ONCE UPON A TIME IN MIZORAM : SEASON 3 (Mizo zombie horror story) Written by : Aaron Malsawmdawngzuala Episode 2 : The Price of Mercy

 ONCE UPON A TIME IN MIZORAM : SEASON 3

(Mizo zombie horror story)

Written by : Aaron Malsawmdawngzuala

Episode 2 : The Price of Mercy

***********************************************************

Awmpuia chu lei diakah chuan dîm baksak lovin an hnûk chhuak dawr dawr a. Khunsanga'n a hmaia a chhuihna vâng khan a lu a nâ in a hai muai muai a, a khawhmuh te chu a phe ruai bawk a. Hrui lian leh nghet taka phuar a nih miau avângin ṭan khawh ngaihna a awm lo, Burma tlangval pahnih lian pui pui te chuan sakhî nungdama an man ang mai hian an pawt kal dawt dawt a ni ber e.

Kudam thim tak aṭanga pâwn êng an thlen chhuah rual chuan, nî sâ in a rawn chhun a, Awmpuia chuan a mit a chhing sawk a. A rawn fiah ṭan a, thei leh thei lova a han hawi kual chu an awmna hmun vel chu a hmu fiah ta ruai ruai a. Hri kai ho rawn kal theih lohna tûrin ramhnuai pilril takah hian Khunsanga te pawl chuan ralthuam ṭha pui pui kengin 'camp' lian ve tak hi an lo siam reng mai chu lo ni in! 

An vêlah chuan sipai inthuamna ang deuh rawn inbel, mi sawm panga (15) dâwn lai hi an lo vei suau suau a, thingtuai hmanga dai an hung kual te leh ralvenna sâng tak an lo siam te chuan an inbuatsaih ṭhat zia a târ lang chiang hle. A hnung lawkah chuan ṭap thâwm a rawn ri tel bawk a. 

Awmpuia'n thei leh thei lova a han lehhawi chu, kudam chhûnga an phuar beh ve, hmeichhe pahnih te pawh kha misual ho chuan an rawn hnûk chhuak ve dawr dawr mai! Chung hmeichhe pahnih te chu hlauh luat vângin an ṭap pûr a, an bân an phuar sak tlat bawk si nên  an khûr hlawk hlawk hmel chu hmuh a hrehawm takzet.

"Kha laiah khan, motor bulah khan theh thla rawh u!" Khunsanga aw thûm chher chher in thupêk a rawn chhuah rual chuan, Awmpuia chu leicharah an theh thla nghal dâwp a. A nâk hliam chu a rawn thîp leh zawk a, a pêm aṭang chuan thisen a rawn chhuak leh ṭiam ṭiam a. Khunsanga chu a rawn pên hnai a, Awmpuia bulah chuan rawn ṭhu hniamin ngeiawm zet hian a rawn nui a. 

A ipte aṭang chuan chemte hriam hmel zet hi a rawn phawrh chhuak a. Awmpuia chuan thâwk a la hrawih hrawih a. Ramsa kawlh leh thluak nei lo, hri kai ho ai mahin, hêng mihring ralthuam ṭha tak keng leh mahni hmasialna vânga rawng taka che hreh lo te hi an hlauhawm zâwk dâwn tih a hrethiam ta nghal a.  

Mahse tlawm a tum hauh lo, "I duh duh chu ti rawh... Lungthlir i pan dâwn a nih chuan, i thihna hmun tûr i pan dâwn tihna a ni mai." tiin a kâ aṭanga thisen chhak chhuak pharh pharh chung chuan Khunsanga chu a lo ṭawng khum ve ngat a. Khunsanga chu a thinrim hauh lo, ngeiawm takin a nui chhuak hawk hawk a. 

A chemte hriam tak mai chu nî êng chuan a rawn chhun tle set set a. "Tlangval huaisen tak i ni. Mahse, huaisenna ringawt hian he khawvel thar, dan leh dun awm tawh lohnaah hian thihna bak a thlen ngai lo." a ti dam thlup a, a aw vawt ruih mai chuan tiril a ti khûr thei hial awm e. A chemte hmawr zum tak chuan Awmpuia nâk hliam, thisen chhuak ṭiam ṭiam lai chu dîm lo zetin a va thai kual sak a. 

Awmpuia chu a nâ tuar a inpetruh nghal ṭeuh a, a hmai a sen awp awp bawk a. Khunsanga chuan, "Lungthlir chu kan pan dawn ngei mai. Chuan nang hian min hruai dawn bawk. Khama leh Luna te ralthuam thuhruk zawng zawng kha ka ta tur a ni." a ti chher chher a. Khama leh Luna hming a hriat rual chuan Awmpuia chuan tute nge an nih a hrethiam nghal, an hming hre lo mahse a hma a anmahni rawn tibuai tu leh Pi Kungi thattu ngei te kha an ni tih a hrethiam nghal vek a. 

Khang misual pahnih vâng khan an ṭhianho in natna tam tak an tuar tawh tih a hria. "Khama te chu an thi tawh... in tlai tawh lutuk. An ralthuam chu tuman an hmu tawh ngai lovang." tiin a lo chhang lêt ve leh ngat a. Khunsanga hmel chu a rawn rum nghal ul a. "Ka hria e, an thi tawh tih chu. Mahse an thil neih te kha a riral ve ngawt dawn lo. Camper pui pakhat, ralthuam a khat a awm tih ka hria a, chu chu ka duh a ni." tiin Awmpuia kâwr âwmah chuan a ṭhâm a, theihpatawpa dimlo hian a pawt kâng deuh lawp a. 

"Khawiah nge an thuhruk?" a ti leh hrawk a. Awmpuia chu a ngawi tlat a, a mitah tak chuan hlau miah lovin Khunsanga chu a melh lêt rân a. A chhân dâwn loh zia a hmuh chuan Khunsanga chu a thaw hak a, Awmpuia chu a thlah a. A sir lawka hmeichhe pahnih, chhuata bawkkhup chunga hlauh vânga lo khûr hlawk hlawk te lam chu a hawi phei ta daih a.

"Hêng hmeichhe pahnih te hi an ṭangkai na êm êm ka hre lo ve, zaninah hian ka naute ho tisa châkna hrîk thlâk nan ka hman tir mai dâwn em niang aw..." tiin Khunsanga chuan ngeiawm lutukin a vau ta mai a. Hmeichhe pahnih te chu an ṭê chhuak ṭhawt a, ṭap chungin an lu an thing nghal nawk nawk a.

Chu thu râpthlâk tak a hriat chuan Awmpuia chu a theihpatawpin a rawn tâl phut a, mahse nghet taka phuar a nih miau avângin a hlawhchham chiang kher mai. "Tenawmpa! Mipa i nih chuan keimah chauh hi min hmachhawn ta che! Hmeichhe pawisawi lo lakah tuan suh!" tiin theihpatawpa ringin a an khum vak vak a.

Khunsanga chu a nui sak a, "Mizo tlangval te hian in hmeichhiate in ngaihsak tih ka hria alawm. A ṭha e, thutlukna chu i kutah a awm ta. Khawiah nge Camper chu a awm min hrilh la, heng hmeichhia te hi ka chhuah zalên ang. Nge ni a, i ngawih tlat vângin an chunga thil râpthlâk tak thleng lai i thlîr liam zâwk dâwn?" a ti leh a.

Awmpuia thluak chu a buai nghal vek mai. Dâwt tlang tak a sawi chuan he ralthuam tawlhru misualte hian a man chhuak nghal dâwn tih a hria. Hun a mamawh a ni. Sawmtea te'n eng ruahmanna emaw tak siamin an rawn ûm zui ngei dâwn tih a beisei tlat a ni. "Lungthlir khuaah a awm lo..." Awmpuia chuan a ti chhuak ta hlawl a.

Khunsanga chuan mak tih hmel takin a melh chhuk rûn a, "Sawi zawm rawh," a ti bung nghut a. Awmpuia chuan thei leh thei lovin thâwk a la hrawih a, "Sihpui mual lamah... cement in ruak hlui tawh tak pakhatah thuhruk a ni. Mahse chabi erawh chu ka kawl lo, khawi ah nge a awm ka hre lo," tiin dawt a sawi ta ringawt a, a nihna takah chuan ralthuam chu khawi laiah nge thuhruk a nih a hre lo hrim hrim.

Khunsanga chuan a chemte chu muangchângin a ipte ah a thun lêt leh a, a mitmeng chu a fîm kher mai. "Sihpui mual... A ṭha, chulai hmunah chuan min hruai ang. I thu sawi hi dâwt a lo nih vaih chuan, nangmah mai ni lo, i hmaah ngei hian hêng hmeichhe pahnih hi hri kai chaw atan ka theh thla ang." a ti khûr khûr a.

