USAGI ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 3

 USAGI

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 3

*********************

Restaurant pakhatah chuan thian ho hi an thu khawm a, thil ei mawlh mawlh pah chuan an titi a. Mi paruk an ni a, hmeichhe pathum leh mipa pathum an ni. Inngaizawng vek pawh an ni hran lem lova, mahse an zinga mi Zonuni leh Petera te chu an inngaizawng thung.

Vengkhat vek an ni a, tette atanga inkawm tawh an ni. An hming chu Esther Lalnunmawii, Zonunsangi, Lalruatfeli, Joseph Lalhlimpuia, Peter Hmingthanmawia leh Isak Lalhmachhuana te an ni. A tir chuan an thian zingah hian Zonuni hi a tel ve ngai lova, an venga rawn awm thar a ni.

Tichuan Petera hian a lo bem nghal chat a ni awm e, an vai hian kum 20-25 vel chauh va upa an ni a, college exam zo hlim hlawl an ni a, result nghak mek an ni. An titi tui lai tak chuan, "Hawh u, khawiah emaw zin ang u. Huau huau a khat emai, a theih phei chuan riah ho nghal theih se...exam chawlh lai hian a rem dawn lutuk." Petera chuan a rawn ti deuh thut mai.

Midang ho chuan an en thap hlawm a, "Riah ho a..khawiah maw?" Estheri chuan nui huk pah hian a lo zawt nghal vat a. "Ka hre bik chuang lo, hmun nuam deuh leh rem deuh te in hre lo ami?" tiin Petera chuan a lo zawt let a. Joseph-a chu a khi deuh suk a, "I rilru a hriat emai a, Zonuni nen chance in neih duh vang a nih kha." tiin a lo chhaih a.

Zonuni lah chuan, "Awww...chance te chu a zawng ve bawk ang chu mawle.." tiin a lo nui ve bawk a, an vai chuan an han nui deuh dar dar hlawm a. Petera chu a han thu tha sauh sauh va, "Hawh u...fiamthu lovin i zin tak tak teh ang u, ka pa bolero ka rawn thawh e. Tunge min support ve...ka chak teh mai ania." a han ti leh a.

"Chak chu a chakawm viau va, mahse keichu ka chhungte hian riah chhuah em hi chu an phal ka ring chiah lova." Ruatfeli chuan a lo ti zawi deuh sap mai. Joseph-a chu a ner deuh sak a, "Kum 24 i ni ve tawh a, enge chhungte chhungte tia chhuanlam i siam bik ziah le aw...naupang chhia ang mai." tiin a lo vin deuh hrep.

"Aa...ka hre lo, min rawn dil pui thiam dan a zir a ni mai." tiin Ruatfeli chuan a chhang a. Petera chuan a thiante chu a han melh kual dan dan a, "In duh vek tiraw? Esther nang...i chhungten an phal angem?" tiin Estheri chu a han zawt bik a. Estheri chuan a dar san euh pah hian, "Hrelo, phal ang. Dawt te pawh kan sawi kual vel mai dawn alawm, thei turah min ngai tawp ru." a lo ti sam et a.

"Nia...keipawh ka hman nghal animai, tunah kan kal nghal dawn mi?" tiin Zonuni chu a lo uang a. An vai chuan Isaka chu an en thap a, "Isak, engmah i la sawi ve lo ania. I phur vak lo ami?" tiin Petera chuan a han zawt ve leh a. Isaka chu a thaw deuh hak a, "Chak chu chak ve e, mahse tunlai chu ka thaw hah hi a nasa zual lutuk a. Ka hlauthawng deuh mawle...theih loh tur thu chu awm chuang lova." tiin a lo chhang a.

"Aw chutiangah enge i lungngaih a....i inhaler kha i ken te chuan engmah hlauhthawn tur a awm lo. Hna kan va thawk dawn pawh ni hlei lo, thaw hah vakna tur a awm hleinem." Petera chuan a lo ti sam leh et mai. Isaka pawh chu a ngawi vung vung a, "Nia...a dik tho mai. Chutia i pa motor hial i rawn donate ngam te chuan kan kal mai aniang chu, chhuah ho pawh a khat ve alawm." a ti ve ta a.

Nui vur vur chung hian Petera chuan, "Umm..ava han tha thin em. Ti kha chuan a dik ta zaih mai, Joseph-a hi rui nawi lutuk lo se a nimai." tiin a han uan chhunzawm leh nghal zat a. Joseph-a chuan a lo duh lo nasa mai, "I zak em? Ruih apianga ka buaipui i nih kha, tikha chuan min ti ve lo mai teh." a lo ti deuh hlur a.

