USAGI ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 2

 USAGI

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 2

******************************

Ruatsanga lakah chuan Pu Biakzuala te nupa chuan FIR an thehlut a, mahse naupang kum 9 mi lek a nih avang chuan jail a la tang thei si lo. Remang Home lamah dah a ni ta a. A nu chuan kartin a tlawh ziah a, Ruatsanga pawh naupang a ta na na na chu chulai hmuna a awm chu amah pawh chuan a hrethiam lo kher mai.

Pi Rinawmi chuan hrehawm a ti em em thin a, a fapa in tual a that ta mai chu amah ngei pawh a zakin an khaw pum titi leh sawi luai luai a tling a. Tunlai angin Social Media, FB leh Youtube te chu awm tawh phei se chu Mizoram pum titi a ni anga, a va mualpho leh zual dawn em.

Mahse a ril a rah, a fapa erawh a hmangaihna a dai chuang hauh lo. Zantin tawngtaiin Pathian hnenah a fapa chu veng turin a dil thin a, a ngai thei hle bawk. Pu Biakzuala te nupa erawh biak pawh a be ngam tawh lova, ngaihdam dil tura vawi khat a kal an lo pet chhuah loh chauh avang pawh kha a ni mahna.

Pawnah pawh a chhuak tha ngam tawh lo, a fapa lah kar khatah vawi khat chauh a va tlawh thei bawk si nen. A rilru a hah in a mang a ang thin em em a, nileng leng mai chuan a tap tlawk tlawk thin a ni. ZAnah pawh a mu tha thei ngai lova, a mitthlaah chuan a fapa in Remremi a vit lai chu a hmu leh thin a.

A chang phei chuan a mang phan hial thin bawk, Ruatsanga pawh chu psychytrist pakhat, Dr. Manuna chuan a enkawl mek bawk a. Han danglam bikna leh han that lohna em em pawh a hmu lo, test tam tak a neih hnuah pawh naupang hrisel pangngai tak ang bakin a hmu lo.

*************************

Remremi thih atangin thla khat a liam ta a, Ruatsanga erawh Home ah dah a la ni reng thung. Inrinni a ni a, Pi Rinawmi pawh a fapa tlawh turin Home ah chuan a kal leh a. Pindan pakhatah chuan Ruatsanga nen leh a Doctor, Dr.Manuna nen chuan an thu ho va.

"Ruatsang, thiante i siam hnem tawh em?" tiin anu chuan a han zawt a. Ruatsanga chuan a lu thingin, "Aih..tumah ka kawm peih lo." tiin a lo chhang deuh hmuk a. Pi Rinawmi leh Dr. Manuna te chu an in en deuh hu a, "NGati nge i kawm peih loh?" tiin anu chuan a han zawt leh a.

Anu chocolate rawn ken ei mual mual pah chuan, "An sual emai, insual an hrat si. An tawngkam a mawi lo thei si, mi tihbuai an ching si. Remremi anga fel kha tumah ka la hmu lo, chuan kan school ah zawk khan ka kal leh chak tawh e." a han ti deuh vawng vawng a.

Anu chu a han thaw deuh hak a, "Fel deuhvin awm la, i chhuak leh vat mai ang." tiin a chhang a. Ruatsanga chuan anu chu a han en vang vang a, "Ngati nge hetah hian min dah reng reng a? REilote chiah i ti sia, ka awm rei tawh e. Anu, chubakah ka dam lo pawh a ni si lova, helai hmun hi ka chhuahsan chak tawh." a han ti zawi deuh sap a.

Anu chuan chhan mai ngaihna pawh a hre lo, "A rei tawh lovang, BAwiha. REilote chiah nghak leh hram rawh, i fel kha." tiin a hnuk a ulh lek lek mai. Ruatsanga chuan tap tuau hian, "School ah ka kal leh chak tawh alawm, helai hmun hi a nuam lo si. Zanah lah keimah in ka mu a, i awm ngai bawk silo. I lo kal khat si, ka haw duh tawh." tiin a inhnit ta fap fap mai.

