A HANDSOME CREATURE : THE FINALE VOL - 5 Written by : Aaron Malsawmdawngzuala WARNING : 18+ CHAPTER - 1

 A HANDSOME CREATURE : THE FINALE

VOL - 5

Written by : Aaron Malsawmdawngzuala

WARNING : 18+

CHAPTER - 1

*************************

(A hmasain Hmaikawra thawnthu min lo chhiarsak thin tute leh Youtube lama min lo ngaihthlak sak thin tute chungah ka thinlung takin lawmthu ka sawi a, hei tunah chuan a tawp ber na tur kan lo thleng ta reng mai. Hmaikawra thawnthu hi a tir chuan Season khat bak ziah ka tum lova, mahse rin ai takin in lo hlut a, request a tam em avangin ka han ziak zawm leh ta nawk nawk a ni e. A tira he thawnthu ka ziah khan idea em em ka nei lova, ka phuah deuh pawp pawp a. Mahse rin ai takin in lo hlut leh si a, phurna tam tak min siam a. Ka lawm takzet, in hmel pawh a tha suk suk e. Mahse tunah chuan a tawpna ber kan thleng ta reng mai a, hei bak chu a awm tawh lovang. Hmaikawra thawnthu lo ngaithlatu zawng zawng te, Victor-a'n a hmangaih vek che u.)

***************************

[Ziah tan hmain thil pakhat ka han sawi leh lawk ange, hei ka story hi youtube lamah leh FB lamah te min lo chhiarsakin min lo ngaihthlak sak thin a, ka lawm takzet. Chutih rual chuan mi thenkhat hian inbox ah, "Kan faten i thawnthu hi an ngaithla ve duh thin sia, an hlau thin si a. Chubalah tawngkam mawilo leh zahmawh rawngkai a tam thei si a, naupang ho tan pawha ngaihthlak ngam turin ziak tawh la.." tiin min rawn hrilh hrep zel mai a. Hei tak hi ania WARNING 18+ ka dah thin, in fate tana a rapthlak chuan khawngaihin in chhiar tir emaw, in ngaihthlak tir lo mai dawn nia. Kum 18 chunglam tan chauh a chhiar turin ka ziak lang thin a, youtube lamah erawh kan ti lang lem lo. Chuvang chuan in fate kum 18 an la tling lo anih chuan khawngaihin lo chhiar emaw, lo ngaihthlak tir tawh lo mai rawh u tih hi inthlahrung tak chungin ka rawn sawi lang leh hram a ni e.]

***********************

5 MONTHS LATER AFTER THE INCIDENT OF THE PREVIOUS STORY (VOL-4)

"Ka pate, duhtawk tawh rawh. Kum 5 lai a liam tawh a, Angel-i chu kan hmu tawh chuang lovang. Police te pawhin min pui thei tawh lova, nangmah chauh chuan engtikah mah i hmu tawh dawn chuang lo. Chubakah a thi nge a dam pawh kan hre tawh chu ania, khawngaihin duhtawk tawh rawh." tiin kum 30-a upa, tlangval fel tak mai Rinsanga chuan a pa nau, Pu Sanghluna chu a be mawlh mawlh a.

Pu SAnghluna chu a han thaw deuh hak a, "Ni e, ka hria alawm. Mahse BAwiha, ka fanu neihchhun a ni a, ka khawvel a ni asin. Kum 5 pawh lo liam tawh mahse, kum engzat pawh liam mahse, ka fanu hi ka theihnghilh thei lo a ni. Zantin ka mumangah ka hmu thin a, min pui rawh ka pa tiin min au lawm lawm thin. Hei vang ringawt pawh hian ka fanu hi ala dam ka ring tlat a ni, a thih ka la ring phal mawlh lo a ni." tiin a lo chhang a.

"Ka pate, i mumanga i hmuh vang ringawtin Angel-i chu ala dam tihna a ni hleinem. A thi e ka tihna pawh a ni chuang lo, mahse hei kum 5 lai a liam tawh a. Tuman a la dam hi an ring bik lovang, kan zawng hnem tawk tawh alawm. Hetia i awm reng chuan keini tan pawh a hrilhhai thlak emai, duhtawk tawh mai rawh." Rinsanga chuan a han ti leh a.

