A HANDSOME CREATURE : THE FINALE VOL - 5 Written by : Aaron Malsawmdawngzuala WARNING : 18+ CHAPTER - 5

 A HANDSOME CREATURE : THE FINALE

VOL - 5

Written by : Aaron Malsawmdawngzuala

WARNING : 18+

CHAPTER - 5

*****************

Sawibuang khaw kawng chanve pawh an la pel lo tih ah chuan Deborah-i leh Melinda-i te chuanna sumo chu a chhe ta tlat mai, Aizawl an chhuahsanna pawh ala rei lo. Passenger ho thenkhatte chu zum ram thiarin an chhuk nghal a, driver chuan motor chu a enfiah nghal char char bawk a.

"Ava timing lo ve....kan kal tand awn chauh va." tiin Melinda-i chu a phun deuh nang nang a. "A rei lovang chu a tih kha, an siam tha vat mai ang." DEborah-i chuan a lo ti ve bawk a. Mipa thenkhatte chuan meizial te an zu pah a, motor chhungah chuan Melinda-i leh Deborah-i chauh chu an awm a.

Passenger hi paruk an ni a, Deborah-i leh Melinda-i te unau, nu pakhat leh patling pathum te niin an vaiin driver nen pasarih an ni. Chutia driver-in motor a siam mawlh mawlh lai chuan hmaikawr vuah pakhat, sang zet leh paluin zet mai hi kawngsir atang chuan a rawn chho thut mai a.

Passenger zinga mi pakhat, Pu Mafela chuan ava hmu a. Mak ti tak hian, "Sawpa saw en teh u, kham atang sawn a rawn vak chho mawle." tih pah chuan a kawk a. Midang pawh chuan an en ve thup a, "Hmaikawr te a vuah lehnghal amawni?" tiin driver chu a nui suk a. "Hmaikawr." tih thumal driver-in a lam ri chiah mai chu Deborah-i beng a verh zawk mai.

A maimitchhing lai chu a rawn meng kawk a, "Hmaikawr a?" tiin a thu tha nghal sawk sawk a. Chutah an sumo dinna lam pana Hmaikawra rawn kal mek chu a hmu ta, "A ni theilo, ka duh lo." a ti nghal chel chul mai. Pa ho pawh chuan Hmaikawra lo phei chu an en reng a, "Ngaih ava ti tha lo ve sawpa saw, kan lam a rawn pan lehnghal ania." tiin Pu Mafel-a chu a han phun leh nang nang a.

Driver chuan, "Ka va bia ange.." tiin a va kal phei ve ta a. Chutih lai chuan Deborah-i hlau lutuk chu Melinda-i chuan a lo buaipui mek a, "Enge...enge awmzia?" tiin a zawt a. Mahse Deborah-i chuan a hma zawn kawh pah chuan, "Victor-a." tih chauhvin a chhang thei. A khur zawih zawih a, hlauhna hlirin a khat.

Melinda-i chuan ava en a, "Sawpa saw maw? Saw saw Victor-a maw?" tiin mak a ti ngang mai. DEborah-i erawh chuan a chhang thei tawh lo, a tap pur tawh mai. Driver chuan Hmaikawra lam pan pah chuan, "Hey thianpa, tunge i nih?" tiin a han vin deuh thak a. Mahse Hmaikawra chu a ding eih lo, a kal ngai chuan a kal reng a.

Driver zawn a va thlen chuan driver chu a han melh run a, "Ngaithla teh, thianpa.." ti a lo dan a tum chu Hmaikawra chuan driver lu chu a kut pahnih chuan a man bet a. A herh ri ta pawp mai, a ringruh tliak ri chu midang ho pawh chuan an lo hre pha hial. Pa ho chu thinrimin Hmaikawra lam chu an va pan a, an zinga nu pakhat, Pi Rini erawh hlauvin motor lam a pan thung.