"Ni love, Bawihte. Hetah hian i awm angai alawm, chuvang alawm i awm. Ka thu i awih theih em kha, a rei tawh lovang." tiin anu chuan a hnem leh a. Mittui tla phung hian Ruatsanga chuan, "A rei tawh lo tak tak ang maw?" a han ti zawi leh sap a. "Aw Bawiha, a rei tawh dawn lo." tiin anu chuan a lo chhang leh a.

Dr.Manuna chu lo inrawlhin, "Ruatsang, kha...milem hi lo ziak leh la, i nu nen hian kan han titi lawk ange." a han ti a. Ruatsanga pawh chuan a lu a lo bu ve mai bawk a, tichuan security guard pakhat chuan awmpuiin Pi Rinawmi leh Dr.Manuna te chuan pindan chu an chhuahsan ta a.

************************

Pawnah chuan an thudun a, "Thlakhat chhung tehmeuh ka zirchiang a, ka enkawl a. Mahse amah ah hian danglamna em em ka hmu lo, REmremi chungchang ka zawh pawhin amah ah danglamna ka hmu lo. A sazupui kha a thi tih pawh a hria a, REmremi pawh a vit tih pawh a inhria. Mahse ka vit palh a ti a, naupang a ta na na na chu damdawiinah a awm mek turah a ngai a, a thi tih pawh a hre lo, hrilh pawh ka hrilh duh lo bawk." Dr. Manuna chuan a han ti nuah nuah a.

"Anih leh sazupui chungchang kha a la sawi ngai em? Ka sawi awmzia chu, a ui thu vel te emaw, Remremi demna lam te a sawi ngai em?" tiin Pi Rinawmi chuan a lo zawt vat a. Manuna chuan a lu thingin, "Aih, mahse a lemziah vel ka en atang hian a sazupui kha ala ngai hle ni tur a ni." tiin a chhang a.

"Enge i sawi awmzia?"

"Sazupui lem hlir a ziak a, a chei dum vek zel bawk."

"Chu chuan awmzia a nei thei angem?"

"Chutia awmzia a neih em em chu ka hre lo va, amak ka tih ber chu amah ah hian rilru chianlohna emaw, han diklohna ka hmu tlat lo a ni."

"Anih chutiang a nih chuan a hma hun zel tur enge?"

"Thla khat chauh ala ni a, la enthlak deuh chu angai ang. Heta naupang dang awm ho ai hian a fing fal nalh bawk a, midang ho hi chu rilru kim lo leh naupang luhlul, an kum phu lova ruihtheihthila tal buai te an ni tlangpui a. Chuan an zingah hian a naupang ber hial bawk ang, Ruatsanga hi veng tha bik turin ka hrilh nasa alawm a thawktute pawh hi."

Pi Rinawmi chu a han thaw deuh hluai a, "I chungah ka lawm takzet, Doctor. Engpawh chu nise, Deborah-i ka lam a ngai tawh dawn sia, ka haw phawt mai ange." tiin a ding a. "Nia, lo lungngai lo la. THeihtawp ka lo chhuah anga, a chhuak thei em em ang." tiin Manuna pawh chuan a lo chhang a.

Gate bul thleng chu Ruatsanga leh Dr.Manuna te chuan Pi Rinawmi chu an thlah a, "Bawiha, kar leh ah ka lo kal leh nghal dawn a. Fel tak khan lo awm la, in hotute thu kha lo awih hle ang che aw.." tiin a fapa chalah chuan a fawp vawng vawng a. "Awle, anu." tiin Ruatsanga pawh chuan a lo chhang a, a haw san leh ta a.

***************************

Zan a ni a, tukverh lam hawiin Pi Rinmawi chu a thu ngawi vung vung mai. A mittui a tla zawih zawih a, a hma zawn dawhkanah chuan rial no leh local zu, fun hnih chu a inchhawp bawk. Pi Rinawmi hi zu in thin pawh a ni lova, mahse a rilru a hah em avang leh veng pum hmuhsit rawn leh hlauh rawn a nih takah chuan inhnem nan a pasal boral ta ang mai chuan zu a in ve ta thin a ni.

A mittui a tla zawih zawih a, a fapa Ruatsanga thlalak chu kengin a en ngawih ngawih mai. Khuma muhil mek, kum 4 mi lek, a fanu Deborah-i chu a va melh leh a. A inhnit hlawp hlawp a, "Bawihte, i u ka ngai emai." tiin a tap leh zawih zawih a. Zu chu a han thli ri leh karh karh a, a tlak leh pawp mai.

