SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 6 (LAST)

SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 6

(LAST)

*****************

Alice-i chu a rawn harh chhuak hlawl mai, glass vek a siam bawm chhungah hian a lo awm a, a lo lang tlang thei vek bawk. Ruak deuh thaw hian a lo awm a, tawnzau leh kekawr bul chiah a lo ha a. A awmna room hrim hrim chu a eng hian a eng ut mai a, khawl ni awm tak tam tak a lo awm teuh bawk.

A kut chu hnung lamah hand cuff-a thlun beh a ni a, a hmui chu tuam a ni bawk. Rang takin a ding a, chutah kawka chu a rawn ri rak a. Dustin-a chu a rawn lut a, a la rawn nui vur vur zui. Alice-i chuan rum zet hian a lo melh a, "Mihring pakhat ve maiin vantirhkoh ka han bum che chu ania.." tiin Dustin-a chu a la rawn intihtheih hmel kher mai.

Chutah Alice-i chuan awlsam tak hian handcuff chu a han ti chhum hmawk a, a hmui tuamna pawh chu a phelh nghal. Thinrim tak hian, "Dustin, min chhuah vat rawh. Nat i duh loh chuan, helai hmun hi ka ti chhe vek thei tih i hria em?" tiin Alice-i chuan  a vau nghal a. MAhse Dustin-a chuan a hlauh loh hmel kher mai, a lo nuih suk ringawt.

Alice-i chu a thinrim ta, a awmna glass chu a thiltihtheihna hmang chuan tih chhiat a han tum a. Mahse engtin mah a awm hauh lo mai, mak tiin Dustin-a chu a en tlawk tlawk ringawt a. Dustin-a lah chuan hmuhsit hmel tak hian a lo nuih a, a kut hmang chuan hnek keh a han tum leh a. Mahse a thei tlat lo, glass chu a them pawhin a keh lo.

Alice-i mak ti lutuk chu sawi mai tur pawh a hre lo, "Enge awmzia? Thil theih a ni lo, enge ka chungah i tih hi?" tiin a vin hrep mai. Dustin-a chuan a va pan phei a, "Helai hmun hi ka ta a ni a, experiment ka tihna a ni. Ka secret room a ni a, a vai hian ka siam vek a ni. Mahse hemi glass erawh ka siam a ni lo, vantirhkoh meuh pawh ina a tihchhiat theih loh chu engvangin nge kei mihring hian ka siam thiam teh lul ang?" tiin a lo zawt let daih mai.

Chutah kawngka a rawn ri leh rawk a, Jenet-i chu a rawn lut ta. Alice-i chu a meng bial kawk kawk mai, "Keimah...keima siam a ni. Lailah, nang ai hian ka chak zawk. Chuan ka thil duh chu ka nei ngei ngei thin, min hriat chian kha..ka luhlul zia te chu i hriat kha.." a rawn ti lut ham ham mai.

Alice-i chuan chhan mai ngaihna a hre lo, a ngawi reng ringawt. Tawng tum chuan a han ang zeuh va, "Aw aw..Onoskelis..keimah Onoskelis..i unaunu.." tiin Jenet-i chuan a rawn tawng khalh leh zung zung mai. Alice-i chuan a melhrum takzet, "Ka unaunu i ni lo, kan Lalpa i phatsan hnu khan nang nen hian unau kan ni tawh lo." a lo ti khur khur mai.

ZA lo tak hian Jenet-i chu a khi suk a, "Animaw...anih chuan ka unaunu i nih tawh loh te chuan...that che mah ila a pawi dawn loh chu, tiraw?" tiin a han deuhsawh leh vel a. Alice-i mittui chu a tla a, "Nang hian Pu Vana i phatsan a ni, Onos...thil dik a ni lo tih pawh i hria, kan vaiin kan rilru i ti na.." tiin a vin hrep mai.

Chutah a aia vin hian Jenet-i chuan, "Ni e, a dik a lawm. Ka phatsan, a chhan pawh ka phutawk chawimawina ka hmuh loh vang a ni. Engvang tehlulin nge ka phatsan lohvang, vantirhkoh ho kha inang khat vekin min en thin thu a sawi a, mahse tinge..tinge duhsak bik a neih?" a lo ti let ve hrep mai a.

Chutih lai chuan Dustin-a chu a lo khuh kharh kharh a, "Ehermm....family problem, ka lo va chhuak ange." tiin a han khi suk a, chhuah a tum a. Kawngka lam ava pan lai chuan Jenet-i chuan, "Dustin, lo ding teh." a rawn ti a, a ding ve mai bawk. "Kha mihring kha...ka sawi hma chu engtin mah lo tina tawh suh ang che." a han ti a, Dustin-a chuan a lu a bu nghat a, a chhuak ta a.

Chuveleh Alice-i chu a hlauthawng hle mai, "Enga...khaa.kha mihring, enge awmzia?" a lo ti nghal chiam mai a. Jenet-i chuan rum zet a melh chung hian, "Aw ni e, Bena..Benjamin Lalfakzuala...kan kutah a awm, kan man tawh." a ti ta mai a, Alice-i chu a meng phawk nasa kher mai.

