SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 1

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 1

*******************************************

Pu Marema leh Pi Muanpuii te nupa chu car seat hnung lamah an chuang mek a, an titi pah a. Nupa inngeih tak an nih hmel kher mai, an thusawi pah chuan an nui dun leh har har thin a. Seat hma lama mi, motor khalhtu, an fapa Ethana chuan car front mirror atang chuan a han en leh zeuh zeuh thin a, a khi ve suk suk bawk.

A bulah chuan a nau, Lawma chu a thu ve bawk a. Phone a khawih a, a thu ngawi reng a. An motor chuanna hi Maruti 800 ang chi kha a ni a, second hand an lei a ni. Lawma phone chu a rawn ri a, a chhang ve mai bawk a. A bialnu call a lo ni reng mai, an la inhnial vak vak zui. Chutia a nu leh pate awm ve reng laia, a bialnu nen an inhau vak vak mai chu a u Ethana ngaihdan a ni ta vak lo.

Zaidam tak si chuan, "Lawma, vak vak a che... dah la nakinah in inbe zawk dawnnia." a han ti zawi deuh sap a. Mahse LAwma chuan a ngaipawimawh lo, tawngkam mawi lem lo tak chuan a vin hrep hrep a bialnu chu phone atang chuan a vin hrep hrep mai a. Pu Marema pawh chuan a rawn khap ve ta nge nge a, mahse LAwma chu a thinrim tulh tulh zawk emaw tih mai tur a ni.

Chutia apa hauhna pawh ngai pawimawh lo ta chu Ethana thin a sa ve deuh zak mai a, "Lawma, a tawk... phone kha dah rawh." a han ti vin deuh thak a. Mahse sawi loh ang mai a ni, Lawma leh a bialnu te chu an la inhau nasa kher mai. Ethana insum zo lo chuan Lawma phone chu lak hmak pahin, "A tawk ka tia ni lawm ni?" tiin a han vin deuh that a.

Lawma lah thinrim laklawk tawh si nen, "Khawi lo la rawh." tiin chhuhsak a tum a, an inchuh titih ta mai. Ethana motor khalh pawh chu a buai zo ta vek a, an hma ah tak chuan truck lian tak hi a rawn lang thut a, "Bawiha.. kha motor." tiin Pi Muanpuii a rak tuar a, mahse a tlai tawh lutuk, a ri ta bur mai.

*********************************************

A mumang ram atang chuan Ethana chu a harh hlawl mai a, a thlan a tla bawrh bawrh mai. A thaw hlawp hlawp bawk a, a thlan te chu a hru a. Muang chang chuan thawk a han la te te a, a hnuk chu a ulh nghal a ni der mai. A inhnit deuh feih feih a, a phone a han en chuan zing dar 6 a lo pel deuh chiah.

Ethana te unau hi pali an ni a, a upa ber a ni. Tlangval kum 30 mi lai tawh a ni a, nupui ala nei lo thung. A nau chiah hi May-i niin kum 25 mi a ni a, lemziak lam tui em em a ni. Painting school pakhatah zirtirtu hna a thawk ve nghe nghe bawk, mahse private a nih avang pawh a ni mahna, hlawh tam tham tak chu a ni lo.

May-i nau leh chiah hi Lallawmzuala, Lawma a ni a, kum 20 mi niin college zirlai a ni. An naupang ber hi SAngtei a ni a, kum 16 mi niin pawl sawm zirlai a ni bawk. Kum 2 kal ta khan an nu leh pate chuan accident vangin an boral san tawh a, Ethana chuan a naute pathum chu a theih patawpin a enkawl ta a ni.

An khawsak a harsa em em a, an eizawnna awmchhun chu an Bakery dawr te tak te mai chauh chu a ni. Sum lakluhna lian tham tak ni ta si lo chu an khawsa ve tawk tawk a, loh theih lohvin an nu leh pate an boral hnu khan an motor neih chhun pawh chu hralh a ngaih phah hial a ni.