"Melinda, hawn sak rawh.." tiin Deborah-i chu a au tuar tuar a, mahse motor a rawn thleng tep tawh tih ah chuan motor chung chu a rawn ri dup a, hmeichhe pakhat hi motor chung atang chuan a rawn zuangthla thak mai. "Tunge sawnu saw?" tiin Melinda-i chuan a kawk a, mahse Deborah-i chuan a lu a lo thing ringawt.

Chutah Pi Rini chu a zuan tlu a, a kekawr ipte atang chuan poket knife hi a rawn phawrh a. Pi Rini hrawkah chuan a vit ta siah siah mai, ka pawh chhawn lovin a thi nghal. Chutih lai chuan pa ho chuan Hmaikawra chu an lo beih rawn ve mek bawk a, mahse hneh lo tak an ni. Pu Mafela chuan kawngsira tiang chu a la a, Hmaikawra bekah chuan a vaw fuh ta hlauh mai.

A tlu hnawk a, chu chu remchangah la in an vai chuan an bawhbet ta a. Mahse kha hmeichhia, Pi Rini thattu, Angel-i ngei mai chu a rawn tlan phei a. A pasal Victor-a lo beihrawntute chu pocket knife hmang chuan an hrawk ah te, an hnungzangah te a vit ta siah siah hlawm mai. Hmaikawra pawh a rawn tho thei ta, amah vaw tu ber Pu Mafela na tuar bawk reng chu a en vang vang a.

Lamlian charah chuan a lu chu a rap bet a, chutah na mangkheng hian a rap ta siah mai a nih kha. A boot bun chhah leh lian tha tak mai chuan Pu Mafela hmai chu a ngam riap riap khawp mai, a mitmu a chhuak pur a, a hnar ru pawh a rawn lang thei hial. Midang ho chu a mal tete in an hrawkah a zai a, a that ta vek mai.

DEborah-i te unau chiah an bang ta, Angel-i nen chuan sumo lam chu an pan a. An unau chuan an hlau kher mai, kawngkhar te chu an kalh vek a, glass an up vek bawk. Sumo hma takah chuan Victor-a te nupa chu an ding ran mai a, Deborah-i te chuan an hlau takzet. An unau chuan an inkuah a, chet pawh an che ngam lo.

Chutah Victor-a chuan sumo chu a sir zawng chuan chawi kan a tum ta mai, mahse a tirah chuan a thei mai lo. Muang chang chuan a rawn kang ve ta telh telh a, Deborah-i te chu an au nasa ngei mai. Side drain ah chuan motor chu a nam liam a, a letling zawngin a awm ta vung mai le.

Tichuan Victor-a chuan tukverh chu a hnek keh vek a, Deborah-i te unau chuan an samah a tham vak a. Sumo tukverh ah chuan leng leh leng lo hian an unau chuan a pawt chhuak dun a, an lu ah chuan na em em hian a chhu ve ve a. Nikhaw hrelovin an awm ta, an pahnih chuan a pu dun nawlh mai.

***************************

Chaw an ei kham a, Siama chu a lo la let thei chuang reng reng lo mai. An mangang tawh hlawm khawp mai, "Hriata, kan zawng dun phawt mai dawn em ni?" tiin Issac-a chuan a han zawt a. "In zawn daih teh, hmeichhe ho hetah hian kan lo awm tawp ngam hleinem." tiin Jenny chu a lo vui nuah nuah a.

"Anih chuan kan hawsan dawn tihna em ni?" tiin Hriata chu a vin deuh lek lek mai. "Aih, Siama tel lo chuan kan haw lovang." Lawmi chuan a lo ti vat a. Issac-a chu a ding hluai a, "Engpawh nise insiam fel phawt ang u. Siama chu haw pahin kan zawng chho tawh mai dawnnia, haw hma loh chuan kan chhungten min ngaihtuah tawh lutuk ang." a han ti a.

"Mahse Siama chuan thlamah hian min rawn zawng leh si ta se..." tiin Lawmi chu a tap lek lek tawh. "Thlam lamah a awm lo aniang, engpawh nise insiam phawt teh ang u." tiin Issac-a chuan a chhang a. An insiam fel ta a, an thianpa Siama chu ngaihtuah viau mahse tih ngaihna vak a awm silo.

