A HANDSOME CREATURE : THE FINALE VOL - 5 Written by : Aaron Malsawmdawngzuala WARNING : 18+ CHAPTER - 4

 A HANDSOME CREATURE : THE FINALE

VOL - 5

Written by : Aaron Malsawmdawngzuala

WARNING : 18+

CHAPTER - 4

*******************

Zing dar 8 velah chuan Hannah-i te thian ho pawh chu an harh ve ta hlawm a, an lu anat hmel hlawm kher mai. Zan hmasa lamah an lo che nasa hlawm bawk nen, an meng chuai hlawm mai. "In tho nuam hlawm maw?" tiin an han in be liam liam hlawm a, mahse Lawmi chuan Siama a awm velo tih chu a hre nghal a.

"Ehe..khawnge Siama hi?" a han ti deuh vak a. Ngaih that hmel zet hian Issac-a chuan, "Aww...a tho hma anga, exer a la aniang." a lo ti mai a. Hriata pawh chuan, "Siama hi chu zing exer ala ziah alawm, amahin a lo haw veleh mai ang." tiin a lo tuihnih ve bawk a. "Hawh u...rawng bawl vat ang u." tiin Hannah-i chu a tho a.

"Ni e, rawng bawl teh u. Haw hma reilote tui kan cheng leh anga, chawhnu lamah kan haw dawnnia." Issac-a chuan a lo ti ve bawk a. Jenny chuan, "Ni e, khaw thim hmain i haw teh ang u. A hrim hrimin Lawmi, Siama thawh lai chu i hre miah lo em ni?" tiin Lawmi chu ava en a. "Aw hrelo, ka mu tui lutuk a." tiin a lo chhang a.

"A ho mang e aw...alo haw ve mai ang. Tho teh ang u, keichu ka morning dawn, lu ana emai." tiin Issac-a chu a nui suk a. "Ka duh ve." tiin Hriata pawh a lo khi suk mai. An vai chuan an tho a, an mutbu te chu an thlep fel a. Hmeichhe ho chuan rawng an bawl nghal a, Hriata leh Issac-a erawh chuan zan hmasa lama an in ban chu an han indun leh a.

***********************

Rachael-i chu a harh thut mai, a thu chhuak hlawl mai a. A awmna hmun chu a thim ruih mai a, in ni awm tak, boruak tlem em em na hmunah a lo awm reng mai. Chhuatah a lo mu a, mahse bang pawp atanga ni zung lo lut a han en chuan zan a nilo tih chu a hre thei. A hlau em em a, a thlan pawh a tla bawrh bawrh mai.

"AWm in awm em? Min pui ru...khawngaihin.." tiin a au vak vak a, mahse chhangtu tumah an awm lo. A tap vak vak a, "Nilo...ka duh tawh lo...hetia awm leh hi ka duh tawh lo. Ka peih tawh lo, khawngaihin Lalpa, min chhanhim rawh." tiin a maimitchhing a, a mittui a tla zawih zawih mai.

A tho kang a, a thim em avang chuan engmah a hmu thei lo. Bang chu a dap kual a, plug a dap fu hlauh mai. Rang tak chuan a on nghal a, mahse a awmna room bang kil zim taka dim light chauh chu a eng a, plug dang a hmu bawk silo. Light lah chu a dim em em a, a eng(yellow) deuh pup ringawt.

Chumai ala nilo, light hnuai chiah ah chuan mipa niawm tak, amah hnugchhawn zawnga lo let reng mai chu a hmu bawk. A hlau em em a, a va pawh mai ngam lo. Hlau chung chung chuan muang chang hian ava pan hnai a, "Ka pu...i harh em? Tunge i nih...ka pu?" tiin thawm dim tak si chuan a au mawlh mawlh a.

Mahse chupa, chhuatlaia mu reng mai chu chet pawh a che eih lo. Hlauthawng tak chung si chuan  a pan phei zel a, a bulah chuan ava ding a. "Ka pu.." tiin a darah chuan a han beng thak thak a, mahse a lo la chhang chuang lo. Chutah a han huai let a, putar ve tawh tak mai hi a lo ni reng mai.

