A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 2

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 2

*************************************

Khua a lo var a, Pi Pari chu a harh a. A mit chu a han nuai nak nak a, a bul a va hawi phei a. Khumah chuan amah chauh chuan a lo mu a, a pasal a lo awm hauh lo. A tho chhuak a, verandah lamah chuan a chhuak phei nghal bawk. A pasal chu an room pawn verandah ah chuan a lo ding a, a melh ngai a lo melh vung vung a.

Pi Pari chuan ava pan hnai a, "I va tho hma ve, nizanah lah i mu har si. Zing dar 3 ah pawh khan i la vei kual thuak thuak khan ka hria, enge rilru hahna i nei em ni?" tiin a zawt a. A pasal, Pu Remliana chu a rawn hawi phei a, a mit chu a sen rum mai. A mu tlem tih a hriat hle a, a chauh hmel hle bawk.

Dark circle a nei kuau bawk a, "Office lam thil mawle, chutia rilru hah em em na tur chu a awm chuang lo." tiin a lo chhang mai a. Mahse Pi Pari ngaih chu a tha tehchiam lo, a pasal chuan a lakah zep a neih a ring deuh tlat. A han en vang vang a, "Dar 3 velah pawh khan ka hre reng alawm, i vei thuak thuak a, i arwn mutlai pawh ka hre lo. Tunah lah dar 6 a ri ve chiah a, i lo tho leh der tawh ania, i mu lo hrim hrim tihna em ni?" tiin a han zawt leh a.

Pu Remliana chu a han thawk hak a, "Mu e, zan mut ka harsat lai alawm. I hriat vek kha, zan mut ka harsat thin zia te chu... engpawh nise, thingpui ka zu lum ange." tiin a kal daih a, inhnuai lamah chuan a chhuk a. Pi Pari chuan a en zui vawng vawng ringawt a, "Engemaw niang le aw...awii, ka mut ala chhuak." tiin a ham bui bui a, khumah chuan lawn chhovin a mu leh daih a.

Pu Remliana chu inhnuai lamah chuan a chhuk a, thinpui in chu sawi lo, choka lam pawh pan lo chuan pawnah a chhuak tlang leh nghal a. A tei kual vut vut a, phone chu a khawih leh mual mual bawk a. Minute 5 vel lai a tei kual leh hnuah chuan a phone chu a en leh a, tu emaw number hmet chhuakin a call a.

A ring quit tep tih ah chuan a rawn la ve thei hram a, "Umm...enge ni ta?" mipa aw hian phak chel chual, harh chiang mang hlei lo tih hriat tak hian a rawn chhang a. Chutah vin zet hian Pu Remliana chuan, "Mawla, enge i harh theih miah loh le? Tiang te chuan kan thawh dun reng thei dawn em ni? Alert takin lo awm reng rawh ka tih kha, a mut pawh ka la mu lo ania." tiin a hau nghal tawn tawn mai.

Phone ami pawh chu a rawn harh kawk a niang chu, "Enge Pu Remlian, engthil nge thleng, an lo thleng tawh em ni?" a rawn ti ve nghal chung chung mai. Pu Remliana chu a thaw hluai a, "Thleng lo, buaina kan tawk." a lo ti ta daih mai. Phone ami pawh chuan hlauhthawn hmel tak hian, "Eng a, eng buaina maw? Min man chhuak ami, khamite kha an man tihna em ni?" a rawn ti leh chung chung a.

"NGaithla rawh, pawisa an lak tawh thu an sawi a, mahse zinglam dar 4 vel khan ka call tlang thei ta miah lova...ka try ngat ngat hnu, minute 10 vel hnuah tu emaw hian a rawn la a, ka that vek i naute a rawn ti."

"Eng a? Tunge chupa chu ni a?"

"KA hre bik lo, Victor LAlthanmawia a rawn inti lehnghal."

"Victor-a a? NGawiteh..Victor Lalthanmawia...tualthahhmang kha maw? Thi ta kha maw?"

