A HANDSOME CREATURE : THE FINALE VOL - 5 Written by : Aaron Malsawmdawngzuala WARNING : 18+ CHAPTER - 6 (LAST)

 A HANDSOME CREATURE : THE FINALE

VOL - 5

Written by : Aaron Malsawmdawngzuala

WARNING : 18+

CHAPTER - 6

(LAST)

*****************

Melinda-i chu a harh a, a bula nikhawhrelova lo let reng Deborah-i chu a hmu veleh chuan tih harh tumin a sawi vak vak a. "Debo, harh teh..." tia a biak vak vak hnu chuan a rawn harh ve ta. A rawn meng phawk nghal hru mai a, "Melinda, khawnge kan awm?" a ti nghal chel chul mai. "Bengchheng suh, kan thawm an hre pha ange." tiin Melinda-i chuan a lo khap vat a.

"Khawiah nge an awm? Khawnge Victor-a te nupa kha?" a han ti leh a. "Ka hre biklo, bengchheng suh. An kal hla lovang, kan bul hnaiah pawh hian an awm reng maithei." tiin a lo chhang a. An awmna chu an han enkual a, kudam chhung niawm tak a ni. A zau lutuk lova, a thim hian a thim ruih mai bawk.

"Tlanchhuah dan kan ngaihtuah angai." tih pah chuan Melinda-i chu thawh a han tum a, mahse a thu leh hnawk mai. A ke a han en chu chain hian a lo inthlung bet a, chutiang bawkin Deborah-i pawh. "Nilo...kan ke an thlung bet daih." tiin Deborah-i chu a beidawn hmel kher mai.

Chutah han thawh kan a tum a, "Ana...Melinda, ana lutuk." tiin Deborah-i chu a then ta chawk chawk mai. "Engti zia nge?" tiin a lo zawt vat a. A kap dawm pah chuan, "Ka serh hi ana lutuk, a thip lutuk." a ti leh a, a mittui a tla thei hial. "Khawimaw ka lo en chhin...i kekawr kha han phelh teh." Melinda-i chuan a ti ta tawp mai.

Deborah-i serh chu an han enchiang a, a lo thi nasa mai a, an hrethiam ta.  Tu emawni chuan nikhawhrelova a awm hlanin a lo pawngsual ngei a ni, Deborah-i thianghlimna chu tu emawni chuan a lo tih bawrhban sak a ni. Han rinhlelh tur tuvak mah an awm chuang lo, Victor-a thil tih ngei a nih an ring nghet bur.

Deborah-i chu a tap zawih zawih a, "Awii ka duhlo, Melinda...min khawihchhia, kha mihring khan min khawihchhe vek a ni." tiin a inhnit hlawp hlawp a. Melinda-i chuan a lo kuah a, "A va han pawi tak em." tih bakin hnem dan tur vak a hre bik lo. Chutah Deborah-i chu a thinrim thut a, "Nangmah vang vek, kal lovang ka tih mawlh mawlh kha.." tiin Melinda-i chu a vin ta hrep mai.

Inthlahrung tak hian, "Bawihte ka tihpalh, inhauhna hun a nilo. Kan tlanchhuah angai, min thah ve hma hian kan tlan chhuah a ngai." tiin a lo chhang a. Deborah-i chu beidawn hmel tak chuan a thu ngui bur a, "Tih theih engmah kan neilo, kan thi dawn. Kan thi ve dawn, chu chu a nimai." tiin a lu a dawm vawng vawng a.

*********************

"Lui chu kan zu thleng ve hrim hrim dawn nge, tihian i hmelma Victor-a chu kan zawng reng dawn? Hei chawhnu a ni der tawh ania, pistol pawh kan keng bawk silo." tiin Erica chu a han phun leh nuah nuah a. "Ka duhdan phei chuan ruang kha lo veng la ka ti zawk asin, mahse i ngam dawn bawk silova. Victor-a hi helai hmunah hian a awm hnai tih ka chiang, min zui ngamlo a nih chuan i duh leh haw mai rawh." AWmpuia chuan a lo ti hmuk mai.

Erica chu a chau tawh takzet, "Anih ro ro chuan i chawl lawk teh ang, ka ke a rawl lutuk." tiin a ding a. AWmpuia chuan nep tih hmel tak hian a han melh deuh run a, mahse engmah chu a sawi chuang lo. Thingkung lian tak hnuaiah chuan an chawl dun a, "Ruang dang te hi a lo awm leh reng lo maw?" tih pah chuan Eric-a chuan chunglam chu a han melh zeuh a, mahse engmah a hmulo hlauh.

Ngawi reng chuan an thu dun a, "Tui pawh kan nei tawh lo, i heh lutuk a i in zo vek alawm." Awmpuia chuan a han ti deuh kher a. Bottle ruak chu lak pahin Erica chuan, "Sawlai lawk ah sawn tui haw ri ka hria, ka va thun ang." tih pah chuan a kal phei a. AWmpuia chuan, "Rei suh aw.." tiin a au zui a.

Tui haw ri a hriatna bul vel ava thlen chuan engemawni hi a chhar ta tlat mai, a han enchiang chu hmaikawr a lo ni. Ring tak hian, "Sir OP...hei thil ka chhar ania." a han ti lung lung a. AWmpuia lah chuan, "Thun vat la, lo chho vat mai teh." a lo ti vin hlur mai. Eric-a chuan hmaikawr chu a han en vang vang a, nalh a ti ngang mai.

"Hei hi Victor-a hmaikawr chu amawni dawn le...mahse Sir Opa sawi dan kha chuan hetiang design kha a ni silova." tih nuah nuah pah chuan a han vuah vel a. Lehlamah a chem a hum reng bawk a, a han hawikual vel a. Chutih lai tak chuan a hnung lamah chuan thawm a hre thut a, rang takin a va hawi phei a. 

Hmeichhe pakhat, la naupan hmel tak hi thing fak nen a lo lang thut mai. Eric-a chu tawng pawh a tawng hman lo, chu hmeichhia chuan a lu ah chuan a hlap pawp mai. Chu hmeichhe tleirawl chu tudang nilovin, Hannah-i thiannu Lawmi a ni. Hannah-i nena an tlanchhiat dun khan an inhloh a, tichuan Erica te awmna lam ah hian a tlanchhe phei ta a ni.

Eric-a leh AWmpuia te tawng thawm kha ral khat atang chuan a hre reng a, mahse an tawng ri  ahriat theih loh mai bakah a hmu theilo bawk. Tanpuina han dil tawp mai chu a tum hman a, mahse Hmaikawra te zinga mi, Hmaikawra thurual puite an lo nih takin tiin a biru ta reng zawk a lo ni.

