ONCE UPON A TIME IN MIZORAM : SEASON 3 (Mizo zombie horror story) Written by : Aaron Malsawmdawngzuala Episode 1 : Dead Bait

 ONCE UPON A TIME IN MIZORAM : SEASON 3

(Mizo zombie horror story)

Written by : Aaron Malsawmdawngzuala

Episode 1 : Dead Bait

**************************************************

Ngaw pui chhah leh thim mup hnuaiah chuan thli a tleh heuh heuh a, dâifîm in hnah ro a far ri fap fap bâk thâwm dang hriat tûr a awm lo. Chu thihna rûam reh tlawk tlawk kârah chuan Awmpuia chu a theih ang angin a pên chhuak hnak hnak a. A ṭhianpa, a unaupa ang maia a en Siama ruang a kalsan chu na a tiin hrehawm takzet a ni. 

A nâk, Luna'n a chhuihna hliam aṭanga thisen chhuak chu a kut pakhata dâwm in, a kut lehlam chuan Siama chempui ngei mai chu theihpatawpa nghetin a hûm ran a. A hmel dâng bâm leh thlan fîm in a bual huh vek ah chuan hlauhna a awm tawh lova, natna leh beidawnna thûk tak hlîr a lang chhuak tawh zâwk a ni.

Siama thihna khân Awmpuia chhungrilah hlauhna awm ve zawng zawngte kha a nuai bo vek ni mai hian a hriat a, tûnah chuan engmah pawisak a nei tawh lo. A nâk hliam thîp ngut ngut leh a taksa chau lutuk te chu Siama a chânna natna lakah chuan engmah a ni lo. A ṭhianpa thutiam ang ngei khân, an ṭhiante dang te, nungdama la awmte zawng chhuak turin, Zothana sawi himna hmun, Sihpui mual cement thlam pan chuan tha thlah ngam lovin a pên lui hrâm hrâm a. 

Chutia a theih ang anga a kal hnak hnak lai chuan, a hma lawk hnim pik kâr aṭang chuan hnah ro pal ri hruap hruap thâwm a rawn chhuak ta thut mai! Awmpuia chu a ding chawt a. Hnim a rawn inkeu hawng a, hri kai pathum ngawt mai, chil phuan tla bawrh bawrh leh mitmeng sen râm hi an rawn dâwk chhuak ta hlawl mai le! 

Awmpuia thisen rim thar lâm tak chuan a hip hlawm hle tih hriat takin rûm chhur chhur chungin an rawn pan nghal a. Nî danga a tawn chu nise chuan insasengna tur a zawn ngei a rinawm; mahse tûnah chuan tlân chhiat emaw, bîruk emaw a tum hauh lo. Awmpuia chu a theihpatawpa ringin a au chhuak ṭhawt a, engmah pawisak nei tawh lo tih hriat takin chung hri kai pathum lam pan chuan a chempui hûm chungin a va tlân phei ta mai a. 

Hri kai rawn hma hruaitu ber, lûngphûm lam pan a rawn zuang chu, a chempui hriam tak chuan a nghâwngah tak a lo sât ri nghal pawp a. Thisen a chik ṭhawt a, chu hri kai chu leiah a thal nghal dâwp a. Mahse Awmpuia chu a tâwp mai lo. Hri kai pahnihna in a rawn zuan ve leh rual chuan insiamremin a lo sât lêt nghal pawp pawp mai a. 

A ṭhianpa thihna vânga a thinrimna leh natna zawng zawngte chu sâwm khâwmin, a tha neih chhun hmang chuan chu hri kai lu chu a sât sawm vek mai. Mahse a pathumna chu a che râng deuh tlat. Awmpuia'n pahnihna a sah mek lai chuan, a nâk hliam pem chu a rawn thip zawk a,  a pai ta khut khut mai! 

Chu a chetsual hun tak chu remchângah la in, hri kai pathumna, tlangval sâ ṭha thelh thawlh tak mai chuan Awmpuia chu a rawn bawh tlu ta dâwp mai le. Leiah chuan Awmpuia chu a nâk dâwm meuhin a tlu bawk thlawp a, hri kai chuan a rawn bawh bet nghal a. A kâ aṭanga chil hnang, thisen nêna inpawlh nûai rawn far fap fap chung chuan Awmpuia hrawk seh tumin a rawn ang zuau zuau mai. 

Awmpuia chuan a theihna tlêm te awm chhun hmangin a hmai zâwnah chuan a lo nam ṭâng ṭâng a, mahse a bân tha in a tlin dâwn ta lo. Hri kai chuan a rawn hnaih tial tial a, thihna in a rawn nangchîng dâwn ta ngei mai! Chutih lai tak chuan thâwm a rawn ri hrâwk a! Awmpuia rawn seh tuma ang zuau zuau tu, hri kai lû chu a rawn thlêp nghal sawk a. 

A chhipah tak chuan chemte hriam tak mai hi a rawn tlum pawk mai a! Hri kai chu a zâwi nghal hnawk a, Awmpuia chungah chuan thâwk pawh la zui tawh lovin a rawn bawk thla nghal thlawp a. Awmpuia chu mak tiin a thaw hlawp hlawp a, hri kai ruang rit tak chu a theih ang angin a nam sawn a. 

A rawn dâk chhuak a, a han en chiah chu, a hmaah chuan Valtea hi thaw hlawp hlawp chungin a lo ding reng mai! Valtea chuan hri kai chhipa a chemte vih luh chu a rawn phawi ri hrâwk a, a theih ang tawka nui hmel pu lûiin a kut chu Awmpuia kai tho tûrin a rawn phar chhuak a. Valtea hnung chiahah chuan Pu Tea, Fela leh tlangval pakhat, Hriata te pawh chu hmanhmawh takin an rawn phei ve nghal bawk a. Sihpui mual cement in pan tûra hmalam an panna kawngah chuan, beiseina beithâm tak nen ṭhian hlui te chu nungdamin an inhmukhawm leh thei ta.

*******************************************************

Khawvâr êng chuan Sihpui mual cement in hlui tak chu a rawn chhun êng ṭan a, dârfêng kâk aṭanga nî zung rawn lût sêt sêt te chuan in chhûng thim dâl ruih mai chu a rawn ti lang fiah ve ṭan ta. Pâwn lamah chuan nizan lama hri kai rawn hrâm nawk nawk leh bâng rawn sâwi ri dawt dawt thâwm te kha a reh ṭhiap tawh a, khawvâr in a rawn nân tâkah chuan hri kai riltâm te chu ramhnuaiah an kîr bo leh ta emaw tih mai tûrin a reh vawng vawng a. 

Mahse, in chhûnga damchhuak tâwm khâwm te tân erawh thla a muang chuang hauh lo; thihna aia râpthlâk zâwk, inrinhlelhna leh thlaphânnain chu in zîm te chu a uap phui tlat a ni ber mai. Pu Rina chu inchhungah chuan a vei tawn sek a. A hmelah chuan zankhuaa mu lo tih hriat takin a mitmeng a sen râm a, hri kai rawn luh thut hlaua invêng a nih rualin, a thil tih rawng tak avânga a inthiam lohna thup nana a thinrimna chuan a chênchhilh a ni ber e. 

A silai chu nghet takin a hûm reng a. Chutah, in kil khata hmeichhia leh naupang hlauh vânga mu khâwm mek te chu a han thlîr kual a. A mit chu in hnung lam thim lai, nizan lama Zauva ṭhutna lamah chuan a va du ta chat mai! A ruak hûai a, tlangval luhlul leh a thil tih rawng tak hretu awmchhun kha hmuh tûr a awm ta miah lo.

"Khawiah nge Zauva a awm?" tiin Pu Rina chu a au chhuak thawt a. In chhûnga mite chu an phu nghal suau a, Zela leh Chhingpuia, nizan lama meng rei ve tak te pawh chu an rawn hawi chhuak nghal vut a. Pu Rina chuan a silai hmawr chu chhuata chhut rîk dawt pahin, "In zîngah hian Zauva awmna hria in awm em? Nge ni a, pâwnah chhuakin hri kâiah a inlet tawh zâwk?" tiin thlaphâng deuh leh thinrim hmel inpawlh nûai hian a han vîn leh ṭhawt a.

Chutih lai chuan, Pu Rina hlau leh tlawn peih em em tu Mapuia chu a rawn tawlh chhuak hrut hrut a. Zauva awm loh chu remchângah la in, inti fel takin Pu Rina bul hnaiah chuan a va kûn phei dû dû a. "Pu Rin... nizan khân Puii leh Bawihi te bulah sâwn a ṭhu in ka hria. Khaw khat an nia, anni pahnih sâwn an hre chiang khawp ang." tiin Puii leh Bawihi bâng nghênga inkuah chial te chu a va kâwk deuh kher a. 