"I chhungte chu ka lo dil pui ang che, Ruatfel...lungngai reng reng suh, i thiannu ka awm alawm." tiin Estheri chuan Ruatfeli chu a han siai zeuh va. "Mahse...khawiah chuan nge kan kal ang...chu chu buaina a ni ta a ni." Isaka chuan a ti deuuh hu a. "Nia...Peter, nangmah ber pawn i hre chuang si lova." Zonuni chuan a lo ti ve bawk.

Estheri bawk chu a han ngawi vang vang a, "Chutia a zina zin ang kan nih dawn chuan...Aizawl atanga hnai te chu ka hria...hnai han ti ila, a hnai lutuk lo." a lo ti chu a thiante chuan an en thap mai. "Khawilai maw?" tiin Isaka chuan a lo zawt vat a. Estheri chu a han thaw hak a, "Buleng khua...nikum khan kan kal tawh a." tiin a chhang a.

"A hmun vel a nuam em?" tiin Petera chuan a lo zawt vat. "Umm..a nuam lutuk. In a tam em em lova, mahse chutia thingtlang em em pawh a ni chuang lo. In a tlem ang hu in an khua a zau ve reuh lutuk, nikum October thla khan kan kal alawm, kan chhungkua in.." tiin Estheri chuan a chhang leh a.

"Eng ti turin nge in kal reng reng a? Chhungte in nei ami?" tiin Ruatfeli chuan a lo zawt ve leh a. "Aih nei love, ka patea thianpa te khua ania. VA tlawh pahin tiin kan kal a, Helipad thar an siam mek a. Kumin khan an siam zo tawh lehnghalin ka hria, a nuam phian ang." tiin Estheri chuan a chhang leh a.

An ngawi deuh vang vang hlawm a, "Aizawl atangin km engzat vel nge ni ang?" tiin Petera bawk chuan a lo zawt leh a. "70-80 km vel a niang...chutia hla lutuk chu a ni lo." Estheri chuan a lo ti leh a. Isaka chu lo inrawlh vatin, "Helipad tih vel chu thudang lo ni se, riahna tur hmun ber chu ania...duhtawka benchhen theih leh zu in theihna tur kha a pawimawh ber." a lo ti ve leh a.

Estheri chu a han ngawi vang vang a, "A chi angem chu ka hre lova, mahse kan haw pah khan veng pakhat kan fan kualna lamah hian fal ve deuhvah in hlui rup mai ding kha ka hmu a. Ka patea thianpa khan in rauhsan tawh a nih thu leh an veng tleirawl ho pawn spot nan an hman thin thute kha a sawi a, kum 10 chuang rauh san a ni tawh an tia..chu chu ka rilru ah a lo awm deuh va." a han ti leh a.

Chutah Petera chu a lo phur kher mai, "A rem em chu...chutia sawrkar phalloh pawh ni hlei lo. An khaw thalai ho pawhin spot nana an hman theih te chuan a rem lohna tur a awm lo...a fal tha viau em?" a lo ti zung zung a. "Umm..fal ve angreng khawp mai, a bul velah pawh thingkung a tam, ramhnuai hnaih deuh lam ania." tiin Estheri chuan a lo chhang leh a.

"A rem dawn khawp chu le...chu chu i ti mai ang u." Joseph-a chuan a lo ti nghal vat. Zonuni chu a han inngaihtuah vang vang a, "A hrang lo maw? Keichu ka dawih teh mai ania, tiang thil velah hian.." a lo ti zawi sap a. "A hrang lo a nih chu, an veng thalai ho pawn spot nana an hman thin te chuan..hrang chu nise an kal ngam tawp nang." nuih huah huah pah chuan Isaka chuan a lo ti a.

"A hran phei chuan a nuam leh zual dawn lutuk." Petera chuan a lo ti leh ham ham mai. Tichuan Buleng khua a in an rauh san tawh chu riah khawmna tur chuan an thlang fel ta a, an awmdan turte leh kal hun tur te chu an sawi fel hnu chuan an haw ve thei ta hram a ni.

*********************************

Tlai dar li a lo ri a, Rempuii pawh a duty hmasak ber ni chu a zo ve thei ta. In lamah chuan a haw a, a rilru ah chuan Nelsona'n a tawngkhum dan te, mawi lo taka Rsa a tih dan te chu a awm reng a. A la lungawi mawlh lo, an hotute hnena han report mai pawh duh viau mahse thawk thar a ni a, Nelson-a lah kha a confi ropui mai bawk si.