"A ni em ka hre bik lo, engpawh chu nise phone-a sawi chi a ni lo...lo kal la, inhmuhna tur kan tih ah khan rawn kal rawh, tunah, vatin.."

"Awle, ka lo kal nghal ange.."

Phone chu an dah a, Pu REmliana rilru chu a hah hmel kher mai. An garage lam chu a pan nghal a, motor la chhuakin chak takin a tlan a. Pu Remliana hi tudang nilovin khang misual pathumte, ZAra te huana pawisa va zawng tura tirtu, an pu ber kha a ni. ZAra pa hi a boral tawh a, Pu REmliana hi Zara pa hrawn a ni a, Pi Diki kha Zara nu tak tak tihna a nih chu.

********************************************

Tlangval kum 29 mi, hmel fai veng leh pawisawi loh hmel tak. Ft 5 leh 8 inches vela sang, pian tha ve tak mai, Peka chu huan kal tur niawm tak chuan a insiam mawlh mawlh a. Chempui te chu a tat hriam ang hliau hliau va, chutih lai chuan a phone a rawn ti a.

A han en chu a thianpa, Nghaka a lo ni. Phone chu a pick up a, "Aw hello, good morning." a han ti dam dap a. Phone atang chuan Nghaka chuan, "Tho ve thei maw...dar 7 ah chuan kim kan tih kha ila hre ve maw?" a rawn ti a. PEka chu a nui suk a, "HEi ka insiamk mek, ka thawhna a rei tawh. Ka hman a nimai, buhfai vel pawh ka buaipui fel tawh." tiin a chhang a.

Nghaka pawh chu a rawn nui ri huk a, "Ehe...i va tho hma leh si ve? I tho a te a ni lo maw?" tiin a rawn fiam a. "NGawi mai mai teh, nang enge i chanchin ni zawk? Mipa rual kan ni dawn bawk a, i muangchang lo teh ang u. Kalkawng a thui si, i tho tawh em?" tiin PEka chuan a han zawt let ve thung a.

"Tho tawh mai nilo, hei ka kal mek zawk. Biak In bulah khan motor ka dah a, hei ka pan mek."

"E a nih chu mawle, chuan Zualtea leh Sammy-a te hi enge an chanchin ni ve?"

"Sammy-a khan ka inbual mek a tia, Zualtea chu ka rawn chhuak chiah a ti... a hunah chuan an rawn thleng ve mai turah ka ngai."

"Aww.... Lal Sammy-a pawh hi a, inbual inbual angai amawni le..engpawh nise, hei ka rawn chhuak phei ange keipawh."

"Awle, Biak In bulah chuan ka lo nghak dawn che nia."

Phone chu an dah a, Peka pawh chu insiam chhunzawm mawlh mawlhin a ken tur ang ang chu a khung fel a, tichuan a chhuak ta a. PEka, SAmmy-a, Nghaka leh Zualtea te hi thian an ni a, thianho intih thawven nan ram riah chhuah an tum a, tihtur pawimawh em em pawh an nei chuang lo.

*********************************************

Hmun pakhat, fal ve angreng takah chuan Motor pakhat, Pu Remliana motor khalh chhuah ngei mai chu a ding a. A bulah chuan bike pakhat a ding bawk, motor chhungah chuan Pu REmliana leh a hma lawka a phone, a thianpa leh a cousin ni bawk, tlangval senior ve lam tawh, kum 32 mi, Siama te chu an thu dun a.

Siama chuan mak tih hmel tak hian, "Victor Lalthanmawia, a thihna pawh kum 7 vel a liam tawh. Engtin nge a nih theih, keichuan a nih ka ring lo bur." a han ti nuah nuah a. A hma zawn melh reng chung chuan, "Ring lo eng ang mah ila, a rawn insawi miau sia lawm. Phone leh ka tum a, mahse tlang pawh a tlang thei tawh lo." tiin Pu Remliana chuan a lo chhang a.