Pu Rina mitmeng chu a rawn inthlâk nghal hlawk a. Rinhlelhna leh thinrimnain a tuam nghal a, a silai chu a lek kâng deuh a, muangchâng hian Puii leh Bawihi te awmna lam chu a pan phei ta a. Puii chuan a nu, hlauh vânga khûr dar dar Nu Hriati chu a kuah nghet sauh a. Puii hi a tlân chhuak ve thei reng a, mahse a nu a hmangaihna leh kalsan a theih loh vânga he tualthattu kianga tâwm zawk thlang ta ngei kha a ni a. 

Tûnah erawh an dinhmun chu a derthâwng ta hle mai. "Nangni pahnih hian sawi rawh u. Khawiah nge in ṭhianpa Zauva chu a kal? Khawngkhâr a inkhâr phui vek si, engtin nge a chhuah theih?" Pu Rina chuan an hmaah tak dingin, a silai chu anmahni tin deuh titih hian a rawn vîn khûr khûr a. 

Bawihi chuan theihpatawpa a huaisenna sâwm khâwmin, dâwt sawi a ngai tih a hria. A rawn dâk chhuak a, aw khûr miah lovin, "Kan hre lo Pu Rin. Nizan hri kai ho in kawngka an rawn chûm nasat lai khân, hlauh vângin kan maimitchhîng a, kan beng kan hup tlat a... chumi hnuah  kan lo muhîl zui ta daih a ni." tiin thiam takin a dâwt sawi chu a khuh mawi nghal a.

Pu Rina chuan ringhlel hmel takin a melh dûn rân a, an mitmengah chuan dâwt sawi hmel a hmuh theih mai loh avângin a hawi sawn leh ta deuh a. A thâwk a la hak a, in hnung lam thim chin chu a pan phei a. Zauva chhuah rûkna leichhuat awng, thîr phek inkhuh ṭhat loh deuh chu a va hmu ta chat mai! 

Hmanhmawh takin a va pan a, thîr phek chu a han hlim kiang a, inhnuai thim mup leh pâwn lam chhuah theihna a lo kâk huau tih a hmuh rual chuan a ha chang a ṭhial ri rap rap a. Chhuat awng inkhuhna chu a chhir hawng thuai a. "Zauva chu a lo dawihzep hle mai." Pu Rina chuan a han ti chher chher a, a aw chu in chhûngah chuan a khâwk rum rum hial a. 

"Ka rinhlelh ang ngeiin, khawtlâng leh a ṭhiante aia mahni hmasialin a lo tlân chhuak ru a nih hi! Emaw, nimin lama kan thil tawnah khân a rûkin sehna te a lo tuar anga, hri kai a a inleh hmain min tlan chhuah san a ni ngei ang. A pawi lo e, kan zînga mipa dawihzep leh rinchhan tlâk lo an chhuak chu, kan him phah zâwk dâwn e." tiin inthiam chawp takin mipui hmaah chuan Zauva chu mipa tlâktlâi lo ber angah a chhuah ta nghal hmak mai.

Pi Dâri te ang, Pu Rina lo thlâwp ṭhintute chuan a thu sawi chu an lo âwih leh ta hmak a, "A lo va han dawihzep êm êm ve mawle, chutianga hri te a kâi phei chuan chhuak vat zawk rawh se!" an lo ti ve nûah nûah a. Mahse, kil khatah Zela leh Chhingpuia te erawh chuan Pu Rina dâwt sawi hrat zia an hriat chian tawh miau avângin, an inmelh rân a, engmah an sawi ngam si lo. 

Puii leh Bawihi pawh chuan Pu Rina dawt sawi chu hre reng mahse he in chhûng zîmte leh uap churhah hian pâwn lama hri kai ho ai pawha hlauhawm zâwk lakah an la tâng reng tih an hriat chian em avângin an thla a muang thei mawlh lo. Pu Liana cement thlam chu beiseina in ni lovin, tualthattu dâwt sawi thiam tak hnuaia thlaphânna rûn a ni ta ber mai!

*******************************************

Ngaw pui chhah leh thim mup hnuaiah chuan Awmpuia, Pu Tea, Fela, Hriata leh Valtea te chu ngawi rengin hmalam panin an pên hnak hnak a. Boruak chu a ritin, nî êngin ramhnuai chu rawn chhun êng deuh tawh mah se, an rilru erawh lungngaihnain a tuam mup si. Awmpuia chu a nâk hliam dâwm reng chungin, a thlan fîmin a bual huh vek a, a hmelah chuan chauh luat vânga hah hmel aiin natna thûk tak hlîr a lang chhuak thung. 

Tumah inbe lovin thihna rûam hrût chuan fîmkhur takin an kal zêl a. Chutia ngawi renga dârkâr chanve dâwn lai an kal hnu chuan, Pu Tea chuan an awm dân boruak ipik lutuk chu a rawn ṭhiat ta a. A hnunga kal mêk Awmpuia chu ngaihtuah hmel takin a va lehhawi a, a hmel chauh hmel tak chu a han thlîr vawng vawng a. "Awmpui... khawiah nge Siama kha a awm tâk a? Nizan lama kan darh thut khân in pathumin... ni lo, in pahnihin kham lamah khan in tlân liam dun ta in ka hre si a." tiin a zawt ta phawng mai a.

Awmpuia chuan a kal lai chu a chawl lêm lo, hmalam en ngur ngur chung chuan ngaihsak loh hmel zet hian, "Ka hre lo." a ti hmuk a. A aw chu a bungin, biak zui chi a ni lo tih a hriat ngawih ngawih a. Siama hming an rawn lam rîk ringawt pawh chuan a thinlung chu chem hriâm taka vih sawk ang maiin a nâ a, ṭah chhuah hawm hawm mai a châk a, mahse theihpatawpin a insûm hrâm hrâm zâwk a ni.

Mahse chu chhânna tâwi leh bung lutuk chuan a ṭhiante ngaih a ti ṭha thei tlat lo. Valtea chu a rawn pên hnai a, "Engtin nge i hriat loh theih a, Awmpui? In pahnihin in lum thla dûn kha ka hmu reng che u a lawm. Nge ni a, in inhloh zâwk?" tiin a rawn zawt ve leh a. Muanpuia a chân tâk avângin Valtea pawh hian Siama chanchin hriat chian chu a thlahlel in a thlaphâng ve em em a ni mahna.

Hriata pawh chuan Fela kai chungin a rawn thlâwp ve nghal a. "Ni e U Awmpui, theih tawp chhuaha kaihruai ṭhîn tu che a ni a, nang phei chu i hliam a nâ in i kal ṭhat theih loh kha. Khawiah nge a awm? Chhan theih a ni ang em?" tiin mangang hmel tak chuan a lo zawt nawn ve leh chhen bawk a.

Chutah zet chuan Awmpuia chu a insûm zo tawh thlâwt lo. A pên lai chu a ding chawt a, a rawn lehhawi thut a. "A thi tawh!" tiin theihpatawpa ringin a rawn au chhuak ta ṭhawt mai le! A aw ring leh râwng tak mai chuan ngaw pui reh tak chu a dêng khâwk rawih rawih a, Pu Tea te ho pawh chu an phu dâwrh a, thâwk la ngam lovin an ding khawng nghal ṭhap mai.

Awmpuia mitmeng sen râm aṭang chuan mittui a rawn luang chhuak nghal zâwih zâwih a, ramsa na tuar ang maiin a rawn rûm chhuak hrawih a. "A thi tawh ka tih chu... hri kai lian pui pui pathum ngawt in min rawn bawh a. Kei tha rêng nei tawh lova lei a let hlawm reng tawh hi... a theih tawp chhuahin min rawn chhan a sin!" a ti khûr hlawk hlawk a, a thâwk lak a sak in a awm a insep sâng hle bawk.

"A bân dinglam bul tawh, kut veilam chauh nei chung pawh khân tlawm a tum lo! Min chhan nân a chempui nen ramsa kawlh ang maia ṭangin a theihpatawpin min beih pui a... pakhat leh pakhat inhmachhawn na na na te chu a that ve hman ngei a lawm, mahse pakhat in a dârah a rawn seh fuh ta a ni." Awmpuia chu a khup suihin leiah chuan a ṭhingṭhi thla hnawk a. 

"Ka mit hmuh ngeiah a thisen lum a chhuak a... theihna nei ila chuan ka thihchilh ve ngei ang. Mahse, 'kal rawh, hri kai a ka inleh hma hian min kalsan rawh' tiin a kut dâm awmchhunin ka kut a hûm a... ka chhan thei lo, ka kalsan tâk kha!" tiin chhuat diak chu a hûm a, theihpatawpin a ṭap chhuak ta hawm hawm a.