"Nilo Bawiha, khawiah emaw mangang tak leh rilru hah takin ka fanu hian min la nghak reng a ni. Ka beidawng dawn lo, ka thawk tek tek chhung hi chuan ka zawn chhunzawm reng ang. Tuman min dang thei lovang, Police ten min pui theilo mahse keimahin ka zawng zel mai ang." tiin a la tang fan mai a, Rinsanga pawh chuan chhan let ngaihna a hre tawh ngang lo aniang nge.

**********************

Chhun dar 12 vel a ni a, Rachael-i chuan thlanmual lam a pan mek a. A han chhukthla thui deuh a, thlan pakhat bula tlangval pakhat lo thu ngawi reng chu a zuk hmu a. Zu pan hnaiin a bulah chuan a zuk thu a, "Zual, in inah ka lo kal a. Hetah ilo awm daih a, nitin i la kal thin em ni a?" tiin a nau SArah-i thlan en ngawih ngawih tu, Zuala chu a han be mawlh mawlh a.

Zuala erawh chuan a melh ngai a la melh reng thung, "Ka la awih thei lo a ni, RAchael. Ka nau neihchhunin min kalsan ta mai hi ka la awih thei mawlh lo  a ni...ka ngai takzet." tiin a tap lek lek mai. "Naktuk hian Aizawlah haw ka tum tawh a, chuvang ania in inah ka lo kal." Rachael-i chuan a han ti leh a.

Zuala chu a rawn hawi chhuak a, "Ehe, i haw dawn maw? Ngati teh thut nge?" tiin a zawt a. Rachael-i chuan, "Ka ni ten haw tawh rawh min ti a, ka nu leh pate an ngaihtuah aniang. Chubakah khatiang thil teh hrep kha kan tawn hnu khan ka nu leh pate hian ka chhuah hi an phal tawh lo lutuk a, Thenzawla ka rawn zin theihna chhan pawh nangmah vang chauh hi ania." tiin a chhang a.

Zuala chu a ngawih vang vang a, "Umm...anih chuan haw ila." tiin a tho a, thlanmual step ah chuan an chho dun ta a. An kal pah chuan Zuala bawk chuan, "Keipawh ka zir zawm leh ang, hetia chawlhsan hmak hi chu ka tumlo bur. Ka rawn zin leh em em ang, kan la inhmu dawn chauh alawm." tiin za lo tak chuan a nui lui sak a.

***********************

Inspector Awmpuia leh a thawhpui SI Eric-a te chuan zu an indun mek a, an kai dun miah miah kher mai. An titi tui dun nasa mai a, an hnathawh chungchang te, an bialnu hlui chungchang te leh thil dang dangte sawiin tawng an inchuh dun nasa tawh kher mai. Chutah Awmpuia chuan kum engemaw zat liam taa a case chhui pakhat, pawikhawihtu a man hnua tlanchhuak ta chungchang chu a sawi lang ta zeuh mai.

"Kum 5 a liam tawh a, kan hlawhchham thak. Chutah thla 5 vel liam ta khan a la dam thu te, thian ho lui kalin an hmuh thute, tual a lo thah leh vak vak chungchang te police department dang te hnen atangin report ka lo hre ve leh a. Ka phur thar tehreng nen, hei tunah chuan a ngaite bawkin..." a thinrim lutuk chu a tawng tha hleithei lo.

Eric-a chu a lo nui suk a, "Victor-a chungchang bawk maw?" a lo ti sap a. Awmpuia chuan no khat chu a han tlak leh pawp mai a, "Ni ang chu mawle...hepa hi chu ka theihnghilh thei lo. KA station atang ngeiin a tlanchhuak a, ka naute a that nual bawk a...tunah chuan hei angaite bawkin hmuh tur awmlo...a chanchin hriat ala nilo...tih ve bawk a nih leh mai mai tawh hi.." a han ti leh nuah nuah a.

