SALTED SALLY

 SALTED SALLY

(MIZO FICTION)

By : Aaron Malsawmdawngzuala

WARNING : 18+

*********************

"Khawngaih taka min hriatthiam mai angai a ni, thianpa. Han kawhhmuh tur che chu ka nei hauh lo nangin, puih i ngaih chuan ka awm reng ania." tia ka inluahna neitupain an in an sak that dawn avanga inluah tur dang ka zawn mai a ngaih thu min hrilh chu ngaihthlak a nuam lo kher mai, inluah tur dang zawn theih hun chhung lah kar 1 chauh ka nei lehnghal.

"Ni e, in chhungkaw thil te ania, a pawi hleinem. Inluah tur dang te chu ka hmu mai ang, min ngaihtuah lutuk duh suh." tiin ka chhang ve mai a, mahse zep lo chuan min hrilh har bawk si nen, a lungawi thlak lutuk lem lo khawp mai. Lunglei atangin hna vangin Aizawlah ka awm a, ka hming chu Malsawmtluanga a ni.

***********************

Ka inluah neitu berin chutia min hrilh tak si ah chuan keipawh inluah tur zawn vat chu tha ka ti a, pawisa neih loh nen rilru a hah duh khawp mai. A hmunhma nuam ve pangngai tak ka duh bawk si, mahse a to thei em em mai bawk si. Whatsapp status ah te inluah tur ka duh thu chu ka post a, ka thian hmelhriat dangte pawh ka be kual bawk.

Office lama ka thawh pui thenkhatte chuan min pui ve bawk a, mahse ka budget nen a inmil hlawm chiah thin lo. Office atanga hla lutuk lo kha ka duh ve bawk si a, tawp hnawk leh chen hrehawm khawpa te kha chu ka duh bik thak lo. Chutia inluah tur zawng reng reng a ka buai kual reng chhung chuan kar khat chu a ral ta lek lek mai, keilahin ka la hmu zo der mai silo.

In neitupa Pu Zika chu a rawn kal leh a, "I hmu tawh em?" a rawn ti lut nghal deuh thawr mai. Ka la hmuh loh thu chu hrilh ka inthlahrung ve tawh si chuan, "Aw..ka be fel tawh e." ka han ti thla ve ngawt a. "A lawmawm chu...pawisa puk te i duh chuan ka puk tir hreh miah lo che ania." tiin min chhuahsan zui a.

Rilru a hah duh kher mai, ka hna lamah buaina a lo awm ve sek bawk nen. Ni 1 chiah ka nei ta, ka zawn hmuh ngei ngei a ngai tawh takzet. Vanneihthlak tak maiin ka off-day a lo ni hlauh mai, nileng chuan inluah tur chu ka zawng leh ta a. Tlai lam ah chuan ka hmu ta hlauh mai, mahse mi inhnuai a ni lo.

Assam type a ni a, a hmuhma pawh nuam ve tak a ni. A neitute in erawh kawngpuiah a awm a, mahse ka inluah tur erawh chu kawngsir step ah chhoh vang vang a, step tawpah amalin a ding thung a ni. Kawtzawl zau lemlo tak, naupang tan chuan sertawk han pet velna tur khawpa zau chu a awm ve bawk.

***********************

Kan inbe fel a, tichuan chumi zan la la chuan ka inpu lut ta a ni. Inchhung han singsak vel chu ka office-a ka thawh pui, ka thian pali te chuan min pui a. In thar lawm nan tiin um khat chu kan han la a, kan kai tlang kher mai. Pindan pahnih a awm a, choka pawh a zim lutuk lem lo. Pindan zau zawkah chuan ka mu a, pakhat erawh ka dah ruak vek thung.

A tukah chuan ka in luah thar atang ngei mai chuan office kal turin ka chhuak ta a, kan office atang pawhin a hla lutuk lem lo. Kum 28 ka ni ve tawh a, mahnia khawsa thang ka ni bawk. Mahnia awm hi ka nuam tih zawng tak a ni a, thian siam pawh ka thiam lutuk lem lo. Ka in thar luah pawh hi a hmunhma vel reh hle mah se, ka hlau lem lo.

*************************

Tlaiah chuan ka haw a, inchhungah chuan ka lut tlang nghal a. Zan hmasa lama bungrua ka rem fel zawh loh hote chu ka han rem fel leh thuak thuak a, a luah man a to lo bawk nen ka duhthusam chiah chiah chu nilo mahse min ti lungawi tawk khawp mai. Ka inbual fai a, rawng ka bawl nghal bawk a.

Zan a lo ni a, ka laptop la chhuakin chaw ei dawhkanah chuan ka han hung rem vel a. Tichuan hna ka thawk tan ta a, earphone-in hla ka ngaithla pah bawk. Kan Manager lakah hian tunlai tak phei chu ka mark a tha em em a, mahse a nuam viau lem lo. Min duhsak in min fak cham chi thin mahse min ring leh lutuk a, mawhphurhna min pe sang thei khawp mai.

Project pakhat buaipui turin mini ti a, "Nang chu i taima bawk a, ka ring bawk che a. Chuvang chuan ni 3 chhungin i zo vek thei ang tiraw.." min tih laia ring mang kheng a, "Ka peih tawh lo.." tia vin hrep ka chak zia kha. Indonesian hla a mawi ka tih em em mai, Beauty and the beast tih hla, DAdali Band-te sak chu ngaithla in hnathawh pawh a ti nuam ngang mai.

************************

Ka kawng a kham tawh em avang chuan ka han chawl zawk a, ding meuhin ka han zi mar vel a. Sana ka en a, dar 10 a lo ri ve der tawh mai. "Mut a chhuak mai dawn lawm mawle.." tia phun nuah nuah chung chuan bathroom lam ka pan a, ka va inphir harh a. Bathroom ah hian wash basin pakhat a awm a, a hmaah darthlalang lian lemlo tak a awm bawk.

Towel chuan ka hmai ka hru a, ka phone la chhuakin message vel ka han check kual mai mai a. Chutia bathroom a ka ding ngawih reng lai chuan inchhung lamah thawm ka hre tlat mai, kawngka inkhar ri a ni. Ka room kawngka te kha chu ka vih kalh thlap bawk sia, room ruak zawk kha ka kalh theihnghilh a nih ngei ka ring.

Bathroom atang chuan ka chhuak a, ka rin ang chiahin room ruak zawk kawngka chu a lo in hawng huau mai. Ka kalh theihnghilh ngei bawk, mahse engtia inhawng a, lo inkhar ri leh bur nge a nih tih chu zawhna a ni ta. A chhan chu thli thaw ti dawn ila, tukverh pakhat mah ka hawng der silo.

Kawngka pawh ka kalh thlap a, keimah chiah in ka awm bawk si. ZAwhte emaw, ui emaw, eng ran mah ka vulh der silo. "Aaa...enge maw tak chu aniang.." tih pahin mak ti angreng tak chung chuan hna chu ka thawh zawm leh a, awm erawh a nuam lutuk lem lo. Mahse ka hnaah rilru ka han pe leh tak tak a, thildang chu ka theihnghilh leh vek tawh.

Dar 12 a rik dawn meuh chuan ka zo ve thei ta, ka indah fel nghal vat a. Tumah tibuaitu nei lova, mahni duhdan ang ngeia mahnia khawsak hi ka nuam tih ber a ni bawk a, hemi zan pawh hian thlamuang takin ka muhil leh siai siai mai. Ahma a ka inluah erawh kha chu kawngpui bul a ni a, tuna ka luah thar hi chu a lo fal deuh bawk nen, a let tamtakin nuam ka ti zawk.

******************************

Kar khat lai chu ka luah ve ta a, buaina engmah ka tawk lem lo. Khawngka lo inkharh ri bak kha chu engthil dang mah ka tawng lova, thawm engmah ka hre ngailo bawk. Tlai khat kan office bang chu ka thawhpui Peka leh Matlana te nen thingpui dawrah kan peng kawi a, "E taka MS, vawiin tlai chu in inah chaw ei khawm ila, kan pathum hian.." PEka chuan a rawn ti chhuak deuh hlawl mai.

"Ni e, keipawh ka hman. Naktuk ka day-off ala ni zui, ka hman sa reng." tiin Matlana pawh chuan  a lo tuihnih ve nghal bawk a. Peka bawk chuan, "I luah luh zana kan rawn puih bak che kha chu kan lo la kal leh lo reng reng, zu ka lo tum ang...vawiin tlai chu ka phur riau." tih pah chuan a han khi deuh sung a.

"In duh phawt te chuan....mahnia chaw ei reng chu  a khawhar thlak emai...mahse chawhmeh tui engmah ka neilo ania." ka han ti a. "Lungngai mah ta che, artui kan leh dal a awm chuan a tawk. Zu a awm chuan engpawh a tui vek, sa kher angai lo." tiin Matlana pawh a phur khawp mai, tichuan kan inzui haw ta hlawm a.

**********************

Inchhung chu kan lut a, "Tikhan lo thu ru...ka han inbual lawk ange." tiin bathroom ah chuan ka luhsan ta a. Minute 10 vel hnuah chuan ka inbual zova, room ah chuan ka lut tlang leh nghal a. Ka inthlak zo ka va chhuak leh chu ka thiante pahnih chuan thingpui an lo indun mek a, "Eheu..in va tlangnel ve.." tih pah chuan ka nui huk a.

An bulah chuan ka va thu a, "Minlo lum kep ve law law tur che u alawm." ka han ti a. Matlana chuan, "Keimahni lum anilo...i nau min lumsak anih hi." a ti ringawt a, ka hrethiam lo kher mai. KA tawng ve hma hma chuan PEka chuan, "Nau i nei tih min hrilh miah lova, engtik laiin nge a rawn awm ve a?" a rawn ti ve leh a.

MAtlana leh Peka hi chu fiamthu an duh bawk a, nui miah lo hian dawt an sawi pap pap thei. Chutiang khawp chuan ka hre chiang dun a, an fiamthu tih ka man thiam nghal mai. Nuih pah chuan, "Khawia nau mah ka neilo..." ka han ti a. "Sawi mai mai rawh, a chhelo phian lehnghal. A hming pawh a sawi vek alawm, Sally..haha, amah pawh a rawn introduce thlap alawm." Peka bawk chuan a ti leh a.

Hming thleng thlengin an lo phuah hman chu ania, an dawt sawi hi a tak tak amaw an ti thin a, an buaithlak dun thin ania. Kei thian kawm thiamlo leh mi biang biak thiam lo lutuk pawh hian hemite pahnih hi chu ka ngam ve khawp mai, chupawh an mahnin min kawm tlangnel chawp vang mai mai chauh a ni.

"Anih khawnge Sally chu a awm?" tiin ka han zawt ve leh a, "Ka chhuak lawk dawn atia, a chhuak ta nih kha." tiin Matlana chuan min lo chhang a. Ava han awihawm tawh loh tak, "Anih chu...." tiin ka nuih liam ta mai mai a, anni pawh chuan engmah an sawi chhunzawm lem lo. Thildang sawiin kan titi a, zu in zeuh zeuh pah chuan rawng te bawlin chaw chu kan ei ta a.

**********************

Chaw eilai chuan kan titi leh a, "I nau chu ava rawn haw har em em...chaw a rawn ei ve dawn lo amawni le.." Peka bawk chuan a ti leh ta. Mahse ka la thutak peih lo, "Aniang, a ei dawnlo aniang." tiin ka chhang mai a. Thildang bawk sawiin kan titi leh a, dar 8 velah chuan haw zai an rel ve ta.

"I nau kha minlo biak dawnnia..." an la ti talh, "AWle...awle...in pahnih khan  ahmangaih nghal che u." tiin ka fiam zui a, an haw ta a. Zu tlem la bang chu ka inchhawp a, TV ka en pah a. Dar 10 rik hma vel hret chuan kawngka a rawn in kik rid dat dat mai, "Tutak chu ni ang maw?" tih pah chuan ka va hawng a.

Mahse tumah an lo awm lo, "Tunge ni?" tih pah chuan pawnah chuan ka chhuak a. Step te pawh chu ka han enkual a, mahse tumah ka hmu lo. "Avan mak em em, tlanchhe daih pawh nise...stepa a chhuk lai hi chu ka hmu hman awm ngei si a." tiin keima hriattham lek chuan ka phun deuh nuah nuah a.

Inchhung lam pan chuan ka phei leh a, kawngka chu ka kalh tha leh a. Zu pawh chu ka han in zo ta law law a, ka kai nuam tawk vel chiai chiai khawp mai. Ka mut a chhuah em avang chuan mut zai ka rel ve ta a, thawm engmah ka hre zui lem lo. Mahse rui viau mah ila, kawngka rawn kik ri kha chu ka hre chiang ngang mai.

A rawn kik rual rual khan ka tho vat a, ka va hawng nghal kha a ni a. Mahse tumah ka hmu leh der silo, amak angreng khawp mai. Matlana leh Peka te'n nau ka nei anga an sawi te kha ka han ngaihtuah let a, mahni leh mahni ka intihthaih der mai. "Mai mai a...mipa alawm ka nih.." tiin ka han inti pachang chawp leh vel a.

**************

KA room tukverh atanga nizung rawn eng chuan min ti harh a, men pawh ka meng hleithei lo. Ka tho phang mit vai nge pawh ka hrelo, engkim mai chu  aneg hian  aneg phut vek mai. Pawn lamah chuan tawng ri niawm tak hi ka hria a, meng hleithei lo chung chuan pawnlam chu ka pan a.

KAwngka a lo inhawng a, pawn pawh chu eng tak a ni. Ka va chhuak a, a eng lutuk chu ka kuta ka inhliah loh chuan ka meng chiang theilo hial. Puan zarna bulah chuan hmeichhe pakhat, sam buang vek mai hi min hnungchhawn zawngin a lo ding a. Puan var thianghlim tak mai hi  alo zar mek a, a zai ret ret bawk.

Muang chang chuan ka va pan hnai a, "Tunge i nih?" ka va ti a, mahse hria awm ang pawhin a lang lo. Ala zai ri rat rat mai a, a hmel chu hmulo mah ila a hlim hmel takzet. "Thiannu, tunge i nih a?" tiin ka han zawt leh a. Chutah a zai lai chu a tawp chat a, a thiltih lai pawh chu a dah hmak a.

Aw(voice) ngaihno bei tak mai hian, "Ilo tho tawh maw, ka u?" a rawn ti ta mai. Kei hian pian pui unau ka neilo hrim hrim, fapa mal ka ni. Chu chu thuhran nise, tunge a nih a, engvanga ka u min ti nge a nih tih chu ka zawhna ber zawk a ni. "Ka u a? Tunge i nih a? Tunge i hming?" tiin ka zawt leh a.

A la rawn hawi miah lo, "Sally ka nih hi..ka u." tiin min hnungchhawn reng chung chuan min chhang leh a. Ka phu deuh zawk mai, Peka te thiandunin nau ka nei anga an sawi, Sally kha a tak takah a lo awm reng tihna em ni ang tiin mak tihna in ka khat a, ka hlau ta tlat mai a nih chu.

"Sally a?" ka ti vak a, a nui ri ta her her mai. Chutah ngil at hian a ding a, chuveleh ahmaa eng em em mai kha, khua chu a rawn thim ta mup mup mai a. Chhum dum tam tak hian van chu a khuh vek mai, chutah le..zawi muangin a rawn hawi ta. Ka hma zawn takah chuan a ding run mai a, ka hik chhuak vekin ka hria.

Hmel engmah a neilo, mit, hnar, ka...engmah a neilo, a mam pur vek mai. Ka hlau lutuk chu ka khawng nghal vek a, ka ding khur nghal zawih zawih mai. "Nilo...nilo..ka duhlo." tiin tlanchhiat ka tum a, mahse ka tlanchhe thei miah lo. Ka ke chu lei chuan na takin a hip bet tlat ang mai hian ka che sawn thei thak lo, khua lah chu a thim telh telh leh nghal.

*****************

Ka mumang ram atang chuan ka harh chhuak thut a, a eu zawt hialin ka hria. Ka thlanin min lo bual huh vek a, ka phone a lo ri ral ral bawk. Ka mumang lek chu lo niin, ka va han lawm tak em. Nizan ka rui lutuk khan Peka leh Matlana te fiamthu mai mai ka lo ngai thutak a, mumang thlengin ka lo man phah chu ania.

Ka thaw huai mai, "Hmela te mai mai chuh.." tiin ka nui deuh suk a, ka phone ri mek pawh chu ka lo ngaihtuah leh tawh lo. Ka han en a, kan manager a lo ni. "Hello Sir?" ka han ti nghal vat a. "MS, ilo kal dawnlo em ni?" a rawn ti chu sana ka en vat a, thawh ka hai chiang lutuk. "Aw Sir, hman tep." tiin phone ka dah a, hmanhmawh bak lengin chaw pawh eilo chuan ka insiam a, ka kal ta a.

***********************

Chumi ni chuan kan office ah chuan thawk thar a lo awm a, hmeichhia ala ni zui. Ahming chu Melody a ni a, a hmeltha phian lehnghal. Kum 28 lai ni ve tahw mah ila, bialnu tak tak han tih tur chu pathum chiah ka la nei. Ka lerh lem lova, hmeichhia ah hian ka huai lutuk lem lo bawk. Mi fate anga han bem mai te hi ka zak tlat a, chuvang pawh a nimahna ka luck loh em em ni.

Mahse he hmeichhia Melody erawh hi chuan ka mit ala riau mai, ka vei deuh reuh tlat. Rin lawk sa ang ngeiin Peka te thianho chuan an be tha leh ngang mai, anni ho hi chu an lerh ve hrim hrim. Thawk thar apiang chu an hmeltha emaw chhia emaw, an bawhzui ngei ngei. Biak pawh ka va be ve lem chuanglo, mahse a hnathawh pah chuan min rawn melh ve zeuh zeuh in ka hria.

Lunch Break a lo ni a, midang zawng chu thil ei turin an chhuak tawh. Kei erawh khawih lak lawh ka la neih avang chuan ka la thu reng a, chutiang chiah chuan Melody pawh a la thu reng. Ka zawh fel hnu chuan zak ru deuh tak chung chuan Melody  chu ka va pan a, computer chu a lo la khawih melh melh reng a.

"I va la buai awm ve?"  ka va ti a, a nui nui sang mai. A zak ve deuh tih chu ka hria, "Buai em em chuang love, engvak mah ka ei peih lova." tiin min lo chhang a, a aw mawi zia kha. "Nakinah i ril a tam ang, hawh...zu ei ang." ka han ti leh a. Mak tak maiin, "Um..minlo nghak lawh aw.." tih pah chuan a indah fel a, ka va lawm chiang tak.

