USAGI ENGLISH : DARK BUNNY [MIZO HORROR/SLASHER FICTION STORY] Written by : Aaron Malsawmdawngzuala WARNING : 18+ CHAPTER : 1

 USAGI

ENGLISH : DARK BUNNY

[MIZO HORROR/SLASHER FICTION STORY]

Written by : Aaron Malsawmdawngzuala

WARNING : 18+

CHAPTER : 1

*******************************

(USAGI tih hi Japanese tawng niin a nihna takah chuan Dark Bunny nilovin, Black Bunny tihna a ni a. Mahse Social Media ah te post ka duh ve avangin tlema a mawi zawk nan, Black aiah Dark tiin ka dah a, min lo hrethiam dawnnia.)

Kum 1996 kum a ni a, Mizorama khaw pakhat, lian lem lo tak, Buleng khuaah chuan Chhungkaw pakhat hi an awm a. Nu ber chu Lalrinawmi niin kum 38-na a hmang mek a, fa pahnih neiin a upa zawk chu Lalruatsanga niin kum 9 mi lek a ni a, a naupang zawk chu Deborah Lalhruaizeli a ni.

Pi Rinawmi hi an pa hian a thihsan tawh a, zu a heh em avangin a cancer ve hlauh mai a, kum 1994 khan a boral a ni. Pi Rinawmi hi a hah thei hle a, fa pahnih lai a enkawl avang leh hmeithai a nih chu thuhran ni se, an retheih ve em avang hian hna mumal pawh nei lovin a huana thlai beitham tak te hralhin a fate hi a chawm ve tawk tawk a ni ber mai.

REthei hle mahse a tituai erawh a la nalh hle a, a kum lah a la upa em em bik lo nen, officer tam tak leh pa hausa tam tak bem erawh a hlawh fu thung a. Mahse a pasal, a hmangaih em em, zu ruih vanga kutthlak thintu erawh kha chu a chang chuan haw thin hle mahse a la theihnghilh thei bik chuang lo.

Sum a mamawh hle tih inhre reng mahse pasal dang neih erawh a tum hauh lova, mi tumruh leh rilru nghet tak pu mi a nih vang pawh a ni mahna. A fanu naupang zawk Deborah-i hi kum 4 leka upa a ni a, a tawngthei ve tan chauh a ni. A pasal a thih phei kha chuan Deborah-i hi naute chauh ala ni ti ila kan sawi sual awm love, Ruatsanga erawh chuan a len hun thleng pawn a hre pha ve deuh ruai ruai mahna.

Buleng khua ah pawh a khaw tawp, mi zawng zawng kawmthlanga awm ang kha an ni a, an thenawmte hi mi khawsa thei tak nilo mahse, khawsa thei ve pangngai tak an ni a. Nu ber hi Pi Sangkimi niin ani erawh a pasal ala dam thung a, sawrkar hnathawk a ni. A pasal hming hi Pu Biakzuala a ni a, an veng Kohhran Upa a ni.

Pi Sangkimi hian fanu mal pakhat a nei a, an duat hlum lo chauh a ni ber mai. A hming chu Remremi niin kum 9 mi ve tho a ni a, Ruatsanga nen hian an inkawm thin a ni. An khawsak insan hleih angreng viau mahse Pu Biakzuala te hian Pi Rinawmi hi an duhsakin an khawngaih em em a, kawng engkimah an pui thin a ni.

*****************************

Tlai khat chu Pi Rinawmi te in kawngka chu an rawn kik karh karh mai a, ava hawn chuan Pu Biakzuala a lo ni reng mai. Sazupui note dum, duhawm tak mai hi a lo pawm a. Pi Rinawmi chuan a en deuh hu a, "Ehe, U Biaka chu...enge ni ta a?" tiin a lo zawt a. Pu Biaka chuan nuih suk pah hian, "Aa...ka lo lut phawt thei angem?" zaidam tak chuan a han ti a.

"Awle lo lut ta che." tiin Pi Rinawmi chuan a lo chhang a, inchhung lamah chuan an inzui lut a. Pu Biaka chu thutthlengah a thu a, sazupui note chu ala pawm reng a.  Pi Rinawmi erawh choka lamah phei tlangin thingpui a siam a, "Khaa..khawilam sazupui nge ni a, i rawn pawm luh deuh hluai a?" tiin a zawt a.