***************************

"Pa a, Bawihtea chu va hruai mai ta che....ka pum anuamlo emai, i hna i chawlh ni a ni tho." a pum chul heuh heuh pah chuan Sangtei chuan a ti a. A pasal MSa pawh chuan zaidam tak hian, "Awle awle, pumpui chakna te kha ei tha rawh ka tih mawlh mawlh kha. Nang hi i pum i sawisel ziah mai a, in entir ila a tha ang." tiin a lo chhanglet a.

"Nia, ka hmarcha eihnem lutuk hi ni berin ka hria. Bawihtea chu han lam vat rawh, school an ban a hun tep ania." tiin Sangtei chu a han vin leh deuh hlur a. "Aw ala hma alawm...englo ania. Thil hrilh duh che ka nei a, nizan ka mumang.." a tih lai chuan Sangtei chuan, "Awi patling pui si...mumang mai mai han inhrilh.." a lo ti vin leh hlur a.

"Aih, ka mumang kha a mak em a. Englo, khapa kha ka hmu a."

"A tu chu maw?"

"Kha...hmana kan buai hrep na kha, Victor-a kha..."

"Tu Victor-a?"

"Victor Lalthanmawia."

SAngtei chu a meng deuh kawk mai a, a lung awi loh hmel kher mai. Tum deuh hmuk hian, "A tawk, sawi lo teh." a ti deuh hlur mai. "Enteh Sangte, a chanchin i hre duh tawh lo tih ka hria...mahse nizan ka mumang ah khan warning min pe a ni." tiin Msa pawh chu a thutak hle mai.

"Eng WArning maw?"

"Ka lo let leh dawn, ka la theihnghilh lo che u a ti a ni. Chuan...ihh." tiin a han ngawi deuh vang vang a. Chutah hreh hmel tak hian, "I nupui Sangtei kha ka la theihnghilh lo tih chiang takin a sawi bawk a ni." a ti leh ta mai a. Sangtei chuan kum tam tak liam hnua a mihring hlauh em em mai hming a han hre thar leh chu a hlau kher mai, a hlauhna kha a la reh mawlh lo a ni ngei ang.

"MS, a tawk. Mumang mai mai a nih chu, sawi tawh suh." tiin a pasal chu melh pawh a melh tawh lo. "Sangte, enge a chhan pawh ka hrelo. Mahse ka rilru a nuam thlawt lo a ni, zep lo chuan." a han ti leh a. Vin deuh lek lek hian, "Bawihtea chu han hruai rawh, i tlai ange." a ti tuar a.

MSa pawh chuan a sawi chhunzawm ta biklo, chahbi a la a, a chhuak ta a. Sangtei thin chu a phu dup dup mai, Victor-a hming a han hre leh chu a pumna reng a ngaihtuah tawh lo. A pasal thusawi avang chuan mumang mai mah nise, hlauhthawnna a nei tlat tho. Kum 8 liam ta a thil thleng kha a ngaihtuah chhuak lo thei lo, Victor Lalthanmawia ngei kha.

**************************

Putar ve tawh tak, kum 72 vela upa. Pu Khuma ram kal haw lam chuan thawm a hre tlat mai, tlai dar 5 vel a ni. Hmeichhe au thawm ni tlat hian  a hria a, pa huaisen tak a ni bawk a, a chempui chu phawrhin thawm lo chhuahna lam chu a pan a. Ram a kal ngun bawk a, kalkawng pawh a hre viau.

Mahse thawm lo chhuahna lam a pan erawh chuan chulam kawng chu vawikhat mah a la kal ngai reng reng lo tih a hria a, uluk takin kawng chu a en zel bawk a. Chu hmeichhe au thawm pawh chu a ring tial tial a, rin aiin a hla phian lehnghal. Hmun zawl nuam tak maiah chuan a chhuak hlawl mai, chu hmun chu a awm tih pawh a hre ngai hauh lo.

Kudam lian tak niawm hi a laiah chuan a lo ding run mai a, rangva hlang a ni. A rangva te chu a tui ek nasa em em bawk a, chu kudam chhung atang ngei chuan a ni thawm chu a lo chhuah ni. Pu Khuma chuan kudam chu a pan hnai zel a, "Tunge ni? Tunge awm?" tiin a han au vak vak a. Hmeichhe au thawm pawh chu a reh hmak mai, a chempui chu a hum nghet sauh sauh va.

