SHIVER (MIZO FICTION ANTHOLOGY HORROR STORY) Written by : Aaron Malsawmdawngzuala CHAPTER - 4 (LAST)

 SHIVER

(MIZO FICTION ANTHOLOGY HORROR STORY)

Written by : Aaron Malsawmdawngzuala

CHAPTER - 4

(LAST)

***************************************

Ropuia chu a tlan zel a, mahse thil dik lo chu a awm tih a chiang a ni. A tlan mekna kawng pawh chu vawi tam a tlan tawhna ni mahse, danglam tlat hian hriatna a nei a. A tlan thui zel a, kawngsira thingkung lian tak mai pakhat, langsar em em mai chu a tlan pelh pah chuan a han en zui vawng vawng a.

"Ka tlan pel daih tawh khan ka hre sia." tiin a han phun sap a. Tichuan a tlan zel a, rei lo te ah chuan kha thingkung, a hma lawka a tlan pelh ang chiah chu a lo ding leh reng mai a nih chu. A thin a phu dup dup tawh a, a ruih pawh a reh vek tawh. Mak tih hmel tak hian, "Engtin nge a nih theih?" a han ti zawi leh sup a.

Mahse a inti huaisen lui a, a tlan zel a. Reilote hnuah chuan a hnungseat atang chuan chu a phurh mek, pa mak tak mai chu nau awi ni awm tak hian a rawn zai ri ret ret ta mai a, a rawn hum a ni zawk mah ang chu. A thluk lah chu a mak em em a, Ropuia thauhvah chuan a man tlat mai.

Mahse engmah a sawi lo, a tlan zel a. Chupa pawh chu a rawn bei ring tial tial a, Ropuia chuan a hlau rilru deuh bawk si, thinrim bawk si chu a insehruh nasa tawh mai a. An tlan thui zel a, chupa chuan a rawn bei ring tial tial mai. Ropuia chuan a aw a han thian kharh a, "Khawi laiah tak nge i kal duh?" a han ti vin ta thak a.

Chuveleh a zai lai pawh chu a tawp hmak a, motor chhung chu a reh ta diak mai. Chupa chu a rawn awm hnai deuh va, "I hre thuai mai ang." a rawn ti thum ta chhur chhur mai le. Ropuia chuan a rearview mirror chu a han en a, a passenger hmel chu a hmu ta. A phu nasa kher mai, a mit chu a dum hian a lo dum nguk mai a.

A vun lah nise a dang var pup a, zau tak hian a lo la nui then thu zui. Ropuia hlau lutuk chu a break a han rap nghal vat a, a taxi pawh chu a ding nghal chat mai. Amah pawh chu a thlawk chhuak lo chauh, a bu lawp mai. Tichuan rearview mirror chu a han en leh vat a, mahse tumah a hmu ta tlat lo mai.

Hnunglam a hawi nghal vat a, a seat hnungah chuan tumah an lo awm tawh lo. Ropuia mak ti lutuk chu a ka hau mai a, "Engtin nge, khawnge a awm?" tiin a hawi kual nasa mai a. Chuveleh khapa zai ri kha a rawn ri leh ta, mahse khawi atanga rawn chhuak nge a hre lo. A ring em em mai a, car chhung ah chuan a khawk hian a khawk hi a ang ber zawk.

Ropuia chuan a hlau tawh takzet, a car atang chuan a chhuak a. A han hawi kual vak vak a, mahse tumah a hmu lo. Khawkar kawng reh tak mai leh ramhnuai em em mai ah chuan amah chauh chuan a awm a, tumah dang an awm ve lo. Zai ri pawh chu a tawp leh nghal a, a che buai takzet.

Engtia han awm tur nge, eng nge tih zel tur pawh a hre lo. Ke in kal dawn se, khaw hnai ber lah a la hla ropui si a, motor chhungah lah khapa kha a lo lang leh thut angem a hre si lo. A mangang lutuk chu a tah a chhuak ngawih ngawih a, a thlanin a bual huh vek tawh bawk. Rei fe a inngaihtuah hnu chuan motor chhungah chuan a lut leh ta tawp a, a tlan chhunzawm leh ta.