Siama chu a ngawi vang vang a, "A aw i hrechiang em, keichu ka ringhlel tlat. Victora hi a la dam a nih chuan a awihawm loh lutuk, thil theih loh hulhual a ni." a han ti leh nuah nuah a. Pu Remliana chuan Siama chu a melh deuh kawk a, "A aw pawh hrechiang mah ila Victor LAlthanmawia aw ka hre hleinem, a takah ka hmu ve hman hleinem." a lo ti hlur mai.

Siama chuan a lu chu a han tuai leh vak vak a, "Huiham... tu phiangsen chu nge maw ni dawn le? KAn ruahmanna te, kan thil tih tum te hi hre ru reng tu, min lo enthla ru reng tu hi an awm tihna a ni mai lo maw?" a han ti leh a. Pu Remliana chu a thaw hak a, "Khalai hmun kha Victor-a damlaia a nupui Angel-i nena an huan kha a nia, tah khan sumdawnna an nei der kha a ni a. Chuvang chuan Victor-a angin a insawi kher tihna pawh a ni thei, midang daih pawh a ni thei tho." tiin a lo chhang a.

"NGawi teh, Pu Remlian..i sawi takah chuan keipawh ngaihdan pakhat ka nei."

"Enge han sawi la?"

"I naute zinga mi tho an ni lo maw, pawisa tlan bo pui an duh avangin... tichuan Victora lem an chang daih te hi a ni thei mai lo maw?"

"Nilo... a ni lovang."

"Engvang ngawtin maw, nuai 20 lai ania, a tam tham si a... a pawisa faiin, an mit ngeiin an hmu awm sia, nuai 2 theuh an chang dawn tih chu inhre tho mahse khatia mit ngeia an hmuh tawh chuan rilru dang an pu anga, an tlanbo pui daih hi a ni thei tho ania."

"Nilo... an chhungte thah ah ka vau vang chauhva ka tirh naa kal ngam an ni a, khawiah an tlanbo pui lovang."

"A ni ngawt lo ania, Pu Remlian. Sum in mihring mit a tih del theih zia hrechiangtu chu nang leh kei kan ni, anni pawh mihring ve tho an ni. Nuai 20 chuan an pathum tan thil tamtak a ti thei dawn tih chu chiang sa ania... an chhung leh khat te an ngaihtuah tawh teuh lo. PAwisa bak kha an rilru ah a awm tawh lovang, tichuan chhuanlamah Victor-a angin an insawi aniang.. chu chu ka ring ber. Tual an that duh tawh phawt a, a aia sual khawih emaw, nangmah phatsan te kha chu an tan a harsa dawn lo lutuk."

Pu REmliana chu a ngawi vang vang a, "A pawimawh hmasa ber chu Victor-a inti hi kan zawnchhuah a ngai a, a dawt ah pawisa. Victor-a anga insawi hian pawisa chu a tlanbo pui ngei pawh ka ring a, amah kan zawn hmuh hmasak loh chuan pawisa chu khawnge a awm kan hre dawn chuang lo, kan chhar hlauh te a nih loh chuan..." a han ti chang fak fak a.

Siama chu a han thaw deuh hluai a, "Tih dan tur ava vang ve, min manchhuak mai ang tih te pawh a hlauhawm a lawm. Kan chet vat angai, anih loh chuan kan chhe vek animai." tiin a thlan te chu a tla bawrh bawrh a. An ngawidun leh vang vang a, an rilru a hah kher mai.

"Zara leh a bialnute unau an thi tawh a, nakinah tu ten emaw an ruang an la hmu dawn tho tho. NGaihtuahna fim tak hmanga kan chet a ngai dawn ania, keini tunah zu kal ngawt ila a chi siloh. Ka nupui hian a ngaihtuah em em mai bawk si nen, phone tlang theih an ni tawh lo phawt anga, ZAra bialnu chhungte pawhin zawhna an rawn ngah dawn..chuvang chuan fimkhur taka kan chet angai." Pu Remliana chuan a han ti leh a.