Mahse nunna a nei tawh lo tih hriat tak mai hian a lo vawt thlur mai a, a vun pawh a dang vek bawk. Chumai ala nilo, chu putar lah chu a lo thi meng kur lehnghal. Chu putar chu tudang nilovin, Victor-a reh hlum ngei, Pu Khuma ngei kha a ni.  Rachael-i hlau lutuk chu a au vak a, a zuang tho nghal a. A tawlh hnung a, vanneihthlak takin kawngkhar a dap fu hlauh mai.

HAwng a tum a, mahse a hawng thei lo. Kawngka chu a beng vak vak a, "Min pui ru...khawngaihin min pui hram teh u." tiin a rak chiam chiam a, mahse tumah chuan an chhang thei der bawk silo. A beidawng takzet, a ke a hliam lah chu a na em em mai bawk si. "Min pui ru...khawngaihin.." tiin a au va, a aw te chu a chhuak tha hlei thei tawh lo hial.

***********************

Zing dar 8:30 vel a ni a, Deborah-i leh a cousin Melinda-i te pawh chuan an thawmhnaw te chu Sumo ah chuan an dah fel mek a. Deborah-i erawh chu a rilru ala nuam chuang lo, hlim hmel a pu mawlh lo a ni. Melinda-i erawh a phur hle thung a, a khi deuh sung reng mai. "Debo, park ah khan leng ang aw...ka kal chakna a rei tawh lutuk." tiin a nui sang reng mai a.

Za lo deuh hian Deborah-i pawh chu a khi suk a, "Umm...kan kal dawnnia." tiin a chhang ve mai a. "Tinge i hmel hi...a ngui bur reng mai." tiin Melinda-i chuan a han melh run a. Inthlahrun hmel tak hian, "Ka tho fulo deuh aniang, ka tha alawm." tiin a lo chhang mai a. DEborah-i nu chuan, "Bawihte...han cham rei su aw...in thlen veleh min lo hrilh dawnnia." a lo ti ve bawk a.

"Um tehreng mai, kan kal phawt ange." tiin Deborah-i chuan a chhang a, motor chhungah chuan an lut ta a. "Kan lo tawngtai pui reng ang che u, tluang tak khan in kal dawnnia." tiin an inthlah liam ta a. DEborah-i chuan side glass atang chuan a nu leh pate chu a en zui ngawih ngawih a, a thla a muang hlawl lo a ni.

*************************

"Ka pate, haw tawh teh ang. Nimin lamah pawh nilengin kan zawng tawh a, beidawng ve tawh mai teh." tiin Rinsanga chuan a pa Sanghluna chu a ngen lawm lawm a. "Aww...tinge i lo kal ve? I chau hma si, a tar zawk pawh kan la chau lo ania." a lo ti deuh hmuk a. "Ka chauh a nilo, nangmah zawk ka ngaihtuah vang che alawm." tiin Rinsanga chu a ner nung tawh mai.

Mahse thutak zet hian Pu Sanghluna chuan, "Ngawi lawk teh....chu i hre ve em?" a han ti a, Rinsanga pawh chu a ngawi ta a. Thawm chu a reh diak a, "Enge a?" Rinsanga bawk chuan  ati leh hu mai. "Shh..bengchheng suh." tiin Pu Sanghluna chuan  a lo khap leh a. Chutah an awmna atanga hla lutuk lovah chuan hmeichhe authawm an hre ta, "Chu i hre ve em?" a han ti leh a.

Rinsanga pawh chuan a hre ve ta aniang chu, "Ehe...hmeichhe aw a ni tiraw?" a ti ve ta nge nge a. "Aw niin ka hria, hawh teh...i va phei vat teh ang." tiin Pu Sanghluna chu a phur ngei mai, thawm lo chhuahna lam pan chuan a phei nghal a. A hmanhmawh lutuk leh a fanu, kum 5 liam ta a bo ta, Angel-i a nih a beisei lutuk bawk chuan a ipte ah lai chu a thlauh daih mai.

Thawm lo chhuahna lam chu an va thleng a, hmun zawl nuam em em mai hi a lo awm a. "Ehe..helai hmun hi khawilai nge maw nile?" tiin Rinsanga chu  a hawi hu hu mai. "Chutiang buaipui suh...en teh saw...kudam ava ang ve." tiin Pu Sangliana chuan an hma zawna kudam niawm tak, lian ve tak chu a kawk a.

