A HANDSOME CREATURE - 7 VICTOR RETURNS Written by : Aaron Malsawmdawngzuala WARNING - 18+ (A sequel to A Handsome Creature - 6) Chapter - 1

 A HANDSOME CREATURE - 7

VICTOR RETURNS

Written by : Aaron Malsawmdawngzuala

WARNING - 18+

(A sequel to A Handsome Creature - 6)

Chapter - 1

***************************************

(Victor Lalthanmawia thi nia an hriat atanga kum 7 hnuah chuan...)

Lui pakhat bulah chuan assam type-a sak, in tereuhte, pawn lam atanga lang mawi phian si chhungah chuan ZAra leh Abby te chu an awm a. Pindan chhungah awmin khumah chuan piancham suit nen chiah chuan an zal dun a, hmangaihna lupuiah chuan an lo pil dun mek a ni.

Zara leh Abby hi inngaizawng niin he lui bula thlam nuam tak ah chuan intihlim turin an kal a, zan hnih vel chu cham an tum a ni. Chutia an lo inbuan tui lai tak chuan room kawngka chu a rawn inchum ri dut dut a, Zara leh Abby te pahnih pawh chuan an thil tih lai chu an tawp san chiang ngei mai.

An phu dun nasa em em a, Abby chu a inha tha nghal sawk sawk a. Zara pawh chu inha ve nghalin, "Tunge.. tunge ni?" a han ti vin nghal deuh thak a. MAhse boruak chu a reh nghal diak mai, an pahnih chuan khum atang chuan an chhuk nghal a, Abby chu hlauh hmel tak hian Zara dar chu vuanin a hnungah a biru nghal a.

Zara chuan a aia vin leh ring hian, "Tunge ka tih chu mawle?" a han ti leh vak a. Chutah kawngka chu a rawn inhawng thut a, kum 17 lek, tleirawl hmeltha tak, SAngzuali a lo ni reng mai. Abby leh Zara chu an thaw huai a, "Ka ril a tam, hei khua a thim mai dawn. Keimahin ka awm reng duh tawh bik lo, rawng pawh ka bawl peih vek tawh. Lo chhuak ru, chaw ei ang." a rawn ti deuh hmuk hmuk a.

Sangzuali chu a chhuak lehnghal daih a, Abby leh Zara te chu an in en tawp ringawt. Ner nung chung chuan Zara chuan, "I nau kan lo hruai ve kher kher hi chu awwww..." a ti vawng vawng mai. Za lo tak hian Abby chu a khi suk a, "A tel lo te chuan ka nu ten riah chhuah an phal nang, chhuanlam kha a ni ve miau va.." tiin a lo chhang zawi sap a.

***************************************

Sangzuali hi Abby nau niin Abby hian a nu leh pate'n an phal nan tiin a hruai ve a, thian ho riak khawm tur anga chhuak an ni. Mahse thianho riah khawm ni chiah lovin, a bialpa Zara te huan ah zawk kalin a bialpa nen duh ang thala nuam an chen duh vang mai mai zawk a ni. Abby hi kum 25 mi a ni a, Zara hi kum 29 mi a ni.

Chaw chu pawnah chuan an ei a, Sangzuali chu tleirawl tawng duh tih takah a ka(mouth) a kal khawp mai. A u Abby bulah chuan an class-a a thiante nena mipa pakhat an ngei zia te, an thiannu bialpa in a lo kawp avanga an hauh hrep thute chu a sawi nasa khawp mai a, Zara chu a lo nui rulh rulh zel.

"Mi kawp ching hi chu keipawh ka ngaina lo teh ania, an englo tan sak hmawk tlak mawle.." tiin Abby chuan Zara chu ava melh deuh kher a. Sangzuali lah chuan, "Awiii kei chu...thiante leh unaute tan chuan mipa mah nise ka hlau chhe te eih lo, keima tawkah hian ka huai ve emai." a han ti deuh pang pang a.

ZAra chuan Sangzuali chu a han melh vang vang a, "Heti lai hmuna thil lo thleng tawh chanchin hi chu hria la, i inlak huai vak ka ring lo." a han ti deuh kher a. Chuveleh Abby chuan rum tak hian ZAra chu a melh a, "Lalzarmawi, sawi chhuah a tul miah lo ania." a lo ti nghal khur khur mai.

Sangzuali chu a meng deuh kawk a, "Enge awmzia, ngati nge...a hrang ami?" a lo ti nghal vat a. Abby chuan vin lek lek hian, "Hrang lo, hrang lo... tihthaih che a tum mai mai nih kha, chaw kha ei mai mai rawh." a lo ti ve nghal vat bawk. Mahse Sangzuali chuan a hre chak tlat mai, "Mawh... sawi tawp rawh, ka hlau lo nasa ania." tiin a lo la inla huai kher mai.