An upa ber a ni bawk a, Ethana chu a chang chuan an hlau ve thin hle. Ethana lah mi thawveng leh thian kawm nuam ti tak ni thin kha a nu leh pa boral atang chuan a mizia a inthlak hlawk a, a tum deuh bur reng a. A tul te ah lo chuan a tawng ngai meuh lo, a unaute chu a mawhphurhna anih avang chuan theih tawp chhuahin an Bakery chu a enkawl chhunzawm a ni.

***************************************

Zing dar 8:30 a ni a, Ethana chu dawr nghak tur chuan a insiam mawlh mawlh a. LAWma leh Sangtei chuan chaw an ei mek a, "Sangte... vawiin school in chawl bawk a, ei thleng vel kha i lo sil mai dawnnia. Tha deuhin in lo nghak ang che aw, hei ka kal dawn ania." tiin Ethana chu chhuah a tum a.

"U, chaw i ei dawn lo em ni, hei ka khawrh kep vek tawh che ania." Sangtei chuan a lo ti vat a. Ethana chuan a sana a en a, "Ka tlai tawh lutuk, in hawn har chi a nilo. Ka ei lo mai ang, ka kal ange." tiin chhuah mai a han tum a. Lawma chuan lo ko dingin, "E taka, U... ihh, vawiin hi kan class ho museum kan kal ni tur kha ania. Pawisa tlem azawng min lo pai ve teh a, meizial man tur takngial pawh ka nei lova." inthlahrung angreng tak chuan a han ti ve leh a.

Ethana chuan a nau en deuh run chung chuan, "Museum a kal tur engatan nge pawisa i tih?" a han ti thum deuh bul bul a. Za lo deuhva nui suk chungin, "Aww... pawisa nei lo tawpa awm te chu, a zahthlak ve alawm." tiin LAwma chuan a lo chhang a. Chutih lai chuan May-i pawh a room atanga inchei sa thlapa rawn chhuakin chaw chu a rawn kil ve nghal a, "KA va nuamsam lo ve tukin chu.." tiin a la phun nuah nuah zui a.

Ethana chu a han thaw deuh hluai a, a wallet chu a phawrh a. Cheng 200 tlang chu phawrh chhuakin chaw ei dawhkanah chuan ava dah a. LAwma chu a lo ner deuh nung a, "Naaa.. 200 lek te chu, tlangval ve uai tawh kan nia... 100 tal min lo pek belh teh?" a lo ti bul bul mai.

Ethana lah chuan, "Kha aia tam hmanna tur engmah a awm lo." tih hmak pah chuan a chhuak daih mai, Lawma lung chu a awi vak loh hmel kher mai. A u chhuak chu rum taka melh zui vawng vawng chung chuan, "Ninawm, thiante zingah pawh a zahthlak thei lutuk. Pawisa ka pai tlem bik thei sia, ukawm ve mah mah thin a ni." tiin a han phun zui leh nuah nuah a.

May-i chuan lo hau vin, "Kan inhralh that loh em hi, tunlai phei chu sum hmanna tur a awm ve zel nen...mi hausa kan nih loh hi, phun khanglang lo mai teh." a lo ti deuh zek a. LAwma chuan a ngei hmel kher mai, "Nang lah hi tikhan min lo ti ve ziah suh, mi lo hau ve hman ziah mai." tiin a chhang let ve nghal a.

May-i chuan thinrim deuh tak hian, "Ka hau ang che chu, kan chhungkaw khawsak harsat zia i hre ve reng a, ka u tan hian a hahthlak ve tho asin. Tihian tlemin keimah bik chu ka inngaihtuah thei mai a, nang leh Sangtei school fee, college fee nen... a tam thei ropui si, thawh chhuah pawh nei ngawt lo hian pawisa pawisa i lo ti ve chhen hi a hneawm fe zawk." tiin a han vin leh hrep a.