Haw chhoh paha zawng mai tur chuan thuthlukna an siam fel ta a, an bungrua te chu khungkhawmin haw zai an rel ta a. An kal pah chuan zawite hian Hriata chuan, "Bro, keichu nimina kan nula hmuh Angel-i kha ka rilru ah a la awm reng mawle." Issac-a nghawk zeuh pah chuan a han ti su su a.

"I mak e aw...Siama vangin a rilru hah em em a.."

"Aih nilo...Siama bo tak daih nen hian a inzawm tlat a hriatna ka nei."

"Engvang chuan nge a inzawm anga?"

"Ka hre biklo, a inzawm tlata hriatna ka nei a...ka hrethiam bik lo."

Chutih lai tak chuan hmeichhe au thawm an hria a, an ding thap mai. Hmeichhe pathumte phei chu hlauvin an inkuah khawm nghal a, thawm lah chu an bul hnai deuh lawk atanga lo chhuak a ni lehnghal. "Chu engthil nge?" tiin Issac-a chu a hawi kual a, an sira hnimbuk atang chuan hmeichhe pakhat a rawn bawk thlawp mai.

Chu hmeichhia chu tudang nilovin, Rachael-i ngei a ni. A ke ah chuan hliam a tuar a, chemtea vihna niawm tak chuan a kaw deuh phut lehnghal. Hmeichhe ho chu an au tuar a, "Tunge i nih?" tiin Hriata chuan a tiang ken lai chuan a tin nghal a. Mahse Rachael-i chu a tap a, "Thiante u..khawngaihin min pui ru.." tiin a thaw hlawp hlawp mai.

Issac-a chuan a kai tho vat a, "Thiannu, enge awmzia?" tiin a zawt a. Mahse Rachael-i chuan a chhang hleithei lo, a hmai te chu  a pem nuai mai. "Enge i chungah thleng a?" tiin Hriata pawh chuan a lo zawt ve bawk a. "Vic....Victor-a..Victor-a.." a ti thei tawk, a la hlauh hmel em em a. "Tunge chupa chu? Tunge Victor-a chu?" tiin Hannah-i chuan a lo zawt vat a.

Inhnit hlawp hlawp pah chuan, "A lo let leh a ni...a nupui Angel-i nen..min thah an tum, min thah an tum a ni." a ti leh a, a tap zawih zawih mai. Chutih lai chuan hnung lam atang chuan silai inkau ri hi an hre thut a, an va hawi phei chu Pu Sanghluna a lo ni. Rawn kal pheiin Rachael-i chu a silai chuan a rawn tin a, "Zawngi, ka fapa i that amaw?" a rawn ti ta mai.

"Tunge i nih a? Enge thil awmzia hi?" tia Issac-a a han tawng dek dek chu silai chuan  atin ve nghal a, "Ngawi rawh...tumah tawng tawh suh u." a ti vin tuar a, an ngawi ta thap mai. Pu Sanghluna chuan a han melh kual hlawm a, silai chuan a tin kual a. Chiang fek fawk hian, "Tute nge in nih? SAwi rawh u." a ti vin ta thak thak mai.

Hlau tak hian Hannah-i chuan, "Ka pu, engthil sual mah kan tilo. Intihlim turin luiah kan kal a, kan thianpa Siama a bo daih a. Chu chu kan zawng mek a, engmah kan tisual lo." a lo ti zung zung a. Rachael-i chu zu en leh in, "Henu hi in thiannu a ni ve em?" tiin Pu Sanghluna chuan a zawt leh a.

"Aih, kan hmu thut a. VICTOR-A LEH ANGEL-I TE NUPA IN MIN THAH AN TUM tiin a rawn tap vak vak ringawt a." a han ti chiah mai chu Pu Sanghluna chu a meng phawk nasa kher mai. "Angel-i a? Victor-a nen....nupa maw?" a ti hu mai a, tleirawl ho erawh chuan an hrethiam lo tulh tulh mai.