Pu Biaka chuan nuih suk pah hian, "Aa...in ta tur a nih hi." a han ti chu Pi Rinawmi pawh a rawn hawi let deuh hru mai. Mak tih hmel tak hian, "Enga? Kan ta tur maw?" tiin a han zawt deuh hu a. "Aw ni e, i fapa Ruatsanga hi kan ina a rawn len apiang hian sazupui note a duh thu hi a sawi reng a, chuvang chu mawle." tiin Pu Biakzuala cbhuan a lo chhang a.

Thingpui siam mek pah chuan, "Awii...chutiang vang mai mai, a ho emai. Naupang ania, a sawi ve mai mai a nih chu. Chubakah enkawl a hautak hmel si, a to awm si. Chaw duh bik te an nei anga, sum lama harsat sa nen, min ti rethei zual mai mai lawng maw?" tiin Pi Rinawmi chu a han phun deuh nang nang a.

"Khaih khaih, chutiangin ngai mahta che. Kan awm alawm, i fa te chu kan fate ang thovin alawm kan en ni...in chhungkua leh kan chhungkaw ran vulh angah i ngai mai dawn nia." tiin Pu Biaka chu a han nui sen sen a. Thingpui no hnih chawi phei pah chuan Pi Rinawmi chuan, "Pu Biaka hi zawng, i fel thin mange." tiin thinpui chu a hma zawn dawhkanah chuan a han chhawp sak a.

Sazupui note chu pek pahin, "Kha...han pawm ve reng reng teh. A hrim hrimin khawnge Ruatsanga pawh chu a awm a?" tiin a han zawt nghal a. Chu sazupui note dum, duhawm em em mai chu chul hliau hliau pah chuan, "Note ka timu zo chiah a, in in lamah a rawn leng phei a nih kha." tiin Pi Rinawmi chuan a lo chhang leh a.

"AW a nih chu....Ruatsanga leh Remremi hi chu an inkawm ngeih ve khawp mai."

"Nia, kan vengah lah a mawng berah kan awm sia. Nangni mi fel chhungkua kan thenawmah in lo awm hlauh va, in fanu Remremi lo hi chu kawm tur dang a nei mawlh lo a nih hi."

"Khaih khaih, mai mai thin a...engemaw kan han fel vak bikna le awww?"

"In fel alawm, engkimah min pui a. Kei hmeithai mai mai hi min duhsak em em a, ka lawm takzet asin. A chang phei hi chuan ka inthlahrung thin, tuna sazupui note Ruatsanga i rawn lei sak pawh hi a ngai lo asin mawle..."

"Kan ina a rawn len apiang hian ka bulah hian, APA BIAK, sazupui note min lo leisak, a dum ngat aw...tiin a ngen ziah a...ka rilru ah hian a awm reng a. Chuvang ania ka office bang ka thianpa vulh lai ka rawn leisak ni, ka fapa ve tho ania, ka leisak a ni ve mai alawm."

"Aww...naupangte chuan engpawh an duhzawng apiang chu an ngen tawp zel mai alawm. Tinge maw i rawn leisak duh kher ni aww, a to awm awm nen."

"Tlawm thu ah chuan tlawm lem love, Mizoramah phei chuan a vang ve lutuk a. Mahse sawi tak ang khan ka thianpa vulh lai ania, a nei tam phian bawk sia. Min tlawm duai alawm, inthlahrung duh reng reng suh." damdiai hian Pu Biakzuala chuan a han ti leh a.

Chu sazupui note dum chu Pi Rinawmi chuan a han en vang vang a, "A duhawm sia, Bawihtea chu a lawm viau ang." tiin a han ngawi deuh vang vang phawt a. Chutah amah bawk chuan, "Sazupui hi ngaina hrim hrim ni hian ka hria, a lemziahna bu ah pawh sazupui lem hlir hi a ziak a, a duh ven ngang ni tur a ni." tiin a han khi deuh suk a.

"Anih chiah chu, ka rawn lei fu hle mai." tiin Pu Biakzuala pawh a lo nui ve huah huah mai. An titi lehdeuh hnu feah chuan, "Khawi nge, keipawh ka han haw phei teh ang. Zanah in chhungkua in lo leng ula, in sazupui tharte pawh hi in rawn hruai ang chu..." tiin Pu Biaka chu a tho deuh hluai a.

"E ni e, kan lo leng dawn nia. Kan lawm lutuk aw, awii..sawi ngaihna pawh ka hre lo. A to hmel bawk si, inrulh leh dan te kan zawng dawnnia." Pi Rinawmi chuan a lo ti ve bawk a. "A khaih khaih, a ngai lo reng reng. Ka rawn leisak ve liau liau alawm heite chu...engpawh chu nise, zanin chu inrawn leng dawnnia." tiin Pu Biaka chuan a chhang a.

