SHIVER (MIZO FICTION ANTHOLOGY HORROR STORY) Written by : Aaron Malsawmdawngzuala CHAPTER - 3

 SHIVER

(MIZO FICTION ANTHOLOGY HORROR STORY)

Written by : Aaron Malsawmdawngzuala

CHAPTER - 3

*********************************************

THAWNTHU PANGANA :

ETERNAL BOND (INZAWMNA TAWP CHIN NEILO)

Ruah chu tam si lo hian a si seng seng reng a, thlanmualah chuan mipui pawh an tha hnem hle mai. Sangtei chu thlan vur thar hlim bulah chuan a ding ngawi reng a, a thian kawm ngeih em em Pari chuan a kalsan ta der mai chu hriatthiam har a ti takzet. Accident vanga thi a ni a, a boral ni khan Pari hian Sangtei chu chhuahpuiah a sawm a, Sangtei hian a hman loh thu a hrilh a ni.

Mittui tla zawih zawih chung chuan Sangtei chuan Pari thlan chu a en reng a, "Mangtha aw, Pari." tiin ama hriat tham lek chuan a phun sap a. Thlanmual chu a chhuahsan ta a, a nun chu a ruak ngawih ngawih hian a hria a. Khami ni khan Sangtei hi a hman reng a, mahse dawt sawiin a hman loh thu in Pari kha a chhang ta kha a ni a.

A inthiam lo takzet a, hrehawm a ti hle bawk. Zan a lo thleng a, Sangtei chu a muhil thei reng reng lo mai. A rilru ah chuan Pari ringawt chu a awm a, khumah chuan a inlet a inlet a. Muthilh a tum viau pawhin a harh tulh tulh zel mai si, a tho chhuak ta nge nge a. A pawhdawh a thlalak chu a la chhuak a, PAri nena an naupan lai thlalak a ni.

Sangtei leh PAri hi tet te atanga inkawm chho ngar ngar an ni a, vengkhata awm niin an inngai thei hle a ni. An thlalak chu a han en vawng vawng a, "Pari, ka ngai emai che. Tinge min kalsan?" tiin a be mawlh mawlh a. Chhuak em em hian a tap hawm hawm a, reilote hnuah chuan a muhil ve thei ta hram a.

A tuk ah chuan Sangtei chu a hna lam pan chuan a kal a, eng ang pawhin a thiannu boralna avang chuan hrehawm tiin lungngai hle mahse hna a kal ngei ngei a ngai bawk si. Nileng mai chuan a rilru ah Pari hlir a awm a, a ngaiin a boral ta mai chu a la tuar thiam thei ngang lo a ni e.

Tlai a lo ni a, Sangtei pawh chu in lam pan chuan a kal hnak hnak a. Chutia muangchanga a kal mek lai chuan nu pakhat hian a rawn kal pel thuak a, Sangtei chu a rawn mit sir zeuh mai. Chutah harh chhuak zawk ni awm tak hian Sangtei chu a ding thut a, "Ni lo, a ni thei lo." tiin a phun sap a.

Rang tak hian a va hawi kir leh a, nichin lawk a rawn kal pel tu chu ava en a. Chunu pawh chu a lo ding ve chat mai, muangchang chuan Sangtei lam chu a rawn hawi a. Sangtei'n a hmel a hmu chuan chu a meng phar awn awn mai, chunu hmel chu a thiannu, Pari hmel a ni tlat. Mahse a pian te leh a inchei dante erawh Pari a ni si lo, mak a ti takzet.

Mit khap miah lo hian chunu chuan Sangtei chu a en reng a, Sangtei chuan a hrethiam lo takzet. Chutah chunu chuan a ka chu a ang zuau a, eng emaw sawi tum ni awm tak a ni. Mahse Sangtei chu mipa pakhat hian a rawn su palh a, "Ka tihpalh lutuk." tiin ngaihdam a dil nghal mawlh mawlh a.

Sangtei chuan khanu awmna lam kha a va en leh vat a, mahse a hmu tawh hauh lo. Mak a ti em em a, a thiannu Pari chu a ngaihtuah lai tak a lo ni bawk nen. A hrethiam lo takzet, "Ka hmu sual mai mai a ni." tiin a ngaih chu a ti tha lui a, tichuan in lam pan chuan a haw ta a. Chaw eikham hnu velah chuan SAngtei chu dawr a kal turin a chhuak a, zana a mamawh tur eng eng emaw chu a lei khawm a.

