THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter - 2

 THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter - 2

*******************************

Zan a ni a, Sarah-i te nufa chu sitting room ah chuan an thu dun a. Inbe miah lo chuan an thu ngawi dun reng a, Sarah-i chuan a phone chu khawih mual mualin google ah chuan Lawirang Khua tih chu a han search a. Mahse a hmu thei mai lo, anu chu a han en a. Pi Seni chuan mu chung hian TV a lo en mek a, Sarah-i chuan a aw a han thian deuh kharh kharh phawt a.

"Nu, Lawirang Khua hi a awmna i hria em? I kal tawh em?"

"La kal nang, mahse hriat chu ka hre tawh."

Sarah-i chuan a chhang lo, "Tinge min zawt teh thut a?" tiin Pi Seni bawk chuan a rawn zawt let ve thung a. Sarah-i chu a han thaw deuh hak a, "Chanchinbu hlui tukinah ka hai chhuak a, 2011 ami daih tawh. Chutah chuan LAwirang khua a hmeichhe thlahrang bawkvaka kal thin an hmuh thu vel kha ka chhiar fuh a, ka rilru a luah tlat mawle." tiin a chhang a.

Pi Seni chu a khi suk a, "A lem emai, an khaw tih lar an duh ve aniang." tiin a lo fiamthu a, engah vak chuan a lo ngaih hmel lem loh khawp mai. Sarah-i chu a han thu tha sauh sauh va, "Eng chiah nge a nih hriat chian ka chak tlat a, tunlai ka awl lai a lo ni bawk nen. Va zin te ka lo rilruk hial asin, Maruata nena kan inkutsuih hma ngei hian.." a han ti leh a.

Pi Seni chu a ngawi deuh vang vang phawt a, "A tul lem lo e, a kawng a chhe awm ropui si, a hla si." a han ti ban deuh chap chap a. Sarah-i chu a ner deuh suka , "Nia, a ni ve tho. Mahse tinge hetiang em em a ka interest nachhan pawh hi ka hre bik lo." tiin a phun ve sap bawk a. Minute 10 vel lai an ngawih dun leh vang vang hnu chuan Pi Seni chuan a TV en lai chu a off a, "Ka mu dawn asin, ila mu ve dawn lo em ni?" tiin a tho deuh thut a.

"Ka rawn mu ang, nakin deuh ah." tiin Sarah-i chuan a lo chhang a. Pi Seni chu a hyan zi mar talh talh a, "Taka, naktukah i nau a lo haw dawn kha.. i la hria tiraw? MAruata sawm la, Airport ah lo va hmuak ang che u. Keizawng ka che peih lo, in ka lo nghak ang." tih pah chuan room ah chuan a luh san a.

Sarah-i pawh chu rei vak lo hnuah chuan a phone chu a dah a, tukverh zawng zawng te chu a kalh tha a. Kawngka kalh tur a a phei lai chuan kawngka chu a rawn inkik thut mai, Sarah-i chu a ding deuh dat a. A ngawi vang vang a, "Tun ang zan rei tawh ah, tunge mawni le?" tiin a phun sap a.

A aia ring chuan kawngka chu a rawn inkik leh a, Sarah-i chuan muang chang chuan a va pan a. A aw han thian deuh kharhin, "Tunge?" a han ti deuh vak a. Mahse a reh vung vung mai, chhangtu an awm lo. Kawngka chu a va hawng ta nge nge a, mahse tumah hmuh tur an awm lo.

Sarah-i chuan mak a ti kher mai, kawngka chu a kal tha leh mai a. A room lam pan chuan a chho va, mu tur chuan a inbuatsaih ve ta a. A mu fel deuh chiah tih ah chuan hmeichhe mangang au thawm ni awm tak chuan a ti harh chiang kher mai, a thu chhuak zawk hial a. A hawi kual a, a room light chu a phe zawk zawk mai.

A ngaihna hre lo tak chuan a hawi kual hru ringawt a, mahse light chu a rawn pangngai ve leh mai bawk a. Boruak pawh chu a reh nghal diak a, Sarah-i pawh chu a thaw huai mai. A awm a dawm vang vang a, "Au thawm kha, ka mumang nge... enge awmzia le?" a ti nuah nuah a.