Kawngka bul thleng chuan an inthlah a, "U Biak, ka lawm lutuk tak tak aw...Ruatsanga pawh a lawm ngawt ang. Anih leh, chaw ei tui phawta le...zanah chuan kan lo leng dawnnia." Pi Rinawmi chuan a han ti leh a. "Awle, chaw eitui ule, nangni pawh.." tiin Pu Biaka chuan a lo chhang a, an inthlah liam ta a.

**************************

Tlai dar 5 rik hma hret chuan Ruatsanga pawh chu a rawn haw a, kawngka a rawn luh rual rual chuan a nu a rawn au vak vak mai. "Nuuuu...anu, khawnge i awm?" tiin a rawn t(r)e chel chul mai a. Pi Rinawmi chuan chawhhmeh a lo chhuang mek a, "Hetah choka ah ka awm, enge ni vak vak a?" tiin a lo zawt let a.

Ruatsanga chu choka ah chuan rawn tlan lut nghalin, "Ihmaw, Remremi te inah ka leng a. Apa Biaka a lo haw a, VA HAW VAT RAWH, I NU IN ENGE MAW TE TE A NEI a tia, enge i neih a? Ka ta tur ami, mawh mawh mawh?" a ti leh chung chung mai.

Pi Rinawmi chu a nui suk a, "Pindanah sawn va lut la, khumah a lo awm mai ang. Chu veleh rang lutukin Ruatsanga chu pindanah chuan a tlan lut nghal a, khuma sazupui note lo muhil suk suk mai a han hmu chu  a ding chat mai, "Sa...sazupui...sazupui.." tiin a sawi hleithei lo.

A lawm lutuk chu a hnuk te chu a ulh hial mai a, ava pan nghal vat a. A chul hliau hliau va, "Anu, hei hi i lei ami? Min leisak ami?" tiin a han zawt leh a. Anu pawh chu pindanah chuan rawn lutin, "I Pa Biakzuala rawn hawn sak che a nih kha, i lawm em?" tiin a lo zawt let a.

Ruatsanga chuan a lu a bu nghauh nghauh va, "Umm..ka lawm lutuk, ka lawm rapthlak. Ka van lawm tak, a ril te a tam angem le? Anu hawh..chaw pe ang." a han ti nghal chung chung a. Anu chu a nui deuh huk a, "Ni mai hrih love, chaw ka pe sa a tia i Pa Biaka khan, keini pawh chaw ei ila, chuan zanah i sazupui thar nen khan i nau DEbo-i nen kan va leng phei dawnnia." tiin a lo chhang a.

"Anih kan chaw einaah ka pawn dawn aw.."

"Aaa khai, pawm reng te kha an duhlo ve thei a. Chutiang tur a ni ngai lo, tikhan khum hnuaiah khan dah hrih rawh."

"Mahse anu..khum hnuaia kan dah daih chuan, a vawt te a ti anga sin...a khawngaihthlak alawm."

"Bawihte, khuma kan dah reng te chuan a e vel anga sin. Khum hnuaiah khan awm hrih se, chuan nakinah a awmna tur bawm kan siam dawnnia."

Thu awih takin Ruatsanga pawh chuan a sazupui note thar chu tih nat hlau tak hian dim takin a pawm a, khum hnuaiah chuan a mut tir a. "Khai le, i intiam tawh angin i len zawh veleh home work ka ti ang i tih kha, va ti phawt la, chuan i tih zawh veleh chaw kan ei dawnnia." anu chuan a han ti leh a.

Ruatsanga chuan a school bag chu a han hawng nghal a, a home work te chu a han ti zung zung a. A tih zawh hnu chuan chaw an ei a, Deborah-i pawh hrai em em a ngai tawh lo. An rual chuan chaw  a ei ve a, a u Ruatsanga chuan a sazupui note thar te chu intithei tak chuan a han kawhhmuh vel a.

************************

Zan a lo ni a, dar 7 leh a chanve vel a ni. Pi Rinawmi te nufa thum chu an sazupui thar nen chuan Pu Biakzuala te inah chuan an leng ta a. "I sazupui note thar chu a fel em? I duhzawng a ni em?" tiin Pu Biakzuala nupui, Pi Sangkimi chuan Ruatsanga chu a han zawt vel a.