ZAra chu a han thu tha te te a, "Anih ka'n sawi ange, helai hi maw....kum 10 ala liam lo maithei, tualthattu pakhat, Mizoram dengchhuak hat khawpa lar hi a nupui nen an awm thin a. He kan thlam ah hian an cheng dun thin a, he luia intihlim tura kal thianho te chu an lo that fai deuh vek a, an nupa chuan...pahnih chiah an tlanchhuak." tiin a chhang a.

Abby chuan vin deuh tak hian, "Zara.. i ninawm, sawi chhuah a tul lo ka tih kha.." tiin a lo khap leh a. MAhse Zara chu a phur laklawh tlat, "Lui mawngah khuan an thah te ruang emaw zat chu an la awm maithei a ni." a han tih zawm leh zat a. Sangzuali hmelah chuan hlauhna a hmu a, a nuih a za kher mai.

"Zara, i ngawi ve mai mai thei lo em ni?" Abby bawk chuan a lo ti vin leh hlur a. Sangzuali chu a ngawi vung vung a, "Tute nge an hming, chumite nupa chu?" tiin a rawn zawt ve leh khurh mai. Zara chu a khi suk a, "Vic.." a ti hman tih ah chuan Abby chuan ring tak hian, "Lalzarmawi...a tawk aw.." a ti vin ta thak mai.

Mahse Sangzuali chuan a hrethiam hman tlat, phawk hru hian ZAra chu a melh a. A chil a lem dawk a, "Victor... Victor Lalthanmawia an tih kha maw?" tiin a thaw nghal deuh dep dep mai. ZAra lah chuan nui deuh sang chung hian, "Ni e...kha pa ngei kha mawle. A dam lai khan a tlem berah mi 30-40 vel chu a that hman hrim hrim." a lo ti leh zuah zuah a.

SAngzuali chaw ei chu a tui ta lo ngei mai, "Awii...a ho lutuk, a thihna a rei tawh emai. Engmah hlau suh, Sangzual, a tihthaih mai mai che a nih hi ka tih tawh kha." Abby chuan a lo ti leh vat a. ZAra lah chuan, "A thi ngei em tih proof-na a awm lo, a nupui Angel-i pa ruang chiah kha an hmu, Victor-a ruang an hmu lo. Chu chu nikum khan hriat chhuah chauh a ni, tun thlengin a thi nge a dam pawh hriat a ni lo." a lo ti leh a.

Abby chu a thinrim kher mai, "Kha pawh kha thu chiang a ni lo, a ruang pawh an phum ve ngei kha...khatiang lam ringawt kha sawi lo teh, chaw ei i ti tui lo." a han ti vin deuh khur khur a. Zara chu a thaw hak a, "Police ten jail chhunga thi, ruang pakhat an hal a, chu chu Victor-a ruang angin an siam a nih kha, Inspector Thangluaia an ti amawni, khapa thil tih chawp vek an tih kha, Victor-a ruang tuman an hmu tak tak lo." a lo ti leh zuah zuah mai.

Sangzuali chaw ei chu a tui tawh mawlh lo, "KA kham." tiin a thleng chu kengin inchhungah chuan a lut hmak mai. Abby pawh chuan ngei hmel tak hian Zara chu a en a, "Tul lo lutuk, ka chaw ei pawh a tui tawh bik nek love." tih pah chuan a luh san ve nghal daih a. Zara chu a khi deuh suk a, "Enge naupang te te, inlak huai ve khanglang ni.." a la ti bul bul zui.

******************************************

Chutih lai chuan lui ral lehlam, hla ve deuh tak, mau hmun atang chuan mipa pathum, hmaikawr rapthlak tak tak vuah pathumte chuan enlenna hmang hian an lo thlir reng hi a lo ni a. An zinga mi, a lian deuh ber chuan phone a phawrh a. Number pakhat a hmet chhuak a, a call nghal a.

"Hello Ka pu, a hmun chu kan thleng tawh e." chupa chuan a han ti a. Phone ami, mipa aw thum tak mai chuan, "A tha e, mahse che nghal vut vut lo ula. KA sawi ang thlap khan che ang che u, darkar 2 vel hnuah chauh in che dawnnia." a rawn ti a. "Anih khawilai vel nge dap ila fuh ber ang?" tiin a zawt leh a.

"KA hre bik lo, mahse khalai hmunah ngei khan a thukru tih ka hria a ni. ZAra pawh khan engmah a hre bik lo, ani bik phei kha chu zuah reng reng suh ang che u. A thi ngei ngei tur a ni tawp, chuan manchhuah awlsam tak khan in hnuhma te kha kalsan lo ula."

