr neitu hi ka hmu thei angem?" tiin Pu Jacob-a chuan a lo zawt let daih mai. Ethana chuan zawi sap hian, "Keimah animai, ka hming chu Ethan Lalmalsawma ania." tiin a lo chhang a. Pu Jacob-a chuan mak a ti angreng kher mai, "Nangmah maw? I va la naupan hmel si ve, engpawh nise...thu phawt ang hmiang." tiin a bula dawhkan chu a kil nghal a, Ethana pawh chu a thu ve mai bawk.

"Chuan Pu Jacob, eng thil chiah maw ni a?" tiin Ethana chuan a han zawt nawn leh a. Pu Jacob-a chuan a suitcase chu dawhkanah chuan a dah a, a hawng a. File engemaw zat hi a rawn phawrh a, "In bakery hi in venga ka rawn insawn tirh atang khan ka thlithlai reng tawh a, in chhang zawrh dangdai tak tak te avangin in lun phian a ni awm a. Regular customer tha tak tak leh rinawm tak tak i nei an ti bawk a, i hlawk phian ang ka ring." a han ti te te a.

"Eng tak nge sawi i tum a?"

"I hlawkna tih zual sak tur che in ka lo kal a ni."

"Enge awmzia?"

"I bakery hi lei ka duh a ni, Ethan. Ka sum offer tur che hi maw, i rin aiin a tam ang. I rin aiin ka ngam huai ang, a chhan chu ka tan  in dawr location hi a fuh em a ni. Chubakah i tan leh ka tan hlawkna ve ve a ni dawn a, nakin zelah pawh dawr dang tam tak i hawn theih phah dawn asin."

Ethana chuan a chhang mai lo, file chu a la a. A han en a, Pu Jacob-a pawisa ngam zat a han en chu tam a ti ngang mai, mahse a lu a thing ta tlat mai. Pu Jacob-a hnenah chuan file chu a pe let leh a, "Ka tihpalh ka pu. Mahse he bakery hi chu kan chhungkaw tan a pawimawh takzet a, kan chhungkaw thlah kal zel hian kan enkawl turin kan inhlan chhawng zel a. Chuvang chuan kan tan a pawimawh takzet, min hrethiam rawh." tiin a hnial a.

Mahse Pu JAcob-a chuan mak a ti hran lo, a rindan deuh tho a ni. A nui leh sak a, "Ka hrethiam che alawm, chhungkua chu a pawimawh alawm. MAhse han ngaihtuah chiang teh, he sum hian eng dinhmunah nge a khai kan theih ang che? I chhungte, i unaute ngaihtuah la, an zirlai nen, chuan nangmah thleng pawhin. Kan nunhlui te hi khawvel danglam zelah kan thlak danglam ve zel angai ania, hun kal tawh chu theihnghilhin bul tan that hi a pawimawh zawk asin." tiin a han thlem kual vel a.

Ethana chu a thaw deuh hak a, "I offer chu a tha ka ti takzet, mahse ka chhanna chu aih ala ni tho tho. He bakery hi kan pawisa thawhchhuah ai mah chuan, kan nunna tluka hlu a ni. Kan in ang mai a ni a, chuvang chuan kan hralh phal lo a ni." tiin a pa hnena thu a tiam tawh chu hlen a tum nghet bur mai.

Pu Jacob-a pawh chu a lu a bu nghauh nghauh va, "A tha e, ka hrethiam e. Mahse i rilru i thlak a nih hlauh chuan ka offer hi chu a la ngai reng dawn ania, lo inngaihtuah chiang la. Hun kal tawh chu hun kal tawh ania, thil thar hmanga nun tan that leh te hi a tul chang a awm chawk ania." a han ti leh a.

Nui lui tih hriat tak hian Ethana chu a khi suk a, "Ka lawm e, ka pu. Mahse ka thutawp chu, aih...tih tho a ni, i lo len luh avangin ka lawm e, hun hman nuam le." a ti deuh ngat a. Pu Jacob-a chu a ding hluai a, "Awle, nangpawh le." tiin a chhuahsan a. Ethana chuan a en zui vawng vawng a, a rilru chu a insual ve nasa hle mai.

A pa in chu bakery an chhungkaw tana a pawimawh zia te, an thlah kal zelin an inhlan chhawng zel a nih avanga tih ral a phalloh thu a hrilh lai te chu a bengah chuan a ri nawn awn awn a. An harsa a, pawisa lak luh lamah hma an sawn chak viau thei si lo. A offer kha pawm ta se an unau chuan an nun a inthlak hlawk thei hial ang, mahse Ethana chuan chutiang ngawt chu thil dik a ni theiin a hre bawk si lo.

******************************************

College ground ah chuan Lawma leh Biaka te thiandun chu an thudun a, Lawma chuan a hmai vung chu a khawih a khawih a. A tum leh bur mai chu Biaka chuan a dara va ben thek thek pahin, "Chuan...nizan chu i u chuan chhuah a phal thlawt lo maw? I lo kal leh si lova, kan nghak rei khawp mai che." tiin a han zawt a.