Eric-a'n AWmpuia a au lai vel pawh kha a hre reng a, mahse enge a sawi erawh a hre pha chuang lo. Khatia Eric-a'n hmaikawr a han vuah chiah khan hnung lam atang chuan Lawmi chuan a hmu a, Eric-a chu Hmaikawra amaw a ti ta a ni. Erica lah hi palian ve tak, ft 5'10 vel laia lian a lo ni ve bawk nen.

Chutah chempui ala keng zui bawk nen, a kawr leh kekawr hak lah a dum ve ve a lo ni bawk nen, hmaikawra ang chiahin boot dum a lo bun ve bawk nen, Lawmi pawh a dem awm em em hran love. Eric-a chu a la thi mai lo, Lawmi chu a en reng a. Lawmi lah chu a thinrim takzet, "Hmela, thi rawh.." tih pah chuan a hlap leh ta vak vak mai a, a vaw hlum ta der mai.

Lawmi tawng ri chu hria in Awmpuia pawh chu a ding nghal vat a, a zuk chhuk ve nghal. Lawmi chuan hmaikawr chu a phelh sak a, a keng ta ran mai. Chutah AWmpuia rawn chhukthla thawm chu a hria a, a hawi chho vat a. Awmpuia chuan a zu hmu ta, a thianpa thisen nena lo let reng mai a hmuh chuan a thinphu a rang ngei mai.

Chutah  abula hmeichhe tleirawl lo ding, hmaikawr lo keng mek chu ava hmu leh bawk a. "Hey, tunge i nih?" tiin Eric-a hriat lohva a ruka a lo pai, a pistol puak ruk chu a ipte atang chuan a phawrh chhuak a, LAwmi chu a tin ta mai. Lawmi chuan a hlau kher mai, a tlanchhe nghal vat a.

MAhse AWmpuia chuan silai chu a hmet puak dur a, Lawmi tukhum ah tak chuan a fuh a. Lehlam kham thui tak, mawng em em mai ah chuan hmaikawr keng reng chung chuan Lawmi chu a lumthla ta vang vang mai. A mawng a thlen meuh chuan a ri deuh dup mai a, Lawmi pawh chu a thi ve leh ta.

AWMpuia chuan Erica ruang chu a zu pan nghal a, "Eric, thianpa....thianpa...nilo." tiin a tap a, mahse Erica chuan nunna a nei tawh der mai silo. Nilo, khawngaihin...Eric.." tiin a sawi vak vak a, mahse awmzia a awmlo. Thinrim tak hian a melh ngai chu a melh run mai a, "VICTOR, VICTOR LALTHANMAWI..nangma thil tih vek, i ruahmanna vek a ni tih ka hria a nia." tiin a au vak vak ringawt mai.

*************************

Jenny pawh chu a lo harh a, a chal chu a dawm vawng vawng a.  A kut a han en leh chu a lo thi nasa mai, "A na lutuk." tiin a maimitchhing vawng vawng a. A han meng leh chu a awmna chu ramhnuai a ni tih a hrechhuak thut a, "Ehe...khawnge ka awm?" tiin a tho nghal a. A bul vel a han en chuan nikhaw hrelova Pu Sanghluna lo let reng chu a hmu a, a bulah chuan athiante pahnih, Hriata leh Issac-a ruang chu a hmu leh bawk a.

A au hman teuh ngei mai, mahse a ka chu a hup a. A mittui a tla zawih zawih a, "Nilo, awi ka duh lo." tiin a uak tuar a, chutah Pu Sanghluna chu a lo harh ta. A mit a rawn nuai nuah nuah a, a tukhum chu a dawm vawng vawng bawk a. Jenny chuan a hlau hle mai, Pu Sanghluna pawh chuan Jenny chu ava hmu ve ta a.

"Mami, min hlau suh...ngaithla teh.." a han ti dek dek chu Jenny chuan a bula thing bung chu la vatin, "Min rawn hnaih suh, kal bo rawh.." tiin a tin ta ran mai. "Nilo, Mami...i dinhmun kha a thalo ania aw...i him lo ania." a han ti leh a. Mahse Jenny chu tawlhhnung zelin, "Ngawi rawh...min rawn hnaih hlek suh." a ti khur dar dar mai.

Zaidam tak hian Pu Sanghluna chuan, "I thiante hi ka thah an nilo....khawngaihin min ngaithla teh.." a han ti leh a, mahse JEnny chuan a duh hauh lo. A tiang ken laia tin reng pah chuan, "Min rawn umzui hlek suh.." tih pah chuan a tlanchhiat san ta daih mai. Pu Sangliana chuan a enzui vawng vawng a, beidawn hmel tak chuan a tho tuih tuih a.

A fanu zawn chu beidawn sanin a haw mai ang nge, a la zawn chhunzawm reng ang tih chu a inzawhna ber a ni. Khati khawpa rapthlak khan Victor-a khan a vau tawh si a, a hmachhawn lui leh a nih chuan amah pawh chu a thih ve mai a hlau bawk si. A inhnit fap fap a, kalna tur ber hre lo chuan Hriata leh Issac-a te ruang chu a kalsan ve ta a ni.

*****************************

Zuala chu a harh a, a lu chu na a ti hle mai. A han hawi kual a, a awmna hmun chu ramhnuai thim mup mai hi a lo ni a. A phone phawrh tumin a han indap a, mahse a hmu zo lo. A thlauh a nih ngei ringin, "Hrep tak chuan a.." tiin a phun nang nang mai. A tho kang a, a ke dinglam chu ala ti na deuh lehnghal.

Kal tuma a han inher chiah chu a bulah chuan hnim dahkhawm niawm tak hi a lo awm teuh mai a, chumi karah chuan mihring kut lo lawr a hmu ta tlat mai. A ding nghal chat a, a khur nghal zawih zawih. Hmawlh sei ve tak mai chu a la a, chu kut chu a han hawlh vak vak a. Mahse a zawi reng avang chuan mitthi ruang a nih a ring a, a va pan ngam ta.

Hnim chu a han la kiang hlawm a, mihring ruang ngei a ni. Chu ruang chu Siama ruang, Awmpuia leh Eric-a ten an kalsan tak kha a ni. Rang takin Zuala chu a tawlh hnung nghal a, "Karei leh..." tiin a rak thawt mai. A taksa ah te chuan hliam a lo awm nual a, nasa taka sawisak a ni tih a hriat hle bawk.

Zuala chuan ruang chu hreh tak chung chuan a han dap a, mahse engmah a lo pai lo. Ruang chu a kalsan leh a, chutah a bula thingkung ah chuan silai mu a rawn per zawk mai. Zuala phu nasa lutuk chu a tlu thelh a, a thlang deuh atang chuan AWmpuia chu a pistol nen chuan a lo chho mek a.