A thusawi kha lo dik tak tak ta se, report ve ngawt khan awmzia a neih leh loh a hlau bawk si. Ban leh mai te chu a duh rum rum a, a ni khatna lekah pawh chuan hrehawm a ti takzet. Zan a lo ni a, chaw a ei kham a rooma a lut chiah chu a phone a rawn ri ral ral mai.

A han en chu Hospital atangin a lo ni, "Hello REmpui, chaw i ei tawh em?" tiin an Dean chuan a rawn zawt a. "Aw ei tawh e, Sir...enge ni ta?" tiin Rempuii chuan a lo zawt let a. Inthlahrun hmel tak hian, "Enteh Rempui, zanin night tur Nurse Biaki kha a damlova, damdawiinah an admit daih mai a. Khawngaihin zanin chu i rawn tlawmngai tlang dawn mawni le, duty tur dang an awm bawk silo. Nurse Heleni nen in ni anga, chuan naktuk i off daih dawnnia, a pawi i ti em?" a rawn ti ta mai a.

Rempuii chuan a peih lo mai pawh nilovin a huphurh takzet, mahse a hnial ngam bawk si lo. Chhuanlam dang siam chu a han tum zet na a, "Awle Sir, ka lo kal ange.." a ti ta hram a. "A va lawmawm dawn ve aw..anih chuan taxi ka rawn kohsak thlap ang che, darkar chanve hnu velah a rawn thleng ang, muangchangin i lo insiam dawnnia." tiin DEan chuan phone chu a dah ta a.

Rempuii chu a tum lian kher mai, "Ninawm e...ban leh daih mai ania ka duh ni." tiin a phun nuah nuah a. Peih lo tak chung chuan a insiam mawlh mawlh a, a nu leh pate bulah chuan thil awmzia chu a sawifiah nghal bawk a. A insiam zawh hnu chuan taxi pawh chu a rawn thleng a, Damdawiin lam pan chuan an tlan leh ta a.

**********************************

Nurse Heleni pawh chu a lo awm ngei a, tihtur vel an inhrilh fiah lai chuan an duty na hmunah chuan NElsona bawk chu a rawn lut thut mai. REmpuii chuan a lo melh rum nasa mai a, "Eheu...zanin chu ka duty tlang fuh hle mai. Ka star thar Rempuii chu i night tlang ve dawn tho animaw, a nuam dawn e." a rawn ti ham ham a.

Heleni chuan vin zet hian, "Lalnelson, enge hetah i rawn luh ve rikngawt a...i duh duh naah rawn lut ve ringawt zel mai." tiin a lo hau va. Nelsona chuan hlauh loh hmel tak hian, "Aww...i bula thu kha, kha nu te kha ka en duh alawm. A hmeltha sia maw, ka duh zawng tak a ni." a la ti ham ham mai.

"I hna va thawk mai mai rawh..ahrim hrimin tinge i la haw loh va? Zing atanga duty i nih kha, enge i la tih?" Heleni chuan a han ti leh deuh khur khur a. Nelsona chu a mengrum ta khur mai, "Ka duh duh hunah ka haw anga, ka duh duh naah ka kal ang. Ka la haw peih lo a ni mai alawm, in la thu viau lo la a nimai." a ti ta hrep mai.

Heleni pawh a thinrim takzet, "Ka inla thu ka ti ami? Duty apiangin zu rui ziah lehnghal, hmeichhe lakah pawr em em ringawt zel mai. Kal vat rawh...anih loh chuan ka report ang che." tiin a vin leh hrep a. Nelsona chu a nui huah huah a, "A ve lutuk che hian...ka kal khawp ang. I bula mi hmelthatei kha zanina mut huna dream veng veng atan ka rawn en leh lawk alawm, zan khatah pawh ka vawi thum thei ang." a la ti ta deuh deuh va.

REmpuii pawh a thinrim ta kher mai, mahse engmah chu a sawi lo. Tawng pawh a tawng thei lo, chutia mawi lo taka Nelson-a'n a han tawngkhum leh ta mai chu a rilru a na takzet. HEleni chu a ding hluai a, "Nelson..i zak lawm ni? Kal rawh...helai hi i awmna tur pawh a ni ve lo." tiin a nam chhuak rawk rawk a, Nelson-a pawh chu a chhuak ve mai bawk.

Heleni chu ava let leh a, "Rempui, a pawi ka ti khawp mai. Nelsona hi chu maw, kan Dean nen hian an inkawm ngeih si a, hausa viau mahse lehkha a thiam si lova, engah mah a hman tlak silova, thawh mumal tak tak leh thiam mumal tak tak pawh nei lovin hetah hian an thawh tir ve mai mai alawm. Mi ang lo angah ngai rawh, i rilru te kha ti na duh reng reng suh." tiin a hnem nghal vat a.