Second 20 vel hnuah chuan a inpeih ta, "Kal ila.." a ti ve ta mai a, keimah zawk chu ka lai leh lek lek hialin ka hria. Kan office canteen lam pan chuan kan chhuk thla a, titi pui lah chu a nuam reuh phian lehnghal. Lunch chu kan eidun a, Peka te thian ho chuan min melh no lo nasa hlawm teh asin.

*********************

Ni a liam zel a, Melody nen chuan kan inngaina ta tulh tulh mai. Kan pahnih chuan kan inkawm deuh chawt a, thawpuite pawn min dem fo reng a ni. Mahse ka duhthu hrilh emaw, han bem tumna pawh ka la nei chuang lo. Sawi tawh ang khan hetiang lamah hi chuan mi dawihzep ve tak mai hi ka nia, a tawpah thiantha ah kan chhuah hram dawn niin a lang.

Inngaihzawnna lam engmah kan sawi dun ngai lova, beisei awmin a awm ngai hek lo bawk. Thian ang tak takin min en tih ka hria a, chuvang ringawt pawh chuan ka bem ngamlohna a zual. Kar hnih vel a rawn thawh hnu chuan vawi khat chu scooty hian a rawn kal a, ala inhmeh em em mai lehnghal.

Scooty a lak thar thu te min hrilh a, chumi tlai pawh chuan kan inthleng min thlah haw nghe nghe. Leng lut tura han sawm chu duh viau mah ila, kei val senior ve tan dawn tawh hian huaisenna ka nei ve hlawl lo a ni e. Ahnuah pawh scooty chuan min thlah ta ziah mai a, ka tan pawh a awlsam phah khawp mai.

**********************

Ni khat chu project lian tak buaipui turin kan boss chuan mawhphurhna min pe leh ta a, a peihawmloh lehpek thin khawp mai. Khaw lum lutuk vang pawh a ni mahna, tlai ka bang ka haw ka lo mutthilh sek avang chuan tlai takah chaw ka ei a. Hna thawk tan tura ka laptop dawhkana ka hun fel meuh chuan dar 8 a lo ri der tawh mai, han chu ka thawk tan leh ta a.

Nidanga ka tih ang bawkin rilru pe tak chuan ka han thawk leh ta a, ngawi rengin misual hi rawn lut se, ka hre miah lovang tih tur khawp chuan ka bei ngawrh hle mai. Chutia thawm reh tak hnuaia hna ka thawh melh melh lai chuan choka lama fian niawm tak tla ri bawl chuan min ti phu chiang kher mai, ka zuang tho hman tep a ni.

Rang takin choka lamah chuan ka va phei a, ka rin ang ngeiin silhmunah chuan fian pakhat hi a lo let bal mai. Engvanga rawn tla ringawt chu nimaw tiin ka inngaihtuah deuh vung vung a, "Buai nen...hlau hman ka nilo." tia mahni hriat tham leka phun sup pah chuan fian chu ka chhar a, a awmna ngaiah chuan ka dah let leh mai a.

Ka zawh meuh chuan dar 11 a pel duai tawh mai, rang takin ka indah fel a. Mu tur chuan ka pindan lam ka pan a, ka phone ka hah en chu Melody message a lo tam hman ngei mai. "Project chu i khawih mek ami?"...."I van buai awm em em?" .... "Ila zo nange?" tiin message a lo hnutchhiah teuh mai.

RAng takin ka reply a, "Ka zo deuh chiah a, hei ka mu dawn mek." tiin ka chhang a. Mahse a mu tawh a ni ngei ang, a reh vung vung mai. Ka thawmhnaw dah hnawk hote chu ka han ti fai thuak thuak a, tichuan bathroom lam ka pan leh a. Ka hmai te ka phih a, ka ha te ka nawt fai a. Ka kam thuah a ka kun lai tak chuan ka beng zawn vel chu a rawn thaw deuh huk mai a, mihring thaw deuh hak ri niawm tak ka hre zui bawk.

Ka phu nasa lutuk chu ka tawlh deuh dawr a, ka hawi kual nghal vat bawk. Mahse bathroom chhungah chuan kei tihloh chu mihring dang tumah an awmlo, ka beng kha a rawn lum huk thei hialin ka hria. Mahse thawm dang engmah ka hre zui lova, tullovah ka hlau mai mai anih hi tiin bathroom chu ka chhuahsan leh ta a.

******************************

Khumah chuan ka han mu zal a, ka kawng a kham ngei mai. A nat hian a na thla rawih rawih mai hian ka hria, ka phone chu a rawn ri deuh ral ral a. Ka han en chuan Melody message a lo ni, "Ka lo muhil a, ka harh deuh chiah." tih hi min rawn thawn a. "I message ka lo hmu tlai lutuk a, i muhil lehnghal duh em?" tiin ka thawn let ve leh a.

"Nah..ka lo nghak ve em em che a."

"Tinge min lo nghah duh kher? Lo muhil mai ta che."

"Ka be chak che sia lawm, mahse ka mut chu a chhuak deuh tho."

"Ummm mu rawh, keipawh ka mu ve nghal ang."

"Awle, naktukah ka rawn lam leh dawn che nia."

"Um..muttui aw."

"Muttui le."

Keipawh chu thildang tih ka peih tawh lemlo bawk a, ka mu ve ta nghal a. Zanin chu ka hlim ru riau mai, ka thiannu mah nise a rukin ka duh em em a. Khatia ka duh em em leh vei ruk em emin ka hnathawh lai min lo nghak fan fan te khan min ti hlim ve em em chu ania, min biak chak thu a la sawi zui.

"Min duh ve deuh amawni le?" tiin ka han inngaihtuah vel a, mahse a hmel leh pian han en hian kei tlangval tha lemlo tak leh hmel chhuan tur nei bik lemlo hi chu min duh ka ring chiah thin bawk silo. Ka lo beisei sang mah mah te pawh a niang nge, zanina hetia min rawn biak avang hian beiseina chu ka nei sang ngam chuang hauh lo.

Kan office atang hian ka inluah aiin Melody te in hi a hla zawk a, kal lamah pawh min rawn lam zat zat zel. Ani nena kan inhriatna pawh thlakhat lai a ni ve ta, nitin mai hian a chhelo tulh tulh amaw tih mai tur a ni. Mipa dang ho lah hi a be tha duh miahlo lehnghal a, Peka a ten zia phei chu a rukin min hrilh fo thin.

*************************

Kawngkhar in chum ri bur bur chuan min ti harh chiang ngei mai, rang takin ka thu chhuak nghal vat a. Khum atanga ka tho chhuak chiah chu chhuatah chuan thil engemaw nal deuh mai hi ka rap pial a, ka tlu thelh nghe nghe. Rang takin light ka on a, ka thil hmuh chuan min va ti hrilhhaiin min va ti hlauthawng tak em.

Ka room chhuatah chuan thisen a lo tling pum mai a nih chu, hlauhna chuan ka thauvah min man a, ka thlan a tla nghal bawrh bawrh mai. Kawngka lah chu a la inchum ri bur bur mai a, hriamhrei emaw, hmanrua engemaw tal keng lo chuan ka va pan ngam ta bik hauh lo mai. Room atang chuan muang changin ka chhuak a, inchhung lam light chu ka on leh a.

Inchhungah pawh chuan thisen a lo tling nuai tho mai, thla a va muanglo kher vele. Choka lam ka pan hmasa phawt a, chemte ka va la a. "Tunge? Tunge ni?" tia vin vak vak pah chuan kawngka lam chu ka pan zel a, mahse tuman min chhang lo. Min chhan a hnekin a aia ringin kawngka chu a in chum ri nasa zual sauh mai a, ka hrethiamlo takzet.

KAwngkhar bul ka thleng chiah chu mak tak maiin thawm a reh hmak mai, phun deuh sep ri hi ka hre bawk. "Tunge i nih?" ka han ti leh vak a, mahse a ngaite bawkin chhanna ka dawng lo. Muangchangin kawngka kalhna chu ka hawng a, chemte chu ka hum nghet sauh sauh bawk a. Chutah ka han tlawh hawng thuai a, tumah an lo awm lo.

KAwtzawl chu a reh em em a, thereng hram ri bak thawm dang hriat tur a awmlo. Pawnah chuan ka chhuak a, ka han hawi kual vel a. Step chhukna lam pawh ka dakthla leh a, tumah hmuh tur an awm lo. Ka ngaih a thalo takzet, zep lo chuan ka hlau bawk. Inchhung lamah ka tlan lut leh a, ka thawk dan pawh a dik tawh lo.

Inchhung kil tinah mai chuan thisen a kawi zun mai bawk si a, khawia thisen nge a nih a, tu thisen nge a nih ka hre der silo. Manganna hlirin ka khat tawh, tih tur ber pawh ka hrelo. Police ka phone mai dawn em mawni aw tiin ka inngaihtuah a, mahse ka thusawi an awih lo anga, keimah zawk hian thubuai ka nei daih mai ang tih ka hlau bawk si.

Chutia ka inngaihtuah buai lai tak chuan bathroom lamah chuan hmeichhe tap ri kerh kerh ri ka hre leh ta tlat mai, zanin zet zawng ka hlau takzet a ni. Chemte chu ka la hum reng a, bathroom lamah chuan ka va kal ang nge tanpuitu ka au zawk dawn tiin ka rilru a la insual buai nasa kher mai.

Ka huaisenna zawng zawng sawm khawmin ka chemte nen chuan bathroom lam chu ka pan a, huai a har tawh khawp mai. Bathroom chhung chu a lo thim vek mai a, light ka on nghal vat. MAhse mak tak maiin bathroom chhung chu a danglam vek, a chhuat pawh glass tile vek a ni. Cement chhuat pangngai kha a ni reng si a, chubakah hetiang em em hian a zau lo.

Chhungkaw hausa ve tawk tak chenna ina an bathroom ang mai hian a changkang em em a, wash basin pawh pathum lai a awm. Mahse light erawh a eng nep hle, a pawl deuh phut hian ka hria. Chumai nilovin a la de zawk zawk lehnghal a, a nelawm loh angreng khawp mai. Min ti hlau zualtu ber chu chhuata thisen kawi nuai kha a ni ber zawk, ka thlanin min bual huh vek tawh.

Chutah a aia ring deuh hian hmeichhe tap ri chu ka hre leh ta a, a rawn chhuahna lai pawh parda phena bual kuang (bath-tub) awmna atangin a ni. "Tunge ni? Tunge tap kha?" ka han ti leh ringawt a, ka aw te chu a khur thei hialin ka hria. Mahse min chhang lo, a inhnit ri leh feih feih a.

"Tunge i nih? Hetah hian enge i rawn tih?" tiin ka vin leh vak vak a, mahse minla chhang chuang lo. Parda chu ka han hlim thut a, chemte chu ka lek kang nghal bawk. Mahse ka thil hmuh chu ka beisei loh lam daih a ni tlat, hmeichhe pakhat hi saruak ngalngat hian min hnungchhawn zawngin bual kuang ah chuan a lo mu kawm ngul mai a nih chu.

A taksa ah chuan pem nasa tak a awm a, a hnungah chuan engemawni hi a inziak bawk. KA phu nasa lutuk chu a ding ngil nghal at mai, a vun chu a dang var deuh vek lehnghal. Kutthlakna ni awm tak hian a ban leh a mal bawr vel chu a duk thleh thluah mai a, thisen a kai nual bawk.

A la khur dar dar zui a, ring tak ni silo hian chhuak em em hian a tap hawm hawm hi a ni ber mai. A hnungah thil inziak pawh chu ka en chiang a, chemte hmawr zum hmanga ziah niin alang. SALTED SALLY tih hi chiang em em hian a inziak a, thisen a luang deuh nguai bawk. "Tu...tunge i nih?" ka han ti khur leh dar dar a.

Chutah a tap bang tak hmak mai, chemiah lo chuan a mu kawm ngul reng mai a. Muangchang hian a ding a, buangkuang chhungah chuan ala awm reng thung. Ka lam a rawn hawi chiah chule, ka thlarau hi a thlawk chhuak lo chauh a ni. A hnute hmur pahnih chu hleh thlak a ni tih hriat tak hian thisen hi a chikin a chik puat puat mai a, a dul ah chuan zawhte hamna hnuhma niawm tak tak a awm thluah bawk.

Chu mai ala nilo, a hmel mawlh kha. Hmel a neilo, hmel pakhat mah a neilo. Ka saiw thiamlo, ahmaa ka mumangah ka hmuh ang chiah chiah kha  a ni. Mit, hnar, hmu leh ha engmah a neilo. A mam thla vek ringawt, ka hlau lutuk chu ka au vak ringawt a. Tlanchhiat ka tum a, mahse ka kutah chuan a kut vawt thlur mai chuan min man bet ta tlat mai.

*********************

"Min thlah rawh...min thlah rawh." tiin ka au chhuak a, ka khum atang chuan ka tla tawp mai. Ka thlanin min bual huh vek a, ka mumang vek a ni tih ka hriatchian meuh chuan ka thaw huai mai. Ka thlan a lo tla nasa ngang mai, ka kawr pawh a huh vek. Khua a var tawh a, sana ka en chuan dar 7 chiah chiah a ni.

Ka mumang a ni hlauh chu lawm hle mah ila, ka hlauhna kha a la reh thei ngang lo a ni. Chubakah ka rilru a nuam thlawt lo, engvangin nge kha hmel neilonu kha ka mumangah ka hmuh ziah, a chhan ka hre duh a ni. Matlana leh Peka dawt sawi anga ka ngaih, ka nau Sally anga an sawi kha ka la ngaihtuah zui em ni ang aw?

Mahse ka ngaihtuah zui em em pawh ka hre tahw silova, thla 1 chuang a liam daih tawh si a. ZAndangah pawh khatiang em em a mumang rapthlak kha ka neih ka hre ngai bawk silo, ngaih chu a tha lo duh khawp mai. Ka phone ka en a, MElody message a lo awm a. "Good morining MS, tukin chu chhungkaw lamah harsatna kan nei tlat mai. Ka rawn tlai dawn a, Boss chu ka hrilh lawk vek tawh. TAxi lo hmang mai rawh aw, sorry lutuk." tih hi min lo thawn a.

"Awle, a pawilove." tiin ka reply mai a, ka tho chhuak ve ta a. Bathroom lam ka pan lai chuan ka mumang chu ka hrechhuak leh zawk mai, a chhung chu a lo danglam leh mai ang a tiin ka ngaihtuah hman hial. "Mumang mai mai alawm.." tiin ka inla pa thar leh vel a, a chhungah chuan ka lut a.

Engmah danglam a awmlo, mahniin ka intih thaih leh ringawt tawh. Mahse ngaih han tih that ringawt erawh ala har narawh e, Peka te thiandun khan dawt an sawilo amawni aw tiin ka inngaihtuah hman hial. Ka inbual fai a, chaw te ka ei a. RAng takin ka insiam a, taxi chang tur chuan ka in chu ka chhuahsan leh ta.

************************

Zing dar 9 hi kan office tan hun a ni a, hmanni zinga ka tlai lek lek tihloh kha chu vawikhat mah ka la tlai ngai lo. TAxi pakhat chu kawngsirah hian a lo ding a, sana ka en chuan dar 8:30 a la ri lo deuh. Taxi lam pan chuan ka va kal a, "A hman theih em?" tiin ka han zawt a. "Hman theih e, khawiah nge i kal duh a?" tiin min lo zawt let vat a.

Ka kal duhna hmun ka hrilh hnu chuan, "Lo chhuang rawh." a ti deuh hmuk a, a nelawm lemloh kher mai. A mit bulah chuan tattoo te tak te hi a la chhu zui a, a lu ala kawlh em em lehnghal. A hmel en reng reng pawhin mifel tak chu a nih loh hmel, zu rim ala nam em em zui. Ka chuang lut ve mai a, a taxi chhung balh zia chu.

Chutah a tlan mai dawn maw ka tia, tu emawni a hmu thut ang mai hian a hma zawn chu a en a, a phu deuh zuk mai. Ngawi reng chuan che miah lo hian  ahma zawn chu a en reng a, a motor steering chu a vuan run bawk. Ka nghak deuh char char a, mahse a che mai lo tlat. Minute khat dawn ka nghah hnu pawh chuan ala che miah lo, a mit pawh a khap eih lo.

"Ka pu, tlan ta che." ka ti ta nge nge a, mahse min ngaithla awm ang pawhin a lang lo. Chutah muang chang hian min rawn en a, mak tih hmel zet hian min en haw mai. Ka rap deuh lek lek hial, "Enge ni?" ka lo ti ringawt. Chutah le...a meng dur deuh khup a, a men puai puai a, thawklehkahtah ring em em hian a tap ta vak mai le.

Chutia patling ve meuh, naupang ang maia a aw rawl tawp tawp a min en reng chunga  a tap ta vak vak mai chu ka hlau lek lek mai, "Hey, enge awmzia?" tiin ka zawt a, mahse min chhang lo hrim hrim. Ka vel tap amaw tih mai tur hian a tap uar sauh sauh a, tihngaihna ka hre lo hle mai.

Motor atang chuan ka chhuak ta ringawt a, ngaih ava ti tha lo kher em. Kal mai ka tum a, "Thianpa.." tiin min rawn au let leh a. Ka v ahawi phei a, hmel pangngai takin a lo awm leh tawh, "Tinge i chhuah daih a?" tiin min la zawt zui. Amah kha ka ngaina tawh lo hrim hrim, "Aaa...angai leh lo." ka ti ringawt a, taxi dang lo tlan chu ka phar a, ka kal nghal vang vang.

*****************************

Office ah chuan ka thleng a, ka tlai lo vel chiah chiah a ni. Ka awm chu a nuam mawlh lo, rilru pek pawh a har ngei mai. Ka project chu sawifiahin presentation te chu ka thawhpuite hmaah chuan ka han nei a, mahse nidang angin ka confi lo tlat. KA thlan a tla reng a, ka la harhfim mawlh lo ni berin ka hria.

Mahse ka mualpho lo hram, pangngai tak chuan ka zo fel thei hram a ni. Ka zawh dawn tep ah chuan Melody chu a lo thleng ve chauh a, mahse ani pawh chu nidang angin ka ngaihsak lutuk lo. A chhan pawh nizan ka mumang vang leh tukina taxi driver, aw rawl tawp tawpa a tah vak vang kha a ni.

Tinge Sally tih hmingpu hi a vawihnihna atan ka mumangah ka hmuh leh? Mumang mai mai mah nise a tak a ang em em bawk si. Chu chu thuhran nise, tinge kha taxi driver kha patling pui si a tah vak mai le? Enge awmzia pawh ka hre lo, awm a nuam ngang lo  a ni ber e. Lunch Break a ni a, Melody pawh chu be lumlam hmasa lovin pawnah chhuakin sikret ka zu a.