"Hey nang kha, tunge i nih?" a rawn ti vak vak mai a, Zuala chuan a hlau kher mai. Rang takin a tlanchhe nghal a, "Ding rawh.." tiin AWmpuia chuan a rawn umzui zel a. Zuala chu a tlan chak zawk tlat, AWmpuia chuan a umpha lo hle a. A pistol chuan kah a han tum thin a, mahse a mu a tlem em avang chuan a kah fuhloh a hlau si.

Vawikhat chu a han kap leh a, mahse a thleh leh tho. Lawmi a thahna silaimu nen mu thum lai chu a hmang zo ta, mu thum chauh a bang tawh. "Ding rawh, anih loh chuan ka kap ang che." tiin a au zui vak vak a, mahse Zuala erawh chuan din chu a tum lo nasa mai.  Awmpuia chuan a um pha lo telh telh a, a tawp atawpah chuan a hloh ta.

Hnim buk tam tak a awm a, thingkung tam tak a ding thup mai bawk si. Khawilai berah nge Zuala chu a bihruk a hre der mai silo, silai chuan a tin kual a tin kual ringawt mai a. Zuala lah chu a reh hmak mai si, chu ramhnuai lah chu a reh hian a reh tlawk tlawk a ni ber mai. Chutah a sir hnimbuk atang chuan Zuala chu a rawn zuang chhuak thut a, AWmpuia chu a rawn bawh tlu a.

Awmpuia pawh chuan  a pistol ken lai chu a thlauh va, a thlauh pah chuan a la hmet puak palh zui. Silaimu dang pakhat chu a khawh ral leh ta a, mu hnih chauh a awm ta. Tichuan theih tawp chhuah chuan Zuala chuan a rek bet a, mahse Police Inspector tha na na na chu a hneh lo deuh chu a ni.

Rang takin a leh thal a, Zuala chu a hnek ta siah siah mai. MahseZuala pawh chuan tlawm mai a tum bik lo,  a theih tawp chhuah chuan a bei let ve zel a. Minute 3 dawn lai chu an insual tawh, mahse a tu mah mah chu an tlawm duh bik lo. Awmpuia chuan a sawisa hi a ni deuh mah zawk, mahse Zuala chu a rawn ding chhuak ve zel tho.

An chauh dun tawh kher mai, Zuala phei chu a thi phung tawh. Chutih lai tak chuan an sir atang chuan Victor-a chu a rawn chhuak hlawl mai a, mahse hmaikawr a vuah lo. Zuala leh Awmpuia chu an meng phawk nasa kher mai, han chet mai ngaihna pawh an hrelo. Zuala chuan, "Vic...Victor?" a ti hu mai a. Awmpuia chuan mak tih hmel tak hian, "In inhria elaw?" a lo ti ve hu bawk.

MAhse Victor-a chu a ngawi reng a, a mitmeng sen rum mai chuan Zuala leh Awmpuia chu a han melh inchhawk zeuh zeuh va. Chutah Victor-a chuan Zuala zawk chu a pan thut a, Zuala chuan chet a la ve hman ngang lo. A hrawkah chuan a rek a, a chawi lawp a. An awmna atanga ft 15 vel dawn lai mai thleng chuan a vawm phei ta mai a, Zuala pawh a hnang awl awl mai.

Chutah AWmpuia chu ava melh leh a, AWmpuia chuan a lo cho nasa mai. "Lo kal rawh...kum 5 chhung teh meuh ka zawng char char che asin. Ka Station atangin i tlanchhuak a, vawiin hian ka hruai let leh dawn che tih hre rawh." a ti pung pung mai a. Victor-a chu a nui suk a, "Awle." tih ringawt chuan a chhang.

Awmpuia chu ava phei a, Victor-a chu a han hnek hawi sawk a. Mahse a che eih lo, na ti hmel pawhin a lang lo. Vawi 5 vel chu a han hnek hawi leh sawk sawk a, mahse tluk pawh a tlu lo. Chutah thinrim em em hian AWmpuia chu a en a, a rek kang ta mai. Thingkung deng dawt khawp chuan a theh phei a, a ruh a ri tuar mai.

AWmpuia kawng a chin hnuailam zawng chu a che thei ta der lo mai a, a hnar atang chuan thi a chhuak zawih zawih bawk. Chutih lai chuan Zuala pawh chuan tlanchhiat a lo tum ve mek a, mahse a ke a hliam awm avang chuan a che sawn thei mai lo. Awmpuia chu a kut hmang chuan a in hai vak vak a, tlanchhiat chu a tum ve nasa.

Muang chang hian Victor-a chuan ava pan phei a, a hnungah chuan a rap a. A ipte atang chuan pocket knife hi a la chhuak a, AWmpuia kawr hnung chu a hlim ta mai. Dim lo baksah chuan a hnungzang chu a zei ta mai anih chu, AWmpuia na ti lutuk chu a rak chel chul mai a. Victor-a lah chuan ala duh tawk lo, a hnungzang vun chu a han lip ta tak tak mai a.

AWmpuia lah a che thei der mai silo, a tuar ta ngat ngat mai a. A mittui te a tla hial a, "Duhtawk rawh...ana lutuk." tiin a au chel chul mai a. Chutah a hnungzang vun a lihna hnuah chuan a han vikt leh vak vak a, thisen chu a chik in a chik tuar tuar mai. Ala duhtawk mai lo, a kut chuan a zu zen lut titih leh ta mai a.

AWmpuia erawh chuan thawm a nei tawh lo, mahse a la thi lo. Victor-a chuan a zen ngat ngat a, engemawni pawhchhuah tum ang mai hian a pawt leh ta ngat ngat mai. AWmpuia chu a khur cher cher a, chutah Victor-a chuan Awmpuia nak ruk bung chu a rawn phawrh chhuak ta mai a nih chu.

AWmpuia pawh a zawi hnawk a, a thi chiang kher mai. A nak ruh hmang chuan a hrawkah chuan a han vit leh hram a, a bur vu mai. Zuala erawh tlanchhe lo mahse thingkung phenah a lo biru hman hlauh a, thil thleng zawng zawng chu a lo hmu thei vek. Victor-a chu a tho va, Zuala zawng chuan a hawi kual a.

Mahse a hmuh mai loh avang chuan a kalsawn ta a, Zuala pawh a thaw huai mai. A kalhnu fe ah chuan a bihrukna hmun atang chuan a chhuak ve a, AWmpuia ruang chu en pawh a en ngam lo. Vanneihthlak takin pistol chu a chhar hlauh mai, a mu a en a, mu 2 a lo la awm. A ak tha a, Rachael-i zawng tur chuan a kal leh ta a.