"Um...a duhawm sia, a hmeltha si." tiin Ruatsanga chuan a lo chhang a, an han nui leh dar dar thin a. Pi Rinawmi chuan polite tak hian, "Bawihte, ka lawm e pawh ila ti miah lo ania, ka lawm e ti rawh le, i pa Biakzuala bulah hian.." a han ti a. Thuawih tak chuan Ruatsanga chu a ding nalh a, Pu Biakzuala hma takah chuan ava ding a.

"Apa Biakzual, ka lawm e." a han ti deuh thlap a. Pu Biakzuala pawh chuan nui var var chung hian, "Ava han fel thin e aw...keipawh ka lawm e." tiin a lo chhang a. Chuveleh Pi Sangkimi chuan, "E taka, Bawiha, naktukah a bawm tur pawh a rawn thleng dawn e." a lo ti ve bawk a.

"Awi...a bawm tur a? A bawm tur lehzel maw..in ti ang lo thin emai, chungte chu kan lo ngaihtuah ve tawh ang chu...a bawm tur leh zel te chu kan lo ngaihtuah ve tawha mai ang chu mawle, kan lo siam ve thei tho alawm." inthlahrung tak chuan Pi Rinawmi chuan a lo ti a.

"A va ho e aw...chutiang mai mai inthlahrunna tur a awm lo, a bawm tur te chu a to hleinem." Pu Biakzuala chuan a lo ti vat a. Puitling ho an han titi nak nak lai chuan Ruatsanga chu a sazupui buaipuiin a lo la buia nasa mai, Deborah-i erawh a nu in pua in a muhil bawrh bawrh tawh thung.

Choka lamah chuan Pi Sangkimi leh Pu Biakzuala te fanu, Remremi chu a tpys chhawp hnawk hnuaiin amahin a lo inkhualte lem a. A thianpa, a kawm ve ber thin, Ruatsanga chu ava en thin a. Ani lah a sazupui thar buaipuiin a lo la tlei nasa mai si. A mal a inti deuh nge ni, "Ruatsang, hetah lo kal rawh..hei, inkhualtelem ang." tiin ava sawm deuh sek a.

Mahse Ruatsanga erawh chuan a sazupui note lo chu buaipui dang a nei thei mawlh lo, chhan pawh  a chhang lo. Remremi pawh a lungawi vak lo ni ngei tur a ni, a toys te chu a khung mawlh mawlh a. Tum deuh hmuk chung chuang pindan lamah a luh pui daih mai.

Kawngka a khar ri deuh bur chu anu Sangkimi chuan a va melh a, "Ehe, Bawihtei chu tinge mawni?" a han ti deuh hu a. Ngaih that hmel tak hian, "Aww....a mut a chhuak tawh a nih kha, va mutpui rawh." tiin Pu Biakzuala chuan a lo chhang a. Pi SAngkimi chuan sana a en a, "Ehe, dar 9 a lo ri der tawh a nih hi. Awii...Rinawm, ka va mut pui tawh mai ange aw.." inthlahrung tak chuan a han ti a.

"Nia, keni pawh kan han haw tawha ange...a tlai tawh alawm." Pi Rinawmi chuan a lo ti ve bawk a. "Ala hma alawm, a tih mut zawh ah a lo let leh mai dawn alawm. Hei, i fapa pawh ala harh that em hi, la thu rawh u." Pu Biakzuala chuan a lo ti vat a. "Aaa...ngawi teh, naktuk zing bazar ka duh dawn sia, kan han haw phawt ange." tiin Pi Rinawmi chuan a lo chhang a.

"Awle, in tih tlat te chuan le.." tiin Pu Biakzuala te nupa chuan kawngka pui thleng chuan an thlah a. "Kan lawm tak tak ania, hei BAwihtea pawh a tlei phah ngat ngat khawp mai, lawmthu kan sawi nawn ni leh teh se." tiin Pi Rinawmi chuan lawmthu a han sawi nawn leh a, an haw ta a.

**************************

Kar 1 a liam a, Ruatsanga chuan a sazupui note thar ringawt mai chu a buaipui a. Mahse a zirlai erawh tha tak chuan a ti zel a, a nu in a control hneh bawk nen. Mahse Remremi, a thiannu ber erawh a hlat tulh tulh thung a. Chu tak chu kum 9 mi lek, Remremi ngaihdan a ni hauh lo thung.

An inkawm tlem tial tial a, leng tura a rawn sawm pawn Ruatsanga chuan a lo hnial zel mai. A sazupui ringawt mai chu a buaipui a, thildang engmah a ngaihtuahin a ngaihsak thei lo. Remremi leh Ruatsanga te pahnih hi school in angah an kal lo leh ta nghal a, Remremi chuan a ngai thin khawp mai.