Lawma thinrim chu a meng rum kher mai, "Thawh chhuah nei reng nang, nei turin lehkha kan zir mek a nih hi. Engmah ni mang bik silo, mi hau ve vak vak mai." tiin a tho hmak a, a roomah chuan lutin kawngka a kahr ri bur lehnghal. May-i chuan thinrim tak hian a en zui vawng vawng a, "Chaw ei pawh a tui nek love." tiin a kham ve nghal daih a.

Sangtei erawh a la thu ngawi reng a, May-i pawh chu hna thawk tur chuan a chhuak a. SAngtei chuan an chaw eina vel chu a ti fel mek a, chutih lai chuan Lawma insiam zo pawh chu a room atang chuan a rawn chhuak a. Be miah lo chuan Sangtei chu a chhuahsan ve nghal bawk a, rilru nawm loh hmel tak chuan Sangtei chuan a u chhuak chu a en zui vawng vawng ringawt.

**************************************

Ethana pawh chuan dawr chu a nghak mek a, tukthuan a ei loh avang chu a ril chu a tam angreng hle a. Chutia a thut ngawih reng lai chuan hmeichhe pakhat hi a rawn lut a, "Lo leng rawh, enge i duh ang?" tia Ethana'n a han en chho chu a tawng tawp chiang kher mai. Pawl nga a nih atang tawh a a star thin em em, Jenny chu lo ni rengin.

A lai deuh nghal tut tut a, "Eee.. lo leng.. lo leng rawh, ve teh khiah che chuan." tiin a tawng bah deuh nuai mai. Jenny chu a rawn nui deuh sang a, "Eng ni love, ka rawn leng lut khat em a. Zanin program pawimawh te i nei em, chhuahna tur pawimawh te i nei em?" tiin a lo zawt let daih mai.

Ethana chuan mak tih hmel tak hian Jenny chu a en deuh hu a, "Nei... nei lem nang, ngati nge?" tiin a lo zawt ve leh nghal a. Jenny chuan phur hmel tak hian, "A that chu, Maruata te nen kan lo sawi ho mek a, nizan atang tawh khan... dine out ang u kan lo tia, class 10 batch ho... a lunglen thlak ve alawm." tiin a sawm a.

Ethana chu za lo deuh chuan a khi suk a, "Aa...ka rawn tel ve lo mai ang, ka naute ka awmpui angai alawm." tiin a lo chhang a. Jenny chu a chek deuh hlak a, "A mak e, tikhan i ti daih zel a nangchu. Chubakah i reh thei si, whatsapp group lah i left daih bawk si a. Inhmuh khawm a kaht alawm, a hla lo..kan haw leh vat dawnnia." tiin a sawm nawn leh a.

Ethana chu a ngawi vang vang a, "Khawiah maw?" a han ti deuh hu a. Jenny chu a phur phah khawp mai, "Silver spoon ah, i lo kal ang tiraw, peih hram hram la?" a han ti leh a. Ethana chu a han ngawi vang vang a, "Ei tur a to awm hlawm sia, chubakah ka nau te hi ka chhuah bo san ngam chiah thin lo alawm." tiin a hnial leh hram a.

"AWii..kan inthawh khawm diat diat ang chu... chubakah chutin a to em em lo."

"Engzat nge kan thawh khawm anga?"

"Sang hnih emaw sang thum vel theuh a nimai alawm."

Ethana chuan chutia zan khat thil thu a cheng sanghnih thum eitur mana han en ral ringawt mai chu ani nau pali lai chawm mek tan leh khawsa ve tawk tawk tan chuan uiawm tak a ni, "Aaa... JEnny, nidangah ka lo tel zawk ange, tun tum chu min hrethiam mai teh u." tiin a hnial leh a.

Jenny pawh chuan a sawm zui tawh lem lo, "Awle, a nih chuan ka ti lui lo mai ang che. Mahse engtik ni ah emaw tal chuan i rawn tel ve ngei ngei angai, thian hlui te pawh kan inhmu khawm khat alawm." a han ti leh a. Ethana pawh chuan a lu a lo bu nghauh va, "Tehreng mai." tiin a chhang a.