Mahse a tlan mekna kawng chu a hriat ngai a ni pawhin a hre lo, a kawng chu a mak tual tual mai a, a bo tual tual bawk. A mumang ni zawk se a ti ve khawp ang le, mahse a tak ngei a ni bawk si. Minute 10 vel hnu ah chuan amah tawk zawnga lo tlan, car dang chu hla vak lo atang chuan a rawn lang ta hlauh mai.

Ropuia pawh chu a thaw huai a, a him ta ni ah a inngai a. A han tlan chak zual sawt a, mahse motor chu a rawn hnai tial tial a. Ropuia chu a ding leh ta chat mai, mak ti tak hian a hma a motor lo tlan mek chu a en hu ringawt a. Chu motor, amah tawk zawnga lo tlan mek chu ama taxi ang chiah chiah a ni.

A chhungah chuan amah ngei mai chu a lo chuang ve tho va, an thawmhnaw hak pawh a in ang chiah chiah. Mahse an hmel erawh a inang chiah lo, a vun a var vek bik a, a mit pawh a dum nguk mai. A seat hnunglamah chuan khapa, passenger mak tak mai kha a lo thu ve bawk a.

Ropuia chu an melh dun khur mai a, a hma zawn takah chuan motor chu an rawn tiding ve bawk a. Ropuia chuan a chil a lem dawk a, "Engtin nge a nih theih?" a ti khur dar dar a. Chutah le, seat hnunglam atang chuan aw thum tak mai hian, "I tlanchhuak thei tawh lovang." a rawn ti thut mai a.

Ropuia chu a phu nasa kher mai, a rearview mirror chu a han en leh vat a. A seat hnungah chuan kha passenger kha a lo thu leh der tawh chu niin, a hma zawn a en leh vat a. A taxi ang chiah a hmuh kha a lo awm leh tawh miah lo, kawng phei thim ruih mai bak chu thildang engmah a awm lo.

A hlau tawh takzet, au vak vak chung chuan motor atang chuan a chhuak a. Chu zan thim tak hnuaiah chuan Ropuia chu a tlan chiam chiam a, ramhnuai lamah te chuan a tlan phei zel a. Mangang tih hriat tak hian, "Min pui ru, khawngaihin min tanpui rawh u." tiin a au vak vak mai a.

Rei fe a tlan hnu chuan a thil hmuh avang chuan a ding chat mai, a hma zawn takah chuan kha passenger kha a lo ding a. A kut a lo phar chhuak a, Ropuia chu a lo nuih sang mai. Ramhnuai thim ruih mai pawh chu a sen deuh phut hian a lang a, "Ka lo lawm a che." tiin chupa chu a nui ta vak vak mai a.

A tuk zingah chuan Ropuia taxi chu kawngsirah zin vei vak ten an hmu a, amah Ropuia erawh hmuh tur a awm lo. A driver seat lam kawngka chu a inhawng huau a, a wallet te, a phone te leh a bag te chu a lo la awm vek thung a. Police koh nghal niin Ropuia chu an zawng nghal chiam a, mahse hmuh leh a ni ta hauh lo a ni.

THE END

*************************************************************

THAWNTHU PASARIHNA :

"LET ME IN." ("MIN LUH TIR RAWH.")

Ruah chu a sur nasa em em a, a khat tawkin khawpui chu a ri leh dur dur thin. Boruak pawh vawt tak a ni, Maengi chu sofa ah thu in lehkhabu chhiar pah chuan thingpui sa ver vawr tak mai chu a han lem deuh sak sak a. Maengi hi kum 25 niin a nu leh a nau mipa nen chauhva cheng an ni a, hemi zan erawh hi chu amahin a awm a ni.

A nau chu Shillongah zirna avangin a kal a ngai a, anu chuan chhun lamah Airport ah ava thlah a. Ruah a sur nasat em avangin anu pawh a la rawn let mai thei lova, MAengi hian amah chauhvin a lo nghak mek a ni. Chutia thlamuang taka lehkhabu a chhiar mek lai chuan kawngka chu a rawn inkik karh karh mai a, anu a nih ringin rang takin sofa atang chuan a zuang tho nghal a.