ZAnkhat chu Pi Rinawmi te chhungkaw thum chu Pu Biakzuala te inah chuan an leng leh a, an lenna chhan ber pawh TV an en duh vang a ni. Kum 1996 a ni a, hetih hunlaia TV nei pha chin kha chu mi khawsa thei leh hausa ve tak an ni. Hemi zan hian kum 1978-a an tih chhuah, Halloween film chu an en a.

Tual thah film a ni a, Pi Rinawmi te pawh chuan hmuhnawm an ti narawh e. Choka lamah Remremi leh Ruatsanga te chu an inkhualte lem thung a, mahse Ruatsanga chuan a ngaihtuah mawlh lo. Anu te film en lai chu choka atang chuan a khat chuan ava bih deuh chhen a, misualpa berin tual a that lai chu ava en fuh leh thin a.

Remremi'n chutia a thianpa berin a ngaihsak tha duh ta lo chu a lungawi lo sawt hle mai, mahse engmah chu a sawi lem chuang lo. Chumi zan pawh chuan inkawm tha mang lo chuan an inthlah leh ta a, Remremi pawh a rilru tak chuan a vui nasa nuah nuah khawp ang le.

*********************

Kar engemaw zat a liam leh a, Ruatsanga leh Remremi te thiandun pawh an inhlat tawh khawp mai. An inkawm ngai tawh meuh lo, Ruatsanga lah chuan a sazupui ringawt chu a la buapui reng bawk nen. Sazupui pawh tlem chuan a lo thang lian ve deuh tawh a, an nufa in an duat bawk a, a thau chak kung kung kher mai.

Inrinni a ni a, school chawlh a ni bawk a. Remremi chuan Ruatsanga chu a ngai tawh ngang a niang nge, anu te bulah len a dil a. Pi Sangkimi te chuan an lo phal ve mai bawk a nih hmel, a toys bawm kengin Ruatsanga te in lam chu a pan phei hnak hnak a. An in a thlen chuan kawngka chu a han kik karh karh a, Pi Rinawmi chuan a lo hawn a.

Kawngka bula Remremi, a toys bawm nena lo ding a hmuh chuan a nui deuh huk mai. "Ehe REmrem, enge i rawn tih dawn a? I rawn leng dawn ami?" tiin a han zawt a. "Anu Rinawm, Ruatsanga a awm em, ka lo kawm dawn a?" tiin a lo zawt let a. Nuih seih pah chian, "Awiii...animaw? Awle, ka'n ko ange aw.." tih pah chuan an in hnung lampang, sazupui an dahna lam chu ava pan a.

Ruatsanga chuan a sazupui bawk chu a lo kawm a, a lo be nasa mai. Anu chu va chhuakin, "Bawihte, saw..Remremi a lo kal ania. Va kawm rawh, a toys bawm nen thlap a lo leng ania.” tiin a ko va. Mahse Ruatsanga chu a lo ner nasa mai, “Naa...anu, ka hman lo. Hei...ka naute nen kan la inkawm alawm.” tiin a lo vin let deuh hlur mai.

“Khatin an ti ngai lo, i thiannu neih chhun a nih saw...va kawm rawh, khatin thiante ka kawm peih lo, ka kawm hman lo an ti ngai lo. Inrinni a nih hi, in chawlh  ve ni ber a nih hi. Va kawm rawh, i pa Biakzuala te tualzawlah in va inkawm dawnnia.” tiin anu chuan a han zilh deuh hlak a.

Mahse Ruatsanga chuan a kawm peih ngang lo a nih hmel, “Mahse nuu...” a han ti leh nung nung a. “Enge mahse?” tiin anu chuan a lo vin deuh hlur mai. “Ihh..ihh..inbual ni alawm.” Ruatsanga chuan a han ti bah leh deuh nuai a. Pi Rinawmi chu a han thaw deuh hak a, “Inbual ni pawh nise, i lo haw hunah ka bual mai dawn che alawm, va kal rawh.” a han ti leh hlur a.

Nu te thu awih ta na na na chu Ruatsanga chuan a hnial ngam tawh bik chiah lo a ni ta ve ang, phur loh hmel tak leh tum bur chung chuan inchhungah chuan a lut a, “I sazupui, i duh em em pawh leisaktu che an nih saw, awmdan mawi ka zirtir che kha hre reng rawh.” tiin anu chuan a hauh chhunzawm mawlh mawlh a, ruatsanga pawh a tum lian nasa mai.