Rempuii chuan a mittui chu a hru zauh va, "Umm..a pawi lo. Mahse a tawngkam mawi lo lutuk kha chu ka ngei khawp mai, vawiin chawhma pawh khan min tawngkhum hrep tawh bawk." a lo ti nuah nuah a. "A hahthlak ania, lungngai suh. A sual man chu ala hmu ve khawp ang, hawh...titi zawm leh ang, thil dang sawi daih ang." tiin Heleni chuan tih hlim a tum hram hram a.

******************************

ZAn a rei zel a, damlo thenkhat te pawh an mu hil bawrh bawrh tawh. Heleni leh pawh dawhkan bawhin an muhil mek a, an hma zawn glass atang chuan an duty-na room a damlote chu an hmu thei vek tho va. Rempuii erawh ala muhil thei lo, lehkhabu chhiarin ala meng kar mai.

Chutih lai mek chuan Nelsona leh guard pakhat chuan a rukin an duty na room ah zu an lo in dun a, an titi dun nasa ngang mai. An in hnem telh telh a, Nelsona zing atanga lo rui tawh sa bawk si chu a rui lungpuam a, a pawr chho tan ta. Men pawh meng mang tawh lo hian, "Diktak chuan maw DAwngte, khi laia a fal a ward awm khi i hria tiraw?" tiin a han zawt a.

Guard Dawngtea pawh chuan, "Khawilai ward maw...Rsa maw i tih? Rsa Ward maw? Hria e..tinge?" tiin a lo zawt let a. Nelsona chu rum zet hian a meng a, "Khipa khi chu ka la khawih khawp ang mawle, tawngthei mang silo mi a melh rum ve khanglang zel a...ka la beng ang." a han ti khur khur a.

DAwngtea chu a lo khi suk mai, "Engati maw? I pawi a sawi em ni?" tiin a lo zawt leh a. Pawr zet hian NElsona chuan, "SAWI...min melhrum ringawt pawh kha ka pawisawina lian tak a ni tawh." a han ti leh pung pung a. DAWngtea lah lo rui ve tawh bawk si chu  a pawr ve ta, "CCTV room ah tumah an awm hleinem, Rsa ward awmna laia CCTV khi kan hersawn zeuh anga, kan han vaw sil awng hrep dawn mi?" a han ti chu Nelsona a lo phur kher mai.

"I ngam a mi? I ngam phawt chuan han kal ila, ka khawih chakna a rei tawh ania." a lo ti ve nghal khur khur a. DAwngtea chuan no khat chu a han tlak leh pawp a, "Kal ang." tiin a ding ta hluai mai. NElsona pawh chu a ding a, din pawh a ding ngil tha hleithei tawh lo.

"Khawi...tiang ka duh ve...ka vuak ve na tur." a han ti vin deuh thak a. "CCTV room ah a awm, hawh..sulhnu vel hi ti fel ila, kan kal dawnnia." tiin Dawngtea chuan a chhang a. Tichuan CCTV room ah chuan lut dunin Rsa ward awmna lai CCTV chu an her sawn a, tichuan tiang la ve ve in Rsa ward awmna lam chu an pan chho dun ta mai a.

***************************

Rempuii chuan lehkhabu chu a la chhiar tui nasa mai a, chutah a pum a rawn nuam lo ta tlat mai. A ner nung a, "Ka va inthiar peih lo tak.." tih nuah nuah pah chuan a tho chhuak a, "U Helen, U Helen..." tiin Heleni chu a sawi vak vak a. Heleni pawh a rawn harh a, "Enge ni ta?" tiin a lo zawt a.

"Ka inthiar lawk dawn a, ka rei lovang." tiin Rempuii chuan a chhang a. "E..awle...bathroom kalkawng kha i hria tiraw?" Heleni chuan a lo ti leh a. "Aw hria e, ka rawn let leh vat ang." tiin a kalsan ta a. Chutih lai mek chuan Nelsona te zurui pawh chuan inchung lam an rawn pan ve mek bawk a, "Ka va han hlap nasa dawn em...tawng pawh tawng thei lo te chu, min report thei tawp nang." tiin Nelsona chu a phun chho nuah nuah mai.