*************************

Bena chu thi hnuang hian a thutna ngaiah chuan ala thu reng a, a lo muthlu tep hman tihah chuan kawngka rawn ri rak chuan a ti harh chiang ngei mai. A thu ngil zawt a, Dustin-a chu a rawn lut a. A la rawn faifuk hlarh hlarh zui a, "Khai a..i va thi nasa ve, kha ramhuai khan a sawisa che mi?" tiin ala zawt zui.

BEna chuan rum fe hian a lo melh a, "Tute nge in nih? Eng ang ramhuai nge in nih? Chuan nichina mi ramhuai lian zet kha tunge?" tiin a lo vin khur khur mai. Dustin-a chu a ner sak a, "Hahdam rawh hahdam rawh, BEna...lungngai suh. Kha chu ramhuai a nia, keichu nangmah ang tho..mihring pangngai." a han ti vel luam a.

"Tunge i nih? Engvangin nge min man? Chuan..tumah ka that lo. In hre sual a ni, tumah ka that lo."

"Nia...ka dawt phuahchawp mai mai a nih kha."

"Enga? Engvangin nge dawt a min puh? I pawi sawi ka nei em ni?"

"Nei lul love, a tul vang mai mai mawle...i la hre chawp ve mai ang."

"Police i ni tak tak lo tihna maw?"

"Haha..ni nang...jail tang tlanchhuak ka nih hi..mahse ka bula mi Adama kha chu police detective tak tak ania."

"Chuan dawt i hrilh tihna em ni?"

"Ni e, dawt ka hrilh alawm."

Bena chu a ngawi vang vang a, "Ala man chhuak em em ang che, kha detective khan...lo ngai reng rawh..dikna chuan hnehna a chang dawn tho tho." a la ti ve fan mai. Chutah Dustin-a chu za em em hian a nui vak vak a, "Khaih..mai mai a, kha detective luliana kha nga tan mah kan ti tawh lova....hei en rawh." tih pah chuan a phone a phawrh chhuak a.

Thlalak pakhat chu hmet chhuakin Bena chu a han hmuh a, Bena'n thlalak a han hmu chiah chu a phu nasa kher mai, lehlam a hawi nghal. Chu thlalak chu Detective Adama ruang, ramhnuaia let reng lai a ni a, a taksa pawh a kang nasa hle. Mittui tla phung chuan BEna chuan, "I that amaw? Kei min man duh vangin dawt i hrilh a, chuan i that leh amaw?" tiin a zawt khur dar dar a.

Dustin-a nui lai chu thinrimna in a rawn inthlak nghal a, "Aw ni e, keima thah ngei a ni. Jenet-i..nichina nula ramhuai rawn lut kha, ani nena kan thil plan vek a ni. Mi na tuar lai hi hmuh nuam ka ti a, ka ti reng bawk ang. He khawvelah hian mi rin ngam tumah ka nei lo, mihring chu sawi loh, Pathian thleng pawh hian tumah ka ring lo." a ti ta vak vak mai.

Bena chuan chhan ngaihna reng a hre lo, a ngawi reng ringawt. Dustin-a bawk chuan, "Kan mamawh che a, kan man che a. MAhse tunah chuan nang pawh hian tangkaina i nei vak tawh lo, a chhan chu i Sichangneii kan hmu tawh, kan man tawh a ni." a ti leh ta mai a. Bena chu a hlauthawng hle mai, "Enga? A...Alice..Alice-i in man maw?" a ti nghal chel chul mai.

"Aw man chiang e, engtin mah lo ti suh atia Jenet-i'n..chuvang chuan ka awm mai mai rih a nih hi. Diktak chuan thah che ka chak tawh, chemte a i hrawk zai thler ka chak, i na tuar lai hmuh ka chak tawh." tiin a nui leh ta huah huah mai. Bena chu a mangang takzet, "Nilo..chhuah rawh u, Alice-i chu chhuah ula, i duhtawkin min sawisa dawnnia, min that dawnnia." tiin a ngen ta tawp mai.

Dustin-a chu a han chek tlawk tlawk a, "Ni lul love, Bena...mihring i nih kha, Alice-i chu vantirhkoh, van chung nula, Sichangneii alawm a nih. Engatan nge i tih a? I hmangaih amaw?" tiin ngeiawm tak chuan a han zawt vel a. Bena chuan huaisen tak hian, "Aw..ka hmangaih, ka hmangaih a ni. A chungah engmah a thlen ka phal lovang, ka neihchhun a ni." a ti siah siah mai.

"Bena, Alice-i hi i neihchhun a ni lo. Fapa i nei tih pawh ka hria, chuan tunah hian an school ban a hun tep tawh bawk. Ka va lamsak dawn che em ni, i duh em?" Dustin-a chuan a ti leh ta mai a, Bena chu a hlauthawng zual kher mai. "Nilo ka pu, nilo...ka fapa kha chu engtin mah ti suh u." tiin a ngen leh lawm lawm mai.

***********************

"Chhuah rawh....i duh phawt chuan min sawisa la, kawrkilh pawh chu nei rawh. Keimah vanga mihring pawisawi miah lovin a tawrh ve ka phal lo, Kelis, khawngaihin...khawngaih takin." tiin Alice-i chuan a ngen lawm lawm mai. "Aww...ka nau duat Lailah, mihring i hmangaih amaw? Pu Vana ngaihdan a ni dawn lo kher mai, i hria a ni lawm ni?" tiin Jenet-i chuan a lo zawt let daih mai.