Chutah Rachael-i chu silai chuan a tin leh a, "Angel-i chu khawnge a awm? Ka fapa Rinsanga kha i thah tiraw?" a han ti leh a. Mahse Rachael-i chuan tap chung hian, "Ka pu, khapa kha ka that lo. Angel-i zawkin a that a ni..Angel-i zawkin." tiin  alo chhang let a. Pu Sanghluna chu a sa pap pap tawh kher mai, "Engmaw i sawi a? Ka fanu in a u Rinsanga chu a that ang maw?" a ti khur dar dar mai.

Rachael-i chuan mak a ti em em a, a tap lai pawh a bang hmak mai. Pu Sanghluna chu mittui tling teuh chung chuan a en a, "Angel-i...i fanu maw?" a ti hu mai a. Vin zet hian Pu Sangliana chuan, "Aw ni e, khawiah nge a awm min hrilh rawh?" a ti vin leh vak vak a. Rachael-i chuan hlauh hmel tak hian, "Ka..ka hrelo. Min man a, min phuarbet a. Mahse ka rawn tlan chhuak thei hram a ni, khawiah nge a awm ka hrelo." tiin a thaw hlawp hlawp mai.

Hriata chu a ngawi vang vang a, "Ngawi teh Issac, Angel-i chu nimina kan hmuh kha a ni thei mai angem?" a han ti zauh pek a. Pu Sanghluna chuan Hriata chu a en leh vat a, "Engmaw i sawi? Angel-i chu in hmu amaw?" a ti leh khur khur a. Zam hmel tak hian Hriata chuan, "Aw..mahse in sawi Angel-i chu a ni em ka hrelo." tiin a chhang a.

"Kha aia chiang khan han sawi teh."

"Ihh nimin khan kan riahna tur thlamah alo awm a, ft 5'2 vel leka sang a nih ka ring. A hmel tha a, a ngo bawk. Hnar zum lampang, mitmeng fiah tak a ni bawk."

Rachael-i chuan zawite hian, "Angel-i ngei a nih chu." a rawn ti sap mai. "Tunah khawnge a awm?" tiin Pu Sanghluna chu a han vin leh tuar a, "Kan hrelo, kan hrelo tak tak." tiin Issac-a chuan a lo chhang vat a. Chutih lai chuan patling kuttum tiah vel lung hi a rawn thlawk phei fua mai a, Jenny lu ah chuan a ri chawrh mai.

T(r)e pawh a t(r)e hman eih lo, a thal nghal tawp mai a. Sir lam an va melh chu Hmaikawra alo ding run mai. Hannah-i leh Lawmi hlau lutuk chuan an thiannu nikhawhrelova let reng Jenny chu an buaipui hman ngang lo, chak mangkheng hian an tlanchhe nghal a. RAchael-i pawh thei leh thei lovin leiah chuan a lo tawlh ve vak vak bawk a, Hriata leh Issac-a erawh tlanchhiat mai an tum bik lo.

Pu Sanghluna chuan a silai chuan a tin a, "ZAwnga..khawnge ka fanu Angel-i a awm?" tiin a vin khur khur a.  Mahse chak lutuk tak mai hian a rawn tlan thut a, Pu Sanghluna chuan a silai chu a hmet puak hman lo. Victor-a chuan a rawn bawh thlu a, Pu Sanghluna chu a hnek ta siah siah mai a, a thi phung mai.

Issac-a leh Hriata erawh han chet mai nachang pawh an lo hrelo, Victor-a chu a rawn tho va. Issac-a chuan hnek a han tum a, mahse a kut chu a lo man chat mai. A elh sak vak a, a ri tuar tuar mai. Issac-a na ti lutuk chu a au vak vak a, Hriata lah chuan, "Hey..thlah rawh...thlah vat rawh." a lo ti vak vak ringawt.