Siama chu a han thu tha deuh va, "A hrim hrimin i naute chu an nih i ring lo ami, Victor-a chu a thi tawh a, i hriat kha nangpawn... keichu i naute pathum thil tih vek tho kha a nih ka ring." ala ti fan mai. Pu Remliana chuan a aw a han thian kharh kharh a, "Diktak chuan...rinna tlem chu ka nei.... Victor-a hi... a thi em, a dam em, tuman kan hre lo." a ti ta mai a.

Siama chuan phawk fe hian a en a, "Eng a? A awihawmloh emai, a ruang pawh an phum kha.." a lo ti vat a. "Ni e, an phum alawm. MAhse kha kha tu ruang nge i hria ami, Victor-a ruang a ni lo. Police Inspector pakhatin mark a score duh avangin balck market atangin ruang dang a chah a, tichuan a naute nen lemchangin Victor-a ruang angin an sawi a nih kha, manchhuah an ni tawh bawk. MAhse Victora ruang an hmu lo, a thattupa, putar ruang chiah kha an hmu." tiin a chhang a.

Siama pawh chu a ngawi ta dak mai, "Chuvang chuan ka naute kha ka tan em em a ni hran lo, thil awm thei ve tho a ni." Pu REmliana bawk chuan a han ti leh a. Siama chuan a chil a lem dawk a, "Engtin nge kan tih ang?" a ti khur deuh dar dar mai. "KAn haw phawt ang, a nih nih chu ni phawt se, Zara te ruang pawh an la hmu anga, lem kan chan ala ngai dawn chauh." tiin Pu Remliana chuan a chhang a, an haw ta a.

Pu REmliana hi tlangval senior uchuak, kum 50 tling tep tawh a ni a. ZAra pa thih hnu khan Zara nu, Pi Diki nen hian an innei ta a ni. Tin, khang misual hmaiakwr vuah pathum, Zara leh a bialnute unau thattute kha a hnuaia thawk, an driver, an huan enkawltu leh an gate vengtu guard(watchman) te an ni.

****************************************

Chhun dar 12 a ri vel chiah a, PEka te thian ho pawh chuan an tum ram chu an thleng ta. Mahse motor erawh an riahna turah a luh tlang theih dawn loh avang chuan an kalna hmun tur atanga hla lutuk lovah chuan an dah a, an riahna tur pian in te chu an la a, tichuan ke in an kal ta ngat ngat a.

An titi tui hlawm kher mai, ramhnuaia ke a kal mek an ni nanga tawng an inchuh nak nak hlawm mai. Tichuan tlang lam pan chuan kan kal chho zel a, a tlang chhip chu an thleng a. Rin ai tak chuan a lo zawl nuam a, an ril a tam tawh em avang chuan eitur an ken ang ang te chu an ei a.

An zu pai chu phawrhin an in hova, an hlim tlang dar dar hle mai. An ngaihzawng chungchang te sawiin an han inkap vel vak vak thul, no 4 vel an in tawh hnu phei chuan tawng an inchuh nasa tawh khawp mai. Peka chu a tho deuh hluai a, "Khawnge ka va zung lawk ange." tiin an awmna atang chuan a kal hla deuh va.

Thingkung bulah chuan a zung a, thawk a han la vak a. A zung zo a phei leh tur chu an chhona lam ava hawi zeuh va, mipakhat lian ve tak, a hmai buara a inkhuh tlat mai chu a hmu thut a. A liam deuh puat lehnghal a, a phu nasa kher mai. A kawk a, "Ehe..khapa kha.." a ti deuh vak a.

A thiante chu an rawn hawi rual thap mai, "Enge a, mi hmuh i nei ami?" tiin Zualtea chuan a lo zawt nghal vat a. Peka chuan a chhang mai lo, a va kal hnai deuh va. A han hawi kual vak vak a, mahse khapa kha a hmu leh tawh miah lo. A thiante chuan an en reng a, "Enge a, Peka..engthil nge i hmuh a?" tiin Sammy-a chuan a rawn zawt ve bawk.