*************************

"Victor-a a? Tunge chupa chu?" Marema chuan a ti hu mai a, "Thawnthu thi tak a ni." tih ringawt chuan Msa chuan  alo chhang a. Hannah-i chuan phawk hru hian, "Engmaw? Victor-a chu in hre ve amaw?" tiin mak a ti hle mai. Hlauh vanga khur dar dar chung chuan Sangtei chuan a lu a lo bu nghat ringawt, "Chupa chu khawnge a awm?" tiin Marema chu ala pawr nasa mai.

Puii chuan zawi sap hian, "SAngte...kha misual Victor-a...hman kuma i thil tawn i sawi thin...kha Victor-a kha em ni chupa chu?" tiin mittui tling teuh chung chuan Sangtei chu a en a. Sangtei chuan, "Aw ni e, khapa ngei kha a ni." tiin a lo chhang a. Marema pawh chuan, "Enga? A thi tawh i ti a nilawm ni?" tiin a lo vin ve pung pung bawk a.

"Aih ala thilo...ala dam." tiin Hannah-i chuan a lo chhang leh a. Chutah Puii chuan, "Haw ang u...tunah haw nghal ang u." a ti ta nghal chel chul mai a. Msa pawh chuan, "Ni e, i haw phawt ang u." a lo ti ve bawk a. Hannah-i chuan, "Mahse ka thiante...Lawmi te, Issac-a te..khawnge an awm ka hre lo ania." tiin a lo mangang kher mai.

"I thiante zawn nan hun kan nei lo, i duh chuan kan rualin lo haw rawh. I duhloh leh i thu, kan haw hunah tanpuina kan dil mai dawn lawm." tiin Puii chuan a lo vin hlur mai. Msa chuan lui lam chu a zuk en a, "U Marem, i tawnzau khu.." tiin tuia tawnzau lo lang chu a kawk a. Marema chuan, "Ka zu la phawt ang e." tih leh zuan thlak chu a rual a.

Tawnzau chu a zu chhar a, chutah tuiah chuan pawttu awm ang mai hian a pil zuk mai. "Nilo..Marem.." tiin Puii chu a tap nghal vak vak a. Marema chu a rawn lang leh thin a, thil sawi tum niawm tak hian a ka a ang zuau zuau a, mahse a pil leh daih zel bawk si. Chutah tuiah chuan thisen a rawn lang bawk a, a tam tulh tulh lehnghal.

Sangtei chuan a hlau takzet, "U MArem.." tiin Msa chu zuanthlak ve nghal a tum a, mahse Sangtei chuan a lo dang a. Puii pawh chu zuanthlak a tum a, Hannah-i chuan a lo dang ve bawk. Chutah Marema chu a thi ta, a ruang chu tuiah chuan a lang nel nel mai. Tichuan tui chhung atang chuan an rinloh lutukin hmeichhe hmeltha tak hi a lo chhuak a, chu nu chu Angel-i a ni.

Angel-i chuan Sangtei te lam chu a pan a, "Khu...khunu khu tunge?" tiin Puii chuan a hlau hle mai. Sangtei chuan, "Ka hrelo...tunge a nih ka hrelo." tiin a lo chhang a. Msa chuan thinrim tak hian, "Zawngi..hmeichhia lehnghal. Ka u i that amaw? Ka that ve khawp ang che." tiin va pan a tum a, mahse Sangtei chuan a pawt bet tlat a.

Sangtei kut chu a thinthlak sak a, chemte kenga Angel-i lo phe mek chu rum tak hian a melh a. Mahse chutih lai chuan an chhak lawk mau hmun, a hmaa Hannah-i rawn chhuahna atang bawk chuan Victor-a chu a rawn chhuak ve ta hlawl mai a, Msa pawh a ding chat mai. "Saw saw...sawpa saw ani em?" tiin Msa chu zamna in a khat nghal a.

Sangtei chuan tap pur chung chuan, "Aw..saw saw Victora chu a ni." a ti a. Chutah Victor-a leh Angel-i te chuan rum takin an melh a, chemte an keng ve ve bawk si. Msa pawh mipa mah nise a hlau takzet, an tlanchhe ta ringawt mai a. Mahse Angel-i te nupa chuan an umzui lo, ngawi rengin an tlanchhe lai chu an en char char ringawt.

An kal liam thleng chuan an thlir reng a, chutah Victor-a chuan Angel-i chu a en a. "Kudam lamah kha hmeichhe pahnihte kha ka han enfiah lawk ange, khupa ruang khu chawhhmeh turin a sa tlem lo hawn ang che." tiin a han nui suk a, Marema ruang chu a kawk a. "Ka lo chho vat ang, tuiah hian la inchiah rih ka duh." tiin a lo chhang a, Victor-a chuan a kalsan ta a.

***************************

Jenny chu a theih tawka chak chuan a tlan zel a, a hah tawh kher mai. Kawng lah chu a hre bik der mai silova, thawm engemaw hleka chuan a hawi hru hru reng bawk a. A hah tawngkhawng tawh chu a thu chawl a, a thaw hluam hluam mai. A mitthla ah chuan a bialpa, a duh em em mai Hriata, a ka atanga thisen baw nuai mai nena a lo let reng te chu a hmu a. A thianpa Issac-a, chal vun t(r)et phunga a lo thi let reng te chu a ngaihtuah let a, a tap hawm hawm mai.

Tichuan a tho a, a kal leh ta ngat ngat a. Khua lah chu a thim tep tawh, kalkawng pawh a hmu fiahlo tan tawh. A phone chu a han phawrh leh a, signal engmah a awm thei bawk silo. A tawpah chuan hmun zawl zau nuam tak maiah chuan a chhuak hlawl mai, a lai takah chuan kudam niawm tak, lian ve tak hi a lo awm bawk.

Chu kudam lam pan chuan a tlan nghal a, kawngka chu rod hmang hian a lo invih kalh ringawt a. A han kal hnai chu hmeichhe tap feih feih ri hi a hre tlat mai a, an phun ri leh bul bul thin bawk. A lut mai ngam lo, a ding deuh vang vang phawt a. Chutah a han kik a, "AWm in awm em?" a han ti ve ngawt a.

Chutah a chhunga awm mek, Deborah-i leh Melinda-i te chuan an lo hre pha ta. "Tunge i nih? Khawngaihin min pui rawh." tiin Deborah-i chu a au nghal vak vak a, mahse Melinda-i chuan a ka a lo hup vat. Zawite hian, "Au ngawt suh, Angel-i pawh a lo ni thei asin." tiin a lo khap vat a. Mahse DEborah-i chu a mangang tawh em a ni, "Ti hi chuan kan thi mai ang, Melinda." tiin a tap zawih zawih a.