Victor-a chuan Issac-a sam chu a tham a, a bula thingkung ah chuan a cham chu a tauh tir ta siah siah mai le. Thingkung ah pawh chuan thisen a luang zawih zawih mai, vawi sarih vel lai a tau tir hnu chuan a chal vun pawh  athler vek tawh. Leiah chuan a han paih thal leh pawp a, Issac-a chu a thi der tawh.

Pu Sanghluna silai thlauh chu Hriata chuan a chhar a, Victor-a chu a tin a. A tap pur mai, "Hey, kalbo rawh...anih loh chuan ka kap ang che." tiin a khur zawih zawih a, a zam hle bawk. Thei leh theilo hian Pu Sanghluna chuan, "Mama...kap rawh, ka kau sa vek..kap rawh." a lo ti ve tawk tawk bawk a.

Chutah HRiata chuan a kap ta, mahse silai kap ngai miah lo a ni bawk a, Victora banah chuan a kap ta daih mai. A mu thun leh dan lah engmah a thiam tawh der silo, Hriata chu a mangang kher mai. Silai chuan hlap  ahan tum ringawt a, mahse awlsam tak hian a lo chhuhsak a. Silai kawm chuan Hriata hnarah chuan a chhu pawp a, a thal tawp mai.

Chutah Pu Sanghluna ipte pui chu Victor-a chuan a chhar a, silai mu chu a la chhuak a. Pu Sanghluna chuan, "Nilo...Victor, that suh..naupang mai ala nih kha. I pawi engmah a sawi lo, that lul suh." a ti lawm lawm a, a che tha thei bik der silo. Victor-a erawh chuan a ngaithla lo, silaimu chu a thun a.

A han kau ri rak a, "Victor..khawngaihin ka fanu kha min pe let rawh. Khawngaih takin, ka ngen a che." tiin Pu Sanghluna chu a tap lek lek mai. Victor-a chuan silai chu  a lek kang a, hnar thi phunga lo mu zawi reng Hriata ka chhungah chuan silai dawt chu a thunlut ta mai. Hriata chu a meng phar awn awn a, Victor-a lah chuan a awmah a rap bet ran mai si.

"Nilo...Victor, ti suh...ti lul suh." tiin Pu Sanghluna chuan a ngen a, mahse Victor-a chuan silai chu a hmet puak ta. Hriata ka chhung atang chuan thisen a lo chhuak a, a thi ve leh nghal der mai. Victor-a chu a han hawi kual a, mahse Rachael-i chu a lo tlan bo ve hman daih tawh. A maimitchhing vang vang a, Pu Sanghluna chu a melh leh a.

A kun hniam a, a hmaikawr chu a phelh a. Pu Sanghluna mitah tak chuan a en a, "Ka hrilh che a ni lawm ni, kum 5 liam ta khan chiang takin ka hrilh tawh che kha. I fanu hi rawn zawng tawh suh, a chhan chu ka ta a ni tawh. Tunah pawh hian ka duh chuan ka that thei che a, ka thah chak hle bawk che. Mahse Angel-i pa i nih vang chauhvin tun chiah chance ka pe leh ang che, tun chiah.." tih pah chuan a samah a tham a.

Lei charah chuan vawi hnih vel chu a lu chu a tauh tir chawrh chawrh a, Pu Sanghluna chu a bing mup tawh mai. Victor-a bawk chuan, "Thihpuina tham a nilo, i dam chhuak ang. Reilote nikhawhrelovin i awm anga, tichuan i harh leh mai ang. Ngawi rengin haw la, i fanu hi rawn zawng leh tawh ngai suh ang che." tiin a kalsan ta a.

**************************

Zing chaw ei kham hlim vela chhuak kha a ni bawk a, Zuala pawh in Aizawl a thleng tep tawh. Kilometre tlemte chauh a awm tawh a, mahse hnai lutuk erawh ala nilo. Chutiah a tlan mek lai chuan kawng sira scarf lo let reng chu ava hmu a, a bike chu a tiding a. Chu scarf chu a en chiang a, tu ta nge a nih tih pawh  a hria.