Melody chu ka bulah chuan a rawn kal a, "Tinge vawiin hi iva induh ve?" tih pah chuan min rawn sik vak a. "Induh ami?" tiin ka lo nuih suk ringawt. "Imm induh e, tukina ka rawn lam loh vang che kha ami?" a han ti leh a. "Nilove...tukin chu ka tho fulo deuh a ni. Ka presentation pek te kha a thalo viau em?" ka han ti a.

"AWi a tha lutuk, tlemte chiah ka rawn ngaithla hman kha ania. Ka rawn ngaihthlak chin pawh kha  a tha lutuk ringawt, promotion i hmu vat ang." tiin min han fak deuh chiam a, duh berte hnen atanga fakna thu han dawn chuan thaw a veng ve deuh. "Umm...a that chu. Hawh thil ei ang, min treat ang che." tiin ka fiam zui a, canteen lam pan chuan kan chhuk dun ta a.

************************

Ni 2-3 vel a liam leh a, ka mumangah pawh engvak mah ka hmu leh tawh chuang lo. Ni e, ka mangchhia mai mai a ni. Mahse ka rilru la ti nuam lo tu erawh chu kha taxi driver, aw rawl tawp tawp a min tahkhum vak tupa kha ala ni tho mai. Patling pui si khatia a han tap vak mai kha chu hriat a nuam lovin, thlem a chakawm loh teh asin.

ZAn khat chu rinloh tak maiin kan thawhpui Simon-a a rawn leng lut ve hlauh mai, "Ehe, Simona teh hlawl chu....engtin nge ka in i hriat a?" tiin ka zawt nghal a. "Peka ten min hrilh a, hei ka ni te vengah ilo awm reng alawm. Vawiin tlai khan an inah chaw ka ei a, ka rawn hrechhuak zawk che a ka rawn kal a nih hi." tiin min chhang a.

Thingpuite in dunin kan hna chungchang te kan sawi a, kan titi tui dun khawp mai. "Ti daih ila, MS. Peka leh Matlana te khan unaunu i nei an ti sia, ka va hmu lo ve." a ti ta mai a. Ka thingpui in lai pawh ka phuh teuh kher mai, "Enga? Tu ka nau maw?" ka ti hu mai a. "An sawi dan chuan hmeltha deuh mai, kum 20 bawr vel. Chhelo reuh lutk an tih nghe nghe kha, nge dawt min hrilh zawk?" a ti leh a.

"An va mak tak, a hma pawh khan tinge nau i neih tih min hrilh loh te an tia. Dawt an sawi mai mai turah ka ngai a, nangpawh an lo hrilh veleh che chu ania." tiin ka chhang a. "Ngawi teh, a hming pawh an sawi tak e. Enge kha aww...sap hming chu ania.." a tih lai chuan, "Sally a ni em?" ka lo ti vat a.

Phawk hru hian min rawn en a, "Aw Sally, engtin nge i hriat zawk a?" tiin min zawt leh nghal a. "Peka te min hrilh tho." tih ringawt chuan ka chhang a. "Aaa...dawt min hrilh ve tho aniang chu...anni thian dun hi chu engtik lai pawha uang reng an nia." a ti sam et a. "Mahse maw Simon, thil mak deuh chu ka tawng tawh asin." ka han ti chiah mai chu min rawn melh hraw mai.

"Enga? Engthil nge i tawn a?" a ti nghal hu mai a. "Englo ania, kar khat vel ka luah hnu khan zan khat chu kawngkhar inkhar ri deuh bur ri ka hria a. Chuan mumang mak deuh deuh ka nei leh zeuh thin a, ka inngaihbelh nge pawh ka hrelo." tiin ka chhang a. "I inngaihbel mai mai anih chu...a ho lutuk." a ti leh ringawt.

"Chuan hmanni zing ka hna rawn kal tur kha, taxi ah ka chuang a. A driver kha a tap vak vak bawk a, kha kha chu tun thleng hian mak ka la ti reng." ka han ti leh a. A nui huk a, "A tap a? Eng ang rual vel nge?" tiin min zawt a. "Ka hre lo, kum 50 chu ala tling lovang. Zu rim ala nam em em zui, ahnuah lah khan pangngai deuhin min be leh bawk sia. Mak ka ti khawp mai, a rapawm lek lek zawk." ka ti a, a nui nasa mai.

"A rui anih chu...chutia i mumang nen thleng thlenga tehkhin chi pawh a nihloh chu. I mumang hlauhawm bawk nen, kha zurui kha ilo tawng leh chiah chiah bawk nen. I inngaihbel kual vel mai mai a nih chu, a ho emai." a han ti leh zuah zuah a, keipawh chuan ka sawi chhunzawm lem lo.

Rei deuh fe kan inkawm leh hnu chuan haw zai a rel ve ta a, step thleng chuan ka thlah a. Inchhung lamah chuan ka lut leh a, "Nia, zu leh damdawi a tihpawlh anga, a rui a te pawh a ni mahna." tiin ka phun deuh sap a. Mut hma chuan Melody nen darkar khat vel kan inbe leh phawt a, tichuan ka mu ta a.

***********************

A tuk tlaiah chuan Melody chuan min thlah haw leh a, mahse keimah hlirin ka khalh thin thung. Kan in thlen dawnah hian ka chhuk a, aman a khalh haw leh mai zel. Mahse tun tum chu kan inzawn kan thlen dawn chuan, "Tlan tlang rawh.." a ti ta tlat mai. Ka tlan tlang a, "Tinge?" tiin ka han zawt a.

"Ala hma tho, lengkual ang." a ti leh a, mak ka ti angreng khawp mai. "Deuh teh tlat che chuan...khawiah nge kan len anga?" tiin ka zawt a. "Tlan zel rawh, kan veng lamah tlang nuam deuh a awm." tiin min chhang leh a. A sawi ang chuan ka tlan zel a, anin kalkawng min lo hrilh zel bawk a.

A sawina hmun chu kan thleng a, a nuam reuh phian mai. "Avan nuam ve....kal ziah tur a nih hi." tih pah chuan kan thudun a, min nui deuh suk a. "Nia, kan kal ziah dawnnia." tiin min chhang a, a awmdan chu a danglam tlat hian ka hria. "Melody, tinge len i tih teh tlat a? Vawiin chu i cool riauvin ka hria, i nuamsam lo em ni?" tiin ka zawt a.

"Nuam lo chuang love, englo ania..tukinah ka nu in min hau vak vak a." tih pah chuan a mittui a rawn hnam nghal a. "Ava zialo ve...tinge in inhauh a?" tiin ka zawt leh a. "Ka nu hi chuan hman deuh atang khan min haw tawh hrim hrim, ka nu hia chuan..." a ti tham leh tiak a, a tah a chhuah hmel takzet.

"Tinge i nu nen chuan in inhauh reng reng a? Engvangin nge a huat ngawt ang che?"

"Hmana thil thleng vangin ania, min hauhna hi a zawng reng tawh zawk."

"Hmanah chuan eng thil nge thleng a?"

"Chhungkaw thil ania.."

"Anih chu...chuti chu ka zawt lo mai ang che."

A mittui a tla a, "Ka haw peihloh vang ania..inhauh reng ka peih hrih lo a ni." a ti a, a tap deuh feih feih a. "Khaih khaih, tap mah ta che. A haw tak tak lovang che, an tar tawh a...a thinchhe ve mai mai nih chu." tiin ka thiam ang tawk chuan ka hnem a, min kuah a, a tap zawih zawih mai.

"Aih, min hua alawm." tiin chhuak em em hian a tap a, keipawh chuan ka kuah let a. Min kuah nghet tawlh tawlh a, chutia ka duh ruk em em leh ka vei em em hmeichhia in duh hmel taka min han kuah tlat mai chu a lungngaih lai mah nise, kei erawh chhungrilah ka hlim veng veng mai.

Ka kalsan hlau niawm tak chuan min kuah nghet sauh sauh a, mak ka ti angreng hial zawk. A mittui chu ka hruk sak a, chiang tak hian min en a. Ava han hmeltha tehreng em, hmundang hawisan ka phal mawlh lo a ni. Min melh dan atang chuan a thian ang chauh chuan min en ta bik hauh lo a ang ta riau mai, ka duhzia hrilh a hun chiah niin ka hria.

Ka kut pahnih chuan a biang lehlam lehlamah ka dawm a, "Melody, thil hrilh duh che ka nei." ka han ti a. Ka mitah min en reng pah chuan, "Umm..sawi rawh." a lo ti zawi sap. Ka huaisenna zawng zawng sawm khawmin ka han thaw hak a, "Melody, kei hian ka duh takzet che a ni." ka ti ve ta thuai mai, ka sawi zo thei hram a ni.

Mahse ka rinloh lutuk, beisei deuh tho siin min chhang ta tlat mai. Sawi thui ve lo mahse a ri a mawi lutuk tlat, "Keipawn." tih ringawtin min chhanglet. Engtia han dawnsawn tur nge pawh ka hrelo, kan ngawi dun reng ringawt. A hmui senno chek maiah chuan dim tak hian ka fawp a, ani pawh chuan min lo chhang let vat bawk.

*********************

A tawp a tawpah chuan kei val senior mai hmabak hian bialnu chu ka nei ve leh ta, chupawh ka duh ruk em em thin ala ni zui. Reiloteah Peka leh Matlana te thiandun chuan Melody nena kan inkar chu an lo hre leh hmanhmawh tawh, thawhpui thenkhatte pawh chuan an hre ve lo thei lo.

Nupa nih hmaa sex hman a duhloh thu min hrilh fo thin a, zu rim ka nam apiangin a titau ziah bawk. Mahse zu ngawlvei ka nilo bawk a, zu inloh te mai mai chu ka harsat lo lutuk ringawt. A tihtauh pawhin a lungawi leh vat zel a, ala naupang ve bawk a, a chang chuan a lawmawm lek lek ka ti hial thin.

***********************

ZAnkhat chu mahni chauhva awm tlawk tlawk chu ka hne ve deuh avang chuan ka inluah neitute ina lenluh ve hrim hrim ka duh deuh tlat mai, tala in in chu ka kalh a. Tichuan ka leng ta a, rinai takin ka leng rei. Eng eng emaw sawiin kan titi tui dun hle a, ka haw dawn meuh chuan dar 11 a lo pel der tawh mai.

Ka haw chho step tawp ka thleng chiah chu ka ding chat mai, kawngkhar bulah chuan changpat tam tak mai hi an lo awm nuai mai. Ka va en hnai a, kha ti em em a tam kha chu khawiah hian an rawn kal khawm theilo hrim hrim. Tu emawni in a dah chawp ani chiang lutuk, hlauh lam ai mah chuan ka thinrim hial zawk.

Hmun phiah la in ka phiat fai vek a, changpatte pawh chu ten chung chungin ka paih fai vek. "Tu phiangsen nge mawni...mai mai chuan..." tiin ka phun nuah nuah a, inchhungah chuan ka lut a. Ka inphih fai hnu chuan mut tumin ka room ka pan a, room ruak zawk ka kal pel chu thawm ka hre ta tlat mai.

BAwng tlawh ri deuh dut hi a ang berin ka hria, ka ding nghal chat a. Ka enfiah ang nge ka room lamah ka lut tlang dawn tiin ka inngaihtuah nghal char char. "Mipa ka nia lawm le." tia inti huai chawpin room ruak lam pan chuan ka kal ta zawk a, kawngka chu ka hawng a. A thim vek, a lum deuh huk bawkin ka hria.

Light chu ka dap a, ka dap fuh hlauh mai. Ka han on chiah chu room chhung chu a eng ta uar mai, tumah erawh ka hmulo. A chhungah chuan ka lut deuh ngat a, ka han hawi kual vel a. Bang kilah chuan paper niawm tak inzep hi ka hmu tlat mai, ka va pan hnai nghal vat a. Ka han enchiang a, ka rin ang chiahin paper inzep a lo ni.

Paper chu ka la chhuak a, ka han keu pharh a. A chhungah chuan, "A LO KAL ANG, ANI KHA PHUBA LA TURIN A LO KAL NGEI ANG. TUMAH A CHHUAH DAWNLO, PHUBA CHU A LA NGEI ANG." tih hi alo inziak a, a hawrawp lah chu ala nalh phian lenghal. "Engtak chu a awmzia nimaw?" tiin ka lu thak lo pui chu ka hiat nuah nuah ringawt a.

Hlauh lam aimah chuan mak ka ti zawk, ka hrethiamlo takzet. Paper chu ka han en leh vang vang a, a hlui anreng viau tawh lehnghal. Thuziak pawh chu pentui duma ziah a ni a, a pherh deuh nual bawk. A hawrawp kha chu nalh viau lo phei se chuan ka chhiar theilo hial zawk ang, chhete a thler bawk.

Paper chu ka hmet khawr a, light off in room chu ka chhuah san ta a. KA room lamah chuan ka phei a, paper pawh chu ka paih daih. "He inah hian engemaw tak chu a thleng tawh chiang a ni, ka ngaihbel mai mai chu a ni lo. Tinge maw zanin te khan Pu Kima kha ka lo zawh law law loh le aw, ka van mawl tak." tiin ka inbe mawlh mawlh a.

*********************

Engemawni hian min ti harh zawk mai, sana ka en a, zinglam dar 2 vel a ni. Hmeichhe tap ri niawm tak hi ka hre zui leh a, lungphu a rang duh hle mai. Ka sawi thiam dan chuan tap duh si, tap ri ngam silo hi a ang ber. ZAwite te hian a tap ri leh kerh kerh zel a, chet mai nachang pawh ka hrelo.

Chutia a tap ri ngaihthlak ngawr ngawr chu a dik thei bawk silo, mahse zep lo chuan ka ngam chiah lo a ni. Ka mumang tal ni leh hram se ka va ti em, ka han insik vel thul. Mahse zanin zet zawng, ka mumang a ni lo tlat. Ka thlan a tla leh nghal bawrh bawrh mai, hreh tak chung chuan khum atang chuan ka tho a.

Room atang chuan dim te hian ka chhuak a, a tap ri erawh ka la hre reng thung. Room ruak ngei atanga rawn ri chhuak a ni tih pawh ka hre nghal, huai ava har thin tak em. Room pawh chu a inkalh lo, chhete a inhawng. Room chhunga light pawh a in on eng vek, ka va pawh mai ngam lo.

Ka han nghak leh deuh phawt a, ka room a let leh mai te chu ka duh rum rum. Mahse enfiah loh chu a dawihzep thlak ka ti ve bawk si, ka va pan hnai ta nge nge a. Room ka va lut chu le, ka thil hmuh chuan min ti ding chat mai. Bang kilah chuan hmeichhe pakhat hi saruak vek hian a lo thu tawm a, a khur zawih zawih lehnghal.

A kun tlat avang chuan a hmel ka hmu thei lo, light a eng tha bawk a, a lang chiang ngang mai. "Tu...tunge i nih?" ka ti khur dar dar a, zeplo chuan ka hlau takzet. Mahse min chhang miah lo, ala kun reng a. A la inhnit feih feih a, a tah ala chhuak takzet a nih hmel. Mahse kei erawh chu hlauhna in ka thauvah min man laklawh tawh, ka va kal hnaih ngam lo hrim hrim.

"Tunge i nih ka tih chu?" tiin ka be leh a, a taksa te chu a pil nasa em em bawk a. Chutah zawi te hian, "Min....min pui rawh...khawngaihin." a ti hluam hluam a. Mahse a la kun reng tho, a hmel ka la hmu thei chuang lo. "Engtin nge i rawn luh theih a? Enge i rawn tih?" ka han ti leh a, hlau anga lan loh hram hram ka tum.

"Khawngaihin....min pui hram rawh." a ti leh hlawp hlawp a, mahse ka chhang ve hman lo. Ka ka(mouth) ka ang hman zuai a, current a rawn thim hmak mai. Second 2 pawh a ral hman lovang tih ah chuan a rawn eng leh thut a, ka va han au ring tak em. Ka hma zawn takah chuan hnai set sawt ah chu hmeichhia chu a lo ding reng mai a nih chu, mahse hmel a nei lo.

Ni e, zandanga ka mumang ang tho kha a ni. Hmel pakhat mah a nei lova, a taksa chu a pem nasa em em bawk. Tlanchhiat ka tum a, mahse ka ke chu lei chuan a hip bet tlat nimai hian ka hria. Ka che sawn thei eih lo, zun ka cheh hialin ka hria. Chutah light ala de zawk zawk zui, ka hlauhna ti belhchhah turin chu hmeichhe hmel neilo chu ring zet hian a han tap leh ta vak vak mai a nih kha.

********************

Ka thu chhuak hlawl thei hial, ka tawnzau hak lai chu a huh hian a huh vek thei. Ka mumang bawk maw ni a, a ni em em tawh lo. Thil engemawni tak chu ka chungah hian a thleng a ni, he ka inluah ah hian keimah chauhvin ka cheng lo tih ka ring nghet bur tawh. Peka leh Matlana te thilsawi pawh kha dawt a nih ka ring tawh lo, Sally hi ka bulah a cheng ve ngei a ni tih ka ring bur tawh.

Ka tho a, a lum lutuk chu towel nen bathroom lam ka pan nghal a. Ka inbual laite, chaw ka ei laite, ka insiam laite chuan thildang engmah ka ngaihtuah thei tawh lo, ka unaunu anga insawi, hmel pawh neilo Sally ringawt chu rilru ah a awm reng mai. Mood a fuhlo nileng leh dawn anih hi, phur fahran lo chuan hnathawk turin ka chhuak leh ta a.

***********************

Kar khat vel chu a lo liam leh ta der mai, engmah ka tawn chhunzawm lem lo. Mahse ka ngaih erawh a tha thei ngang chuang lo, ka mumanga ka thil hmuh thinte chuan ka rilru a ti buai takzet a ni. Hnathawhna velah pawh ka awm a nuam thei tak tak tawh lo, Melody phei chu awm lo se chuan office kal ka ning viau ang.

Melody bulah pawh ka hrilh hial a, ani pawhin mak a ti thin khawp mai. Doctor pan mai tur te pawhin min hrilh a, mahse doctor panna tur khawp chu niin ka hre bawk silo. Mahse rilru ah chuan doctor han pan mai pawh chu a pawina a awm dawn amaw nile tiin ka inngaihtuah fo thung.

Melody nena kan inhmangaihna kawng erawh a tluang hle a, inneih pawh kan tum rilru deuh uai tawh. Mahse Melody zawk hian ala inpeih loh thute, hmanhmawh lova muang changa tih a duh zawk thu min hrilh fo. Chubakah keipawhin ka nu leh pate engmah ka hrilh lo bawk a, keipawh ka hmanhmawh bik lem lo.