Chutia hmeichhe aw vekin tanpuina a rawn dil chu Jenny chuan kawngka chu a hawng a, rod chu invenna atan a keng lut nghal bawk a. A chhung chu a lum huk mai a, a lo thim rui bawk. Kil khata bulb dim tak hnuaia Deborah-i leh Melinda-i te lo thu reng mai chu ava hmu a, "Tute nge in nih?" tiin a rod ken lai chu a hum nghet sauh sauh va.

Deborah-i chuan, "Min pui rawh, thiannu...khawngaihin." a lo ti nghal a. Jenny chuan ava pan ta a, "Enge in chungah thleng? Tute nge in nih?" tiin a han zawt a. Deborah-i chuan tap chung hian, "Victor-a'n min man a ni, ala thi lo...ala dam..a la dam reng a ni." tiin a lo chhang a. Melinda-i pawh chuan, "Kan ke ah hian chain hmangin min thlungbet a, khawngaihin min han pui hram teh." a lo ti ve bawk a.

Jenny chuan tihdan kawng chu a zawng ve nasa, mahse chu chain chu a nget lutuk tlat. A tawpah chuan bang kila chahbi ang deuh chu a phone torch hmang chuan a en fuh ta hlauh mai, rang takin a la a. "Hei hi chahbi chu ani ngei ang..." tiin an ke an thlunna chu hawnna a han zawng leh a.

A tawpah chuan a hmu ta, chahbi chuan hawn a han tum ngat ngat a. Minute 5 dawn lai mai  abeih hnu chuan a phelh thei ta, rang takin an tho va. Jenny bawk chuan, "Tunge Victor-a chu? Ka thiante thattu pawh kha insawi Victor-a chu a ni ngei ngei ang." a han ti a. Mahse Melinda-i chuan, "I chhuak phawt te ang u..nakinah kan sawi dawnnia." a lo ti vat a. Rang takin an pathum chuan an chhuak ta a, khua pawh a thim ta.

************************

Zuala chu a kal zel a, khua a thim em avang chuan kawng pawh a hmu tha hleithei tawh lo. Chutah engemaw nem nuak hi a rap fuh thut mai a, a phu nasa lutuk chu a thal tawp mai. A han en chian nak chuan ruang bawk a lo ni a, a hmai lah chu a thi phung lehnghal. Chu ruang chu Lawmi thah tak, Eric-a ruang a ni.

Tlanchhiat mai a tum a, mahse a bula iptepui lo awm ve reng chu a hmu a. A la kang a, a chhung chu a han hai a. Tui bottle ruak leh torch light chiah a lo awm, "Hlauh mai a..torch light a awm hlauh ve." tiin a phun nuah nuah a, ruang chu a kalsan nghal vang vang a. Rei pawh a kal lo tih ah chuan hmeichhe thaw hlawp hlawp ri hi a hre tlat mai, a ding chat a.

Thing kung phen atanga lo chhuak a ni tih chu a hria, mahse ava pawh mai ngam lo. Mahse chunu phun sep sep ri chu a ngaithla chiang a, "Zuala...Zuala ka va mamawh tak che em. Lalpa khawngaihin min pui rawh...thih ka la duh lo." tia tap chunga zawitea lo phun mawlh mawlh ri a hriat chuan Rachael-i ngei a ni tih a hre ta.

Rang takin ava pan a, "Rachael.." tiin a light hmang chuan a en a. Rachael-i chu a lo phu nasa mai, "Nilo...ka duhlo." tiin a lo indang a. Mahse Zuala chuan zaidam tak hian, "Keimah Zuala...min hlau suh." a lo ti vat a. Chuveleh Rachael-i chu a thaw huai mai, a lawm lutuk chu a hnuk a ulh a.

"Zuala...alo let leh...ala dam." tiin a kuah a, a tap hawm hawm mai. "Lungngai suh...i bulah ka awm tawh alawm." tiin Zuala chuan a samah a lo chul sak a. "Engtin nge hetah i awm theih?" tiin Rachael-i chuan a zawt leh a. Zuala chuan, "Chutiang sawina hman a awmlo, helai hmun hi kan chhuahsan vat angai. Ding rawh...i kal thei angem?" a han ti a.

MAhse Rachael-i chu a ding mai thei lo, "Ka keah hian a vit a...a na lutuk a." tiin a han inhnit feih feih a. Zuala chuan a kuah a, thei leh theilo chuan an kal dun hnak hnak a. Mahse rei pawh an kal hman lo, Zuala'n a hma zawn a en leh chiah chu Angel-i  alo ding run mai. Rang takin Rachael-i chu Zuala hnungah chuan  a biru a, mahse Zuala chu a zam bik tawh hauh lo.

"Nilove Angel, tun tum chu tumah in that tawh lovang." tih pah chuan a pistol chu a phawrh a, Angel-i chu a tin ta mai a. Mahse Angel-i chuan  a hlauh loh hmel kher mai, "Ti ta che....min kap ta che...in ngaihawm dun ka tih tehreng nen, min thah i tum mai amaw?" tiin a nui har har a. "Ka kap tak tak dawn che ania.." tiin Zuala chuan a vin vak vak a.

Mahse chutih lai tak chuan an sir atang chuan eng dang a rawn awm leh a, "Khawngaihin kap suh." patling aw hian a rawn ti a. An va hawi phei thap a, Pu Sanghluna a lo ni. Mak ti tak hian Angel-i chuan apa chu a en a, "Ka...ka pa.." a ti tham tiak mai. Pu Sanghluna mittui chu a tla zawih zawih mai a, "Bawihte...ka fanu." tiin Angel-i chu a en a.

Chutah Angel-i chu a maimitchhing a, a lu dawmin a au ta vak vak mai. Tumah chuan an va pawh mai ngam lo, a tawpah chuan Angel-i chu a zawi hnawk mai. A thingthi dawt a, nikhawhrelovin a let zui nghal der mai. Pu Sanghluna chuan va panin, "Bawihi...harh teh.." tiin a buaipui nghal a.

************************************

An motor awmna lam an chhuah chhoh meuh chuan kuah a thim der tawh, "Nilo..Marema kha  a that..Marema khaa..." tiin Puii chu ala tap reng mai a. Motorah chuan an lut a, "Pui, kan haw vat angai. Inti pachang hram hram rawh, tanpuina kan dil vat dawnnia." tiin Sangtei chuan a hnem mawlh mawlh a.