A haw leh lam chu thil mak tak a hmu leh ta, a kal mekna foot-path opposite ah tak mai chuan mipa pakhat hian mit khap lek lo hian a lo en reng a. Sangtei chu a ding nghal chat a, chupa hmel a han en chu a thin a phu nghal dup dup mai. A chhan pawh chupa hmel chu a thiannu Pari hmel nen a in ang chiah chiah a, a bak zawng erawh mipa pianzia a ni bawk si.

Sangtei chuan mak a ti em em a, a en hu ringawt a. Chutah chupa chuan eng emaw chu a sawi a, a phun bul bul a. Mahse Sangtei chuan a hre pha bawk si lo, "Tunge i nih?" a han ti vak ringawt a. Mahse chupa chuan a chhang lo, Sangtei chuan va pan a tum a. MAhse chupa chu a kal daih a, kawngsir thim lai chu a va pan a.

Sangtei ava thlen meuh chuan tumah an lo awm tawh lo, kawngsir thim lai pawh chu a phone torch chuan a han en kual a, tumah an awm der lo mai. Mak a ti takzet a, a hrethiam lo hle bawk. Ngaih tha lo tak hian, "Tu emaw hian min enthla tihna nge? Tinge Pari hmel ka hmuh zel le?" tiin a inbe mual mual a.

Chumi zan pawh chuan a muhil leh thei ta reng reng lo mai, a rilru ah chuan tlai a haw lama a thil tawn leh zana a thil tawn te chu a awm reng a. A hlauthawng takzet, "Kei hi ka a ta em mawni le?" tiin a inzawt a inzawt a, a hmuh sual a nih chu ring duh viau mahse a hmu sualin a inhre bawk si lo.

A tuk chu office chawlh a nih avang chuan Sangtei chu inti thawveng turin amah te chauh chuan a leng chhuak a, park ah te kalin a rilru chu hahdam taka awm tir a tum a. A hma ni a a thil tawn te chu theihnghilh hram hram a, a taksa chak loh vang leh a thiannu boral a la tuar nat em avanga hmu sual mai mai niin a inngai lui hram hram a.

Nileng deuh thaw chuan a leng kual a, amah pawh chu a zang deuh hawk chuan a inhria a. Tlai lam a lo nih chuan haw zai a rel ve ta a, in a thlen hma chuan dawrah a peng kawi a. Eng eng emaw chu a han lei a, dawr nghaktu hnenah chuan pawisa chu a pe a. DAwr nghaktu chu mipa a ni a, fel hmel leh zaidam hmel tak a ni.

Sangtei nen chuan an han inbe nual a, an titi tui angreng khawp mai. Chutih lai tak chuan phone call a dawng a, an manager a lo ni. Zanin atana tih ngei ngei tur hna a pe nual a, tichuan an inbiak zawh chuan phone chu a dah leh mai a. Chutah hmeichhe aw hian, "Kha le, a kir." a rawn ti ta daih mai.

Rang takin Sangtei chuan dawr nghaktu lam chu a han en a, a meng phawk nasa kher mai. DAwr nghaktu hmel chu mipa a lo ni tawh hauh lo, a thawmhnaw hak chu la in ang tho mahse hmeichhia a lo ni daih tawh mai a. Chutah Pari hmel ang chiah chiah ala pu zui, a hlau lutuk chu pawisa kir pawh chu a la ta lo.

RAng lutukin dawr atang chuan a chhuak nghal a, a thlan a tla bawrh bawrh mai. Chak takin in lam pan chuan a pen phei hlawk hlawk a, in a thleng tep tih ah chuan motor pakhat hian a rawn tlan pel a. Sangtei chuan a mit sir chuan motor chu a han melh a, chutah thil mak tak a hmu leh ta.

Motor tukverh chu inkhar thlap mahse, a glass ah chuan Pari hmel bawk chu chiang em em hian a lo lang leh ta. A lo la meng rum em em mai lehnghal a, Sangtei hlau lutuk chu a aia chak hian a kal leh a, kawng a cross dawn lai tak chuan hmeichhe sam var vek hian a opposite zawng chuan kawng chu a rawn cross ve a.

Chunu hmel pawh chu Pari hmel ang chiah chiah tho a lo ni a, a sam var leh a incheina erawh engmah a danglam lo. Mahse a hmel chu Pari hmel a ni tlat, Sangtei chuan a hlauthawng takzet. A rilru chu a buai amaw a inti hial tawh, a tap pur tawh mai. A tlan in a tlan haw a, room ah chuan a lut tlang nghal a.