Eng ang pawhin zu in nasa mahse, zanah a muhil tha thei chuang lo. Chuvang chuan mutduhna a lei tawp zel a, zan a mut dawn apiangin a ei thin a ni. Pawhdawh chu a hawng a, mutduhna chu a phawrh chhuak a. A ruih deuh tawh vang nge ni, ngaihtuahna fim pawh hmang tawh lovin mutduhna chu a rualin mum thum chu a dawlh ta pawp mai.

A dawlh nan zu chu ala hmang zui, zozial chu a han pak khu leh talh talh a. A rui tawh hle mai, mahse a la tap bang hleithei lo. A fapa Ruatsanga pian tirh a, a hlim zia te chu a ngaihtuah let a. A enkawl seilen chho lai te, school kal tura a hruai thin laite chu a mitthlaah chuan  alang chuai chuai mai.

Zu chu fun hnih a in zo tawh, a kai tawh ngang mai. A luak te chu a chhuak bur tawh a, a mutduhna damdawi ei pawh chu a tam tha bawk a, hna a rawn thawk tan ta. REiloteah chuan a lu chu a rawn hai muai muai a, a thal tawp mai. A muhil nghal bawrh bawrh a, a ke pawh chu khumah a hlang chho hman tawh lo.

*******************************

A tuk zingah chuan Office turin Pu Biakzuala chu a insiam mawlh mawlh a, a nupui Pi Sangkimi chuan chaw ei a lo siam sak mek bawk. Dar 9 a ri tep tawh a, chutih lai tak chuan an kawngka chu a rawn inkik karh karh mai. "Ka va hawng ange." tih pah chuan Pu Biakzuala chuan a va pan a, kawngka a hawng chu mak a ti hle mai.

Deborah-i chu an kawngka bulah chuan a lo ding reng mai a, "Ehe...nang chu..enge hetah i rawn tih dawn?" a ti deuh hu mai. Pi Sangkimi pawh chu a rawn phei a, Deborah-i hmel a hmu ringawt pawh chu a thin a rim nghal hlur mai. Vin lek lek hian, "I nu in a rawn tir che animaw?" a han ti deuh nghal khur khur a.

Deborah-i chuan a lu thingin, "Aih...ihh, anu saw, ka kai tho thei lova. School kal a ngai tawh sia, a tho thei miah lova." a ti ta mai a. Pu Biakzuala te nupa chu an in en hu a, an hlauthawng ngei mai. RAng lutukin Pu Biakzuala chu a tlan phei nghal a, Pi Sangkimi pawhin Deborah-i chu pawm vatin a zui ve nghal bawk. Pi Rinawmi te in chu an thleng a, pindan lamah an tlan lut nghal.

Pi Rinawmi chu a hma zana a awmdan pangngai chuan a lo la awm reng a, zu fun ruak leh rial no lo let bal mai an han hmuh chuan Pu Biaka te nupa chu an ngaih a tha ta hauh lo. Pu Biaka chuan Pi Rinawmi chu a han sawi vak vak a, "Rinawm, Rini...harh teh, harh teh." tiin a be mawlh mawlh a.

Mahse Pi Rinawmi chu thawk pawh a thaw lo, a taksa chu a zawi hian a zawi vek a ni ber mai. Chutah Pi Sangkimi chuan chhuat lai a damdawi strip ruak chu a hmu a, ava chhar a. A han enchiang chu mutduhna damdawi a ni tih a hre thei nghal a, "Pa-a, hei enteh." tiin a lek kang a.

Pu Biaka chuan chhuhsak nghalin a han enchiang ve a, "Nilo...ekhai aww.." a ti vawng vawng mai. "A mar kha han en teh." tiin Pi Sangkimi chu a chiai titih der tawh mai. Pu Biaka chuan a han enfiah a, chutah Pi Rinawmi chu a thi tih a hrethiam ta. A lu a thing a, Pi Sangkimi pawh a tap ta ruih ruih mai.