Chutah kudam kawngka chu a rawn inchum bur bur a, "Min pui ru..min pui hram ru.." tiin chu hmeichhia bawk chu a rawn au leh ta vak vak mai. Kawngka chu rod bung, chhah tha ve tak hmang hian a lo invih kalh a. "Kan hawng dawn em?" RInsanga chuan a han ti leh te te phawt a. Pu Sanghluna erawh chuan chhan pawh a chhang lo, rang takin a hawng nghal a.

Chutah Rachael-i chu a rawn bawk chhuak titih a, a thaw hlawi hlawi mai. "Tunge i nih? Mami...enge awmzia?" tiin Pu Sanghluna chuan a bia a, Rachael-i chu a hawi hru hru mai. "Tu..tute nge in nih?"  ati khur dar dar a. Rinsanga chuan, "I thawm kan hria a, kan lo pan che a nih hi." tiin a lo chhang a.

Chutia amah chhanchhuak tu tur a hmu chu Rachael-i chu a thaw huai mai, mahse a kudam awmna rimchhia leh boruak tlem lutuk vang nge, a hlauhthawnna a la reh lo zawk ni. A zawi hnawk a, nikhaw hrelo chuan a tlu tawp mai. An biak an biak pawh chuan a chhang hleithei lova, a chang changin a rawn harh leh thin a.

"Ka pate, tui kha han in tir teh." Rinsanga chuan a han ti a, mahse Pu Sanghluna chuan a ipte a thlauh tih a hrechhuak thut. "Aw haw...ka thlauh daih alawm, ka va la leh lawk ange." tiin a let leh a, "Rei suh aw.." tiin Rinsanga chuan a au zui lawm lawm a. Rachael-i chu tih harh a han tum leh a, mahse thawm dang a hre leh ta tlat mai.

An mahni lam pana hmeichhe pakhat lo kal phei mek hi a hmu a, chu hmeichhia chuan hmaikawr a vuah a, baseball bat niawm tak, lian tha tak mai hi a hum run mai a, a hmawrah chuan thir len zum fer fur mai hi a in vet kual nuaih bawk. Rinsanga chuan a hrethiam lo hle a, "Hey...tunge i nih?" tiin a han au vak vak a.

Mahse chu nu chuan  achhang lo, thinrim hmel em em hian a rawn pan zel a. "Hey thiannu, tunge i nih ka tih chu.." tiin a han vin deuh lek lek a, mahse ala chhang chuang lo. Rinsanga pawh chu a thinrim ve deuh ta, "Khanglang chuan.." tiin Rachael-i chu leiah chuan a mut tir a, a chempui chu a phawr chhuak ve ta a.

"Ding rawh...ka thin i ti rim palh hlauh ange aw.." tiin Rinsanga chuan  a han vin leh khur khur a, mahse chu hmeichhia chuan a la rawn pan phei zel tho. "Mai mai chuan le....nat i duh em ni?" tiin Rinsanga chu a thinrim tawh takzet. An thawm chu hria in Rachael-i pawh chu a lo harh a, a han tho chhuak a.

A han meng chiah chu a thin a phu nghal dup dup mai, "An...Angel.." a ti tham tiak a. Chutah a tho vat a, "Thianpa, tlanchhia ang...tlanchhia ang." tiin Rinsanga chu ava pawt vak vak a, mahse Rinsanga chu hmeichhe pakhat lek vang chuan tlanchhiat a tum bik hauh lo. "Lungngai suh...hlau reng reng suh." tiin a lo thlamuan a.

Tichuan chu hmeichhe lam chu ava pan ta, mahse chunu chuan a kut lehlam atang chuan engemawni hi dip var vek mai hi a rawn vawm thut a, Rinsanga mitah chuan a lut ta. "Khai...a thip lutuk." tiin a mit chu a nuai nghal vak vak a, chu hmeichhia chuan chulai tak chu remchangah la in Rinsanga luah chuan a tiang ken lai chuan a hlap ta chawrh mai le.

Thirlen zum chu Rinsanga luah chuan a bur va mai a, a thingthi hnawk mai. Mahse chiang takin chunu chuan Rinsanga chu a en a, a hmaikawr chu a phleh ta. Rinsanga'n chu hmeichhe hmel a han en chu mak a ti hle mai, a hmaia thisen luang zawih zawih chung chuan a mittui a tla hial. "Angel..Angel.." tiin a thaw hlawi hlawi mai a.