Peka chu a thaw huai a, a thiante lam chu a va pan a. An bula thut pah chuan, "Mipakhat ka hmu a, a palian em em lehnghal." tih pah chuan no khat chu a rawn tlak leh pup a. A thiante chuan an awih vak loh hmel kher mai, "Ramhuai a nih chiah chu.." tiin Zualtea chu a lo uang a.

"Aih ka ti tak tak alawm, mihring pangngai chu a ni. TAh sawn, kan chhohna lam kawng awih deuhvah sawn a phei liam zuk a, ka hmu leh hman tawh miah lo." Peka chuan a han ti leh a. Sammy-a chuan nuih pah hian, "Eng nge i hlauh vak a, i zurui hi ramhuai hi i hmu ziah bik mai." tiin a lo fiam zui ve bawk.

PEka chu a thaw hak a, "Ka hmu tak tak ti mawlh mawlh a awww.... enge maw in awih loh tlat le. Ft 6 chu a pel hrim hrim ang, a sang lutuk. Chuan a lu chu buara ni awm tak hian a tuam bawk, a mit zawn pahnih a kua in ka hria." tiin a lo chhang leh a. Nghaka chu a han chek deuh hlur a, "Aww a ho e, mihringte chu awm ve bawk ang chu... mi ram kal te pawh a ni ve thei a, a palian e palian love, hlauhawmah hian ngai nghal ngawt zel suh u, in dawih emai a." a lo ti zek mai.

PEka chu a khi suk a, "Kan hlau hleinem, amak ka ti em alawm." tiin a lo chhang leh a. Nghaka chuan a melh deuh khur a, "Enge a makna, mihring dang lo awm ve chu?" a han ti vin deuh hlur a. Peka chu a thaw hak a, "Mak e, mi ram kal pawh chu lo ni tehreng se, tinge a lu kha a tuam tlat kher, chubakah a kal chak em a, a t(r)uan kha  a rang em a, ka hmu leh hman tawh reng reng hleinem a hnua ka va en pawh khan." tiin a hnial let ve leh a.

SAmmy-a chuan ring deuh lenglawng hian, "A ho eemai, in ho lutuk. Tu pawh chu lo nise, buaina min thlen loh chuan a tawk. Min rawn tibuai a nih leh eng anga palian pawh nise, pali kan nia... kan lo sawp zek mai dawn lawm.. tiraw Zualte?" tih pah chuan a thianpa Zualtea chu a han nghawk zeuh va.

Zualtea pawh chu a kai deuh tawh aniang, "Ni e, dik chiah mai. Kan tam zawk, kan hneh hrim hrim." tiin meng mang lo chuan a lo nui ve huah huah bawk a. Peka pawh chu a t(r)awng zui tawh bik lem lo, sawizui pawh an tum tawh lo aniang nge. Thildang sawiin an titi leh a, zu pawh chu an in chhunzawm lehnghal a.

**********************************************

Pu Remliana leh Siama te chu park ah chuan an awmdun a, an hmaah chuan tlangval pali, Henry-a, Lucas-a, Mamuana leh Dina te an ni a. An la thalai hlawm thah thah khawp mai, kum 25-30 vel chauh an la ni ngei ang. Pu Remliana chuan ngun takin a han en hlawm a, a lu a bu nghat nghat mai.

A aw a han thian kharh kharh a, "In hna tur chu inhre chiang thawkhatin ka hria, min ti hlawhchham hauh suh ang che u. Fimkhur takin kal ula, motor number kha MZ01 K 4533 a nih kha. A rawng sen ania, in phone ah pawh thlalak ka thawn vek tawh che u. Ni khat leh zan khat hun ka pe ang che u, tichuan Victor-a anga insawi kha... a nung chung ngeiin ka hmu duh bawk ania." a han ti chang fak fak a.

Mamuana chu rawn pen chhuakin, "Ka pu, anih leh nikhat leh zan khat chhung chuan lo hmu lo ta ila... a hnuah hmu leh ta si ila, engtin nge min tih ang?" ngeiawm tak chuan a han ti deuh kher a. Pu REmliana chu a khi suk mai, "A tha e, in hlawh pawh ka belh ang. Mahse ka cheng nuai 20 kha in tlanbo pui tur a ni lo, ka hnen a thleng thlap phawt tur a ni." tiin a chhang a.

