A HANDSOME CREATURE : THE FINALE VOL - 5 Written by : Aaron Malsawmdawngzuala WARNING : 18+ CHAPTER - 2
A HANDSOME CREATURE : THE FINALE
VOL - 5
Written by : Aaron Malsawmdawngzuala
WARNING : 18+
CHAPTER - 2
*****************
An paruk hian thian an ni mai bakah a kawp kim chiah chiah in an inngaizawng a, an zinga mi Issac-a hian car a nei bawk. Issac-a leh Hannah-i hi an inngaizawng a, Hriata leh Jenny an inngaizawng bawk a, Lawmi leh Siama te chu an inngaizawng bawk. Mahse an nu leh pate bulah erawh an sawi hauh lova, an nu leh pate pawhin inngaizawng an ni tih engmah an hrelo bawk.
An thil tum ber chu intihlim tura lui kal chu ni tho mahse, chhungte leh hmelhriat dangte ven thawn ngai lova duhtawka mahni hmangaih ber te nena han khawsak dun vel te chu an thil chak ber a ni mah zawk ta ve ang. Issac-a car ah chuan an bungrua leh mamawh vel te chu an han dah khawm a, Siama erawh chuan Bike a keng dawn thung.
Siama leh Lawmi te chu an inphur a, tichuan a bak zawng chu Issac-a car ah chuan an chuang ta a. Rei tak an tlan fe hnu chuan an thleng ta, "Awii avan hla em em, kan thleng thei dawnlo emaw ka tia lawm.." tiin Hannah-i chu a han zi mar tial tial a. An lui kalna hi hla viau e tilo chuan thui tak motorin a tlan theih thung a, mahse kawng erawh a chhe hle thung.
Motor an dahna atanga hla lutuk lovah chuan lui chu a lo awm a, a bul deuh lawkah chuan thlam lian ve pangngai tak hi a awm bawk. "Thlamah khian kan riak dawnnia, zan 1 chiah ni tho a..a hrehawm lovang." Issac-a chuan a han ti a. An hlim tlang hle mai, "A nuam dawn e." tiin Siama pawh a lo khi suk mai.
"Engpawh nise kan riahna tur thlam ah khian han in dahfel phawt teh ang u." tiin Hriata chuan hma a hruai a, midang chuan an zui bawk a. Thlam an han lut chiah chu an phu deuh zawk mai, hmeichhe hmeltha tak pakhat hi lo thu in meizial a lo zu hlat hlat mai. Lut mai lo chuan Hriata chuan, "Ehe...thiannu...ihh..kan tihpalh, thlam neitu em ni i nih.." a ti bah nuai mai.
Chhang mai lo chuan chu hmeichhia chuan a han melh vang vang hlawm a, a nui suk mai. Tawnzau dum pan tak leh kekawr bul chhing em em mai chiah hi alo in bel a, a mal mum nalh leh var tak mai te chuan mipa ho mit chu a la ngang mai. Mahse an bialnu te an awm ve vek avang chuan an han melh tha lo lui vel a, hmundang han hawisan erawh an rilru tak chuan an ui hlawm khawp mai.
A meizial chu a han pak khu leh tual a, "Nilove, keimahin ka lo awm mai mai. Lo lut ru, a neitu ka nilo." tiin a nui har har a. Hannah-i te thian ho pawh chu an lut ve mai a, bungrua te chu an han dah fel a. Issac-a chuan, "Thiannu, enge i tih reng reng a?" tiin a han zawt a. Chunu chuan, "Mahniin lui ka kal e ka tia, ina awm reng ka ning a." tiin a lo chhang a.
"Nangmah in maw? Midang kalpui i neilo maw?" Hriata chuan a lo ti hu mai. "Umm...mahniin ka kal ziah alawm." tiin a lo chhang leh mai a. Jenny chuan, "Nih leh tunge i hming ni a? Engtin nge kan koh ang che?" tiin a han zawt veleh a. Chu hmeichhia chuan Jenny chu ahan nuih seih a, "Angel..Angel Lalremruati." tiin a chhang a.
