THE CRAWLING WOMAN (Spanish : Repente Mulier) MIZO SUPERNATURAL HORROR STORY Written by : Aaron Malsawmdawngzuala Chapter - 1

THE CRAWLING WOMAN

(Spanish : Repente Mulier)

MIZO SUPERNATURAL HORROR STORY

Written by : Aaron Malsawmdawngzuala

Chapter - 1

***************************************

Lawirang khua hi in 100 tling vel tawk, lian lem lo tak a ni a. A mi cheng te pawh an tam lem lo hle in an inhrechiang thawkhat hlawm hle bawk, mahse khawte tak te ni chung eng eng emaw chu a awm kim ve riau va. In lian pui pui leh bazar lun tak, dawr lar tak tak te awm ve kher lo mahse picnic spot te, hotel te leh park te a awm ve thlap thung a ni.

Kum 2011 a ni a, chu khua a tlangval pahnih, zu heh vanga lar ve tak, Siamtea leh Nunmawia te chu zan dang ang bawk chuan an rui nawi dun leh hle a. Haw mai chu an la phal lo a ni chek ang chu, khawlaiah chuan ke a kal dun pahin an zai phei dun rat rat a. Kawnpui sawitu an awm ang mai chuan an kal ngil hleithei lo, an zai pawr tulh tulh lehnghal.

Chutiang hlim taka an thianduna an zai lai chuan an sira Hotel, an khua a hotel lar ve ber mai, HAHDAMNA RUN chu Siamtea zawk chuan a en vang vang a. A ding deuh dat a, "Tinge, hmuh i nei em ni?" tiin Nunmawia chuan a han zawt deuh hu a. Siamtea chu a khi suk a, "Saw Hotel-a thawk, naupai mek bo ta daih kha ila hria em?" tiin a lo zawt let daih mai.

Nunmawia chu a han ner deuh nung a, "Tu maw? Thla ruk vel liam ta ami kha em ni i tih? Tunge a hming khah...sap hming a nei hialin ka hria..." a han ti nuah nuah a. Chek hlur chung hian, "Lily.. Lily Zothanpari kha.." a ti vin hlar a. Nunmawia pawh chu a khi deuh vur vur a, "Hehe, ni tak...ngati nge i rawn sawi chhuah deuh thut a?" tiin a han zawt leh a.

Siamtea chu a han thaw deuh hak a, "KA ui ngawt mai, bathroom vel an siam belh lai khan inhlawh nan ka thawk ve thin a. A hmeltha sia, ka en reng zel. Engtia bo nge maw a nih le, ni 10 dawn kha chu khaw pum khan kan zawng luai luai kha a ni a, mahse a ruang hmuh tur takngial pawh a awm der si lo." a han ti nuah nuah a.

Rui viau e ti lo chuan Nunmawia pawh chuan a lu a lo bu ve nghauh nghauh va, "A ni ngawt mai tiraw, i sawi takah chuan mi sawi ka hre tlat a ni. A bo hma lawk khan a rai an ti thanin ka hria, nge ka hriatsual zawk..ka chiang lo." a lo ti ve bawk a. "Rai e, mahse thla 2 vel bak a la ni lo... a mak ve ngawt mai, hotel chhunga a awm lai reng, a duty lai renga bo tawp kha a nia, a mak tak tak a ni." Siamtea chuan a lo ti vat a.

Kal leh mai chu an tum a, mahse Nunmawia chuan Hotel lam chu ava melh leh zeuh va. Hotel hnung lama, hmeichhe pian ni awm tak, rang lutuk maia bawkvak phei zeuh chu a hmu hman tlat mai. A ding chat a, "Ehe...i lo hmu ve em?" tiin a thianpa chu a nghawk nghal vak vak mai.

Hrethiam lo tak hian Siamtea lah chuan, "Eng chu maw, khawiah maw?" a lo ti hu mai a. A hmu chiang bawk ngang aniang, Nunmawia thlan chu a tla nghal bawrh bawrh mai. A ruih pawh a reh nghal vek hialin a hria, "Saw...Hotel hnung lamah sawn, mihring.. mihring bawkvak phei ka hmu.." tiin a kawk a.