Jenny chuan chhang tlem azawng chu a lei a, tichuan a chhuahsan ta a. A hma chuan Ethana hi mi tawng duh leh thawveng tak kan tih tawh kha, thiante zingah pawh fiamthu duh ber ber leh chhuah ho nuam ti ber a ni thin. A rukin Jenny hi an naupan lai atang tawhin a star thin hle a, thian kawm pangngaiin kawm reng thin mahse a duh thu a hrilh ngai lo.

A chhan ber pawh lo duh let ve ta si lo se, an inthianthatna a chhiat phah a hlauh em vang a ni. A nu leh pate thih chhan ah lah a fimkhur loh vang angah a ngai tlat a, motor khalhtu ber a lo nih bawk si avang chuan a indem ngawih ngawih thin bawk. A hma chuan a pa hian bakery chu a nghak thin a, apa ta a ni reng bawk.

A nu erawh in lamah a awm tawp thung thin a, mahse an boral takah chuan Ethana mawhphurhna vek a nih a ngai ta si a ni. A nu leh pa dam lai atang tawh khan Ethana hian hna mumal a nei ngai meuh lova, tlangval fel zawk zawk a lo ni bik bawk si lo nen. Chutia sual leh chhungte tana hnawksak chu a ni kher bik chuang lo, BA thleng chu a zo ve a.

Khawi khawi emaw school ah a thawk kual vel mai mai a, a nu leh pate pawh khan tih ngaihna vak an hre ngai lo. Zu a in ve thin a, a rui haw ve fo bawk. Mahse a nu leh pate boral hnu ah erawh eng ruihtheih thil mah a ti tawh ngai lo va, a sim deuh hmak a ni ber mai. Meizial a zu tawk a, chupawh a nau Lawma meizial heh lutuk a hauh theih nan a rukin, a naute hmuh lohvin a zu hram hram thin.

**********************************************

Painting school lamah chuan May-i pawh chuan a zirlai pakhat Siama chu a thil lem ziah lai enpuiin, "Aww..tiang deuh khan. A hma pawn ka sawi tawh kha, hnawih hnemna lai tur bik a awm ka tih kha." tiin a lo hrilhfiah mek a. Paint brush dang lak belh tum chuan class room chhung chu a chhuahsan a, office ah ava lut chu mipa pakhat hi a hmaah tak chuan a rawn ding thut mai.

Chupa hming chu DAvid-a a ni a, May-i thawhpui a ni. May-i hian a hne in a ning em em thin a, a chhan pawh DAvid-a hian a ngaizawng em em a, a hel reng thin a ni. May-i chu a phu zawk mai a, "Awi, min ti phu nasa lutuk." tiin a awm chu a dawm vawng vawng mai. David-a chuan inla zei tak hian, "Sorry lutuk, enge class lam boruak a an?" tiin a lo zawt a.

Za lo tak chung chuan May-i chu a nui lui hram hram a, "A tha a nimai, bursh la turin ka rawn kal lawk a." tiin a chhang a. DAvid-a chuan a han din hnaih deuh va, "Enteh May, in fak derna leh in bawlna lam ni miah lovin maw, i talent hi keichuan ka ngaisang thlawt. Art lam hi i thiam hrim hrim bawk, ka star ru reuh teh mai che ania." a han ti kual vel a.

May-i chuan ei lo ru hle mahse polite tak chuan, "A va lawmawm ve aw, nang meuhvin min fak a." tiin a han nui lui leh sak a, mahse a tawlh hnung deuh hret hret a. David-a chu inla hmeltha tak hian a han vei nuih deuh suk a, "Kan inhriatna a rei ve tawh tho nangin, la leng chhuak dun ila a tha ang. Hriat chian leh zual i chakawm riau mai, tlai banah thingpui kan inkawi lawk dawn em ni, canteen vel ah emaw...i hman angem?" tiin a la sawm ta deuh deuh va.