Sex hman a duh ngai lova, inneih hma chu invawn thianghlim tlat a duh thu min hrilh thin. Keipawh tlangval sual leh hur herh tak ka nilo bawk a, ka tilui ngai bik lo. Rin ai takin a Christ ru reuh phian a, an ina ka len chang te hian Bible te hi a lo chhiar melh melh zel. Hetiang khawpa nula, la naupang te si, fel leh hmeltha hi an van tawh teh lul nen, vannei ka inti takzet.

**************************

Zankhat chu hna pawimawh leh project siam tur engvak mah a awmlo bawk nen, ka tih tur hrelo chu phone khawihin thutthlengah ka mu mai mai a. Ka mut a chhuak riau mai a, sana ka en lahin dar 9 chiah ala ri bawk si. Melody lah project lian tham ve tak siam tur a neih avangin biak chi  ani bawk silo, "Umm..mu teh ang." tiin ka tho a.

Bathroom lam ka pan a, ka hmai ka phih a. Wash basin-a ka hmai ka phih zo ka hawi chhuak, darthlalang ka han in en leh chiah chu ka va phu nasa teh kher em. Ka hnungah chuan thla niawm tak, chianglo ruaia kal phei zeuh hi ka hmu thut mai. Ka thinphu chu a rang hman kher mai, hnunglam ka hawi vat a.

Mahse engmah ka hmulo, ka han enkual tak ngial pawhin chukchu tak ngial pawh ka hmu lo. Ka thaw huai a, ka mumanga ka thil hmuh thinte kha ka ngaihtuah nasat lutuk vang a nih ringin ka ngiah ka ti tha lui a. Inla huaisen luiin ka hmai chu ka phih tha leh ngat a, ka hawi chhuak leh a. Mahse engmah ka hmu tawh lo, ka nui suk a, bathroom atang chuan ka chhuak ta a.

*********************

Ka muhil tep tawh, ka chhing diar diar tawh. Chutah chiang fek fawk hian hmeichhe aw tham leh nalh tak mai hian ka beng bulah, "I duh apiang ka tih sak ang che." tiin zawi te si, mahse fiah em em si hian a rawn phun ri sap mai. A aw nalh em avang khan han hlauh mai nachang pawh ka hrelo, ka mumang amaw ka ti hial zawk.

Mahse he inah hian keimah chiahin ka cheng a ni tih ka hrechhuak leh thut a, khum atang chuan ka zuang tho rang chiang ngei mai. Ka sawi thiam dan ber chuan, hmeichhe pakhat hi ka bulah hnai takah rawn mu ve se, tichuan ka beng bulah rawn phun sap mai se, chutiang vela chuang chu a ni.

Ka mumang nge ni anga, kha hmeichhia ka mumanga ka hmuh thin, Sally inti kha a awm ve tak tak zawk ni ang tiin ka inngaihtuah nasa hle mai. Ka thlan a tla nghal zawih zawih mai, mut leh mai pawh chu ka ngam rih lo. Ka khum bulah chuan ka thingthi a, ka tawngtai ta tawp mai. Tichuan inven nan tiin Bible chu ka lukham bulah ka dah a, ka muhil ve leh mai bawk.

*************************

A tuk office lunch break ah chuan Melody nen canteen ah kan chawl dun leh a, zan hmasa lama ka thil tawn te chu ka hrilh a. Ani pawhin mak a ti hle mai, "Ka'n zung lawk." tiin bathroom lam panin min kalsan a. Chutih lai chuan PEka hi a rawn kal a, Peka te nen hian Melody nena kan inngaihzawn atang phei hi chuan kan inbe tawh ngailo tluk a ni.

"I va induh vea..."

"Induh mi? Mi in kawm peih tawh lo zawk a nih kha."

"Lutuk che hian, Melody nena in inngaihzawn atang pehi chuan i thianpa hi min hre tawh lo a nih ber hi maw..hehe."

"I la hmu ve em em ang...han tang deuh la."

"E taka MS, i nau kha tunge a hming khah? E..ka hre leh si..Sally kha...i bulah ala awm em?"

Ka phu deuh zuk mai, Peka hian dawt a lo sawi hauh lo em ni? Ka melh deuh hru a, "Tu maw?" ka ti hu mai. "Aww...Sally, i nau..enge maw i nau chungchang ka sawi apiang hian thildang i sawi ziah le..i va uikawm ve a.." tiin a la nui huah huah zui. Han chhan mai ngaihna pawh ka hrelo, "Peka, Sally chu i hmu tak tak em ni?" tiin ka zawt ringawt.

"Amak e aw...hmu e, i va han strict vel ve a.." a han ti leh a. "Eng ang hmel pu nge?" ka han ti leh a, mak ti hmel deuh hian min en hau mai. "ENge awmzia? I nau hmel pawh i hre nange.." tiin min melh hu mai a. Thudik engkim ka hrilh chuan a awihloh emaw, rilru buai anga min ngaih te ka hlauh avang chuan, "Hehe...tak tak chuan a haw tawh." tiin ka chhang ta ringawt a.

********************

Tlai banah chuan Melody chu a rawn leng kawi a, kan hna thil vel sawiin ka titi luam a. "Alum emai, khawimaw kekawr bul i nei em? HAw hma chu ka lo ha teh ang, ka thawmhnaw hak hian min ti chau." a han ti a, ka boxer leh tawnzau fai te chu ka pe a. Ka room ah ava inthlak a, a o chhuak leh chu nidang zawng aiin ka hmu tha.

A mal var no nalh tak te, a vun ngo tak leh a pian nalh em em mai te chuan ka mit an la em em a. Kha leh chen ka bialnu lo ni tawh kha a taksa ka han hmu tam deuh chu thisen pawh a lum deuh pap mai, a bialpa ka ni bawk a, a zak lemlo aniang, bra pawh a ha lo. Ka bulah a rawn thu a, hmun dang ka hawisan phal meuh lo a ni.

**********************

Zan a ni a, mahni chauhvin thutthlengah thu in phone ka khawih leh ta mial mial mai. Thil mak tak tak ka tawn fo tawh vang nge, mahnia awm tawp zel mai chu khua  ahar tan ta riau mai. Mahse ka ngaihtuah leh ka mitthla a awm mek chu ka bialnu Melody a ni daih thung, a mal var mum nalh tak te khan zeplo chuan ka thisen a ti lum a, nupuia han neih thut mai te chu ka chak rum rum hial a ni.

MAhse ani lah chuan inneih hmaa sex hman a tum loh zia min hrilh fo bawk si, mahse han fight luih erawh chu ka tum hauh lo thung. Mahni a awm ka ni bawk a, mahni hian ka phun leh ri leh nuah nuah thin. Khuma mut pah chuan ka bialnu ka hmangaih em em Melody thlalak chu ka en ngawih ngawih a.

"Aww..tiang em em a itawm bialnu hi ka lo nei animaw? Han che sual zeuh ila, a nawm dawn tehreng nen..." tiin keimah chuan ka tawng mawlh mawlh a, ka nui deuh vur vur bawk. Kawngka a rawn inkik a, "Tun ang hunah tunge maw ni le?" tiin peih lo tak chuan ka tho a, kawngka ka va hawng chu ka rinloh lutuk a ni tlat.

ZAn dar 11 a ri tawh a, mahse ka kawngka bulah chuan Melody a lo ding reng mai a nih chu. "Ehee..Melody, tun ang zanreiah..enge i lo tih dawn?" ka ti hu mai. Min chhang lo, min thlakhlelh hmel tak hian ka mitah tak a en a, nidanga a awmdan nen a in anglo takzet. A rawn lut a, kawngka chu a kalh tha hmak a.

Chutah le, min kiss ta bawrh bawrh mai. "Enge awmzia?" tiin ka zawt a, mahse ka tawng hleithei lo. Min kiss chhunzawm zel a, ka tawng a phallo ni berin ka hria. A mipa zawk ka ni bawk a, zawhna zawh luih reng chi a nilo. KA insum thei ta bik lo, ka pawm nawlh a, ka room lamah ka hruai phei a.

Duhthawh em emin sex chu kan hmang ta a, a zei em em mai lehnghal. Ka ngaih a tha lo hman hial a, mahse a serh atanga thisen lo chhuak chuan a virgin ka hawng ngei a ni tih a ti chiang a, ka lawm angreng hle mai. Mahse mak ka tih em em chu na ti hmel pawh a pu lova, nuam a ti em em zawk hialin ka hria.

Kan zawh hnuah chuan kan mu dun hle hle a, kan chau dun khawp mai. Kah thaw dun hlawi hlawi a, ka la tawng mai thei hrih lo. "Duat, ngati teh thut nge?" tiin ka zawt a. Mahse a maimitchhing tlat a, a rawn tlawh hnai a. "Engmah min zawt suh, ka muhil duh." a tih rual rual chuan min kuah a, a hnar nghal suk suk mai.

Keipawh chuan ka zawt zui lem lo, ka muhil ve leh mai a. Thil tla ri bur chuan min ti harh chiang ngei mai, ka meng kawk thei hial. Light ka on vat a, Melody chu min hnungchhawn zawngin ka khum mawngah chuan a lo ding run mai. "Duat, tinge khatah i din a? I tha maw?" tiin ka han zawt a, mahse min chhang miah lo.

"Duat, enge awmzia? Tinge khatia i din reng a?" tiin ka zawt leh a, min la chhang chuang lo. Ka ngaih a tha lo hle mai, vawi tam ka biak hnu pawh chuan min la chhang duh miah lo. "Melody, ka ngaih i ti thalo ania.." ka han ti leh a. Chutah muang chang chuan a rawn hawi a, ka bialnu Melody a ni ta hauh lo mai.

Hmel a lo nei reng reng lo, ni e..ka mumanga ka hmuh thin Sally ngei kha a ni. ka hlau lutuk khum kilah chuan ka tawlh phei nghal a, "Nilo..ka duh lo." tiin ka rak nghal chiam mai. Ka hma zawn takah chuan a ding khur mai a, a kawr hma te chu a tet nasa ngang mai. Chutah ka khum mawng atang chuan a rawn vak chho ta, ka hlau lutuk chu ka au vak ringawt.

*************************

Khum atang chuan ka tla tawp a, ka mumang bawk a lo ni leh ta. Ka bulah pawh chuan Melody a lo awm tawh lo, zingkarah min kai tho lovin min haw san a ni ngei ang. Ka thlanin min lo bual huh vek a, ka lukham pawh a lo huh dup mai. Ka thaw huai a, "Huiham ka va han kham tawh tak em!" tiin khum atang chuan ka tho a.

A hma zana Melody nena kan lo chet hit deuh vang nge, ka inbual pah te chuan ka nui deuh sung reng hian ka hria. Ganja zu ang mai chuan ka khi deuh reng a, ka mumang lam pawh ka ngaihtuah vak thei lo. Phur tak chuan ka insiam a, office chu ka kal ta a. Ka thlen chuan Melody chu a lo awm der tawh a, a buai hmel kher mai.

Computer hmaah chuan thu in hmundang pawh a melh hman meuh lo, ka va be lui ta chuang bik lo. Chhun a ni a, canteen lam pan chuan kan inzui thla leh ta a. Ka lai deuh tut lehnghal, nizan lama kan awmdan pawh engmah kan sawi chhuak hrih lo. Mahse mak tak maiin Melody chu a mood a fulo em em a, a awm a nuam chiahlo niin ka hria.

"Nizan kha ngati teh thut nge a?" nui deuh vur vur chung chuan ka han zawt a. "Enge nizan? Enge awmzia?" a ti hu mai. Mak ka ti angreng hle a, mahse a hre lo der mai mai angah ka la ngai a. "Hrelo der suh, zak suh a ho lutuk." tiin ka han nui leh deuh suk a. Mahse Melody chuan a hriatthiam loh hmel khawp mai, "Enge nizan chu??" a ti leh a.

"Tinge i mood ava fuhloh hmel ve? Na i nei ami?" tiin ka zawt ta daih a. "Aw..tukin zing ka tho kha ka nuamlo lutuk a." tih pah chuan a rawn tawlh hnai a, zawite hian, "Ka serh atangin thisen a rawn chhuak a, ana ropui. Amak rap, enge a chhan pawh ka hrelo." a ti leh a, keimah zawk chuan ka hrethiam tawh lo hial zawk.

Ka tawng leh hma hma chuan, "Inneih hmaa sex kan hmanglo char char anih chuan Pathianin min malsawm em em ang." tiin a han nui leh sak a, ka mak ti lutuk chu ka en hau ringawt. Min rawn en ve a, "Tinge khatia min en hu a?" tiin min zawt a, chhan mai ngaihna pawh ka hrelo. Ka aw ka han thian kharh a, "Melody, nizanah ilo kal em?" tiin ka zawt ta tawp mai.

Min melh deuh hraw a, "Project ka khawih a, ka buai mah nakalai a. Zan ah lehnghal, engtin nge ka rawn kal theih ang? Tinge min zawh a?" tiin min zawt let hu mai, ka ngaih a va tha tawhlo chiang tak em. Nizana sex ka hmanpui kha Melody ngei hi  a ni bawk si a, mahse tinge amah hian engmah a hriat miah loh le?

"Engmah nilove, aaa...ka zawt mai mai che." ka ti ta ringawt a, a ner suk a. "Nizanah chuan dar 10 leh a chanve velah ka mu a, zing dar 5 vel ah ka tho leh a. Ka kap a na lutuk a, ka han enchiang kha ka serh a lo thi phung a...amak ania aw.." a han ti leh a, engmah sawi loh law law mai chu ka thlang ta a.

**************************

Tlai ka haw pawh chuan Melody chu ka be tha ngam tawh lo, thil awmzia hi ka hre biklo a ni. Amah MElody hi hlauh tur nge pawh ka hrelo, ka rilru a buai zo vek tawh. Inah chuan ka haw a, room ah ka lut tlang nghal a. Diktaka sawi chuan he ka in luah mek ah hian ka awm hreh tawh a ni, ka thla a ti muang hlawl lo.

Ka inthlak a, khumah chuan ka bawk thlawp a. Nizana sex ka hman pui kha MElody hi a nilo tihna em ni ang, mahse a serh a nat thu leh thisen a chhuah thute kha a sawi bawk sia. Engmah a hre tlat lo kha amak ka ti ber, a mood ala fuhlo em em zui kha ania. Ka rilru ah chuan zawhna hlir a khat, enge thil awmzia ka hre chak takzet a ni.

"Inbual harh teh ang." tiin ka phun deuh sap a, towel ka ban chiah chu lehkha them hi a lo tla a. Ka han chhiar a, thuziak a lo awm tlat mai. "NIZAN KHA A NUAM I TI EM? I DUH APIANG KA TIHSAK ANG CHE KA TIH KHA..." tih hi a lo inziak a, thinphu ava rang duh kher em. Enge awmzia ni ta ang? Nizana ka mutpui kha Melody anilo tihna maw?

He lehkha a thuziak hi tu ziah nge? Tunge min tibuai reng tu hi? Engmah awmzia ka hrelo, paper hnung lam chu ka han en leh a. Chutah chuan tereuhte hian SALLY tih a lo inziak bawk, mak ka ti takzet. "I duh apiang ka tihsak ang che.." tia ka beng bula rawn phun sap kha chu an awm ngei a, mahse ka mumang nge ka bengchhe ri ka hre silo.

Melody ka it em em thu leh sex hmanpui ka chak thu kha ka sawi ri ngei a, kha kha Sally hian a lo hria anga, Melody angin a rawn kal tihna em ni? Mahse thil ni thei a ni bawk silo, mi bulah phei chuan sawi ila mi a emaw min ti ngei ang. Mahse he ka inluah a ka thil tawn zawng zawngte nena han ngaihtuah chuan a ni thei ve tho, rilru a va buai veleh.

*************************

ZAn a ni a, rilru nuamlo tak chuan ka thu ngawi reng a. Ka TV en lai pawh chu ka ngaihsak eih lo, ka thla a muang hlawl lo a ni. Bathroom ah ka lut a, wash basin-ah chuan ka hmai ka han phih a. Ka han in en vang vang a, keimah ah hian diklohna a awm zawk em mawni te ka ti hial. Bathroom chhuahsan tura ka inher chiah chu darthla lang zawka ka thla chu a che ve ta miah lo, chiang takin ka hmu hman a ni.

Ka thin phu ri dup dup ri chu ka hre thei hialin ka hria, darthlalang lam erawh ka va melh nghal ngam mai tawh lo. ZAwi muang chuan ka hawi let leh a, mahse ka thla pawh a pangngai leh vek tawh. Ka hmu sual mai mai lo tih ka chiang, enge awmzia ni ta ang? KA hlau takzet, ka thlan pawh a tla nghal bawrh bawrh mai.

**************************

ZAnlaiah chuan engemaw ri leh dup thin chuan min ti harh a, ka mumang tho a ni leh ringin ka meng duhlo lui tlat. Mahse ka mumang chu anilo aniang nge, chu thawm chuan min ti muhil thei tlat lo. Ka sawi thiam dan ber chuan bang chum ri dup dup hi a ang ka ti ber, phun ri bul bul hi a khat tawkin ka hre zeuh zeuh bawk.

"Mipa ka nia lawm le." tih pah chuan ka tho chhuak a, thawm awmna lam chu ka pan a. Bathroom atanga lo chhuak ni tlatin ka hria, bathroom ah chuan ka lut a. A chhung chu a vawt deuh ruih mai, mahse tumah ka hmu lo. Thawm chu ka la hre reng a, zawi te te a tawng ri ka hre bawk.

"Tunge awm? Awm in awm em ni?" tiin ka han au ngawt a, mahse chhanna ka dawng lo. Bang rawn inchum ri leh dup chuan min ti phu zawk a, wash basin bula darthlalang chu a che dawt mai. Tawng ri chu ka ngaithla chuang deuh a, "Min pui rawh..." tih ri ni tlatin ka hria. Hmeichhe aw a ni a, a mangan hmel hle bawk.

A lan dan ber chuan darthlalang hnunga bang chhungah chuan awm an awm anga, chu chuan a rawn chum ni berin ka hria. "AWm in awm em ni?" ka han ti leh a, min rawn chhang let niawm takin tawng thum bul bul ka hre leh a. Mahse enge a sawi ka hre thei lo, a mangan hmel em em ringawt mai.

Thawk leh khatah boruak chu a rawn reh ta hmak mai, thawm engmah hriat tur a awm lo. Ka kawngka rawn inchum ri dawt dawt chuan min ti phu zuk a, bathroom atang chuan ka tlan chhuak nghal vat a. Kawngka chu a rawn inchum ri leh bur bur a, va hawn mai pawh ka ngam tawh lo.