**************************

Remremi leh Ruatsanga te chu Pu Biakzuala te tualzawlah chuan an inkawm a, Remremi chuan nuam ti viau mahse Ruatsanga erawh chuan nuam a ti ve hauh lo. A rilru ah chuan a sazupui ringawt chu a awm reng a, thil dang a ngaihtuah thei hlawl lo a ni ber mai.

“Hawh..kei nu ber ka nia nga, nang ka pasal i nia nga, naute lem ho hi kan fate an ni anga...” tia Remremi a tawng mawlh mawlh lai chuan, “Remrem, hawh...kan sazupui kha tel ve ila.” Ruatsanga chuan a rawn ti deuh hlawl mai. Remremi chu a ngawi hmak a, a hmel a dur nghal khuih mai.

A tum hmuk a, “Enge tel ve a ngaih na?” a han ti vin hlur a. “Awww...kan fapa ang ania nga, a tha dawn asin.” tiin Ruatsanga chuan a lo chhang a. Remremi lungawi lo chu  angawi vang vang a, “Nang chu a nuam lo e, sazupui ringawt kha i buaipui a.” a han ti deuh nang nang a.

“Aaa..kan tel ve anga, nupa chu kan ni anga, kan fapa  ani anga, a tha dawn asin.”

“Sazupui chu kan fapa ani anga maw? Mihring pawh a ni ve hleinem, ramsa alawm.”

“Ihh....aww..chupawh nise, heng ho pawh hi naute lem vek tho alawm. Inkhualte lem alawm kan nih dawn, mawhh....ka va la ang.”

Remremi chu a ngawi vang vang a, “Nihleh i rei angem?” tiin a han zawt a. “Aih rei dawn lo...ka va la zuai anga, ka rawn pawm phei nghal ang.” tiin Ruatsanga chuan a lo chhang vat a. A tawp a tawpah chuan Remremi pawh chuan a rem ti ve ta a. Rang lutukin Ruatsanga chu a tlan haw nghal a, Remremi chu ama hriat tham lek chuan a phun nang nang mai.

*************************

Ruatsanga chu inah chuan va haw a, mahse anu erawh DEborah-i ti mu in a lo muhil tlang ve hlauh mai. Ruatsanga chuan pindan chu ava bih dek dek a, anu a lo muhil ve tih a humuh chuan kawngka chu a khar a. Tichuan an verandah lamah chuan kalin thawm dim tak chuan an sazupui dahna bawm kawngkhar chu a han hawng a, sazupui chu a pawm chhuak a.

RAng takin a chhuah pui leh nghal a, tichuan Remremi bulah chuan ava pawm phei a. Remremi chuan a lo melh no lo khawp mai, “Hei le, ka rawn keng e.” tiin Ruatsanga chu a han nui deuh sung a. Tichuan an inkhualte lem chhunzawm leh nghal a, Ruatsanga mood pawh a fuh ngar ngar tawh khawp mai.

Mahse a hma a mood fuh em em leh hlim em em, Remremi erawh a tum ta hmuk mai. A chhan pawh nidang ang bawkin Ruatsanga chuan a sazupui ringawt chu a buaipui leh a, Remremi reng a ngaihsak leh tawh lo. Chu chuan Remremi thin chu a ti ur em em a, a biak pawhin Ruatsanga chuan chhanna chang pawh a hre leh tawh lo.

Darkar chanve dawn chu Ruatsanga chuan a sazapui ringawt chu a bia a, Remrei phei chu a tap lek lek tawh. Sazupui ch a en vang vang a, a haw ngawih ngawih tawh a ni ber mai. Chutia huat hmel taka sazupui na melh reng lai chuan Ruatsanga chu a rawn tho thut a, “Remrem, ka note hi lo veng lawk teh aw...ka va zung lawk ange.” a ti a.

Remremi chuan a lu a lo bu nghut ringawt, Ruatsanga chu zung turin Remremi te in hnung lamah chuan ava phei a, ava zung tur tur a. Chutih lai chuan REmremi chuan thinrim tak hiansazupui chu a pan hnai a, a han thutchilh vang a. Rum taka melh chung hian, “Nangmah vang vek, Ruatsanga nen pawn kan inkawm theih tawh loh phah...nangmah hlir a ngaihtuah che a, nang sazupui mai mai.” tiin a vin khur khur mai.