Dina chu rawn tawng chhuak ve in, "Lungngai suh, motor an dahna lai hmun i sawi a, a dik a nih phawt chuan.. khalai kawng kha chu kan hre bel ve tawk thawkhat alawm, tumah an kal ka ring lo. KAn hmu em em ang, a awm a nih ngat chuan." a lo ti ve bawk a.

"Tin, thil pakhat... khang a hmaa ka tirhte kha, kha mite pathum kha an lo la dam a, anmahni thil tih vek a lo nih a, in man chhuak a nih chuan an nunna zuah hauh suh ang che u, that ngei ngei ang che u." Pu Remliana chuan a han ti leh a. Siama chu lo tawng chhuak ve in, "Ruang in hmu dawn a, kan sawi ang khan mi pathum ruang niin pahnih chu hmeichhia an ni dawn a, pakhat chu mipa a ni ang. In finger print hnutchhiah reng reng suh ang che u, in fimkhur angai ania." a lo ti ve bawk a.

"Thlam chu in zu thlen ngei ngei a ngai dawn a, kan sawi lawk vek tawh kha. Dap tha leh thovang che u, dawt vek pawh a lo ni thei kha mite sawi kha.. engpawh chu nise, tha takin thawk ula, in hlawh tur pawh a chhe hran lo ani tih kha vawng reng bawk ang che u." Pu Remliana bawk chuan a lo ti ve leh a.

Henry-a chu a khi suk a, "Kan hria e, kan hna thulh meuhvin kan kal dawn chu ania. Kan hlawhtlin beisei ang, mahse... kan kalkawngah te kan buai takin, chutia ramhnuaia han intirh nghal tawp mai chuh. Advance tlem azawng, kan va mamawh dawn ve...kawng laka thil lei tur leh mamawh neuh neuh te pawh kan nei thei a.." a han ti deuh duah a.

Siama chuan a lo ngei hmel kher mai, a thin a ti rim hman lek lek hial a. MAhse Pu Remliana erawh chu a khi suk ringawt, "A tha e, ka pe ang che u." tiin cheng 500 note clip khat, chhah tha lenglawng chu an pali chuan clip khat theuh a pe a. Lucas-a chuan pawisa chu a han en chiang vel a, a hnim deuh vang vang a.

Nui deuh sukin, "Kan lawm e, kan kal ange. Lo lungngai suh u, pawisa nen kan rawn let leh ngei ang." a ti a, chung tlangval pali te chu an kal ta a. Siama chuan lungawi loh hmel tak hian, "Tinge Pu Remlian, khatiang zat zat i pek a, a mal te te in clip khat theih i pe lehnghal? An bum ve thei tho che nia, kan thil tih hi a risky ropui si." tiin a lo phun nghal char char mai.

Pu Remliana erawh chu a lo nui var var mai a, "Siamte, an chhungte...an nu leh pa theuh te, ka hre vek alawm. A chhuichhuak vek, ka fimkhur loh i ring em ni? Mi a ka ni hleinem, min bum ngam miah lovang." tiin a lo chhang daih mai. Siama pawh chu a thaw hak ringawt a, park atang chuan an kal sawn ve ta a.

**************************************

Victor Lalthanmawia, mi zawng zawngin a thi tawh amaw an lo tih, Hmaikawra ti a an hriat thin ngei mai chu a nupui hlui Angel-i nena an thlam ni thin, thalai tamtak te buma an lo thah tawhna hmun, Zara te thlam chu a pan phei chhet chhet a. Kawngka zawnah tak chuan a ding a, thlam chu a en vang vang mai.

A hmai tuamna chu a phelh a, a hmai ser, meiin a kanna hnuhma vel te chu a nasa em em a. Victor-a, tlangval hmeltha tak ni thin kha tunah erawh hmelthatna reng a nei tawh lo, a hmai chanve phawk chu a kang ser nasa em em a. Mahse kum 7 lai a liam tawh avang chuan engmah na a nei tawh lo thung, thlamah chuan ava lut a.