**********************
Deborah-i leh a cousin Melinda-i te pawh chuan sumo ticket an book fel ta, a ruk tak chuan DEborah-i chuan Sawibuang khuaa han zin leh chu a zuam tawh lem lo a ni. Mahse a cousin leh a thian kawm ngeih ber ni bawk Melinda-i chuan a ti lui tlat mai si a, a hnial hreh bawk si. Kar 2-1 vel cham tur chuan ruahhmanna an siam fel ta a, an zin hma ni chiah a ni.
Thawmhnaw vel khung fel mawlh mawlh pah chuan DEborah-i chuan a melh ngai hi a melh reng a, Melinda-i titi bawrh bawrh pawh chu ngaihsak hmel pawhin a lang lo. Melinda-i chuan ava en a, Deborah-i lo ngawi ngul mai leh amelh ngai lo melh reng a hmuh chuan a titi lai pawh chu a tawp ve hmak mai.
A darah chuan ava sawi a, "Hey...enge i ngaihtuah a?" a han ti chu a lo phu nasa kher mai. "Ui, min ti phu alawm." a ti vin deuh hlur a. "Enge i ngaihtuah vung vung a? Ka thil sawi kha i ngaithla miah nange?" tiin Melinda-i chuan a zawt a. "Ihh...englo, ngaithla e...enge i sawi khah?" a ti bah nuai mai.
"Huiham, enge i ngaihtuah a?"
"Engmah....sawi zel rawh."
"Sawi phawt rawh, i phu nasa em em lehnghal a...enge i ngaihtuah?"
"Englo...diktak chuan ka rilru a nuam lo a.."
"Engchuan maw i rilru ti nuam lo?"
"Victor-a."
Melinda-i chu a thaw hak a, "Enge maw Victor-a i tih reng le? Kum nga aliam tawh, a thi daih tawh ang. Ka ning, zin i ti chakawm loh vek." a ti hlur mai. "Ka tawn ang kha i tawng ve lova, ka hma zawnah ngei khan tlanbo pui turin min sawm a. Tualthattu ber ani tih hriat ran phei chuan e, hlauhawm tak a ni." tiin a aw pawh chu ala khur thei hial.
Melinda-i chu a ngawi vang vang a, "Kan zin leh lo mai dawn em ni?" a han ti deuh hmuk a. "Mahse, ticket kan book vek tawh a. Pawisa pawh kan pe lawk tawh a, a chilo emai." Deborah-i chuan a lo ti a. "Chuti chu sawi sawi tawh suh...awm i ti nuam lo." tiin Melinda-i chuan a vin deuh vak a.
Inthlahrun hmel tak hian Deborah-i chuan, "Ummm kan zin dawn lawm, ka sawi tawh lovang." tiin a nui lui sak a. MAhse Melinda-i erawh a la lungawi lo, an han inthlem leh rih a. An in thlem lungawi hnu chuan, "Naktuk zing dar 6 ah kan chhuak dawn sia, zanin chu kan mu hma dawnnia." Melinda-i chuan a ti a.
**************************
Rachael-i air-bag vel te chu Sumo ah chuan Zuala chuan a han hlanpui zung zung a, "Ka ngai dawn hle mai che, keipawh ka lo zin vat ang." tiin Zuala chuan Rachael-i kutah chuan a vuan a. Rachael-i pawh chu a hnuk a ulh a, "Umm, kan thlen veleh ka lo be dawn che nia." tiin a chhang a.
"Tluang taka in thlen theih nan ka lo tawngtai pui ang che, in thlenna chin apiangah signal a awm chuan min rawn chanchin min rawn hrilh zel la." tiin Zuala chu a han nui lui suk a. Rachael-i pawh chuan nui seih chung hian, "Tehreng mai, nangpawh ilo kal hun ka lo nghak reng ang." tiin a chhang let a.
Motor chhungah chuan a lut a, "Anih leh phawt aw...RAchael." tiin a kutah chuan a vuan leh a. ZAwite hian a beng bulah chuan, "Ka hmangaih che." a ti sap a. Rachael-i pawh chuan a lo nuih let a, "Keipawn ka hmangaih che." tiin a chhang let ve a. Motor a tlan liam thleng chuan Zuala chuan a en ngawih ngawih a, a mittui chu a hru a hru bawk a.