Khunsanga chu a ding chhuak vut a, a naute ho chu Burmese ṭawngin a au nghal a. "Insiam ru, kan chhuak dâwn! He pa hi hruai ula, hêng hmeichhia te pawh hi rawn hnûk kal ve rawh u!" tiin thu a pe ta hmak hmak a. Awmpuia chu lei charah chuan a mu hlawm reng a, a ruahmanna chu a theih ang tawka fing ni mah se, Khunsanga te rual ralthuam nêna inthuam hi a ṭhiante lo nghah mekna cement in ngeiah chuan a hruai lût dâwn tih a hriat avangin a chhungril chu a thlaphâng ru takzet a ni.

*************************************************************

Cement in hlui chhuat awng aṭang chuan Sawmtea, Zothana, Zauva leh Renga te chu theihpatawpa thâwm dîm hian an tawlh thla a. In hnung lam ramhnuai hnim pik leh thim mup hnuaiah chuan an chhuak phei ta a. Ngaw pui boruak chu a uapin a reh vawng vawng a, hri kai thâwm hriat tûr rêng a awm lova, mahse chu ngaw pui reh thap mai chuan an ngaih a ti ṭha thei chuang hauh lo.

Zauva chuan hma a hruai a, a thiamna zawng zawng sâwm khâwmin leichhuat chu a bih ngun hle. Thim tham kârah chuan Awmpuia thisen far tharlâm tak leh, mipa rual pheikhawk lian pui pui hniak tharlâm tak te chu theih ang angin a chhui zui zêl a. Hêng mite hi ralthuam ṭha tak kêng, mi hlauhawm tak an ni tih an hriat chian avângin fimkhur takin an pên a.

Sawmtea chuan a kuta a 'revolver' hûm lai chu a hum nghet sauh sauh a. A silaimu neih zât chu a rilru in a chhiar thar leh a, thelh thiang a ni lo tih a inhre chiang hle. A farnu Hlimpuii leh a ṭhiante dang in chhûnga a kalsan tâk te kha ngaihtuah viau mah se, anmahni chhan nâna a nunna thâptu Awmpuia nungdama chhanchhuah chu a tih tûr dik tak a ni tih a hria.

A sirah chuan Renga pawh inpetruh ṭeuh in a chempui lian leh hriam tak chu a lek kâng deuh uaih a, engpawh tâwk se hmachhawn tûrin a inpeih at reng bawk a. Zothana erawh chuan hmalam leh hnunglam thlîr kawpin a ṭhiante chu a vêng thung a. Tumah ṭawng rî lo mah se, an inmelh kual dân aṭang ringawt pawhin hnungtawlh tum an awm lo tih a hriat theih hle.

Chutia ngawi reng leh thâwm dîm taka an hnu chhui an kal zêl lai chuan, Zauva chu a awm hmunah a ding chawt a. A hnunga mipa pathum te chu hnungtawlh tûrin a bân a phar chhuak nghal vat a. An hma lawk hnim bûk phên aṭang chuan hnah ro pal ri rawp rawp thâwm leh, ramsa rûm ang maia thaw ri chher chher thâwm a rawn chhuak ta thut mai!

Sawmtea chuan a revolver in thâwm lo chhuahna lam chu a tin nghal vat a. Chutih lai tak chuan, thim kâr aṭangin hri kai pakhat, thisen kai hnuang leh chil phuan tla bawrh bawrh hi anmahni lam panin ramsa kawlh ang maiin a rawn dâwk chhuak ta thut mai le! Sawmtea'n a silai kâu a hmeh puah mai a tum lai tak chuan Zothana chuan a bânrekah a rawn man chawt a.

 "Kâp suh... thâwm kan siam thiang lo." tiin theihpatawpa zâwi hian a lo hrilh ru hman hlauh a. Silai ri an hriat chuan an hnu chhui mêkte khân anmahni ûm tu an awm tih an hre dâwn tlat a ni. Silai hman theih a nih tak lohah chuan, Renga chu a rawn pên chhuak nghal vut a. Hri kaiin a rawn zuan dâwn chiah tih ah chuan theihpatawpa nâ in a chempui chuan hri kai lû ah tak chuan a lo sât ri nghal pawp a. 

Hri kai chu a zâwi nghal hnawk a, dîm takin chhuatah a bawh thlâk pui nghal a. Hri kai ruang an hnuh sawn hnu chuan hmalamah an pên leh ta a. Ramhnuai thengthaw deuh hlek an va pawh chiah chu, an thil hmuh avângin mak tiin an ding leh chawt hlawm a. Leiah chuan hri kai sawm dâwn lai ruang hi a lo let phung a, a piah lawkah chuan Awmpuia thisen chhuak thahnem tak a lo far kual nûai bawk a.

Zothana chuan ruang pakhat chu a va en hnai a, hri kai lû a silaimu luhna kua a hmuh chuan a meng fiah nghal kâwk a. "Hêng mite hi mi naran mai mai an ni lo. An hri kai thah ho hi an lû-ah tak an kâp fuh vek... ralthuam changkang tak leh hmang thiam tak an ni ngei ang." tiin thutak zet hian a sawi a.

Sawmtea chuan leichhuata thisen leh kehniak te chu a melh ngar ngar a. A revolver hûm lai chu kekawr ipteah thun ṭhain, "Tute pawh nise kan va ûm phâk a ngai. Awmpuia an thah hma ngeiin kan nangchîn dâwn nia. Zauva, hma hruai zêl rawh le." a han ti chang fak a. Tichuan, mi hlauhawm tak tak te lakah an ṭhianpa chhanhim tûrin mipa pali te chu thihna rûamah chuan an lût thûk ta zêl a.

***************************************************************************

Ngaw pui chhah leh thim hnuaiah chuan Awmpuia chu thei leh thei lovin a kal hnak hnak a. Khunsanga leh a naute, ralthuam tha tak keng ho chuan an hual kual ṭhap a. Hrui a phuar a nih miau avangin a kal chak thei lo, mahse a thluak erawh a hmang tangkai hle thung. Awmpuia hian Sihpui mual cement in pan tur angin insawi mah se, a rukin kawng diklo lamah a hruai kawi kual vel mai mai tih reng Khunsanga te chuan an hre lo. 

Kalkawng tha leh zâwl lai deuh awm rengah, hnim pik leh kawng chho thengthaw lo deuh hlekah te chuan a kalpui lui tlat a. A chhan chu thil pahnih vang a ni. Pakhatnaah chuan theih ang anga hun khawhral a tum a, pahnihnaah chuan Sawmtea ten an rawn zawng ngei dawn tih a hriat chian em avangin a hnuhma an chhui awlsam nan hnim te chu a pal bel lui zel a, a nak hliam atanga thisen far pawh hnim hnahah a theih ang angin a tat kâi zel bawk.

Mahse chu a thil tih chu a taksa in a tuar phah nasa hle. A nak hliam aṭang chuan thisen a rawn chhuak deuh reng a, a kal zawng te chuan a thip in a na ngut ngut zel a. A chau tawh lutuk chu a tlu leh hnawk ṭhin a, mahse Burma tlangval pahnih te chuan dimlo baksak hian an rawn pawt tho leh lawp ṭhin a.

An hnunga rawn kal ve zel, hmeichhe pahnih phuar beh te pawh chu an chau tawh takzet. Hnim hriam leh ling te chuan an ke leh ban a tai thi neuh neuh a, an ṭap deuh par reng mai. Awmpuia chuan chung hmeichhia te chu a lainat hle a, mahse a chhan theih rih tlat si loh avangin a hawisawn san leh thin.

Darkar chanve dawn ramhnuai thengthaw lo taka an kal kual hnu chuan, Khunsanga chu a ngaih a ṭha ta vak lo. Ramhnuai pilril lutuk leh kawng mumal awm lohna an pan zel mai chuan rinhlelhna a siam ṭan ta tlat mai. "Ding lawk ru!" Khunsanga chuan a rawn ti thawt a. A naute chu an ding nghal thap a. 

Khunsanga chu kur kuankuah hlun chungin Awmpuia hmaah tak a rawn phei a, a mitmeng chu thinrimna leh rinhlelhna in a khat a. "He kawng hian khawi nge a pawh dawn? Cement in lian tak awmna awm pawh a la nih loh hi?" tiin Khunsanga chuan a zawt bung nghut a. Awmpuia chuan a thiam ang tawka inthup in, "Sihpui mual pan theihna kawng tawi zawk a nih hi. Hri kai an tlem deuh bawk." tiin a lo chhang a.

Mahse Khunsanga chu ramhnuai pilril a vâk kual tam tawh a ni a, bum mai mai chi a ni lo. Awmpuia hnunga thingtang tliak thar lam tak te, hnim hnah a ruka a thleh kawi vel te leh, thisen far kual vel te chu a lo hmuh hmaih lo chiang kher mai. Awmpuia chuan a bum a ni tih a hrethiam ta. 

Khunsanga chuan a kut tum lian pui mai chuan Awmpuia hmaiah tak a hnek ta pawp mai le! Awmpuia chu leiah a tlu thla nghal hnawk a, a lu hai lutuk chu a hmu phe nghal ruai a, a kâ aṭangin thisen a rawn chhak chhuak nghal pharh pharh bawk. "Min bum theih i ring em ni, Zawnga? I hnuhma chhui turte zawngin i lo theh kawi vel tih ka hre lo emaw i ti ami!" Khunsanga chuan a ti vin hrawk a. 