"Awle ka pu, kan hria e. Chaw te kan han ei ve anga, tichuan chet tak tak dawnah kan rawn phoen leh dawn che nia."

"A tha e, min ti hlawhchham hauh suh ang che u."

Phone chu a dah a, chung hmaikawr vuah pathum te chuan Zara te awmna thlam lam chu an en leh deuh vang vang a, an pathum chuan hmanraw hran theuh an keng a, baseball bat, chemte leh hreipui an keng theuh a ni. An pathum chuan kutkawr an vuah vek bawk a, an lu tih lo chu an taksa dang lang thei tur thuam hnaw engmah an inbel lo.

******************************************

Zan dar 10 a ri tawh a, Zara leh Abby chu khumah chuan an mu dun a. Sangzuali erawh inchhung lama thutthleng seiah a mu daih thung. A hnar ring phian lehnghal a, Abby leh Zara te erawh an la meng thung a. "Engtin chiah maw helai hmun hi thlam atan in hman theih a?" tiin Abby chuan a han zawt a.

Zara chu a han ham deuh bai bai a, "Khatia Victora te nupa in helai hmun an lo luah hnu, tual thihna zawng zawng hriatchhuah a nih hnu khan helai hmun hi ka pa khan a vei ta riau va. Tichuan tihian kan siam thar a, mahse reilote hnuah a boral leh ta mai sia. Inah pawh a awm tha hman ngai lo, tah hian a riak nasa thei lutuk." tiin a lo chhang a.

Abby chu a ngawi vung vung a, "Engtin nge hlai hmun kher hi in neih theih hrim hrim a, lui bul lehnghal, phal pawh a ni reng reng a mi?" tiin a han zawt leh a. Zara chu a nui suk a, "Ka pa kha chu sum a buaipui bawk a, sum pawh a ngah alawm. Ka pa mah nise a dik lohna hi ka hre hnem ve em a, ka ngai vak lo." a han ti deuh zek a.

Abby chuan a lu ah chuan kuk fawkin, "I mawl a mi, chutiangin sawi reng reng suh. Mahni pa te thlarau zahna nei ve ta che, a malsawm lo emai." tiin a lo hau nghal hrep mai. Zara pawh chu a nui suk ringawt a, "A sum duh em avang khan kan buai phah em alawm, duham chintawk a nei lo leh lutuk a." a la ti hram a.

Chutih lai tak chuan kawngka chu a rawn ri bur mai a, an phu dun nasa kher mai. Rang takin an inha tha nghal sawk sawk a, "Tunge..enge ni?" Zara chuan a ti vak vak a. MAhse tuman an chhang lo, khum atang chuan an tho chhuak a. Chutah Sangzuali t(r)e vak ri an hria a, an ding chat mai.

Zara chuan light a on a, "Sangzual...Sangzual eng thil nge?" tiin Abby chu a hlauthawng ve hle bawk. ZAra chuan Abby chu a kai a, room atanga chhuah an tum chiah chu room kawngka chu amahin a rawn inhawng thut a, an ding leh chat mai. Sangzuali chu kawngka bulah chuan ngawi reng hian a lo ding a, Zara leh Abby chu mittui tla zawih zawih hian a en reng ringawt.

A khur deuh der der bawk a, "Sang..Sangzual, enge awmzia?" Abby chuan hlauthawng tak chung chuan a han ti tham tiak a. Chutah a rawn khuh thut a, a ka(mouth) atang chuan thisen a rawn baw chhuak ta hawk hawk mai. A thingthi dawt a, chhuatah chuan a bawk thlawp mai.

A hnungah tak chuan chemte hi a lo bur vu mai a, chutah Abby chu au vakin va tlan phei a tum a, mahse Zara chuan a lo dang vat. A chhan chu kawngka ah chuan khang hmaikawr vuah pathum, hmanraw keng te kha an lo din ve vang a ni. Abby pawh chuan a hlau kher mai, a unaunu thichhawngin let reng mahse chung hmaikawr vuahte chu a hlauh em avang chuan Zara hnungah chuan a biru a.

Hmaikawr vuah te zinga mi, a laia mi ber chuan Sangzuali hnungzanga chemte bur vu mai chu dim baksak lo hian a han phawi ri hrawk a, Zara leh Abby te lam chu an va pan ta. Zara chuan invenna tur hmanrua a nei ve der mai si lo, "Tu..tute nge in nih, enge in duh?" a ti vin vak vak ringawt mai.

Chutah pakhat chuan Abby chu rawn man a tum a, Zara chuan a lo dang ve nasa mai. A hnung atang chuan pakhat dang leh chuan a baseball bat ken lai chuan a hlap ta pawp mai a, ZAra lu chu a hai chhawk mai. Chhuatah chuan a tlu der mai a. Abby hlau chu tlanchhiat a tum a, mahse a unaunu lo tlu mek chu a pal ta a.