Chaw pawh ei lo chuan zan thleng chu a room ah chuan a tawm a, "Ka a zo tawh em ni? Eng nge thil awmzia hi?" tiin a phun sap sap reng a. Vanneihthlak takin rei vak lo hnuah chuan a muhil ve thei ta hlauh mai, mahse chu chuan a thla a ti muang chuang hauh lo. A mumang ah chuan Pari chuan a umzui leh tho va, eng emaw chu sawi duh a nei chiang a ni.

Zingah chuan hma takah a tho va, an manager-i'n tih tur  apek ho chu a han ti fel zung zung a. Tichuan hna a kal hman loh tur thu chu hrilhin chawlh a dil a, an pu pawh chuan a lo phal ve mai bawk. A chhan chu hemi ni hian Sangtei chuan Pari te ina kal a tum a ni, Pari nu chu va biak a, a thil tawn te chu hrilh ve mai a duh a ni.

Chhun ah chuan Sangtei chu Pari te in lam pan chuan a va kal ta ngei a, gate a thlen chuan a han ding chat a. Thawk a han la te te a, a hreh ve deuh angreng khawp mai. Tichuan gate chu a hawng a, a kal phei zel a. Kawngka chu a han kik ri karh karh a, Pari nu, Pi Liani chuan a rawn hawng a.

Sangtei hmel a hmu thut chu mak tih hmel deuh hian, "Ehe, Sangte...teh hlawl che chuan?" a lo ti deuh hu mai a. Mahse Sangtei chuan hnuailam a melh reng a, a chhang lo. Pi Liani bawk chuan, "Lo lut rawh." tiin a hruai lut ta a. DAwhkan chu kilin an thu dunin thingpui an in dun a, "Ka lo tibuai che a nih chuan min hrethiam la, mahse thil hrilh tur che leh zawh duh che ka nei a ni." inthlahrung tak chuan Sangtei chuan a han ti tham tiak a.

Pi Liani chuan thingpui chu a han lem sak a, "Min tibuai hleinem, Sangte. Pari khan a hmangaih em em che a, unaunu ang chiahin a en che a. Chuvang chuan ka fanu ve tho alawm i nih, eng nge min hrilh duh chu han sawi la?" tiin zaidam tak chuan a lo zawt a. Sangtei chu a han thaw hak a, "Ihh...englo.." a han ngawi leh vang vang phawt a.

Chutah hreh hmel tak hian, "Thil.. thil ka hmu thin a ni. Ka sawi fiah thiam lo, a mak lutuk." tiin a tap nghal lek lek mai a. Pi Liani chuan a chhang lo, mak tih hmel deuh hian Sangtei chu a lo en reng a. Sangtei bawk chuan, "Nu Malian, Pari hmel hi midang hmelah ka hmu thin a ni." tiin a han sawi zawm leh a.

Pi Liani chuan phawk hru hian, "Pari hmel midang hmelah ka hmu thin e a? Eng nge i sawi awmzia?" tiin a lo zawt hu mai a. Sangtei chuan a lu a lo bu nghat nghat a, "Aw ni e, mi hmelah ama hmel ka hmu thin. A chang leh kawng sirah te, a chang leh darthlalang ah a thla ka hmu a. Eng emaw chu sawi a tum chu niin ka hria, mahse ka hrethiam bawk si lo." tiin a inhnit feih feih a.

Pi Liani chuan muang chang chuan a thutthleng hnung chu a han ngheng a, a ngawi ta vang vang mai. Second sawm vel hnuah chuan muang chang hian, "Ni e, Pari kha chu mi danglam tak mai hi a nia. A thil rin zawng leh vei zawng te, a awih zawng te hi a mak thei lutuk. Mi ina fiamthu emaw eng atan mah a an ngaih loh tur leh awih loh tur te hi ani kha chuan a la thutak thei lutuk. Nunna leh thihna hi a kal hrang miah lo ni te hian a rin thu hi a sawi leh zeuh zeuh zel a, mithi an awm te hian an thlarau hian khawvel a chhuahsan mai lova, an hna an thawh zawh hma chu an chhuak mai mai lo ni te hian a ring thin a, min hrilh thin alawm." tiin a chhang ta mai a.