Mahse a ding deuh chat mai, motor tlan thawm engmah a hre lova. Chubakah anu pawhin a rawn phone hmasa lo hrim hrim, a ngaih chu a tha teh chiam lo va. Kawngka chu hawng mai lo chuan tukverh lam chu a pan ta zawk a, parda chu a han keu va. Kawngka bulah chuan pa pakhat, kum 40 vela upa hi a lo ding run mai.

A huh vek a, kawngka bul chhuat te pawh chu a huh vek mai. Maengi chu kawngka lam pan chuan ava kal leh a, "Tunge ni?" a han ti a. Pawn lam atang chuan chupa chuan, "Thiannu, rawn tihbuai che chu ka hreh viau a. Mahse ka motor a chhia a, ka phone a thi tawh bawk si nen...tu emaw min phone sak thei angem ka rawn ti a nih hi." tiin a lo chhang a.

Maengi chu a han ngawi vang vang a, sana a han en a. Dar 11 a ri dawn tawh a, chutiang zan tlai tawh lutuk a hmelhriat loh, mipa lehnghal a ina luh tir tawp mai chu a ngam chiah bik lo. Kawngka chu tlem te a han hawng a, chupa hmel a hmu chu a engemaw rap deuh riau lehnghal.

Chupa chuan inla polite tak hian a lo nuih vel suk a, "Ihh...tah hian lo nghak la. Ka hmelhriatte ka'n phone ang e, ka rei lovang." Maengi chuan a han ti khur deuh dar dar a. Chupa pawh chuan a lu a lo bu nghat a, "Ka lawm e, i fel hle mai." tiin a lo chhang leh a. Maengi chuan rang takin kawngka chu a khar leh nghal a, kha pa nui hmel khan a awm a ti nuam lo thei hial.

A phone chu a la a, tanpuitu thei tur awm ang chu a han phone a. An inbiak fel hnu chuan kawngka lam chu ava pan leh a, "Minute 20 vel hnuah an lo thleng thei ang, ka be fel tawh e." tiin kawngka hawng chuang lem lo chuan a han hrilh a. Chutah pawn lam atang chuan chupa chuan, "A lawmawm e, ala rei dawn hle mai. I chungah ka lawm e, MAeng." tiin a rawn chhang ta mai a.

Maengi chu a ding ngil zawt mai, mak a ti takzet. Khapa kha a vawi khat hmuhna chauh a ni a, hriat pawh a hre ngai lo. Mahse a hmingin a rawn ko thei nghal ta mai chu a hrethiam lo kher mai, "Eng.. engtin nge ka hming i hriat?" a ti bah deuh nuai mai a. Mahse chhanna a dawng tawh lo, a reh hmak mai.

"KA pu.... ka pu?" tiin a han ko vak vak a, mahse chhanna reng a dawng tawh lo. Fimkhur tak chung chuan kawngka chu chhete a han hawng a, a han dak de de a. Khapa kha a lo awm tawh hauh lo, chumai nilovin kawngpui lamah leh an in kawtah pawh chuan eng motor mah a awm lo bawk.

RAng lutukin kawngka chu a khar nghal a, a kalh nghal hmak bawk. Tichuan tukverh zawng zawng chu a check vek bawk a, a thla a muang lo takzet. Anu chu phone a han tum a, mahse a tlang thei der mai si lo. Sofa lamah chuan a va phei leh a, thu chung chuan a phone chu a khawih a.

Minute 30 a liam tawh a, mahse khapa puitu tura a kohte chu an la rawn lang thei reng reng lo mai. Chutah choka lam atang chuan thawm a rawn awm ta tlat mai, a phu nasa em em a. Sofa atang chuan a zuang tho nghal a, choka lam thim ruih mai chu va enfiah a tum a. MAhse a ngam chiah lo, light on dawn lahin a chhung, gas bulah daih plug a awm bawk si.