Light chu a rawn thim leh zuk a, second khat pawh tling lovah chuan a rawn eng pangnai lehnghal. Sarah-i chu a thaw deuh hak a, "Ninawm mange aw.." tih deuh hlur pawh chuan khum atang chuan a tho chhuak a, light chu ava off deuh hmak mai. A room bula dim light sen vut mai chu a on a, a room chhung pawh a sen deuh pup mai.

Muthilh leh mai a han tum a, mahse a thei ta thak lo. Hmeichhe au thawm kha chu a hre ngei a ni, mahse a mumang nge a tak erawh a hre hrang thei chiah bawk si lo. Sarah-i hi hmeichhia mah nise hmeichhe dawih tak zawng a ni lo chiang kher mai, a huaisen mai bakah sawi hreh leh thudik puan chhuah hi a hreh vak lo.

Chuvang chuan journalist ngaihsanawm tak a ni reng bawk a, lar pawh a lar ve hat reng bawk a ni. Ramhuai leh thlahrang tih vel pawh hi a awih ngai lem lova, mahnia awm thang a ni bawk a, han hlauh tehchiam hi a nei vak lo. Mahse Lawirang Khua a, a thil hriat thar chuan a rilru a luah em em chhan pawh hi a inhrethiam bik lo a ni ber mai.

A room tukverh lam chu ava hawi a, "PAwn atanga lo chhuak zawk em mawni dawn le, ngaih ava ti tha lo tak em ve aw.." a han ti leh nuah nuah a. Khum atang chuan a tho chhuak leh a, tukverh lam chu ava pan a. Tukverh ah chuan a han dak chhuak a, kawngpui lam chu a zuk en a.

Tumah kal vel pawh an awm lo, a tlai tawh reng bawk a. Khawlai chu a reh diak mai si, "KA bengchhe ri a nih dawn hi." tiin Sarah-i chu a khi suk a, tukverh chu a khar ta a. A kalh fel mek lai chuan hmeichhe inhnit feih feih ri niawm tak chu a hre ta tlat mai, a ding ngil nghal at a.

Hmeichhe inhnit ri chu a ring telh telh a, a inhnit mai pawh a ni tawh lo. A rawn tap ring ta tial tial mai a, hnunglam atangin a ni. Sarah-i chu a hawi let ngam mai lo, a thlan a tla bawrh bawrh a. A hlau takzet, muang chang chuan a han hawi let a. Chutah le, hmeichhe dang var vek mai, kawr tet hnuang ha leh hmei khem nasa em em mai chu a hma zawnah chuan a lo bawk run mai.

Na tuar ni awm tak hian a rum vawng vawng a, a mitmeng sen rum mai chuan Sarah-i chu a rawn melh chho va. Sarah-i hlau lutuk chu a meng phar awn awn ringawt mai, chutah chu hmeichhia chu a rawn bawk vak phei a. Sarah-i chu a rawn ban ta uak uak mai, Sarah-i chu a tawlh hnung ve zel a.

A hlau lutuk chu au pawh a au chhuak thei lo hial, chu hmeichhe rapawm zet mai chu a rawn bawk vak phei zel a. Sawi bawi bawi hian a ka chu a ang a, "Min.. min pui rawh, khawngaihin min tanpui rawh." a rawn ti tial ruai ruai mai. Sarah-i hlau leh rap bawk si chu awmngaihna a hre lo, a ding khawng reng ringawt.

Chutah le, zawimuang hian hmeichhia chu a rawn ding kang a. A ban te chu a inherh ri thawk thawk mai, chiang kek kawk hian Sarah-i chu a rawn melh a. A sam lah chu a thur bum mai a, a then phei chu tla kawlh ni awm tak hian a awm bawk. Chutah ring tak hian a au vak a, Sarah-i lamah chuan a zuan hian a rawn zuang phei thut a.