Rsa ward awmna lai chu an thleng a, "Hawng teh..hawng vat teh...ka vaw chak tawh ania." tiin Nelsona bawk chu a han vin leh pung pung a. Dawngtea chuan kawngka chu  a hawng a, Rsa chu a lo la muhil hauh lo. Bangah chuan meihawl hian thil a lo ziak rang nasa mai a, "Hey..tawngtheilo pa...ila mu lo maw...hmelchhepa." tiin Nelsona chuan a han vin nghal khur khur a.

Rsa pawh chuan a thil ziah lai chu a tawp chat mai, muang chang chuan dawhkana rawmawl bal zet chu la in a hmui chu a tuam leh a. DAwngtea chu a khi suk a, "Va inla changtupa deuh ve...a ngal ruh khawng tliak ila  a nimai alawm tiraw, U Nelson?" tiin a han nui vur vur a.

Nelsona pawh chu lo khi sukin, "A nghal ruh mai ni nang, ka vaw hlum lo chauh dawn." tih pah chuan a lut a, light chu a on eng a. A va pan phei a, "Helam lo hawi teh, tukin khan nurse ka hauh lai khan ilo mengrum vela tiraw? TUnge ka nih i hria em? Mawhh...i chak dawn lo khawp mai." a han ti vin khur khur a.

Mahse Rsa chu a che sawn eih lo, a la thu ngawi reng a, bang lam chu a la hawi reng bawk. DAwngtea pawh chu a rawn lut a, "Hlap rawh....a inla ngeng ve khanglang a nih kha. Naupang te te si, hlap hrep rawh." a lo ti ve bawk a. Nelsona chuan a tiang ken chu a hum nghet sauh sauh va, "Ka fate rual lek si hi, mi ang lo lehnghal." tih pah chuan Rsa tukhumah chuan a hlap ta chawrh mai.

Rsa chu a bu deuh lawp a, dawhkan chu a bawh rawk a. Mahse rang takin a thu ngil leh nghal mai a, a meng rum tawh kher mai. "Ala na tawk lo a nih kha..khawimaw keimah ve.." tiin Dawngtea chuan a chhipah tak chuan a rawn vaw ve leh a. Mahse RSa chu a che eih lo, a hmaiah chuan thisen a rawn luang zawih zawih mai.

*****************************

REmpuii pawh a inthiar zo va, a insilfai hnu chuan a duty na lama chhoh leh a tum chu Hospital chhung ala bel chiah lo nen, short cut lo zawk lam step ah chuan a chho ta daih a. A chho sang zel a,  a bo ta tulh tulh mai. A kal thui zel a, a tawpah chuan RSa ward awmna floor ah a chhuak chho ta thut mai a.

A han hawi kual a, a thim angreng bawk si. Mak ti tak hian, "Ehe..hei chu Rsa ward awmna lam daih a nih hi." tiin a phun zawi sap a. Kalkawng dang a han zawn leh dawn lai tak chuan thawm a hre tlat mai, Rsa ward awmna lam pan pheina atanga lo chhuak a ni.

Hlau rilru hle mahse a hna a ni ve tlat bawk si a, hreh ru tak chung chuan ava pan phei a. Chutah Rsa ward kawngka lo inhawng huau a hmu chu a ding chat mai, "Awi ka duh lo, a chhuak ru tihna em ni ang?" tiin a khur nghal zawih zawih mai. Mahse thawm chu a han ngaithla chiang a, Nelsona aw a hre tlat mai.

A va pan phei zel a, a ring tulh tulh mai. "THo rawh..min beilet ta che. Tho ta che, i inla ngeng ve mi?" tia inhlap ri chawrh chawrh ri chu a hrechiang telh telh a, a hlauthawng chu a va tlan phei ta a. Rsa ward chhung lo eng uar a hmu chu ava dak a, Nelsona leh dawngtea chuan Rsa hnungzang chu an lo vuak rawn siah siah mai.

Mahse Rsa erawh na ti awm ang pawhin a lang lo, a thut ngai chuan  ala thu reng. Rempuii chuan vin zet hian, "Engthil nge maw in ti le?" a han ti vak mai chu Nelsona te thiandun pawh an tawp chiang kher mai. An hawi let nghal vat a, "Awhaw le....ka duattei a lo thleng ta." tiin Nelsona chu a la nui ang huah huah a.

Rempuii chuan thinrim tak hian, "Engvangin nge RSa kha kut inthlak chiam a, enge in pawi a sawi a?" tiin a han vin leh thak a. Nelsona chu a khi suk a, "Kan thu thu a ni, kan duh leh kan vua ang. Enge hetah i rawn tih zawk a...pawngsual i duh ami?" a la ti ta deuh deuh va.