Thla 5 liam ta a an thil tawn rapthlak tak atanga an tlanchhuah dun hnu khan Rachael-i leh Zuala te hi an inngaizawng ta daih a, a hma kha chuan induhna chhe te mah an nei ngai lo. Ahma lama kan sawi tak ang khan Zuala hi Thenzawl khua a ni a, a unaunu thih hnu khan Thenzawl ah a haw ta a ni.
An exam result a lo chhuak a, Zuala pawh a pass ve ta hlauh kha ania. Mahse Aizawl lamah erawh a kal leh tawh ngailo, a pass chhuah hnu pawhin engmah a zir zawm ta lo a ni. Mahse engemaw tal tih leh a duh a, chuvang chuan a nau vanga a tawrhna te chu a reh chian hunah, a inpeih thlap hunah Aizawl lama kal a, lehkha zir zawm leh chu a la tum fan tho a ni.
Rachael-i hian Thenzawl lamah chhungte a nei bawk a, a ni(aunt) te an ni. Zuala nen an inngaihzawn hnu deuh khan exam chawlh lai ala ni bawk nen, Zuala bula awm a thlahlel ve bawk nen, ani te bula awm tur chuan Thenzawl a zin ta kha a ni a. Mahse tunah erawh a haw a hun leh tawh bawk si, an lung a leng dun khawp ang le.
************************
SAwibuang Police Station kawtah chuan Inspector Awmpuia chu a vei vut vut a, meizial a zu khu luih luih bawk a. Chutih lai chuan SI Eric-a dawr kal lo let leh lam chu lo ko dingin,
"Eric...lo ding lawk teh." a ti a. Eric-a chuan, "Enge ni, Sir?" a lo ti vat a. "Naktuk kha i day off tiraw?" tiin a han zawt a.
"Aw ni e, tinge?" tiin a lo zawt let a. "Tih tur pawimawh i nei em?" a han ti leh te te a. "Neilove, Sir....enge ni ta?" a lo ti leh a. Awmpuia chu a ngawi vang vang a, "Tih tur pawimawh i neih loh chuan luiah kal ang hmiang, i peih em?" tiin a han sawm a. Phur tak hian Eric-a chuan, "Peih e le, a lum si...kalpui tur awm se ka tih lai tak ania." a lo ti hlauh mai.
"A that chu, zu leh sehhmeh vel chu ka tum vek ang." a han ti phei chu Eric-a chu a phur ngei mai. "A va tha dawn em, chaw kan fun bawk anga. Lui kal ka chak lai tak a lo nia, khawi luiah nge kan kal ang?" tiin a han zawt leh a. "Ka hre lo, zaninah ka lo hrilh chiang dawn che nia." tiin Awmpuia chuan a chhang a.
"Mahse Sir, ngati teh thut nge a?"
"Aa..kal ka chak mai mai. Nangmah lo chu midang ka kal pui peih hlawm bawk silova, ka ring dawn che ania aw..."
"Awle...dar engzat velah nge kan chhuah ang."
"Chungte chu zanah kan sawi dawnnia, i hmanhmawh tut tut emai." tiin Awmpuia chu a han nui huah huah a. Chutah a ngawi deuh vung vung a, "Kha misual Victor-a kha han hmu thut mai ila, naktuk kan lui kalna turah chuan lo awm nghe nghe se ania ka tih ni.." a han ti deuh khur khur a.
ZA lo tak hian Eric-a chu a nui suk a, "Victor-a i hmuh i rin vang hi a nilo maw?" a han ti zauh va. Awmpuia chuan, "Enga? Teuhlo...aa..ka han sawi vel mai mai mawle." a lo ti bah nuai a. Erica chu a lut a, Awmpuia erawh pawnah chuan a la ding reng a. A meizial zuk leh hlat hlat pah chuan zawite hian, "Han hmu thut mai ila aw.." a han ti leh hram a.
**********************
MSa chuan a nupui Sangtei, an kawtzawla a melh ngai melh renga thu vung vung mai chu a va en a. Sangtei hmel chu a han en vang vang a, hlimlohna riau a nei tlat hian a hria a. Sangtei leh Msa te hian fa kum 7 mi leh kum 4 mi, mipa ve ve an nei tawh a ni. An fapa upa zawk hming chu Johnny-a a ni a, a naupang zawk hming chu Tluangtea a ni.