Chu hmeichhia chu tudang nilovin Rinsanga nau, a cousin Angel Lalremruati ngei a ni. Angel-i pawh chuan mak tih hmel tak hian a en a, Rinsanga chu a kawk a. Rinsanga lua a tiang hmawra thirlen bur va mai chu a phawi a, Rinsanga pawh a rak that mai. Leiah chuan a bawk thlawp a, Angel-i lamah chuan thei leh theilo hian a kut a phar chhuak a.

"Angel. nilo...bawihi.." tiin a tawng chhuak thei tawk tawk ani ber mai. MAhse Angel-i erawh a awmdan a diklo, a au vak vak a. A rum nghut nghut bawk a, a lu te chu a dawm a. Chutah a mittui a tla a, a u Rinsanga chu enin a khur dar dar mai. Mahse Rinsanga erawh chuan thisen a hloh hnem tawh lutuk, a tlin ta ngang lo.

Angel-i chu a la en reng a, "Bawihte...Angel.." tih chiah a sawi thei tawh, a bawk thlawp a, a thi zui ta nghal a. Rachael-i erawh chu tlanchhiat tumin a lo bai auh auh a, mahse a kal rei thei silo. A tlu leh hnawk a, "Ka pu..ka pu.." tiin Pu Sangliana chu a au va. Angel-i chuan a u Rinsanga ruang chu ala en reng a, a khur cher cher mai.

Chutah a maimitchhing a, a ding thut mai. A rawn hawi chhuak a, a nui leh ta vak vak mai a. Rinsanga ruang chu a tiang ken lai chuan a vaw leh ta vak vak mai, "Thi rawh....tunge i nih ka hrelo che. Thi rawh, thi nghal rawh." tiin a au vak vak a, chutah Rachael-i lam ava pan a. A samaha a kek a, ramhnuai lamah chuan a hnuk lut leh ta daih mai.

Reiloteah chuan Pu Sangliana pawh a lo let leh a, mahse thisen nena Rinsanga lo let reng mai chu ava hmu ta. Rang takin a tlan phei a, "Nilo..bawiha...Rinsang." tiin a sawi vak vak a. MAhse Rinsanga chuan nunna  a nei tawh lo, a chhang thei tawh lo. Pu Sanghluna chu  a tap a, "Kha hmeichhia kha..ka that khawp ang." tiin Rachael-i thil tih a nih chu a ring nghal bur.

*************************

Sangtei te nupa leh Msa u te nupa, Puii leh Marema te pawh chu lui lam pan chuan an kal mek a. Msa chuan phur tak hian, "Lui kal lohna  a rei tawh bawk a, vawiin chu thimah law law i haw teh ang u." a han ti vel a. Puii pawh chuan, "Eng ti tiha rawt chhuak ve mai nge maw i nih le...Sangtei lah lo kal ve bawk." tiin a lo nui ve huah huah bawk a.

"Tunlai chu a awm a nuamlo thei lutuk a, han vah harh pui ka duh mawle." tiin Msa chuan a lo chhang a. MArema chuan, "Ni e, lui kal te hi anuam ve hrim hrim a. Mahni hlir hian ka kal thin a, kalpui tur awm se ka tih lai tak ania. In nupa in inlo peih ve hlauh chu a tih zia hle mai, Sangte..inpa hi ruih i phal em?" tiin a han fiam vel a.

Sangtei erawh chuan a chhang lo, a lo nui suk ringawt. Puii bawk chuan, "Hey nangni kha, haw theilo khawpin han rui vaih teh u, in chak lo khawp ang." a lo ti khur khur a. Chutia an titi mawlh mawlh lai chuan Sangtei chuan an kalna sir, mau hmun bula tu emaw lo ding run mai chu a hmu thut mai.

Hmaikawr a vuah a, a sam a sei bawk. Ft 6 vel laia sang a ni a, a dum vekin a inthuam bawk. A phu nasa lutuk chu a lo hlauh thin em em, Victor-a chu a rilru ah a rawn lang nghal zawk mai. A au vak a, a pasal MSa phenah chuan  a biru nghal a. Midang ho pawh chu chutia Sangtei a au ta vak mai chu an phu nasa kher mai, "Enge a? Enge ni ta?" tiin Msa chuan a lo zawt vat a.