Sangtei chuan mak tih hmel tak hian Pari nu chu a en hau mai a, "Eng maw? Hna thawh zawh loh a?" a ti hu mai. Pi Liani chuan a lu a lo bu ve nghat nghat a, "Um, a thiannu i nia a sawi ve ang chu i bulah pawh...inzawmna thuk tak nei te hian an intih san a nih pawhin an inkalsan kumkhua dawn chuang lo ni te hian a sawi thin. Mahse chuvang chuan tuna i thil tawn hian inzawmna a nei ka tihna a ni chuang lova, a thil sawi thin te ka sawi chhuak mai a nih chu." tiin a lo chhang leh a.

Sangtei chu a han inngaihtuah vang vang a, kum kha leh chen Pari nen an lo inkawm ve tawh a, chutiang thil a sawi thin pawh a hre ve der si lo. A aw a han thian deuh kharh a, "Anih.. ka chungchang hi i bulah a sawi thin em?" tiin a han zawt ve a. Pi Liani chuan thil a ngaihtuah chhuak zawk mai, "Aw taka...hmanni lawk khan i chungchang chu a sawi alawm." a rawn ti deuh thut mai.

"Engtin nge a sawi?"

"Sangte, Pari hian a hmangaihin a ngai thin takzet che a ni. Lo thi ta ila, Sangtei a mal lutuk tur hi ka khawngaih lawk tiin fiamthu deuh reuh hian a sawi a. Ka hau hrep nghe nghe alawm, chutiang sawi loh tur tiin ka khap nghal a. A tana i pawimawh zia hi i hrefiah lovang tih a hlau takzet niin ka hria, a tan hian i hlu hle a ni ngei ang."

Sangtei chuan a chhang tawh lo, a ngawi reng a. Rei deuh fang hnuah chuan Sangtei chu a tho va, "Nu Malian, min lo hrethiam dawn nia. Ka kal phawt ang e, nidangah ka lo leng leh dawn nia." tiin chhuah a tum a. Pi Liani pawh chu a tho ve a, "Awle, lungngai reng reng suh aw. Pari hian engtik ah mah tih nat che a phal ngai lovang, chu chu i hre reng dawn nia." tiin a chhang a.

Sangtei chuan kawngka bul chu a thleng tawh a, "Sangte.." ti a ko ri chu a hria a. A ding chat mai a, a thin a phu nghal dup dup mai, a chhan pawh Pi Liani aw a ni tawh hauh lo. Pari aw, a lo hriat than fo tawh, a thiannu boral ta Pari aw ngei a ni tlat. Muang chang chuan a han hawi let a, Pari nu, Pi Liani hmel reng reng a lo ni tawh lo.

Pari hmel a lo ni leh daih tawh, chang tak hian a mitah tah chuan a rawn en kuau lehnghal a. Sangtei chuan a hlau takzet, a thlan fim a tla nghal zawih zawih a. Rang lutukin pawnah chuan a tlan chhuak nghal a, in lam pan chuan a nghal vang vang a. Zan a lo ni a, a ngaite ang bawkin Sangtei chu a muhil leh thei ta reng reng lo mai.

Pari nu sawi chu a bengah chuan a cham reng a, Pari hmel chu hmun tinah chuan a hmu zel tawh mai si. A khum bula tukverh lam chu a hawi reng a, ruah a tla cherh cherh reng bawk. A ngaihtuahna a kal thui em em mai a, a thil tawn leh hmuh thinte chu Pari nu bul tih loh chu tumah a hrilh lo.

Hrilh pawh nise an awih sak dawn chuang lo tih a hre ve reng a, a chhungte tak ngial pawh a hrilh lo a ni. Chutia a inngaihtuah lai tak chuan a tukverh darthlalanga a thla chu a han en chiang a, a hnungah chuan tu emaw ni hi awm ve tlat hian a hria a. A han en chiang leh deuh va, a hnungah chuan thla chu a hmu ta.

Mihring ruang am chu a ni ngei mai a, hmeichhia a ni tih a pian atang chuan a hriat hle bawk. Chutah a la che hrut hrut zui a, Sangtei chuan a hlau kher mai. Hnunglam han hawi nghal vat chu tum hle mahse a che ngam thak lo, tukverh darthlalang thla atang chauh chuan a en ngam a, a taksa chu a khawng nghal vek nimai hian a hria a.