Mahse sazupui na na na chuan hrethiam hek lo, hnim chu a lo thial tuam tuam ringawt a. Chu ringawt pawh chuan Remremi chu a ti thinrim zual ta tlat mai, chu sazupui pawisawi lo tak mai chu REmremi chuan a rek ta thut mai a, sazupui chuan Remremi kutzungpui chu a seh ta mai a.

Sazupui hian mihring hi an seh ngai zen zen lova, mahse ti phut zuk emaw, man thut te hian an sa him nan an lo beilet ve thin a ni. Chutia sehna pawh chu a ni lo, mahse Remremi phu nasa leh hlau lutuk chu a hnung tlawh dawrh mai a, Sazupui pawh chuan a thlah ve nghal mai bawk.

A thinrim lutuk chuan sazupui chu a theih pa tawp chuan a pet ta chawrh mai, a leng lawp mai a. An pal hungna ban a perek lian chi, sei tak lo lawrh an chuan a hrawkah tak a inthil tlang zawt mai, SAzupui chu a khur ta ngat ngat mai a. REiloteah chuan a thi der mai a, Remrei pawh a hrilhhai kher mai.

Hnung lam atang chuan thil thleng chu Ruatsanga chuan a lo hmu vek a, ka ang phuau chung chuan a lo ding ngawi reng a. A thinrim lutuk chu engmah a sawi thei lo, a ding ngawi reng ringawt. Chutih lai chuan inchhungah chuan Pi SAngkimi chuan chawhmeh siam tur a lo chan mawlh mawlh a, pindan atanga an pa, Pu Biakzuala’n a rawn koh avang chuan chemte chu dawhkanah dahin pindan lamah a kalsan ta daih a.

Pi Rinawmi pawh a fapa lam turin a lo kal ve mek bawk a, Remremi erawh chuan Ruatsanga’n hnunglam atangin a lo en reng tih erawh a hre hauh lo thung. SAzupui ruang chu a pawt phawi a, leiah chuan a tla ri dup mai. A han khawih a, a sawi vak vak thul.

Mahse nunna a nei tawh lo, Ruatsanga duatlai sazupui chu a thi tawh. Ruatsanga chu thinrimna in a khat ta, a hmai te chu a sen t(r)awn t(r)awn mai. Ngaihtuahna fim a hmang thei tawh lo, Remremi te inchhungah chuan a lut a, tumah an lo awm lo. Dawhkana chemte chu a hmu a, a mitthlaah chuan hman zan lawka an film en a, misualpa in dim baksak lova tual a thah lai te chu a lang ta chuai chuai mai.

Tichuan chemte chu ava ban a, pawnah chuan a chhuak leh a. Chutia pawna a chemte keng chunga a chhuak lai tak chu Pi Sangkimi chuan a rawn hmu hman a, “Ruatsang...Bawiha, engatan nge chemte kha i tih a..” tiin a zawt a, mahse Ruatsanga chuan a hre pha tawh hauh lo.

Remremi chuan sazupui ruang chu a en vang vang a, a hlauthawng kher mai. Anu te hrilh tum chuan in lama kal a tum a, a hawi let leh chian chu a hma zawn takah chuan Ruatsanga chu a lo ding khur mai. Chemte ala keng zui bawk nen, Remremi chuan a hrethiam lo kher mai.

Tawng tumin a ka a nag zuau hman a, mahse Ruatsanga chuan Remremi dulah chuan a vit ta siah mai. Remremi chu a ngawi hmak a, thawm a chhuah eih lo. Chutah a han vit nawn leh a, Pi Sangkimi chu pawnah chuan a rawn chhuak ve chiah bawk. A fanu Ruatsanga’n a lo vit lai tak a hmu chu a thaw hrawk a, a au chhuak thei lo hial zawk.

Chutih lai tak chuan Pi Rinawmi pawh a rawn thleng ve chiah bawk a, thil thleng chu a rawn hmu ve nghal bawk. A th(r)awng lutuk leh mangang lutuk chu a au vak a, “RUATSANG..BAWIHA, engthil nge i tih?” tiin a va tlan nghal a. Chutah ring mangkhengin Pi Sangkimi pawh chu a au ve ta chiam chiam a.

Ruatsanga erawh chuan Remremi chu alo la vit nawn awn awn mai, Remremi pawh leiah chuan a tlu tawp a. Chawp leh chilhin a thi nghal a, Pi Sangkimi chu va tlan pheiin Ruatsanga chu a nam thlu tawp mai, a fanu ruang chu buaipui nghalin, “Bawihte, REmrem..harh teh...khawngaihin..” tiin a sawi vak vak a.