A rawn kun hniam a, Awmpuia kawr awmah tham in a pawt kang leh lawp a, a pum ah tak chuan a chhuih leh nghal pawp a. Awmpuia chu nâ tuarin leiah a vial ngawih ngawih a. Hmeichhe pahnih te chu hlauh luat vangin an ṭe chhuak ṭhat a. Burma tlangval pahnih te chuan silaiin hmeichhia te chu an lo tin nghal vat a. "Ngawi hmak ru!" tiin an lo vau ve mek bawk.

Khunsanga chuan a ipte atangin chemte a phawrh chhuak leh ta. "Ralthuam chu khawiah nge a awm ka hriat theih i ring lo tak tak a ni maw? A tha e, i tangkai tawh lo bawk a, hetah hian ka that law law teh ang che." tiin Awmpuia nghawng ah chuan a chemte chu a va tin ta uaih mai! Chutih lai tak chuan, thlang lam hnim pik kar aṭang chuan hnah ro pal ri a rawn ri ta hrâwk a!

Awmpuia te an inbeih buai lai leh hmeichhe ṭe thawm in ramhnuai a luah khah mek lai khan, an hnunga hnu rawn chhui tu te chu thâwm dîm takin an lo thleng hman der tawh chu niin. Thingkung lian pui phen atang chuan Sawmtea chu a rawn dak chhuak a, a revolver in Khunsanga chu a lo tin rân tawh.  A sirah Zothana, Zauva leh Renga te pawh an ralthuam theuh nen, inring takin an lo awm ve mek bawk. Awmpuia'n hun khawhral a lo tum ve ṭang ṭang na chuan awmzia a nei ta.

***********************************************************

Sihpui mual cement in chhung uap churh leh reh tlawk tlawkah chuan Sawmtea te an liam hnu khan thla a muang thei tak tak tawh lo. Pu Rina chu in kil khatah a kut leh ke phuar behin leichhuatah a ṭhu sawp niai a. A tukhum, Puii'n brick hmanga a chhutna hliam chu a la na ngut ngut bawk a.

Rei fe an ngawih hnu chuan, Pu Rina chu a rawn dak chhuak a, ralthuam nena lo vengtu Pu Tea lam chu a melh tlawk tlawk a. "Pu Te... khawngaihin min phelh hram rawh. Puitling leh pa fing tak i nih kha. Khang thil ka tih chhan te kha chu he in chhunga mite him nan leh kan dam khawchhuah nan liau liau a ti ka ni asin. Min hriatthiam hram ka beisei, thianpa." tiin khawngaih thla la thei ang ber tur chuan a han ngen a.

Pu Tea chuan a silai hmawr chu chhuatah a nghat a, Pu Rina chu thutak zet hian a melh a. "I thil tih sual pawi zia hi i la hre lo a nih hi. Mi pawisawi lo nungdam tura i thah te, dawt hmanga min bum i tum te kha nangmah i dam khawchhuah nana ti vek i nih kha. Chuan, keimah ngawt chuan ngaihdam theihna che ka nei lo. Sawmtea thu thu a ni ang, a tello chuan kan ngaidam ve thei ngawt lo che." a lo ti hmiah mai.

Chu thu a hriat chuan Pu Rina chu a beidawn hmel kher mai. "Mahse Pu Te, Sawmtea te chu an rawn let tawh kher lo ang. Hri kai ho mai bakah misual rual ralthuam keng an hmachhawn dawn a, an thi vek tawh mai thei asin. Min phelh la, he in hi kan ven him a ngai. Engemaw thut a thlen pawhin silai hman dan ka thiam ber a, ka pui thei ang che u." tiin a phakarna hmang bawk chuan thlem a han tum leh hram a.

Valtea chu a insum thei tawh lo, a rawn pen chhuak vut a. "I kâ kha chip hmak rawh! Sawmtea te chu an thi lul lo ang. Nangni ang misual dawihzep, mahni sahim nan midang theh chhuak hreh lo hi chuan i thih hma chu dawt bak sawi tur i hre chuang lo. Sawmtea te rawn let hun chu lo nghak mai mai la, i phu tawk hremna chu a pe khawp ang che." a lo ti vin ṭhak a.

Kil khata hlauh vanga ngawi renga lo ṭhu ṭhin, Pu Rina lo thlawp em em ṭhintu Pi Dari pawh chu a rawn ṭawng chhuak ve ta. "Pu Rin, i thusawi awih khan kan lo thlawp ṭhin che a. Mahse i thil tih rapthlak tak tak te kan mit ngeiin kan hmu tawh a, tunah chuan tu man kan chhan tawh dawn lo che. I thusawi hi pakhata mah awih tlak a awm tawh lo." a lo ti ve hlur bawk a.

Mapuia phei chu a hming an lam tel ve hlauin bâng nghêng chuan a tawm chawih chawih a ni ber mai. Pu Rina chu a kun ngul a, a beidawng ta takzet tih a hmelah a lang chhuak tawh. Zela leh Chhingpuia te chuan Pu Rina chu theihpatawpa fîmkhurin an silai leh chempui nen an din hual ran a, tumahin khawngaihna chhete mah an lantir duh tawh lo. 

He tualthattu tenawm tak hian a thil tih sual man chu a la tuar ngei dawn tih an hre vek a ni. Pu Tea chuan in chhunga boruak ṭang lutuk chu tih zangkhai tumin, "Tuman a thu sawi kha ngaihsak a ngai tawh lo. Pawn lama kan ṭhiante him taka an rawn let theih nan inring takin lo awm zawk ang u. Awmpuia leh Sawmtea te hi tlangval huaisen tak an ni a, hêng misual lak aṭang hian an rawn let ngei ang tih ka ring tlat a ni." tiin hmeichhia leh naupang ho chu a hnem a. Tichuan, in chhung uap churh leh pik takah chuan an ṭhiante rawn let hun nghak chuan thla muang lo tak chungin an thu ngawi thap hlawm a.

*********************************************************************

Thingkung lian pui phên aṭang chuan Sawmtea chuan a revolver in Khunsanga chu a tin rân mai a. Ngaw pui reh tlawk tlawk kârah chuan silai kau ri 'khep' thawm chu a fiah tha kher mai. Khunsanga chu muangchangin a rawn hawi chhuak a, ralthuam in tin reng mah se a hmelah hlauh hmel a pu hauh lo.

"I chemte kha dah thla la, i kut phar rawh. Chuti lo chu i thluak kha helai hmunah hian ka kâp darh nghal ang." Sawmtea aw chu a vawt in a chang fâk a. Zothana, Zauva leh Renga te pawhin Khunsanga naute dang chu theihpatawpa inringin an silai leh chempui theuh nen an lo tin ve ran bawk a.

Khunsanga chu a nui hak a. "Mizo tlangval te huaisen zia hi chu ka lo hre fo tawh ṭhin. Mahse pali chauh in ni a, keini mi sawm panga kan ni thung. I silai hmeh puah rual rual khân in vaiin in thih phah vek dawn tih i hria em?" tiin a lo chhang lêt a. "Nang thah nan che hian silaimu pakhat chauh ka mamawh. A bak chu ka ṭhiante hian an chingfel thei em em ang." Sawmtea chuan a ti chang leh fak a. 

Mahse Khunsanga chuan a chemte chu leiah a theh thla a, a kut phar chhuak tûr awm taka a awm laiin, "Kâp rawh u!" tiin a naute chu Burmese ṭawngin a au ta thut mai. Inbeihna chu a inṭan ta! Sawmtea chuan a silai a hmet puak ṭhuai a, mahse Khunsanga a lo inveng hman hlauh a, a hnunga Burma tlangval pakhat awmah tak chuan a kâp fuh ta zawk a. 

Zothana leh Renga pawh chuan an ralthuam theuh nen thingkung phên aṭang chuan an lo kâp ve nghal zawt zawt a. Silaimu a leng fûa fûa a, boruak a buai ta nuaih mai. Khunsanga naute ho chuan an ralthuamin an rawn kâp let ve nasa hle a. Chutih lai tak chuan, phuar beh chunga lo bawkkhup hmeichhe pahnih te zînga pakhat, hlau lutuk thlaphang awm ngaihna hre lo tlân chhiat tuma rawn tho chhuak thut chu thil pawi tak a thleng ta!

Khunsanga naute zînga pakhat, silai rawn hmet puak pawp pawp chuan chu hmeichhia chu a dârah leh a âwmah tak a rawn kâp fuh ta siah siah mai le! A ṭê chhuak ṭhawt a, thisen per chhuaia leia a tlu thla hnawk chu Awmpuia leh a ṭhiannu chuan mangang lutukin an thlîr tlawk tlawk ringawt a. 