Chu thla lah chu a rawn lian tual tual a, a fiah tual tual ang mai hian a hmu a. A hlau lutuk chu a khur dar dar a, mahse a huaisenna zawng zawng sawm khawmin a han hawi let a. Tumah a hmu lo, mahse a thla a la muang chuang lo. Khum atang chuan a tho va, a room chhung chu a han en kual a.

Mahse engmah a hmu chuang lo, a han thaw deuh huai a. Khum lamah chuan a let leh a, mahse a thlen hma chuan a beng bulah phun ri sup hi a hre leh ta tlat mai. Hmeichhe aw ngei mai hian, "Tinge min kalsan?" a rawn ti ta mai a nih chu. Sangtei chu a phu nasa kher mai, a ding nghal chat a.

Chu aw pawh chu tu aw nge a hria, a thiannu Pari aw ngei a ni. A mittui chu a tling teuh tawh a, "Pa.. PAri, nangmah i ni em?" tiin a han phun ve sup a, a aw te chu a khur nasa tawh kher mai. MAhse chhanna a dawng lo, room chu a reh diak mai a. A reh ri erawh chuan Sangtei chu a tih thlamuan phah hauh lo, tu emaw tak chuan an en reng ni hian a inhre tlat a.

Muang chang chuan khum lam chu a va pan leh a, amah chauh a room a riah chu a ngam chiah tawh lo a ni. A chhungte bula mut ngawt lah ni thei ngangin a hre si lo, chutah tukverh darthlalang ama thla chu ava hmu a. A vun rawn chu danglam tlat hian a hria a, a dang var pup ang mai hian a hmu a.

A han in en chiang leh deuh va, a ban te chu a han vai chhin a. A thla chuan chutiang tho chuan a lo vai vel zel a, han danglam em em chu a hmu hran lo. Mahse a che leh chiah chu tukverh darthlalanga a thla chu a che ve ta hauh lo mai, Sangtei chu a ding chat a. Chutah le, a thla chu a ri awm miah si lo hian rawn nui ta vak vak mai a nih chu.

A hmel chu Pari hmelah chuan a rawn inthlak riai riai a, chutah ring em em mai hian, "Engvangin nge min kalsan, Sangte?" tiin vin zet hian a rawn au ta vak vak mai a. Sangtei hlau lutuk chu a tawlh hnung a, light te chu a rawn phe ta zawk zawk mai. A thil hmuh chu a fiah lo tial tial a, room chu a thim riai riai a.

A harh chhuak zawk a, thlanin a lo bual huh vek mai. A mumang a lo ni hlauh mai a, khum atang chuan a tho chhuak zawk a. A thaw huai mai, a chil a han lem dawk a. A awmdan chu hrehawm a ti tak zet, a hmai hupin a tap zawih zawih ringawt mai a ni. Chumi ni atang chuan namen lovin Sangtei chu a dam lo tan ta a, a khawsik a sang reng a.

Ni nga vel chhung chu hna pawh a kal loh phah a, mangchhia chuan a tihbuai chhunzawm reng bawk a. A chhungte pawh chu an ngaih a tha lo kher mai, damdawiin kal tih lahin amah Sangtei ber chuan a duh der mai si lo. A mumangah ah chuan Pari aw chu a hre chhunzawm zel a, "ENGVANGA MIN PHATSAN NGE I NIH?", "NANGMAH VANG VEK A NI." "KHAMI NI KHAN AWM VE LA CHU KA THI BIK LO TUR." tiin a ankhum vak vak thin a ni awm e.

Zan khat chu Sangtei chuan a ning ve deuh ta a, a huaisenna zawng zawng sawm khawmin Pari thlarau chu hmachhawn a tum ve ta a. Zanlai dar 12 chiah chiah a ni a, Sangtei chu a room lai takah chuan a ding vang mai a. Thawk a han la hak a, "Pari, eng thil chiah nge ka lak atang hian i duh?" tiin a han vin deuh thak a.

Mahse chhanna a dawng lo, room chu a reh hian a reh ngawih ngawih mai. Chutah a aia fiah leh chiang hian, "Mitthi i ni tawh, khawngaihin min tibuai tawh suh." a han ti leh a. Minute khat dawn chu engmah ala thleng chuang lo, a la reh thuap mai. Mahse Sangtei chu chet sawn a han tum a, chutah le, light chu a rawn phe ta zawk zawk mai a.