Chhuatah chuan a thal ve ta thuai mai a, chuveleh misual ho chuan a samah kekin an rawn tham tho nghal a. Bang kilah chuan an theh phei lawp mai. Zara chu a rawn tho ve leh tawk tawk a, misual zinga pakhat chu a rawn bawh tlu ve ta thuai mai. Mahse a hliam a nat em avang chuan a che hleithei lo.

Misual pakhat, base ball bat keng, Zara vaw tu pa ber chuan Zara chu a hnungzangah chuan a vaw leh siah siah mai a. Zara chu a chau tawk takzet, misual pakhat zawk pawh chu a rawn tho leh a, a hreipui thlauh chu a chhar a. Pakhat dang leh chuan Abby chu a dinchilh mek bawk a, Abby chuan a hlau takzet.

Sangzuali chu a rawn che deuh teih teih a, a u chu a rawn melh tawk tawk a. Thei leh thei lo hian, "U...min.. min chhan rawh." a rawn ti tawk tawk mai. Abby chuan tih theih a nei si lo, bang kilah chuan dingin, "BAwihte..." tiin mittui tla chung chuan a en ngawih ngawih ringawt mai a ni.

Hreipui keng ber chuan a hreipui chum a lek kang ta vu mai a, Sangzuali tlu mek chu dinchilh a tin ta ran mai, "Nilo..ti suh, khawngaihin..engtin mah ti suh." tiin Abby chuan a ngen lawm lawm a. Zara, a mipa awmchhun ber lah a che hleithei tawh der bik si lo, a hmai chu a thi hnuang tawh mai si.

Misualpa chuan Sangzuali tukhumah tak chuan hreipui chuan a chek tlum ta pawp mai le, Abby chu tap chung hian a au vak vak ringawt a. Sanzuali lu chu a chanvel ah a phel tep a, a thi chiang hle bawk. Chhuatah chuan thisen chu a luang kawi nuai mai a, Zara pawh chuan tih theih nei lovin a en tawp mai a ni.

Abby dinchilh tu ber, chemte keng ber pawh chuan Abby chu chemte chuan a tin a. Baseball bat keng chuan va pan ve a tum a, ZAra chuan a ke ah a lo man ve leh hram a. Thaw hrawk hrawk chung chuan, "Abby..tlan... tlanchhe rawh." a ti tawk tawk a. Mahse Abby tan tlanchhiat ngaihna a awm bik lo, chemte nena dan beh reng a ni ve tho bawk si.

Zara chuan base ball bat keng, a kea a vawn mek chu a chawnpuarah tak mai chuan a seh sak ta vak mai. Na a ti lutuk chu a au vak a, chuveleh Abby dinchilh mektu pawh chu a rawn hawi a. Abby chu a hawi kual a, a sirah chuan insect killer, spray chi a lo awm hlauh mai.

A ban nghal vat a, misualpa rawn hawi let leh chiah chu a mitah chuan a lo spray ta chiam mai a. Misualpa na ti lutuk chu a mit a nuai nghal vak vak a, engmah a hmu tha thei der lo mai. Abby chu a tlan thut a, pawnah chuan a tlanchhuak ta daih mai. BAseball bat keng mek chuan thinrim tak hian, "Zawnga mai mai chuh, min seh ve amaw?" tiin Zara chu a hlap leh ta chiam mai a.

ZAra chuan mu leh mal a hre tawh lo, a hmai chu thisenin a bual huh vek tawh. Chutah chupa chuan ala duh tawk lo, Zara hmai chu a vaw siah siah mai a, thisen a per chhawk chhawk mai. VAwi 10 vel lai a vuak hnu chuan Zara hnar ruh chu a tliak mai nilo, a sawi hian a sawi bawi tawh mai a, a biang vun pawh a thler duai mai.

A ha a vaw bal nual bawk a, a bek chu hmun engemaw zah velah a pawp bawk. Chemte keng pa chuan a mit chu a nuai nawk nawk a, a rawn meng thei ve deuh ta. A thinrim takzet, chemte chu hum nghet sauh sauhvin Zara chu a rawn pan ve ta a. A thutchilh ang ren rawn a, "I inla hero vel amaw, i bialnu saw kan man anga, kan that ang. Kan thah hma in kan pathum hian kan pawngsual bawk ang, khawnge ka han that law law teh ang che." tih pah chuan a awmah chuan a vit siah siah mai.