**********************************************

A mumang ram atang chuan Sarah-i chu a harh chhuak zawk mai, a thu chhuak hlawl mai a. A thlan chuan a lo bual huh vek chu niin, a thaw hrawk hrawk a. A alarm chu a rawn rik chhunzawm ve leh nghal bawk, a mumang mai mai a ni tih a hria chu a thaw huai mai. Khumah chuan a han zal leh rih a, "Khai a...eng ang mumang nge maw ni ngai le?" tiin a phun sap a.

A tak ang chiah a ni bawk si chu a ngaih a tha lo hial a, "Ka vei mah mah em mawni aw, mumang thleng thlenga ka hmuh tak ni?" tiin a inbe leh mawlh mawlh a. Thawk a han la hrawk a, tichuan khum atang chuan a tho chhuak a. A tihdan ngai te bawk chuan an inkawtah chuan a han tlan kual leh a, a zawh hnu chuan a inbual fai a.

Ei rawng a bawl lai chuan a mumang chu a hre chhuak leh zawk mai, kha chanchinbu hlui a chhiar atang khan Lawirang khua a hmeichhe bawkvak thin thlahrang chu a rilru ah a awm reng mai a. Thildang ngaihtuah a tum pawhin a thei hlawl lo, a awm a ti nuam lo thei hial zawk.

A nu chu a rawn tho chhuak a, "Bawihi.. Maruata chu i phone em, Bawiha hmuah a ngaih dawn kha?" tiin a rawn zawt a. SArah-i chuan a lu a dawm vawng vawng a, "Awii, ka theihnghilh chiang lutuk. Mahse a pawi lo, engmah tih tur a nei bik chuang lo. Nakinah ka phone mai a, a awm awl lai alawm." tiin a chhang a.

Pi Seni chu a han chek hlur a, "Amak thin e aw... a ring vek dawn che u ania, pawisa ka nei mang tawh lo a ti lehnghal a. TAxi fare takngial pawh a nei tawh lovang, i theihnghilh leh ange." tiin a zilh zui nghal a. Sarah-i chuan a chhang lem lo, a rilru ah chuan thildang a awm thei mawlh lo a ni e.

*******************************

Dar 10 leh a chanve a pel a, Maruata motor khalh mek lai chuan a phone chu a rawn ri a. A han en chuan Sarah-i a lo ni, "Hello, SArah?" tiin phone chu a han la a. "Dar 11 leh a chanve hma in min rawn lam la, Bawiha a lo haw dawn a, LEngpuiah va hmuak ang." SArah-i chuan a rawn ti nghal deuh thawr a.

Maruata chu a rawn thaw huai a, "Huiham, i va sawi chawpchilh thei tak. Hei petrol la turin ka kal mek a, hmundangah kal leh te ka lo tum asin." a lo ti daih mai. SArah-i chuan lungawi loh hmel tak hian, "Nizanah ka hrilh ang che ka tia, ka lo theihnghilh daih alawm. Avan buaithlak tak, scooty nen chuan a bungrua zawng zawng nen kan leng awm silo." a rawn ti nuah nuah mai.

"Nia, i sawi tlai lutuk a. Min arwn be bawk si lova, program dang ka lo nei hman alawm."

"Anih chuan i hman dawn lo tihna em ni?"

Maruata chu a ngawi vang vang a, "Umm... ka lo cancel mai ang, ka hman thei mai ang." tiin a chhang ta a. Sarah-i pawh chu a thaw huai mai, "A that chu, kalkawngah thil hrilh tur che ka nei ania." a han ti leh hram a. Maruata chuan ngaithat loh hmel tak hian, "Eng thil maw, ava thlamuan thlak loh thin tak?" a lo ti nghal vat a.

Vin deuh hlur hian, "Aww... ka mumang mawle, a rapthlak lutuk. Ka dah phawt dawn, 11 leh a chanve hma chuan lo thlen tum ang che, ka ring che ania." tih leh phone dah chu a rual nghal a. Maruata pawh chu a nui huk ringawt, "Ava buaithlak thin, a ho leh ngawt ang." tiin a phun sup a.

***********************************************

Petrol a lak zawh hnu chuan tukthuan pawh la ei ve hman ta lo chu Maruata pawh a ril a tam ve ta hle mai, haw mai lo chuan thingpui dawr kawtah chuan a ding a. Samosa pahnih vel chu a han lei a, tichuan thinpui dawr kawtah chuan a ei a. A ei zawh hnu chuan a chhan funna chanchin bu chu bawlhhlawh bawmah chuan a paih a, mahse kal leh mai a tum chu a ding chat mai.