A bialnu,  ahmangaih em em Rachael-i scarf ngei  a ni. A hlauthawng nghal em em a, "Nilo, Rachael...nilo.." tiin Scarf chu a en reng ringawt a. A bike lam pan chuan a kal leh a, a tlan leh ta zel a. Thui pawh a tlan hma chuan side drain-a sumo letling zawnga lo let bur mai chu a hmu leh a, a ding leh a.

Motor dang erawh chuan an rawn tlan pel mai zel a, mahse Zuala erawh chuan a bialnu Rachael-i te chuanna sumo ngei a nih ringin a han enchiang a. Mahse a lo nilo hlauh mai, mahse  angaih ala tha chuang hauh lo. A bul vel chu a han en kual leh a, kawng sir vela thisen niawm tak luang zen zuih mai te chuan a ngaih a ti tha lo tawlh tawlh mai.

Tichuan kawng sir lam ramhnuai deuh chu a han bih thla dek dek a, kawng awih lutuk lo hi a lo awm a. A bike chu kawngsirah chuan a side tha a, a lock thlap bawk a. Kawngsir-a ramhnuai lam panna kawng zim tak leh chep tak lo awm ah chuan a lut thal ve ta ringawt mai, thui deuh fe chu a kal thla ve zel a.

MAhse chutia a pan thla zel a nih chuan kawng a bo mai ang tihte chu a hlau hnuhnawh leh a, let leh mai chu a tum a. Chhoh leh tuma  ahan inher chu a sir hnim kar a ruang panga lai mai, Melinda-i leh Deborah-i te chuan pui mi pali leh driver ruang, rem leh rem lova lo in hnawh khawm tun mai chu a hmu ta thut mai.

Thisen an kai nuai bawk nen, pakhat phei chu a mitmu a la chhuak pur zui. A phu nasa lutuk chu a au vak a, a in rap pial ta. A sir kham awih lutuk lovah chuan a lum thla ta mai a, a la lum thui em em mai lehnghal. Ramhnuai thim takah chuan a lum lut thla zel a, a tawpah chuan thingkungah a lu a sawh dawt a, nikhawhrelovin a awm zui nghal.

*****************************

Angel-i chuan a pasal Victor-a chu a lo nghak reng a, Melinda-i leh Deborah-i nikhawhrelova let reng te chu a veng ran a. REilote hnuah chuan Victor-a pawh chu  alo thleng ve ta, "Enge i han tih leh a?" tiin Angel-i chuan a lo zawt a. "Thawm ka hria a, ka han enfiah leh lawk mawle." tiin a lo chhang a.

"RAchael-i kha i va phuar nghet awmlo ve a, engtin nge a tlanchhuah theih zawk?" tiin Victor-a bawk chuan a han ti leh a. Angel-i chu a lo ner sak mai, "A ke a na lehnghal a, khawiah hian a tlan thui awmlo emai." tiin a lo chhang hmuk a. Victor-a chuan Deborah-i nikhawhrelova let reng chu a han en vang vang a, a mitthlaah chuan thil tam tak a lo lang zut zut a.

Sawibuang khua a awm laia Pu Rama te nupa in an chhanchhuah laite, Victor-a nilova Mama zawk a nih laite chu a ngaihtuah chhuak a. DEborah-i a duh em em lai te, a suangtuahna khawvela an lendun lai te chu a ngaihtuah let a, a en ngawih ngawih mai. Angel-i chuan Victor-a chu a han melh ren rawn a, "Enge i ngaihtuah a? Hmeltha i va ti awm ve?" tiin a lo khi suk mai.

Victor-a chu a khi suk a, "Nang tluka tha an awm lo, bawihte." tih pah chuan a han kiss a, Angel-i pawh chuan rang takin a lo chhang a. An tisa chakna a chhuak leh ta tlat mai, Victor-a chuan a pawm nawlh a. RAmhnuai lamah chuan a pawm phei a, an va sarak dun chiam mai. Chu ramhnuai thim ruih mai hnuaiah chuan an nupa chuan nuam an tawl a, nupa nun chu duham tak hian an hmang dun ta a.