Siamtea chu ava hawi phei ve a, tumah a hmu ve der si lo. Irhfiak deuh uk uk pah chuan, "Khawi... khawimaw, khawiah maw? Ka va hmu ve lo ve, i hmu sual a ni lo maw?" a lo ti leh hu mai a. Aw khur deuh dar dar chung hian, "I hmu reng nang, a pil leh hman daih alawm. A rang lutuk, ka ti tak tak, dawt ka sawi lo." a ti vin hlur tawh mai.

Siamtea chu a nui ta vak vak mai a, "Zawnga, Lalnunmawi... min tihthaih i tum ve khanglang ami a? A tul miah lovang aw... nanga tihthaih ka hlau chhe te lo." a ti deuh zek mai. Nunmawia chu a thinrim lek lek hial a, "Siama, ka tihthaih hlawl lo che. Ka hmu chiang lutuk tlat, ka nu hmingchhalin ka sawi ngam." a ti vin leh hlur mai a.

Mahse Siamtea chuan ala awih tlat lo, "Anih va kal ila, va fiah ang hmiang, i ngam em?" a ti ta mai a. Nunmawia chuan a chil a lem dawk a, "A tul lo, haw vat zawk ang." tiin a chhang a. Siamtea chuan hmuhsit hmel tak hian, "I va dawih ve, i insawi huai theih tehreng nen. Keimahin ka va fiah ange, tah khan lo awm rawh." tiin kal a tum ta mai a.

Rang lutukin Nunmawia chuan a pawt let nghal vat a, "I mawl ami, haw mai mai zawk teh ang. A tul lo, va intih pa vel kha angai lo." tiin a vin deuh hrep mai a. Inla pa tak hian Siamtea chu a han khi leh suk a, "I dawih emai, angaihna a awm lo. I hmu tak tak lo aniang, keiman ka va fiah ang ka tih chu." tiin a rui phur tawh bawk nen, a kal lui ta tho va.

Nunmawia chuan a lu a dawm vang vang mai, a ruih pawh a reh deuh vek tawh. Haw san mai chu thil tih chi niin a hre bawk si lo, "Hrep taka.." ti a vin deuh thak pah chuan a va zui ve ta ringawt a. Hotel chu a reh thiap mai a, pawn light takngial pawh on a ni lo. A thim mup mai, Siamtea chu a leh hawi a.

A thianpa Nunmawia'n a lo zui ve tih a hmu chu a nui deuh suk mai, "Nangmahin i haw ngam chuang lo a nimaw, lo kal mai mai rawh. Kei, i thianpa hian ka han fiah sak ang che." ala ti ham ham mai. Nunmawia chuan a chhang lo, hlau rilru tak chung chuan a zui ve zel ringawt a.

Hotel chu an va pan hnai zel a, Siamtea chuan a han en kual vel a. Nunmawia erawh a thin a phu dep dep a, a thianpa Siamtea chu a haw rilru tawh ngawt ang le. Hotel hnung lam an thlen hma chuan an ding a, "HEtah hian maw i hmuh?" tiin Siamtea chuan a han zawt a. Nunmawia chuan a lu lo bu nghatin, "Aw...a hnung lamah hian rang lutukin a vak phei, ka hmu chiang lutuk tlat." a ti khur dar dar mai.

Siamtea chu a han thaw hak a, "Mipa nge hmeichhia?" tiin a zawt leh a. "Hmeichhia a niang, hmeichhe pian a ni. A sam a sei bawk, dawt ka sawi lo, Siama.." tiin a lo chhang leh a. Nuih deuh huk pah chuan, "Dawt i sawi ka ti hleinem mawle aw... a mak thin." tiin Siamtea chuan a la fiam hram a.

Nunmawia chuan a thianpa chu a melh rum ngang tawh mai, tichuan Hotel hnunglam chu Siamtea chuan zawi muang chuan a pan a. A hnungah chuan hlau tak chung hian Nunmawia chuan a zui ve zel a, a thlan fim chu a tla zawih zawih mai. Chutah Siamtea chuan Hotel hnunglam chu a va bih thut a, a thaw deuh huai a.