"Tunge...tunge ni?" tiin a han au vak vak a, mahse min chhang miah lo. Chutah a reh deuh vang vang a, kawngka lam pan pah chuan choka a chemte chu ka va la a. Zawi muang chuan ka pan zel a, ka thlanin min bual huh vek tawh. Muang chang chuan kawngka kalhna chu ka han hawng a, chemte hum ran chung chuan kawngka chu ka hawng a.

**********************

Mak tak maiin step chhukna bulah chuan pa pakhat hi a lo ding run mai, min la melh kur lehnghal. "Tunge i nih?" ka han ti vak a, mahse min chhang lo. Step ah chuan a chhuk a, ka ngaih thalo leh thinrim deuh bawk si chuan ka zui a. "Lo ding teh, tunge i nih a?" tiin ka au zui a, mahse rawn lawilet miah lo chuan a chhuk zel a.

Step tawp thleng chuan ka zui thla a, thui vak lo chu a kal phei leh a. Ka zui zel a, "Lo ding teh ka tih chu....enge i duh a?" tiin ka be zui char char bawk. Ka in chhohna step atanga hla lutuk lo thleng chuan kan inzui a, chutah a ding ta chat mai. Ka lam a rawn hawi a, min melh run mai.

"Tunge i nih?" ka han ti nawn leh a, mahse min la chhang chuang lo. Chutah le, kawngsira lung tum, lian ve tak chu a la lawk a. Ama mitah chuan a chhu ta vak vak mai, thisen a luang nghal zawih zawih. Mak ka ti lutuk leh ka hlau bawk si chu ka tawlh hnung nghal a, chupa lah chu a hmai zawng zawng a thi vek tawh.

***********************

KA thaw hrawk a, ka eu vakin ka hria. Ka harh chiang ngei mai, ka lo rin ruk deuh ang ngeiin ka mumang bawk a ni. Ka thaw huai a, a ngaite ang bawkin ka tawnzau pawh a lo huh leh vek tawh. Ka va han kham tawh tak em, engtikah tak he mumang hian min kalsan ang maw. Doctor hnena in entir mai chu ka duh rum rum tawh, a hrehawm emai.

Sana ka han en a, zing dar 6:30 chauh ala ri lehnghal, a lum ka ti lutuk chu pawnah ka chhuak a. Mipui phun ri deuh sep sep ka hriat avang chuan step ah chuan ka chhuk a, kawngpui ka thleng chu ka dinna atanga hla vak lovah hian mipui an lo ding khawm teuh mai. Chutih rualin min ti hlauthawng bawk, achhan chu police ka hmuh tel vang a ni.

Ka va kal phei a, mi thenkhat ho bulah chuan, "Enge thleng a?" tiin ka zawt a. "Ruang an chhar a." tih ringawt chuan min lo chhang a, ka va en chiang ve ta a. Karei le, ka va han phu chiang tehkher em. Chu an ruang chhar chu nizana ka mumanga ka patling hmuh ngei kha a ni, ani chiang lutuk.

A hmai chu a lo thi nasa em em a, tlangval thenkhatte chuan an lo buaipui mek a. KA hmui ka hup tawp, "Thianpa, i hmelhriat em ni?" tiin nu pakhatin min lo la zawt zui. "MAw..keimah maw..e..aih nilo." tiin ka chhang bah nuai mai. Ka thin a phu nghal dup dup a, ruang pawh chu ka en rei thei lo.

Rang takin ka inah ka let leh nghal a, ka hlau lutuk kha ka khur thei hialin ka hria. Enge awmzia ni ngai? Kha pa te kha chu nizana ka mumang ami kha a ni si a, mahse a tak tak ah a lo awm reng bawk sia. Anih chuan ka mumang kha mumang a nilo tihna em ni? Nge kei hi ka a tawh zawk?

He ka inluah hi chhuahsan vat mai ka duh tawh a ni, he in hi a hrang anih ka ring nghet bur tawh. Hetiang reng reng chuan ka a zo takngial dawn, doctor hnenah chuan ka in entir tak tak mai dawn em ni tiin ka inngaihtuah nasa hle mai. A taka min rikrap silovin ka mumangah chauh min tihthaih a, mahse tun tum erawh chu ka ngaih a ngam ngang tawh lo a ni.

**********************

VAwiin chu ka day-off ni a ni hlauh bawk a, inluah tur dang zawn leh mai chu ka tum rilru a. Nileng mai chuan inluah tur chu ka zawng kual leh ta a, mahse a vang duh khawp mai. "Umm, vawiin atan chuan duh tawk phawt ang." tiin hawn zai ka rel ta a. In ka thleng ka lut chiah chu dawhkanah chuan paper them hi a lo awm a, ka chhuah hma kha chuan eng paper mah a awm ka hre lo.

Paper chu ka la a, a chhungah chuan thuziak a lo awm leh ngei a. Ka chhiar zawng ringawt pawh chuan ka mur sung sung theiin ka hria, "KA PHUBA KA LAK HMA CHU KHAWIAH MAH MIN KALSAN LOVANG, KA U." tih hi a lo inziak reng a nih chu. Lehkha chu ka pawtthler nghal a, bawlhhlawh bawmah pawh paih lovin pawnah a hla thei ang berah ka va paih.

Ka thu a, ka lu ka dawm vawng vawng ringawt. Enge ka tih ang ka hrelo a ni, pastor ka ko mai dawn nge tiin ka ngaihtuah hman hial. Ka han rum leh hak ringawt zel a, ka mang a ang takzet a ni. Bathroom ah chuan ka lut a, darthlalang hmaah chuan ka han in en vang vang a. Ka thaw hak a, "AWle, he inah hian i awm ve tih ka hria. Tunge i nih? Enge i duh sawi rawh..rawn inlan rawh." ka han ti ngawt a.

Mahse thawm engmah a awm lo, a reh thuap mai. Ka han nghak leh deuh vang vang a, mahse engmah thawm a awm chuang lo. "Ava atthlak em." tiin bang chu ka chum vak a, bathroom chu ka chhuahsan a. Tinge kha lehkha ah khan KA U tih a ziah tel kher, ka mumang hmasa berah pawh khan KA U tiin min ko tawh bawk.

*************************

ZAn a ni a, chaw eikhamah chuan sikret lei turin dawr lam chu ka pan a. Sikret leh kuhva chu ka lei a, ka phei lehnghal a. Kawng sirah chuan thian ho pali vel hi an lo awm a, min rawn en chu mak tih hmel deuh hian an phu deuh zuk hlawm a. An phun nghal sap sap bawk, an in en he hu hlawm bawk a.

An zawn ka va thlen chuan an zinga pakhat chuan, "Thianpa, lo ding lawk teh." a rawn ti ta nge nge a. KA va phei ve mai bawk a, "Enge ni ta?" ka va ti a. Min en vang vang a, "Hemi venga awm hi ami i nih?" a han ti leh a. "Aw ni e, khilai in khi ka luah a. Ka awmna ala rei lo, tinge a?" tiin ka zawt let a.

"Aaa..eng nilove..kan hmelhriat pakhat nen in in ang lutuk a." a han ti leh ringawt a, za lo tak chuan ka nui ka, ka kalsan ta hlawm a. Ka phei hnu pawh chuan an la phun sap sap tih chu ka hria, "Danglamna an nei lo tluk vel a ni." tia an sawi chu ka hre phak. Engah vak ngailo chuan ka in lam pan chuan ka chho a, inah chuan ka lut a.

******************************

DAr 10 vel thleng chu TV en pahin Melody nen kan intext a, a mut tawh avang chuan keipawh chuan mut ve mai ka tum a. Ka hmai te ka phih a, mu tur chuan ka inbuatsaih a. HEmi zan erawh engmah thawm danglam ka hre lo hlauh, thlamuang takin mu ve thei tawh ila ka va ti tak em.

Ka awmdan chu ka kham tawh takzet a ni, hetiang reng reng a hlauthawnga nun hman reng mai chu. Inluah tur dang lah chu ka hmu der mai silova, hmuh chhun ho lah a to em em hlawm mai bawk si. Engtin nge ka awm zel ang tiin ka inngaihtuah neuh neuh a, hriat loh hlanin ka lo muhil der mai.

*********************

Pangngai taka zing ka tho chu mak ka tiin ka lawm angreng hle a, mumang hlauhawm engmah ka nei lo hlauh. Ka tho nuam hle mai, a thawh pawh ka tho tlai deuh. RAng takin rawng ka bawl nghal a, chaw te eiin ka insiam a. Message ka dawng a, ka han en chuan Melody message a lo ni.

"Duat, vawiin ka lo kal thei dawnlo. Tukin tang khan ka luak reng a, mahse manager chu ka hrilh tawh tho." tih hi min lo thawn a. "Aw..ava zialo ve. Awle, office ban veleh ka rawn kan dawn che nia." tiin ka reply a. Melody meuh a kallo tur chuan min ti phurlo takzet, office ah lah kan buai thin em avangin kan awmdun hleithei bawk silo.

***********************

Lunch Break lai chuan pawnlamah meizial ka zu a, khawlaia mipui che tla vel chu ka thlir mai mai a. Chutih lai tak chuan hmeichhe pakhat hian ka ban a rawn vuan thut mai a, ka phu deuh zuk mai. Ka han en a, a hmel chu a chhe lemlo. Mahse min endan chuan ka ngaih a ti tha lo hle a, a mittui a tling teuh bawk.

Chutah zawi sap hian, "SAngte...SAngte.." tiin a tap titih ta mai a. "Min hai aniang, thiannu..SAngtea ka nilo." tiin ka lo chhang vat a. Chuveleh nu pakhat leh tlangval pakhat hi an lo kal a, chu hmeichhia chu an rawn kai hrang nghal a. "Daisy, Sangtea a nilo..." tiin a rawn kaihrang tu nu chuan a hrilh fiah mawlh mawlh a.

Ka hre thiamlo kher mai, "Thianpa, kan tihpalh aw.." tiin tlangval zawk pawh chuan thupha  a chawi mawlh mawlh a. Kal mai a han tum chu ka ko let a, "Lo ding lawk teh, thianpa." ka ti a. A ding a, "Enge awmzia ni a?" tiin ka zawt a. "Englo ania, a unaupa...hman kuma boral tawh nen in inang reuh lutuk a. Amah amaw a ti che a nih kha...chubakah a rilru a kim chiah lova." tiin min chhang ta mai a.

"Anih chu, nihleh an chhungte zinga mi em ni i nih?"

"Aih nilove, a thianpa ka nia." 

"A unaupa nen chuan kan in ang reng reng em ni?"

"Aw in ang ve deuh e, in san zawng pawh a in ang lutuk."

"A hmel en kha chuan  a pangngai hmel viau sia..rilru kimlo hmel a pu pawhin ka hrelo."

"Ihmaw thianpa, a unaupa mai nilovin a unaunu pawh  a boral tawh a. Khata tang khan a pangngai thei tawh lo, damdawiinah pawh an kal pui fo alawm."

Han zawh chhunzawm zel ka duh viau nangin, "Tluanga...lo kal ta che." tia hmeichhe nu zawkin a rawn auh tak avang chuan, "Ka kal phawt ange..kan tihpalh aw.." tiin min kalsan ta a. Ka awm ti nuamlo zual ber tu chu khatia an kaih hran hnu pawh a ka nula in min la en char char kha  a ni, a tap deuh pur lehnghal.

***************************

Ka hnathawh ah pawh rilru ka pe hleithei lo, kha nula..DAisy tia an koh khan ka rilru  a luah tlat mai. "SAngte." tiin min kova, Sangtea chu a unaupa boral tawh kha a ni ngei anga. An chanchin hriat chian chu ka chak takzet. Chubakah a hma zan lawk pawh khan tlangval thenkhat khan mi tu emaw nen kan in an thu min hrilh tawh bawk a, an sawi kha Sangtea ve tho hi a ni thei mai angem?

He ka inluah a ka thil tawn zawng zawng te nen chuan inzawmna a neih ka ring tlat pek a, mahse khami te kha engtin nge ka hmuh leh theih tak ang? An phone number emaw, an address ka lo dil lo chu ka inchhir rum rum mai. Tlai ka ban hnu pawh chuan ka zawng kual deuh a, mahse an hmel reng reng hmuh tur a awm tawh lo.

***********************

Min phur haw thin tu ber, Melody a lo kal tak silovah chuan taxi ka hmang ta ringawt a. Melody hi a day-off chang pawhin taxi in ka haw fo zel, kan inah chuan haw ta mai lovin Melody te in thleng chuan ka chuang phei a. KAwngka chu ka han kik deuh karh karh a, Melody nu chuan a rawn hawng a.

"Ekhai MS, Melo-i i rawn kan dawn em ni?"

"AW..hei eiturte ka rawn lei a...a zia tawh em?"

"SAw ala mu...va lut tawp mai rawh. Thingpui ka lo lum ange, lo va inkawm ru."

Mak ka ti angreng, khati em em khan Melody nu hian min be tha ngai lo. Nidangah chuan min melh deuh ruk ruk a, a nuam lo thin hial zawk. NGe ni ka over mah mah zawk, engkim mai hi ka ngai hlauhawm vek tawh ni berin ka hria. Roomah chuan ka lut a, Melody chu a lo muhil a. Kai tho mai lo chuan a bulah chuan ka thu a, ka en vang vang a.

A damlo tih hriat takin a mit te chu a lo bui deuh chur a, a chauh hmel em em bawk. Mahse a hmelthatna erawh a ti bo chuang lo, a damlo hmel pawh chu tha tak a ni. Ka en ngawih ngawih a, a kutah chuan ka vuan a. Chutih lai tak chuan  a rawn harh a, "Ehe...ilo thleng tawh elaw?" a ti tham deuh tiak a.

************************

DArkar 2 vel lai chu ka leng hman, kan titi dun a. Anu pawh chuan thingpui te min rawn pe a, min la betha chhunzawm khawp mai. Mahse Melody chuan biak pawh a lo be lo, an inkar hi  a fuh hleithei ngang lo a nih hmel. Han hriat ve chu chak viau mah ila, mi chhungkaw thila lo buai ve vak kha a nuam ka ti silo.

Ka zawh chang pawhin Melody ber pawh hian min hrilh tha duh ngai lova, han zawh luih vak pawh ka tum bik ngai lem lo. Tichuan haw zai ka rel ta a, kawngka bul thleng chuan min thlah a. "Inneih tawh mai ania ka duh ni, min duat dan i thiam si." tiin a khi deuh sak a, ava han duhawm chiang tak.

*************************

Zan a ni leh ta, eng thil hlauhawm tak tawng leh ang i maw tiin mahnia zan hun han hman chu ka phur teh chiam lo khawp mai. TV chu ka on a, mahse ka ngaihtuah lo hrim hrim. Ka phone ka khawih mual mual a, dar 9 a rik hnu thleng pawh chuan eng thil danglam mah ka tawng lem lo. Chutah zan danga ka thawm hriat ang bawk, bathroom lam atanga manganga au thawm chu ka hre leh ta.

Ka thin a rawn phu leh nghal dup dup mai, ka hlauh rual rualin ka kham tawh takzet. Bathroom lam chu ka pan a, a chhungah chuan ka lut a. Thawm chu a la rik chhunzawm reng, engemaw sawiin a phun mawlh mawlh bawk. DArthlalang hmaah chuan ka va ding a, a reh hmak mai. Ka huaisenna zawng zawng sawm khawmin, "Tunge i nih?" ka ti zawi sap a.

Mahse thawm chu ala reh vang vang mai, "Enteh, he inchhungah hian i awm ve tih ka hria. Enge i duh sawi la, ka hmaah hian rawn inlan rawh." ka ti leh a, a phun ri leh sup a. A tawng engmah ka hre thei lo, a khawk deuh rum rum mai hian ka hria. "Tunge i nih?" ka ti leh a, chianglo ruai hian a rawn tawng leh a.

"I thil duh min hrilh la, ka tihsak ang che." ka ti leh a, mahse engmah chhanna ka la dawng chuang lo. A chang leh a nui ri her her a, a tawng ri leh sap thin. Mahse a chiang lo em em a, a khawk hian a khawk rum rum hi a ni ber mai. Hlau tho mah ila, zanin chu engemaw tal hriat chian a, finfiah ngei ka tum nghet bur.

Chutia engmah a tawng ri ka hriat theih tak silovah chuan ring leng lawng hian, "SALLY...SALLY, lo chhuak rawh." tiin ka au ta vak vak a. Chutah le, darthlalang chu a rawn che leh ta dut dut mai, hmeichhe tap ri ka hriat chhunzawm bawk. Mak tak maiin darthlalang chu a rawn fiahlo ruai mai a, current chu a phe zawk zawk bawk.

Chutah le, darthlalang ah chuan keima thla nilovin, midang zawk ka hmu ta tlat mai. Hmeichhia a ni a, a pian leh a awmdan atang chuan ahma zana ka mumanga ka hmuh fo thin, kha hmeichhia SAlly inti ngei kha a ni tih ka chiang. Mahse a hmel ka la hmu thei chuang lo, a samin a khuh vek.

Ka hik chhuak vekin ka hria, ka hlau takzet. Che miah lo chuan ka en reng a, a ding ngawi ngul bawk. Hlau chung chung chuan, "Ka hria che, i hming chu Sally a ni. I hmel min hmuh rawh, tinge min tihbuai reng? MAwh, min chhang rawh. I pawi ka sawi em ni? Tinge min tihbuai reng?" tiin ka vin vak vak a.

Chutah a rawn hawichhuak ta, eng ang hmel chiah nge a put tih pawh hriat hleihtheih loh khawp chuan a hmaiah chuan thisen a kai nasa ngei mai. Ka tawlh hnung nghal vat a, mahse tlanchhiat mai ka la tum bik lo. KA kut ka hum a, ka la ding lui ve ngat a. Ka chil ka lem dawk a, "Eng...enge i duh?" ka han ti leh a.

Chutah a aia nasa chuan light chu a rawn phe leh ta zawk zawk mai, in pawh chu a nghing deuh dat datin ka hria. A mitmeng lah chu a sen hian a sen rum mai a, min melhrum hle bawk. A khur deuh cher cher lehnghal a, a rapawm takzet. Chutah ring em em hian, "PHUBA...PHUBA.." tiin min rak khum ta vak vak mai.

***********************

Thutthleng sei atang chuan ka tla thla tawp mai a, ka mumang bawk a lo ni. Ka thaw hrawk hrawk a, ka thlan a tla nasa hle bawk. Sitting room a ka almirah chu a rawn nghing dawt a, ka va phu nasa kher em. Ka ding a, ka va en chiang nghal vat a. Almirah a darthlalang ah chuan mipa pakhat thla a lo lang tlat mai, mahse inchhung ka hawi kual vel pawh chuan mihring tumah an awm der mai silo.