********************************

SAngtei te nupa leh Puii te nupa pawh chuan lui chu ban thleng ta, "Saw tah sawn thlam a awm nghal bawk a, nakinah thil kan han ei dawnnia." tiin Marema chuan a hmaa Hannah-i te thian ho lo riahna thlam chu a han kawk a. "Ehe, hemi luiah hian ka la kal lo reng reng." MSa chuan a lo ti ve bawk a.

"AWi a lum si, i cheng phawt teh ang u." tiin Puii chu a inphelh deuh nghal tung tung a, tuiah chuan a cheng nghal bawrh bawrh a. Msa leh Marema erawh chuan zu chu an la chhuak a, "Hey...ruih chhe khawpin han in na teh u." tiin rum zet hian Sangtei chuan a melh dun a. "Dik chiah, kan inthen nghal vang vang ang." fiamthu ti tak deuh chuan Puii pawh chuan a lo ti ve bawk a.

Msa leh Marema te erawh chu an nui suk ringawt a, tichuan zu chu an indun ta a. Sangtei pawh chu a inphelh ve a, tui chu a cheng ve ta a. Marema te chu an titi pah a, an lem hnem tawlh tawlh a, an titi pawh a tui dun tawh khawp mai. Um chanve dawn an in hnu chuan an duhtawk ve ta a, zu chu an dahtha a.

Marema chu a han tho tuih tuih a, "Khawi nge....i han cheng ve dawn ang hmiang." tih pah chuan a thawmhnaw te chu a hlip a, chutiang bawk chuan Msa pawh chu a lo inphelh ve mial mial bawk a. Chutih lai tak chuan an lui kalna lam nilo, lehlam mau hmun atang chuan hmeichhe pakhat hi a rawn let thla tawp mai.

"Min chhan ru.." tia au chung hian a rawn lum thla hi a ni ber mai, Msa chuan ava hmu a, a va tlan vat a. Marema pawh chuan a zui ve nghal a, "Ui tunge a? Enge awmzia?" tiin Puii pawh chuan tui chu a chhuahsan a, Sangtei pawh chuan a zui ve bawk. Msa chuan chu hmeichhia chu a han en a, ala naupan hmel em em lehnghal.

"Mami...enge awmzia? Tunge i nih a?" tiin a han zawt a, chu hmeichhe tleirawl chu Hannah-i  a ni. "Hmai...hmaikawr vuah pakhatin min thah  a tum. Kan thiannu pawh lungtum lian deuhin a vawm a, kan kalsan daih. Ka..ka thiannu, Lawmi pawh khawnge a awm ka hrelo." tiin a tap hluam hluam mai a.

Msa leh Sangtei te nupa chu an inmelh nghal hru mai, Sangtei chu hlauhna in  a khat leh nghal der tawh. "Tumaw? Tuin maw thah tum che?" tiin Marema chuan a han zawt leh a, "Tunge a nih ka hrelo, hmaikawr a vuah a." tih ringawt chuan Hannah-i chuan a lo chhang leh a, a tawng tha hleithei tlat lo.

"Tunge chu hmaikawr vuah chu ni reng reng a? Khawnge tunah a awm?" tiin Marema chu a pawr ngei mai, "Ka hrelo..ka hrelo.." tiin Hannah-i chu a tap zawih zawih mai. Msa erawh chu a ngawi reng a, a nupui Sangtei hlau hmel chu a en reng ringawt a. "Tunge chupa chu  a hming? Tunge?" tiin Marema chu ala pawr nasa mai.

Mahse Hannah-i chu a thaw hleithei lo, "ZAwt tawh hrih suh, a hlauthawng a nih hi." tiin Puii chuan a pasal chu a lo khap a. Marema lah chuan a chempui a han la a, "Khawnge a awm? Ka'n that ange...tunge a hming i hria em?" te a ti thul. Chutah chiang fek fawk hian Sangtei chuan, "A hming chu Victor-a a  ni, Victor Lalthanmawia." a rawn ti chang fak mai.

***********************

TO BE CONTINUE