May-i chuan a hne tawh ngei mai, "Ka u bakery lamah a buai sia, ka nau te pahnih lah zirlai mai an la ni bawk si. In lamah tih tur ka ngah lutuk a, nidangah a nimai aw..ka lawm lutuk tho ania." tiin pangngai tak chuan a hnar a. Mahse David-a chuan kal tir mai ala tum lo, "A rei dawn hleinem, kan haw leh nghal vat dawn alawm. Painting chungchang te, art chungchang te emaw kan sawi anga, i duh duh kan sawi dawn nia." tiin a han nuih leh vel a.

Mahse May-i chuan a duh lo mai nilovin a insum thei lo tep tawh zawk, "David, ka sawi tawh kha. Ka hman lo, chuan hei class ah luh vat ka ngai, brush la tur ringawta lo kal ka nia." a han ti chang deuh fak a. David-a pawh chu a tawlh hnung a, "Awle awle, i tih tlat te chuan le. Mahse nidangah chuan ka ring dawn che ania, nidangah i tih vek tawh kha." a la ti hram a.

May-i chuan a chhang lo, bursh chu a la a. Office chu a chhuahsan nghal hmak a, class lamah chuan a let leh a. David-a pumpelh tum reng reng a nitin hun hman ziah a ngai mai chu a ning ve tawh takzet, han vin vak dawnin a inthlahrung ve deuh bawk si. May-i hi hmeichhe hmelchhe zawk zawk a ni lo reng bawk a, a pian pawh a nalh phian bawk.

******************************************

Lunch break a ni a, Lawma te college ground ah chuan Lawma leh a thianpa Biaka chu an thu dun a. An inbe lem lo, Biaka chuan phone a khawih a. LAwma erawh a melh ngai a melh vung vung ringawt a, a inngaihtuah nasat hmel kher mai. Biaka chuan a han en a, "Museum ah kal ve lovang, haw hma ang i ti ve a. Kan la haw chuang bawk si lova, enga tinge vawiin chu i danglam tlat?" tiin a zawt a.

Lawma chu a han thaw deuh hluai a, "Tukinah ka u nen kan inhau va, mood fu lo ve deuh mai mai mawle." tiin a lo chhang hmuk a. Biaka chuan a phone chu a dah a, "U Ethana bawk em ni, in inhau leh tawh ami?" a lo ti nghal chat a. Lawma chuan tum deuh bur chung hian, "Au Ethana chu ni chiah lo, May-i zawk." a lo ti a.

"Engati nge a, chuti khawpa chawhma pum i tum burna chhan te chu min lo hrilh ve la?"

"Ka phun ve hlek hian a lo tawng ve vak zel a, aa.. a ho lutuk, theihnghilh rawh. Haw teh ang, museum kal tih vel mai mai ka peih nek love a."

"Anih chuan zanin chu chhuak ila, ka chhuah harh pui ang che. Puipuii te inah kan leng dawn nia, drinks pah in."

"Au Ethana'n a phal chuang lovang, chubakah naktuk college ka kal thei lovang, ka ruih leh vak chuan.."

"Aww.. kan rui vak dawn hleinem, kan kai chiai chiai dawn lawm. A thuhrimin i u Ethana hi i hlau leh lutuk, a intithu ve ropui sia. Kum 20 kan tling ve tawh a, u te thuhnuaia awm reng tur pawh a ni lo."

Lawma chu a khi suk a, "Leng rei lo ila, drinks pawn drinks tam lo ila a nih chuan...mahse tak takin haw har chi dawn loh a nia aw." a ti ta nge nge a. Biaka pawh a lo nui suk a, "Tehreng e, rei dawn lo. Chhuah ve hrim hrim kha a chakawm alawm, Puipuii te inhnuai a free lutuk." a lo ti nghal ham ham mai.

HAw tur chuan an phei a, Biaka hian scooty a nei a, an thiandun hian an inphur haw mai thin a ni. Biaka titi tui lutuk chuan a kalna a lo en chiang lova, an college ami sual ve tak leh pawr ve thin tak, Manuna chu a su palh hlauh mai. Manuna lah chuan coffee a lo ken phei mek lai a nih bawk si avang chuan a kawrah chuan a baw vek mai a, "A sa lutuk." tiin a rak deuh tuar mai.