Bawlhhlawh bawma a chhan funna chanchinbu chu a han en chiang a, chanchinbu hlui chu a ni teh meuh mai. Mahse a date inziak chuan Maruata mit a la tlat, October thla ami niin 2011 kum a mi a ni. A va let leh ngat a, bawlhhlawh bawma chanchinbu a paih tawh hnu chu a la chhuak leh a.

Mak a ti angreng kher mai, a nupui hual SArah-i thil ngaihven em em, kha chanchinbu hlui, Lawirang Khua a hmeichhe thlahrang, bawkvak thin chanchin ziahna ngei mai kha a lo ni. Thul thleng palh ve mai nge, engvanga chu chanchinbu kher chu lo ni nge, amak a ti lutuk chu a ngawi vang vang a.

Chutah a dinna bul, zunin phen a mihring pianzia ang tak, rang lutuk maia bawkvak lut zuk chu a mit sir chuan ava hmu hman a. A phu nasa kher mai, ava hawi vat a. Mahse tumah an lo awm lo, a ngaih tha lo chu ava kal hnai ngat a. Zunin phen ah chuan ava dak a, tumah a hmu lem lo.

A thaw deuh hak a, ngaihtuah zui tum lem lo chuan a hmu sual mai mai a nih ringin a motor lam chu a pan leh a. A thu ngawi vang vang a, "A van mak em em, kha chanchinbu ber kher chu.." tiin ama hriat tham lek chuan a phun nuah nuah a. Sana a en chu dar 11 a lo ri der tawh mai, rang lutukin SArah-i te in lam pan chuan a inkhalh phei ta a.

***************************************

Lengpui Airport lam pan chuan Sarah-i leh Maruata te chu an inphur phei mek a, an ngawi dun reng a. SArah-i chuan a hma zana a mumang te, kawngka rawn inkik, a hawn hnu a tumah a hmuh leh siloh te chu a lo la ngaihtuah zui reng a. Chutiang bawkin MAruata pawh chu a lo inngaihtuah muk hle mai, a chhang lei funna chanchinbu hlui, Sarah-i chanchinbu hlui phawrh nena a date a lo in ang chiah chiah mai te chu a ngaihtuah chian poh leh mak a ti thar leh a.

Chumai bakah thingpui dawr bula zunin phena, tu emawni pil zuk te kha a mitthla ah chuan a lo lang leh thin a. Chutia an ngawi dun vang vang lai chuan Maruata chuan Sarah-i chu a ve melh a, a lo inngaihtuah muk hmel hle mai. A va nghawk zeuh va, “I mumang chu min hrilh dawn maw ka tia, i va ngawi thei leh si ve?” tiin a han zawt a.

Sarah-i lah chu a lo phu deuh zuk a, “E aw.. nia, kha kha.. amak lutuk, a rapawm tawp.” a han ti bah deuh nuai ringawt a. Maruata chu a khi suk a, “Englam nge ni a, ava rapthlak awm em em ve?” tiin a lo fiamthu a. SArah-i chu a han thaw hluai a, “Enge awmzia ka hre bik lo, mangchhia diktak a ni.” a han ti leh phawt a.

“Aww...a nih chuan han sawi la.”

“Kha... ka sawi kha ila hria em? Nimin zinga ka sawi, chanchinbu hlui ka hmuh che kha?”

“Aw hria e, Lawirang Khua a thil thleng bawk kha em ni?”

“Aw ni chiang e, thlahrang bawkvaka kal an tih kha.. nizanah ka mumangah ka hmu.”

“Ehe.. engtin chiah nge i hmuh a?”

“A tak ang chiah animai, ka taksa khan a feel thei vek. Amak lutuk, ka room chhungah a lo awm a. Au chhuah ka tum a, ka au chhuak thei si lova. KA harh hlauh kha ka lawm zia chu, a tak tak amaw ka ti hman alawm.”