DEborah-i lah chuan a hrethiam lo, a hawi hu hu ringawt a. Thenawm khawveng te pawh Pi Sangkimi tap ri an hriat avang chuan an rawn lut khawm a, thil awmzia an hmuh chuan Deborah-i chu nu ho thenkhat chuan an pawm sawn ta nghal a. Pi Rinawmi ruang chu an buaipui nghal a, in te pawh an singsa fel nghal bawk a.

***************************

(15 YEARS LATER)

Kum 2011 a ni a, Mental Hospital pakhatah chuan nurse pakhat hmeltha tak mai thawk thar hi a awm a. A hming chu Lalrempuii a ni a, kum 22 leka upa a ni. A senior, Nurse Mamuani chuan compund chhung vel chu a han fan kual pui a, eng eng emaw chu a hrilh fiah a.

Tichuan pindan pakhat, fal angreng tak mai chu an pan leh a. Rempuii chuan hrethiam lo tak hian, "Ehe, tinge hei chu ava hla bik ve...ngati nge a?" tiin a han zawt a. Mamuani chuan khik deuh suk pah hian, "Hei hi chu tlemin damlo dangte tan a hlauhawm deuh va, buaina a siam nasa thei lutuk a, a palian bawk sia...chuvang chuan tah hian an dah bik a." tiin a chhang a.

Rempuii ngaih chu a tha chiah lo kher mai, "Ehe...anih chuan min lo tina mai ang a.." a ti nuah nuah a. "Ni love, a zakzum lutuk. Keini nurse ho phei chu min khawih ngai lo mai pawh nilovin a en pawh min en ngai lo, a kun reng zel. Damlo thenkhatte hian an tibuai ve peih bawk a, an ngam leh tak tak silova." tiin a lo leh a.

REmpuii ngaih chu ala ngam chiah lo, "Min ti na lo tak tak ang maw? Tunge a nih reng reng a, enge a damlohna?" tiin a han zawt leh a. File pakhat pek pah chuan, "Lalruatsanga a nia, RS tiin kan ko mai thin a. Nu leh pa a nei tawh lova, fahrah a nia. A back story te chu hria la i khawngaih ve thovang, a vanduai ania aw.." tiin Mamuani chuan a chhang leh a.

Rempuii chuan file chu a en a, LALRUATSANGA, KUM-24 BULENG KHUA tih hi a lo inziak a, a natna chu ANTI-SOCIAL DISORDER tih a ni bawk. REmpuii chu a han ngawi deuh vung vung a, "Buleng khua, ka vawikhat hriatna." a han ti deuh nuah nuah a.

"Kha...1996 kuma Bul eng khua a mipa naupang pakhatin an thenawm ami hmeichhe naupang a vih hlum kha, a lar em kha ila hria em?"

"Awii 1996 kum daih maw, kum 6 vel bak ka la ni lovang, a rei tawh emai."

"E nia, in la naupang ve em a, in hrepha ve chiah lovang. Kum 16 vel ka nih lai ania, ka nu ten an sawi thin kha ka la hre reng thin. Khata mipa naupang, an thenawm naupang vit hlumtu kha, amah Rsa hi a nia."

"AWii a ni maw? A rilru buai vang tihna a ni maw, anih chuan..heta a awm chhan pawh a ni ngei ang tiraw?"

"Aih ni chiah lo, heta a awm chhan chu anu thih thu a hriat atang khan a rilru a buai chho tan a, tun thleng hian tihian hetah a awm a ngaih phah ta zawk a nih hi."

"Anih anu chu engtia thi nge?"

"Sleeping pills a ei hnem lutuk a, zu a in bawk nen...amu hlum ta a nih kha."

"Anih chuan anu thih vanga rilru buai ta a nih chuan....nihleh tinge an thenawm hmeichhe naupang chu a thah si a?"

"Aaa...kha chu sawi neuh neuh hi a tam a. Khawi nge dik ber pawh ka hre lo, mahse amah enkawltu Dr. Manuna sawi dan kha chuan amah ah diklohna pakhat mah a awm lo a tia, lehkhabu hial pawh a ziak alawm, Ruatsanga a enkawl dan vel."

"Anih chu...tunah kum 24 chauh ala nih chuan an thenawm hmeichhe naupang a thah lai chuan kum 9 chauh ala ni dawn tihna a nimaw?"