REmpuii thinin a tuar a lo, "Chhuak rawh u, chhuak vat rawh u. Ka report hma che u hian chhuak rawh u, a nih loh vaih chuan..." a tih lai chuan, "A nih loh vaih chuan enge? Engtin nge nang khan min tih anga, min report ang maw? Ka thusawi kha i theihnghilh tawh em ni? He Hospital ah hian DEan thleng khuan tumah ka hlau lo, ka thu ber ka tih tawh kha.." Nelsona chuan a lo ti let hrep mai.

Rempuii chuan thinrim tak hian, "A tha e...in hre khawp ang." tih pah chuan kal a tum a. Nelsona leh Dawngtea te pahnih chuan an umzui a, an va man bet ta mai. "Hey..min khawih suh u...min thlah nghal rawh u." tiin Rempuii chu a tal nasa mai a. Mahse a au hma chuan Nelsona chuan a hmui a hup sak a, "Khanglanga che, tunah hian kan han pawngsual law law teh ang che. DAwngte, manbet rawh, a kekawrte kha lo phelh teh." ala ti ta deuh deuh va.

DAWngtea chuan a lo manbet a, a taksa chu an duh lai lai an khawih sakin an thram sak ta chiam chiam mai. Patling pahnih tha nge nge, Rempuii chuan a hneh ngang lo. Mahse Dawngtea khan Rsa ward kawngka kha a khar leh tawh hauh lo, Rsa chu a ding a.

Ward pawnah chuan a rawn chhuak ve ta, a thinrim a ni tih hriat tak hian a mitmeng te chu a sen rum mai a. Chutih lai chuan DAwngtea chuan Rempuii chu a lo la man bet a, chhuatah chuan an nambet a, a hmui a hup sak bawk. Nelsona lah chuan a kawr chu a phelh ta mai, "A va han nuam dawn em...i nghal man chu i hmu khawp ang, Hmeli.." tiin Rempuii chu a bawh ta mai.

Rsa chu a rawn kal phei chhut chhut a, a rum deuh nghut nghut lehnghal. Chutah DAwngtea chhip sam chu a rawn tham a, a kang lawp mai. Dim baksak lo chuan bangah chuan a lu chu a tauh tir pawp a, a thal tawp mai. Rang takin Rempuii chu a tho va, a tlan chhe nghal a.

Nelsona thinrim chu a tho chhuak ve a, "Khanglang che chuan le...nang naupang." tih pah chuan Rsa chu a theihtawpa na chuan a va hnek siah mai. Mahse Rsa chu a che eih lo, Nelsona chuan a dulah te chuan a han hnek leh vak vak thin a. Mahse Rsa chuan na a tih loh hmel kher mai, a kut pahnih chuan a rek ta thut a.

A rek kang ta mai, Nelsona chu a thaw tha hleithei lo nghal. Dawngtea chuan a lu a dawm vawng vawng a, Rsa ward chhunga tiang chu va la vatin a rawn tlan chhuak leh nghal a. Rsa hnungzanga chuan a va hlap leh pawp mai, mahse engtin mah a awm lo. Nelsona chu a thlah a, chhuatah chuan a tla ri thlawp mai a.

A thaw hrawk hrawk mai, Rsa chuan hnunglam chu a hawi a. DAwngtea chuan a hlau leh si, "Hey..ding rawh. Min..min rawn pan hnai tawh suh..anih loh chuan ka vaw hlum ang che." a ti khur dar dar mai a, a hnung tawlh hret hret bawk a. Rsa chuan a pan hnai zel a, chutah Dawngtea chuan vuak leh a han tum a.

A tiang a han lek kang chiah chu Rsa chuan a kuta an hlinna chain, ft khat vela sei chu a ban tha hmang ringawt chuan a ti chat ta hmawk mai. DAwngtea pawh chuan mak a ti kher mai, a tawp chat a. Chutah Rsa chuan rum tak hian a melh leh a, a pan phei leh ta.

Dawngtea chu a tap lek lek tawh, vuak a han tum leh a. Mahse Rsa chuan a lo man chat mai a, a chhuhsak nghal. A rek nghal bawk a, DAwngtea chu a ang hlawi hlawi mai. Chutah Rsa chuan tiang hmawr chu a han en vang vang a, Dawngtea ka chhungah chuan dimna tel hauh lo chuan a hawlh lut ta mai, a tukhumah chuan a tlang zawk mai a.

Thisen a baw nghal zawih zawih bawk, a ka chhunga tiang lawr tut chung chuan DAwngtea chu a thal tawp a, a thi ta der mai. Rsa chuan hnunglam a hawi leh a, Nelsona chu a hrawk dawmin a lo la khuh uak tuar tuar a. Rsa chuan a va pan phei leh ta, Nelsona bulah chuan a thingthi a.