Vawi 10 vel a vih hnu chuan Zara awm zawn chu a thler duai mai a, a thi chiang ngang mai. Room chhung chu thisen hian a kawi nuai mai a, bangah te pawh a per nasa khawp mai. Misual pathum te chu an ding khawm a, a pawimawh ber kan zawn hma in khanu kha kan hmu phawt tur a ni." an boss ber chuan a han ti a, in atang chuan an chhuak ta a.

*****************************************

Chutih lai chuan Abby pawh a lo tlanchhe mek a, mahse a tlanchhe thui thei bik lo. Motor an dahna chu a thleng a, motor chhunga luh chu a tum a. Motor pawh chu thlam atanga hla lo te a awm mai a ni a, thlam pawh chu ala hmuh phak vek a ni. Motor chahbi ber chu inchhungah a awm daih tih a hrechhuak a, va let leh chi zia zang a ni tawh der mai si lo.

A mangang takzet, chutah thlam atang chuan misual pathumte chu an rawn chhuak a. Rang lutukin Abby chu motor hnungah chuan a biru nghal a. A tah ala chhuak bawk si, thawm a nei ngam si lo. Hrehawm a ti takzet, chutah misual pathumte chu an hmanrua theuh kengin motor lam chu an rawn pan leh ta nghal a.

Abby chuan awmnghaihna a hre lo, an awmna lai a zawl si a, tlanchhe mahse, zan thim mah nise thla a en em em mai bakah, thlam pawna light an dah zawng zawng nen, an awmna hmun a zau nen, an hmu hman vek dawn tho si. Misualte lah chu an rawn kal chak em em mai a, an rawn thleng dawn hnai ta der mai.

Abby chu a thaw halh halh a, a thawm an hriat a hlau si. A che ngam tawh lo a ni ber, a hmui a hup tawp a. Misualte chu an lo hnai zel a, a tihngaihna hre lo chu motor hnuaiah chuan a vak lut ta tawp mai a. Misual pathumte chu an rawn thleng ta, motor chhung chu an bih a.

An zawng kual a, Abby chu hmui hupin thawk pawh thaw tha ngam lo chuan mittui tla zawih zawihin motor hnuaiah chuan a tawm reng a. Misual pathumte chu an ke chauh a hmu thei a, an kal bo hun a nghak tawp mai a ni. An phun ri sur sur a, mahse enge an sawi tak erawh Abby chuan a hrechiang thei lo.

***************************************************

Minute 5 vel lai an vei kual hnuah chuan an reh ta diak a, an kal bo ta daih mai. MAhse Abby chu ala chhuak ngam mai lo, ala awm vang vang phawt a. Minute 2 vel hnuah chuan hlau tak chung chuan motor hnuai atang chuan a vak chhuak a, a han ding a.

A hawi kual a, tumah chu a hmu tawh lo. In lam ava hawi a, kawngka chu a lo la inhawng huau a, inhnit hlawp hlawp chung chuan ava pan phei ta a. A thleng tep tih ah chuan inchhung ah chuan thawm a hre leh ta tlat mai, rang takin in sir lamah a phei a, a biru leh nghal.

Inchhung atang chuan misual pahnihte chu an rawn chhuak a, hmaikawr pawh an la vuah reng a, hmanrua pawh an la hum ve ve. Abby chuan a han bih dek dek a, pakhat zawk chuan baseball bat a keng a, pakhat zawk chuan hreipui a keng bawk. Mahse pakhat, chemte keng zawk chu a awm ve tlat lo.

An kim loh avang chuan Abby chu biru mek mahse a ngaih a tha chuang hauh lo, chutah a hnunglamah chuan thawm a hre thut a. Rang takin a hawi phei vat a, a hlauh ang ngei ngeiin chemte keng ber chu a lo ding run mai. Abby chu chet pawh a chet hma chuan misualpa chuan a dulah a vit ta thut mai a, Abby chu a au eih lo.

Chutah dim lo tak chuan misualpa chuan chemte chu a phawi mai pawh nilo, a sir zawng chuan a han hlawi phei deuh kher a. Abby dul sir pawh chu chemte hriam tak chuan a tai thler phei duai mai. Thisen a rawn baw chhuak hawk hawk a, a ril te chu a rawn chhuak hial bawk.

Misual pahnih dangte pawh chu an rawn phei a, Abby thi tur chalchang chu an thlir thap mai. Second 15 vel hnuah chuan Abby pawh chu a thaw muang tial tial a, a thi ve ta. An boss ber chuan phone a phawrh a, "Ka pu, kan zo ta e, an thi vek tawh e." a ti a. Phone ami chuan, "A tha e, pawisa chu zawng ula... in hmuh hunah min rawn phone leh ang che u." tiin a rawn chhang a.