Chu nula chu a thâwk a zâwi nghal riai riai a, thawk leh khatah a nunna a chân ta der mai. Chu thil a hmuh rual chuan Sawmtea chu thinrimin a so bawrh bawrh a. Fimkhur pawh dâwn lovin thingkung phên aṭang chuan a rawn dâwk chhuak zawk a, a revolver in Burma tlangval pahnih chu a kâp thal nghal pawp pawp a. 

Mahse silaimu pakhat chuan Sawmtea dâr veilam chu a rawn tâi thi ve nghal hrawk a, nâ a tih em avangin a silai chu a thlauh ta phah a. Khunsanga'n Sawmtea silai tel lova a rawn dâwk phei a hmuh chuan ngeiawm zet hian a lo nui a, a rawn zuang tho ve nghal vut a. Mipa pahnih te chu an inbawhchilh ta! 

Sawmtea chuan theihpatawpa nâ in Khunsanga hmaiah chuan a hnek siah a, Khunsanga chu a pai deuh khut a. Mahse Khunsanga chu a palian in a tha a chak zawk tlat. Sawmtea'n a hnek nawn leh dâwn chiah tihah chuan Khunsanga chuan Sawmtea banah lo man in, a pumah tak chuan a khupin theihpatawpa na in a lo do ri nghal dawt a. 

Sawmtea chu a thingthi dawt mai. Khunsanga chuan dim baksak lovin Sawmtea chu chhuatah a theh thal thuai a, a chungah bawh betin theihpatawpa nâ in Sawmtea hmaiah chuan a hnek ta siah siah mai a. Sawmtea hnar leh kâ aṭang chuan thisen a rawn baw chhuak nghal zung zung a, a lû a hai in Khunsanga ramsa tha ang maia chak chu a hneh dâwn lo tih a chiang kher mai.

Mahse chutih lai tak chuan, Zothana leh Zauva te chuan Khunsanga naute chu an lo that hnem hman tawh hle a. Renga chuan a chempui nen Khunsanga hnung lam aṭangin a rawn pan phei den den a. Khunsanga'n a naute sawm panga te zînga pasarih (7) lai mai nungdam lova an let phung a hmuh chuan an dinhmun a ṭha lo tih a hrethiam ta nghal a.

"Lêt ang u! Hêng ho hi kan la hmachhawn leh khawp ang!" tiin Khunsanga chu a au tuar a. Sawmtea a chhuih zui leh pawp hnuah, a naute mi pariat la bâng te nen chuan hnim pik lam panin theihpatawpa chakin an tlân chhe ta huk a. Renga'n ûm zui a tum chu Zothana'n a lo dang vat a.

Inbeihna thâwm a reh meuh chuan hmun tin mai chu thisen hlîrin a khat a. Zauva chu Awmpuia bulah a va tlân phei a, mahse Awmpuia chu a mit a chhing chial a, a thâwk a zâwiin a thi lek lek tawh a ni. Chutih laiin an sir lawkah chuan, hmeichhe dam chhuak zâwk chu a ṭhiannu thi ta ruang kuah chungin a ṭap hawm hawm a. 

Chu ngaw pui reh leh thim mup hnuaia nula ṭap rî lungkuai tak chuan, Sawmtea te pali mipa huaisen inti ve tak te chu tlawm ngawih ngawih a inhriatna a pe hial a. Theih tawp an chhuah chung pawha chhanhim zawh loh an nei ta tlat mai chu a pawi an tiin, he khawvel tharah hian mithi tho leh rualte ai mahin, an mahni mihring puite ngei zawk hi ramsa hlauhawm leh nunrawng ber an lo ni tih fiah takin a nemnghet ta a ni.

****************************************************************

Sihpui mual cement in chhung chu a thim khup mai a, boruak uap churh leh pik tak hnuaiah chuan dam chhuak te chu thla muang lo takin an awm ṭhap a. Kawngkharpui lian tak bulah chuan Pu Tea, Valtea leh Hriata te chu an silai theuh hûm in an ṭhu khawm a, pawn lam thawm ngaichang reng chungin thutak deuh hian thil an sawi ho mek a.

Pu Tea chuan thawk lak hak pahin, "Nichina ngaw pui lama silai rawn puak ṭhuai ṭhuai thawm kha ka ngaih a ṭha thei miah lo mai. Burma ral dang an lo awm leh a nih phei chuan, ralthuam an nei tha thei ropui sia. Sawmtea te pali chauh khan an va hneh zo a ngem tih hian ka rilru a luah tlat." a ti zawi sup a. 

A hmelah chuan a ṭhiante a ngaihtuah zia a lang chiang hle. Valtea chuan a lo thlawp vat a, "Ni e, keipawh ka ngaih a ṭha lo khawp mai. Hri kai ho lakah chuan hlauhthawn tur a awm lutuk lo, ralthuam leh thluak hman vak ngaihna an hre lova. Mahse, tun ṭum ami te hi chu mihring fing, hun rei tak ral lo do tawh leh ralthuam nei ṭha an ni miau a. Engpawhnise, Zothana leh Sawmtea te hi tlangval huaisen tak an ni a, theih tawp chu an rawn chhuah ka ring tlat a ni." tiin beiseina nei takin a lo sawi ve a.

Hriata pawh chuan lungngaih hmel tak hian, "Awmpuia kha a chungah eng em thleng lo hram se ka ti ngawt mai. Keimahni min chhan nan a nunna thapin khang hri kai ho kha a tlan chhiat pui a, chumi hnuah misual kuta a va tang lehzel kha chu a lainatawm em mai." a lo ti ve sap a. An thianpa inpekna chu an ngaisang in, a dinhmun hlauhawm tak chu an ngaihtuah tlang hle tih a hriat.

Chutia Pu Tea te thian ho an inbiak melh melh lai chuan, in hnung lam kil thim deuh laiah Pu Rina chu a kut leh ke phuar beh tlat in leichhuatah a ṭhu kun ngul a. A sir lawkah chuan Mapuia pawh hlauh vanga ngawi reng leh tawm chawih chawih chungin bâng nghêng chuan a lo ṭhu ve mek bawk a. 

Hmeichhia leh naupang ho an muthlu deuh sap sap tawh bawk nen, in kil lama awm te chu tuman an ngaihven vak lem lo. Mapuia chu a ke kham lutuk siam rem tumin a tawlh hnung deuh hrut a. Chutah, a kut chuan thil hriam deuh tak mai hi a va khawih fuh ta palh a. A phu deuh zawk a, a kut han la sawnin a han bih chiang chu, darthlalang keh them, a tlang hriam hmel zet mai hi a lo ni a. 

Nichina buaina an neih laia an tih keh palh emaw, he ina a lo awm sa emaw a ni ngei ang. Mapuia chuan chu darthlalang keh them chu muangchangin a chhar vat a. A rilru ah chuan thil sual ti leh tur ang maia hlauhthawnna a rawn lut nghal. Hlauh hmel takin a rawn hawi chhuak a, a piah lawka phuar beh, Pu Rina lam chu a va melh ta a. 

Pu Rina pawh chuan Mapuia chet dan chu a lo hmuh hmaih bik lo, an pahnih chuan an in en ta kar mai. Mipa dawihzep pahnih te chu an inmelh tawn ta zak zak a. Mapuia chuan Pu Tea te titi lam chu a va melh phei zeuh a, anmahni lam reng an ngaihtuah lo tih a hmuh chuan a thla a muang deuh a. 

Zawi te in darthlalang keh them chu leichhuat, cement pial tha takah chuan a dah thla ta riai riai a. Thawm chhuah miah lovin Mapuia chuan darthlalang keh them chu Pu Rina awmna lam pan chuan chhuat hrulin a va nawr phei ta zeuh a. Darthlalang them chu chhuat zawlah chuan muangchangin a tleng phei a, Pu Rina hnung, a kut phuar behna bul chiahah chuan a va tawp ta chat a. 

Mapuia chu engmah ti lo ang maiin a kun leh nghal daih a. Pu Rina chuan a mit sir in darthlalang rawn tawlh phei chu a lo hmu reng a. Fimkhur lutuk leh hawi kual zawk zawk pahin, hnung lamah a kut chu a tiche a, darthlalang keh them chu a chhar fuh ta hlauh mai! A hum nghet sauh a, a kut hnung lama an phuarna hrui hrual chu thâwm dîm takin a zâi ṭan ta nghauh nghauh mai.

***********************************************************

Ngaw pui chhah leh thim hnuaiah chuan Sawmtea te pali leh nula la dam zâwk chu hahchawl turin lûngpui lian tak phênah an ṭhu khâwm a. Boruak a vawt in a reh ruih a, thisen leh thlan rim in a nam huam bawk. Chu nula chuan mittui la tling pam chung chuan Awmpuia thi lek lek, nikhawhrelova let reng chu theih ang angin a buaipui a. 

A kâwrhâk tlang chu pawt thlêrin, Awmpuia nâk hliam aṭanga thisen chhuak reng chu a theih ang tawkin a nem phui sak mawlh mawlh a. A piah lawkah chuan Zauva pawhin Sawmtea dâr hliam, silaimu in a taihna vanga thisen chhuak chu a lo buaipui ve mek bawk a. Tui thianghlim an neih chhun hmang chuan a hru fai a, dîm takin puan in a tuam sak a. 