Nui var var chung  hian, "En rawh, DAwiha. Tumah an awm loh hi, nep lutuk mai." tiin a kawk a. Nunmawia pawh chuan a en ve a, tumah an lo awm lo ngei bawk. Siamtea bawk chuan, "Ka sawi mawlh mawlh kha, i hmu sual mai mai aniang ka tih kha." a han ti leh a. Nunmawia pawh chu a thaw huai a, "Nia, a ni mahna." a ti zawi sap ringawt.

An ding ngawi dun vang vang a, Siamtea chuan Hotel chu a han thlek vang vang a. Ham deuh bai bai chung chuan, "A thuhrimin, tinge zanin hi tumah duty an awm lo nge ni, an va reh thep thuap ve mawle?" a han ti nuah nuah a. "Aww... staff ho hlawh tlem vangin an nuar a, kar hnih vel chu an khar tawh." tiin Nunmawia chuan a lo chhang a.

Siamtea chu a khi suk a, "A nih vel tak chu, hawh teh, i haw phawt teh ang, DAwiha." a han ti leh hram a, kal chu an tum ta a. Pen 5 vel bak an la pen hman lo, hnunglam atang chuan hmeichhia, lungchhe taka inhnit hlawp hlawp ni awm tak thawm an hre ta tlat mai. An ding rual chat a, "I hre ve em?" Nunmawia chuan a ti nghal vat a.

Siamtea pawh chuan thawm chu a hre ve tlat, "AW, hria e." tih ringawt chuan a chhang a. Inhnit hlawp hlawp ri chu a ring zel a, tap ri in a chhunzawm nghal. Thawm chu an hnung lam atanga lo chhuak a ni tih pawh an hre chiang dun hle bawk, muangchang chuan  hlau tak chung si hian hnunglam chu an hawi a.

Mahse engmah chu an hmu lo, mahse Hotel hnunglam atang chuan lei th(r)il a mihring bawk vak ri hruap hruap ni awm tak chu an hre leh a, tap ri chu a ring telh telh bawk. An thiandun chuan an che eih lo, an ding ngawi reng ringawt. Chutah thawm chu a ring zel a, Hotel hnung atang chuan hmeichhe pakhat, kawr t(r)et hnuang ha leh hmai dang var vek, sam thur bum mai hi a rawn bawkvak phei ta mai a nih chu.

A taksa te chu a khem nasa hle a, a hmel lah a rapawm takzet. A mit chu thisen ang mai hian a sen rum mai a, var lai pakhat mah a awm lo. Thla eng tak hnuaiah chuan chu hmeichhe rapawm tak mai chu a lang chiang em em a, a thaw hrawk hrawk bawk. A ka atang chuan thisen a rawn chhuak a, Siamtea leh Nunmawia te thiandun chu a rawn melh ta run mai.

Chutah bawkvak chung bawk chuan a rawn pan phei ta mai a, anmahni chu a rawn ban deuh uak uak lehnghal. Aw rang rei ruai leh khawk rum rum hian, "Min.. min pui ru, khawngaihin, min tanpui rawh u." a la rawn ti zui a. Siamtea leh Nunmawia te thiandun hlau lutuk chu an meng phar awn awn mai a, chutah tlangval satha tak ni chung si chuan an au dun nghek mai.

An tlanchhe nghal a, an inngaihsak hman tawh lo. Hmun hran ve ve ah chuan an tlan a, an tan chuan zan tihbaiawm tak chu ava ni chiang em. Chumi zan atang chuan Lawirang khua a Hotel pakhat, HAHDAMNA RUN chu a hrang ang chuan a thang ta der mai a. Thenkhat chuan chu hmeichhe bawkvak thin chu zanlai dar 12 atang zing dar 3 velah a inlar tlangpui angin an sawi a, a thenin khawvar hma hretin a rawn inlan thin an ti bawk.