Maimitchhing chung hian Sangtei chuan Hmaikawra a hmuhna lam chu a kawk a, "Sawpa saw...tunge?" tiin a tap titih nghal a. A kawhna lam chu midang ho zawng chuan an han en a, tumah an hmu bawk silo. "Tumah an awmloh saw.." tiin Puii chuan a lo chhang a. Sangtei pawh chuan hlau chung chung chuan a han en ve leh a, mahse tumah  a hmu tawh lo.

"Enge i hmuh a?" tiin Marema chuan a lo zawt ve bawk a, Sangtei chuan mak a ti hle mai. "Ahh..ihh...tu emawni lo ding ang deuh hi ka hmu a.." a ti bah nuai ringawt a. Msa chuan, "I hmusual a nih chu...saw tumah an awmlo." tiin a hnem a. Mahse Sangtei rilru chu a nuam lo takzet, "Va enchiang teh u." a han ti hram a.

Marema chuan, "Ka va en ange, tikhan lo awm rawh u." tiin mau hmunah chuan ava lut a, a han hawikual vel a. Minute 1 vel hnuah chuan a lo let leh a, "Tumah an awmlo, i hmu sual aniang." a rawn ti a. Sangtei pawh chuan a lu  ahan dawm vang vang a, "Ni e, ka hmusual aniang." a ti ve mai a.

"I rilru ah a awm reng a, chuvang a nih kha...hlau suh, thlamuang deuh khan awm rawh." tiin Msa chuan a han kuah a, "Kal vat ang u..tui cheng ila  a dam vek mai ang." tiin Marema chuan tih hlim a tum hram hram a. "Nia..kal ang." tih ringawt chuan Sangtei chuan a chhang a, lui lam pan chuan an kal chhunzawm leh ta a.

********************

Zing dar 10 a ri tawh a, mahse Siama erawh a lo la let thei reng reng lo mai. Lawmi phei chu a rilru a hah tawh takzet, "Khawnge a awm ang le?" tiin an a phun nuah nuah reng mai. Hannah-i chu a rawn tho chhuak a, "Le..chaw a ei theih tawh e.." a han ti lauh lauh a. Jenny chuan, "Ei vat ang u, Siama hi a lo la let lo ami?" tiin Lawmi chu a zawt a.

"Kan awm ho vek a, alo la let lo chu a nih hi.." a lo ti hlur mai. "Ehe, avan mak. Ani hi a lo bo hi nilo maw...enge awmzia le?" tiin Jenny pawh chu a ngaih a that loh hmel kher mai. "Aww...mipa ho bulah a awm aniang. Pawnah zu an in a, a haw lamin a join ve nghal teh pawh a nimahna." Hannah-i chuan a lo ti ve bawk a.

"Va en chhin teh, Lawmi." Jenny chuan a han ti a, Lawmi pawh chu a chhuak nghal a. Lui sirah chuan Issac-a leh Hriata chuan zu chu an lo in a, an lo titi nasa ngei mai. "Enteh bro, nimin a hmeichhia lo awm ve kha..Angel-i kha, ka rilru ah a awm tlat nia mawle." Hriata chuan a han ti a, Issac-a chu a lo khi suk mai.

"Nia, zep lo chuan a chhelo khawp mai. Keini aia u a ni tih chu a hriat a, mahse a itawm reuh khawp mai." tiin a lo chhang ve bawk a. Hriata chuan nui vur vur chung hian, "A hming nen khan a inhmeh e, Angel-i ania, amah pawh kha vantirhkoh ang mai khan a duhawm em em bawk sia." a han ti ve leh a.

Chutih lai chuan Lawmi chu a rawn kal a, "Siama alo let tawh em?" tiin ava zawt a. "Ka hre nang, alo la let lo mi?" Hriata chuan a lo ti hu mai. "Umm..lo la let lo chu a nih hi." tiin Lawmi chuan a lo chhang a. "Ehe..khawnge maw a awm ang le?" tiin Issac-a pawh chu a ngaih a tha chiah tawh lo.