"Aw ni e, tual chu a that hma ve khawp mai." tiin Mamuani chu a han nui deuh suk a. REmpuii chu a han ngawi leh vang vang a, "Keichu kum 9 a nih atang chuan a rilru a buai tawh a nih ka ring, chutia kum 9 mi lekin tual va thah ngawt thu awm suh." a lo ti leh a.

"Dr. Manuna lehkhabu ziah USAGI tih kha lo chhiar ve rawh, khata a inziah dan kha chuan a sazupui thar kha an thenawm naupang chuan a lo tih hlum sak a, khami vang khan a vit hlum palh tiin a ziak a, ka han ngaihtuah chian chet chet chuan a awm ve tho ka ti." tiin Mamuani chuan a lo chhang leh a.

**************************

Ruatsanga ward chu an thleng ta a, kawngka pawh thir veka siam a ni a, MAmuani chuan kawngka chu chahbi hmang chuan a han hawng a. A chhung an han lut chiah chu a lo thang huam mai, Rsa chu bang kilah hian an mahni hnungchhawn zawng hian a lo ding run mai a.

Bangah chuan meihawl a ziah niawm tak hian sazupui dum lem a lo inziak thluah mai a, milem mak pui pui, awmzia pawh hriat theih loh khawpa mak hi a lo inziak rang ruai bawk. A lu lah chu a buk luih mai a, a palian em em mai lehnghal. A lo berah ft 6'2 vel tal chu a ni ngei ang, a kut chu chain sei lutuk lova thlun beh a ni bawk.

A hmui chin zawng chu rawmawl bal ung zel mai hian a tuam tlat bawk a, nurse pahnih thawm a hriat hnu pawh chuan ala rawn hawi eih lo, a din ngai chuan a la ding reng a. Mamuani chu ava lut hmasa a, "Good morning RS, nizan lam i mutui em?" tiin a han zawt a.

Mahse Rsa chuan a chhang lo, a la ding ngawi reng. Khum bula thutthlengah chuan Mamuani chuan zawi muangin a thuttir a, "I BP check lawk ang aw...a rei dawn lo ania." zaidam tak chuan a han ti a. Mamuani tih ang ang chuan Rsa pawh chu a awm ve mai a, Rempuii erawh a la lut ngam chiah lo thung.

BP a check zawh hnu chuan Mamuani chu a han ding deuh hluai a, "Ummm..i BP pawh a tha e, chaw an rawn pe tep ang che aw...i ril te a tam tawh awm si." a han ti leh a. Rsa erawh a thutdan pangngai chuan ala thu ngawi reng a, tawng pawh a la tawng eih lo.

Mamuani bawk chuan, "E taka, saw saw ka thiannu thar ania, i ward ah pawh BP check tur ten a lo kal ve zeuh zeuh dawn a, a thu lo awih hle ang che aw.." tih pah chuan Rempuii chu a kawk a. Rsa chu muang chang chuan hnunglam chu a va hawi a, REmpuii hlau chu a lo khur dar dar mai.

Rsa mitmeng a hmu chu a rap rilru angreng kher mai, a mitmeng chu a sen rum mai a, dark circle a lang ruah bawk. REilote ava en hnu chuan a hawi sawn leh nghal a, "Anih..kan chhuahsan phawt ang che aw...nakin deuhvah bed sheet vel kan rawn thlak dawn nia." Mamuani bawk chuan a ti leh a, a chhuahsan ta a.

*****************************

An let leh pah chuan, "Enteh U Mamuan, tinge a tawng miah loh va?" tiin Rempuii chuan a zawt a. "E nia, taka...ka lo hrilh theihnghilh daih che. A tawng thei lo, a aw bawm a kang vek alawm." tiin a chhang ta mai. Mak ti tak hian Rempuii chuan, "Eng a? A kang vek a? Enge awmzia, tinge?" a ti deuh hu mai.

"Aaa..englo ania, khatia a nu in a thihsan tih a hriat atang khan a buai ta vek a. Chhuah a tum a, Home-a thawktu thenkhat te pawh a seh hliam nual a ni awm e. Tichuan vawi tamtak inthah a tum a, mahse an dang hman hlauh zel a. Tum khat chu chokaah lut ru in tel sa lutuk mai a in deuh pawp a, a thi hman thelh a. Mahse a nunna an chhan hman hlauh va, khata tang khan a tawng thei ta lo a ni." tiin Mamuani chuan a lo chhang leh a.