Biaka inthlahrung lutuk chuan, "Ka tihpalh lutuk, thianpa. Ka tihpalh takzet, min hrethiam teh." tiin a rawmawl a phawrh a, Manuna kawr chu a hruk sak a. Manuna thinrim chuan a nam pawp a, "Mawla kal rawh, ka hnek hrep dawn che a maw ni le...i kalna tur kawng en ta che." tiin a vin hrep mai.

Biaka chu chhuatah chuan a thal tawp a, Lawma ngaihdan a ni bik hauh lo. Rum tak hian Manuna chu a melh a, "Khatia nam tluk kher kha a ngai mi, i va sual kher kher ve a?" a ti ve ngat a. MAnuna lah chuan a lo hlau lo nasa mai, "A ve a, tunge i nih a? Ka kawr a huh vek hi i hria em, lo inrawlh ve vak suh." a lo ti zek mai a.

Mahse mipa luhlul ve tak Lawma chu a ngawi mai duh bik lo, "Ka tihpalh a tih mawlh mawlh kha, khatia nam vak kher kha a tul lo." a ti ve leh ngat a. Manuna chu a thinrim zual kher mai, "I pawr ve deuh mi, khanglang a." tih pah chuan Lawma bekah chuan a hnek ri chawrh mai, Lawma pawh a thal tawp mai a.

RAng lutukin Biaka chuan Manuna chu a lo dang vat a, mahse ani pawh chu a lo theh phar dawrh mai. Lawma tlu mek chu a dulah leh a mit sirah a chhuih leh hrep a, mahse midang lo kalin Manuna chu an rawn pawt sawn thei hlauh va, Lawma chu a hmai a thi deuh phung mai a, Biaka chuan a rawn kai tho vat a.

************************************************

Sangtei chu thutthleng seiah chuan mu in TV a lo en mek a, chutih lai chuan a u Lawma chu a rawn haw a. Sangtei chuan mak tih hmel tak hian, "Ehe, i van lo haw hma leh si em em?" a lo ti a. Mahse Lawma chuan a chhang lo, a hmel hliah deuh tut tut chung chuan room lam a pan nghal hmak a.

Sangtei pawh chuan mak a ti angreng kher mai, a hmuh chian hman loh avang chuan a u hmai khem te pawh chu a hmu hauh lo. TV chu a en chhunzawm leh mai a, mahse Lawma chu a rawn chhuak leh a. Choka lamah chuan a phei a, a hmai chu a phih a. Si deuh hlarh hlarh pah chuan, "Aiah, a thip lutuk." a ti vawng vawng mai.

SAngtei chuan ding meuhvin a enchiang a, a u mit sir kak chu ava hmu fuh ta. A va pan nghala , ngati nge... enge awmzia?" tiin a zawt nghal. Lawma chuan towel a a mit deh pah chuan, "Ka tlu." a ti hmuk ringawt a, room ah chuan a let leh nghal daih mai. Sangtei ngaih chu a tha chiah lo kher mai, "HEpa hi, insual naah a tel ve a maw ni le?" a ti nuah nuah a.

Lawma pawh chu a room darthlalang hmaah chuan thu in a mit kak chu a han en chaing a, a lo kak thui phian lehnghal. Manuna'n a hnekna a bek chu a vung deuh bawk, "Ava chi loh e, engtin nge Au Ethana bulah dawt ka sawi ang aww..." a ti vawng vawng mai. Chutah Sangtei chu a rawn lut thut a, a phu zawk mai.