Maruata chu a han ner deuh nung a, “Nang tak hi chu aww... i vei leh lutuk a nih kha. Kum 10 liam ta daih ami kha ania, ngaihtuah viau tawh lo teh.” a lo ti daih mai. Sarah-i erawh chu a thutak em em mai bawk si, “Hetianga ka rilru ah a awm reng dawn ai chuan, va zin ve hrim hrim ka duh... a zia mahna.” a la ti fan mai.

Maruata chuan a melh hraw a, “Ala ti ta deuh deuh, engemaw i hriat le? A peihawm loh dawn lutuk, ka kal tawh alawm. A lum si, i inchhir ang ka tih mawlh mawlh kha.” a lo ti vat a. MAhse Sarah-i chuan a ngaipawimawh lo, “A lum tih vel mai mai, ka hrechiang chak alawm. Ka kal awm tho emai a, zin te pawh a khat alawm.” tiin a han nui lui sak a.

Maruata chu a thaw deuh hluai a, “Huiham... ni mai mai teh se. Chutia i kal chak viau te chuan kal la ti nia, an futui kha a tui ve em a, ala tui angemaw? Min lo hawn dawn nia, chutia i kal chuan..” tiin a han khi suk a. Chutah Sarah-i chuan Maruata chu a han en ren rawn a, “Min kalpui rawh.... keimah chauh chuan ka duh bik lo.” ala ti ta deuh deuh va.

Maruata tih ngaihna hre lo chu a chek hlur a, “I ti mak e a, zin peih loh thu sawi zo chiah a. Tinge maw saw mi khua kher saw i thlan aw... engmah va hriat belh tur a awm lo. PAwisa hekna mai mai, petrol a to si.” tiin a phun nghal nuah nuah mai. Mahse SArah-i chuan a hnial zel a, “Ka tuina lam ania, ahma pawn engkimah min tui pui thin kha. Khami an sawi, HAHDAMNA RUN Hotel ah khan kan chawl nghal anga, a rem dawn asin.” a han ti leh a.

Maruata chu a ngawi vang vang a, “Ka peih lo ea.” a ti duh chauh ringawt. Mahse Sarah-i chuan sawm tak te hian a sawm lui zel a, a tawp a tawpah chuan Maruata pawh chuan a hnial thei ta bik lo. Phur loh hmel tak chuan, “Nia.. kan la ngaihtuah dawn nia.” tiin a chhang ve ta nge nge a, Sarah-i pawh a lawm hmel kher mai.

*********************************************************

(ONE WEEK LATER)

Kar khat a liam hnu chuan Lawirang Khuaah chuan MAruata leh SArah-i te pawh chu an zin ta nge nge a, Maruata lo sawi lawk tawh ang ngeiin a kalkawng pawh a chhe narawh e. A hla em em mai lehnghal a, zin mai mai na chi pawh a ni hauh lo mai. Tin, a lum hle tak bawk a. Sarah-i te chuan khaw chhung chu an thleng ta, khaw lian lo tak a ni.

MAruata pawh chu motor khalh pah chuan a han hawi kual a, “Engvak mah a lo la danglam lo a nih hi, lung a ti leng reuh ngei mai.” a han ti nuah nuah a. HAHDAMNA RUN hotel ngei mai chu an thleng ta, hotel lian lem lo leh simple tak a ni. Motor chu an park that hnu chuan hotel lam chu an va pan a, Sarah-i chuan a en vang vang a.

Hotel kawta tlangval pahnih meizial zu lo ding mek te chu Maruata chuan ava pan hnai a, “Thiante u, ka lo tibuai lawk che u. He hotel hi hman ami tho kha ala ni em, a enkawltu ngai an la ni em?” tiin ava zawt a. Pakhat zawk chuan, “Aih, a neitu chu a ngai ala nia. Mahse a enkawtute chu an thlak tawh, manager pawh a thar a ni tawh.” tiin a lo chhang a.

“Anih leh staff te zawng zawng pawh a thar vek em ni, engtik lai vel khan nge an inthlak hlawm a?” tiin Maruata bawk chuan a han zawt leh a. “Kum 5 a la tling lo maithei, ka chiang tawh lo. Staff zawng zawngte pawh an danglam vek tawh, an inthlak kual ve nuai thin a.” tiin tlangval chuan a lo chhang leh a.