Ka mumang ala nih ringin ka han insik thul, ka mumang chu a ni si lo. KA han enchiang a, darthlalang hmaa ka va din ve pawh chuan ka lang ve thei miah lo. Chupa chuan min hnungchhawn tlat a, kawr ala ha lo zui. Muangchang hian a rawn hawilet a, a hmel chu ka hmu chiang thei ta.

Ala naupan hmel em em a, kum 30 vel bak a nih ka ring lo. Mahse chupa chu ka hriat tawh hnu leh ka hmuh tawh hnu ni tlatin ka hria, "Nang...nang hi.." ka ti bah nuai mai. Chupa chu hmanzana ka hmuh, a hmehriat pakhat nena kan in an thu lo sawitu, min lo ko ding tu ngei kha a ni tih ka chiang.

Min melh run ringawt a, "Enge i duh?" tiin ka zawt a. Mahse min chhang lo, a kut hnung ala suih tlat zui. Chutah a kut dinglam atang chuan chemte a rawn lek chhuak ta mai, "Hey..enge tih i tum a?" tiin ka vin vak vak a. Chemte chu a lek kang a, ama dulah tak mai chuan a vit ta siah siah mai a nih chu.

"Nilo...tawp rawh. Ti tawh suh...nilo." ka ti vak vak a, mahse na ti hmel pawhin a awm lo. Thisen a luang nuai mai a, mahse inchhungah chuan engmah a awm chuang lo. Darthlalang ah zawk erawh chuan chhuatlaiah thisen a tling pum tawh, ala nui deuh vur vur lehnghalin ka hria. Chutah min rawn en a, chemte chuan min rawn vawm ta mai.

Ka hmai ka hup tawp a, boruak a reh hmak mai. KAwngka a rawn inkik dawt dawt a, ka han meng chu darthlalangah chuan keima thla a lo lang a, engkim a lo pangngai leh vek tawh. KAWngka lam chu ka va pan a, sana ka en chuan zanlai dar 12:15 vel a ni. "Tunge ni?" tiin ka han au va, mahse chhanna ka dawng lo.

Kawngka in kik dawt dawt chu a reh leh ta daih a, hlau chung chung chuan zawi muangin ka hawng a. Step chhukna bul ah chuan khapa, nichin lawka darthlalang atanga a invit siah siah lai ka hmuh ngei mai khan min lo melh leh run mai a nih chu, kawr a ha lo leh ngei bawk. A kut dinglamah chuan chemte a keng a, a nui deuh vur vur bawk.

Mahse a nui hmel chu hlim vang leh lawm vanga nui a ni hauh lo, thinrim tak chunga za lo taka nui ni berin ka hria. "Tah khan ding rawh, che sawn suh." ka ti a, ka sawi zawh rual rual chuan step ah chuan a chhuk a. "Nilo, ding rawh...lo ding vet teh." tiin ka um zui a, mahse a chhukthla lui zel a.

Step tawp thleng chuan kan in um a, chutah chak em em hian a tlan ta vak mai. "Hey, ding rawh." tiin ka umzui a, ka umpha lo em em mai lehnghal. Thui deuh fe kan in um hnu chuan a ding a, keipawh ka chauh em avang chuan ka ding ve a. Ka khup dawm meuhin ka thaw hlawi hlawi mai, ka lam hawi chuan a rawn inher a.

Thawk hluam hluam pah chuan, "Nilo..ti suh...thianpa, inbe lawk teh ang." ka ti tawk tawk a. Mahse ka thusawi chu a ngaihsak loh hmel kher mai, chemte chu a lek kang leh a. A hma a darthlalanga, ka hmuh ang bawk khan a invit leh ta siah siah mai a nih chu, "Nilo...duhtawk rawh." tiin ka va tlan phei vat a.

**********************

Ka khum atang chuan ka thu chhuak hlawl mai, ka thlan in min lo bual huh leh vek tawh. Ka tawnzau hak lai phei chu phelh ila, a sawr theih hial ang tih tur khawp chuan a huh nasa. Lungphu ava rang duh em, ka awm dawm meuhin ka han thu vang vang phawt a. Chutah hriatchhuah zawk ka nei, "Nilo..khapa kha.." tiin pawnah ka tlanchhuak nghal.

Step ah chuan ka chhukthla nghal a, ka hmanhmawh lutuk chu ka lum lo chauh a ni. Step tawp ka thleng a, ka va hawi phei chu mipui an lo tam em em a. Sana ka en a, zing dar 6:30 vel a ni. Police ka hmu tel nual bawk, huphurh ang reng tak chung si chuan ka va pan phei ta a. Mipui ho lo punkhawmna lai tak chu nizan ka mumanga khapa in vihna lai tak ala ni zui.

Mipui ho karah chuan ka va inzep ve a, mahse ruang chu an lo khuh tawh. Tu ruang nge ni ang tia inngaihtuah vak pawh a ngai lo, tu ruang nge a nih tih chu keiman ka hre chiang. Thli a rawn thaw vak a, puan chu a rawn len sawn ta. Karei, a ril te nen lam a chhuak nuai mai. Hmeichhe ho thenkhat chu an t(r)e deuh nghal vak vak hlawm a, rang takin Police pakhat chuan ruang chu a khuh tha lehnghal vat a.

Ka hmui ka hup a, ka luak teuh kher mai. Ka rin ang chiahin nizana ka mumanga ka hmuh kha, khapa ruang ngei kha a ni. Ka thil tawn te hi a ni em em tawh lo, hrehawm ka ti lutuk chu ka hnuk a ulh hial zawk. Patling pahnih, ka bul deuh lawka lo ding ve te titi chuan ka beng a verh angreng khawp mai.

Ka va pan hnai deuh a, an titi chu ka ngaithla chiang a. Pakhat zawk chuan, "Amak khawp mai, hmanni zinga ruang chhar pawh kha helai hmunah chiah chiah tho hi a ni a, tunah lah hei ruang chhar a ni leh a.." a lo ti nuah nuah mai a. Ka va inrawlh vat, "E taka, ka pu...hmanni zinga ruang an chhar kha engtin nge a case an kal pui tak zel?" tiin ka va zawt a, ka in bul deuh lawka thil thleng mah nise ka ngaihtuah chhunzawm duh lo bawk a, enge chanchin engmah ka hre chhunzawm ta bik lo a nih kha.

Pakhat leh zawk chuan, "Mahnia inthat an ti, achhan chu a bula lung thisen kai ah khan ama finger print an hmu a, mifang finger print engmah a awm lo an ti in ka hria." tiin min chhang a. Mak ka ti hle mai, ka mumang chu a thleng dik ta zel mai si a. Mahse engmah ka sawichhuak ngam chuang lo, a chhan chu ka mumang zawng zawngte kha midang ka hrilh anih chuan buaina ka tawh phah thei tih chu ka hai bik lo.

Chutia ka inngaihtuah lai chuan mipui zingah chuan mipui zingah chuan ka hmuh hnu mipa pakhat ka hmu leh ta tlat mai, meizial a lo zu khu deuh hlat hlat bawk. Chupa chu hmanni a hmeichhe pakhatin, "SANGTE." tia min rawn koh laia, rawn hruaihrang a, mi rilru kim chiah lo a nih thu min rawn hrilh tu kha a ni tih ka chiang.

Phone a hmang a, a tawng mawlh mawlh a. Chutah a bike ah chuan a lawn kai a, a tlan ta daih mai. Rang lutukin ka umzui nghal a, taxi a rawn tlan hlauh mai. Ka lo phar ding a, "Saw bike saw zui rawh." tih leh luh ka rual a. "Tinge...enge awmzia?" tiin driver chuan min lo zawt a. Ka hmanhmaw lutuk chuan, "Tlan phawt la ka hrilh ang che." ka ti tawp.

Tichuan chu tlangval chu kan um zel a, mahse a tlan rei lutuk lo. Ka awmna veng dawt chiah a in lian ve tak pakhat bulah chuan a ding a, "Rs. 30 ani mai." driver chuan a han ti nghal a. Keilah tawnzau leh boxer nen chauh ka awm a, pawisa ka ak thak lo. "Lawk aw.." tiin chu ka zuiruk pa chu ka en reng a, in lam pan chuan a kal a.

Kawngka a kik a, hmeichhe pakhat hi a rawn chhuak a. Ka va han lawm tak em, chu hmeichhia lo chhuak chu hmanni lawk a min hai tu, "Sangte." tia min ko tu kha a lo ni hlauh mai. An in ka hre ta bawk a, abak chu a harsa tawh lo. "Ka pu, min drop let leh la a fare chu ka pe ang che." ka ti a, mak tih hmel deuha min en vung vung pah chuan a in-turn veleh mai bawk a.

*************************

Tlai ka ban veleh chuan ka inthlak sawk sawk a, kha hmeichhia, Sangtea amaw min titu te in lam pan chuan taxi in ka kal leh ta nghal a. Melody erawh engmah ka hrilh lo, ka buaina hi hre ve lo se ka duh ber. An in chu ka thleng ta, kawngka chu ka han kik dat dat a. Rei fe ka nghah hnu chuan a rawn inhawng ta, kha hmeichhia ngei kha a ni.

Min hmu chiah chu min en ngawih ngawih a, "SAngte..i ni tiraw?" min ti leh a. "Khawngaihin ka lo lut thei angem?" ka ti a. Anu ni awm tak, nutling ve lampang tawh tak mai chu a rawn kal a. "DAisy, SAngtea a ni lo." tiin a fanu chu a rawn kai hrang a, ka lam a lo hawi leh a. Min en deuh hraw pah chuan, "Nang hi hmannia kan hmuh kha i ni tiraw?" tiin min zawt a.

"Aw ni e ka pi, thil sawipui duh che u ka nei a ni." tiin ka chhang a. Daisy chu room ah lut turin a hrilh a, a lut ve mai bawk. Tichuan chunu chuan min han en leh a, "Hmanni vang kha em ni? A hai mai mai che a nih kha, ka fanu hi rilru lama harsatna nei ani a, khawngaih takin min hrethiam dawnnia." tiin kawngka chu khar leh mai a tum a.

En pawh min en tha duh lo, "Ka pi lawk, thildang sawi tura lo kal ka nia." ka han ti leh a. Mahse chunu chuan, "Thianpa, kan buai lutuk..min hrethiam hrih mai teh." tiin khar a tum leh a. Chutah, "Ka pi, Sally tih hmingpu i hria em?" ka han ti chu a tawp chat mai, rang em em hian a rawn leh hawi vat a.

"Engmaw i sawi?" tiin min en hu mai a, a mittui a tling nghal teuh. "I hria em? Sally tih hmingpu chu i hria em?" tiin ka han zawt nawn leh a. Min en vang vang a, "Tunge i nih?" min ti a, a tap lek lek mai. "Ka pi, i fapa Sangtea nen kan in ang viau a ni maithei, mahse Sangtea ka nilo. MS-a ka ni a, titi pui che ka mamawh a ni. Ka lo lut thei angem, khawngaihin?" ka han ti leh a.

"Aw..lo lut ta che." tiin a inhnit hlap hlap a, ka lut ta a. Kan thu dun a, "Khawi atanga lo kal nge i nih a?" tiin min zawt a, kan khua te chu ka hrilh a. "Ka pi, SAlly chu tunge a nih?" tiin ka zawt tan ta a. A kun lap a, "Ka fanu a nia, Sally Lalhriatpuii." a ti a, ka rindan chiah a ni. "Tukin khan kan vengah ruang chhar a ni a, kha mitthi leh Sally te hian inzawmna an nei em?" tiin ka zawt leh a.

Mahse min chhan hma hma chuan DAisy chu a room atang chuan a rawn tlan chhuak a, ka bulah chuan a rawn kal a. Chiang fek fawk hian, "An pawngsual a, an that a ni." a rawn ti ta mai a. Rang takin anu chuan, "Daisy, room ah lut rawh ka tih kha." tiin a lo vin a. Ka ding a, "Ka pi, engkim min hrilh angai." ka ti a.

An nufa chuan min en dun char char a, "Ka pi, Sally hi ka hmu thin a ni. Ka in luah mek ah hian a awm ve a ni, min ring rawh u." ka ti leh a. Mak an tidun kher mai, "Sally ala dam maw?" tiin min zawt a. "Nilo, a thlarau zawkin min tibuai thin a ni. Sawi duh a nei a, mahse a thil sawi ka hre thei silo. Ka lak atang hian duh a nei a, chu chu ka hre duh a ni." ka han ti leh a.

***********************

Ka thil tawn thin te, ka mumang zawng zawng te leh khang mitthi pahnih, an thih lai chiang taka ka hmuh thute chu chip chiar takin ka hrilh ta vek a. An nufa chuan an tap nasa dun hle mai, "Khawngaihin, rem intih chuan engthil chiah nge thleng min han hrilh teh u." ka han ti leh a, an tap dun zawih zawih mai.

Minute 1 vel an tah hnuah chuan anu zawk chuan, "SAlly hi ka fate zinga naupang ber ania, a thih khan kum 19 chauh ala ni. Tichuan a u chiah chu hei, DAisy hi a ni a. Tichuan a upa ber chu Sangtea a ni a, in hmel a in an em avangin Daisy pawh hian a hai che a nih kha. Keipawh hian ka fapa boral ta, Sangtea nena in in an em avang hian ka melh tha ngamlo hial zawk che a ni." a han ti charh charh mai a.

"Nihleh engtin nge SAngtea leh Sally te chu an thih?"

"Thah an ni, an unauvin."

"Police hnenah in report lo em ni?"

"Evidence kan nei silo a, Sangtea ruang erawh chu hmuh a ni a. Mahse Sally ruang erawh chu tun thleng hian kan la hmulo, Sangtea pawh accident vanga thi angin an kaltlang pui ta a nih kha."

"Ka pi, peh hel kual lovin engkim min han hrilh teh."

Chutah DAisy zawk chu rawn tawngchhuak ve in, "Engkim ka hrilh ang che, ka pu. Ka nau DAisy thah a nih tirh khan a thattute chu ka haw em em a, ka hrechiang em em hlawm bawk. MAhse an that lai ka hmu lova, evidence lah ka nei hek lo. Chuvang chuan ka nau DAisy chu mibo case angin an kalpui ta a, amah chhan tuma theih tawp chhuah a beitu, ka u SAngtea pawh accident angin an lantir ta a ni." tiin Sally chanchin chu min hrilh chiang ta a.

*************************

DAISY THUSAWI :

Kan unau hi pathum kan ni a, Sally hi a naupang ber niin kei hi a mi lai ka ni a, Sangtea hi kan upa ber a ni. Sally hi a hmingpum chu Sally Lalhriatpuii a ni a, SAngtea hmingpum chu Lalnunsanga a ni. Kum 8 ka nih laiin ka pa hian cancer vangin min boral san tawh a, Sally phei chuan ka pa hi chiang takin a hre hman lo.

Sally hi mi ngawi chawi tak leh zakzum tak a ni a, kei leh Sangtea erawh thian kawm nuam ti leh tawng duh tak kan ni thung. Mahse Sally erawh keini ang lo takin a tawng khat hle a, thian a kawm ngai meuh lo. Amaherawh chu kei leh ka u Sangtea'n Sally kan tluk lohna ber chu kan tet te atanga lehkha a thiam thei fal bik hi a ni, ka nu pawh hian kan unau ah chuan a duat ber hial ang.

A fing em em a, a rilru a chakin lehkha lah a thiam thei bawk. Kei ai mah chuan ka u Sangtea hi a ngaina a, khawiah emaw chhuak dawn hlek se ka u Sangtea kal pui loh chu a duh ngai lo. Unau an ni tih hrelo tan phei chuan inngaizawng amaw an ti hial ang, chutiang khawpa innel leh unau inhmangaih chu an ni.

Sally hi school a kal lai atang tawhin a classmate te pawn an kawm ve ngailova, a chhan chu a ngawichawi em thin vang a ni. Thian rawn hruai haw emaw, thian rawn leng hrim hrim pawh an awm ngailo. Chutih rual chuan zirtirtute fak ber a ni thin thung a, school a kal chhung zawng kha chu pakhatna a ni deuh char char a ni.

Kum 18 ah Class 12 a pass a, college a kal ve ta a. Kei erawh ka laktlak loh fal deuh a, 12 ka pass hnu khan engmah ka tih chhunzawm peih ta lo a ni. Sally chuan college chu hrehawm a tih thin thu te, a boruak a zawh loh thin thute leh school nena a danglam zia te a rawn sawi haw ve fo thin.

A mizia a thlak phah chuang lova, a la ngawi chawi reng tho. An classmate zinga mipa thenkhat te chuan an lo bem ve ngei a ni awm a, mahse a chhanglo mai nilovin a thinrim hial zawk. Chuta tang chuan a classmate te chuan hming thar phuah sakin, "Thinlung sak, luhlul, ngawichawi, fing bawk si, hlim hmel pu ngai bawk silo...Salty Sally..i ni ringawt." tiin chhaih nan an hmang ta a ni.

A hming thar an phuah sak chu a duh lovin a haw em em a, a rilru a nat thute pawh min hrilh fo thin. An zirtirtute bula complain han thehluh dawn lahin College ve hial a ni tawh si a, engah vak an lo ngaihloh phei chuan kan tan a zahthlak mai mai dawna kan hriat avang chuan kan complain ta lova.

Chumai chu an lo la duhtawk chuang lo, a lehkhabu ah te chuan SALTY SALLY tih lian pui pui hian an lo ziah sak a, a rilru a na thin hle. Kum khat chhung tehmeuh thian neilova a awm hnu chuan thian a nei ve ta a, a hming tak chu ka hrelo a, mahse Sally khan 'Di' tiin a ko mai thin a. Keini pawh chuan a koh dan chuan kan ko ve mai thin bawk a, kan inah te pawh a rawn hruai lut ve ta fo mai.

Chutia thian a han nei ve ta chu ka u Sangtea nen pawn kan lawmpui hle a, "Pathian min pek." tih hialin a sawi thin. Mahse Di-i rawn len vawikhatnaah khan ka u Sangtea hi a awm lova, a hna vanga Champhai lama a zin lai tak a ni. Thian an nih hnu phei hi chuan D-i pawh hian Sally chu a chhan thin hle a, Sally pawh hian kan inchhungah hi chuan a thiannu D-i chungchang hlir a sawi thin.

Vawikhat chu Sally chu a lo haw thei ta reng reng lo mai a, kan call pawh chuan phone a la thei miah lo. Tlai dar 4 vel hi a lo haw hun a ni thin a, mahse dar 5:30 a pelh hnu pawha a lo haw theih tak reng reng loh avang chuan kan mangang tan ta a. Phone lah a ring quit thak thak zel mai bawk si, D-i chu kan call ta tawp a.