Sitting room dawhkana torch light chu ava la a, tichuan choka lam ah chuan ava phei leh a. Choka chhung a lut chu a vawt deuh bik ruih hian a hria a, light chuan a han en kual deuh chiam a. Mahse tumah a hmu lo, chutah choka tukverh lam chu ava en leh a. Mipa pakhat lo ding run mai, dum vek mai chu ava hmu ta.

A hlau lutuk leh phu nasa lutuk chu choka atang chuan a tlan chhuak nghal a, bedroom lam a pan nghal. Mahse a thleng tep tih ah chuan kik ri a hre leh ta, a ding chat a. Tun tum chu kawngka kik ri a ni tawh lo, tukverh atangin a ni. Sitting room tukverh lam chu ava hawi a, khapa ngei mai kha a lo ding leh run mai.

Rum fe hian Maengi chu a lo melh khur mai a, "Min luh tir rawh." chiang fek fawk hian a ti thum chhur chhur mai. MAengi hlau lutuk chu a thlan a tla zawih zawih a, "Kal..kal bo rawh. Po.... police ka phone ania, an lo man ngei ang che." a ti khur dar dar a. Mahse chupa chuan a hlauh loh hmel kher mai, "DAwt sawi suh, tumah i call lo. Nangmahin i awm, min luh tir rawh." tiin a lo chhang let leh a.

MAengi hlau lutuk chu a khur zawih zawih mai, mahse a chet leh hma chuan light chu a rawn thim ta hmak mai le. A mangang takzet, a phone chu a phawrh a. Mahse NO SIGNAL tih a lo inziak kuau mai, "Hrep taka.." tiin a insehruh nasa mai a. A phone flashlight chu a on a, inchhung chu a en kual a.

Bedroom lam chu ava pan leh a, mahse bang tawpna berah chuan khapa kha a lo ding khur mai a nih chu. A lo nuih vur vur a, "Kawngka zawng zawng i khar vek hleinem, khar kimloh i nei." tiin a rawn pan phei ta chhut chhut mai le. Maengi pawh chu a inhrechhuak zawk a, ama room ngei mai, pawn lam panna kawngka chu a kalh lo tih a hre chhuak zawk a.

Mahse a tlai tawh lutuk, a au vak a. Choka lam chu a pan leh a, an choka lamah hian darthlalang hmanga siam kawngkhar a awm a. Choka a luh veleh chuan kawngka chu a khar nghal a, kalh a tum a. Mahse kawngka zawn tak ah chuan Chupa chu a rawn dak thut mai a, darthlalang atanga siam a lo ni bawk nen, an inhmu chiang kher mai.

Maengi chu a t(r)e nasa mai a, kawngka pawh chu kalh lo chuan a tlan lehnghal a. Choka tukverh ah chuan a zuang chhuak ta ringawt mai, chak takin ke lawngin khawlaiah chuan a tlan ta chiam mai a. Ruah lah chuan ban reng reng a tum lo emaw tih tur khawp hian a sur tam tulh tulh mai lehnghal.

"Min pui ru, khawngaihin min pui ru." tiin a au vak vak a, mahse tumah puitu tur a hmu lo. A bengah chuan khapa aw mawlh mai kha a cham reng a, "I tlanchhe thei chuang lovang." tiin a rawn hrilh leh thin a. Mahse khawi atanga thawm lo chhuak nge a hre lo, "MAeng, tlan tawh suh...inpe mai rawh." tiin aw chuan a umzui reng a.

Kawng sir lama ramhnuai lam panna ah chuan a tlan phei ta ringawt a, ke lawng a tlan a ni bawk si nen, kekawr bul a ha bawk nen, a thim bawk nen, Maengi chu a taksa pawh a pilh nuai tawh mai. Mahse a tlan zel a, vanneihthlak takin aw chuan a umzui tawh lo hlauh mai. A ding a, a awm dawm meuhvin a thaw hlawi hlawi a.

A awmna chu a han enkual a, khawiah ber nge a awm a hre ta hauh lo mai le. A kal zel a, a ramhnuai tulh tulh mai. Mahse rei vak lovah chuan kawngpui chu a pawh leh ta hlauh mai a, a thaw huai mai. A hlauhna erawhin ala kian san chuang lo, chutah le... khapa aw bawk ka a hre leh ta.