Msa erawh a ngawi reng, a thlan a tla buah buah mai a. Motor chu start a han tum a, a nung thei mai lo lehnghal. "Hrep taka...nung rawh...nung vat teh." tiin a au vak vak ringawt mai a. Chutah a nung ta hlauh mai, motor light in an hma zawn a en chiah chu an au nasa ngei mai. An hma zawn takah chuan Victor-a chu a hmaikawr vuah in, chem lian tak keng chungin a lo ding run mai a nih chu.

Mahse motor chu a tlan thei lo leh tlat, a thi leh rih thin. An mangang kher mai, "Su rawh...su mai rawh." tiin Puii chu a au vak vak bawk a. Chutah Victor-a chu a rawn phei leh ta, motor sirah chuan a ding ang ren rawn a. A hmaa Melinda-i leh Deborah-i te chuanna motor a tih ang bawk chuan a chawi leh ta mai a, kawsir side drain ah bawk chuan a letling zawng chuan a let leh ta vung mai.

Tukverh chu a han hnek keh leh a, leng leh lenglo chuan tukverh atang chuan Puii chu a hnuk chhuak leh a. "Nilo..Puiii.." tiin Sangtei chu a au vak vak a, motor ke ah chuan Puii lu chu a tauh tir chawrh mai. Puii chu nikhawhrelovin a awm der mai, a Victor-a chuan a pu nawlh mai a. Sangtei te chu a han en leh a, "Nangni chu a lehpek ah aw...thi mai tur atan chuan in uiawm bik tlat." tiin a nui suk a, a kalsan ta a.

************************

Zuala leh Rachael-i te chuan Pu Sanghluna bulah chuan thil awmzia te an han zawt a, Pu Sanghluna chuan engkim chu a hrilh ta vek a. Zuala te pawh chuan Victor-a leh Angel-i an tawn dan te, an thiante an thah thute pawh chu an hrilh ve ta vek a. Pu Sanghluna'n a fanu neih chhun, Angel-i'n tual a lo that ve thin tih a hriat chuan a rilru a na hle mai.

Angel-i chu Pu Sanghluna chuan  a pu nawlh a, tichuan Zuala te thiandun nen chuan hmun him lam panin an kal ta a. An kal zel a, "Keipawh kawng hi ka bo riau mai, a thim bawk si nen." tiin Pu Sanghluna chu a phun deuh nuah nuah a. A tawp a tawpah chuan kudam awmna bawkah chuan an chhuak leh ta a, Rachael-i leh Pu Sanghluna chu an inmelh ringawt.

Kawngka a lo inhawng huau a, "Kan lut mai dawn em ni?" tiin Zuala chuan Pu Sanghluna chu a zawt a. Rachael-i chuan, "Tah sawn alawm Victor-an min dah...helai hmunah hian kan kal tawh alawm." a lo ti vat a. Zuala chuan a pistol chu a phawrh a, "Min lo zui ru." tiin hma a hruai a, an zui ve mai bawk.

Mahse tumah an lo awm lo hlauh a, Angel-i chu chhuatah chuan an mut a. Minute 10 vel hnuah chuan  alo harh a, "Angel BAwihte...i lo harh tawh maw?" tiin apa chuan a lo be nghal a. Chuveleh Angel-i chu hlauh hmel em em hian apa chu a melh a, a khur nghal zawih zawih mai. "Min hlau suh, i pa ka nih hi..min hlau suh." tiin a hnem mawlh mawlh a.

Angel-i chu a tawng lo, a ngawi reng ringawt. Apa chuan zaidam tak hian, "Engkim ka hria alawm, mi i that thin. Ka hre vek, mahse ka ngaidam che. I duh vanga ti i nilo tih ka hria, min han hrilh teh. Engtin nge Victor-a khan a tih che a...enge i chungah thleng tiin a han zawt leh a. Mittui tla teuh chung chuan Angel-i chuan, "Ka in thunun theilo a ni, ka pa. Ka inthunun thei ngang lo a ni." tiin a tap zawih zawih mai.

**************************

ANGEL-I SAWI : 

Victor-a hi kum 5 vel lek a nih atang khan apa hian kut a thlak nasa thei em em a, a nu lah chuan a chhan ngai bik der lo. Anu leh pate lah chu an inhau reng mai a, apa chuan anu chu vawi tamtak kut a thlak thin bawk. An retheih em avang chuan an school ah pawh Victor-a hian hmuhsit a tawk nasa thei hle a, a chang phei chuan an sual rawn hrep thin.

Hun a lo kal zel a, kum 7  a ni ve ta a. Vawikhat chu a nu leh pa an inhauh lai chuan an inluahna neitu hi a lo kal a, an inluah man chu a rawn thing a. Mahse pek tur an neih siloh avang chuan thla khat tal chu hun pek leh an lo dil a, mahse in neitupa chuan a lo rem ti hauh lo. Police call ah a vau ta mai a, Victor-a pa chu a sa kher mai.

Tichuan chemte chuh thutin in neitupa chu Victor-a pa chuan a that ta mai a, Victor-a pawhin a hmu ve vek. A ruang chu an phum bova, tun thlengin kha in neitupa kha kei leh Victor-a tih loh chuan a awmna an hre zui ta lo a ni. Chuta tang chuan mi thah chakna chu Victor-a chuan a nei ve ta a, a rilru chu a kal sual chho tan ta a ni.

A hmasa berah chuan school-a amah ti duhdahtu ber, Williama chu a bitum ta a. William-a school bang chu a lo chang a, an ina lenglut ve tur chuan a sawm ta a. William-a pawh chuan a lo remti ve mai a, tichuan an in fal tak mai lam chu a panpui ta a. Hmun fal deuh an thleng ta maw tih ah chuan Victor-a chu a kal muang deuh a, William-a hnungah chuan muangchang hian a kal ve a.

Chutah thing tum a la a, William-a chu a vaw thlu ta mai a. A tawp a tawpah chuan a vaw hlum ta, mahse chu a tualthahna hmasa ber chu a lo hmu tu an awm tlat, chu chu apa, Victor-a pa ngei a ni. A thinrim em em a, tichuan Victor-a chu school kal tir  a phal ta lova. Nasa takin a sawisa thin a, vawikhat phei chu a mit a halsak hial a  ni.

Chuvang chuan Victor-a mit hi a sen rum zel a, contact lens hmangin a thup bo mai mai a ni. Kum 8 a lo tling chho a, a tualthah chakna chu ala reh chuang lo. Vawikhat chu a nu le pa inhau chu nidang zawng aiin an thawm a ring a, a tawpah phei chuan apa chuan hmaikawr te vuahin an u chu a rikrap ta chiam mai a.