Boruak chu a reh tlawk tlawk a, Awmpuia ṭap hawm hawm thâwm bak hriat tûr a awm lo. Valtea chu a mittui a rawn luang ve ngiai ngiai a, nizan lawka Muanpuia, ama kut ngeia a nunna a lak sak tâk kha a mitthlaah a rawn lang nawn leh uar uar a. Hriata leh Fela pawh chu lungchhe takin an kun tlawk tlawk a. 

Siama, tlangval huaisen leh tlawmngai, kut pakhat chauh nei chunga a ṭhianpa chhanhim tu boral ta chu an uiin, an thinlung a deng nâ takzet a ni. Chutih lai chuan, Pu Tea chu mipa puitling leh pa ber a nihna ang in a rawn pên chhuak a. Mittui tling pam chunga leia Awmpuia ṭhu sawp nûai chu a va pan hnai a, a dârah chuan dîm te in a va khawih a. 

"Awmpui... inthiamlo rêng rêng suh. I ṭhianpa thil tih kha mipa dik tak, pasaltha huaisen te chauh lo chuan an ti thei lo. Chuvângin, a thihna chu ui hle mah ila, a thil tih hlutzia târ lan nan i dam chhuah ngei a ngai a ni." tiin thutak leh lungkuai takin a rawn hnem a. Pu Tea chuan Awmpuia chu a kai tho a, a theih ang tawkin a bianga mittui leh diak kâi nûai chu a tih fai sak a. 

Tichuan midang ho chu a han melh kual hlawm a. "Helai hmunah hian engpawh lo thleng se, chak lo taka awm hman kan ni tawh lo. Sawmtea leh midang te pawh khân nungdamin min lo zawng ve mêk ngei dâwn a, kan theihna theuh sâwm khâwmin hma lam pan zel ang u. Sihpui mual cement thlam lam chu pan phawt ila, chuta ṭang chuan ruahmanna dang chu kan siam leh zâwk dâwn nia," tiin ro a rêl ta a. Tichuan, natna leh thihna kârah pawh beiseina chhe tê neiin, chung mipa rual te chu theihpatawpa fîmkhurin hmalam panin an pên chhuak zui ve leh ta a ni.

*****************************************************************

Ngaw pui pilril leh thim chhah mup hnuaiah chuan Sawmtea, Zothana, Renga, Zauva, Pu Rova, Muani leh Hlimpuii te chu theihpatawpa thâwm dîmin hmalam panin an pên hnak hnak a. Sihpui mual pan theihna kawng chu a theih ang angin Zauva leh Zothana ten an zawng kûal a. Nî êngin ramhnuai rawn chhun ṭan mah se, Sawmtea hmelah erawh hlauhthâwnna a la kiang thei lo. 

A ṭhiante — Pu Tea, Valtea, Awmpuia, Siama, Muanpuia leh naupang Fela te hmel a hmuh ve hma loh chuan a thla a muang thei lo. "Zothan, kan kal chak mah mah lo maw? Kan ṭhiante dang khân kan hnuhma min rawn chhui ve zêl dâwn a, helai ruam velah hian zawn kual hmasak phawt a ṭha in ka hria." Sawmtea chuan a M-16 rifle hûm chungin a lo zawt a. 

Renga pawh chuan a chempui lék kâng deuhin, "Ni e, nizan khân kan darh nuai si a, hliam tuar te nen chuan hla tak an kal theih ka ring lo. Sihpui mual kan thlen hma hian hmuh kîr ngei an ngai a ni." a lo ti ve bawk a. Zothana chu a bu nghat a, a naute panga ngawt a chân tawh avângin ṭhian te chân natzia a hre chiang hle. 

"A ṭha e. Fîmkhur takin inṭhen darh vak lovin kan theih chin chinah thâwm ngaithla in kan zawng kual dâwn nia." tiin thutlukna a siam a. Tichuan, hmeichhe pahnih leh Pu Rova te a lâiah dah in, mipa pali te chuan ngaw pui hnim pik tak kârah chuan inrâlring takin an ṭhiante chu an zawng ta a.

Chutia dârkâr chanve dâwn lai thâwm dîm taka an pal kual hrep hnu chuan, an hmâ lawk rûam thengthaw lam deuh, hnim bûk kâr aṭang chuan hnah ro inpal rî leh thaw hlawp hlawp thâwm a rawn chhuak ta thut mai! Sawmtea chu a ban a phar chhuak nghal vat a, Zothana, Renga leh Zauva te pawh inring takin hnim phênah an tawm nghal chawt a. 

Hri kai rual thâwm a nih ringin an hmanraw neih theuh chu hmeh puah mai theih tûrin an kau sâ nghal a. Hnim chu a rawn inkeu hawng a, mipa pakhat, silai hlui ve tawh tak lék kâng chungin a rawn pên chhuak ta hlawl mai le! Mahse hri kai a ni lo, thlan fîm leh chirh diakin a bual huh vek, Hriata ngei mai a lo ni! 

A hnung chiahah chuan Fela leh Pu Tea ten, a nâk hliam vânga pên hlei thei lo Awmpuia chu an rawn kuah chhuak bawk a, Valtea'n hnung a rawn dâwl ve nghal bawk. "U Zothan!" Hriata chuan Zothana hmel a hmuh rual chuan a theihpatawpa ringin a au chhuak ṭhawt a. A silai dâha theh thla in a tlân phei nghal a.

Zothana pawh chu a phu zawk a, a naute zînga damchhuak awmchhun a hmu chu a lawm lûatah Hriata chu a kuah vawng vawng mai. Sawmtea leh Renga pawh chu hnim kâr aṭangin an rawn dâwk chhuak ve nghal a. "Pu Te! Valte! Awmpui!" Sawmtea chuan a hlim lutuk chu a ṭawng khûr hlawk hlawk hial a. 

Renga nen chuan an tlân phei a, an ṭhiante nungdama an hmu lêt leh chu an theihpatawpa nghetin an inkuah vawng vawng hlawm a. Muani phei chu Pu Tea âwmah bei thlawpin a ṭap chhuak hawm hawm a. Mahse, chu hlimna chuan rei a daih lo. Sawmtea chuan a ṭhiante hmel a han en kual a, kim lo an awm tih a hmu thiam nghal chat a. 

"Khawiah nge Siama... chuan Muanpuia?" tiin Sawmtea chuan phâwk hrâ in a zawt ta phawng mai. A zawhna avâng chuan hlimna vânga an mittui tlâ chu natna mittui in a rawn thlâk nghal riai riai a. Pu Tea chu a kûn ngul a, a mit a mitchhîng vang vang a. Valtea pawh a hawisawn nghal daih a. 

Awmpuia, a hliam vânga leia ṭhu sawp nûai chu a rawn inhnît fêih fêih a. "A thi tawh... kan chan tawh, Sawmte." Awmpuia aw chu a khûr dar dar a, a thâm chhuak ṭâwk ṭâwk a ni ber e. "Siama chuan... hri kai lakah, kei min chhanhim nân a nunna a hlan a. Muanpuia pawh... hri kai hovin an lo nang chîng a, a ni pawh a thi tawh." tiin thil thleng chu a hrilhfiah a.

Chu thu an hriat meuh chuan Sawmtea chu a ding khawng lah a, a M-16 rifle chu a thlauh thla dâwp a. Renga phei chu lûngpui nghengin a ṭhu thla hnawk a, a kâ hupin a mittui a sur zung zung mai. Mipa theihna ngah leh huaisen tak pahnih, an tlân chhiatpui leh he thihna rûama nungdam tûra an ṭan rual pui ngawih ngawihte an chân ta mai chu ana khawp ang le. 

Muani leh Hlimpuii te pawh chu an lo inhnît ve hlawp hlawp bawk a. Rei fê chhum zîng mup hnuaia an ṭah tlawk tlawk hnu chuan, Zothana chu a rawn pên chhuak a. Amah pawhin a naute panga ngawt a chân tawh a. Mahse ro rêl a hun tih a hre bawk. "Sawmte, Renga, hma lam kan pan zel angai." a ti thâm ṭuak a.

Sawmtea chu thâwk la hawkin a rawn hawi chhuak a, a mittui chu tuai fâiin a silai chu a chhar leh vut a. A mitmengah chuan Siama leh Muanpuia te phuba lâk duhna leh nungdama la awmte hi thihchilh pawha humhim a tum zia a rawn lang chhuak a. Zauva lam hawiin, "Zauva, hma han hruai rawh le. Pu Liana cement thlam lam chu pan nghal ang u." a ti chang fâk a. Tichuan, chhûngkaw thar leh damchhuak tlêmte te chu theihtawpa fîmkhur leh ṭangrual takin Sihpui mual cement in pan tur chuan an pên chhuak ho ta ṭham ṭham a.