"Maeng, i him tihna a ni lo." a rawn ti thum leh ta chhur chhur mai. MAengi chu a phu leh zawk a, a tlan leh ta. Ruah lah chu ala bang lo nasa mai, mahse rei pawh a tlan hma chuan vanduaithlak takin lung a rap hrual a, lamlianah chuan a tlu bawk ta thlawp mai. A na a ti lutuk chu a tap zawih zawih a, thawh pawh a tho mai thei lo.

Chutah pen thawm a hria a, amah rawn pan phei niawm tak a ni. Hlau chung chung chuan a han hawi chhuak a, a hlauh ang ngei ngeiin khapa bawk kha a lo ni. Nel awm loh tak hian a nuih sung a, "MAeng, min luh tir mai tur kha i ni reng asin." tiin a rawn pan hnai zel a. Maengi chu a tho thei lo, mangang takin a au vak vak ringawt mai a ni.

Zankhua a ruah a sur avang chuan zing lamah chauh MAengi nu pawh chu a rawn haw thei a, a fanu a phone tlang thei bawk si lo nen a mangang ve khawp mai. Mahse in a thlen meuh chuan kawngka chu a lo inhawng huau a, chhuat chu a huh dup bawk. Maengi chu hmuh tur a awm hauh lo, hemi hnu hian Maengi hi a bo hlen chu a ni ta der mai.

THE END.

******************************************************

THAWNTHU PARIATNA :

THE MISSING MAN (MI BO TLANGVAL)

Tlai dar 5 niin khua pawh a thim hnai tan tawh a, jogging turin Kimkimi pawh in atang chuan a chhuak a. An veng hi kawnghnuai lam a ni a, tlai lamah phei chuan a reh tha angreng thin hle a ni. Kimkimi chu lamlianah chuan a tlan thauh thauh va, a thlan pawh a tla nasa tawh hluam hluam khawp mai.

Rei fe a tlan hnu chuan haw zai a rel ve ta a, a haw lamah chuan thingkung a thlalak intar a hmu chu a ding chat mai. A han en chiang a, mibo poster a lo ni. Thlalak ah chuan tlangval pakhat, a la hmuh ngai reng reng loh hi a lo lang a. Chiang tak hian a hming, LALROHLUA tih chu a lo inziak kuau mai.

A hnuai leh deuh ah chuan, 'Ramhnuai lama a kal hmuh hnuhnun ber a ni a, t shirt dum leh kekawr dum a ha a ni.' tih hi a lo inziak tel bawk. Poster en reng chung chuan Kimkimi chu a han inngaihtuah vang vang a, "KA la hmu ngai lo reng reng, kan venga awm chu a ni awm sia." a ti nuah nuah a.

In lam pan chuan a tlan chhunzawm leh mai a, mahse a ding leh deuh chat a. A va hawi let leh a, thlalak ami Lalrohlua chuan a rawn en kur ni hian a hria a. A rap ru angreng phian mai, a khi suk a. Tichuan a tlan chhunzawm leh a, in lamah chuan a haw ve ta a. Kimkimi hi kum 22 mi a ni a, college zirlai niin hriselna ngai pawimawh mi tak a ni.

Zan a lo ni a, Kimkimi chu a muhil thei mai lo tlat. Khumah chuan a inlet a inlet a, a chang leh a bawk a, a chang leh a saisir a. Eng ang pawhin awm se a mut chu a chhuak thei hauh lo mai, a mitthla ah chuan tlai lama a hmuh, mibo poster a Lalrohlua hmel chu a awm reng mai.

Zangthal zawng chuan a han mu leh a, inchung ceiling chu a han en vung vung a. Rohlua hmel hlir chu a ngaihtuahna ah chuan a awm a, mak a inti kher mai. Zan dar 11 a pel tawh a, zan dang chu nise a muthilh a hun daih tawh. Mahse zanin zet zawng, chu mibo hmel mawlh mai chuan a muthilh tir thei hauh lo mai.