Chempui la in an nu chu a tin ta mai a, annu chuan a hlau ngei mai. Tlai lam a lo ni a, Victor-a pa chu rui chungin a lo haw a. thutthlengah chuan a muthlu a. Annu chuan a en reng a, chutah choka a chemte chu chuh thutin an pa muhil lai chu a vit ta siah siah mai. Kil khat atang chuan Victor-a chuan a lo en reng a, mahse hlauhthawnna engmah a neilo.

A hmuhnawm a ti hial zawk, anu chuan Victor-a chu a en a. "Bawihte...mangtha aw.." tiin a invit hlum veleh ta mai a. Chuta tang chuan Victor-a chu home-ah dah a ni a, mahse a chet mak theih em avang chuan complain pawh a tam thin khawp mai. Ramhuai biak lam te a buaipui chho va, atawpah phei chuan anu leh pate thlarau a biak thin thute chu a sawi ta a.

Kum 18 vel a tlin meuh chuan home atang chuan a thlanchhuak a, tichuan a bo zui ta vang vang a ni. Aman min hrilh dan chuan mi pawisa te a ru thin a, khaw dang dang ah a kal kual a. Biru reng rengin hun a hmang a, kum 30 a nih thlengin mi thil ru reng rengin a khawsa ta a ni. A pawisa ruk te hmang chuan a nung chho ve zel a, a tualthah leh hmasak ber chu kum 10 vel liam ta a thian ho lui kal te kha an ni.

Khalai hmunah khan, a nu leh pate damlaia an in ngeiah khan in asa leh a. Tah chuan a cheng ta a, tual thatin a hun a hmang chho leh ta  ani. Khatia kan khua atanga min rukbo khan a tir chuan doctor amaw ka ti a, mahse a hnuah chuan doctor nilovin setanic, ramhuai be thin a ni tih ka hre ta a.

Rinbial chhungah saruak vekin min muttir a, tichuan eng eng emaw hi a chham kual a. Thawm mak tak tak te ka hria a, ka taksa chu ka thunun thei tawh ta thin lo a ni. Thla 2 vel chhung chu chutiang hlir chuan min hrem thin a, a tawp a tawpah chuan a thuhnuaiah chuan ka awm ve ta a ni.

***********************

A sawi pah chuan a tap zawih zawih a, "Anih leh engtin nge chung zawng zawng chu i hriat?" tiin Zuala chuan a lo zawt vat a. "Aman min hrilh vek a ni...min mantirh khan. Ka taksa  a thunun hma khan, aman min hrilh vek a ni." tiin a lo chhang a. Pu Sanghluna chu a thinrim ngei mai, a hmai chu a sen vek thei hial.

Chutih lai chuan kawngka a rawn in tlawh hawng pawp a, Victor-a chu puii rekbet chung chuan a rawn lut a. An lo ding nghal thap mai, Angel-i'n Victor-a a hmu chiah chu a hlauh hmel em em a. Victor-a chuan thinrim tak hian, "Thih in duhlo a nih chuan chhuak vek ula, Angel-i kha kalsan rawh u." a ti khur khur mai a.

Mahse Zuala chuan a pistol chu a phawrh a, "Nilove...zanin hi i tawpna tur a ni ve tawh, Victor. A tawk tawh e, tunah chuan kan hun a thleng ve ta. I thi dawn, i thi khawp ang." a lo ti ve ta sak sak mai a. Victor-a chuan chemte a phawrh a, Puii hrawkah chuan a chuktuah a. Vin zet hian, "Ka thusawi in awihlo a nih chuan he hmeichhia, pawisawi lo hi ka that ang." a ti leh khur khur mai a.

Mahse tumah chu an che duh bik lo, an ding ngawi reng hlawm a. Puii erawh chu nikhawhrelovin ala awm reng a, Victor-a chuan a vuan bet reng a. Chutah Puii hrawkah chuan a zai ta mai a, a rawn meng kawk mai. Rachael-i chu a au vak a, Zuala hnungah chuan a biru nghal a.

Victor-a chuan Angel-i chu a en a, "Angel, hetah lo phei rawh." a ti vin thak mai a. Mahse Angel-i chu a che eih lo, a din ngai chuan  a ding reng ringawt. Chutah a rawn phei ta, Zuala chuan a silai chu a han hmet puak a. MAhse Victor-a darah a fu hlauh mai, a eu deuh zawk ringawt a.

A chemte chu a va vawm phei a, Zuala darah chuan a fuh ve thung. A bur chat mai a, a thal tawp mai. Pistol lah chu a thlauh va, a thim laiah chuan a thleng phei daih mai. Victor-a chuan bang kila galon bur, petrol-a khat vek mai chu a la lawk a, kudam chhung chu a leih ta puat puat mai.

A leih pah chuan, "Kan thi vek ang...Angel, nangpawh ka ta i nih loh chuan tu ta mah i ni dawn bik lo. I pa pawh a thi anga...Zuala, nangpawh i thi ang..kan thi vek law law ang." a ti khur khur mai. Chutah Zuala chu a rawn tho kang a, a dara chemte bur vu mai chu na ti chung chung chuan a pawt phawi a.

Victor-a chu rum zet melh pah chuan, "Aih...nangmah chauh i thi ang. Hawh le..kan insual lohna pawh a rei ta. I han ti leh ila...han che ta che." tiin ava pan ta mai a. Thinrim tak hian Victor-a chuan falon bur chu a paih thuai a, Zuala lam chu ava pan ve ta a. Zuala chuan lo vih a tum a, mahse a lo bum a.

Zuala dulah chuan a khup chuan a do ta siah siah mai, Zuala chuan chemte chu a thlauh va.Pu Sanghluna chuan lo puih a tum a, hnunglam atang chuan Victor-a chu a lo man bet a. MAhse an pahnih a an beih rawn chung pawh chuan an hneh lo dun kher mai, Zuala chu bang keh thawt khawp chuan a tlawh bet a.

Chutah Pu Sanghluna chu chhuatah bawhbetin a rek vak vak a, "Lo kal suh ka ti che a ni lawm ni?" tiin a vi khur khur a. A rek hlum dawn ta mai, chutah Victor-a chu a eu zawk mai. A hnungzangah chuan chemte a bur va mai a, a vittu chu tudang nilovin, a nupui Angel-i ngei a lo ni.

Rilru nat hmel tak hian Victor-a chuan Angel-i chu a en a, "Tinge? Ngatinge duhtak?" a ti sup ringawt. Inthlahrun hmel tak leh hlauh hmel tak hian Angel-i chuan, "Victor...ka...ka pa ni asin..ka pa...ka hmangaih a ni." a lo ti tham tiak a. Victor-a chuan a hnungzanga chem chu a phawi a, a rak thawt mai.