*********************************************************

Pu Rina chu meipui sirah inti hotu takin a vei tawn sek a, a kutah a silai neih chhun chu nghet takin a hum bawk a. Damchhuak dangte chu bâng nghêngin an ṭhu ngawi ṭhap a. In lâia Pu Rina a la ṭawng zuah zuah lai chuan, Mapuia chu hlauh vânga khûr dar dar chungin a va tlân phei rawk rawk a. 

Pu Rina beng bulah chuan a va kûn hniam a, "Pu... Pu Rin... pâwnah sâwn... Zauva a rawn lêt!" a va ti khûr dar dar mai. Pu Rina chu a thusawi lai a tâwp chawt a, a meng phâwk nghal hrâ a, "Eng thu awmze nei lo nge maw i rawn sawi le? Zauva te chu nizanah a tlân chhe daih tawh. Hri kai in an pawtsawm vek tawh ang chu." Pu Rina chuan zâwi thûm chher chher, mahse vîn ru tak si hian a lo ti hlak a. 

Mahse Mapuia chuan thlaphân hmel lutukin a lu a thing nawk nawk a, "A ni lo... amah ngei a ni! Chuan... mipa dang hlauhawm hmel deuh deuh, silai ṭha pui pui keng a rawn hruai tel bawk!" a ti nawn leh sâ sâ a. Chu thu a hriat rual chuan Pu Rina hmel chu a rawn inthlâk nghal hlawk a. 

Mapuia chu a nêm sawn dâwrh a, amah ngei chuan kawngkharpui, bâng awng, Mapuia lo bih dek dekna lam chu hmanhmawh takin a pan phei ve ta rawk rawk a. In chhûnga mite chuan a chêt dân an hmuh chuan mak tiin an lo thlîr ṭhap a. Pu Rina chu kawngkhar thingpheka an kheng phui tlat bâng awng kârah chuan a va bih ve ta dek dek a. 

Tiau chhum kian deuh tawh hnuaia nî êng rawn lût in a chhun tlang kârah chuan, ramhnuai hnim pik kar aṭanga mipa rual rawn pên chhuak chu chiang lutukin a va hmu ta! A thau ah a man nghal dawt mai! Zauva ngei mai chu inringtâwk takin a rawn pên phei a, mahse chu aia a thâu-ah man tirtu chu Zauva hnunga mipa rawn kal te chu an ni. 

Tlangval palian leh hmel rorum tak tak, Sawmtea leh Renga te chuan sipai silai hlauhawm tak M-16 leh AK-47 hûm in an rawn kâi hruai a, hri kai hlauva tlân chhe hmel an pu hauh lo. Chutah, an hnunga rawn pên chhuak a hmuh phei chuan Pu Rina chu a thaw a chham dâwn hialin a inhria. 

Lungthlir khuaa a hmelhriat ṭha leh zahawm, Pu Tea ngei mai chu a rawn lang ve hlawl mai! Valtea leh midang te nen an rawn inzui a. Pu Tea hmel puitling leh fiah kâk a hmuh phei chuan, dâwt hmanga a lo bum kual theih mipa an ni ve lo tih a hre chiang kher mai. Zauva khân heng mite hi rawn hruaiin, a tualthahna leh a phakarna rawn hailang tûrin an rawn thawk chhuak tih a hrethiam ta!

Khûr hlawk hlawk chungin Pu Rina chu a rawn tawlh hnung hrut hrut a. A hmai a dâng sâwp sâwp a, a silai hûm lai te chu a thlauh lo chauh a ni. Mapuia chuan hlauhthâwn hmel takin, "Pu Rin... engtin nge kan tih dâwn? Min rawn that dâwn a ni hrim hrim... an rawn thleng ṭêp a nia?" tiin a lo zawt khûr hlak hlak a.

"Ngawi hmak rawh!" Pu Rina chuan a ti hlur a, a aw ah chuan manganna a lang chiang hle. "Pu Tea a rawn tel ve! Sipai ralthuam theuh an rawn keng bawk... Kha Zauva phiangsen khân ka thil tih hi theihnghilh ṭhakin dâwt nen a lo va thlêm kawi a ni ngei ang. Kan chan a chhe dâwn tlat..." tiin a phun khûr zawih zawih a.

An chêt dân phîlî buai nûai chu kil khata lo ṭhu, Zela leh Chhingpuia te chuan an lo hmu ve reng a. Zela chu a rawn ding chhuak hluai a, "Pu Rin, eng nge nita? Pâwnah chuan eng nge awm a? Tinge i va phîlî ve a?" tiin thil awmzia a rawn zawt ta phawng mai a. A aw ah chuan rinhlelhna a ri chhuak tel.

Pu Rina chu a rawn lehhawi sawk a, a mitmeng a â ruai tawh. "Engmah a ni lo! Lo ṭhu ngawi hmak rawh u!" a ti vîn ṭhawt a. Mahse a phîli buai hmel lutuk chu Pi Dâri te meuh pawhin mak an ti ṭan ta. Puii leh Bawihi erawh chuan in hnung lam aṭanga Zauva te an rawn lût dâwn tih an hriat rûk miau avângin, theihpatawpa thâwm dîmin an lo inkuah nghet sauh a.

Pu Rina chuan nungdama he in aṭanga a chhuah theihna awmchhun chu dâwt sawi tawh lovin, heng mi pawisawi lo ho hi a hman tangkai a ngai dawn tih a inhrethiam ta. A dâwt sawi an hrechhuak dawn tho tho tih a hriat rual chuan, a mitmeng sualnaa khat chu in hnung lama thlaphâng taka lo ṭhu, Puii, Bawihi leh Nu Hriati te lamah chuan a fû phei ta chawt mai! "Mapui!" Pu Rina chuan a silai kâu ri thak chungin a ti vîn hrawk a. "I chempui kha phawrh rawh. Sawng hmeichhe pathum saw man bet nghal ang che... rang takin!" a ti ta mai le!

*******************************************************

Sihpui mual cement in chhung uap churh leh thlaphânthlâk takah chuan Mapuia chu khûr dar dar chungin a rawn pên chhuak a. Pu Rina thupêk hlauhawm tak chu hnial ngam lovin, a chempui lian leh hriam tak chu a phawrh chhuak ri hrâwk a. Puii leh Bawihi te chu hlauh vângin an tawlh hnung hrut hrut a, bâng chu an nghêng rawk rawk mai. 

Nu Hriati, riltâm leh chau taka lo muhîl chu rawn harhin mangang takin a fanu chu a rawn kuah ve nghal chûk chûk a. In chhûnga mite chu thâwk pawh la ngam lovin hrethiam lo takin an en hu ringawt hlawm a. Mahse, Mapuia'n chempui lék kâng chunga Puii te a va man bet dâwn chiah tih ah chuan, in kawngkharpui, lûng leh thingpheka an khen phui tlat chu pâwn lam aṭangin theihpatawpa nâ hian a rawn ri ta dawt dawt mai le! 

In chhûng boruak a dêng khâwk nghal rawih rawih a, Mapuia chu phu dâwrhin a tawlh hnung nghal hrut a. Pu Rina pawh chu a silai hûm chungin a hawi phâwk nghal hrâ mai. "Pu Rin! Kawngka hi hawng rawh!" pâwn lam aṭang chuan Sawmtea aw thûm leh vîn râwng tak chu a rawn ri chher chher a. "I awm tih kan hria a nia! He kawngka hi hawng nghal rawh, hrep tak che hian!" Kawngka chu a rawn ri nawn leh nghal dawt dawt a, bângte chu a nghing lûih lûih thei hial a ni.

Chutah, beidawng leh mangang tâwpkhâwk aw tih hriat ngawih ngawih hian, Pu Tea chu a rawn au chhuak ta hawm hawm mai le! "Khawngaihin... Pathian hmingin kawngka hi min hawn sak hrâm rawh u! Tûmân ralthuam kan rawn hmang lovang!" Pu Tea aw chu ṭah aw tûau in a ri chhuak a. 

"Tleirawl kum 16 mi lek leh hliam nâ tak tuar, thi mêk tlangval kan rawn hruai a nia! Min that mêk a nih hi, i hria em? Pawnah hian min thih tîr in tum ami!" a ti chhuak tuar tuar a. Pâwn lama an in auh buan buan leh kawngkhar an rawn chûm rîk bur bur lai chuan, Pu Rina chu a phîlî buai tâwpkhâwk tawh a. 