Sawmtea chu mipa tuar chhel tak a ni bawk a, a pêm a thip em em chung pawhin han ṭhen deuh chawk chawk bak thâwm a siam lêm lo. A thluak erawh a vir vut vut reng a, an hun tawn mekin a zir loh em avangin a inring reng tho. Zothana erawh a ṭhu hahdam ve hman lo. Burma ral ho ruang let phungte chu fîmkhur takin a dap kual a, an ralthuam neih ang ang chu a khâwm mawlh mawlh a. 

Kum 1980 chho bawra ralthuam hmingthang leh ṭha tak tak—AK-47 silai hlui lam tawh te, SKS rifle te, leh sipai hman chi M-16 te chu leichhuatah a rawn dah khawm a. Hetiang ralthuam ṭha lutuk heng ral ho in an rawn keng chu mak a tiin, he misual pawl te hi mi narân mai mai an ni lo tih a hre chiang hle.

Sawmtea chuan a dâr tuam tu Zauva hnenah chuan lawmthu sawi nan a bu nghat a. Chutah, Awmpuia hliam hru fai tu, nula hmel dawldang leh thlaphang tak chu a va melh vang vang a. He nula hi a khawngaih rualin, tunge a nih tih leh heng khawchhak ral ho nen hian eng nge an inzawmna tih hriat chian a chak hle.

"Nula..." Sawmtea chuan aw thum leh dam dap hian a han ko va. Nula chu a phu deuh zawk a, hlauh hmel takin a rawn hawi chhuak a. "Hlau suh, kan tina dawn lo che a nia." Sawmtea bawk chuan a tih chhunzawm leh a, "Tunge i hming?" tiin a zawt ta a. Nula chuan a mittui chu a hru  a, a inhnit feih feih a. 

"Engi... ka nia. Lalengmawii." tiin zawi te, khûr dar dar chung hian a chhang a. Sawmtea chuan a lu a lo bu nghat a, "Khang khawchhak ral, ralthuam keng ho khan engtin nge an man theih che u a? Khawi lam mi nge i nih reng reng, Engi?" tiin a han zawt zui leh a. Hêng misual rual te hi khawi aṭanga rawn kal nge an nih hriat a pawimawh takzet.

Engi chuan thâwk a la hluai a, a mittui rawn luang thla ngiai ngiai chung chuan, "Aizawl lam mi kan nia... kan ṭhian hovin thla 1 liam ta khan Champhai lamah zin a. Tichuan Zokhawthar hnaih lampanga lui kan kal tumin, thil rapthlak lutuk a thleng thut a... hri kai rualin min rawn bei thut a, chumi hnuah khang misual ho khan..." tiin thil thleng chu theih ang angin sawi a ṭan a.

Mahse a sawi zo hman lo, leichhuata mu Awmpuia chu a rawn khuh chhuak ta bawrh bawrh mai a, a kâ aṭang chuan thisen a rawn baw chhuak nghal ṭhawt bawk. A dinhmun a chhe tawh takzet. Zothana chuan silai rawn ah bawr ṭeuh pahin, "Hun kan nei tam lo! Helai hmuna kan awm reng chuan a him dawn lo. Sihpui mual lamah let pui vat angai dawn, Awmpuia hi a thawk a chham hman mai ang." a rawn ti a. Tichuan, hun khawhral thei an ni tawh lo tih hriain, Awmpuia chu an pawm kang a, theihpatawpa chakin Sihpui mual cement in pan chuan an kal leh ta a.

**************************************************************************

Sihpui mual cement in chhung thim ruai leh uap churh hnuaiah chuan Pu Rina chu bâng nghêngin a la ṭhu kun ngul a. A hnung lamah chuan a kuta darthlalang keh them, hriam leh sin te hmang chuan a phuarna hrui hrual chhah tak chu theihpatawpa thâwm dîmin a lo zâi chât hman ta der mai! 

Mahse a la che sawn ngam rih lo. A kut zalen tawh chu a hnung lamah chuan phuar beh niawm takin a la dah reng a, remchâng a melh ru rân a. Pawn lama hma hruaitu ber Sawmtea te an la  awm loh avangin in chhûng boruak chu a zâwiin hlauhna hlîrin a tuam a ni ber. Chutih lai chuan Nu Hriati, hlauh leh chauh vânga khûr ru dar dar chu a rawn inbeng kâng a. 

A mutna bula a lo sin thin, puan lum chhuata tla chu va chhar a, a fanu Puii khuh lum nan va lak a tum ta a. Chu puan chu in hnung lam thim chin, Pu Rina te ṭhutna bul lawka let reng a ni. Nu Hriati chuan thâwm dîm tein chu puan awmna lam chu a va pan phei ṭhêm ṭhêm a. Puan chhar tura a kûn hniam chiah tihah chuan thil rapthlak tak a thleng ta thut mai! 

Pu Rina chu rûl chuk tura rawn dâwk chhuak zawk ang mai hian a rawn zuang tho thut a. Nu Hriati samah tak chuan ṭhâmin a pawt kâng nghal hrawk a, nâ a tih lûatah Nu Hriati chu a ṭê chhuak nghal ṭhawt a. A theih ang a rângin Pu Rina chuan Nu Hriati chu a rek bet nghal a, a kuta darthlalang keh them hriam hmel zet mai chu a hrawkah tak chuan a va chuktuah nghal ta mai!

Nu Hriati ṭê thâwm an hriat rual chuan kawngkharpui lama lo ṭhu khâwm, Pu Tea, Valtea leh Chhingpuia te chu an rawn lehhawi nghal vat a. An silai chu an chuh nghal vat a, mahse an thil hmuh avâng chuan chet chhunzawm ngaihna reng an hre lo. Pu Rina, an lo phuar beh tlat emaw an tih khân, Nu Hriati hrawk zâwnah darthlalang keh them nena tin ranin a lo ding ran tawh mai.

"Tûmah lo kal hnai hlek suh u!" Pu Rina chuan a ti vîn nghal tuar a. "In rawn pên hnai a nih vaih chuan he pitar hrawk hi ka zâi chât nghal a ni mai!" tiin fiah fâk leh khûr miah lo hian a vau ta khûr khûr hlawm a. In chhûnga damchhuak ho chu an thau ah manin, hlauh luat vângin an tawlh hnung nghal hrut hrut hlawm a.

A nu dinhmun hlauhawm lutuk a hmuh rual chuan Puii chu a meng phâwk hrâ a. "Ka Nu! Khawngaihin thlah rawh... Nu!" tiin mangang lutukin a ṭap chhuak nghal hawm hawm a. Theihpatawpa chak in a nu chhan tûra va tlan phei a tum a, mahse a sir lawka lo awm Bawihi chuan a lo kuah bet chawt a. 

"Puii, che suh! A that duh tak tak ang, ding rawh!" tiin Bawihi chuan ṭap chungin a ṭhiannu chu a theih ang angin a lo dang bet ve ṭang ṭang bawk a. Boruak chu a ṭang in, silai kau ri in a rawn zui nghal a. Valtea chuan Pu Rina chu a silai chuan a tin rân a, a ha chang a ṭhial rap rap mai. "Pu Rin, i chet dan hi a dâwihzep thlâk lutuk! Mipa i nih chuan ka pi kha thlah la, keimah min rawn hmachhawn ta che tenawmpa!" a ti khar khar a. 

Pu Tea chuan thil pawi a thleng dâwn tih a hriat avângin a bân a phar chhuak vat a. "Valte, inbengdai rawh... silai kha dah rawh. Pu Rin, thil pawi dang siam belh tawh suh, kan inbe thei alawm. I duh chu sawi rawh, mahse khawngaihin Pi Hriati kha kal tir hram rawh." tiin theih ang tawka aw dâm chuan a han bia a. 

Mahse Pu Rina tân chuan ngaihdamna leh inbiak remna in awmzia a nei tawh lo. "Ngawi hmak rawh u! Thu min pêk theihna dan in nei tawh lo!" tiin a lo vîn lêt hrep a. Chutah, a sir lawka khûr hlawk hlawka lo ṭhu, Mapuia chu a ke chuan a tlawh pawp a. "Mapui! Tho rawh laktlak loh pa! Rang takin chhuat awngah sâwn i chhuah theih nan kawng lo zu siam rawh!" a tih chhunzawm leh a. 

Mapuia chu hlauh vânga thlan fîm in a bual huh vek chungin a rawn tho ṭuah ṭuah a. "Chumi hma chuan... Valte, i pistol kha chhuatah dah rawh. Chuan Pu Te, i ulhbun leh i silaimu zawng zawng kha chhuatah khân theh thla nghal rawh u. Mapuia hi in lo khawih a nih vaih chuan, he pitar nunna hi ka la nghal ang." tiin Pu Rina chuan a vau khur khur mai. 