"Kawrkilh pawh chu nei rawh, khawngaihin Bena kha chhuah la...engkim nei vek rawh."

"Lailah, kawrkilh chu kan zawng dun mek a nih hi...a neih hma hauhvin engtin nge ka ta a nih theih ang?"

"Min chhuah la, ka zawnpui ang che..ka zawnpui em em ang che."

"I chiang amaw? Ka ring ngam hlawl lo che, chuan..engtin nge min zawnpui i tum a?"

Alice-i chu a ngawi vang vang a, "Ka hria...ka hre tawh, khawnge a awm ka hre tawh." a ti ta tawp mai. Jenet-i chuan a han en vang vang a, "Lailah, vantirhkoh thianghlim i ni tih hria la, dawt i sawi thiang lo a nia. Pu Vana duh dan pawh a ni lo, lee...thudik tak i sawi em?" tiin a han zawt nawn leh a.

"Aw...ka hria...mahse min chhuah la, Bena chhuah bawk la..chuan ka sawi ang. Ka hruai ang che, a hmunah ka hruai ang che." a han ti leh a. Jenet-i chuan a awih loh hmel kher mai, Dustin-a rawn phawt a tha in a hria a, tichuan Alice-i chu a chhuahsan leh ta phawt a. Alice-i chu a thinrim kher mai, "Nilo..Bena..Bena, ava pawi tak." a ti vawng vawng ringawt mai a ni.

*********************

Dustin-a chu pawnah a lo awm a, Jenet-i chuan ava pan a. Dustin-a'n a lo hmuh veleh chuan, "Enge kan Sichangneii chu kan tih dawn?" tiin a lo zawt nghal a. Jenet-i chu a han thaw deuh hak a, "Ka hre lo, a sawi dan chuan kawrkilh awmna a hria a ni awm a...Bena nen min chhuah ula, a awmna ah ka hruai ang che u a ti." tiin a lo chhang a.

Dustin-a chu a khi suk mai, "Chu chu i awih em ni?" a lo ti hmuk a. "Lailah-i hi van chung nula thianghlim a ni a, dawt a sawi ngai lovang." tiin Jenet-i chuan a lo chhang leh a. Dustin-a chuan a lu a thing a, "Tunah chuan vanah a awm lo, khawvel ah...sual tinreng awmna khawvelah mihring angin a rawn awm a, mihring nihna a nei tawh bawk." ta lo ti daih mai.

"I sawi awmzia chu...Lailah-i hian dawt a sawi ve thei tihna maw?"

"Aw thei e, nang hneh theih nan chuan eng dawt pawh a sawi ang...a chhan chu Paradise ah a awm lo, khawvelah a awm a, mihring nihna a nei tawh bawk."

"Anih kei hi....enge ka nih ve?"

"Nangpawh Onoskelis i ni a, mahse mihring nihna i nei, a chhan chu khawvelah i awm tlat tawh a ni."

"Anih chuan engtin nge kan tih dawn?"

Dustin-a chu a ngawi vang vang a, "Lut phawt ang." a ti a, experiment room ah chuan an inzui lut leh ta a. Alice-i pawh a lo la awm reng, Dustin-a chuan ava pan nghal a. Glass box hma takah chuan va dingin, "Kawrkilh awmna chu i hre takzet maw?" tiin a han zawt ve leh a. Rang zet hian Alice-i chuan, "Aw ka hria, min chhuah ula, ka hrilh ang che u." a lo ti nghal chiam chiam mai.

Dustin-a chu a han thawk deuh hak a, "Enteh Lal Sichang, Pu Vana fanu i ni a, dawt i sawi thiang lo a nia. Chuan kan chhuah veleh che i thiltihtheihna hmanga min beih thut hi kan hlau ve thova, phakar i chhuah vaih chuan i chak dawn lo nasa ania." a han ti leh a. Alice-i chuan a lu thingin, "Aih, ka tiam a che u. Bena nena min chhuah a nih phawt chuan engtin mah chet lak ka tum lovang, kawrkilh chu in ta a ni nghal mai." tiin a lo chhang leh a.

Dustin-a chuan a lu a han bu deuh nghat nghat a, "Umm..mahse fimkhur nan thil pakhat kan tih phawt angai." a ti ta tlat mai. Alice-i pawh chuan a hrethiam lo kher mai, "Eng thil maw?" a lo ti hu mai a. Dustin-a chuan Jenet-i chu a han en a, "I sawi kha ka la hria a, kha...Lailah-i khawvela a rawn chhuk lama anchhia i lawh kha.." a han ti nuah nuah a.

JEnet-i pawh chu a lo khi sak a, "Aw hria e..chu chu ngati nge?" tiin a lo zawt let a. Dustin-a chuan a aw a han thian te te a, "Englo..ihh, vantirhkoh a nihna anga a thiltihtheihna zawng zawng hi lak sak ila, mihring pangngai angah kan siam thei angem?" tiin a zawt ta mai a. Alice-i chu  a mangang kher mai, mahse engmah a sawi duh chuang lo.