Titi a ti tam hle a, sawi dan hrang hrang pawh a tam narawh e. Nimahsela a hmutu diktak pahnih, Siamtea leh Nunmawia te tih loh mita hmutu ngei midang an awm ve ngei em tih erawh hriat chian a ni lo thung. Tawng ve anga insawi pawh an awm nual a, mahse a tak ngeia hmutu midang an awm leh awmloh erawh a chiang lo.

*****************************************

(10 years later)

Kum 2022 a ni a, zing dar ruk a rik meuh chuan SArah-i alarm chu a rawn ri ral ral mai. Ham deuh bai bai chung chuan Sarah-i chu a rawn tho chhuak a, alarm chu a off a. A han zi mar leh te te a, tichuan insawizawi tur chuan a insiam mawlh mawlh a. Room chu chhuahsan in inhnuai lamah chuan a chhuk a, choka lamah chuan phei leh in a hmai te chu a phih fai a.

Sarah Lalmuanawmi hi kum 27 mi niin nula invawng tak leh hmelchhe lem lo tak, pian dik zaih mai hi a ni a. Ft 5'6 vel laia sang niin an vengah pawh a luck hle a, pasal ala nei miah lo mai chu mak an ti rual rualin tlangval thenkhat, amah lo ngaizawng ru ve ngawih ngawih tute tan chuan thawk huaina chu a tling ve hial mahna.

Chhungkaw awm thei ve tak atanga rawn seilian niin mi tumruh leh taima tak a ni a, ruihtheih thil chu sawi loh, zuk leh hmuam takngial pawh engmah ti lo khawpa nula fresh leh duh khirh tak a ni. A eizawnna lam erawh Journalist a ni daih thung, thil chik mi leh a vei tawh chu vei bur ang chi kha a ni a.

Media lamah pawh a lar in, Jounalist hna chauh ni lo, eng eng emaw show ah pawh Host atan hial a an lo hman ve tawh, hmeichhe confi leh mahni inring tawk tak a ni bawk. Pasal hual a nei a, a hming chu Lalruatfela niin Maruat tiin an ko thin a ni. College Professor niin Maruata pawh hi mi awmthei ve tak a ni a, Sarah-i nen an inneihna turin thlakhat vel bak a awm tawh lo.

Kum 3 kal ta khan SArah-i leh Maruata hi an intawng a, sawi tak ang khan Sarah-i hi mi duh khirh leh thil chik mi a ni a, Maruata pawh hian a bem rei fu a ni awm e. Rintlak angah a ngai a, an inhmelhriat atanga hun engemaw chen hnuah a bemna chu a chhang ve ta chauh niin an sawi.

An inkawt zau leh nuam takah chuan SArah-i chu a tlan thauh thauh va, minute 20 vel lai mai a insawizawi hnu chuan inlamah chuan a lut leh a. A thlan pawh a chhuak tha khawp mai, a hah bawk aniang, sitting room lamah chuan pheiin sofa ah chuan a han tlu zal a. A phone a han en chu a pasal hual, Maruata miss call 4 lai mai a lo awm a.

Rang lutukin a call back nghal, mahse Maruata chuan a la thei lo ve thung. A rawn call leh mai ringin phone chu a ak a, a room lam pan chuan a chho leh nghal a. A thawmhnaw te chu hlipin a inbual fai a, thawmhnaw fai leh rimtui tak a inbel hnu chuan inhnuai lamah chhuk leh in coffee te chu a insiam a.

A inzawh hnuah chuan inchhung te chu a han ti fel leh tan a, almirah vel a lehkhabu hlui ho a remthat lai chuan chanchinbu hlui hmel tawh tak pakhat, a rawng pawh eng deuh nuai tawh chu a titla palh a. A chhar nghal vat a, a han enchiang chu a date ah chuan 2011 tih a lo inziak kuau mai.