Sarah-i chu rawn inrawlh ve in, “Anih leh hman a an sawi thin, hmeichhe thlahrang bawkvaka kal thin an hmuh thu kha tak tak a ni em? tiin a rawn zawt hram a. MAruata chuan a lo melhrum kher mai, chutah tlangval pahnihte chu an in en a, an nui deuh put put mai.

Pakhat zawk chuan nui chung hian, “Ni love, an sawi ve mai mai a nih kha. A tak tak a nilo, hawh thianpa kal phawt ila, kan tlai ang.” tiin an kalsan ta daih mai a. Maruata chuan Sarah-i chu a han melh hraw a, “Kha.. ka sawi reng kha..” a han ti deuh bui bui a. Sarah-i lah chuan, “Hawh.. lut ang, ka chau, ka mu duh.” tiin a la luh san daih zui, MAruata pawh chu thaw deuh hakin Sarah-i chu a zui lut ve mai bawk a.

*******************************************

Hotel chhungah chuan an lut a, te reuh hle mahse a kim ve biai tho mai. Lobby angreng deuh te pawh a lo awm ve thlap a, receptionist pahnih, tleirawl tak ve ve hi an lo awm a. Room chu an book fel a, tichuan an room lam pan chuan an chho ta a. SArah-i chu a chau bawk aniang, khumah chuan a bawk nghal thlawp mai.

Maruata chuan a be mawlh mawlh a, mahse Sarah-i chu a lo muhil hman daih a. A harh leh chuan khua a lo thim titih tawh a, a hawi kual a. Inthlak pawh a lo la inthlak lo chu niin, a han inbual fai ve a. Bathroom atanga a chhuah leh hnu chuan Maruata chu room ah chuan a rawn lut ve chiah a, “E.. kha, i tho ve thei maw?” tiin a lo zawt a.

Sarah-i chuan inthlak pah chuan, “Khawnge i kal a? Tinge min kaih thawh mai loh?” tiin a lo zawt let ve nghal vat a. Maruata chuan a bag atanga beer um hnih phawrh pah chuan, “Hei hi ka zu ngaihtuah mawle, ka chau deuh va, ka in chak riau va.” tiin a han khi vun vun a. SArah-i chu a lo kiai suk duh chauh, “Ava han buaithlak, chaw te min ei san daih lo maw, nang hi?” tiin a han zawt leh a.

“Ei san teh nang aw... i chauh hmel sia, ka kai tho duh ta lo che anih kha.”

“Anih leh eitur i order tawh em?”

“Order nang, i harh hun nghah pahin ka tia beer ka zu lei mawle. An la ti to em em zui, mahse ka lem ve sak chak bawk sia.”

“Anih chuan han thli phawt teh, ka inthlak zawh hunah ka rawn join ang che.”

Maruata chuan beer chu a han thli phuan barh barh a, no khat chu awlsam tak chuan a han lem deuh khalh a. SArah-i pawh chu inthlak zovin a bulah chuan a rawn thu ve a, beer pawh chu a dawm ve nghal bawk a. Maruata chu a han irh deuh bap bap a, “Room chhungah nge kan ei ang, dining hall ang?” tiin Sarah-i chu a zawt a.

“Room chhungah hian ei ila, dining hall a zu chhuk vel ka peih lo.”

“Mahse an ti buaithlak reuh lutuk, room chhunga ei chuan 200 chawi belh angai an ti.”

“A ho emai, a to lo lutuk. Ka lo tum mai ang khate chu, tihian spot pahin a rem zawk.”

Eitur chu intercom atang chuan an chah a, an nghak mek lai chuan beer chu an han indun leh deuh pap pap a. Maruata pawh tlem chuan a kai ve deuh tawh, Sarah-i erawh a in muang bawk a, engtin vak mah ala awm lo. Maruata chu a han irh leh deuh uk uk a, “E taka, i mumangah chuan thlahrangnu bawkvaki chu i la hmu thin em, i sawi ta ngai miah lova?” ngeiawm tak chuan a han ti deuh kher a.