***********************************************

Chung misual pathumte chuan thlam chhung chu an han chinglet tak tak a, ruang te pawh chu pawnah an dah vek a. Khum hnuai te, choka lam te, hmuntin mai chu an lipse a, mahse khawia pawisa mah an hmu der mai si lo. An pu chu an han phone leh thin a, an hmuh ngang loh thu an sawi a.

An pu lah chuan, "A awm ang, khalai hmunah ngei khan a awm tih pawh amah ngei khan min hrilh a ni. KA ruksak a hlauh avanga khata dahtha kha a ni tih pawh ka hria, zawng uluk rawh u, pawnlamah te pawh khan hmun mak deuhvah a dah te pawh a ni thei tho ania, inhmuh hma chu min rawn call buai tawh suh u." a lo ti hmak mai si.

Misual pathumte chuan an han zawng leh ta tak tak a, bang te chu an vaw thiat thul, an thawm ana khawp mai. Darkar 2 dawn an zawn hnuah chuan an hah tawh kher mai, an boss ber chuan thut chawlh pah chuan a hreipui hmang chuan chhuat chu a han chhu deuh det det a.

Chutah a chhu pawp ta, a kua atanga thil lo lang chu pawisa note a ang a ti riau mai. A ding hluai a, "Ehe..lo kal teh u." tih pah chuan hreipui chuan chhuat chu a chek vak vak a, a chek awng ta huau mai. Chutah chhuat awng atang chuan pawisa lehkha tam tak, khat hnur mai chu an hmu ta a.

An in en hehu hlawm mai, chutah chhuat chu an tichhe zau deuh va. PAwisa chu an la chhuak ta, a tam tham takzet. airbag ruak pahnih an ken ah chuan an dah a, a khat vek thei, a leng lo lek lek zawk. An pu chu an phone leh nghal a, "In thawk tha e, ka chhuang takzet che u. Tikhan lo haw ula, inhmuhna hmun tur kan sawi ah khan kan inhmu anga, pawisa kha rawn keng ang che u." a rawn ti a.

"Awle ka pu, ruang hi engtin nge kan tih dawn?"

"KA sawi tawh kha, tikhan tualthahna thleng angah a lang mai ang, tichuan nangni pawh in fingerprint awm miah lo tur khan che ula, in hnuhma kha in kalsan hma in enfiah leh vek ang che u."

"KAn hrethiam e, ka pu."

"Anih pawisa kha in chhiar em, ka sawi ang zat thlap kha a ni em?"

"AW kan chhiar e, nuai 20 chiah chiah a ni e."

"Um..in tlanbo pui a nih vaih chuan in chak lo khawp ang tih hria ula, in hlawh ang zat tur chu ka pe ngei ang che u, i tlanchhia a nih chuan thil thleng tur in hriat kha."

"Ni love, ka pu. Kan rawn thlen em em ang, a kim thlapin."

Phone chu an dah a, an inmelh kual relh relh hlawm a. An boss ber chu a ding hluai a, "Lungngai suh u, kan tha..engkim, a tha vek dawn. A tih ang hian, a sawi ang hian che phawt ila, tichuan phuba chu nakinah, kan la la ve khawp ang." a han ti chang fak fak a, tichuan an thil tih a ni tih hriat loh theih ang ber chuan hnuhma chu an han ennawn leh vel a, tichuan in atang chuan an chhuak ta a.

************************************

Pawn an chhuak chiah chu mak tiin an pathum chuan an ding rual thap mai, "Ehe..enge awmzia?" pakhat chuan a ti hu mai a. ZAra, SAngzuali leh Abby te ruang chu hmuh tur a lo awm tawh hauh lo. A lo bo daih a nih chu, "Khawnge an awm, a ni thei lo, thil theih a ni lo." tiin an boss ber phun sap mai.

In leh a vel te chu an zawng kual chiam a, mahse an mi thah takte ruang kha hmuh tur an awm tawh lo, a bo hmak mai a nih chu. Pakhat chuan, "Engtin nge kan tih ang, an la dam tihna em ni, ava mak ve?" tiin a mangan hmel em em a. A thianpa chuan a lu a lo thing a, "Aih, an vai khan.. an pathum khan kan that chiang lutuk, khawiah hian an dam tawh lovang. Lo la thi lo pawh nise khawiah mah an vak sawn thei lovang, an pathum lehnghalin...thil theih a ni lo." tiin a lo chhang a.

An mangang ve ta kher mai, "Enge awmzia ni ta ang, ramsa in an la tihna nge?" tiin pakhat leh zawk chuan a lu a dawm vawng vawng mai a. An boss ber chuan vin deuh tak hian, "Nilo..mihring ei duh khawp ramsa chu a lian dawn, keini pawn a thawm kan hria ang, a awmzia chu midang, mihring dang an awm ve a ni." a ti ta mai a.