Mood fuh lo tih hriat tak hian LAwma chuan, "Teuh nang, engmah a phal lo. I mawhphurhna hre rawh chuti khati a ti ziah a, kan inhnial hrep phah alawm." a lo ti nuah nuah a. Biaka lah chu a lo nui huk a, "Ninawm duh khawp ang. A thuhrimin tinge hetiang em em a a strict kher le? A ring zo lo che ni ber hian a lang, a inla thu ve mah mah a ni." tiin a thianpa chu a lo vui pui ve nasa mai.

Lawma chu a han thaw hluai a, "Huiham, min ngaihtuah vang tih chu ka hria. Mahse a strict leh lutuk a, Manuna nena kan buaina chungchang te kha a lo hria a. Tunge maw lo hrilh reng reng ni?" tiin a phun leh nuah nuah a. Chutah Biaka chuan a hma zawn chu a en a, "Mi chhe sawi chu koh aiin a hnai, saw enteh, Manuna chu a lo kal mek ania." tiin a kawk a.

Manuna chu Lawma chuan a hmuh veleh chuan a thinrim chu a ding hluai a, "Ka khawih ve hrep dawn mawnile, nimin khan ka inrin loh lai ania, ka lungawi miah lo ania." a ti deuh nghal khur khur mai. Mahse mak tak maiin Manuna chuan a kal pel dun ta daih mai a, hmu awm ang pawhin a lang lo, a hmu lo der a ang mah zawk.

Chutah an mak tihna tih belhchhah turin Manuna mit chu hnekna tih hriat tak hian a duk chur bawk, Biaka leh Lawma thiandun chu an in en hu ringawt a, "Khai, ngati nge a mit kha?" a ti vawng vawng mai. Biaka lah chuan ngei hmel taka khik suk pah hian, "A cho loh val a tawng ve ta a nih hmel, heh... huai ber amaw intih man a hmu a nih saw." a lo ti zek mai.

Lawma pawh chu a khi ve suk a, "Theih patawpa inhnek chawrh chu e, a nawm bik lem loh zia a hre ve tawh chiang viau ang chu." a lo ti ve bawk a. Mahse Manuna mit duk chu a en chiang a, a hmaia hliam ai mah chuan a nasa in a nat hmel zawk bawk. Chutiang khawpa duk nasa a hmuh chuan a khawngaih letling rilru leh deuh va, "A sawisa tupa chu a rapthlak ve hle nimaw." a ti zawi sap a.

"Engpawh chu nise, thildang sawi ang. Chuan...engtik nge niang kan lenchhuah theih ang? Chhuak ru ve thin mai la, i tel lo bik ziah a...a nuam lo lawm." Biaka chuan a han tih chhunzawm nghal leh zuah zuah a, "Kan la chhuak em em ang, mahse tunah rih chuan ka u Ethana hi a hnawk rih tlat. Mark tih that ve deuh phawt angai, muangchangin ka chet angai." tiin a han nui bawk bawk a.

Nui chung hian Biaka pawh chuan, "A buaithlak thin e aw, sakeibaknei in kawl hi a ni ringawt," tiin a fiam zui a. Dar a rawn ri a, class lam pan chuan an lut dun leh ta a. An kal chiah chu Manuna pawh a rawn hawi chhuak ve ngam ta chauh va, rum takin Lawma chu a melh zui a, "I va han chak dawn lo chiang em." tiin ama hriat tham lek chuan a phun sup a.

******************************************

Sangtei chu class roomah chuan awmin class an la mek a, an teacher chuan an zirlai chu a lo explain mawlh mawlh a. Chutih lai chuan kawngkhar chu a rawn inkik karh karh a, "Lawk aw, sir.. Sangtei hi ka be lawk duh a, a rem angem?" tiin an school teacher a strict ber leh thinchhe ber mai, chhuanlam haw deuh mai, Miss Kate-i chuan a rawn dil a.

Sir Puia pawh chuan a lo phal a, Sangtei chu a chhuak ta a. Miss Kate-i chuan class room ruak, an sak that mek ah chuan a inzui luh tir a. A hma zawn takah chuan din tirin a han en ren rawn a, "Sangte, thla hmasa pawh khan ka sawi tawh. Fee i la pe chuang lo ania, a tirah pawh ka ngaidam tawh che. Harsatna kan nei i tia, ka hrethiam che a. Tun thla fee a huna i la pek theih loh chuan pek hun hma ngeiin i chhungten min rawn hmu rawh se ka tia. Mahse tuman min rawn hmu chuang lo, enge awmzia?" tiin a vin deuh khur khur mai.

Inthlahrung tak hian Sangtei chu a kun ngal a, "Sorry Miss, ihh.. kan chhungkua kan harsa zual lai ania, ka u in pawisa chu a ngaihtuah mek a..." a sawi zawh hma hma chuan, "Aw ka hrethiam, tupawn harsatna kan nei alawm. Mahse school dan chu dan a ni, chhuanlam ngai hlir i siam a, i chhungte ka hmuh a ngai. Tunge rawn kal thei ang, a nihin a ni lo reng reng." a lo ti vin leh hlur mai.