"Ehe, ava hlui tawh ve.." tih pah chuan han dah that leh mai a tum a, mahse thu inziak pakhat chuan a mit ala ta tlat mai. A en vang vang a, 'LAWIRANG KHUA A THLAHRANG, HMEICHHE BAWKVAK THIN AN HMUH HI TAK TAK A NI NGEI EM?' tih heading a chhiar chuan a han thaw hak a.

Almirah chu kharin chanchinbu chu choka lamah chuan a la phei a, a chhiar zawm chak tlat mai. Thutthlengah chuan a thu a, a chhiar tan ta. "Kumin 2011, October ni 8 zan khan Lawirang Khua a hotel pakhat, Hahdamna Run kawtah hmeichhe bawkvak, rapawm tak leh thlahrang ni ngeia an rin an hmuh thu a khaw mite chuan an sawi a. Mit ngeia hmutu an khaw tlangval pahnih te chuan zing dar hnih bawr velah an hmuh thu an sawi, hemi hnu hian thenkhatin an hmuh ve thin thu an sawi bawk. Mahse chanchin dang a awm chhunzawm lem lo ni a hriat a ni a, a tak ngei a ni em tih sawichianna awmlo mahse a hmutute chuan chiang takin an hmu a, dawt an sawi loh thu an sawi ve tlat thung." tiin Sarah-i chuan ama hriat tham lek chuan a han phun nuah nuah a.

A ngaihtuahna a ti kal thui phian mai, a chanchinbu chhiar laiah chuan a rilru a pek em avang chuan an inchhunga mi pakhat rawn lut lai pawh chu a hre hauh lo. Kawngka pui hnungchhawn zawnga thu a nih vang chuan Sarah-i chuan engmah a hre der mai si lova, chupa lah chuan a la rawn pan zui.

Sarah-i lah chu a lo la inngaihtuah nasa mai a, "Ka van hre ngai lo em em, Lawirang Khua pawh chu khawi lama awm nge maw a nih reng reng le?" tiin a phun leh sap a, chutah ahnunga mi chuan a darah a rawn vuan thut mai. Sarah-i phu nasa lutuk chu a thutna atang chuan a zuang tho zawk a, "Awi ka nu!" tiin a per deuh nawlh hi a ni ber mai.

Rang takin a leh hawi a, a bialpa, a pasal hual Maruata lek chu lo niin. Maruata chuan inthiam loh hmel tak hian, "Ekhai aw.. i va han phu nasa em em ve, ka tihpalh lutuk." tiin thupha a chawi nghal mawlh mawlh a. Sarah-i chuan rum zet a melh pah hian, "I va han mawl tak, tinge khatia thawm nei miah lohva i rawn luh reng reng a. Tlem a tlemah Heart Attack min siam mai dawn lawm, ka thlarau a thlawk chhuak lo chauh." tiin a lo vin hlur mai.

Inthiamlo tak chung chuan Maruata chu a han khi deuh suk a, "I nei lovang, nang te chu i taksa a fit in a hrisel tha bawk a, Heart Attack i nei thei lo hrim hrim." tiin a han nuih tlawn vel a. Mahse Sarah-i erawh ala lungawi chiah lo, "Misual emaw ka ti mai dawn che alawm, mawl leh lutuk mai." tiin ala hau nasa mai a.

"Khati em em a i phut nasat kha ka ring hleinem, a hrim hrimin tinge phone i lak theih miah loh va?"

"Pawnah ka lo work out a, nangpawh zing kar kar ah enge i rawn tih a?"

"Ka u fanu te ber kha hostel ah a awm dawn a, zing dar 6:30 a kim an ti khanglang a. Ka va thlah pahin ka rawn peng kawi a nih hi, phone i la thei bawk si lova."

"Ka rawn call let lehnghal che kha, i la thei lo veleh thung a nih kha."

"A nih tak chu, engpawh nise coffee te chu lo in ve ila."

SArah-i chuan coffee chu a han siamsak ve nghal a, a chanchinbu chhiar lai chu a thawh san daih a. MArauta chuan chanchinchu chu banin, "Enge i lo chhiar reng reng a?" tiin a han en a. A ner nung a, "Ehe... 2011 ami daih a nih hi, engatan nge hetiang chanchinbu hlui lutuk tawh te i chhiar a?" tiin a zawt nghal a.