Msa chuan a nupui chu ava pan hnai a, "Enge i ngaihtuah a?" tiin a dar ah chuan a va vuan a. Sangtei chu a lo phu zuk mai, "AWi, min ti phu chiang lutuk." tiin za lo deuh chuan a nui suk a. Msa chu a bulah chuan a thu ve a, "Mawh..enge i ngaihtuah a?" tiin a han zawt nawn leh a. "Engmah nilove." tiin a lo chhang mai a.
"Sangte, i pasal ka nih hi...i rilru a nuamlo tih ka hrethiam vek alawm. Enge a chhan min han hrilh ve la, ka pui dawn che alawm."
"Aaa...thil engemaw tullo deuh deuh hi ka ngaihtuah chhuak leh thin a, chuvang mai mai chu mawle."
MSa chu a ngawi vang vang a, "Hmannia ka mumang chungchang ka hrilh vang che kha ani tiraw?" a ti ta mai a. Chuveleh Sangtei pawh chu a meng kawk mai, "Aih nilo." a ti hmuk a. Mahse thutak zet hian Msa chuan, "Ani tih ka hria, nangmah ang chiah khan keipawh hi ka rilru a hah ve tho asin." a tih lai chuan Sangtei chuan a lo khap vat a.
"Duhtawk rawh...chulam ka ngaihtuah lo." tiin a lu a dawm vawng vawng a, rilru hah hmel tak chuan a han thaw leh deuh hak thin a. Inthiamloh hmel tak chuan Msa chuan akuah a, "Awle...ka sawi tawh lovang. Naktuk chu inrinni a ni bawk a, lui kal ang hmiang." tiin a han sawm a, "Ka peih lo." a lo ti leh hmuk mai.
"Awww...i rilru hah tih ziaawm nan kan chhuak thawveng ve ang chu. Duhleh ka u te nupa kan sawm bawk anga, i chak ve lo mi?" tiin a han zawt leh a. SAngtei chu a ngawi vang vang a, "KA hrelo...nia kal chu ka chak reng. Mahse naupangte hi..engtin nge niang?" tiin a han zawt leh a. "AWww...ka nu te an awm alawm. Hruai chi an nilo, ka u te nupa nen, kan nupa nen, kan pali in kan kal dawnnia." a han ti leh a.
"Nia, a tha lawm. Khawi lui ah nge niang?" tiin Sangtei chuan a han zawt leh a. "KA hrelo, ka u hian lui chu a hre hnem zawk ang. Ka u kan zawt dawnnia, keipawh ka kallohna arei tawh bawk a, ka kal chak alawm." tiin Msa chuan a chhang a. "I ruih vaih.." tiin Sangtei chuan a han melh rum der vel a, an nui dun bawk bawk a.
**********************
Pu Sanghluna chhuak tur lo insiam mawlh mawlh chu a unaupa fapa, Rinsanga chuan ava hmu a. Rinsanga hi Angel-i cousin a ni a, mahse Angel-i nen khan an innel lutuk lemlo. Ramdanga awm char char a ni a, Angel-i abo lai pawh khan lehkha zirin ramdangah a awm a ni. Angel-i a bo hnu khan Pu Sanghluna hian a fanu chu nitin mai a zawng thin a, kum 5 chhung tehmeuh chu a zawng tawh a ni.
Rinsanga hi Pu Sanghluna te inpiah lawkah hian an awm a, Pu Sanghluna hetia a fanu bo zawnga mi a ang maia a chhuak a chhuak thin hi Rinsanga nu leh pate rilru ti hah leh ti mangang tu ber a ni. Eng ang pawhin hrilh nasa mah se, Pu Sanghluna chuan a ngaithla duh thin si lo.
Chuvang chuan Rinsanga hian theih tawpin a veng a ni deuh tawp mai, mahse a sawt lutuk chuang lo. "Ka pate, khawnge i kal dawn?" tiin ava zawt a. "Vawiin chu lui lamah ka han zawng teh ang, zan hnih khat vel chu ka riak bawk ang." tiin a lo chhang a. Rinsanga chu a thaw hak mai, "Ka pate, duhtawk tawh rawh ka tih kha." a han ti deuh hlur a.