Kawngka chu a han hawng a, a chhung chu a lo thim ruih mai. A han lut a, a chhung a han en chiah chu a ding chat mai. Chhuat laiah chuan chalk hmanga rin bial niawm tak chhungah hmeichhe pakhat a lo bawk vang mai, saruak vekin a awm lehnghal. A bulah chuan pa pakhat, sang tak mai hi a lo awm bawk a.

BAti a lo inchhi bial vek bawk a, an awmna lai bik chu a hmuhchian theih ngang mai. Hmeichhia chu a rum  ngut ngut bawk a, a taksa ah chuan hruia hlapna ni awm tak kutthlakna hnuhma a awm thluah bawk. Chu a bula lo ding chu sam sei ngil tak, a dar pel daih niin hlinglukhum niawm tak hi a kum bawk.

Mahse a hnungchhawn tlat a vang chuan Pu Khuma chuan a hmel a hmu thei lo, "Hey...enge awmzia? Tute nge in nih?" tiin a han vin vak vak a. Hmeichhia chu a rawn dak chhuak a, a chil thli a fan duah duah mai. Pu Khuma chuan mak a ti takzet, a chhan pawh chu hmeichhia chu hmeichhe hmeltha tak a nih vang a ni.

Ala naupan hmel em em a, a ngo hle bawk. MAhse chutih rual rual chuan a rap takzet a, chunu mit lah chu a sen rum mai lehnghal. Chutah chupa chu a rawn hawi ta, kawr dum bantlawn hi a ha a, a kekawr leh pheikhawk pawh a dum hlang vek a ni. Mahse hmaikawr a vuah tlat thung, a hmaikawrah chuan thisen a luang nuai bawk.

A hmaikawr chu a var a ni a, a mit bul leh a hmui erawh a dum thung. Pu Khuma lam chu pan chuan ava phei a, Pu Khuma chu a zam hle mai. "Hey, lo kal suh...tunge i nih?" tiin a chem chuan a tin a. Mahse chu Hmaikawra chuan a ngaithla eih lo, a va pan hnai zel a. "Tunge i nih? Tunge i nih min hrilh rawh...anih lo chuan ka sat ang che." a han ti khur leh dar dar a.

Mahse a ding duh der silo, Pu Khuma chuan sah tumin chem chu a han lek kang a. Mahse awlsam tak hian Hmaikawra chuan a lo man a, a hrawkah rekin chhuatah chuan a bawh bet ta ran mai. Chem a kenna lam chu Hmaikawra chuan a thing thit a, rum em em hian Pu Khuma chu a melh a.

Pu Khuma erawh a tawng chhuak thei lo, a rek nghet lutuk tlat. A khawhmuh a fiah lo tial tial a, a thaw thei ta lo. A tawp a tawpah chuan a rek hlum ta a, Hmaikawra chu a thaw halh halh a. Chutah a hmaikawr chu a phelh a, mipa hmeltha tak a ni. Pu Khuma ruang let reng chu a en vang vang a, a beng bulah chuan a zu kun hniam a.

ZAwi te si, fiah em em si hian, "Ka hming chu Victor-a a ni, Victor Lalthanmawia." a ti chang fak fak mai a, a thinrim hmel hle bawk. Chutah hmeichhia saruaka lo bawk reng chu a va en a, chunu pawh chuan a rawn melh ve a. An in melh vang vang hnu chuan an nui dun a, "Chuan kei hi  anupui, Angeli ka ni." tiin a nui var var mai.

*************************

"Luia kal, ram riah chhuan tih vel hi keichu a tul pawh ka tilo. Tunlaiah phei chuan tui tla hlum an tam thei si, ka remti lo reng reng." tiin tleirawl kum 18 mi lek, Hannah-i pa chu a ang nasa kher mai. Tap deuh tuau hian Hannah-i chuan, "Exam chawlh lai ania, ka thiante zawng zawng pawh an chhungten an phal vek." a ti deuh hluam hluam a.