Thisen te chu a lo la kawi nuai mai a, hmaikawr vuah pathum ten pawisa an lak chhuahna, chhuat awng pawh chu a lo la kaw huau mai. Amah chu a bal em em a, ramhnuaia khawsa thin a ni tih a hriat hle bawk. Kan hriat tawh angin a hma atang daih tawh a ramhnuaia khawsa thang kha a ni a, kum 7 lai ramhnuaia alo la damchhuak pawh hi a mak lutuk hran love.

A che rapthlak thei bawk a, thah hreh tumah a nei bawk si lo. Ramvak mi diktak niin sa pelh a thiam bawk a, eitur chu a tlachham reng dawn bik lo tih chu a chiang reng. Thlam chhung chu a en kual a, bucket ruak chu la in a bula luiah chuan tui ava chawi a.

Tichuan thlam chhuata thisen kai te chu a ti fai ang nawk nawk a, bungbel tla darh nuai te, bungraw let rem rum te chu a rem fel a. REi fe a tih fel hnuah chuan a fai ve kuar mai, a thaw huai a. Thutthlengah chuan a thu a, a melh ngai a melh vung vung mai.

A mitthla ah chuan Angel-i chu a rawn lang ve leh zawk zawk thin a, a hmangaih em em, a nupui hlui kha a ni ve tlat. Tichuan choka lam chu ava hawi a, thuk bul a chem kawm te, tu thlawh leh hmanraw dang lo awm te chu a en kual a. Ava phei a, hmanruate chu a han lek kual hlawm a.

Mahse a duh a hmu lo a niang nge, a kal leh daih a. Tichuan room lamah a phei a, Zara leh Abby te mutna khumah ngei chuan a thu a, a thaw deuh halh halh mai. ZAwimuang chuan a tlu zal a, a maimitchhing a. Thil tih tum emaw, hna engemaw tak chu hmachhawp a nei leh tawh tih a hmel atang chuan a hriat reng mai.

***************************************

Tlai lam a ni tawh a, Peka te thian ho pawh chu chawhmeh tur a awm takin tiin ramhnuaiah chuan an pali chuan an vak kual hlawm a. Tumbu leh eng eng emaw vel chu an hawn ve thei nual tho mai. An haw leh lam chu ahma a an kalna lo lam atang chuan an haw a, motor an hmu tlat mai.

PEka chu a ding dat a, "Ehe saw...motor, mi an awm ve em mawni le?" a ti nghal a. Sammy-a chuan a en vang vang a, "A tihzia hlauh ve, ka tui a hal tawh lutuk. Awm an awm hlauh chuan tui in va dil nghal teh ang, i ramhuai hmuh te pawh kha a lo ni maithei asin." tiin PEka chu a han fiam zui kher a.

An va kal ta a, mahse an thlen dawn tep ah chuan misual pathum, Pu REmliana naute, hmaikawr vuah pathumte ruang chu an hmu ta. An ding chat a, "Ekhai...ruang ruang ruang." tiin Zualtea chu a au nghal chiam chiam mai. Tlangval than kin tawh, puitling pali mah nise an hlau ve kher mai.

Mahse an tlanchhe mai bik lo, an ding khawng reng ringawt a. Ruang chu a rapawm ve hlawm bawk em a, pakhat phei chu a kawngah tak a bung lek lek a, a ril te a lang nuai mai bawk si. PAkhat lah a mitah tak baseball bat bung, a zum lam chu a mitah a bur vu a, a tukhumah a tlang hial bawk a.

Pakhat lah luruk khi lang vek thei khawpa lu vun thler a lo ni bawk nen, mipa tan pawn a rapawm ve duh khawp ang le. Hmaikawr vuah pathum tena an hmanraw ken theuh, hreipui, chemte leh baseball bat bung te pawh chu a lo la let remrum bawk. An ngawi reng ringawt a, "Thah ngei an ni, helai hmun hi a him lo tawp mai." Ngahka chuan a han ti nuah nuah a. Zualtea chu a thla a muang lo kher mai, "Enteh u, kan haw leh mai dawn em mawni le?" a ti nghal chung chung a.