Mahse D-i pawh chuan a awmna a hriat loh thu leh an haw rual loh thu a rawn sawi a, rilru a hah ta hle mai. A bo ni tak hi an exam zawh ni a ni a, D-i phei chu a tuk lawkah a Patea te khuaa a zin tur thu ala sawi zui. Tin, a bo hi Sangtea lo haw ni tur a ni bawk a, hrilh pawh kan la hrilh ngam lo.

Sangtea chuan zan dar 8 velah a lo thlen tur thu a sawi a, a nau duhtak Sally a bo tih a hriat chuan a mangang dawn em a, chuvang chuan kan hrilh ta lo law law mai a ni. Zan dar 7 velah chuan Police Station ah ka nu nen kalin Sally bo thu chu kan va hrilh ta tawp a, anni pawh chuan rang takin hma an lo la nghal vat a.

Kan manganna ti zual turin ka u Sangtea pawh chu a rawn haw thei ta reng reng lo mai a, kan phone pawhin a ni pawh chu kan be tlang thei ta miah lo mai. Kan veng thalai te chuan a zan a zanin SAlly chu an zawng ve nghal a, Police te pawhin hma an la nghal char char bawk. Kei leh ka nu erawh thenawm khawveng ten kan inah min awmpuiin min hnem a, ka nu phei chu a tap bang hleithei lo.

Zan dar 10 velah chuan Police te chuan thu thinthawng tak mai min hrilh ta a, kan beisei loh lutuk leh kan rin phak bak khawpa thu lungchhia chu kan dawng ta. Sangtea chu a accident a, a hmunah a thi nghal tih kan hre ta. A accident-na hmun lah chu kan veng pelh daih ala ni zui a, khamah a tlanliam niin an sawi.

Chuta tang chuan a ni ka buai tak ni, mi ang lo ang chiah ka ni tawh. Tin ka mumangah hian ka nau Sally hi ka hmu ziah bawk a, chu chuan ka rilru hi a ti buai ber niin ka hria. Sally chu zawn hmuh a ni ta lova, hei tunah kum 2 lai a liam tawh. Police te chuan engmah min tihsak chhunzawm ta lova, tichuan ka unau neihchhun te pahnih chuan min boral san ta a ni.

Hmannia ka hmuh che khan Sangtea nen in in an em avangin ka u Sangtea emaw ka ti che a, nanglah chuan min hriat hmel bawk silova. Ka nu te chuan theih tawpin min hrilhfiah a, hmuh leh che kha ka chak takzet thin asin. Tuna nangmah ngei ilo kal hi ka lawm takzet, khawngaihin min pui rawh, thianpa.

**********************

DAisy chu a tap zawih zawih mai a, anu chuan a lo hnem bawk a. "Ka la hrethiam chiah lo, Sally chu a thi ngei tih engtin nge i hriat? Chuan nichin khan pawngsual anih thute i sawi si a, mahse a thi ngei tih finfiahna engmah i sawi chuang bawk silo." tiin ka han zawt leh a. Thinrim hmel tak hian a melh ngai chu a melh vang vang a, "A chhan chu amah Sally ngeiin min hrilh a ni, PAWngsual a nih thu hi amah ngeiin min hrilh a ni." a ti ta mai a.

"Engtin? Enge i sawi awmzia?"

"Ka mumangah zantin min hrilh thin a ni, pawngsual a ni a, nasa taka sawisak a ni bawk."

"I mumangah maw? Chu ringawt chu a rintlak dawn em ni?"

"Nangpawh i mumanga i hmuh thin vang ani lawm ni helai thleng thleng ilo kal?" tiin min vin lek lek mai, a sawi takah chuan a dik ve tho mai. ZAidam tak chuan, "Awle, ka ring che alawm. Nih leh Sally thattute chu i hria em?" tiin ka han zawt leh a. "Hrelo, mahse rinhlelh ka nei." a ti leh a.

"Tunge i rinhlelh a?"

"Ka rinhleh pahnihte chu an thi tawh." a ti leh ta mai, ka bo tulh tulh zawk. "Enga? Engtin nge an thih?" tiin ka zawt leh a. "Pakhat zawk chu Jerry-a a ni a, hmanni zingah a ruang chhar a ni. Chuan pakhat leh zawk chu tukin khan a ruang chhar a ni leh a, tukin khan ka thianpa Zuala'n min rawn hrilh a ni." tiin min chhang leh a.

KA man ta uar uar mai, khang mi pahnih..ka mit hmuh lai ngei a inthatte pahnih kha Sally thihna a inhnamhnawih te an ni tih chu ka man thiam ta nghal vat a. "Daisy, engvanga ringhlel nge i nih?" tiin ka han zawt leh a. A inhnit feih feih a, "A chhan chu hemite pahnih Jerry-a leh tukina thi ta Ruata te kha ka hmelhriat an ni hauh lova, mahse ka mumangah an pahnih khan ka hmu fo a ni." tiin min chhang leh a.

"Anih leh Sangtea accident kha.....engtin nge khapawh kha tualthahna tho a ni tih i hriat?" ka han ti leh a. "Ka u Sangtea hi motor khalh thiam tak a ni a, zu in mi  anilo bawk a, ruihtheih thil chu sawiloh, meizial leh kuhva tak ngial pawh a ti ngai lo. Khawiah hian khamah a tlan liam hi ka ringlo, chu chu thudang nise...ani pawh nasa taka Jerry-a leh Ruata ten an sawisa lai ka mumangah ka hmu thin bawk." tiin min chhang leh a.

Sally thlarau chu a lungawi lo takzet a ni tih ka hrethiam ta, phuba la turin kei..a u Sangtea hmel ang pu hi min duh a ni tih ka hrethiam ta. Ka han ngawi deuh vang vang phawt a, "Daisy, Sally thlalak ka lo en thei angem?" tiin ka dil a. "Thei lutuk e, ka va la ange." tiin roomah chuan a lut a.

Reilote hnuah chuan album chhah vak lo kengin a rawn chhuak leh a, "Kha hei hi a album ania." tiin min pe a. Album chu ka han keu va, a nau tet lai te, an unau thuma an thlalak te leh an pa ber boral laia an thlalak te a ni hlawm. Ka keu zel a, chutah Sally puitlin hnu thlalak chu ka hmu ta, hmeichhe hmeltha tak a ni.

A ngo veng reuh va, a sam erawh a dar chen vel bak a nilo. A hmel en reng reng pawh chu mi pawi a sawi ngai lemlo tih a hriat em em a, kan en deuh vawng vawng thei hial. A phek dah ka han keu leh a, chutah chuan SAngtea nena an thlalak chu ka hmu ta. He khawvelah hian unau ni kherlo, thisena inzawmna pawh nei chuang lo, phir pawh ni kher lo, mahse hmel in ang chiah chiah hi chu an awm ngei a ni tih chu an sawi ka hre fo.

Mahse Mizoramah kher kher hi chuan unau pawh nilo, inzawmna nei lemlo, mahse hmel in ang chiah chiah hi an awm ka la hrelo. Film-a double role ang chiah hi a nimai, Sangtea nen chuan kan in ang takzet. Keimah emaw ka ti hman hial, mahse kan hair style a in ang chiah lo. Thlalak atanga en chuan kei ai chuan a hniam deuh zawk ka ring bawk, ka thau deuh zawk bawk.

Album chu ka pe let a, "Sally a bo hma deuh a, a thlalak i nei em? Entirnan a thlalak hnuhnung ber emaw, la tharlam deuh ka tihna ania." tiin ka han zawt leh a. Ka phone ah hian ala awm maithei, kan en ange." tiin a phone chu a en a, mak ka ti deuh chu ka rin ai daihin DAisy hi a pangngai daih.

A phone chu a han khawih mual mual a,  "Hei hi a nih hi...nikum hmasa lawk a mi." tiin min hmuh a. Hmeichhe amah leh hmeichhe pakhat nena an thlalak a ni, ka phu zuk mai. Chu hmeichhia chu ka hmelhriat a ni tlat, "Henu hi tunge?" tiin ka zawt nghal a. "A thiannu D-i a tih thin chu.." tiin min chhang a.

*************************

An in atang chuan ka chhuak nghal a, taxi ka chang nghal. Vanneihthlak takin minute 1 hnu velah chuan a rawn tlan hlauh mai, ka phar ding a, ka chuang nghal a. REiloteah chuan ka thleng ta, khua pawh a thim vek tawh. Kawngka chu ka kik karh karh a, an lo hawng ve nghal vat bawk.

"Melody a awm em?" ka ti nghal a, ka bialnu Melody te inah ka kal a ni. Melody nu chuan, "Awm e, lo lut rawh." tiin min luh tir a. Melody chu a room atang chuan a lo chhuak a, "Ehe MS, ilo leng animaw?" a rawn ti chhuak a. Ka va pan hnai a, "Inbe lawk ang." ka ti a. Mak tih hmel tak hian, "Aw le..ihh..verandah ah sawn min lo nghak rawh." a ti bah nuai a.

Verandah ah chuan ka lo nghak a, reilote hnuah chuan a rawn phei a. "Tinge a? A va pawimawh awm ve?" tiin min rawn zawt a. "Melody, Sally kha engtia bo nge?" tiin ka zawt a, a meng phawk nghal hru mai. Mak tih hmel tak chuan, "Sally a? Tu SAlly maw?" a ti zawi sap a. "SAlly Lalhriatpuii." tih ringawt chuan ka chhang leh a.

A ngawi vang vang a, "Engtin nge SAlly chu i hriat ve a?" tiin min zawt leh a. "Melody, thawnthu thui tak a ni. Sally kha engtia bo nge i hria em?" tiin ka zawt leh a. A mittui a hnam nghal, "Engtin nge ka hriat bik ang?" tiin a tap titih nghal a. "A bo ni kha in in exam zawh ni a ni a, Sally nen pawh in awm dun ngei ang. Kha mi ni khan in haw rual em? Engtikah nge i hmuh hnuhnun ber?" tiin ka zawt leh a.

"Ihh...ka hre chiang tawh lo..khami ni khan ka exam zo hmasa a, pawnah ka lo nghak a. Ka patea'n min rawn hruai a, kan inah min dah a. Chuan Sally chu a thlah tlang a, ahnuah khan a bo zui ta a ni. Mahse ka patea thil tih a ni miah lo ania, ka patea sawidan chuan dawr ah a kal kawi dawn avangin an in thlen hmain a chhuk a, tichuan ka patea chu a rawn haw leh thlap." a ti leh a.

"I patea chu khawnge a awm?"

"MS, engemaw i hriat le? Ka patea te chu police te pawhin zawhna an zawt vek tawh, tuna nangina i rawn thar thawh theih ngawt a ni hleinem. Enge i hriat a? Engtin nge Sally chu i hriat?"

"Ka mumanga hmeichhia ka hmuh thin kha i hria em? Kha kha Sally  a ni, chuan ka thawm hriat thin zawng zawngte pawh Sally vek a ni. Chuan hmanni zinga i serh a nat thu i sawi te kha ila hria em? A chhan chu Sally thlarau chuan thunun che in ka in luah ah a rawn hruai che a, sex kan hmang dun a ni." ka ti ta siah siah mai, engmah zep a hun tawh lo.

Mak tih hmel tak hian min en a, "Enga? Engthil nge i sawi hi...MS, i a tawh a nih kha..engtik laiin nge nang nen hian kan mut dun a?" tiin a tap lek lek mai. "SAwifiah ka thiam lo, Melody. Min ring rawh, i patea te in chu min kawhmuh vat rawh..anih loh chuan.." ka tih lai chuan thinrim tak hian, "Anih loh chuan enge?" tiin min vin ta vak mai.

A au ring bawk a, a nu pawh a rawn lut hial. "Engthil nge thleng a, in thawm ava ring ve.." a rawn ti lut a. Chutah Melody room-a light chu a rawn phe ta zawk zawk mai a, hmeichhe nui ri in a rawn chhunzawm bawk a. Melody te nufa chuan an hlau kher mai, "AWii..enge awmzia?" tiin an rak nghal chel chul mai a.

Chutah a wardrobe a darthlalang ah chuan kan thla a lang ta hauh lo, mipa pakhat thla a rawn lang daih mai. "AWi ka duh lo.." tiin Melody nu chu bang kilah a tawm nghal a, Melody chuan a darthlalanga thla lo lang chu mak tih hmel tak hian a en char char a. ZAwite hian, "Pa..Pate..." a ti sap a.

Chu mipa thla lo lang chu Melody patea ngei chu a ni, a kut lehlamah chuan hruihrual ala keng zui. Vin zet hian, "Melody, khawiah nge i patea te in chu min hrilh rawh..vatin." tiin ka au vak vak a. Mahse a tawng hleithei lo, "Hawh...i scooty chahbi la la, i patea te inah chuan kal nghal ang..vatin." tiin ka sawi nawk nawk a.

Hriatthiam loh hmel tak hian min en a, "MS, enge awmzia? Engthil nge thleng hi..ka hlau ania." tiin a tap pur mai. A biangah ka dawm a, "Melody, min ring em? Mawhh..min ring tiraw?" ka han ti a. A lu a lo bu nghat a, "Anih chuan i patea te inah min hruai rawh...kan hmanhmawh angai." ka ti leh a.

Scooty chahbi chu a la a, "Mahse ka nu hi.." tiin a nu chu ava kawk a, a lo thidang der mai. DArthlalangah pawh chuan engmah a lang leh tawh lo, keimahni thla langin a pangngai leh vek tawh. Anu chu khumah kan mut a, tichuan kan chhuak ta nghal a. Melody erawh chuan zawhna ala ngah nasa mai, a la khur char char bawk.

"Engmah min zawt hrih suh..kan thleng tep em?" tiin ka zawt a, ka hmanhmawh tawh takzet. A la hla reuh phian zui, minute 10 dawn lai kan tlan hnu chuan kan thleng ta. An in chu a lo fal phian lehnghal, hmanhmawh takin Melody chu ka kai dawr dawr a. Kan thleng tep tawh tihah chuan nu pakhat manganga au thawm kan hre ta, "AWIII...KA DUHLO...ANI THEI LO." tiin a sarak chiam chiam mai.

A pawi ka ti lutuk chu ka ding a, ka lu ka dawm vawng vawng ringawt. An inbul vel ami te chu an lo tlanchhuak nghal a, Melody patea te inah chuan an lut nghal sup sup a. Melody chu a mangang nasa mai, "Ka patea nupui aw ngei ani...enge awmzia?" tiin ani pawh chu a hlauthawng hle a.

Ka chhang lawk thei lo, nuho lah chu an au tuar tuar hlawm lehnghal. Ka chhan hma chuan Melody chu a tlan lut ve a, a hnu deuh lawkah, "NILO PATE.." tiin a tap zui ve nghal. Ka lut ve lawk thei lo, ka rilru a hah takzet. Muangchang chuan ka va lut ve a, an bathroom zawnah chuan an lo ding khat mup mai.

Ka va inrawlh phei ve a, ka va hmu ve ta. Melody tap nasa lutuk chu a thidang hial a, an han buaipui leh rih bawk a. Mipui zinga pa pakhat chuan, "Damdawiinah Melody hi lo han kalpui teh u, motor nei ho khan." a han ti a, Melody chu mi pathum vel chuan pawm chhuakin damdawiin lam an pan pui a, then khatin ruang an buaipui bawk. 

Kei erawh chet mai nachang pawh ka hrelo, sana ka en a, zan dar 8 vel a ni. Pawnah chuan ka chhuak leh a, ka ding ngawi reng ringawt. Chutah inchhung atang chuan pa pakhat hi a rawn chhuak a, a hlauhthawn hmel em em lehnghal. Chupa chu ka hmuh hnu a ni tlat, hman deuh a taxi driver pakhat, ka mit hmuh lai ngeia tap vak vak kha a ni.

Min hmu thut chu a phu zuk a, a khur nghal deuh zawih zawih mai. Ahma a ka hmuh laia a tah vak vak kha chuan mask ka vuah avangin ka hmel a hmu lova, chuvang chuan khatih lai khan mak min ti vak lo pawh  ani maithei. Mahse a hlauhthawn dan atang te, ahmaa thil thleng atang te leh min hlauh hmel em em dan atang chuan ani pawh chuan Sangtea emaw min ti ve a ni ngei ang.

Chu aia la chiang bawk chu, Sally bo thu hla ah a in hnamhnawih ve tih a chiang bawk. Ka va pan phei a, a tlanchhe ta daih mai. "Hey ding rawh.." tiin ka um nghal a. Mipui an tam em avang chuan tuman min rawn ngaihsak lem lo, tichuan kan in um ta ngat ngat a. Ka tlan pah chuan ka phone ka phawrh a, DAisy ka call nghal a.

Daisy te in atanga ka chhuah hma khan DAisy phone number leh, a nu phone number ka la hman hlauh a ni. Daisy chu police phone nghal turin ka ti a, tichuan ka location chu Police te nen rawn chhui zel turin ka ti bawk. A tlan hla zel a, a tlanchak vak lem loh avang chuan ka hmu hman zel a.

A tawpah chuann inrel pakhat, dal ve taka awm, thim reih ruih ah chuan a lut ta daih mai a, ka zui ve nghal a. Mahse a thim em avang chuan engmah ka hmu thei lo, ka phone chu ka phawrh vat a. Ka han en kual a, mahse ka hmu ta miah lo. Chutah ka tukhum chu a rawn ri dawt a, ka khawhmuh a thim nghal ruih mai.

************************

Ka harh leh chuan tlai lampang hi a lo ni a, ni a lo tla tep tawh. Ka awmna hmun chu ka han en a, huan ni awm tak a ni. Thawm ka hria a, ka tho chhuak nghal a. Thawm awmna lam chu ka pan zel a, "Min khawih su..kal rawh u." tia hmeichhe mangang au thawm a ni. Thawm awmna ka va thlen chuan ka che sawn thei ta miah lo mai, ka ke chu leiah a inchar bet ni mai hian ka hria.

Ka hmazawn atanga ft 20 vel lekah chuan motor hi a awm a, a che deuh dut dut mai. Mipa pathum vel hi an awm bawk a, motor chhung atang chuan hmeichhe pakhat hi an rawn hnuk chhuak a. Chu hmeichhia chu tudang nilovin, Sally ngei a ni. Chung mipa pathum te chuan an man bet a, kut an thlak bawk a.

Ka thinrim lutuk chuan chhan tumin ke pen ka han tum a, ka thei thak bawk silo. Au ka tum a, ka thei chuanglo bawk, engmah ka ti thei lo. Chung mipa pathum te pawh chu ka hmuh hnu vek an ni, Jerry-a, Ruata leh Melody patea, Pu Thanga te an ni. An pathum chuan Sally chu an sawisak rawn a, a hmui an tuam sak bawk.