"Tumah che su, in chêt sawn chuan ka kâp dâwn che u a nia! Ngawi vek ru!" tiin in chhûng lam damchhuakte chu a silai chuan a tin kual ruai a. Chutih lai tak chuan, pâwn lamah Muani chuan a puan bih lai hnuai chu a va zen rak rak a. A theihpatawpa ngheta a thil hum rawn phawrh chhuakin Sawmtea chu a va pe ta mai!

"Sawmte... hei hi hmang rawh. Nimin lama burma ral ho te, ralthuam tawlhru ho ta kha a rûkin ka lo ak ṭha a lawm." Muani aw khûr dar darah chuan huaisenna a rawn lang chhuak a. Sawmtea'n Muani kuta thil awm a hmuh rual chuan a meng fiah nghal kâwk a, beiseina êng lian tak a rawn nei nghal. 

Chu thil chu 'Grenade' bomb a lo ni! Sawmtea chuan chu bomb chu laksakin, a (pin) chu a pawt phawi dâwn uaih a. Kawngkharpui bul hnaiah chuan tawlh hnaiin theihpatawpa ringin a au vak vak a! "Pu Rin! In chhûnga mite u, lo ngaithla rawh u! Khawchhak ral ho ralthuam, 'Grenade' (Bomb) hlauhawm lutuk ka kuta hi ka hûm a nia! Second sawm chhûngin he kawngka hi in rawn hawng lo a nih chuan, ka rawn vawm lût anga, in vaiin in thih phah vek ang! Ka fiamthu lo a nia, pakhat, pahnih, pathum..." tiin a han chhiar ṭan ta mai le!

'Bomb' tih thû in chhûnga a rawn khâwk luh rual chiah chuan, hmeichhia leh putar, Pi Dâri te ho thleng chuan hlauhnain a ṭhâm chhuak nghal vek a. Thihna thla in a hual vel tak meuh meuh ah chuan tûmân Pu Rina thu an ngaichâng tawh lêm lo. "Hawng rawh u! Kan thi vek dâwn! Pu Rin, kawngka saw hawng vat rawh!" tiin Pi Dâri phei chu a ṭap chhuak pûr a. 

Nutling dangte pawh chuan, "Tualthattu i lo nih tak tak hi! Sawng pawn lama kan mihring puite saw min thah tir i tum em ni!" tiin Pu Rina chu an hnialin, an au khum ta tuar tuar a. In chhûng boruak chu a buai nghal nuai mai. Pu Rina chuan a mipuite'n an rawn hel ta thut mai a hmuh chuan a mangang ve tawh takzet. 

"Ngawi hmak ru! Ngawi rawh u ka tih chu! Ka kâp darh vek dâwn che u!" tiin a silai chu a vâi kual ruai a. Mahse, mipuiin an rawn hnaih chilh tak ah chuan hnung lam a ngaihven hman ta lo. Chu a phîlî buai leh hma lam chauh a tin lai tak chu, in hnung thim china bâng nghênga ṭhu, Puii chuan remchângah a lo la ta hlauh mai le! 

A bula brick bung chang ṭha tak, a rûka a lo hûm rân chu theihpatawpa nghetin a man a. Thâwm dîm tak, mahse theihpatawpa chakin a rawn ding chhuak thut a. Pu Rina rawn hawi let hman hma chiah chuan, a tukhumah tak mai theihpatawpa nâ in a va chhu ta chawrh mai le! Pu Rina chu a rûm chhuak hrâwk a, a silai thlauhin cement chhuatah chuan a thal ta dâwp mai!

A lû aṭang chuan thisen a rawn baw chhuak nghal zung zung a, nikhaw hre lovin a tlu hlawm ta reng mai. Chu veleh Zela leh Chhingpuia te chu kawngkharpui lam pan chuan an dâwk phei nghal zawk a. Mapuia'n lo dan a tum ve ngial pawhin Chhingpuia chuan a hmaiah a lo hnek thal nghal pawp mai.

Zela te ṭhiandûn chuan kawngkhar khar phuina lûng lian pui pui leh thingphek te chu theihpatawpa chakin an theh sawn hlawk hlawk a. Kawngkharpui an rawn pawt hawng chiah chu, nî êng a rawn lût uar a, Sawmtea leh a ṭhiante chu thâwk la hlawp hlawp chungin in chhûngah chuan an rawn inbawh lût ta huk mai! 

Pu Tea leh Hriata ten Awmpuia, thisên kâi nûai leh rûm ri hrâwk hrâwk chu an rawn kâi lût rawk rawk a, an hnungah Fela a rawn tlan lût ve bawk a. Mahse lawm avanga inkuah vawng vawngna hûn a la awm lo! Zothana leh Zauva te an rawn lût hnuhnung ber dâwn chiah tih ah chuan, ramhnuai hnim pik kâr aṭang chuan rûm ri chher chher leh ramsa koham thâwm hi a rawn chhuak leh ta thut mai! 

An inhnial buan buan leh thâwm an siam nasâ lutuk khân ramhnuaia hri kai rual riltâm tak tak te a lo ko khâwm vek chu niin. Zothana'n a han lehhawi chiah chu, tiau chhum kâr aṭang hian hri kai sawm dâwn lai hi theihpatawpa chakin in anmahni lam panin an rawn dâwk phei zawk zawk mai le! 

"Hri kai an lo kal! Khâr vat rawh u!" Zothana chu in chhûnga zuang lût dâwrh chungin a au ṭhawt a. Sawmtea, Renga, Zela leh Chhingpuia te chuan rang lutukin kawngkharpui rit tak chu an nem phui nghal rawk rawk a. An in khâr phui dâwn chiah tih ah chuan hri kai ho chuan kawngka chu an rawn su ri ta bur bur mai!  Mipa rual ten theihpatawpa nghetin an dawm bet a, thîr khen phuina hmanraw hmuh theih ang ang chu midang chuan an rawn la phei nghal mawlh mawlh bawk a.

****************************************************************

Sihpui mual cement in kawngkharpui chu pâwn lam aṭangin theihpatawpa nâ in an rawn su dawt dawt a. Sawmtea, Zothana, Renga, Zela leh Chhingpuia te chuan an theihna zawng zawng sâwm khâwmin an lo nêm bet ve ṭâng ṭâng a. Mahse, hri kai rual chu an rawn pung tam tial tial emaw tih mai tûrin an thâwm a lian in, kawngka nawr hawn tuma an rawn nêk tâk mup mup ah chuan mipa tha ngah tak tak panga meuh pawhin an dang hneh dâwn lo hialin a hriat ta mai. 

In chhûng boruak chu manganna hlîrin a lûah khat a. Hri kai ho koham lutuk tawh chuan thingphek ṭhenkhat chu an rawn nam tliak a, thîr leh thing inkar awng aṭang chuan an kut  thisen kâi nûai mai te chu in chhûng lamah an rawn rawlh lût ta nawk nawk mai le! Hmeichhe ho leh naupang, a bîkin Pi Dâri leh Mapuia te chu hlauh vângin an ṭê chûl a. 

In chhûnga mipa ho tân lah khen phui ṭhat theih a ni tawh lo, chet hlek chuan an rawn bawh lût huk dâwn tih a chiang reng mai si, an dinhmun chu a derthâwng kher mai. Chutih lai tak chuan, in hnung lam thim chin deuhah Awmpuia chu a nâ tuar rûm ri hrâwk hrâwk chungin a lo ṭhu kûn tlawk tlawk a. 

Hri kai ho thâwm in inchhûng a luah khah mek lai chuan, a nâk, Luna'n dim lo taka a chhuihna hliam chu a han keu a. A hliam chu a lo kâk zau tulh tulh a, thisen tharlâm tak chu a rawn chhuak zung zung mai hi a lo ni. A taksa chu a châu in a khûr dar dar a, mahse a thluak erawh a la fîm kher mai. 

A thisen chhuak rim chu a na in hri kai ho tan pawh hla tak aṭang pawh a hriat theih khawpin a nam ngei ang tih a hrethiam a. Hri kai ho rawn pun khâwm zel chhan hi amah vâng a ni tih a hriat rual chuan, inthiamlohnain a rawn tuam nghal hlup a. Awmpuia chu a rawn hawi chhuak a, a mit a len kual ruai a. 

Chutah, in kil khata nizan lama Zauva chhuah rûkna, leichhuat awng, rangva a inkhuh chial chu a va hmu fuh ta chat mai le. Mipa ho kawngka danga an buai mup mup lai chuan, Hlimpuii, hlauh vânga khûr dar dar chunga ding ngawi reng chu Awmpuia chuan a bânah a va pawt phei rawk a. 