Reilote hnuah chuan a muhil thei ve ta hlauh mai a, mahse a mumang lamah thleng chuan Rohlua chuan a tibuai chhunzawm ta tlat mai le. Ramhnuai ah hian Kimkimi chu a lo awm daih mai a, zan ala ni zui. Nidangah pawh an veng bul chiah a ni bawk nen, ramhnuaiah chuan leng turin a thiante nen an kal ho fo thin a.

Mahse a mumang ramah erawh a dang deuh tlat, thingkung leh hnim te chu a dum deuh khup bik hian a hmu a. Boruak vawh dan pawh a danglam tlat, sava hram leh rannung hram pawh engmah a ri lo. Chu ramhnuai vawt leh thim tak mai chu a reh thuap mai a, thingkung tam tak, lian tak tak leh a zung invial tup mai karah chuan a ding ran a.

Chutah le, thingkung phen atang chuan mipa ni awm tak, cher lam deuh leh sang vuah mai hi a rawn lang thut mai a. A pian atang leh a lu shape atang chuan Kimkimi chuan tunge a nih a hre thei tlat, "Lalrohlua.." a ti zawi sap a. Chutah chu thla chu a ding thut mai a, thla eng ina a en phak chin ah chuan a rawn ding a.

A hmel chu a rawn lang chiang ta, a rin ang ngeiin kha mibo poster a mi, Lalrohlua ngei mai kha a lo ni. Poster ami nen a hmel in ang chiah chiah mahse danglamna a nei tlat, a vun chu a ngo satliah a ni lo, a var deuh vek mai a. A mitmu te chu a dum chiang bik em em bawk a, Kimkimi chu a mitah tak chuan a rawn en kur mai.

Kimkimi chu a khur zawih zawih mai a, a hlau takzet. Mahse a che sawn thei lo, a ke leh lei chu a inchar ang mai hian a tang tlat hian a inhria a. Chutah Rohlua chuan a rawn pan zel a, "Min hmu reng, min hmu reng a ni lawm ni?" a rawn ti ta chhur chhur mai le. A aw ri te chu a mak em em a, kil tin atang hian a rawn ri chhuak emaw tih mai tur a ni.

Kimkimi chu tawng ve tumin a ka a han ang zuau a, mahse a kha a chih tlat mai. A tawng chhuak thei reng reng lo, tlanchhiat pawh duh viau mahse a taksa chu a che sawn thei der mai si lo. Chutah Rohlua chu a muangchang chuan a hnung tawlh a, thingkung lam pan chuan a let leh a.

Reilote ah chuan a ral riai riai a, a bo daih mai. A mumang ram atang chuan Kimkimi chu a rawn harh chhuak thut mai a, a thaw hlawi hlawi mai. A thlan chuan a lo bual huh vek a, a mumang a ni hlauh chu a thaw huai mai. Mahse mak a ti lutuk tlat, a chhan chu a mumang kha  atak ang chiah chiah in a feel thei tlat a ni.

Khum atang chuan a tho chhuak a, a chal thlan buah mai te chu a han hru fai a. A awm a nuam lo ruih thei hial a, "Tinge maw khapa kha ka rilru ah a awm tlat le?" tiin ama hriat tham lek chuan a phun nuah nuah a. Kawngka lam ava en chu a phu zuk mai, zan hmasa lamah a mut dawn khan kawngka chu a khar thlap si a, mahse chhe te in a lo inhawng reng mai a.

Ni hnih thum vel a liam a, Kimkimi mumang chu a tha lo tulh tulh mai. Tlai khat chu evening walk a nei leh a, nidanga a tlanna hmun ah tho chuan a ni. Mibo poster pawh chu a la awm reng a, Rohlua chu hmuh a la ni hauh lo tihna a nih chu. Tichuan a tlan zel a, mahse ngaihthatlohna riau a nei.

A hnungah chuan amah zui niawm tak, pen ri thauh thauh hi a hre tlat mai a. A tir chuan a bengchhe ri a nih ringin engah vak a ngai lo lui a, mahse pen ri chu a rawn hnaih telh telh avang chuan a hlauthawng deuh tan a. A ding chat a, rang lutukin hnunglam chu a hawi let vat a.