Rempuii chu a ngawi vang vang a, "Anih leh nichina i sawi, Dr. Manuna lehkhabu ziah, USAGI tih emawni kha...kha kha enge awmzia?" tiin a han zawt leh a. "Japanese tawng ania, sazupui dum tihna ania. A nalh reuh ka ti, i ti ve em?" tiin Mamuani chu a lah nui suk zui.

REmpuii pawh chu za lo tak chuan a nui ve suk a, "A nalh em em pawh ka hre lo ea, amah kha ka rap rilru riau ania." tiin a lo chhang a. Mamuani chuan ner deuh nung hian, "Awiii BAwihi leh....khatiang mai mai pawh i hlauh te chuan Mental Hospital ah engtin nge i thawh rei theih anga, huaisen i zir fe a ngai a nih chu." a lo la ti zek zui.

REmpuii pawh chu a thaw deuh hak a, "Nia...kan la huaisen chho ve zel mahna." a ti zawi sap ringawt a. Zing chaw ei a lo hun a, damlo dangte pawh dining hall panin an phei sup sup a, dining hall a chaw ei thei chin bik hi an awm a. Tlema pangngai ve deuh reuh ho chauh an ei thei a, mahse rilru buai leh a zual te erawh buaina a thlen theih avangin an ward ah thlap an pe thin a, thenkhat te phei chu naute ang maia a hrai a hrai an ngai thung.

**************************

Ruatsanga nu, Pi Rinawmi thih atang khan an in te tak te chu luah lohvin rauh san a ni ta a. Kum 15 lai a liam tawh avang chuan a hlui tawhin a chul hian a chul rup tawh a, an thenawm Pu Biakzuala te pawh veng dangah an insawn daih tawh a ni. Mahse an khua, Buleng khuaah tho chuan an la awm thung.

Thlan mual pakhat ah hian nu pakhat hi thlan lung pakhat en ngawih ngawih chung chuan a thu ngawi reng a, a mittui a tla zawih zawih bawk. Chu nu chu tudang nilovin REmremi nu, Pi Sangkimi kha a ni. Chu thlan pawh chu Remremi thlan a ni a, thlan lungah chuan Remremi thlalak pawh a chuang kalh mai.

Pi Sangkimi chuan a en ngawih ngawih a, "Bawihte, kan ngai bang thei dawn lo che chu a nih ber hi tiraw? Ka fanu neihchhun i ni asin, lo let leh thei la ka va han ti tak em. Aww..BAwihte, ka ngai emai che." tiin a tap zawih zawih mai a. Chutih lai tak chuan a hnung lam atang chuan, "Nu..." tia rawn ko ri a hria chu a phu deuh zuk mai.

Rang lutukin a hawi let a, hmeichhe tleirawl ngo tak, hmeltha zet mai hi a lo ni a. Pi Sangkimi chu a ding a, "Bawihte, enge hetah ilo tih a?" tiin a lo zawt vat a. Chu tleirawl chuan, "Hetah i awm ka ring a, ka rawn kal." tiin a lo chhang a. Pi Sangkimi chuan a mittui hruk hul pah chuan, "Tinge..school i kal amaw tia, enge tunah hetah ila tih?" tiin a lo zawt leh a.

"Englo, kan Principal nupui a boral thut a, chuvang chuan kan bang leh ta daih a. Inah ka rawn haw a, a lo inkalh daih bawk sia. HEtah i kal leh kha ka ring reng a, chuvang chuan ka rawn pan tawp a nih hi."

"Aw a nih tak chu, ava zia lo ve mawle."

"Nu, chaw i ei tawh em?"

"Aih la ei nang, ka ril a tam lova."

"A ti leh ta...ka rindan chiah...tinge chaw i ei loh ziah a?"

"Awwwww....a tam lo lawm. Hawh teh, i haw teh ang."