"Chaw a ei theih tawh em ni?" Hriata bawk chuan a lo ti leh a. "Umm...ei theih tawh, lo phei phawt teh u." tiin LAwmi chuan a lo chhang a, thlam lam pan chuan an phei ta hlawm a. "Siama chu khawnge maw a awm ang le? Khawnge maw a lo kal hman thawt thawt leh?" tiin Issac-a chu a phun nuah nuah a.

"Hawh teh u..chaw i ei san phawt mai teh ang u. Alo let hunah amahin ei mai rawh se, ril a tam tawh alawm." tiin Hriata chuan chaw ei chu a insiam sawk sawk a, midang erawh chu an ngawi kar mai. Ngaih tha lo tak chuan chaw chu an ei ve ta a, Lawmi erawh chuan bar khat pawh a ei thei lo, a bialpa Siama chu a ngaihtuah takzet.

*********************

Zuala chu a mangang takzet, Rachael-i chu a ngaihtuah takzet a ni. A mumanga Sarah-i thusawi mawlh mai chuan a awm a ti nuamlo zual a, Hmaikawra chu ala dam ngei a, Rachael-i chu a kidnap ngei a nih a ring bur bawk. Chutah thuthar an hriat belh a, thu lawmawm lam a la nilo rapthlak zui.

Rachael-i chuanna sumo-a passenger te pawh chu chin hriat lohvin a driver leh a motor chawpin an bo vek tih chu a hre leh ta zel a, a thla a phang tawh takzet. Ani lah Thenzawlah a awm daih bawk si, Rachael-i chu zawng dawn pawh nise an khua atang chuan tih ngaihna a awm der mai silo.

A chhungte bula dil a, Rachael-i zawng tura kal mai lah a ngam bawk silo. Mahse a ngaihtuah em em bawk si, ngaihdan siam har a ti takzet. A tawpah chuan a thil duhloh em em mai a tih a ngai ta, a chhungte pawisa tam tham tak chu a ru chhuak a, an hriat lohvin apa bike chu a la chhuak bawk a.

Khawi lama zawn tur nge pawh hrelovin Aizawl lam pan turin a chhuak ve ta ngawt mai, engtia han zawn tur nge pawh a hre chuang lo. A rilru chuan a chhungte hnenah ngaihdam a dil mawlh mawlh a, a phone sim card pawh a paih hmak. A kal pah chuan Sim card thar a lei a, tichuan khawi lam ber nge pan tur pawh hre chuang miah silo chuan a tlan ta vang vang mai.

**************************

"Sir, engtin nge kan tih dawn? Kan let leh dawn nge, ruang hi ti hian kan awmpui char char dawn?" tiin Eric-a chu a mangang kher mai. "Ka ngaihtuah mek a nih hi....a ruang en atang hi chuan thah ngei a ni a. Chuvang chuan ani, let leh rikngawt ka duhloh nachhan." tiin a lo chhang a.

"Nia, thah ngei chu ania..mahse enge tih i tum? Tihian ramhnuaiah hian tualthattu chu i chhui dawn tihna em ni? Midang te pawh hrilh hriat hmasak a tha a i ti lo em ni?"

"Nilove, Police Inspector kan nih hi. Khawi hmunah pawh awm ila, engmah kan hlau tur a nilo."

"Ka hlau ka ti lo, mahse hetia awm reng chu a dik chuang hleinem."

"Enteh Eric, keichu ka rilruah hian mi pakhat chauh a awm. Chu chu Victor-a kha a ni, Victor Lalthanmawia kha." a han ti chu Eric-a chu a lo ner nung mai. "Engemaw khapa bawk kha ila ngaihtuah le? Amah chauh kha tualthattu awmchhun pawh a nilo, tualthah case tamtak kan buaipui tawh. Victor-a chauh hi mi that thin a ni lo, midang pawh a ni thei." tiin a lo vin lek lek mai.

"Nilove, ngaihtuah teh. Ramhnuaiah kher, Victor-a pawh kha ramhnuaia vak thang tak a ni. Thla 5 liam ta a Bukpui luia tualthihna case te kha, ka hre chiang lutuk lo nangin ka buaipui nasa alawm. Khata tualthattu pawh kha Victor-a a ni tih ka chiang, midang an ni theilo hrim hrim." tiin a lo chhang let a.

*********************************

TO BE CONTINUE