SArah-i chuan coffee rawn chhawp pah chuan, "Journalist ka nih hi, thil thar chauh hi hriat loh tur." tiin a khi suk a. Maruata chu a lo ner deuh sak mai, "Anih engatan nge i tih a?" tiin a zawt nawn leh a. Sarah-i chu a bulah chuan rawn thu in, "Hei hi ka lo chhiar a, Almirah ka tihfai pahin ka hmu a, ka chhiar chiang chak thut a." tiin a chhiar lai chu a kawk a.

Maruata chuan a han chhiar ve a, a khi suk mai. Chanchinbu chu thlehfel pah chuan, "AWi awi awi, a lem lutuk. Thudik pawh va ni suh, phuahchawpah pawh a phuahchawp mah mah." tiin a awih loh hmel kher mai. Sarah-i pawh chu a lo nui suk ringawt, "A hrim hrimin khawilai ah nge Lawirang khua chu a awm reng reng a, ka la hre ngai miah lo?" tiin a han zawt a.

Maruata chu a nui huk a, "Journalist ve si han hriat loh, thil i inlak hriat theih tehreng nen.." tiin a han fiam deuh hlak a. Sarah-i chu a lo ner nasa mai, "I hre bik ami?" a lo ti deuh hlur a. Maruata chuan a aw a han thian vel phawt a, "Hre tehreng e, khawthlang lamah. A kalkawng pawh a chhe lutuk, project neiin vawi 2 vel chu kan zin ve tawh alawm, mahse a rei tawh mai." tiin a lo chhang a.

Sarah-i chuan a chhang lo, "College professor meuh kan ni ve a, Mizorama khaw awm zawng zawng te chu hriat vek tur." Maruata bawk chuan a han ti leh deuh kher a. Sarah-i chu a ngawi vang vang a, "Tunlai tak chu ka awl lai a ni bawk a, nang lah college zirlai ho exam zawh hlim a ni bawk nen tihtur vak i nei chuang lova, kan inneih hma te chu min va zinpui ve la, ka kal ve chak riau." a han ti deuh thut a.

MAk ti tak hian Maruata chuan a en deuh hu mai, "Eng a? Engvangin, engatan maw?" tiin a zawt nghal a. "Aaa.. ka hre chuang nang, ihh.. ka kal ve chak, ka la kal ngai miah lova, ka la hre ngai miah lo bawk a... va fan ve hrim hrim ka chak deuh mawle." tiin Sarah-i chuan a lo chhang a.

"Kal duh suh, a ho emai. A kawng a chhe si, a boruak a uapin a lum bawk si, i inchhir ang."

"Aww... a ho e, kan cham rei dawn chuang hleinem."

"Nikhat lek cham pawh ka peih lo, hmun dangah te kal zawk ila... berkher a, Lawirang Khua berkher han thlan...i ti awm ang lo emai."

"Ti awm ang lo viau amawni le, ka kal ve chak a nimai a."

"Anih leh enge i kal chakna chhan?"

Sarah-i chuan a chhang mai lo, Marauta chuan chanchinbu chu a en a. A khi suk a, "Helai thlahrang an sawi vang hian em ni, he thlahrang hi va fiah i tum deuh tihna em ni?" a han ti kher a. SArah-i chu a thaw hak a, "Tum em em chuang love, mahse engemaw hriat belh turte a awm takin ka ti mawle." tiin a lo chhang sam leh et a.

Maruata chu a chek hlur mai, "Sarah, engemaw i hriat le? Chanchinbu hi en rawh, kum 2011 ami a nih hi, kum 10 a liam tawh. Chutah sawi zui pawh a awm tawh lova, engemaw va hriat belh vak i tum le?" a han ti a. Sarah-i erawh ngawi reng a, "Chuta chhapah, khatiagn thlahrang bawkvak tih vel, thudik a nih kher pawh ka ring lo keichuan... zep lo chuan a atthlak ka ti, SArah." Maruata bawk chuan a han ti leh a.