An hawi kual leh vak vak a, mahse an pathum tih loh chu mihring dang hmuh tur reng an awm der mai si lo, "Engpawh chu nise, min beih a tum a nih chuan a ti fuh lo khawp ang. Tunah chuan pawisa hi a pawimawh zawk, kan tum ram chu i pan phawt ang u, mi zuirutu ana wm a nih chuan kan that ve nghal ang." an boss ber bawk chuan a han ti leh a.

Tichuan hlauthawng rilru tak chung si chuan an kal ta a, ramhnuai lam pan chuan an kal zel a, thui deuh fe an thlen hnu chuan khua pawh a var dawn tan ta, ni chhuah nan hun rei a ngai tawh lo. Km 2 lai ke a an kal hnu chuan an motor dahna chu an thleng ve ta, an thawmhnaw chu an hlip sap sap hlawm a.

Hla deuh taka motor an dahna chhan chu Zara te khan motor ri thawm an hriat an hlauh vang a ni, tichuan an insilfai a, an hmanrua te pawh chu an silfai vek a, tichuan motor chhungah dahin tan hmaikawr te chu an phelh a. Kum 35-40 bawr vel an nih hmel a, an hmel pawh chutia pawi khawih duh mai hmel pawh an pu hran lo.

An thawmhnaw zawng zawng chu dahkhawmin an hal a, an hmaikawr te pawh chu an hal tel vek a. Khua ala thum deuh avangin meilum bulah chuan an han thu chawl rih a, an hmel atang chuan an thla a muang bik vak lo hle tih pawh a hriat. An zinga pakhat chuan, "Pu ber hi kan hrilh mai dawn mi, ruang lo bo vek kha?" a han ti a.

Chutah vin zet hian an boss ber chuan. "A tullo, a ngai lo a ni tawp mai." a lo ti deuh hlur mai. "Mahse nakinah keimahni zawkin buaina kan neih belh leh thei ania, tunge min zuirutu hi kan hre der mai si lo." a thianpa chuan a lo ti leh a. Boss ber chu a ding deuh hluai a, "Kan hrilh chuan keimahnin hna kan insiam leh mai mai, buaina a thleng zawk thei tlat. Chuvang chuan tikhan tawk rawh se, keichu ka ning zozai tawh." a ti vin leh deuh hlur mai.

************************************

An ngawi thap a, chutah an awmna atanga hla vak lovang chuan mipa khat ding run mai chu an boss ber chuan ava hmu ta a, a phu zawk mai. A melh vang vang a, "Saw... sawpa saw tunge?" tiin a kawk a. A thiante pahnih pawh chuan an hmu ve a, an ding ve nghal.

Chupa chu a lian angreng hle a, ft 6 chu a pel dawn chiang sa hrim hrim. Kawr ban tlawn t(r)et hnuang hi a ha a, a hmai chu buara chhia niawm tak hian a tuam tlat a, a mit pahnih zawn a kua a, a mitmeng te chu a sen rum mai. "Tunge i nih, nangkha?" tiin misualte chuan an han vin vak vak ringawt a.

Mahse chupa chuan a chhang eih lo, a melh run reng ringawt mai. Boss ber chuan, "Motor a kan hmanrua te kha va la chhuak rawh u." a ti a, a thiante chuan an va la nghal a. Tichuan an hmanrua theuh, hreipui, chemte leh baseball bat te chu an keng leh ta thap mai.

Boss ber chu ava kal hnai a, a hnungah chuan muangchang hian a thiante pahnih chuan an rawn zui phei ve bawk. Chupa hma zawn takah chuan inla pa tak hian boss ber chu ava ding a, "Tunge i nih a, enge i duh?" a han ti chang deuh fak a. MAhse chu paliana chuan a chhang eih lo, a thlek deuh vang vang a.

Boss bawk chuan, "Tunge kan nih i hre lo a ni, kal bo rawh. A nih loh chuan kan that hreh miah lo che ania, kan bulah hi chuan rawn inla pa vak duh suh." a han ti leh khur khur a. Paliana chuan a hlauh loh hmel kher mai, chuta baseball bat keng ber chu a rawn pawr deuh thut nge ni, an boss chu rawn pawtin, "Khawi keiman zirtirna kan pe hlak ange." tiin hnai takah chuan a va din chilh a.

Rum taka enin, "Mi thah hi kan hreh reng reng lo, khawnge ka han vaw ve deuh hlak teh ang che." tih pah chuan a baseball bat chu a lek kang a, a vai pawp mai. Mahse Paliana chuan awlsam em em mai hian bat chu a kut dinglam chuan a lo man chat mai a, misualte pawh chu an meng phawk nasa ngei mai.