Hlimpuii chu a phu zawk a, ṭê chhuah a tum rual chuan Awmpuia chuan a kâ a va hup sak vat a. "Thâwm siam suh..." tiin Awmpuia chu a theih ang tawkin a va hrilh ru sâ sâ a. Hlimpuii'n Awmpuia hmel dâng bâm leh thutak lutuk a hmuh chuan a ṭê chhuak ngam ta bik lo. "Midang hrilh miah suh aw... heng hri kai ho in min rawn hual chhan hi keimah vâng vek a ni." Awmpuia chuan thâwk la hlawp hlawp chungin a ti a. 

"Ka hliam aṭang hian thisen a chhuak nasa lutuk a, a rim an hria a ni. Ka awm ve reng chuan an rawn pung tam zel anga, min that vek dâwn... chuvângin hengho hi ka theih chin chinah hruai bo ka tum dawn a ni." Chu thu a hriat rual chuan Hlimpuii chu a meng phâwk hrâ a, a lu a thing nghal a. 

"Ka chhuak anga, hmun hla deuh zâwkah heng hri kai ho hi ka hruai phei dâwn. An rual hian ka tlân liam pui anga, tichuan ka lo lêt leh em em ang... chumi hnuah chauh chuan i u Sawmtea chu i lo hrilh mai dâwn nia." tiin Awmpuia chuan a ruahmanna hlauhawm tak chu a sawi chhuak ta a.

Hlimpuii chu a mittui a tling nghal pam a, "I mâwl em ni? Chutiang sawi reng reng suh!" tiin theihpatawpa zâwi, fiah fâk si hian a hau hrep a. "I thi dâwn a sin... I chhuak dâwn lo, U Sawmtea te'n min chhan thei em em ang!" tiin dan a tum a, a bânah a pawt lêt ṭâng ṭâng a. Mahse Awmpuia chu a luhlul tawh kher mai, he in chhûnga a ṭhiante, a bîkin Siama'n a nunna hlân meuhva a lo chhanhim tâk a ṭhiante an thih vek a phal lo a ni.

Awmpuia chu a nâk hliam dâwm chungin a tâl hrang a, theihpatawpa chakin leichhuat awng inkhuhna rangva awmna lam chu a pan ta a. Hlimpuii chuan theih tawpin vawn beh a tum ngial pawhin mipa tha chu a hneh dâwn lo tih a chiang hle. Rangva inkhuhna chu dîm tein a la sawn a, ramsa ang maia kawlh hrikai ho kâra thihna hmachhawn tur chuan chhuat awngah chuan a lût thla ta daih mai!

Hlimpuii chu mangang lutukin a awm hmunah a tâwp chawt a. "U Awmpui..." tiin a phun sap a. Tichuan, hlauthâwng lutuk in a u, Sawmtea kawngka danga lo buai mek lam chu a pan ta rawk rawk a. Sawmtea bul a va thlen rual chuan, theihpatawpin a kâwr nghâwngah a pawt a, "U Sawmte! U Awmpuia... chhuat awng aṭang khân a chhuak ru a nia!" a va ti ta vak mai a!

Chu thu a han hriat chiah chuan Sawmtea chu a ding dawt a, kawngka a lo nêm ṭâng ṭângna a kût thâ zâm pawh a thlah hnawk hial a. A meng phâwk nasa kher mai! A farnu hmel thlaphâng tak a hmuh rual chuan eng thil pawi nge thleng dâwn a hrethiam nghal. Renga pawh chuan kawngka lo nêm bet ṭâng ṭâng chungin Sawmtea te unau phîlî buai leh Hlimpuii mangang hmel chu a lo hmu ve reng a, a ngaih a ṭha lo nghal kher mai.

Chutah pâwn lam aṭang chuan theihpatawpa ring hian Awmpuia ngei mai chu a rawn au chhuak ta! "HRI KAI HMELCHHE HO! Heta hi ka awm! Min rawn man ta che u!" tiin mipa engmah pawisak nei tawh lo ang mai hian a rawn au lauh lauh mai a. Kawngkharpui rawn ri dawt dawt leh hri kai rawn innam lût tum rûm hrâwk hrâwk thâwm te chu mitkhap kâr lek ah a reh nghal vek a! 

Hri kai ho chuan thawm lo chhuahna lam chu an va melh thap hlawm a, Awmpuia chu Siama chempui theihpatawpa ngheta hûm chungin, a hliam aṭanga thisen chhuak hnuang chung chuan in kawtzawlah chuan a lo ding rân mai a. Zauva'n a hma zana ramhnuai thim zînga hri kai ho a  in umtir ang chiah khân, Awmpuia chuan hri kai rualin an rawn ûm dâwn chiah tih ah chuan ramhnuai lam panin a theih ang a chakin a tlân luh pui ta huk mai! 

In chhûng lam aṭanga tukverh leh bâng awng aṭanga lo thlîrtu te chuan, mipa huaisen pakhatin a ṭhiante him nâna mithi tho leh rual a hruai liam lai chu mittui tling pamin an thlîr liam  vawng vawng a. Sawmtea chu a harh chhuak zawk a. "Awmpui!" tih leh in hnung lam chhuat awng pana zuan thlâk chu a tum ta mai a. 

Zui ve a, va chhanhim a tum a ni. Mahse a zuang thla dâwn chiah tih ah, Zauva leh Pu Rova chuan a bânah an lo man bet chawt mai! "Keimahni kan kal ang, U Sawmte," Zauva chuan thutak lutuk hian a lo ti a. "Pu Rina hi a rawn harh vat dâwn a, helai in chhûng buaina chingfel tûr hian i awm a ngai. Engtia tih chi nge ni dâwn ro i lo rêl zâwk dâwn nia." a ti nghet charh a.

Tichuan, Sawmtea dâng betin Zauva leh Pu Rova te chu Awmpuia um zui tur chuan chhuat awngah chuan an lût thla ve ta nghal a. Pu Tea, Valtea, leh midangte chuan Awmpuia inpekna leh a dinhmun hlauhawm tak chu ngaihtuahin an inhnît hlawp hlawp hlawm a, in chhûng boruak chu a ritin a lungchhiatthlâk takzet a ni.

*****************************************************************************

Ngaw pui hnim pik tak kârah chuan Awmpuia chu a theih ang a chakin a tlan phei hlawk hlawk a. A nâk hliam aṭanga thisen far chuan a hnunga hri kai rual te chu a hip hneh hle a, an rawn ûm hnai tial tial a. In chhûnga a ṭhiante chhan nan a theih tawp chhuah mah se, a chau tawh takzet a, tlân chhiat reng theih a ni dâwn lo tih a inhria.

A tlân lai chuan a hma lawka thing zung lian pui mai chu a pal palh a, leiah chuan a bawk thla ta thlawp mai. A nâk hliam chu a rawn thîp zawk a, thisen a chhuak nasa lehzual nghal a. Thawh chhuah a han tum a, mahse a taksa chuan a tlin tawh thlâwt lo. A hnung lawkah chuan hri kai sawm rual vel teh meuh chu an rawn thleng chawpchilh ve nghal a.

"Lo kal rawh u!" tiin Awmpuia chuan thei leh thei lovin a chempui chu a lo lek kâng ve a. Hri kai hmahruaitu ber chuan seh tumin a rawn zuang phei nghal a. Mahse, chu hri kaiin Awmpuia a rawn deh hma si chuan, silai ri ring leh fiah tak mai hi a rawn puak ta ṭhuai ṭhuai mai le! Awmpuia rawn zuantu hri kai chu a lû ah tak silaimu chuan a rawn fuh a, leiah a let nghal dâwp a. 

Silai chu a rawn puak chhunzawm zawt zawt a, hri kai rawn tlân phei dangte pawh chu an lû-a kâhhliam vek niin, reilotêah an thal phung hlawm mai a. Silai ri a reh meuh chuan hri kai nungdam reng an awm tawh lo. Awmpuia chuan mak ti takin silai rikna lam chu a en a. Hnim kâr aṭang chuan mipa pakua (9) vel lai mai, ralthuam ṭha tak tak keng hi an rawn chhuak hlawl mai a. 

An zînga an hotu ber ni awm tak, palian leh khabe hmul to siar siar, hmai sêr lian tak nei chuan Awmpuia chu a rawn pan hnai a. He pa hi Khunsanga a ni a, Khama leh Luna te anga ralthuam tawlh ru ṭhin, Burma mi a ni. Khunsanga chuan hri kai thi let phung te chu en kualin, a nui hak a. "I va tuarchhel ve tlangval," tiin Mizo ṭawng pai deuh hian a rawn be chhunzawm a. 