Mahse tumah a hmu lo, kawng chu a reh ruih mai a. Mipui kal vel pawh hmuh tur an awm lo, tichuan Kimkimi pawh chu a thaw huai a, a tlan leh ta a. A tlan mek lai chuan kawngsir chu a en zeuh zeuh va, mmibo poster chu thingkung tin maiah chuan a lo intar zel mai a, mahse makna riau a nei.

Poster chu a tlan thui zel a, a fiah telh telh mai hian a hria a. Rohlua thlalak chuan amah Kimkimi chu a melh rum tulh tulh zel mai hian a hria a, a ngaih a tha lo takzet. Chumai ala ni lo, poster pakhatah chuan thil a inziah belh tlat mai. Kimkimi mit chu a la em em a, a ding chat a.

A han chhiar chiang a, 'Engvangin nge min tanpui loh?' tih hi a lo inziak tel tlat mai a nih chu. Ama chhiar tur bika ziah niawm tak hian a hria a, mahse a awmzia a hre der mai si lo. A han inngaihtuah a, Rohlua chu poster a thlalak tih loh chu nidangah ala hmu ngai der mai si lova, mahse inzawmna riau an nei ang tlat hian a hre bawk si.

Amah pawh chu a inhrethiam lo takzet, Rohlua hi mibo satliah mai nilovin, ama hnenah ngei eng emaw tak a sawi duh a nih a ring hial a, mahse chutiagn ngaihdan erawh a atthlak viau in a hre bawk si. A awmna chu a han enkual a, amah chiah chuan chulai kawngah chuan a awm a.

Nidangah chuan mi an vei ve deuh hut hut thin a, mahse tun tum chu amah chauh va chutia a awm mai chu mak a ti angreng hle bawk. Tu emaw tak chuan a enthla reng ni hian a inhre tlat bawk a, a awm chu nuam lo tak a ni. Rang takin an in lam pan chuan a let phei leh nghal a, a tlan in a tlan haw a ni ber mai.

Zan a lo ni a, Kimkimi chuan mumang mak tak a nei leh ta. Evening walk a lo nei leh mek a, mahse hemi tum hi chuan khua a thim tawh thung a ni. Lamlian chu a reh em em a, khawkar kawng ang maia reh a nih avang chuan thawm pawh a awm mang lo tluk a ni. A pen ri leh thli thaw deuh vuk vuk ri bak chu thawm dang a awm meuh lo.

Tichuan a tlan zel a, mahse thawm dang hriat a nei ta tlat mai le. A hnungah chuan tu emaw hi a rawn tlan ve ni tlat hian a hria a, a pen rual deuh chiah chiah hian a rawn pen ve ni tlat hian a hria a. A han tlan muang deuh va, a hnunga pen ri pawh chu a rawn muang ve zel mai. A ding a, hnunglam chu a hawi nghal vat a.

Chutah a hmu ta, Rohlua ngei mai chu a hnungah chuan a lo ding run mai a nih chu. A thinrim hmel em em a, lungawilohna nei ni awm tak hian Kimkimi chu a melh run a. A vun te chu a dang var ang pup leh ta nghal a, Kimkimi chuan a hlau takzet. Thaw hlawp hlawp chung chuan, "Ro..Rohlu..Lalrohlua..i ni em?" a ti tham tiak a.

MAhse Rohlua chuan a chhang lo, mit khap miah lo hian a en reng ringawt a. Kimkimi chuan a chil a lem dawk a, "Min kalsan rawh, min rawn hnaih suh." a ti khur dar dar a. Chutah Rohlua chu muang chang chuan a rawn kal phei a, Kimkimi lam chu a rawn pan a ni. Muang fan raih hian, "Tinge min hriat loh der tlat a, Kimkim?" a la rawn ti zui.