Room chhung chu a rawn vawt deuh ruih bawk a, Sangtei chu a huaisen chhunzawm lo chiang kher mai. Chutah bang kil thim lai atang chuan tu emaw hi a rawn chhuak a, a pian atang chuan hmeichhia a ni tih a chiang reng. Sangtei chuan khur zawih zawih chung hian a en reng a, PAri ngei a lo ni.

A hmel chu a pangngai lo takzet, a dang var pup mai a. A mit te khur te chu a thuk ruih bawk a, Sangtei lam chu a rawn pan ta chhut chhut mai le. Sangtei chu au a tum a, mahse a au ri thei thak lo. Rum em em hian Pari chuan a rawn melh a, "Khami ni khan ka bula awm tur i ni asin." a rawn ti thum chhur chhur mai.

Pari aw pawh a ang hlawl lo, patling aw thum tak ang mai hi a ni. SAngtei chu tlanchhiat a tum a, mahse a che thei lo. Pari lah chuan a rawn pan hnai zel a, a tawp a tawpah chuan a che thei ta. Rang takin room kawngka lam chu ava pan a, hawn a tum a. Mahse a hawng thei tlat lo, Pari chuan a rawn kal chilh ta nge nge a.

Sangtei pa chu a fanu room lama thawm a rin em avang chuan a harh a, room atang chuan ava chhuak a. Kawngka chu a han kik karh karh a, "Sangte, Bawihi? I thawm ava na ve, eng nge i tih a?" tiin a han au lauh lauh va. Mahse Sangtei chuan a rawn chhang let hauh lo, kawngka chu a han hawng a.

Sangtei chu hmuh tur a lo awm hauh lo mai, kil tinah chuan a han zawng kual a. Khum hnuai leh wardrobe chhung thleng chuan a han en kual a, mahse Sangtei hmel reng reng hmuh tur a awm hauh lo. Chumi zan atang chuan Sangtei chu a bo ta hmak mai a, hmuh a ni leh tawh lo a ni.

THE END

********************************************************************

THAWNTHU PARUKNA :

UNKNOWN PASSENGER (PASSENGER HRIAT NGAI LOH)

Serchhip khua a veng pakhat ah chuan taxi hi a tlan mek a, in lian lem lo tak bulah chuan a ding a. A chhung atang chuan nupa leh naupang pathum vel hi an rawn chhuak a. Chumite chhungkua chu Aizawl a an chhungte inneihna hmanpuia zin an ni a, an haw leh chiah a ni. PA ber chuan pawisa chu a phawrh a, "Kha le, ka pu. I ti lawmawm e, tluang takin min thlen a." a han ti deuh duah a.

Taxi driver, Ropuia chuan pawisa chu a la a. Nui deuh sang hian, "E khai, in duh hun hunah min rawn hmang thin dawn nia. Ka phone number ka pek tawh che u kha, anih ka kal phawt ang e." tiin taxi chu a han start nung hlarh hlarh a. Pa ber pawh chuan a kut vai pah chuan, "A nih tluang deuhvin i let phei dawn nia, mangtha phawt le." tiin a lo chhang a, an inthlah liam ta a.

Ropuia hi kum 45 vel a ni ve tawh a, taxi driver hmanga eizawng a ni. Kum 20 dawn chu taxi a khalh ve tawh a, thiam pawh a thiam narawh e. Serchhip atang chuan Aizawl lam pan chuan a han tlan leh ta vang vang a, dar 5 a pel tawh a. Khua pawh a thim deuh tan tawh, "Thim hnu ah bak ka thleng dawn lo a nih hi." tiin a han phun deuh sup a.

Kum tawp lam a ni tawh a, khua pawh a vawt tha raih raih tawh khawp mai. A car tape chu a play a, a zai pah rat rat a. KAwng lakah chuan a zu pai ruk kal lam atanga a in chak tawh. Chhugkua, naupangte thlenga a phurh avanga a in ngam loh chu a han peg deuh zeuh zeuh bawk a.

Rei fe a tlan hnu chuan khawkar kawng reh lai chu a thleng a, a hma zawn atanga hla vak lovah chuan mihring ni awm tak, kawng sira lo ding hi ava hmu a. Khua a thim tawh avang chuan eng chiah nge a nih a hre lo, a va tlan hnai zel a. Mihring ngei a ni tih a hmu chiang thei ta, feh haw lam emaw tu emaw lo kal vel mai mai a nih ringin ngaih that lohna pawh a nei lem lo.