REilote hnuah chuan taxi hi a rawn kal leh a, chuta tang chuan nichin lawka min vawthlu tu, kha taxi driver ngei mai kha  alo chhuak a. Tichuan Sally chu a rawn sawisak chhunzawm veleh bawk a, an ruih hmel hlawm em em lehnghal. Chutah a kawr te chu an pawt tret a, an chhuih vak vak bawk a.

En a hrehawm takzet, mahse ka en lo thei silo. An pali chuan duhtawkin an pawngsual a, Sally lah a au thei der silo, an phuar nghet em em mai bawk si. Tichuan khaw thim deuh thak thleng chuan an sawisa a, an pawngsual bawk a. Pu Thanga chuan motor lam apan a, zu dang rawn phawrh pah chuan bag niawm tak hi a rawn keng chhuak a.

"Enge a pai kan en reng reng teh ang, pawisa  a awm takin." tiin Sally bag chu a han hawng a, lehkhabu te chu a la chhuak a. A nui suk a, "SALTY SALLY..haha, a hming chu ava nalh reuh ve." tiin a nui huah huah a. Taxi driver bulah chuan Pu Thanga (Melody patea) bawk chuan, "Henry nang sap tawng thiamah, enge SALTY SALLY chu a awmzia han sawi teh." a han ti vel a.

Sally taksa duhtawka chul kual vel pah chuan, "SAlly itawmtei tihna aniang." tiin a lo nui vel a. Chutah Pu Thanga chuan, "Ngaithla teh BAwihi, kan thu awih la..engmah sawi chhuak lo la, nungdamin i awm ang." tiin Sally chu a han vau vel a. Jerry-a chuan, "SAwi duh a nei aniang, a ka kan tuamna hi kan phelh mai dawn mi?" a lo ti ve bawk a.

Henry-a chuan, "A au vak ange...miin an hre palh ang." a lo ti vat a. Nui chung hian Ruata chuan, "Aaa...a au ngam lovang. A fel alawm, a au dawn lo reng reng." tih pah chuan  ahan piai vel a, SAlly chu a khur zawih zawih mai. A hmui tuamna chu a phelh sak a, a au lo reng bawk a. Mahse rum tak hian a melh hlawm a, "Ka u in a that vek dawn che u, ka u in phuba chu ala khawp ang." a ti khur khur a.

Pu THanga chu a thinrim hmel hle mai, "VE khanglang che chuan...Hmeli." tih pahin a chhuih ta chiam chiam mai a. Midang te zawk chuan, "U THang, insum deuh teh." tiin an lo khap hial zawk. Pu Thanga chu a thinrim lak lawh tlat, "Ka zu in in a, he hmeichhia pawh hi keima rawn hruai a ni. Ka duh leh ka that anga, ka duh leh ka sawisa ang. Inlo sawi ve tur a awm lo, pawisa pawh keima thawh vek a ni." tiin a hau ta hlawm hrep mai.

An ngawi deuh thap hlawm a, engmah an sawi zui ngam lo. Sally chu nikhawhrelovin a let der tawh, Pu Thanga chuan a sawi vak vak a, mahse a harh thei lo. "I pet nasa lutuk a, nikhaw hrelovin a awm der a nih kha. I that mai anga sin, a zialo emai." tiin Henry-a chuan a lo hau va. Pu Thanga erawh ala thinrim reng thung, "Tih harh dan ka hria alawm." tiin motor lam pan chuan a kal a, chemte a rawn la chhuak ta mai.

"U THang, enge tih i tum a?" tiin Ruata chu a lo mangang hman tep a, "Ka ti harh dawn." tih ringawtin a chhang a. Sally chu bawkkhup zawngin a kuai let a, a hnungzangah chuan chemte chuan a tin ta ran mai, "SALTY SALLY..a inti vel a, khawnge, a hnungah hian a hming hi kan ziak ange." tiin chemte hmawrzum chu a chuk tuah ran a.

"Lo man bet rawh u.." tiin midang ho chu a vin leh vak a, an lo manbet ve mai bawk a. Pu Thanga chuan zu chu  a han tlak leh pap a, chutah Sally hnungzang ah chuan chem chu a han thai kawi ta vel a nih kha. Sally chu a rawn harh chiang ngang mai, mahse a che thei silo. An man nghet em em bawk si, a ka ah puan an hnawh tlat avang chuan a au ring thei silo.

Minute 1 dawn hnuah chuan, "Umm tattoo nalh tak a ni...i lawm em ,BAwihte?" tiin a han nui huah huah a. HEnry-a chu a nui huk a, "U THang...a spelling ila ti diklo zui. Hei en ta che, SALTED SALLY tih i ziak daih alawm." a han ti a. Mahse Ruata leh Jerry-a erawh an nuih aza ve chiah tawh lo, hlauthawng an ang mah tawh zawk.

Sally chu a chau tawh takzet, a meng tawk tawk tawh a ni. Pu Thanga chuan zangthal zawngin a kuai let leh a, a duhtawkin Sally taksa chu a han chen leh a. "I fel e, i thiannu zarah nula itawm tak ka han khuainuai leh thei a.." tih pah chuan na em em hian Sally awmah chuan a han tum leh vak a.

Sally chuan a lu a rawn kan awrh mai a, a maimitchhing ta hmak mai. Jerry-a chuan tih harh a tum a, mahse a chesawn ta eih lo. A mar an han dek a, "Ekhai...i that der ania." a ti ta mai. Pu Thanga chuan tih harh a han tum ve leh a, mahse Sally chu a harh thei tlat lo, an sawisa hlum der tawh a ni.

An mangang tlang hle mai a, an invin thul. "I phum mai ang u.." tiin an inhnial buai a, a chang leh an incho thul. A tawpah chuan sally ruanga thisen kaite chu an hru fai a, taxi ah chuan an zawn lut a. An tsul hnu vel chu an tifai leh a, an tlan ta daih mai. An tlan liam meuh chuan ka awmna chu a thim vek a, "MS, i harh em?" ti ri ka hre chhunzawm nghal bawk.

************************

Ka mit ka meng a, ka bulah chuan DAisy leh Police pakhat hi an lo awm a. Ka tho chhuak nghal vat, "Khawnge ka awm?" ka ti a. Police pakhat chuan, "Thianpa, hlauthawng suh. Engthil nge thleng a?" tiin min zawt a. "Ka pu, Henry-a chiah a bang tawh." ka ti ringawt. A hriatthiam loh hmel kher mai, "Tunge chupa chu, enge awmzia?" a ti hu mai.

Ka chhang mai thei lo, a phone a rawn ri a. "Hello, aw hei location ah chuan kan awm a. Ka rawn chhuk pui ang.." a tih lai chuan a lu chu a ri chawrh a, a thal der mai. A hnungah chuan Henry-a chu rod lian tak keng chungin a lo ding run a, Daisy chu a man bet nghal bawk. Rang takin ka tho va, mahse Henry-a chuan police pa silai chu a chhar vat a.

Min tin a, "Nang hi ila dam amaw?" tiin a thinrim hmel kher mai. "Khawngaihin ti na suh, Henry..i nunna a derthawng ania." ka ti a, ka lu chu a la thip vawng vawng mai. "Ka hming te i hria amaw? Min rawn zui hlek suh ang che, a nih loh chuan i unaunu hi ka kap a nimai. Chuan nangpawh, nangpawh kha ka kap ang che." tiin min vau chhur chhur a.

In rel atang chuan min tin reng chung chuan a chhuak a, DAisy chu a hruai tel bawk. Mahse ka zui ve zel tho a, kan awmna ber kher lah chu a fal in a reh em em lehnghal. Thla chu a eng em em bawk a, boruak lah chu a vawt ruih lehnghal. Chutah Daisy chu a rawn zawi thut a, a tlu tep nghe nghe.

Mahse Henry-a chuan a lo man hman a, "Hey Hmeli, thih der tum suh aw..." tiin a vin vak vak a. Chutah DAisy chu a rawn meng thut a, Henry-a ban chu a herh vak mai. Henry-a na ti lutuk chu a au vak a, a pistol pawh chu a thlauh nghal a. Chutah kawngsira motor deng dawt khawp chuan a hrawkah rekin a nawrbet ta mai a, a ngaihna ka hrelo hle.

Pistol chu ka chhar nghal a, Henry-a chu ka tin a. Motor darthlanlang ka va en chuan Henry-a rek mektu hmel chu ka va hmu a, Daisy hmel a ni hauh lo. Sally hmel zawk a ni, a thinrim hmel em em lehnghal. Chet pawh ka che eih lo, ka en tlawk tlawk ringawt. Henry-a lah chuan a hlauh hmel em em a, a ka a ang sawi bawi bawi mai.

A tawpah chuan a rek hlum ta, DAisy pawh chu a zawi hnawk a, a tlu tawp mai. Boruak vawt vur leh thli thaw te chu a reh ta a, keipawh ka thaw huai mai. Daisy chu zawi muangin a rawn harh a, "Khawnge ka awm?" a rawn ti tham tiak a. "Engmah hlauhawm a awmlo, DAisy...kan him e." tiin ka chhang a.

"Ihmaw..nichin khan Sally ka hmu..min bia...mahse ka mumang niin ka hria." a ti zawi leh sap a. "Enge a hrilh che a?" tiin ka zawt a. "A ruang an phumna min hrilh a..." a ti ta mai a. Ka zawt vat a, a hmun awm ang vel a han sawi chuan ka inluahna lai mek bul velah a ni tih ka hre ta. Police dang pahnih te pawh an lo thleng a, hemi zan bak bak a ka insawifiah nasat kha ka la hrelo.

***********************

Police te hnenah chuan thiam ang tawkin kan han insawi fiah a, Henry-a thihna lakah pawh chuan kha police inspector, Henry-a'n a vuak thluk pa puihna hmang chuan thiam kan chang thei hram bawk. Tunah chuan engkim a zo ta, hemi zan la la hian Sally ruang pawh lak chhuah  ani.

Mahse ruhro vek a ni tawh thung, keipawh ka thaw huai ta mai. Damdawiin min panpui nghal bawk a, ka lu a hliam te chu an han buaipui a. Daisy erawh a taksa ala chauh deuh avangin a la muhil hrih a, kei erawh ka nat tawh vak lemloh avang chuan ka haw thei ta hram a. Mahse ka la haw mai lo, a chhan chu Melody an hruaina damdawiin tho kha  anih vang a ni.

Ani pawh a lo harh tawh a, engkim chu a bul atanga a tawp thlengin ka hrilh fiah a. A rilru  ana takzet, "Ka patea kha ka ring lutuk a, keimah vang vek a ni." tiin a tap zawih zawih a, ka thiam ang tawk chuan ka hnem a. MElody pawh chu a harh that tawh avang chuan a chhuak ve thei ta a, taxi in kan haw dun a.

An in thleng ka thlah a, zinglam dar 4 a ri dawn tawh. Keichu taxi hmang tlangin kan in lam ka pan phei nghal a, kan inah chuan police te leh ka inluah neitute chu an lo inbe mek bawk a. Ka inluahna neitupa pawhin ruang a awm tih a hriat bikloh thu te, engmah Sally chungchang  a hriatloh thute chu a lo insawi fiah ve mek bawk a.

Ina ka lut tur chu ka in tukverh ah chuan hmeichhe dang thla ka hmu leh ta tlat mai, min hnungchhawn tlat bawk. A rawn hawi a, Sally bawk a lo ni leh. Chutah min rawn en a, "Ka la zo lo, ala tawp lo. Mi pakhat ala bang, mi pakhat ala bang." tiin hnuailam a melh vang vang a, ka hlauthawng leh tan ta khawp mai.

Chutah a rawn hawi chhuak leh a, Sally aw zawng a ni ta lo. Ka rinloh lutukin Melody thla a lo ni daih mai, rang takin ka tlan let lehnghal a. Eng taxi mah a awm tawh lo, ke chuan ka tlan ngat ngat a. VEng hnih-thum laiin min dai dang a, a hla bawk nen, ka chau tawh bawk nen, ka hah kher mai.

Chutah ka lu a rawn na vak a, ka tlan zawm thei lo. Ka lu chu ka dawm vawng vawng a, ka khaw hmuh te chu a thim mup mai. A zia deuh ta maw tih ah chuan ka han meng leh a, ka awmna hmun chu a dang leh daih tawh. Ka awmna chu ka han enkual a, kawngsir ah ka lo ding a, khawi hmun nge a nih ka hrelo, a reh em em mai lehnghal.

Ka hma zawnah chuan motor pakhat hi a lo ding a, chu motor chu Pu Thanga motor a ni. A bulah chuan Pu Thanga, Ruata leh Jeery-a te an lo awm ve bawk. Meizial an lo zu a, an rilru  ahah hmel hlawm kher mai. Khua a thim tawh a, Henry-a erawh ka hmu lo. "Engtin nge kan tih dawn? Tual i that der ania.." tiin Jerry-a chu a mangan hmel hle mai.

Vin zet hian Pu Thanga chuan, "Ka ngaihtuah mek anih hi....Henry-a chu ava rei ve mawle." a ti nuah nuah a. "A hrim hrimin petrol te chu check lawk ve tur che ania, buai mah nakalaia.." tiin Ruata pawh chu a lo phun ve bawk a, chutih lai tak chuan an bul lawkah chuan motor hi a rawn ding a, a chhung atang chuan keimah ah tak mai hi a rawn dak chhuak a.

"Thiante u, ka phone a thi daih a...in phone ka lo hmang lawk teh ang a?" a rawn ti a. Chu mihring chu keimah nilovin Sangtea ngei a ni tih ka hrethiam nghal, Pu Thanga te chu an che buai teuh kher mai. "Awle." tiin a lo chhang ve mai bawk a, Sangtea chu a rawn chhuak a. An bulah chuan ding ve in an phone chu a hmansak a, "Aww..ka nu lah hi phone lak nachang hre bawk silo. Lawk aw thianpa, midang ka'n phone leh lawk." tiin number dang chu a type leh mawlh mawlh a.

Chutah a han call leh a, motor atang chuan phone a rawn ri ta ral ral mai. Pu Thanga te chu an phu deuh zuk hlawm a, an inmelh ta rek rek hlawm mai. Sangtea chuan mak a ti em em a, "Chu chu ka nau ringtone a ni...tunah hian ka nau ka call mek a, engvangin nge in motor atang hian a rawn rik daih theih..." tiin  a thinrim hmel kher mai.

Chutah Jerry-a chu a hawi kual zek zek a, Sangtea chu hnek a tum ta mai. Mahse Sangtea chuan a lo bum a, a khawilet hrep mai. Pu Thanga chuan a motor chhunga chemte chu ala a, mahse Sangtea chuan awlsam tak hian a lo chhuksak leh mai a. An pathum chuan chemte chuan a tin ta ran a, "Khawnge ka nau a awm?" tiin a vin ta vak vak mai a.

An che ngam der lo, chutah taxi pakhat a lo tlan a. Sangtea chuan  alo phar vat a, mahse chu taxi chu chak em em hian a rawn tlan a. Sangtea chu a su thal tawp mai, Henry-a  alo ni. "Hepa hi tunge? Chemtein a lo tin che u sia, ka rawn su tawp anih kha." a rawn ti chhuak nghal bawrh bawrh a.

Pu Thanga chuan, "A u mawle...khai, ava han fuhlo cher cher veleh." a lo ti nuah nuah a. Tichuan tihdan an han ngaihtuah vang vang a, atawpah chuan accident anga lantir mai chu an tum ta a, a motor ah chuan an chuan tir a, Sangtea chu nikhawhrelovin a awm reng. Tichuan a break ti fail in kham lamah chuan an tlan liam tir ta a, ka harh zawk mai.

*****************

Ka mit kan meng leh chu ka lu a rawn nat vak hmaa ka awmna ngaiah tho chuan ka lo awm leh a, Melody ka hrechhuak thut mai. Rang takin ka tlan leh nghal a, khua a var deuh uar tawh. A tawp a tawpah chuan ka va thleng ta, an inkawt bula kham awih ve tak lam chu a lo pan mek a, a melh ngai melh rengin a lo kal chhut chhut mai.

Vanneihthlak takin ka va man hman hlauh a, leiah chuan a tlu hnawk a. Min rawn en a, "Nilo ka u, henu vang vek hi a ni. A thih ve angai, ama zarah mi pali laiin min pawngsual a, amah vang vek a ni." tiin Melody hmel pu si, mahse Sally aw daih chuan min be mawlh mawlh a, mahse ka vuan bet tlat a.

"Nilo Sally, phuba chu i la kim tawh alawm. I duh ang ngeiin i ruang pawh phawrhchhuah  ani tawh a, engkim thudik hriat chhuah a ni tawh. Melody hian engmah a ti velo, a patea kha  a ring sual a ni. Khatiang thil kha  a thleng dawn tih engmah a hre lawk biklo a ni, a thian tha tak i ni asin. Khawngaihin Sally, i u vang tal pawh hian ngaidam rawh." tiin keipawh chu ka mittui a tla hial.

Chutah Melody taksa chu a zawi hnawk a, a muhil ta siai siai mai. "Ka u.." tih ri ka hria a, ka hma zawn ka hawi phei chu Sally a lo ding a. A hmeltha in a duhawm takzet, lungngaih hmel tak hian a tap a. Zawimuang chuan vanlamah chuan a kang chho riai riai a, ka en reng a. Tap chungin hnuailam rawn melhin min la en reng a, muang chang chuan a ral ta riai riai a.

************************

Thla thum vel a liam leh hnu chuan promotion ka hmu a, ka hlawh pawh a pung ve deuh ta. Melody chawmna tur khawp chu ka hlawh chhuak ve thei tawh, a tawp atawpah chuan kan innei ta hial a. Sally thlarau erawh chuan vawikhat mah min tibuai leh tawh lo, Daisy te nen pawh thiantha tak an ni tawh.

A hmaa Melody leh anu an lo inngeih loh em em nachhan pawh engdang nilovin, Melody patea, Pu Thanga khan a u nupui, Melody nu ngei mai chu a lo beisei ruk thin vang a ni a. Melody hian a patea hi a tan em em a, chuvang chuan a nu thusawi pawh a lo awih duh ngailo hi a lo ni.

Mahse engkim thudik a lang chhuak vek tawh bawk a, tunah chuan an inngeih leh tawh khawp mai. Kan inneih atanga reiloteah chuan Melody chu a rai ve ta nge nge a, pa ka ni ve dawn ta. Kan nu in nau a hrin meuh chuan ka lawm kher mai, hmeichhia a la ni zui. A hming pawh keimah ngeiin ka sa, "SALLY LALHRIATPUII." tiin.

****************************

THE END