Jenet-i chu a inngaihtuah vung vung a, "Theih chu thei e, mahse a vaiin ka laksak thei lo. Ka sawi awmzia chu...kawrkilh chu  a tel ngei ngei angai. Kawrkilh hmang chuan a thiltihtheihna zawng zawng laksakin Lailah-i nilovin, Alice-i pangngai, mihring pangngai ah ka siam thei. Mahse kawrkilh tel lo chuan, hun reilote bak ka thei lo." tiin a chhang a.

Dustin-a chu a han ngawi leh vang vang a, "Engtianga rei nge ni ang?" tiin a han zawt a. "Darkar 1 vel bak a ni lovang." tiin Jenet-i chuan a lo chhang leh a. "Kawrkilh kan neih hunah a bak zawng laksak ang che." Dustin-a chuan a han ti leh a. An pahnih chuan Alice-i chu an han en a, "I pawm em?" tiin Jenet-i chuan a han zawt ve leh a.

Alice-i chuan mittui tla teuh chung hian, "BEna nen min chhuah dun angem?" tiin a han zawt let ve leh phawt a. "Phakar i chhuah lova, kan thu ang zela i awm a, kawrkilh awmna hmun min hrilh tak tak dawn chuan...kan chhuah ang che u." tiin JEnet-i chuan a chhang a. Alice-i chu a thaw hak a, "AWle, ka pawm e." a ti ta a.

Chu veleh Jenet-i chu awlsam tak hian glass chhungah chuan a lut a, a kaltlang pawp mai. Thlarau ang mai hian awlsam takin glass bawm chhungah chuan a kal tlang tawp, Dustin-a meuh pawh a ka hau mai. Tichuan Alice-i lu chu a dawm a, a biang leh lam ve ve ah chuan a kut pahnih chuan a vuan a.

Chutah le, Jenet-i mit chu a rawn sen vet vet a. Chutih rual chuan Alice-i mit erawh a var pup mai, Jenet-i chuan thu mak tak tak chu a chham mawlh mawlh bawk a. Alice-i hmel chu a rawn danglam a, Lailah-i hmel diktak a rawn lang daih mai. Jenet-i erawh a lan dan a danglam ve lo, Lailah-i hmel chu zawi zawiin Alice-i hmelah a rawn inthlak riai riai a, a tawpah chuan Alice-i a rawn ni leh ta.

Jenet-i chuan a thlah a, Alice-i chu a thingthi hnawk mai. Jenet-i chuan a ban a han phar a, chuveleh glass bawm chu chawp leh chilh hian a rawn bo nghal vek mai. Alice-i chu a samah a tham tho nghal a, "Lo kal rawh le." tiin dimna tel miah lo chuan  ahnuk phei nghal bawrh bawrh mai.

*************************

Tluangtea pawh chu apa nghakin an school kawtah chuan a la thu reng a, naupang dangte erawh an haw zo titih tawh. A pa chu a rawn thleng thei der mai si lo nen, a mangang rilru tawh kher mai. Chutia a thut ngui bur lai chuan apa thianpa, Lawyer pakhat, Remruata office bang chuan a rawn hmu hlauh mai.

A bike ti ding meuh chuan Tluangtea chu ava pan phei a, "Ehe Bawiha, tinge khatia mahni a i thut vung vung a?" tiin ava zawt a. Tluangtea chuan zawite hian, "Apa a lo la thleng lova, ka nghak a...a rei tawh lutuk." a lo ti sap mai. Remruata pawh chuan mak a ti ang reng hle a, "Tinge mawni le, hei a tlai tawh tehreng nen.." a ti ve nuah nuah mai a.

A phone chu phawrhin Bena number chu a hmet chhuak a, a han call ta a. Mahse switch off a inti tlat mai, "I pa chu a phone a switch off daih bawk sia, engemaw awmzia le?" a han ti leh nuah nuah a. Tluangtea han kalsan tawp chu a dikin a hre bawk silo, Bena lah nise, a hnuah rawn kal leh si se, a lo buai hrep phah thei bawk si.

"Umm..ka rualin haw mai rawh aw.." a ti ta nge nge a. "Mahse..apa hi, min hmuh loh chuan a mangang lutuk ang." Tluangtea chuan a lo ti a. "Message ka hnutchhiah mai ang, whatsapp ah...chuan in in thleng ka thlah dawn che nia." tiin Remruata chuan a chhang a, message chu hnutchhiahin Remruata chuan Tluangtea chu a phur ta nge nge a.

Bazar zawn an thlen chuan, "Lawk aw, BAwiha...Sangha ka'n lei lawk ange." tiin Sangha chu a han lei leh rih a. Sangha lian tak mai pahnih chu chan lohvin, a pum chuan a lei a. Tichuan an kal leh ta a, Tluangtea chu an in thleng chuan a thlah a. MAhse an in chu a lo la inkalh tlat mai, mahse tala a tello, invih kalh ringawt a ni thung.