Kimkimi hlau lutuk chu a tlan chhia a, mahse a tlan chak thei hauh lo. Hnunglam ava hawi a, Rohlua lah chu a rawn hnai tual tual a, kal pangngai a kal reng ni si chuan Kimkimi chu a rawn umpha titih der mai. Au vak vak chung chuan, "Min kalsan rawh...ka duh lo." tiin Kimkimi chu a rak vak vak a.

Rohlua chuan thinrim hmel tak hian, "Min pui rawh, Kimkim...tige min kalsan i tum?" tiin a rawn vin zui vak vak mai. Kimkimi chu a t(r)e vak vak a, a tap pur tawh bawk. "Ka nghahna che a rei tawh lutuk, nangmah chauh hian min chhanchhuak thei." tiin Rohlua chuan a rawn au zui reng bawk a.

A mumang tam atang chuan Kimkimi chu a rawn harh leh ta, a thu chhuak hlawl mai. A thaw hlawi hlawi a, a thlan chuan a lo bual huh leh vek tawh mai. A tuk zingah chuan a chhungte bulah chuan a sawi ta tawp a, mibo Rohlua a mumanga a hmuh thin thute, tlai a excer lak apianga eng emaw thawm a hriat thin thute leh a thil tawn mak tak tak te chu a hrilh fai ta vek a.

Mahse a nu leh pate lah chuan engah vak an lo ngaihsak lova, "I thil ngaihtuah tam lutuk leh excer lak chin tawk i hre lo i rilru a fim lo a nih kha.." an lo tih liam sak daih mai. Mahse hun a kal zel a, Rohlua lo chu a mumangah thildang a hmu thei tawh hauh lo. "Min tlanchhiat san tum suh, tinge min tanpui loh?" tiin Rohlua aw chuan a mumangah chuan a be reng zel mai si.

Zan khat chu Kimkimi chuan thudik hriat ngei a duh a, a huaisenna zawng zawng sawmkhawmin Rohlua an hmuh hnuhnunna ber, an veng kawng reh lai tak a ramhnuai panna lamah chuan amah ngei chuan engkim va fiah a tum ta a. Chaw ei kham velah chuan chhuanlam siamin a chhuak a, tichuan ramhnuai lam chu ava pan ta a ni.

Rei fe chu a han kal kual a, ramhnuai chu a nelawm lohvin a reh hian a reh thiap mai. Tumah a hmuh loh avang chuan a thil tih lai mek chu atthlak a ti angreng khawp a, mahse a tawp nan ti ni awm fahran hian, "Rohlu, i awm em?" a han ti vak ringawt a. A rin loh tak maiin hnunglam atang chuan, "HEta hi ka awm e." tih ri a hre thut mai.

Rang lutukin hnunglam a hawi a, Rohlua chu a hma zawnah chuan a lo ding khur mai a nih chu. Kimkimi chuan hlau hle mahse hlauh loh a tum lui hram hram a, "Mihring damlai i ni em, nge i thi tawh?" tiin a han zawt deuh tawp a. Rohlua chuan a thlek vang vang a, "Nang chuan min hmu a, mahse anni kha chuan min haider a ni. HEtah hian, helai hmun ngeiah hian min kalsan a ni." tiin a lo chhang a.

Kimkimi chuan a hrethiam lo kher mai, "Eng nge i sawi awmzia? Eng thil nge i chungah thleng a?" tiin a han zawt leh a. Chutah ROhlua chuan a rawn pan phei chhut chhut a, "Min theihnghilh a ni, mahse..nang chuan min theihnghilh ve thei tawh lovang." tiin a lo chhang leh a, a la nui deuh sung zui.

Kimkimi chuan chhan let leh a tum a, mahse a thei ta hauh lo. A mumang ang chiah khan a tawng chhuak thei ta miah lo mai a, Rohlua chuan a rawn pan phei zel a. A khaw hmuh chu a fiah lo tial tial a, reilote hnuah chuan engkim chu a thim vek mai. Kar hnih hnuah chuan khalai kawng, Kimkimi excer lakna thin ah tho khan mibo poster hi a intar a, 'LALNUNKIMI, ramhnuai lama zan tir dar 6 vela a kal lut chu hmuh hnuhnun berna a ni.' tih hi a lo inziak a.

THE END

********************************************