Rang lutukin a hnungchhawn nghal vat a, "Enge i duh?" a lo ti vin nghal hlur a. SAngtei chuan a en vang vang a, "Insualna ah i tel em ni?" tiin a zawt ta nge nge a. Lawma lah chuan hnung chhawn reng chung chuan, "Tel lo, ka tlu ka tih kha." tiin a lo chhang leh hmuk a. Mahse Sangtei chuan a awih chiah lo, "Kut inthlakna a ang em alawm, buaina i siam a mi a, tute nen nge in insual a?" tiin a zawt leh a.

Chutah vin zet hian LAwma chuan, "Ka tlu..ka tlu ka tih chuan ka tlu nimai, enge maw mi zawh chhen le?" tiin a ankhum ta nek mai. Sangtei pawh chu a lungawi lo kher mai, "Thinchhe lutuk, a lo nih tak chu." tiin na taka kawngka khar bur pah chuan a chhuahsan ve hmak a.

LAwma pawh chu a inthiam chiah bik lo, a nau zawkin a rawn ngaihtuah ve a ni tih chu hre tho mahse a thinchhe lutuk chu hrehawm a ti ve tho. "Ala chak lovang chu aw...kha Manuna an tih kha, a la hre ve khawp ang." tih nuah nuah pah chuan a inthlak a, a dula Manuna'n a tlawhna chu na a ti kher mai, a dawm leh vang vang thin.

*****************************************

Tlai lamah chuan Ethana pawh chuan a dawr chu a khar fel a, a kal hma chuan a dawr chu a han leh hawi a. An dawr hming, SUNRISE SWEETS tih inziak chu a en vang vang a. A mitthla ah chuan apa'n a dam laia a thil hrilh, 'He kan dawr hi chu dawr satliah a ni lova, i pu Zadawla siam leh din, harsa tak chungah a neih kha a ni a. A fapa a hlan chhawng a, chu chu i pu kha a ni. I pu khan kei, a fapa hi min hlan chhawng leh a, he dawr hi i ta tur a ni tih hre reng la. Kan chhungkaw tan a pawimawh a, ka boral hunah pawh he dawr hi enkawl chhunzawm ang che.' tia a chah lai te chu a hmu a, a pa thusawi chu a bengah chuan a ri nawn awn awn mai.

Tichuan in lam pan chuan a haw ta a, in a thlen chuan Sangtei chuan ei rawng a lo bawl mek a. Ethana chu chauh hmel tak chuan a thu hnawk a, "SAngte, i u te an lo haw tawh em?" tiin a zawt a. SAngtei chuan a u thingpui siam sak pah chuan, "Au Lawma chu a lo haw tawh a, mahse Au May-i chu a lo la haw lo." tiin a chhang a.

Thingpui chu a va pe a, "Khawnge i u Lawma chu a awm a?" tiin Ethana chuan a zawt leh a. SAngtei chuan Lawma room lam chu kawh zeuh pah chuan, "Enteh U, a mit sir a rawn kak deuh huau a. A dul kha a dawm deuh vawng vawng zel bawk a, a hmai kha hnekna ang deuhvin a vung deuh bur bawk a." tiin a hrilh a.

Chuveleh Ethana chu a meng phawk nghal hru mai, "Enge awmzia, mi nen an insual i tihna em ni?" tiin a lo zawt nghal vat a. "Ka hre bik lo, ka zawh lahin min chhang tha duh lo, ka tlu a ti ringawt a. ZAwh zel dawn chuan a thinchhe sia, min vin hrep hrep zel a." tiin Sangtei chuan a chhang leh a.

Ethana chu a ngawi vang vang a, Lawma room lam pan chuan a phei a. Lawma lah mu chung chuan phone a lo khawih mek a, chutah Ethana chu a rawn lut thut mai. Rang lutukin a tho thurh a, a kun deuh nghal ngul mai. Ethana chuan rum fe hian a melh a, "Khawimaw dak teh." a han ti vin deuh that a.

Chhete chuan Lawma chu a han dak ve deuh va, a hmai a hliam chu Ethana chuan a hmu chiang kher mai. A thaw deuh hluai a, "Insualnaah i tel ve em ni?" a han ti vin leh thak a. Kun reng chung chuan, "Aih." a lo ti hmuk mai. Ethana chuan chaing fek fawk hian, "Anih leh ngati nge?" tiin a zawt leh a.