A kuta darthlalang them hriam tak chuan Nu Hriati hrawk chu a va chhun hnai sauh a, thisen a rawn hnam ṭiam ṭiam hial a. Chhingpuia chu inpetruh ṭeuh chungin chet a rawn tum uaih a, mahse Pu Tea chuan a lo dang leh vat a, muangchângin a ulhbun leh silaimu ipte chu chhuatah a dah thla ta riai riai a. 

Valtea pawh chuan duh lo teh mah se, Nu Hriati chu a nu rual a nih ve tho avângin a ngenna ang chuan a pistol chu a nghat thla ve ta nge nge a. Mapuia chuan khûr dar dar chungin chung ralthuam pahnih leh silaimu te chu a va chhar khâwm nghal rawk rawk a. "Chhuk thla rawh!" Pu Rina'n thupêk a hriat rual chuan Mapuia chu silai pahnih keng chungin chhuat awngah chuan a lût thla nghal rawk rawk a. 

Tichuan Pu Rina chu Nu Hriati rek bet reng chung chuan hnungtawlh in, chhuat awng thim chin lam chu a pan phei ve ta hret hret a. Puii chu a beidawng lutuk a tal vak vak tawh, a ṭap thâwm chuan in chhung a luah khat vek bawk. Pu Rina'n chhuat awng a thlen rual chuan, Pu Tea chuan, "Pu Rin... i duh chu i hmu tawh. Kal rawh... tuman kan rawn ûm zui lo ang che, thlah tawh rawh." tiin a lo ngen leh a. 

Mahse Pu Rina chuan la tin reng chung chuan, "Valte, i pistol kha rawn theh phei rawh. A nih loh chuan Pi Hriati hi ka that hreh hauh lo ania." a ti leh ta khur khur mai a. Valtea chu a ngawi reng a, Puii lah chuan tap chungin, "Ni lo.. U Valte pe mai rawh." tiin a lo ngen bawk. Valtea chuan Pu Tea a va melh zeuh va, Pu Tea chuan a lu a lo bu nghut a.

Valtea chuan rum fe hian Pu Rina chu a melh a, pistol chu ava theh phei ta a. Pu Rina chuan a aia na hian Pi Hriati chu a rek nghet a, pistol chu a chhar a. Puii chuan tap chung hian, "Chhuah tawh rawh, Pu Rin. Ka nu kha chhuah tawh rawh khawngaihin?" tiin a ngen chhunzawm leh a. Chhuat awng atang chuan inhnuai lam atangin Mapuia chuan Pu Rina chetdan nunrawng tak chu rawn dak chho chungin a lo hmu ve vek a, a ding khawng reng ringawt.

Mahse Pu Rina mitmengah chuan ramsa rilru dik tak a rawn lang chhuak ta, darthlalang keh them chu a han lek kâng leh deuh a. Chutah Pu Rina chuan engmah sawi lova Pi Hriati harwk zawna a han thai phei pawk rual chuan Pi Hriati hrawk chu a thlêr nghal duai mai. Thisen lum  chu a rawn pik chhuak ta ṭhawt ṭhawt mai le! 

In chhûnga awm ho chu an ṭê tuar tuar hlawm a. Chu thil râpthlâk tak thlen rual chiah chuan, Pu Rina chu inhnuaia chhuat awngah chuan a zuang thla ve nghal zawk a, Mapuia nen chuan ramhnuai pilril lamah theihpatawpa chakin an tlân liam ta nghal a. Nu Hriati chu a hrawk aṭanga thisen chik tuar tuar chungin cement chhuatah chuan a bawk thlawp a, a ke a lêng awt awt a. 

"KA NU!!" ti a au rawng rawng chungin Puii chu a tlân phei a, a nu thisen chhuak rawn baw  zawih zawih chu a theihpatawpin hup beh a tum a. Bawihi pawhin ṭap chungin a va zui phei ve nghal bawk a. Valtea chu chhuat awng lam pana zuan thlâk ve nghal mai a han tum a. Mahse Pu Tea chuan a kâwr nghâwngah a lo pawt bet chawt a. "Awmzia a awm hrih lo Valte! Silai pahnih ngawt an rawn ru chhuak a, ralthuam kan nei mang miah tawh lo ania... chhuak ve pawh ni ila hri kai ho zawng zawng nen kan dinhmun tur a hriat loh." tiin a lo dâng bet a.

*****************************************************************

Minute sawmhnih a liam hnu chuan, ngaw pui thim leh pilril tak hnuaiah Pu Rina leh Mapuia te chu thaw hlawp hlawp chungin an tlan chhe mek a. Hnim hriam leh ṭang ro in pal ri rawp rawp te chu ramhnuai reh tlawk tlawk kârah chuan a ring duh kher mai. An hnunglam aṭanga rawn ûm zui thâwm emaw, hri kai rawn hrâm thâwm emaw hriat tur a awm rih lo bawk a, lûngpui lian tak bulah chuan an ding a, an hahchawl a.

Mapuia chu thlan fîm leh hlauhnain a bual huh vek tawh a, a kuta Pu Tea ulhbun hum ran chung chuan a khûr dar dar reng a. Nu Hriati, darthlalang keh thema râpthlâk taka a hrawk zâi chah a nih laia thisen rawn baw chhuak hawk hawk kha a mitthlaah a châm reng a, a â lo chauh a ni ber e. 

"Pu Rin... eng thil nge i tih tâk kha? Tual i that a nia! Khawiah nge kan kal dâwn... hri kai rualin min rawn nangchîng ve hmang ange?" tiin a ṭap deuh pûr a. Pu Rina chu a thaw hrawih a, a mitmeng sualnaa khat chuan Mapuia chu a melh hrâwk a. "Ngawi hmak rawh! Khang ho bulah khan kan dam khawchhuak dawn chuang lo. Nangpawh ka thu i awih loh chuan khalai hmunah khan i thi ve mai dawn tih hre rawh. Mahni sahim nan chuan theih tawp chhuah a ngai a nih hi, hrethiam ta che." tiin inthiamlohna chhete mah nei lo hian a lo chhang lêt hmak a. 

Valtea pistol a rûk chhuah tak chu nghet takin a hûm bawk a. Mahse rei pawh an hahchawlh hma hauh chuan, an hma lawk hnim pik kâr aṭang chuan hnah ro in pal ri hruap hruap thâwm a rawn chhuak ta thut mai! Pu Rina chu a ding khawng nghal awt a, Mapuia phei chu a tha a ṭhum nghal vek a, a silai ken lai chu a thlauh lo chauh a ni.

"Che hlek suh u," aw thûm leh chang ruih mai hi thim tham kâr aṭang chuan a rawn ri chhuak a. Hnim a rawn inkeu a, silai kau ri 'khep khep' thawm in a zui nghal. Hri kai an ni lo! Mipa rual, AK-47 leh ralthuam hlauhawm tak tak keng mi pakua (9) ngawt mai hian Pu Rina leh Mapuia te chu an rawn hual ta ṭhap mai le!

An hma hruaitu ber chu Khunsanga a ni a. A hmai leh a kâ velah chuan Sawmtea nena an insualna vanga thisen kai a la awm nûai a, a mitmengah chuan tlawmna leh thinrimna a inpawlh nûai bawk. A naute pariat la bâng te chuan an silai theuh in Pu Rina te pahnih chu an tin rân tawh a. 

Mapuia chuan silai in tin an ni tih a hmuh rual chuan, hlauh luat vângin a kuta ulhbun ken lai chu leiah a thlauh ri nghal dâwp a. A ban a phar chhuak a, "Min kâp suh u! Min kâp suh u! Engmah tihsual kan nei lo a nia!" tiin a khûr zawih zawih a. Zun a cheh lek lek hial a, a ke a khur hlawk hlawk mai.

Pu Rina erawh a dâng sawp sawp hman na in, a thluak fing leh phakâr tak chu a rawn vir zawk a. Zauva'n in chhûnga a sawi, 'Awmpuia rawn mantu, ralthuam ṭha tak keng mipa rual hlauhawm tak' a tih te ngei kha an ni tih a hre chhuak nghal a. Chutih rualin, heng mite hian na takin inbeihna an hmachhawn zo chiah tih an hmel leh thisen kai nûai aṭang chuan a hmu thiam bawk a.

Khunsanga chuan a chemte hriam tak phawrh chhuakin Pu Rina chu muangchângin a rawn pan phei a. "Mizo tlangval luhlul tak tak hmuh tur an lo va tam ve le... tute nge in nih? Helai thihna hmunah hian eng nge in lo tih ve?" tiin Khunsanga chuan a zawt chher chher a, a aw ah chuan khawngaihna chhete mah a lang lo.

"Khawngaihin min that suh u..." Pu Rina chuan a theih ang a dâmin a ti a, mahse a aw ah chuan tlawm mai a tum bik lo tih a hriat. "Hliam in tuar a, in naute in chân nual bawk a ni maw? A chhan chu kei hian thil awmzia chiang takin ka hria a nia. Mipa pali vel, tharum ngah leh luhlul tak tak te khân an rawn bei che u a ni tiraw?" tiin a han zawt lêt khauh a.