Mahse Pu Sanghluna chuan awlsam te hian, "FA nei ve la, i fa neihchhun chu bo ve ta se...i hrethiam chauh ang." tiin a lo chhang hmak mai. Rinsanga chu a ngawi vang vang a, "Min lo nghak rawh..ka lo kal ve dawn." a ti ta mai a. "Eng a? Enge i rawn tih ve anga?" tiin a zawt hu mai.
"Lui kal ka chak alawm, ka kal ve dawn a ni tawp mai. Ka insiam chhungin lo kal suh ang che, chaw te ka va fun ve nge.." tiin an inlam ah chuan phei leh a tum a. "Bawiha, i lo kal ve dawn tak tak ami?" tiin Pu Sanghluna chuan a han zawt leh hram a. "Aw..kal dawn, min lo nghak ang che." tiin an in lamah chuan a let leh ta a.
**************************
Angel-i chuan a ti lui deuh nge mawni, thlam chhuatah chuan a sexy thei ang tur ber chuan a han thu duhdah sawt khawp a. Tleirawl ta na na na chuan chutianga nula, an mahni aia upa deuh hret lehnghal, hmeltha leh itawm em em mai, taksa lang tam thei ang bera a han thu kawisawi vel chu Issac-a. Siama leh Hruaia te chuan an hmuh hmaih hauh lo.
Chutia an bialnute hmuh hlau tak si a Angeli mal leh a ke vel an lo melh ru zeuh zeuh chu an bialnute chuan an hai bik hauh lo, Angel-i chu Hannah-i te thian pathum tan chuan hnawksak tak a ni. "Thlamah hian i riak ve a mi?" tiin Jenny bawk chuan a han zawt leh a. "Riak love, tukin zing khan ka kal a...sawlai deuhah sawn huan kan nei a.." tih ringawt chuan a lo chhang leh a.
Siama chuan, "Anih chu mawle...hei keini pawh zanin riah a, naktuka haw lehnghal turin kan lo kal a. Nidangah pawh he luiah hi chuan kan kal fo va, hemi thlamah pawh hian kan riak nghal mai zel a. Tuman min hau ngai lem lo bawk a, a neitu i ni emaw kan han ti thut mawle." tiin a han nuih tlawn vel a, LAwmi chuan a lo melhrum kher mai.
Angel-i hmel chu damdawi rui a ang takzet, chung tleirawl hote chu melh pawh a melh tha peih lo tih tur khawp chuan a meng diar diar mai. A thle deuh ngawih ngawih bawk a, chung ringawt pawh chuan Issac-a te thian pathum mit chu a tih tlai phah kher mai. "Nilove, engatan mah min ngai suh u. Ka haw tep, ka chau deuh a....ka thu chawl lawk mawle." tiin a han chhang leh a.
"Lo tel ve zawk la.." Issac-a'n a han ti zauh chu Hannah-i chuan a sik vak a, Issac-a pawh a phu zawk mai. Angel-i chu a nui suk a, "AAa...ngawi teh, in kawm rual pawh ka ni ve lo keichu..hehe, tui ka zu cheng leh zawk ange." tih pah chuan muang chang chuan a tho va. A rui tih hriat tak hian a kal pai deuh chhut chhut a, a tlu tep tep mai.
Kawngka bul ava pan lai chuan a ding nghet zo talo, a tlu tur chiah chu rang em em hian Siama chuan ava man bet hman a. Angel-i chuan ti lui tih hriat tak hian a hnute chuan Siama kut chu ava nawk deuh hram a, hmeichhe ho erawh chuan an hmuh hmaih lo chu thuhran, Angel-i chuan a ti lui tih chu an hai mawlh lo.
A bik takin Siama bialnu Lawmi phei chuan a haw takzet, chutah Angel-i lah chuan Siama chu a kuah deuh ang thuak thuak lehnghal. Hnai takah hian Siama chua en a, "AWii..tihpalh aw...avan zahthlak tak." a han ti vela, Siama zawk pawh chu a lai lek lek mai. Pawnah chuan a chhuak a, lui lamah chuan a phei ta a.
*************************
TO BE CONTINUE
Comments