Zawi te hian, "Ka tlu." tiin a phun leh sup mai. Ethana lung chu a awi lo tih a hmelah chuan a lang nasa kher mai, "Kut thlakna a nih kha, tu nen nge in insual a?" tiin a zawt leh a. MAhse Lawma chuan thudik a sawi duh bik thak lo, "Ka tlu alawm." ala ti talh a. Ethana pawh chuan tih ngaihna vak a hre tawh bik lo, a chhuahsan ve ta tawp a.

A chhuah veleh chuan Lawma thinrim chuan boruak chu hnek tum ni awm tak chuan a han tin vel uai uai a, chutih lai tak chuan Ethana chu a rawn let leh thut mai. LAwma'n a kut a lo la kang ve tawh laklawh si, Ethana nen chuan an in en vung vung a. Chhuanlamah a han zi mar nghal daih a, Ethana chuan a melh rum kher mai.

ZAwite, fiah tak chung si hian, "Damdawi hnawih rawh, a septic a hlauhawm." a ti ringawt a, a chhuahsan leh ta a. LAwma chu khumah chuan a thu hnawk a, "Lalsangzuali tawng thei lutuk, lo sawi leh zuah zuah tawh animaw? Huiham, ka nun hi chu a van fair lo bik tak." a ti nuah nuah mai. 

Ethana chu a inthlak zova, a room atang chuan a chhuak a. Rawng lo bawl mek, a nau Sangtei bulah chuan va kalin, "Bawihi, ka chhuak leh lawk dawn a, ka lo haw tlai chuan chaw in lo ei mai dawnnia." tiin a hrilh a. "Khawnge i kal leh dawn?" tiin Sangtei chuan a lo zawt a, mahse chhang lem lo chuan Ethana chu a chhuak ta tho va.

************************************

May-i pawh chu taxi atang chuan a chhuk a, fare te a pek zawh hnu chuan an in lam pan chuan a haw phei mek a. David-a chuan a rukin a lo zui ve zel hi a lo ni a, a hmuh phaklohna turah chuan dingin a lo en zui ve reng mai. May-i inchhung a luh thleng chuan a en zel a, a va tawlh hnai hret hret a.

Kawngka leh tukverh zawng zawng a in hawn huau avang chuan May-i thutthlenga a mu nghal zuar mai te chu hmuhnawm tih hmel tak hian a en ngawih ngawih a, a chil thli a tla lo chauh hi a ni ber mai. A han khi vel deuh suk a, "Ka la khuai nuai dawn che alawm, BAwihi." tiin a hma hriat tham lek chuan a phun sup a.

Let leh a tum, hnunglam a hawi chiah chu a phu nasa kher mai. A ding chat a, a hmaah chuan Ethana chuan rum zet hian enin a lo ding ngawi reng mai a. David-a pawh chuan mak tih hmel tak hian a en ve vung vung a, "Ehh. enge a? Khatia....enge mi en vung vung a." a ti bah deuh nuai a.

Mahse Ethana chuan a chhang lo, lungawi loh hmel tak hian a en char char ringawt. David-a pawh chuan a hlau rilru deuh va, "Enge maw....min en reng le?" tih pah chuan a kal ta daih a. Ethana erawh chuan a la en zui vang vang mai, an in lam chu ava hawi leh a. Tukverh atanga a nau May-i mu lai lo lang chu ava hmu a, David-a chu ava en leh a.

David-a lah chu a rawn leh hawi leh zuk a, mahse Ethana'n a lo la en reng tih a hmuh chuan ahma zawn a hawi leh rang chiang kher mai. Ethana lah chuan DAvid-a chu a bike-a a lawn thleng chuan a en zui a, a tlan liam thleng chuan a en a. A lu a bu nghauh nghauh va, taxi phar dingin taxi chhungah chuan a lut a.

TO BE CONTINUE