An thawm hria in Pu Biakzuala pawh a rawn tlanchhuak ve nghal a, thil thleng a hmu chu mak a tiin ani pawh chu a th(r)awng takzet. Pi Rinawmi pawh rawn tlanin Ruatsanga kuta chemte chu a paih thlak sak a, “Enge awmzia Ruatsang, engvanga ti nge i nih?” tiin a beng vak vak mai.

Pu Biakzuala phei chu awm ngaihna a hre lo, a vai ruai a ni ber mai. Vin zet hian Pi SAngkimi chuan, “Enge khatia i din reng, damdawiinah chhoh pui ang. I a ami? Ngawi reng suh...Pa-a, ka sawi chu i hria em?” a ti chiam chiam a. A harh deuh zuk a, “BAwihte...enge awmzia?” tiin a han t(r)ap hnuhnawh leh a.

Pi Rinawmi chuan Remremi ruang chu ava en leh a, “Nilo, Remrem...nilo, enge awmzia?” tiin va pan a tum chu Pi Sangkimi chuan a lo nam thlu tawp mai. Vin tak hian, “Nangni nufa kha min rawn hnaih reng reng suh u, i fapa khan ka fanu hi a vit lai ka hmu, chiang takin ka hmu..i hria em?” a ti chiam chiam mai a.

An thawm a rin em avang chuan thenawm khawveng hnai te leh an in bul vela lo kal mek te pawh chu an rawn pung khawm chak hle mai, “Enge awmzia...enge thleng a?” tiin an rawn zawt sap sap hlawm a. TAp chung chuan Pi SAngkimi chuan, “He naupang, he naupang Ruatsanga hian ka fanu hi ka mit hmuh lai ngeiin a vit a ni...ka hmu chiang lutuk.” tiin a rak hian a rak vak vak mai.

Ruatsanga erawh a ding ngawi reng a, a bulah chuan chemte, thisen kai luai mai chu a let reng bawk. Mittui tla phun ghian anu chuan a en a, “Engvang nge? BAWiha, engvanga ti nge i nih?” tiin a zawt a. Zawi muang hian Ruatsanga chuan, “Ka...ka sazupui, kasazupui a that a nih kha.” tih pah chuan a sazupui ruang chu a kawk a.

Pi Rinawmi chuan sawi tur reng a hre lo, a hamhaih vek hi a ni ber mai. Pu Biakzuala chu a hawi kual a, “Min..min pui ru, khawngaihin min pui ru..” a ti chel chul mai a. Midang ho pawh chu an rawn tlan khawm a, Remremi chu an rawn enchiang a. An zinga putar upa lam chuan a mar te chu a rawn dek a, “A thi tawh.” a ti zawi sap mai.

Chuveleh chhuak mangkheng hian Pi Sangkimi chu a tap a, a au t(r)ial ruai ruai mai. Ruatsanga chu ava en a, “Nang naupang tenawm, rapthlak lutuk. Engvanga ka fanu hi that nge i nih, mihring pawh i ni lo. RApthlak lutuk, ramhuai i nih kha, Setana sawn i nih kha. Thi rawh, thi nghal rawh.” tiin anchhia a lawh chiam chiam mai.

Pi Rinawmi chuan chet mai dan tur pawh a hre lo, a fapa chu a kuah ta ringawt a. MAhse Ruatsanga erawh chuan ngawi rengin, hrehawm ti hmel pawh pu miah lo chuan Remremi ruang chu a en reng ringawt a, a mit ala khap miah lo lehnghal. Pu Biakzuala pawh chu a thinrim ngang mai, rum zet hian Ruatsanga te nufa chu a en a.

Ava pan phei a, "Rinawm, i fapa thil tih hi i hmu em? Mawhh..ka fanu a that der asin, engtiangin nge i fapa hi nundan i zirtir a? Tualthat turin maw? Kawng engkimah kan pui che a, tiang hian maw min rulhlet dawn a? MAwhh...tunah hian ifap hi ka that ve nghal dawn mi? Chu chu i duh em? Mawhhh?" tiin a va pan hnai leh ta mai.

Pi Rinawmi chuan mangang tak hian, "Nilo, U Biak..nilo." tiin lo dan a tum a. Mahse a nam thlu tawp mai. Ruatsanga chu reh a tum lai tak chuan tlangval thenkhat chuan an lo dang hman hram a, an buai lai laih khawp mai. Patling thenkhat ho chuan Ruatsanga te nufa chu an pawt hrang a, hmun dangah chuan an hruai phei ta a.

*************************************

TO BE CONTINUE