An nufa chuan an inzui chho va, "Mahniin thlanmualah kal ziah tawh suh, apa pawhin a hrilh thin che kha." tiin tleirawl chuan a han hau leh bawrh bawrh a. Mahse Pi Sangkimi chuan a chhang lem lo, an inzui haw ta a. He tleirawl hi tudang nilovin Ruatsanga nau Deborah-i kha a ni a, Pi Sangkimi te hian fa atan an enkawl zui ta daih a ni.

Pu Rinawmi thih atang khan Pu Biakzuala te nupa chu an inchhir em em a, an fanu Remremi vang khan an thinurna chu dang zo lovin Pi Rinawmi kha an hmelma en ta chiam a, mahse amah Pi Rinawmi ber khatia a awm takah chuan an nupa chuan an indem ngawih ngawih a.

Chutah Ruatsanga a rilru a buai phah a, intih hlum a tum tih te thlengin an lo hre leh bawk nen. Deborah-i, enkawltu nei lova a awm tawp tur chu an ngai ngam lova, Pi Rinawmi laka ngaihdam dil nan tiin an fanu angin an enkawl seilian ta a ni. Deborah-i pawh tunah chuan kum 19 lai a lo ni ve tawh a, pawl 12 zirlai a ni ve tawh bawk.

****************************

Staff pakhat chuan chaw thleng kengin Rsa ward lam chu a pan mek a, a faifuk hlarh hlarh mai. Kawngka chu a han kik karh karh a, "TAwngthei lo pa...Lalruatsang...kha hei, aw i chaw tur." tiin a han vin deuh thak a. Kawngka hnuaiah chuan jail tang chaw pek ang mai chuan thleng chu a han theh lut a, "A luh pawh ka rawn lut peih lo, i rimchhe si." a la ti zek zui a.

Rsa chu muang chang chuan a rawn ding a, kawngkhar lam chu ava hawi a. Rsa ward kawngkhar hi sawi tawh ang khan thir a siam bik a ni kan tih tawh kha, tin kawngkhar lai takah hian kil li neiin zimte a slide hawn theih siam a ni bawk a. Chu staff rilru chhe zet mai chuan kawngka te zawk, chaichim lenna vel leka zim chu a han hawng a.

Rsa lo ding run chu a en a, "Mi lo melh rum ve ziah suh...naupang te te si. Pa lian viau mah la ka hlau eih lo che ania, nang rilru buai mai mai." tiin a han vin leh hrep a. He staff hi a hming chu Nelson-a a ni a, kum 40 vela upa a ni tawh bawk. Mental Hospital ah hian a thawhna a rei tawh a, damlote chungah a sual thei hle bawk.

Rui chung hian hna a kal ziah leh nghal a, staff dangte pawhin an hne thei hle bawk thin a ni. Rsa chuan ngawi reng chuan a en run a, "A ve lutuk a, nanga tawngthei lo khan tikhan min melhrum reng reng suh aw..." tih pah chuan a khar hmak a. A kal leh tur chiah chu a hma zawnah chuan Nurse thar, Rempuii kha a lo ding reng mai.

Nelsona chu a phu deuh zuk a, "Ehe..nang hi, nurse thar kha i ni maw?" tiin a han melh deuh vang vang a. REmpuii chuan  a lu a bu nghut ringawt, "I chhelo reuh hle mai..haha, ngaihloh lamah lo ngai lo la." tiin Nelsona chu a han khi leh sung a. Rempuii chuan a melh no lo kher mai, "Khawngaihin kal sawn rawh, Rsa room ah khan damdawi ka dah dawn." a han ti tum deuh hmuk a.

Nelsona lah lo kam nam deuh tawh bawk nen, "Eu...tum nasa deuh ve. I tum nasat poh leh i hmeltha a nih kha mawle...awle..Hmelthate, kawng ka kian a che." tih deuh duah pah chuan a kalsawn a. Mahse a la kal mai lo, Rempuii chu a la en vung vung a. Rempuii chuan chahbi chu la in hawn a tum a, "I lut ngam chiah ang maw?" Nelsona chuan  a lo ti a.