"Tinge mawni le, i pa chu awwww....ka lo nghah pui lawk dawn che em ni?" tiin Remruata chuan Tluangtea chu a han zawt a, "Aih, a hma pawn keimahin min kalsan fo alawm. A pawi lo, keimahin ka lo nghak mai ang." tiin a lo chhang a. Remruata chu a nui sak a, "Kha hei hi...i pa nen in lo hmeh dawnnia." tiin sangha pakhat zawk chu a pe a, a kalsan ta a.

Tluangtea chu a nui var var mai, sangha chu fridge ah a dah a. Mahse sangha chu a ruh t(r)elh hian a hria a, a la chhuak leh ngat a. Dawhkanah chuan a dah a, a han hmet chhin a, a pum zawn vel chu a ruh hiah a ruh t(r)alh mai a, engemaw thil sak tak leh lian tak chu a kawchhungah chuan a awm ngei tih a hrethiam ve ta a.

Rang lutukin chemte a la a, sangha chu a lai takah a phel a. A rin ang ngeiin lunghlu ang tak mai, pawl vat mai hi a lo awm a. Tluangtea chuan a la chhuak nghal vat a, a han enchiang a. Chu lunghlu chu apa an man mekna chhan, Alice-i leh Jenet-i khawvela an lo chhukna chhan, Pu Vana kawrkilh a ni tih reng a hre der si lo.

Thil hlu tak a ni tih hrethiam hek lo, chubakah lunghlu shape ang chiah a nih loh avang leh sangha kawchhung hnang leh thisen vel nen a inchiah nuia avang chuan thil hlu tak ang pawhin a lang lem lo. PAwnah chuan a chhuah pui a, a han en chiang deuh dawn a. Mahse a inchhuih ta hlauh mai, a bawk thlawp mai a.

Kawrkilh chu a vawr palh ta hlauh mai le, kawrah chuan a tla ta daih mai a. Tui hawk chuan a len bo ta daih mai, "Naa...ka la enchiang hman lo asin le..ka van ui reuh." a ti nuah nuah ringawt a. In lamah chuan a let leh a, "Ninawm apa hi, lo haw har si.." tih nuah nuah pah chuan a lut leh ta a.

*********************

Dustin-a leh Jenet-i te chuan Alice-i leh Bena te chu ramhnuai lamah chuan an hruai a, Alice-i pawh vantirhkoh thiltihtheihna a nei tawh rih lo, mihring pangngai ang chauh a nih tawh avang chuan a kut an phuarna hrui pawh a tal chat zo tawh bik lo, Bena pawh thi hnuangin a kal ve zel a, a chau tawh hle mai.

Chutia an kal mek lai chuan Dustin-a chu a ding a, "Enteh Jenet, an pahnih hian an chhe zawr ropui si a, kan kal chak lo emai. Engemaw tihdan zawng teh, a hahthlak." tiin a phun nuah nuah a. Jenet-i chu a khi deuh suk a, "Um a nih te chuan.." tih leh a ban chu a ti sei vak a, a thla a kap parh nghal bawk.

Chutah an pathum chuan a man bet hlawm a, a thlawh pui ta daih mai. Amah Dustin-a ber lah chu a au ring em em lehnghal, van sang takah chuan an thlawk ta a. Lui pakhat, a hma a Lasi leh Alice-i thutna bul zawn an thlen chuan, "Khutah khuan t(r)um rawh." Alice-i chuan a lo ti vat a. Jenet-i pawh chu lui zawnah chuan a thlawk thla a, a tum pui ta hlawm a.

Bena chau tawh lutuk leh hliam na bawk si chu a thu sawp nghal nuai mai a, a thaw hlawp hlawp mai. "I va han thlawk chak em em ve...ka thaw a chham tep alawm." tiin Dustin-a pawh chu a lo phun nuah nuah mai. Jenet-i chuan Alice-i chu rum tak hian a han melh a, "Le, khawnge kawrkilh chu a awm sawi rawh le." a han ti a.

Alice-i chuan zawite hian, "Saw laiah sawn, lui mawngah a awm." a ti zawi sap mai a. Chuveleh Dustin-a chuan, "Hey hey hey, a awihawm loh lutuk. Lui mawngah luh tir che a, chumi hlana kei hi min lo sawisak a tum chiang lutuk." a lo ti nghal zuah zuah a. Jenet-i pawh chuan Alice-i thusawi chu a ring teh chiam lo, "Engtin nge lui mawngah a awm tih i hriat?" tiin a zawt ve ngat a.

"A hma pawhin ka hmu tawh a, ka nei reng tawh. Mahse engin emaw min rawn tibuai a, chuvang chuan lui mawngah ka thlauh ta a ni." tiin Alice-i chuan a chhang a. Hriatthiamloh hmel tak hian Jenet-i chuan, "Enga? Eng thilin maw lo ti buai che?" tiin a zawt leh nghal a. Chutah Alice-i chu a nui suk a, "I hnunga mi khan.." a ti ta mai a.

Rang takin Jenet-i chuan a hnunglam chu a hawi a, lui atang chuan kha lasi ngei mai kha a rawn thlawk chhuak ta mai a, tui pawh a per nasa kher mai. Dustin-a leh BEna pawh chu an phu chiang kher mai, "Ekhai...eng thilmak dang nge ni ngai?" tiin Dustin-a chu a au deuh vak a. Lasi chu boruakah chuan a awm reng a, rum zet hian Jenet-i chu a en a.