SArah-i chuan no khat chu a han tlak ve leh deuh pap a, “Khami zan, zan hmasa bera ka hmuh bak kha chu hlauhawm tak chuan ka la hmu leh lo. Mahse a hmel chu hmu lo mah ila, hemi khua a kal tura min hrilhtu hi an awm zia, zantin, ka mumangah.” tiin a lo chhang a. Ho tih hmel tak hian Maruata chu a han khi leh suk a, “Hmm, a tu chuan maw hrilh che?” a ti deuh hu mai.

SArah-i chuan serious hmel tak hian a melh ngai chu a melh vang vang a, “KA hre bik lo, tunge min hrilh? Mahse aw(voice) ka hre thin tlat alawm, ka rilru ah a awm reng a, kalkawng vel hrehawmin lum hle mahse, engtin emaw hahdamna riau ka nei, kan thlen chiah atang khan..” ala ti ta deuh deuh va.

Maruata pawh chuan mak a ti angreng hle mai a, Sarah-i chu a en vung vung ringawt. Chutia an ngawih dun reng lai chuan kawngka a rawn inkik thut a, an la phu dun nasa em em lehnghal. MAhse room service lek chu lo niin an eitur a rawn dah dawn hi a lo ni a, Maruata chuan kawngka chu ava hawng a.

********************************************

Chaw an eikham hnu chuan room chhungah chuan SArah-i leh Maruata te chu an awmdun a, Sarah-i chuan a diary phawrh chhuakin a thil tihlai mek, a mission intanna tur chu a han ziak tan vel a. A case hming chu amah ngeiin phuahin, ‘THE CRAWLING WOMAN’ tiin a ziak a.

Maruata erawh a phone ah games khelin ama tawkah chuan a lo tlei hle mai, chutih lai chuan intercom chu a rawn ri ral ral a. Maruata chuan ner nung chung hian, “Amak e aw... engemaw ni le, ka chak tep tawh asin.” tia phun nuah nuah chung chuan a han chhang a, “Hello, enge ni ta?” a han ti a.

Receptionist chuan, “Room no 106 a ni em aw?” tiin a rawn zawt a. MAruata chuan SArah-i ve en hu chung chuan, “Aw ni e, enge ni ta?” tiin a lo zawt let vat a. Sarah-i erawh a thil ziah ah chuan a lo la tui nasa mai a, Maruata chu a ngaihsak lem lo khawp mai. “E, Pu Lalruatfela te maw? Ihh...MZ 01 X 2490 hi i ta a ni em aw?” tiin Receptionist chuan a rawn zawt leh a.

“AW ni e, ngati nge?”

“Kan staff te ho motor chhuahna tur dal chiah chiahin i lo park palh a, khawngaihin min rawn dah sawn sak lawk dawn em ni?”

“E aw...a nimaw, ava zia lo ve, ka lo chhuk nghal e.”

Intercom chu a dah a, “Sarah, ka motor zu dah that lawk angai a, tikhan lo awm la, ka lo let leh vat ang aw..” a tih chuan Sarah-i chuan en miah lo chuan a lu a lo bu nghut ringawt a, a thil ziah lai ah chuan a tui ngang a niang nge. Maruata pawh chuan a chhuahsan ve mai bawk a, a chhuah hnu reiloteah chuan Sarah-i pawh chuan a diary chu a khup a.

A phone chu phawrhin anu a call a, chanchin te chu an inhrilh a. Minute 10 vel an inbiak hnu chuan phone chu a dah a, Maruata erawh ala rawn let lo. SAna a en a, dar 9 a pel ve der tawh mai. “A chhukna rei tawh tawh nen, a lo van let har em em?” a ti nuah nuah a. Thildang tih tur a van em avang chuan room chu a chhuahsan a, lobby lamah chuan a zu chhuk ve a.

********************************

Lobby-ah chuan thu in Maruata chu ala nghak reng a, a rin ai chuan a rei ta phian mai. A ding a, a vei kual a. Call dawn lahin a phone roomah a kalsan daih bawk si, chutia a vei kual pah chuan banga thlalak intar hrang hrang te chu a en kual a. Chutah thlalak pakhat chuan a mit a la hle mai, a ding chat a.