REmpuii chu a tawp hmak, "Engvangin nge ka luh ngam loh anga?" a han ti vin hlur a. Nelson-a chu a khi suk a, "Khapa kha tunge a nih i hre chiang chiah a mi? Mi rilru buai, tel chhuan so khu vut vut pawh in duh khawpa mi a anih kha. A lo pawngsual che anga sin, i hlau lo ami?" a han ti chu Rempuii pawh a sa zak mai.

Mahse a chhang lo, kawngka chu a hawng a. Rsa chuan a tih dan ngai bawkin bang lam chu a lo hawi leh a, a lo hnungchhawn leh vung tawh mai. Chaw pawh chu a lo la ei lo, dawhkanah chuan a lo dah ringawt a. Rempuii chuan nui sang hian, "Rs, hei chaw eikhama i ei tur damdawi aw...ehe, tinge chaw ila ei loh va?" a han ti dam diai a.

DAwhkanah chuan damdawi chu dah pah hian, "Ei vat rawh, hei...thovin an bawm hlauh ange. I eikhamah damdawi hi i ei dawnnia aw...puar deuhvin i ei dawnnia." a han ti a. Chhuah leh a tum chu kawngka bulah chuan NElsona chu a lo ding run mai, Rempuii kawr hma a hming inziak chu a en a.

Nuih suk pah chuan, "Lalrempuii maw...a nalh hle mai. Lalrempuii tih hmingpu hi chu an chhelo tlangpui, an itawm tlangpui bawk." tiin REmpuii chu a ke atanga a chhip thleng chuan it hmel tak hian a han melh chho vel a. Rempuii thin chu a rim ta, "I zak em? Khatia i duh duh dana i tawngkhum tur pawh ka ni lo, chubakah nichina Rsa i tawngkhum dan te kha...i zak lawm ni? Khatiang khan damlote leh mi pangngai pha lo te tawngkhum tur a nia mi?" tiin a vin ve ta hrep mai.

Nelsona chu a nui huah huah a, "Anih...tawngkhum zel ta che ila. He mi ang lo leh tawng pawh tawng thei lo, palian satliah, naupan lai atanga tual thah hmang hi tawngkam chhe tinrengin tawng khum zel ta ila, enge i tih vak anga, nang hmeichhe awm nem zawk khan?" a lo la ti ham ham mai.

REmpuii chuan rum tak hian a melh a, "Ka report ang che...Dean hnenah ka report che anga, midang bulah pawh ka report ang che. He hospital a staff pakhat ve mai i nih kha, chaw petu leh chhuat nawttu mai mai i nih kha, kei aiin lo thawk rei tawh mah la khatia min tih theih dan kha i nei lo hrim hrim." tiin a chhang let ve ta hmak hmak mai.

Nelson-a ngaihdan a ni ta lo, Rempuii chu a va pan ta mai a. Hnai takah melhin, "Zawngi, i zak em? Chhuat nawttu, chaw petu mai mai, staff satliah min ti maw? HE Mi a dahna ah hian kum 10 chuang ka thawk tawh tih hre rawh, DEan pawh hi ka thianpa a nih hi...nurse tamtakin min zuam sual tawh ania." a ti ta khur khur mai a.

Rempuii pawh chuan a chhang ngam tawh lo, a hlau kher mai. Chutah Rsa chu a rawn hawi let thut a, rum zet hian Nelsona chu a rawn melh khur mai. NElsona lah pawr laklawh chuan, "Nang ve lah kha, engmah ti thei mang si lo, mi melh rum em em zel ringawt mai." tiin a la vin hrep zui.

Ward chu chhuahsan pah chuan, "Ka sawi kha hre reng rawh aw, Zawngi....min ngam vak suh, he Hospital ah hian thuneihna sang tak ka nei ania, duhleh i seniorte i zawt hlawm dawnnia." tih pah chhuan a kal ta a. Rempuii rilru chu a na takzet, Rsa chu ava en leh a.

Rsa pawh chu a lo la ding ngawi reng a, "Thinrim suh aw Rs, a ruih vang mai mai a nih kha. Chaw kha ei vat la, damdawi kha i ei dawnnia aw.." tiin REmpuii chu a nui lui hram hram a. Rsa thinrim lutuk chu a khur zawih zawih thei hial, Rempuii pawh chuan a chhuahsan a, kawngka chu a kalh tha leh a.

************************

(TO BE CONTINUE)