"Khang ramhuai ho khân ka kawng min lo dâl reng a, kan tihfai a ngai hrim hrim a. Nang hian min lo koh khâwm sak hlauh chu a ṭha phian e." a ti zui sup a. Awmpuia chuan chhân a han tum a, mahse a kâ aṭangin thisen a rawn chhuak a, a ṭawng thei tawh lo. Khunsanga chuan a naute chu Burmese ṭawngin a bia a. 

"He tlangval hi hruai tel ang u. Lungthlir lam panin kawng kan zawh zêl dâwn a, Khama te ralthuam thuhruk zawn chhuah nan kawng min kawhhmuhtu a ni thei tlat. Zawn rawh u," tiin thu a pe a. Hêng mite hian Lungthlir a ralthuam thuhruk chu lakchhuah an tum mek tih chu Awmpuia chuan a hrethiam ve ruai ruai a.

Khunsanga naute pahnih chuan Awmpuia chu an rawn man a, an pawm kâng ta nawlh a. Mahse thisen a hloh hnem tawh em avângin Awmpuia chu a meng tawk tawk tawh a ni. A khaw hmuh a thim mup a, a ṭhiante a ngaihtuahna a awm hnuhnun ber rual chuan nikhaw hre lovin a awm ta zui a.

An kal liam hnu reilotêah chuan, Zauva leh Pu Rova te chuan silai puak ri ṭhuai ṭhuai an hriatna lam chu theihpatawpa chakin an rawn pan a. Thâwm lo chhuahna hmun an va thlen chuan hri kai ruang sawm dâwn lai hi a lo let phung a. Mahse, Awmpuia hmuh tur a awm miah lo mai.

Pu Rova chuan leiah silaimu ruak a chhar a, silai pângngai mu a ni lo tih a hre nghal. Zauva pawh chuan Awmpuia thisen chhuak leh, mipa rual ke hniak tam tak kal liamna hnuhma chu a lo hmu ve bawk a. Hri kai nilo, mihring hlauhawm tak dang an awm tih an hriat rual chuan, Sawmtea te hrilh thuai a ngai tih hriain cement thlam lam pan chuan an tlân let ve leh ta nghal a.

********************************************************************

Pu Rina chu a tukhum nâ ngut ngut chung chuan a rawn harh chhuak hlawl a. A han che sawn dâwn a, a kut leh ke chu nghet takin phuar beh a lo ni tawh tih a inhre nghal a. A han hawi chhuak chu, a hmaah tak chuan Sawmtea, Zothana, Pu Tea leh tlangval dangte chu silai hûm rânin, hmel thutak leh rûm zet hian an lo ding khup a. 

A hmaa mipa rual thinrim hmel tak a hmuh chuan Pu Rina chu a thau-ah a zam kher mai. Sawmtea chu a rawn kûn hniam a, a mitmengah chuan khawngaihna chhe tê mah a lang lo. "I lo harh ta maw, hotupa? I dâwt phuah chawp hmanga mipui i lo thununna leh i rorelna rawng tak kha chu a tâwp ta e." aw thûm leh fiah kâk hian a ti a. 

Pu Rina chuan theih leh theih lovin insawifiah a han tum a, mahse a aw a chhuak thei lo, a dinhmun a chhiat tawh em avang chuan sawi tur a hre lo a ni ber e. Chhingpuia chu a rawn pên chhuak ve nghal a, thinrim inpetruh ṭeuh chungin Pu Rina thil tih sual chu an hmaah chuan a rawn puang ta zung zung a. 

"Sawmte, he pa hi khawtlang hruaitu ṭha ber awm zia zângin a inti thu em em a, mahse tualthattu tenawm lutuk a nih hi! Pu Ruala pawh kha amah inchhan nan hri kai bulah a nam phei a, chuan Zauva thiam loh ang vekin he inchhûnga mite hi hmin zui a nih kha!" a ti vîn ṭhak  a. 

Zela pawhin thlâwp takin, "A rûkin kan lo hmu vek a lawm." a lo ti ve bawk a. Chu thu an hriat phei chuan Renga chu a insûm thei tawh lo. A chempui a phawrh nghal a. "Hetiang mi tenawm, mahni sahim nâna midang phatsantu hi chu nungdama zuah reng a ṭul lo. Pâwnah hian theh chhuak ila, hri kai ho chaw atân pe law law ang u. Chu chu a phu tâwk chiah a ni." a ti nghal tun tun mai.

Mahse Valtea erawh chuan ṭhen sawk chungin, "Hri kai chaw atâna pêk ngawt te chu a nuam sa mah mah dâwn a sin. A aia hlauhawm leh hrehawm hian hrem hlak a ngai a ni, a tihsual man hi nâ ti tak chunga a tawrh a ngai." a lo ti bung nghut a. Chung thu râpthlâk tak tak an sawi ri a hriat chuan Pu Rina chu a dâng lâwp lâwp a, thlan fîmin a rawn bual huh nghal vek a.

Chutih lai chuan in kil khatah, Pu Rina thusawi apiang zawm tlat ṭhîn Mapuia chu khûr hlawk hlawk chungin bâng nghêngin a lo ṭhu rûn a. Puii chuan a nu kut vuan reng chungin Mapuia lam chu a kâwk a. Boruak ṭang tak kârah chuan ngeiawm rawng kâi, mahse thutak deuh si hian, "Kha, nichin lawka mipa huaisen, nutling leh nula laka chempui lian pui nêna mi vau khûr khûr tu kha i ni lawm ni? Tûnah lah i chempui hriam tak ai khân i khûr nasa zâwk a nih kha." a ti han sap a.

Bawihi pawh chuan lo tuihnih vein, "Amah aia chak zâwk a hmuh meuh chuan a chempui pawh hum zo lovin zun cheh mai hlau in a ding khur ta zawih zawih a nih hi. Mipa dawihzep tlâktlâi lo lutuk mai." a lo ti ve hlur bawk. Hmeichhe pahnih in khatianga boruak ṭang tak kâra Mapuia an han ṭawngkhum hlak hlak chu a thutak rualin, a dawihzep zia a rawn lan chian em avang chuan nuihzatthlak lek lek zawk.

Mapuia chuan hrem ve a hlau lutuk chu a mualpho pawh dawn lovin a ṭap chhuak ta pûr mai a. "Kei chuan engmah thiamlohna ka nei lo ania, min tina ve lul suh u! Pu Rina hian thah ah min vau a, a thu ka hnial ngam loh vângin chempui pawh kha la chhuak mai chauh ka ni!" tiin a bân a phar chûl a. 

Pu Rina chuan a pawl-pa chutia dawihzep taka a tawng zuah zuah a hmuh chuan a ngei in thah daih mai a nâp a, mahse amah ber chu phuar beh a nih miau avângin theih tawpin a inpetruh ṭeuh ringawt a. Pu Rina chu a beidawng tâwpkhâwk tawh a, theih leh thei lovin, "Sawmte... min thah chuan Camper chabi in hmu dawn miah lo a nia. Khawngaihin min that suh u..." tiin a ṭawng chhuak ve ta hrâm a. 

Mahse Sawmtea chuan hlauhthawnna nei miah lovin Pu Rina ipte chu a va dap sak a, chabi chu a phawrh chhuak ta nawlh mai. "I chhuanlam neih ve chhun pawh ka kawl ta e." tiin chabi chu a vai khum zauh a. Pu Rina chu hremhmun aikaih ang maiin a hawi â ruai a. Sawmtea'n rorêlna tâwp ber a puang dâwn chiah tih ah chuan, an piah lawka chhuat awng inkhuhna rangva chu a rawn ri ṭhuai a! 

In chhûnga mipa ho chuan an silai chu chhuat awng lamah chuan an tin nghal ṭhap a. Mahse hri kai an ni lo! Thâwk la hlawp hlawp leh hmai dâng bâm chungin Zauva leh Pu Rova te chu an rawn chhuak hlawl mai a. Zauva chuan a kuta silaimu ruak nghet taka hûm chungin, "U Sawmte... hri kai ho hi kan buaina lian ber a ni tawh lo! Awmpuia kha... mi hlauhawm tak, ralthuam ṭha tak nei ten an hruai bo daih a nia!" a rawn ti ta mai le! Pu Rina laka an thinrimna zawng zawng chu thâwk leh khatah hlauhthâwnna dangin a rawn luahlan ta vek mai!

*****************************************************************

Awmpuia chu a lu na bur leh hai muai muai chungin a rawn harh chhuak a. A mit a han meng a, a awmna hmun chu a thimin a uap churh a, kudam (godown) hlui tawh tak, hman lohna rei tawh tih hrethiam nghal a. A han che sawn dawn a, a kut leh a ke chu hrui lian leh nghet takin phuar beh a lo ni tawh tih a inhre nghal bawk.