Chutah Angel-i biangah chuan a dawm a, "Ni e..ka hrethiam alawm. Ka ta i ni tawh dawnlo tih ka pawm e, mangtha le." tih pah chuan chemte chuan a vit ve ta sia siah mai a, Angel-i chu a tlu tawp mai. Pu Sanghluna chu rawn thovin, "Nilo..ka fanu." tiin a va pan phei a. Mahse Angel-i chuan a lo chhang thei tawh lo, a lo thi der tawh.

Zuala lam chu a pan leh a, Zuala chuan a lo la cho nasa mai. Din pawh ding tha hleithei lo chuan posi te chu a lo la lak khum vel a, Victor-a chu a thinrim takzet tawh. A va rek vak a, bangah chuan a nambet a. Chutah chhuatah chuan a theh leng leh lawp lawp mai, tichuan banga lo intar, hmaikawr chu lain a vuah leh ta a.

Pu Sanghluna erawh a fanu ruang chu kuahin a tap zawih zawih mai, thildang a ngaihsak hman hlawl lo. Victor-a chuan Zuala chu a pan leh mek a, chutih lai chuan silai a puak dur mai. Zuala pistol chu kengin Rachael-i chu a lo ding khur zawih zawih mai a, Victor-a chu a lo kap hi a lo ni. Mahse vanduai thlak takin a mal ah a kap a, Victor-a chu a thi lo nasa mai.

Rachael-i lam chu ava pan a, Rachael-i chuan silai chu a han hmet leh vak vak a. Mahse awmzia a awmlo, a mu a zo tawh tlat. Rachael-i samah chuan a kek a, Zuala awmna lamah chuan a theh phei lawp mai. Zuala chuan a lo kuah a, Victor-a chuan chemte chu kengin a tin kual a, "Tumah in chhuak lovang, tumah in chhuak bik lovang." tiin a bai auh auh mai.

Thinrim hmel em em hian Pu Sangliana chu a rawn ding chhuak a, Victor-a chu a en rum ngei mai. Bang sira galon bur, petrol-a khat vek chu a la lawk a. Amah chu a inleih ta vak vak mai a, Victor-a pawhin a en hau ringawt. "Ka pu, enge tih i tum?" tiin Zuala chu a mangang kher mai. Chutah Victora chu petrol hmang chuan a va theh ve leh a, Victor-a lah chu a ke a nat avang chuan a lo che tha thei bik mai silo.

A kuta lo indang pah chuan, "Enge maw i tih le? Putar.." a lo ti vak vak ringawt. A bur a ruah thleng chuan a theh a, tichuan Zuala te chu a va en leh a. A ipte atang chuan lighter  aphawrh chhuak ta mai, "Tlanchhe ru.." tih pah chuan Victor-a chu ava bawh rawk mai a. Lighter chu a hmet alh ta, anpahnih chuan an alh dun ta chiam mai a.

An tal dun vak vak a, hmundang te chu a alh kai a. Rang takin kawngka lam chu Zuala leh Rachael-i te chuan an pan dun nghal a, mahse an chhuah hma chuan Zuala chu a ding leh a. Rachael-i chuan, "Tinge i din? Hawh kal vat ang." a ti chul mai a. Mahse Zuala chuan, "Aih...ka nau a that a. Chuvang chuan a thi lai hi ka en duh a ni...a thi ngei tih chian ka duh." tiin a ding tlat mai.

Tichuan Pu Sanghluna erawh chu a kanghlum der tawh, mahse Victor-a erawh ala che tlat. Kudam chu a kang tam telh tleh mai a, mahse Zuala chu ala che sawn duh eih lo. Victor-a chu a hmaikawr kang sawr vut vut atang chuan a rawn meng sen leh rum mai a, a taksa kang hluah hluah chung chuang bawkkhup chung hian Zuala chu a en reng a.

A zawi tial tial a, a bawk ta thlawp mai. Tichuan Zuala chuan a hmelma pa, a nau thattu Victor-a chu a kan hlum thleng chuan a thlir a, a chhuahsan ve ta a. Rachael-i nen chuan chu kudam alh hluah hluah mai chu an kalsan ta a, a tawp a tawpah chuan Victor-a chu an mangtha ve thei ta hram a ni.

*****************************

Vanneihthlak takin Melinda-i, Deborah-i leh Jenny te chuan khawchhung an lut thei hlauh mai a, tichuan tanpuina an dil a. Khaw hnai bera tlangval te leh khawthlang hruaitute chu an ramhnuai lamah chuan Jenny, Deborah-i leh Melinda-i te chuan hruaiin an chhukthla nghal a, police an hruai bawk. An kalkawngah chuan SAngtei te sumo, a letlinga lo awm run mai chu an hmu a.

Sangtei leh a pasal MSa leh Hannah-i te chu an lo la dam hlauh mai, an chhanchhuak nghal a. Chutih lai chuan mipa pakhat leh hmeichhe pakhat, rawn bai chho dun uih uih te chu an hmu a. Zuala leh Rachael- te an lo ni. Jenny-i'n Hannah-i a hmu chiah chu a kuah nghal a, an tap dun hawm hawm mai.

Police te chuan thil awmzia an han zawt a, Zuala chuan engkim chu a hrilh ta vek a. Rang takin Police te chu an chhuk nghal a, tlangval leh paho thenkhat te pawh an kal tel ve a. A bang zawng chuan Sangtei, Msa, Hannah-i, Jenny, Deborah-i, Melinda-i, Zuala leh Rachael-i te chu khawlam pan chuan chhohpui an tum ta a.

Motor-a an luh hma chuan Zuala chuan thlang lam ramhnuai kara mei khu vut vut chu a en a, "Mangtha le Victor...mangtha vang vang le." tiin a phun sap a. Khaw lam pan chuan an haw chho ta a, Hannah-i pawh apa thu a lo awihlo chu a inchhir takzet. Sangtei pawh chuan a hlauh em em Victor-a a thi tih a hriat chuan a hlim hle a, "Ka zalen ve ta." tiin a phun sap bawk a.

Tichuan tualthattu nunrawng, hmeltha em em bawk si. Mi khawngaihna neilo, tumah zuah ngai lo. Victor-a, Victor Lalthanmawia...Hmaikawra tia an hriat lar, kum 10 chhung tehmeuh mi lo that thin chu a tawp a tawpah chuan a nupui Angel-i pa ngei chuan a thihchilh ve ta a, engtikah mah a lo let leh tawh ngai lovang.

***********************

THE END