Hlau tak hian Nelsona chuan, "Ka..katihpalh. Rs..min..min ngaidam rawh. I chungah ka fel tawh ang, i duh apiang...i duh apiang ka tihsak tawh ang che." tiin a tap hluam hluam mai. Rsa chuan Nelsona ka chhung chu a zen ta mai a, a ha hnuai lam zawng chu nghet tak hian a vuan a.

Chutah le, Nelsona khabe chu a kamsir vun thler vek khawp chuan a pawt thlawn ta mai a. Thisen chu a chik hian a chik tuar tuar mai, NElsona na ti lutuk chu a tal vak vak a. Rsa chu a ding leh a, Nelsona chu a en vang vang a. A lu chu na takin a han rap leh ta siah siah mai a, a mitmu te thleng chuan a rawn pawng chhuak pur thei hial.

A rap hek titih vek hial a, Nelsona pawh a thi chiang kher mai. A hmel chu hmuhtlak a ni tawh lo, a thluak te nen lam a sawm nuai mai a, rapthlak tak a ni. Tichuan Rsa chuan Dawngtea ruang chu ava pan leh a, chahbi la in a kut an hlinna chain chu a phelh a, chahbi dang pawh chu a la tel bawk.

*************************

REmpuii chu a duty na room ah chuan a vabawk lut deuh rawk rawk a, Heleni chu a lo phu nasa kher mai. "Ehe Rempui, ngati nge?" tiin a lo zawt vat a. Rempuii chu a tawng tha hleithei lo, "Nel..Nelsona leh guard pakhat...Rsa...RSa ward ahh.." a ti bah nuai mai a, a thaw hlawp hlawp mai.

Heleni ngaih chu a tha hauh lo, "Rempui, engmaw i sawi? Enge awmzia, engthil nge thleng a?" tiin a zawt leh a. Rempuii chuan tap chung hian, "Rsa..Rsa...Rsa a rawn chhuak. Nelsona leh guard pakhat...a sawisa...a sawisa.." a han ti leh chu Heleni chu a meng phawk nasa mai.

"Enga? Rsa a chhuak maw? Khawnge..khawnge tunah a awm?" tiin a zawt leh a. Rempuii chuan a chil lem dawk pah chuan, "Ka hrelo..ka hrelo." tiin a lu a thing a. Rang lutukin intercom chu a chuh nghal vat a, security chu biak a tum nghal a. Mahse CCTV room-a duty ber Dawngtea lah a thi der tawh bawk si, a duty puipa Siama lah pawn lam ah a duty bawk nen.

"An la thei lo...an la thei miah lo." tiin Heleni pawh chu a mangang takzet. REmpuii chuan tap tuau hian, "Engtin nge kan tih ang? Mawhh...engtin nge niang?" a ti chel chul tawh mai. Heleni chu a ngawi vang vang a, "DEan..Dean kan phone mai dawnnia." tiin an Dean chu a phone nghal a.

Mahse Dean pawh chuan a lo la thei miah lo mai, an mangang dun takzet. Heleni chu a ding hluai a, "Hawh..han kal ang. Han enfiah ang, Nelsona te pawh chu engtin nge an awm han en ang." a ti chu Rempuii chuan a duh lo nasa mai. "Aih...aih, ka ngam lo, ih..min, min sual an tum a.." a han ti bah leh nuai a.

"Enga? Tuin maw? Rsa'n maw sual tum che?" Heleni chuan a lo ti hu mai. "Nilo...Guard pakhat leh Nelsona khan...Rsa ward chhungah khan an lo awm a, RSa'n min rawn chhan." a han ti leh a. Chutih lai tak chuan an duty-na room ah chuan Guard pakhat zawk, Siama chu a rawn lut deuh thut mai.

Rempuii leh Heleni chu an phu nasa ngang mai, "Helen, CCTV roomah Dawngtea ka hmu miah lova. A lo kal mial em le..tinge in va mangang hmel ve?" a rawn ti deuh hu a. Heleni chuan a va pan a, "Siama..Rsa a tlan chhuak, a tlan chhuak ania." a han ti chu Siama pawh a meng phawk nasa kher mai.

*************************************

Rsa chuan chahbi keng reng chung chuan inhnuai lam a pan thla zel a, emergency exit lam chu a pan phei a. Chahbi chuan a han hawng a, pawnah chuan a chhuak ta. A sirah chuan guard pahnih hi an lo titi a, pakhat zawk chu hmeichhia a la ni zui. Chutia Rsa, thi hnuanga an han hmu thut chu an phu nasa kher mai.