"Awww..tleirawl te an nia, keini pawh kan naupan laiin kan kal ve thin tho kha. A ho emai, eng em an tawk bik nang." tiin a patea chuan a lo tan a. "Hman leh tun a in ang lo, chubakah mipa an tel dawn lehnghal." tih pah chuan room ah  alut hmak mai. Hannah-i chu a lungawi lo hle mai, a nu bulah chuan a vui nuah nuah a.

Anu chuan, "Aho lutuk, in kal dawnnia. I pa hi chu amak thei ngawt mai, kan hunlai kan hunlai tiin a sawi zuah zuah reng a. Tunlai thalai chu lui kal pawh an peih tawh lo te a ti vel vak vak a, phal leh tawp silo. In kal dawnnia, a thinrim rei lovang." tiin a lo hnem a. A patea pawh chuan, "Nia, mahse fimkhur ula. Tui te kha ngam lutuk lo ula, in kal dawnnia." a lo ti ve bawk a.

Hannah-i pawh a lawm hle mai, a phone chu a phawrh nghal vat a. An thian ho Whatsapp group ah chuan lutin, "Keipawh ka chhungten an phal e." tih chu a thawn ta hlawm a. An thianho hi paruk niin an hmingte chu Issac-a, Hriata, Siama, Jenny, Lawmi leh amah Hannah-i te niin kum 17-21 vel chauh a upa an ni hlawm.

*************************

"Debo, i nite khuaah han zin ang hmiang. Awm awl lai te a ni tho va, keichu ka zin chak e." tiin DEborah-i cousin, Melinda-i chuan a han sawm a. Tum hmuk hian DEborah-i chuan, "Sawibuang khuaah khian ka zin tawh muar ang, ka duh teuh lo mai." a lo ti hlur mai. "Hmmm..engvangin maw?" tiin Melinda-i chuan a zawt a.

"Kum 5 chu a liam tawh, mahse ka la theihnghilh theilo. Kha mihring vang khan zan tin chempui nen ka la mu tih hre rawh, ka zin duh tawh teuh lo." a han ti leh a. "Aww..Victor-a an ti tiraw khah..Mama an ti bawkin ka hria..a ni tiraw?" tiin a lo zawt leh a. "A ninawm, a hming pawh kha lam ri suh." tiin a vin leh hlur mai.

Melinda-i chu a nui huah huah a, "AWiii kum 5  a liam tawh, i chhungte pawh khami hnu khan an zin an zin tawh a, engmah an tawng lo. Chubakah a thi daih tawh ang, a rei tawh emai." tiin a lo chhang leh a. "A ruang pawh an hmulo, chuan a la thilo tih ka chiang. Thla 5 vel liam ta khan Bukpui lui ah college naupang ho mipakhatin a mal te te in alo that an tih thawm kha i la hria em?" tiin DEborah-i chuan a han zawt a.

"E ni tak e, ka lo theihnghilh daih tawh." Melinda-i chuan a lo ti nuah nuah a. "Kha pawh kha, thuchiang tak chu ka hre velo nain Victor-a tho a ni e an tih kha, Police ten an puang zar tha duhlo mai mai alawm." Deborah-i chuan a han ti leh a. "Mahse thla 5 a liam tawh a, chupawh Bukpui lui daih lehnghal. Sawibuang khuaah tunah a awm mek tihna pawh a nilo a, chutia i hlauh te chuan Sawibuang khua chauh nilovin kan awmna hmun tin pawh hi a hlauhawm vek ang chu." Melinda-i chuan a han ti leh hram a.

"Ui nia...zin chu ka chak reng. Mahse kha thil ka tawn khan tun thleng hian min la ti hlau alawm, SAwibuang khua sawichhuah apiangin ka hrechhuak ziah a." a han ti leh nuah nuah a. Melinda-i chuan a thlem a thlem a, a tawpah chuan a thlem thlu thei ta. "Um nia, kan zin dawnnia." tiin a chhang ta nge nge a.

**************************

TO BE CONTINUE