Mahse a thleng hnai zel a, mak a ti tan ta khawp mai. Chu mihring chu mipa a ni ngei mai a, mahse feh haw lam chu a nih loh hmel. A incheina chu a smart angreng phian a, kum 50 vel bawr ni awm tak a ni. Ropuia chu a lo vai lauh lauh va, phurh ve mai chi a ni angem a hrethiam mai lo.

Khawkar kawng, reh lutuk tak mai a chutia patling pui, smart taka inchei ina taxi a lo phar chu mak a tiin a la tawng ngai lo. A zawn a thlen chuan chutia phar ve ta na na na chu tiin a ding a, tukverh chu a han roll thla a. Chupa chuan a lo melh run a, a hmel chu a nelawm lem loh kher mai.

Ropuia chuan a aw a han thian deuh kharh kharh a, "Khawi lamah nge i kal dawn a?" tiin a han zawt a. Chupa chuan aw thum tak mai hian, "Saw lai thleng lawk saw." tih chauh chuan a chhang a. Ropuia chuan mak a ti angreng kher mai, mahse zawhna dang a zawt chhunzawm lem lo.

A han thaw hak a, "Um, lo lut rawh." a han ti a. Chupa pawh chu a lut ve mai a, tichuan a tlan leh tan ta a. Tape pawh chu a play chhunzawm ta lo va, taxi chhung chu a reh hian a reh thuap mai a. An ngawi dun reng a, Ropuia pawh chuan titi han vawrh vak ngaihna pawh a hre lo.

Rearview mirror tang chuan chupa chu a han melh leh zeuh zeuh zel a, a hnungah chuan thu in mit khap miah lo hian a thu ngawi reng a. Ropuia awm chu a ti nuam chiah lo, chupa awmdan leh chezia chu mak tihna riau a nei a, diklona eng emaw chu a awm tlat hian a hria a.

Motor engine ri tih loh chu ri dang a awm lo tluk a ni, motor dang rawn tlan lah an awm mang lo va. Ropuia chuan titi han vawrh chu a tum ta nge nge a, "Ka pu, khawi laiah tak nge kal i duh a?" tiin a han zawt a. Mahse chupa chuan a chhang miah lo, a thut ngai chuan a la thu ngawi reng a.

Ropuia chu a hrilhhai angreng kher mai, "Helai hnai velah hian i awm tihna em ni? Nichin khan saw lai lawkah sawn i ti sia, kan tlan thui tawh angreng sia?" tiin a han zawt nawn leh a. Mahse chu pa mak tak mai chuan ala chhang chuang miah lo, Ropuia pawh chu a lungawi lo lek lek hial a.

A lo kai ve deuh tawh bawk nen, "Hmmm...mihring ngeng chi i ni ve deuh animaw?" a han ti ve deuh kher a, mahse chupa chu ala ngawi reng tho. Ropuia pawh chuan biak chhunzawm a tum tawh bik lem lo, a ngai te ang bawk chuan an ngawi dun leh ta reng a. Minute 5 vel hnuah chuan chupa chuan, "I haw dawn em ni?" a rawn ti deuh thut mai.

Ropuia pawh chu a phu deuh zuk a, mak a ti angreng kher mai. Chutia a rawn biak ve khiah tak ah chuan, "Aw... Aizawlah ka haw dawn a." tiin a chhang vat a, mahse chupa chuan a biak chhunzawm leh ta chuang miah lova. Ropuia chu a han thaw hak a, "Anih nang, khawiah nge i chhuk dawn?" tiin Ropuia bawk chuan a han zawt leh a.

Mahse ala chhang chuang lo, chutah taxi chhung chu a rawn vawt deuh thut mai a. Ropuia chu a phu zuk thei hial a, AC a han en a, a lo in-off thlap bawk si. Mak a ti deuh chuan, "Khai a, engati nge a rawn vawh thut le?" tiin a han phun sup a. Chutah a hnunglam atang chuan chupa chuan, "Aizawl chu i thleng kher lo maithei a ni." a rawn ti leh ta thut mai a.

Ropuia chu a thu ngil zawt a, rearview mirror atang chaun chupa mitah tak chuan a en a, a ngaihdan chu a ni vak lo kher mai. Nghet tak hian a steering chu vuanin, "Eng nge i sawi awmzia?" a han ti vin deuh thak a. Mahse chupa chuan a chhang leh duh ta miah lo mai, a thu ngawi leh ta reng mai a.

TO BE CONTINUE