A mit a fiah ṭan a, thim thamah chuan a hawi kual nghal ruai a. Chu kudam ruak leh thim takah chuan amah chauh a awm lo. A sir lawk chhuatah chuan amah ang bawk a kut leh ke phuar beh, hmeichhe pahnih hi an lo ṭhu ve reng ani tih chu a va hmu a. Chung hmeichhe pahnih te chu an hmelah hlauhna nasa tak a lang a, an kâwrhâk te chu a balin an thlaphâng hle tih a hriat theih. 

An hmel aṭang chuan helai hmunah hian an tâng rei tawh tih a rinawm hle. Awmpuia chuan thei leh thei lovin a va hnaih phei deuh a. "Tute nge in nih? Khawiah nge kan awm?" tiin zâwi tein a va zawt a. Mahse chung hmeichhe pahnih te chuan an chhang lo, ṭawng chhuak ngam lo tih hriat takin an khûr dar dar a, AWmpuia chu an melh run ringawt.

Chutih lai tak chuan, an awmna kudam kawngkhâr hlui leh lian tak chu pâwn lam aṭangin a rawn inhawng ri ta tuah tuah mai le. Nî êng a rawn luh rual chuan Awmpuia chu a mit a chhung deuh sawk a, kawngka biangah chuan mipa pathum hlimthla a rawn lang nghal a. Ngaw pui chhûnga rawn chhanhimtu leh rawn mantu, palian khabe hmul tuak vek, Khunsanga ngei mai chu a rawn pên lût a. 

A hnungah chuan a naute, Burma tlangval rorum hmel tak pahnih in silai nen an rawn zui lût ve bawk a. Kawngka chu khârin, an pathum chuan Awmpuia awmna lam chu an rawn pan phei chhet chhet a. Khunsanga chu Awmpuia hmaah tak chuan a rawn ding kâk suah a, "Tlangval... zawhna pakhat chiah ka zawt ang che. Kan awmna khua hi Lungthlir a ni em?" tiin Mizo ṭawng pai deuh hian a rawn zawt a. 

Awmpuia erawh chuan chhân a tum lo, ngawi rengin a lo melh lêt ve kar a. Khunsanga chu ngeiawm zet hian a nui chhuak hak a. "I nâk hliam kâk nasa tak kha ka naute hian ṭhui phuiin an tuam dam sak vek che a. Chhanhim i nihna ah lawmthu sawi ahnêka khatianga a ngeng zâwnga i rawn awm vel kha ka duh loh zâwng tak a ni a nia aw!" tiin a vau chhur chhur a.

Awmpuia chuan a nâk hliam chu a han ngaihtuah a, a lo na vak tawh miah lo tih a hre ve chiah. Mahse he ralthuam tawlhru tu misual hnenah hian tlawm emaw, ṭha taka chhân emaw a tum hauh lo. A ṭhiante leh Khama te vângin Burma ralthuam tawlh pawl ho a huatna kha ala lian hle a ni. 

"Tun chiah ka zawt nawn leh ang che..." Khunsanga aw chu a rawn vawt raih a, fiamthu hmel a pu tawh lo. "He khua hi Lungthlir a ni em?" a han ti nawn leh a. Mahse Awmpuia chuan a kâ a chip tlat a, a aia rum leh inpetruh ṭeuh chungin Khunsanga chu a melh ngawt ngawt a, a chhang duh chuang lo.

A chhân dâwn loh zia a hmuh rual chiah chuan, Khunsanga chuan a pheikhawk lian pui chuan Awmpuia hmaiah tak chuan theihpatawpa na in a chhuih ta pawp mai le! Awmpuia chu a thal nghal thuai a, a lu a hai nghal muai muai a, a hnar aṭang chuan thisen a rawn baw chhuak nghal hawk hawk a.

Chu thil râpthlâk tak an hmuh rual chuan, a sira phuar beh hmeichhe pahnih te chu hlauh vângin an au chhuak nghal tuar a. Mahse Khunsanga'n rum taka a va melh rual chiah chuan an kâ an hup a, an ngawi nghal hmak a, hlauhnain a ṭhâm khawng nghal vek a ni ber mai. Khunsanga chuan a naute pahnih lam hawiin, "Lo hruai chhuak rawh u." tiin thu a pe nghal a. Burma tlangval pahnih te chuan Awmpuia nikhaw hrelo ṭêp tawh chu dîm baksak lovin an pawt tho lawp a, kudam pâwn lamah chuan an hnûk chhuak ta dawr dawr a.

***************************************************

Zauva leh Pu Rova thusawi vang chuan in chhung boruak chu a inthlak hlawk a. Pu Rina an lo thinrim khumna zawng zawng kha hlauhthawnnain a rawn thlak nghal a ni ber mai. Sawmtea chuan a silai chu theh thla in, "Eng nge i sawi awmzia? Tute nge chu mite chu?" tiin a zawt a. A aw ah chuan mak tihna leh manganna a ri chhuak hial a.

Pu Rova chuan a kuta silaimu ruak tla a chhar ho chu rawn phawrh chhuakin, "Hri kai an ni lo. Sipai inthuamna ang deuh rawn inbel, ralthuam tha tak keng an ni, ral khat atang khan kan hmu hman thuak alawm. Awmpuia thisen chhuak leh an hnuh liamna hnuhma kan hmu a ni." a ti a. 

Zothana chuan chu silaimu ruak chu a lo la vat a. "Hei chu kan hman thin ang a ni lo, ralthuam tawlhru thin, Burma lam mi an ni mai thei. Tute pawh nise min hmuh chuan min that hreh miah lo ang." tiin a lo sawi ve a. Chu thu a hriat chuan Sawmtea chu a insum thei tawh lo. A chempui leh a silai chu a chhar leh vut a. 

"Chuti a nih chuan umzui nghal ang u! Awmpuia saw nungdamin an hruai a, kan chhan chhuah ngei a ngai." a ti nghal chhur chhur a. Tual zawlah chhuah mai a tum chu Zothana chuan a dar ah a lo man bet chawt a. "Inngaihtuah fim rawh, Sawmte! Kan vaiin kan chhuak thei lo." tiin a lo dang a. 

Zothana chuan hmeichhia leh naupang ho chu a kawk kual a. "Heng mite hi ramsa kawlh ho karah kan theh chhuak ngawt dawn em ni? Chuan, Pu Rina pawh hi kalsan chi a ni lo. Kan kal darh vek chuan kan thih phah vek zawk ang." a han tih chhunzawm leh a. Pu Tea pawh chuan, "Zothana sawi chu a dik a ni. Pawl hnih ah inṭhen a ngai. A huaisen leh ralthuam hmang thiam zual te chauh kal ula a tha ang." a lo ti ve a.

Tichuan ruahmanna an siam ta zung zung a. Zothana chuan, "Kei, Sawmtea, Zauva leh Renga te hian heng ralthuam keng ho hi kan va chhui zui ang. AWmpuia chu chhanchhuah kan va tum dawn nia." a han ti leh a. "Pu Tea, Valtea, Zela leh Chhingpuia, nangni helai ah hian in lo awm ang. In hi lo veng uluk ula, heng hmeichhia leh naupang ho hi him takin in lo awmpui dawn nia." tiin thutlukna an siam ta a.

Chu thu an hriat rual chuan leichhuata phuar beh, Pu Rina chu ngeiawm zet hian a rawn nui chhuak a. "Pawl hnih ah in inthen dawn maw? In chak lohna in rawn pho chhuak a nih chu. Khang mihring ho khan an lo that vek mai ang che u." tiin ngeiawm zet hian a lo tawng khum a. 

Sawmtea chuan ngawi rengin Pu Rina chu a va pan phei a, a nakah tak chuan theihpatawpa na hian a va chhuih pawp a. "I ka kha lo chip hmak rawh. Ka lo let leh hunah kan la inbe dawn nia." a ti bung hmuk a. Mapuia phei chu hlauh vangin zun a lo cheh lo chauh a. Sawmtea kal chhuak tur chu Hlimpuii chuan tap pur chungin a rawn kuah thlawp a. "U, kal suh. U Awmpuia chu a thi tawh pawh a ni thei. Ka chan ve duh lo che." a lo ti tham tiak a. Sawmtea chuan a thiam ang tawkin a thlamuan a, tichuan mipa pali te chu chhuat awngah chuan an chhuk thla ta a. In chhunga mite tan chuan  lo  nghah ngawt ngawt mai loh chu tih theih dang a awm lo.

***************************************************************

END OF EPISODE 1