Khunsanga chu a ding dawt a, a mitmeng a rum nghal ul mai. Pu Rina sawi mipa pali te chu Sawmtea te ngei khan an ni tih a hrethiam chiah chu a hliam khawih fuh ang hlauh a ni. "Engtin nge chu chu i hriat? An pawlte i lo ni ve em ni? Anih chuan helai hmun ngeiah hian i taksa hi ka chan darh nghal ang!" tiin Khunsanga chu a rûm chhuak hrâwk a, a chemte in Pu Rina hrawk chu a rawn tin nghal a.

"Ni lo, ni lo! An hmelma lian ber ka ni zawk!" Pu Rina chuan rang lutukin a lo ti vat a. "Khang mite khan ka mi leh sate min thah sak a. Chuan dâwtin mi dangte rilru an hneh a, tih hlum ah  min vau a. Tûnah hian an chênna hmun kalsanin helai ramhnuaiah hian an buai mek a ni. An awmna 'Cement In' chu heta ṭang hian a hla lo, an awmlohna in chhûngah chuan ralthuam leh khawl ṭha tak tak an la kawl ṭeuh bawk a nia." tiin thiam takin Khunsanga chu a thlêm ṭan ta a.

Khunsanga chuan a chemte dah thla riai riai in, a hmai thisen kai chu a tuai fai a. "Cement in a? Ralthuam maw..." tiin a phun sup a. A thinrimna kha phuba lak chaknain a rawn thlak nghal tih a hriat theih hle. "Ni e," Pu Rina chuan beiseina rawn nei tharin a lo ti thuai a. "Khang mipa pali te kha in lamah an awm lo a, tûnah hian in chhûngah khân hmeichhia leh naupang dâwihzep tak tak bâk an awm rih lo. Min that lova in pawl a min tel tir ve chuan, chulai hmunah chuan him takin ka hruai lût ang che u. Chuan, in naute thah saktu te lakah hian theihpatawp in phuba in la dawn nia." tiin a han dak leh zuah zuah a.

Ngaw pui reh leh thim mup hnuaiah chuan Khunsanga chu a nui chhuak ta hawk hawk a. Hri kai rual te ai pawha râpthlâk leh nunrawng, mipa pahnih te chu an inmelh tawn a. An remruatna tenawm tak hmang hian, Sawmtea te ṭhianho tan chuan chhiatna rapthlak tak a in mung ṭan ta mek tih tu man an hre si lo.

*********************************************************************

Sihpui mual cement in chhung chu thihna avanga lungngaihna thla zarin a uap phui mup a. Chhuat laizâwlah chuan Pi Hriati ruang chu a let reng a, a hrawk thler huam aṭanga thisen chhuak chuan cement chhuat chu a bual sen nuai a. A fanu hmaah ngei, râpthlâk leh hrehawm ti taka a thawk tâwp lai hmel chu hmuh a hrehawm khawp ang le.

Puii ṭap rawng rawng thâwm chuan bâng leh chhuat te chu a nghawr dawt dawt a ni ber. "Ka Nu... khawngaihin harh teh... Nu!" tiin a nu thisen kâi hnuang chu theihpatawpa nghetin a kuah vawng vawng a, a hmai leh a kâwr te chu thisenin a bual sen vek tawh bawk. Bawihi chuan mittui tla zung zung chungin a ṭhiannu chu hnem ngaihna reng a hre bik lo, a lo kuah ve tawp a.

Hmeichhe naupang dang leh in chhûnga awm ho chu phâwk hrâ in an meng a, hlauh luat vângin in kîl thim laiah an tawm chawih chawih a. Tualthahna râpthlâk tak mai, hri kai te thil tih ni miah lo, mihring ngeiin a mihring pui rawng taka a that lai an mit hmuh ngeia thleng chuan an thluak a chawmawlh tir vek a ni.

Pu Tea chuan a thawk a chelh tlat a, a beidawng hmel chu thim kârah pawh a hmuh theih. An innghahna ber ralthuam—a ulhbun leh Valtea pistol ngei mai kha phakâr taka rûk chhuah a ni ta si. "Engtin nge khatiang khân a chet thut theih..." a ti zuai raih a, a mah leh a mah a inthiam lo hle bawk.

Mahse chutiang a tap a rûm vawng vawngna hun a ni lo. Valtea chu ramsa sa-seh thinrim ang mai hian a rawn ding chhuak hluai a. A mitmeng chu a sen râm a, a khabe ruh a pawng ṭâwlh ṭâwlh a. Pi Hriati thih dân râpthlâk lutuk chuan a chhungrilah phuba lak duhna mei lian tak a chhem alh ta tlat mai.

A sîra a chempui hriam tak chu theihpatawpa nghet hian a hûm chawt a. Engmah sawi lovin chhuat awng, Pu Rina leh Mapuia te tlân liamna lam pan chuan theih tawpa chakin a pên phei ta thut mai. Pu Tea chuan thil awmzia a hriat rualin, rang lutukin Valtea kâwr nghâwngah a lo phih bet chawt a. "Valte! Ât so suh! Silai pahnih ngawt an kawl tawh a, nangin chempui chauh i nei. I zuang thla a nih chuan thihna i pan dawn tihna a ni mai!" tiin a theih tawpin a lo dang bet a.

Mahse Valtea thluak chu thinrimnain a tuam mup tawh. "Min thlah rawh Pu Te!" tiin thâwm chhuah hlau si, mahse khûr dawt dawt chung hian a ti vîn ṭhak a. "Saw misual, tenawmpa sawn dâwt hmangin min bum a, kan ralthuam min laksakin Puii nu a that zui bawk a. Nungdamin ka chhuah dâwn lo, a phu tâwk hremna ka pe dâwn!"

Pu Tea chuan theihpatawpa ṭang chungin, "Sawmtea te rawn lêt hun nghâk ang! Anni chuan silai an la nei, chumi hunah chuan rualin hnu kan chhui dâwn nia. Tûnah chuan nang leh kei chiah in chhung nghak tu mipa kan awm tawh, Puii hian kan thlamuan a mamawh zâwk!" tiin hmin a tum ṭang ṭang a.

Chutah Valtea chuan Pu Tea bân chu theihpatawpa nâ in a phih thla ta sawk a. "Nghah theih a ni tawh lo! Damin an rawn let angem pawh a hriat loh..." tih leh chhuat awng thima zuan thlâk chu a rual ta nghal a. Pu Tea chu a tlai hman ta, beidawng zetin in hnuai thim mup mai chu a thlîr thla ta vawng vawng ringawt a.

Valtea chu in hnuai leichhuat diakah chuan a tla thla dawt a. Ramhnuai pilril tak, thengthaw lo leh thim chhah mup hnuaiah chuan a awm ta, tlai lam a ni tawh lehnghal. A hma lawkah chuan thlîr theih mang loh in thing leh hnim a pik a, thawm hriat tur mang pawh a awm lo. A chempui chu a hûm nghet sauh sauh a. 

A thinrim luat vânga a tha khûr leh a lungphu ri dup dup te chu theih tawpa thunun a tum a. Mipa dawihzep pahnih tlân chhia te hniak leh hnim an pal palhna chu lei diak leh hnim kârah chuan a hmu thei nghal mai bawk a, muangchâng lova ûm zui chu a tum ta a. Valtea'n ramhnuai a hrut lût ṭan chiah tih hian, thil pakhat hriat loh lian tak a nei a ni. 

Chu chu, a hmalam thim tham kârah hian mipa dawihzep pahnih emaw, hri kai rual ringawt emaw hmachhawn tûr a pan lo tih hi. Pu Rina phakar zia leh Khunsanga te pawl, Burma ralthuam nena inthuam chhuak hlun, tualthah chakna hlîra khat te nen an thawkho mek tih reng a hre si lo.

****************************************************************************

Sihpui mual cement in chu a pawn lam aṭang pawhin a reh vawng vawng a. Ngaw pui chhum zîng chhah tak kârah chuan Sawmtea te ṭhianho chu theih leh theih lovin an rawn pên hnak hnak a. Zothana leh Renga chuan Awmpuia thi lek lek, nikhawhrelova awm chu theihpatawpin an rawn zawn a.

An hnungah chuan Zauva'n hmalam leh hnunglam vêngin a rawn zui bawk a. Burma ral ho ralthuam an rawn laksak, AK-47 hlui tawh tak pahnih leh M-16 pakhat chu a rawn ak bawr ṭun bawk a. Nula Engi pawhin hlau leh khûr dar dar chungin a rawn zui ve bawk a, Sawmtea pawh a dâr hliam vângin a thlan a tla phung tawh a ni.

Kawngkharpui bul an thlen chuan Sawmtea chuan thâwm dîm takin a kik khep khep a. "Pu Te, keimahni Sawmtea te.. lo hawng ru." tiin kik deuh karh karh mah se, in chhûng lam aṭang chuan rawn hawn vat tu an awm miah lo. Thil dik lo a awm tih Sawmtea chuan a hre nghal a, a revolver hûm lai chu nghet takin a chelh a, inring rengin a awm nghal vat a.