Sangtei chuan hrehawm a ti takzet, an chhungkua an harsa bawk si nen fee pek a ngaih thu chu a u Ethana a lo hrilh ngam lawk lo hi a lo ni. Aw khur dar dar chung chuan, "Ka u ka lo hrilh ang, ka u Ethana a lo kal ang." a ti tham tiak a. Miss Kate-i chuan a lu chu a han bu deuh nghauh va, "Naktukah lo kal rawh se, principal rawn hmu se, a harsatna te chu rawn sawi rawh se." a han ti vin leh thak a.

Sangtei pawh chuan hlauh hmel tak hian, "Yess miss." a ti zawi leh sap a. Miss Katie chu a han thaw hak a, "Chuan, tun kar chhunga thla hnih chhung fee hi in pe tla hman lo a nih chuan, harsatna in sawi si lo a nih chuan i kal chhunzawm zel thei angem ka hre lo, chu chu i hre reng dawnnia." a han ti leh a.

Inthlahrung tak hian, "Yes miss." tiin Sangtei chu8an a chhang zawi leh sap a. "Class ah va let leh tawh rawh." tiin Miss Kate-i chuan a chhuahsan a, mahse Sangtei chu a la ding ngawi reng a. A rilru a hah khawp mai, a u Ethana thawh hah zia leh a naute a ngaihtuah zia chu a hre ve reng a.

Mahse buaina tam tak an tawk leh thin bawk nen, a u lah a lo nelawm em em silo nen, a dil hreh thin avang chuan a sawi ngai lo mai hi a lo ni a. MAhse a sawi ngei chu a ngai tawh si, a u Ethana chuan a hauh phah hrep ang tih pawh a hlau rilru kher mai. A mittui chu a hru zeuh va, tichuan class lam pan chuan a let leh ta a.

*****************************************

Tlai lamah chuan Ethana chu ke bawkin a haw leh hnak hnak a, pawisa safe nan tiin inren mi tak a ni bawk a, kea a haw chang hi a tam zawk thin a ni. A kal zel lai chuan kawngsir lam ava hawi chu a ding chat mai, a nau May-i leh a thawhpui Thantea te coffee in dun chu ava hmu a.

Thantea chu tunge a nih a hre ngai lo, a nau May-i thawhpui leh MAy-i ngei pawh ina a duh ruk ve em em a ni tih a hre der si lo. A rilru a nuam chiah lo kher mai, "Tunge sawpa saw? Ka nau saw a tibuai em, nge a thianpa, nge a bialpa? Mipa chungchang engmah a sawi ngai si lova, bialpa a lo nei ru reng em mawni le?" tiin a rilru chuan a inbe nghal mawlh mawlh a.

Mahse May-i hlim taka nui bawk bawk chunga a titi a hmuh chuan a thla a muang deuh, kal leh mai chu a tum a. Mahse May-i leh Thantea te chu an ding a, coffee dawr an chhuahsan a. May-i chu an in lam nilo, kawng danga Thantea nena an kal a hmuh chuan a ngaih a ngam leh ta chiah lo.

A ruk chuan a zui ve ta zel mai a, May-i lah chuan a u in a zui ru mek a ni tih lah a hre der mai si lo. Thantea nen chuan kal pah chuan an titi dun a, "Tun kar Art Exhibit kan neih tur hi i phur em?" tiin Thantea chuan a zawt a. May-i chu a ngawi vang vang a, "Ka tel thei angem ka hre lo, ka u phalna ka lak phawt a ngai ang." tiin a chhang a.

"E taka, i u Ethana kha maw. I sawi hmang hian a ngaihtuah hmel che ka ti, mahse ka bulah chuan i him alawm tiraw?" tiin Thantea chu a han khi vel deuh sung a. May-i pawh chu lo nui ve in, "Nia, mahse a chang hi chuan keipawh hian a ti mah mah chu ka ti ve thin." tiin a lo chhang a.

An tawng chu hre pha miah lo mahse Ethana chu a inthiam lo ta deuh va, a nau, kum 25 lai ni ve tawh, pasal nei rual ve tawh, chutia tlangval nena an lo kal dun avanga a zui ru kher chu a mah mah ve deuh chuan a hria a. A ding a, "KA unau te hi ka rintawk ve angai a ni, an nun ania, ka inrawlh thuk mah mah deuh chuan ka hria." tiin ama hriat tham lek chuan a phun zawi sap a.

May-i chu a enzui vawng vawng a, "Ani chu a nula ve tawh a, bialpa pawh lo nei ve pawh nise enge pawi? Puitling a ni tawh alawm, ka strict em avang hian min hrilh ngam lo te pawh a ni mahna." tiin a rilru chuan a inbe mawlh mawlh a. Lehlam a hawi a, an in lam pan chuan a haw ta a.

********************************************

TO BE CONTINUE