Jenet-i pawh chuan lasi chu a en a, mak a ti kher mai. Lasi chuan pawr zet hian, "Kha vanchung nula kha chhuah nghal rawh, anih loh chuan i thi animai." a ti khur khur a. Jenet-i chuan thinrim tak hian, "Enga? Nang kha tunge i nih a?" tiin a lo zawt let daih mai. Lasi chuan a chhang lo, tui chu a rawn so phuan leh ta berh berh mai a.

Chutah le, lui atang chuan lasi dang 20 vel zet mai chu an rawn thlawk chhuak leh ta sup sup mai a. Boruakah chuan an thlawk kual a, Jenet-i chu an en ta thap mai le. Alice-i chu a nui sak a, "Lasi te u, he ramhuai Onoskelis hi that rawh u." tiin thu a pe ta a. Lasi zinga an lalnu ber, Alice-i thiannu ber chuan, "Awle ka Lalnu." tiin a chhang a.

Chuveleh Jenet-i pawh chu thinrim tak chung chuan a taksa chu a ti danglam ve nghal a, Onoskelis, ramhuai lian lutuk mai ah chuan a inti chang ve leh ta. Chutia a landan diktaka a inlan takah chuan lasi ho pawh chuan chutin an hnaih ngam chiah lo, mahse 20 vel zet an nih avang chuan an hual bet vek a.

Onoskelis chuan lasi ho chu a en kual den den a, "Thih in duh a ni maw? A tha e, a mal te te in ka that vek ang che u." a ti khur khur mai. Chutah lasi ho chu an hnung theuh atang chuan meikhu dum zet leh tak em em mai hi a rawn chhuak a, chu meikhu chu rul lian tak, ki nei fur maiah an rawn chang a.

Chung rul 20 rual chuan Onoskelis chu an zu bei ta a, a thenin an zial a, a thenin an an chuk bawk. A tirah chuan Onoskelis pawh a buai hman teuh kher mai, mahse a chak em avang chuan chung rul ho chu an lu a lo seh bun sak hmawk hmawk mai a, a then chu a lo pawt chhum hmawk hmawk mai.

LAsi ho chu leiah an t(r)um a, ramhuai pitar hmelchhe tak, ha hriam tak leh dum vek maiah chuan intichangin Onoskelis chu an bei leh ta. MAhse Onoskelis chuan a thla parh lian tak mai hmang chuan a lo vai kiang hlawm a, an hneh meuh lo chu a ni e. Chutih lai chuan Alice-i chu tlanchhiat a lo tum a, mahse Dustin-a chuan a va man hman a.

"Lal Sichang, nge kal ngawt i tum a? Mihring i nih tawh kha, min hneh tawh dawn bik lo." tiin a hmuiah chuan a hup sak a. Bena chu thei leh thei lo hian a rawn tho a, Dustin-a chu a rawn zuan tlu ve nghal. An pahnih chuan an insual ve ta a, mahse Dustin-a chan a tha zawk tlat. A sawisap hrep mai a, Alice-i chuan rawn puih a tum a.

Mahse vantirhkoh a ni tawh tlat lo, Lailah-i nilovin mihring pangngai, Alice Lalrintluangi mai chauh a nih tawh si avang chuan mipa tha chu a hneh ngang lo. Dustin-a chuan a lo vai pawp a, a thal der mai. Tichuan BEna chu a sawisak chhunzawm leh a, mahse BEna pawh a lo tlawm mai duh bik lo.

A thi phung tawh a, mahse a la bei lui tang tang tho. Onoskelis pawh chuan lasi ho chu a la bei mek zel a, meialh a ka atanga tichhuakin lasi 12 vel chu a that der tawh. LAsi ho pawh an tlem tawh kher mai, Alice-i thiannu ber, Lasi Lalnu chuan thei patawp chuan a bei lui zel a, Onoskelis pawh a hah tawh ngang mai.

Lasi zinga pakhat chuan Dustin-a'n Bena a sawisa lai chu ava hmu a, rang takin ava pan a. Dustin-a chu a man lawk a, a thlawh pui ta daih mai a. Sang takah a thlawh pui a, kham pakhata puk pakhatah chuan a vawm lut daih a, Dustin-a chuan a tukhum a sawh chawrh a, nikhawhrelovin a awm der mai.

Chu lasi chu a thlawk thla leh a, Onoskelis chuan Dustin-a a tihdan chu a lo hmu hman vek hi a lo ni. A rawn thlawk thla lam chu mei alh hlawm hmangin a lo vawm a, chu lasi chu a kang vak a, tuiah chuan a tla ri bur mai. A thi chiang hle bawk, lasi pawh an Lalnu leh lasi dang pahnih chiah an awm tawh.

Onoskelis pawh a hah tawh ngang mai, a thaw hlawp hlawp a. LAsi pathum te nen chuan an han inmelh ran a. Chuveleh Jenet-i ah a intichang leh daih a, Alice-i leia a lo tlu lai chu ava kek tho nghal a. A thingthit tir a, "Thlawk bo rawh u, thih ve in duh loh chuan...in Lalnu hi in hmuh lai ngeiin ka that bawk ang...chu chu in duh loh chuan thlawk bo rawh u." tiin a vin vak vak a.