"Ni e, tualthattu hi helai hnaiah pawh hian a awm maithei ania....keizawng haw mai ania ka duh." tiin NGhaka pawh chuan a thianpa Zualtea thusawi chu a lo pawmpui khawp mai. Peka chu a ngawi vung vung a, "Chhuna...zu kan in laia ka hmuh ka sawi kha, khapa kha a inthuam dan a mak si a, a thil tih a ni mai lo maw?" a rawn ti chhuak hlawl mai.

Sammy-a chuan awihloh hmel tak hian, "A ni kher lovang, a inhlat emai. Chubakah i hmu tak tak ami, i ruih laiin i mit a vai palh te a ni zawk lo maw?" a lo ti deuh kher a. Peka chu a sa zak mai, "Dawt ka sawi ziah lo, ka hmu alawm mawle.." a lo ti vin ve hlar mai.

Nghaka chu a ding hluai a, "Inhnial suh u, inhnialna hun pawh a nih loh hi. Engpawh nise, motor hi check teh ang u, tlangval pali lai kan awm ve a. Hetia ruang kan hmuh tak avanga haw tum nghal ngawt chu, ka rilru ka thlak leh e. Mizo takin awm ang u, motor chhung check ila, tichuan police kan hrilh vat dawnnia." a ti a.

Motor chhung chu an check a, eitur tlem azawng a lo awm a. Chutah Peka chuan air bag pahnih chu seat hnung lamah chuan a hmu fuh ta. A la chhuak ve ve a, a han hawng a. Pawisa tam tham tak a hmu chiah chu a meng kawk mai, "Ehe...hei pawisa...a tam lutuk." tiin a au vak a.

Chuveleh a thiante pathum chu an rawn kal ve nghal, anni pawh chuan pawisa an hmuh chiah chu mak an ti kher mai. An in en hehu hlawm ringawt mai a, "A va han tam em em ve mawle, engzat tak ni ang maw?" Zualtea chuan a han ti nuah nuah a. Chutiang khawpa tam pawisa chu an la hmu ngai lo tlat, an en ngawih ngawih hlawm ringawt hi a ni ber mai.

Nghaka chu a han ding ngil deuh at a, "Engtin nge kan tih ang, police hnena report mai ava tha ve.." a han ti a. Mahse a thiante erawh chuan an chhang lo, pawisa chu an la en ngawih ngawih mai. Sammy-a chuan a han khawih chhin vel a, "A tak..pawisa tak tak a ni." a ti zawi sap a.

Zualtea chuan a lu a han bu nghat nghat a, "HElai ruang ho hi, hemite ta hi em mawni le? KA ring lo, engemaw tak chu a awm aniang. HE tualthihna thlen chhan pawh hi he pawisa vang bak hi a ni lovang, thil lian tham tak inphumru chu a awm a ni." a han ti a.

Peka chuan a lu thak lo pui chu a hiat nauh nauh va, "Mahse... pawisa hetah ala awm bawk sia. Hetah ruang pathum a let reng bawk a, an thihdan lahi hi a rapthlak hmel hlawm si. Tu thah nge ni hlawm ta ang, pawisa vang a nih chuan pawisa hi tualthattu chuan lak bo daih awm tak ania, mahse hei ala awm reng si a.." a lo ti ve bawk a.

"Pawisa inchuh vang hian anmahni an insual buai anga, an inthat pawh a ni thei tho." Zualtea chuan a lo ti ve leh a, an rinthu chu an sawi nak nak hlawm a. Peka bawk chu a han hawikual leh a, Victor-a'n a vawm chhiat tak, misual pathumte zinga pakhat, an boss ber phone dar vek chu ava hmu leh ta.

**************************************

TO BE CONTINUE