A hmeichhia zawk chuan, "Ehe..enteh saw..saw tunge?" a ti nghal chiam chiam a. A mipa zawk chuan a han enchiang a, "Rsa a nih saw.." tih pah chuan a va pan hnai a. Rsa chu ngawi reng chuan chahbi keng reng chung chuan a kal phei ve zel a, "Rs, enge hetah i tih..engtin nge i rawn chhuah theih a?" tiin Guard chuan va man mai a tum a.

Rsa chuan a mitah tak mai chahbi sei tak mai chuan a lo chhun tlum pawk mai, ana ti lutuk chu a au vak vak a. Chutah Rsa chuan a hmui hup sakin a chhip samah chuan a kek dak awrh a. Hmeichhia zawk chu a hlau kher mai, "Nilo..ka duh thei lo." tiin a tiang chu a phawrh a.

A keng khur zawih zawih mai, "Hey...duhtawk rawh. Khawih tawh suh...kal bo rawh." a ti vak vak ringawt a. Rsa chuan guard pa chu nghet takin a lu ah chuan a chelh a, a th(r)uai ri pawp mai. Chupa ringruh chu a tliak tih hriat tak hian a ri tuar a, a thi chiang ngang mai.

Guard hmeichhia zawk chu hlauvin a tlanchhe ta ringawt a, Rsa chuan a um zui lem lo. A sira rangva phek, dekchi chhin tiat vel chu Rsa chuan a chhar a. Chunu lamah chuan a va khawh pawp a, chunu ngawngah tak chuan a fik hmawk mai a, a lu a bung hmawk mai.

Tichuan a kal zel a, gate duty te awmna lam chu ava thleng leh ta. Gate duty te pahnih chuan engmah an lo hre lo, an lo in card den vel mai mai a, "Ka va zung lawk teh ang...ka zun zawh ah ka rawn ei kawt leh vek ang che." nui huah huah pah chuan pakhat zawk chuan a han ti a.

"Kal mai teh...va zung mai mai teh." tiin a thianpa zawk chuan a lo ner khum sak mai. TIchuan pakhat zawk chuan a chhuahsan ta a, zun in lam chu a pan a, a zung zo a chhuak leh tur chiah chu a hma zawnah chuan Rsa chu a hmu thut mai. Au a tum a, mahse Rsa chuan a hmui a hup sak nghal.

Chu zunin cement bang chang tak maiah chuan Rsa chuan a lu chu a tauh tir ta siah siah mai a, vawi 10 dawn a tauh tir hnu chuan a thi chiang kher mai. A chal vun te chu a thler vek a, thisenin a hmai chu a bual huh vek bawk. Chupa ruang chu kalsanin zunin chu a chhuahsan ve leh ta a, duty pakhat zawk awmna lam chu ava pan ve leh ta.

Chutia ri deuh dawp dawp thawm a hria chu duty pakhat zawk chuan mak a ti angreng hle a, a ngaih tha vak lo chu an duty room-a CCTV chu a han en a. Chutah RSa rawn kal phei chhut chhut chu a hmu ta mai, a palian in a sang si a. Thisen a kai hnuang bawk si nen, a hlau takzet.

Heta gate duty te room a CCTV ah hian footage pahnih chauh a awm a, chu chu an duty-na bul Hospital luh pheina kawng leh gate pawn chauh a ni. A chemte pai, a hma a sertawk an velna chu a chuh nghal vat a. A duty room atang chuan a tlan chhuak nghal a, mahse pawn ava en chu tuman an lo awm lo.

A han hawi kual ngial a, "Thianpa..thianpa...khawnge i awm?" tiin a thianpa chu a au vak vak a. Mahse tuman an chhang der mai si lo, "A tha dawn lo tawp mai." tia phun supin a duty na roomah a tlan let leh nghal a. Mahse a lut tur chiah chu kawngka bulah chuan RSa a lo ding thut mai, a phu nasa lutuk chu a tawlh dawr a.

A chemte ken lai chuan vih a tum a, mahse a kut chu awlsam tak hian Rsa chuan a lo man a. Chemte chu chhuhsak chuang lovin a mah leh a mah chu a hrawkah a invih tir ta mai, thisen a rawn baw chhuak hawk hawk ta mai a. A thi rang kher mai, tichuan chemte chu la in Rsa chuan damdawiin gate chu a chhuahsan ta a.

******************************

TO BE CONTINUE