Lasi pakhat zawk chuan va beih a tum a, ava tlan phei a. Mahse Jenet-i chuan a kut chu a lo phar a, lasi chu  a ding chat mai. Jenet-i chuan a kut chu a hum ruh vak a, lasi pawh chu a sawng te vek a, a darh chuai mai. Lasi pawh pahnih chiah an awm ta, Alice-i pawh a mangang takzet tawh.

Bena chuan leia thal reng chung chuan a lo en reng a, Alice-i pawh a beidawng takzet tawh tih ava hmuh chuan a rilru a na em em mai a. A maimitchhing vang vang a, "Pu Van, i awm takzet anih chuan i fanu Lailah hi rawn chhanhim rawh. Khawngaihin, i awm tak tak anih chuan he ramhuai hi ka hneh ngei theih nan chakna min pe rawh." tiin a phun nuah nuah mai.

Chuveleh lui luang lai chu a rawn fawn vak a, tui a rawn intheh vak mai. Chutah tak chuan Pu Vana kawrkilh bo chu a rawn intheh chhuak ta, BEna kutah tak chuan a rawn la tla zui. Bena chuan a han en a, chu kawrkilh chu Alice-i sawi, Pu Vana kawrkilh ngei a ni tih a hre nghal, a chhan chu Alice-i khan a lem a ziak thlap a, a hmuh thlap tawh a ni.

"In kal dawn em? In kal bo dawn em? Nge thih ve in duh zawk?" tiin Jenet-i chuan a lo la vau nasa mai a, "Nang ramhuai pitar kha...Alice-i kha thlah nghal rawh." hnung lam atang chuan BEna chuan a rawn ti a. Jenet-i chu a hawi let nghal, BEna chuan kawrkilh chu a lo keng vang mai a, Jenet-i chu a tin ran mai.

Jenet-i'n kawrkilh a hmu chu a meng phawk nasa ngei mai, "Kha..kha kha..Ben..Bena, kha thil kha min rawn pe rawh, mihring khawih ve chi a ni lo." tiin a kut chu ava dawh a. Mahse BEna chuan a lu a lo thing a, "Nilove...he kawrkilh hi i ta a ni lo, Pu Vana ta a ni...Alice-i hian Pu Vana hnenah a pe leh ngei bawk ang." tiin a lo chhang ve hmak mai.

Thinrim tak hian Jenet-i chuan, "Bena, tun chiah ka sawi tawh ang. Min rawn pe la, Alice-i hi ka chhuah anga, hremhmunah ka let leh ang. Ka tiam a che, kha kawrkilh kha ka mamawh a ni." a han ti chang leh fak fak mai a. MAhse BEna chuan a la phal tlat lo, "A teuh lo mai, nang ramhuai khan i phu hlawl lo." a lo tih khum leh hmak mai.

Chutih lai chu Lasi Lalnu, Alice-i thiannu ber chuan remchangah la in Jenet-i chu ava zuan vak a, a ha ti hriamin a nghawngah chuan a seh ta mai. Jenet-i chuan Alice-i chu a thlah lo thei lo, Lasi Lalnu chu awlsam takin lui lamah chuan  apaih leng dawr mai. LAsi pakhat zawk chuan rawn bei leh a tum a, mahse Jenet-i chuan a lo pawt sawm vek mai.

Alice-i chu BEna lamah va tlan pheiin, "Bena, khawi le.." tiin a au vak a. BEna chuan kawrkilh chu a vawr a, Alice-i chuan a lo dawng chat mai. Jenet-i a rawn hawi rang kher mai, mahse a tlai tawh lutuk. Kawrkilh chu Alice-i kutah a awm tawh. Chutah le, Alice-i chuan kawrkilh chu a kut pahnih chuan a vuan a, van lam hawi zawng chuan a lek kang a.

Chutah kawrkilh chu lal lukhum mawi tak, rangkachak vek ah hian a rawn chang a, a lai takah chuan lunghlu pawl vet mai hi a awm bawk. Alice-i chuan a khum ta, chu veleh a bul vel chu a rawn eng vang a, thil a rawn thaw vak a, khawpui a ri rum rum mai. Alice-i chu hmuh hleitheih loh khawp hian eng chuan a hual vel a, zawi zawiin a rawn reh leh a.

MAhse Alice-i pawh a ang tawh lo, Lailah-i hmel diktak a ni tawh. Mahse danglam tak a ni thung, a vantirhkoh thla var thianghlim tak mai chu a sen vek a, a thuamhnaw var nalh tak pawh a dum vek tawh. Kawrkilh thiltihtheihna avang chuan Lailah-i chu vantirhkoh upa ber ai pawhin a chak tawh zawk, Jenet-i chuan a hlau kher mai.

Mahse tlawm ala tum chuang lo, Onoskelis-ah inti chang lehin va beih a la tum fan a. Mahse Lailah chuan a kut a lo phar a, Onoskelis chu a ding chat mai. Lailah chuan muang changin ava pan a, Onoskelis chu a khur cher cher a, na a tuar mek a ni tih a hriat hle. Zawi zawiin mihring ah a chang a, a tawpah chuan Jenet-i a ni leh ta.