SArah-i chu a han thaw leh deuh hak a, "Nia, a ni ve tho mai." a ti zawi sap a. Chutia a han tawng deuh chiam mai chu Maruata pawh chu a inthiam lo leh deuh ni ngei tur a ni, SArah-i kutah chuan a vuan a. Zaidam tak hian, "Hmundangah, nuam deuhah kan kal dawn nia. Hmuhsitna ni lo se, LAwirang khua tih vel a kawng chhe taka va insawh sil th(r)um ai chuan phaiah te pawh kan kal ang chu. I duh phawt te chuan, inneih hnuah pawh Pathian zarah kan la dam anga, Honeymoon pawh a changkang thei ang berin kan ti dawn nia." tiin a han nuih suk a.

Za vak lem lo tak chuan Sarah-i pawh chu a lo khi ve suk mai, "Engpawh nise, ka va haw phei tawh ange." tiin Maruata chu a tho va, Sarah-i pawh chuan kawngka bul thleng chu a thlah a. An invai liam hnu chuan SArah-i chuan chanchinbu chu a en leh vang vang a, "Ni e, a sawi dik ve tho mai. Hetiang mai mai a buai chu, hun kan khawral mai mai ang." tiin a phun sap a.

Chanchinbu chu la in Almirah lam chu a pan leha , paih tur ho chu a thliar hrang leh a. Tichuan ei rawng a bawl chhunzawm nghal a, chutih lai chuan anu chu a rawn tho chhuak ve a. A rawn ham deuh bai bai mai, "E nu, i lo tho ve tawh maw? Lo thu rawh, thingpui ka rawn siam ang che." SArah-i chuan a lo ti nghal vat.

SArah-i nu, Pi Seni chu a thu a. Zik mar pah chuan, "Ka harh reng tawh alawm, tunen nge in inbiak mual mual a. Inleng i va nei hma awm ve, in tawng kha ka manghriat ruai ruai a?" tiin a han zawt a. Thingpui rawn pek pah chuan, "Maruata a nih kha, a kal deuh chiah." tiin SArah-i chuan a lo chhang a.

"Ehe, Maruata a.. a va rawn lang hma ve, hei tunah dar 7 leh a chanve a pel chauh ania?"

"A u fanu kha hostel ah a awm dawn a, zing dar 6:30 ah kim tur an ti sia. A haw lam a rawn peng a nih kha, min la ti phu nasa em em lehnghal."

"Eng chungchang nge maw in sawi ni ka lo tia, thingpui te i lo lumsak ve maw?"

"Coffee a in a, a chhuak lehnghal."

Thingpui chu Pi Seni chuan a han lem deuh khalh a, "Tihian Pathianzara kan dam zel chuan, pasal chu i nei ve ta mai dawn chu ania. I tawh khirh ve ropui sia, mo rapthlak ti hian an sawi an sawi mai che angah?" tiin a han fiam zuk a. Sarah-i pawh a lo khi suk mai, "Haha, lungngai reng reng suh, hetah ka rawn hruai phei daih ang." tiin a lo fiamthu ve bawk a.

An nufa chuan an titi deuh nual a, Pi Seni pawh chuan a fanu chu ni reilote hnuah mo a ni vat dawn si a, thutha te chu a fah mawlh mawlh a. Maruata hi kum 34 vel laia upa a ni tawh a, tlangval senior diktak kan tih ang chi kha a ni. Mahse sawi tak ang khan college professor lai a ni a, Pi Seni pawn makpa atan a iai lo khawp mai.

****************************************

Chhun a ni a, an garage bulah chuan SArah-i chuan scooty chu a sil mawlh mawlh a. Blutooth woofer ah ring tak hian hla a play pah bawk a, a scooty sil pah chuan amah pawh chu a zai rut rut mai. Minute 10 vel hnuah chuan shampoo a lo nei tawh lo tih a hrechhuak a, "Aww...ka lo lak belh law law lova aw... ava buaithlak tak." a ti nuah nuah a.