Reilote hnuah kawngka chu muangchângin a rawn inhawng a. Pu Tea hmel dâng sawp sawp leh beidawng tih hriat ngawih ngawih chu a rawn lang hlawl a. Pu Tea'n Sawmtea te him dama an rawn let a hmuh chuan a thaw hawk a, mahse a mitmeng chu a la buai nuai tho. "Lo lût vat ru..." a ti zawi sup a.

In chhûng an luh rual chiah chuan, ngaw pui thim lama hri kai rim chhe tak an tawn hnuah pawh, thisen tharlâm rim na tak mai chuan an hnâr a rawn verh nghal zawk a. Zothana leh Renga te'n Awmpuia an nghah thlâk dâwn lai tak chuan, in chhûnga thil thleng an hmuh avângin an ding khawng nghal awt a.

Chhuat lai zâwla Pi Hriati ruang, a hrawk thler huam aṭanga thisen la luang ngiai ngiai leh, chu thisena inchiah piah nûai chunga Puii lo ṭap rawng rawng lai chu an va hmu ta! Bawihi chuan ṭap chungin Puii chu a lo kuah bet a. In chhûnga hmeichhia leh naupang dangte chu kil khatah hlauin an lo tawm khûr hlawk hlawk bawk.

Sawmtea chu a ding dawt a, thawk lâk nachâng a hre lo ṭhelh hial a ni. "Eng... eng thil nge thleng a?" a ti chhuak hlawl a. A dâr hliam na te chu a theihnghilh ṭhak hial a. Hri kai ho laka him tura an ngaih, an kulhbing cement in chhûng ngeiah hetiang tualthahna râpthlâk a thleng ang tih a ring phâk lo reng reng.

Zothana chuan Awmpuia chu dîm takin leiah a nghat a, a thinrim lutuk chu a hmai a sen nghal ṭâwlh ṭâwlh a. "Tu tih nge? Hri kai an rawn lût em ni?" a ti vin ṭhawt a, a silai chhar thar AK-47 chu a lek kâng nghal uaih a. Mahse hri kai seh hnu a ni lo tih chu an hre chiang hle, Pi Hriati hrawk chu hriamhrei hmanga zâi thler a ni miau a.

Pu Tea chu chhuatah a ṭhu hnawk a, a kun ngul a. "Pu Rina... kha tualthattupa khân darthlalang keh themin a phuarna hrui a lo zâi chat a. Pi Hriati kha man betin a hrawkah a tin a... Valtea pistol leh ka ulhbun theh thla turin min vau a...." tiin aw khûr dar dar chung chuan thil thlen dân chu a sawi chhuak a.

Chu thu an hriat phei chuan Sawmtea te chu an sa phat mai. "Chuan kan silai neih chhun chu in lo pe amaw?" Zauva chuan mak ti leh thinrim bawk siin a lo zâwt ve nghal a. Pu Tea chuan inthiam lo takin a lu a bu nghat a, "A that dâwn miau a, kan pe ta mai a ni. Mahse silai a lak zawh vek hnuah, lainatna chhete mah nei lovin a hrawk a zâi chah sak ta tho a ni..."

Puii ṭap ri lungkuai tak kârah chuan in chhûng boruak chu a rit luk a. Sawmtea chuan a ha chang a ṭhial rap rap a. "Chuan Mapuia? A ni kha khawiah nge a awm?" tiin a han zawt leh a. Pu Tea chuan, "Pu Rina a hlauh vângin a zui chhuak ve... in hnuai chhuat awng aṭang sawn an zuang thla a, ramhnuai thimah an tlân liam ta a nih kha." tiin a chhâng a.

Tichuan Sawmtea chu a hawi kual a, mipa pakhat a kim lo tih a hmu chhuak chiah. "Khawiah nge Valtea?" a ti nghal ruai a. Thil pawi zâwk a thleng tih a hre thiam nghal. Pu Tea chuan beidawng zetin chhuat awng lam chu a kâwk a. "Ka dang zo lo a ni. Puii nu a thi lai a hmuh khân a â vek a... chempui chauh hûm chungin phuba la tûrin a zuang thla ve nghal." a ti zuai raih a.

Zauva chu rang lutukin chhuat awngah chuan a va dâk thla nghal a. Khua a thim thet thet tawh a, ramhnuai chu a thim chhah mup tawh. "A va han â tak êm... silai pahnih keng an ni a, a ni chempui ringawt nen. A thih phah dâwn chiang lutuk!" Zauva chuan a ti vawng vawng a. Sawmtea chuan thâwk a han la hawk a. A mitmengah chuan mipa huaisen, thutlukna siam zung zung ṭhin a nihna a rawn lang chhuak leh ta. 

Zothana silai rawn ah luh, AK-47 pakhat chu a phih thla hlawk a, silai cheng chu a kau nghal ri khep a. "Zothan, Zauva, Renga... silai kha sem ru. Valtea thi tura kan kalsan theih loh tluk zetin, kha Pu Rina leh Mapuia te chu an phutawk hremna kan pe ngei tur a ni. Kan chhuah angai, tumah an thih belh tawh tur a ni lo." a rawn ti chang ta fâk a.

Sawmtea'n chhuat awnga zuan thlâk a, Valtea ûm zui a tum uaih lai tak chuan, Zothana chuan a dârah a rawn dawm bet chawt a. "Sawmte, inbengdai lawk teh." a rawn ti thut a, a hmel chu a thutakin ngaihtuahna thûk tak a hmang mek tih a hriat hle. A kuta AK-47 silai chu a han lek kâng deuh a, "Khang Burma ral ho te kha an thi vek lo a nia. A la dam ho khan helai hmun hi an rawn hmu chhuak vat dâwn. Kan thisen far leh hnuhma te hmangin min rawn nangching thuai ang." a lo ti khauh mai a.

Zothana chuan sawi zawm lehin, "Awmpuia'n theih tawp chhuahin hruai kawi tum mah se, thâwm leh sulhnu vel zawng zawng avang hian kan awmna hmun hi an rawn hre vat dawn tho tho. Valtea chhan kan tumna lamah hian hmeichhia leh naupang te nen, sazu thangah kan in-âwh tîr vek zâwk ang. Burma ral ho an rawn thlen hma ngei hian helai cement in hi kan chhuahsan a, hmun him dang kan zawn vat a ngai a ni," tiin a ngaihdan chu fiah takin a rawn chhawp chhuak a.

Chu thu an hriat rual chuan in chhûnga awm te thluak chu a rawn fîm nghal kâwk a. Chhingpuia chu a rawn pên chhuak ve nghal vat a, "Zothana thil sawi kha a dik chiah a ni. Hliam tuar na tak kan nei a, naupang leh hmeichhia an awm bawk. Ralthuam tha tak tak nei chung ral ho insawi te chu he in aṭang hian kan do hneh dâwn lo hrim hrim. Kan chhuahsan vat loh chuan hetah hian min rawn that chimih vek zawk ang." tiin Zothana thil sawi chu a lo thlawp ve nghal a.

Sawmtea farnu, Hlimpuii pawh chu hlauh vânga khûr deuh dar dar chungin a u bulah chuan a va kal phei a, a bânah a va vuan chawt a. "U... kal mai ang u. Pi Hriati pawh khati khan a awm tawh bawk si, helai hmun hi chu a him tawk tawh lo." tiin Pi Hriati ruang thisen kâi nûai melh zeuh pah chuan a lo ngen ve vawng vawng bawk a. 

Muani pawh chuan a mittui hruin, "Ni e, naupang ho tân tal pawh hian him taka kan tawmkhâwm theihna tur hmun kan dap vat a ngai a ni, khua a thim tawh bawk si." a lo ti ve sap bawk a. Sawmtea chuan a farnu mitmeng thlaphâng tak chu a en a, chumi hnuah in chhûnga naupang leh hmeichhe ho, anmahni ring ngam taka thlîr ṭhap tu te chu a melh kual leh a. Chhuat awng thim mup mai, Valtea liam thlâkna lam chu a thlîr thla leh vawng vawng a.

Mahse hruaitu a nihna angah thutlûkna khauh tak a siam a ngai tih a hria. A thluak a fîm telh telh a, Zothana leh midangte thil thlir dân chu a dik ve tho bawk si. Sawmtea chu a bu ta nghat a, a thaw chhuak nghal hawk a. "A ṭha e, Zothan, i sawi dik a ni. Hmeichhia leh naupangte himna kan ngaihtuah hmasak ber a ngai. Valtea pawh kan theih ang angin kan la zawng zui dâwn nia." tiin a pawm ve ta hram a. 

Chutah a aw chu thian kharh kharh in, in chhûnga awm zawng zawng te hriat tûr chuan, "Hmanhmawh ru le! Eitur, tui, leh ralthuam kan neih ang ang te kha la khâwm ula, insiam sawk sawk ang u! Hmelma te an rawn thlen hma ngeia he hmun hi kan chhuahsan vat a ngai a nia." tiin thupêk a chhuah zui ta nghal a.

****************************************************

END OF EPISODE 2