PAliana chuan bat chu a laksak a, a lai atakah a la ulhtliak zui. Baseball bat chu thing thami, maple hardwood atang ngata siam ni chung si chuan Paliana chuan a kut pahnih chauh chuan a ulh tliak thei chu misual pathumte chuan mak an ti kher mai. A bul lehlam, zum therfur hmang chuan Paliana chuan a hmazawna mi mitah tak chuan inches 5 vel lai maia thukin a vir tlum pawk mai.

Misualpa mitmu chu a kek puak pup hi a ang ber, thisen a chik zawr zawr a. A au vak a, a pai tuang tuang a, a let tawp mai. A khur der der a, second 5 vel hnuah chuan a reh hmak a, a thi chu a ni der mai. Misual dang pahnihte chuan chet mai nachang pawh an hre lo, an ding ngawi reng ringawt.

Hreipui keng zawk chuan a rawn bei ve leh a, mahse a chek thelh hlauh. Paliana chuan a lo bum a, tichuan a rek thut a. A rek na bawk aniang, hreipui chu a thlauh nghal a. A la rek kang zui, chupa hmai chu a dang var nghal pup pup thei. Chuveleh boss ber chuan a chemte ken lai chuan Paliana nakah chuan a rawn vit a, a phu uih ringawt.

A thianpa la rek kang reng chung chuan PAliana chuan a han melh hrawk a, boss chuan chemte chu phawi a tum a. Mahse Paliana chuan a lo phal miah lo, a kutah chuan a lo man tlat mai. A reh mek chu a thlah a, leiah chuan a tla ri dup a. A khu vak vak a, a uak deuh thawt thawt bawk.

Paliana chuan boss ber chu thingkung pakhatah chuan a nam bet a, a naka chemte chu a phawi a. Boss ber chu thingkungah chuan a tukhum chu a vuak tir vak vak mai a, thisen a per chhawk chhawk mai. A lu chu a hai takzet, nikhawhrelovin a awm hial a. Chutah Paliana chuan ala duhtawk lo, chemte chuan a dulah a vih chhunzawm siah siah bawk a, a thi chiang ngang mai.

Leia tlu mek, misual dam awmchhun chuan khur zawih zawih hian a lo en reng ringawt a. An boss ber a thi chiah chu Paliana chuan a rawn melh ve ta kur mai le, a hlau lutuk chu a bula hreipui chu ban a tum a. MAhse Paliana chu a che rang zawk tlat, hreipui chu a rawn rap bet chat mai.

Misualpa chuan lak a han tum a, mahse Paliana chuan a rap bet nghet lutuk tlat. Chutah a hmaiah chuan a la tlawh pawp zui a, a lum phei tual tual mai. Paliana chuan hreipui chu a chhar a, misualpa tlu mek chu a dulah tak chuan a chek siah mai a. A thih hma mai nilo, a thih hnuah pawh chuan a chek siah siah mai.

Vawi 30 dawn chu chawl miah lovin, zak kau meuhvin na tak tak chuan a chek siah siah a, a duhtawk meuh chuan misualpa chu a taksa, a kawnga chin hnuailam zawng chu a bung tep mai. A ril leh a kawchhung vel chu a chhuak pur hlawm a, a rapthlak takzet.

A thaw hlawi hlawi a, a chau ve det aniang chu. Chutah an boss ber phone chu a rawn ri a, Paliana chuan ava la a. An pu ber a lo ni, "Enge in chanchin, khawilai nge in thlen tawh?" a rawn ti a. MAhse Paliana chu a ngawi reng a, a chhang miah lo. Pu ber chuan, "Tinge min chhan loh, enge in awmzia hi...min rawn phone pawh in tum si lo?" a rawn ti leh khur khur a. 

MAhse Paliana chu ala ngawi reng, "ZAwng ho, min bum in tum em ni a, khawnge in awm, ka thil tih tum hi ka tih vaih chuan aw...in chak dawn lo, ka ngam lo amaw in ti ange.." tiin a rawn thinrim tawh kher mai. Chutah Paliana chuan a hmaikawr, buara atanga siam chu a phelh ve ta, a hmai dinglam zawk chu a kang tih hriat tak hian a ser khat tlat mai a.

ZAwi sap si, chiang em em si hian, "I naute an awm tawh lo, ka that vek tawh." a ti thum dut dut mai. Pu ber ngaih chu a tha lo kher mai, "Tunge, tunge i nih?" a rawn ti vin leh vak vak a. Chutah Paliana chuan chiang fek fawk, ring lenglawng hian, "KA HMING CHU VICTOR-A A NI, VICTOR LALTHANMAWIA." tiin a chhang a, phoen chu a vawm darh chhuai mai a, tichuan ramhnuai thim lam pan chuan a kal bo ta daih a.

****************************************************

TO BE CONTINUE