Chutah a ke bulah chuan shapoo bur chu a rawn tla a, kawngka atanga rawn anu rawn theh thlak a nih ringin a chhar a. "I va han fel thin tak, ka chunnu hi chu aww.." tia nuih sang pah chuan kawngka pui lam chu a han en a, mahse a nui hmel chu a tawp chiang kher mai. Kawngka chu a lo inkhar daih mai a, tumah a bul hnaiah chuan an lo awm lo bawk.

Shampoo bur chu a en leh a, scooty sil tura a chhuah hma kha chuan bathroom lamah a dah ngei bawk si. A hrethiam lo kher mai, "Tunge maw rawn theh phei le, tumah an awm si lova?" tiin a inzawt mual mual a. A ngaih a tha teh chiam lo, inchhung lamah chuan a lut ta kher a.

Sitting room vel a enkual pawh chuan tumah an awm lo, mak a ti kher mai. Ring tak hian, "Nu.. nu, khawnge i awm?" tiin a au vak vak a. Room atang chuan Pi Seni chuan, "AWiah, enge ni? tiin a rawn chhang a. SArah-i chuan mak a ti takzet, "Lo chhuak lawk teh, Nu." a han ti leh a.

Pi Seni chu room atang chuan a rawn chhuak a, "Engthil nge ni a, ta vak vak chuan?" tiin a rawn zawt a. A shampoo bur ken lai chu lek kangin, "Hei hi ka scooty sil laiin i rawn dah em?" tiin Sarah-i chuan a lo zawt a. Pi Seni chuan a ngaihna a hriat loh hmel kher mai, "Rawn dah nang, keite chu roomah lehkhabu ka chhiar a, ka mu char char alawm." tiin a lo chhang daih mai a.

Sarah-i mak ti chu a ka hau mai, "Anih chuan tunge ni anga, ka la chhuak silova. Cheng 3 man angchi pack hnih chiah ka la chhuak a, hemi shampoo bur lian hi chu bathroom ah khan ka dah reng sia, engtin nge ka bulah a rawn awm theih?" a ti hu mai. Pi Seni chuan a hrethiam lo takzet, "Engemaw i sawi awmzia le, enge i buaina chu?" tiin a lo zawt leh a.

"Ka ke bulah a rawn tla a, i rawn theh thlak a nih ringin kawngka lam ka rawn en a, tumah an awm silova. A mak kher mai, nge ka kengchhuak anga, ka hre tawh lo zawk le aw?" SArah-i chuan a han ti leh nuah nuah a. Pi Seni chu a khi suk a , "I senior ve tawh hle tihna a nih kha, haihawt lutuk." tiin roomah chuan a luhsan leh daih mai.

SArah-i pawh chuan tih ngaihna vak a hre tawh bik lo, "Huiham, a mak hle mai." a ti zawi sup ringawt a, pawnah chuan a chhuak leh a. A han ding ngawi leh vang vang a, hla chu a play chhunzawm leh a, scooty pawh chu a sil chhunzawm veleh mai a. A rilru ah chuan zinga a chanchinbu chhiar, Lawirang Khua a thil thleng chu ala awm reng tho va.

Engvanga a rilru a awm reng nge a nih a hre bik lo, a pasal hual Maruata ang tho khan thudik a nih a ring bik chiah lo. Mahse hriat chian a chak ta tlat mai chu amah ngei pawh chuan mak a inti em em a, a rilru ah chuan a vei reng a ni ber mai. Chumai bakah kum 10 lai a liam tawh a, sawi chhunzawm em em a awm tawh lo bawk.

Mahse hriat belh a chakna erawh a bo chuang lo, journalist anih angin a vei tawh chu vei bur, buaina a neih pawn chinfel zawh hma chu beidawng lo ang chi kha a ni a. Lawirang khua a kal pawh chu a rilru ah chuan ala awm fan a, kal luih kher chu a tum em em bik chuang lo. Mahse kha a chanchinbu chhiar khan a rilru a luah em a, thildang a ngaihtuah thei lo a ni ber mai.

******************************************

TO BE CONTINUE