Thlalak chu a han en chiang a, hmeichhe pakhat thlalak a ni. A hmeltha reuh phian lehnghal a, a thuziak chu a chhiar a. ‘KAN NGAIH EM EM, KAN UNAUNU LILY ZOTHANPARI. MARCH NI 24, 2011-A HUN LO TAKA MIN KALSAN TA HI HRIATTHIAM A HAR KAN TIIN ANA KAN TI TAKZET.’ tih hi a lo ni.

Mak a ti em em a, a ka hau mai. A chhan chu chunu hmel chu a mumanga a hmuh, kha hmeichhe rapawm tak, amah pana rawn bawkvak phei nen khan an in an em vang a ni. An in ang mai pawh a ni lo, a ni ngeiin a hre bawk. Chutih lai chuan Hotel Manager chu a rawn lut deuh thut a, a staff te chu eng eng emaw a rawn hrilh a.

Sarah-i chuan ava pan phei a, “Ka pu, hemi Hotel Manager hi i ni tiraW?” tiin ava zawt a. Manager pawh chuan tha tak hian, “Ni e, ka pi.” tiin a lo chhang mai a. Sarah-i chuan polite tak hian, “Inzawh chi a ni em ka hre lova, mahse sawta hmeichhe thlalak saw, tunge min hrilh chiang thei angem?” tiin a han zawt deuh thuai a.

Manager pawh chu a khi deuh suk a, “E aw.. Nia. Hemi hotel-a ka thawh hma daih a mi tawh ania, keichu 2018 khan Manager angin ka awm ve chauh va, Aizawl atanga lo kal ka nia.” tiin a chhang a. “E, a nih chuan engmah a chungchang i hre lo tihna em ni?” tiin Sarah-i chuan a han zawt leh a.

“Ni love, ka hre ve alawm. Ka hriat dan chuan Lily hi hemi hotel ah hian a thawk ve thin a, kum 3 vel lai chu a thawk ve hman ang. Chuan nikhat kha hotela a duty lai rengin a bo ta daih a, an zawn luai luai hnu pawhin an hmu zo ta lova. Khaw pumin ni engemaw zat an zawn hnuah pawh a ruang takngial pawh an la hmu si lo nen, boral angin an puang ta a. Chuzawng chu a ni mai ka hriat, tun thleng hian a ruang pawh chu an la hmu chuang lo.” tiin Manager chuan a lo chhang leh a.

Sarah-i beng chu a verh hle mai, a mumanga a hmuh thin hmeichhia ngei kah niin a hre bawk si. A ding ngawi reng ringawt a, a thu hriat chuan Lily chu tunge a nih tih hriat chian zel a ti chak zual takzet. Chutih lai tak chuan hnunglam atang chuan adarah chuan tu emaw ni hian a rawn vuan thut a, a phu nasa kher mai.

Rang takin a hawi let a, Maruata lek chu lo niin. Sarah-i phu nasa lutuk chu mak tih hmel tak hian a en hu a, “Ehe, i va han phu nasa em em ve mawle?” tiin a la nui huk zui. SArah-i lah chuan vin lek lek hian, “I van rei em em ve, enge i va tih chen chen a?” a lo ti deuh hlur mai. MAruata chu a nui leh suk a, “Hei... zanreiah riltam takin ka tia eitur ka va lei, dawr awmna a hla lutuk a.” tiin a eitur lei te chu a hmuh a.

Sarah-i chu thinrim hmel tak chuan a han thaw hak a, “Sawi lawk ta che ka ngaih i ti tha lo hman alawm.” tiin a vui nuah nuah a. Maruata chuan Sarah-i chu a en vang vang a, “I rilru ava hah hmel, engemaw thil thleng a awm em ni?” tiin zaidam tak chuan a han zawt a. SArah-i chuan Lily thlalak chu ava melh leh zeuh va, “Roomah lo chho rawh.” tiin a chhoh san daih mai, Maruata pawh thaw deuh hluai chung chuan Sarah-i chu a zui chho ve mai bawk a.

****************************************

TO BE CONTINUE