Lailah chuan Jenet-i lu chu a vawn sak a, a thla sen nalh tak mai chuan a hual vel bawk a. Chiang fekfawk hian, "Onoskelis, i chak lo. I chak ta lo, haw tawh rawh. Kut ruakin hremhmunah chuan han kir leh rawh, Belzebula chuan a lo hrem loh hram che ka beisei." tih pah chuan a luah chuan a hmer vak a.

Jenet-i na ti lutuk chu ring tak hian a au vak vak a, a rawn alh tan ta. A alh nasa tulh tulh a, a tawpah chuan a kang ral ta thak mai. Lailah pawh chu a thaw huai a, mihring ah inti chang leh in Alice-i a ni leh ta. Bena chu ava en a, "Tikhan..tikhan a thi tihna mi?" a lo ti hu mai. Alice-i chu  a khi suk a, "Thi love, hremhmunah ka thawn let a nih kha." tiin a chhang a.

Lasi Lalnu chu a rawn kal a, "Ka Lalnu, ka lawmpui che." tiin a rawn nui sang a. Bena chuan lasi chu a han en vang vang a, hmeltha a ti kher mai. Alice-i chuan a lo hrethiam nghal, "Hey, Bena..en vak vak suh, a zawl mai ang che." nui chung chuan a lo ti vat a. "Maw..min zawl ang maw?" a lo ti leh hu mai.

"Aw...ka zawl kher dawn lo che, mahse mipa ka zawl thin. Lasi, lasi ka nih hi." tiin LAsi chuan a lo chhang a. Bena chu a nui suk a, "Lasi...avan mak." a ti nuah nuah ringawt. "Ka lalnu, ka kal leh tawh ang e. Nang ka pui thei che hi ka lawm takzet, mangtha phawt le." tiin Lasi chuan chibai a buk a.

"Min puih avangin ka lawm e, anih phawt le." tiin Alice-i chuan a chhang a, Lasi chu a thlawk bo ta a. Alice-i chuan Bena chu a en vang vang a, "Khawi atangin nge kawrkilh hi ilo hmuh a?" tiin a zawt a. "Ihh..lui atang hian a rawn per chhuak nawlh a..ka hre bik lo."  a lo ti hu mai. Alice-i chu a nui suk a, "Hawh..haw tawh ang." tih ringawt chuan a chhang a, a thlawh haw pui ta a ni.

**************************

(2 hours later)

Bena te in bulah chuan BEna te pafa leh Alice-i chu an ding a, "Ka lawm e, BEna. NAng awm lo la chu...hnehin ka awm ang a, Pu Vana ka ti lungawi lo ngei awm si a. Ka lawm e, ka lawm takzet." tiin lawmthu a hrilh mawlh mawlh a. Bena chu a khi suk a, "Keipawh ka lawm e, kei chauh nilovin ka fapa pawh i ti lawm a, kan lawm takzet." a lo ti ve bawk a.

Alice-i chuan Tluangtea chu a en a, "Tluangte, Sichangneii hi ka haw a hun tawh a, fel deuhin lo awm ang che aw..ka ngawi ngawt ang che." a han ti a. Tluangtea chuan a ui takzet, "Umm." tih bakin a chhang thei lo, a mittui a far zawih zawih mai. BEna chu a thaw hak a, "Kan inhmu leh thei angem, ALice...i lo chhuk leh angem?" tiin a han zawt a.

Alice-i chuan a lu a thing a, "Ka hre lo, ka thu a ni si lo alawm. Mahse kan la inhmuh leh ngei ka beisei...ka kal tawh mai ange." tiin a thla chu a zar pharh a, Lailah-i a rawn ni leh ta a, a thla sen mawi tak chu a zap hluau hluau a. "Mangtha u aw...kei angel hian ka venghim reng ang che u." tiin van sang lamah chuan kawrkilh hum ran chung chuan a thlawh bo san ta a.

An hmuh theih loh thleng chuan Bena te pafa chuan an en zui vawng vawng mai, "Ka hmangaih che, Alice...mangtha le." tiin BEna chu a phun ri sap a. Tichuan inchhung lamah chuan a fapa Tluangtea nen chuan an inzui lut ta a, Tluangtea erawh tap chungin room lam a pan nghal. Dawhkanah chuan bag dum hi a lo awm a, BEna chuan a hmu chu mak a ti kher mai.

"A hma khan ka hmu miah silova, engtia rawn awm ngawt nge maw a nih le?" tih nuah nuah pah chuan ava pan phei a. Bang chu a han hawng a, pawisa tam em em mai hi a lo khat nuk mai. Paper them a lo awm bawk a, "I LAWMMAN A NI E, ALICE LALRINTLUANGI." tih hi a lo inziak a.

Bena chu a nui suk a, "Ka lawm e, ka lawm e..Alice, engtikah mah ka theihnghilh leh tawh ngai lovang che." tiin a phun ri sap a. Bang chu roomah a la lut a, pawisa zawng zawng chu a dahtha nghal vek bawk a. A nupui Mamuani thlalak, banga an tar chu a en vang vang a. "I kal hmaa min chah ang ngeiin, nuamsa takin kan fapa hi ka awm tir thei tawh ang." a ti zawi sap a.

***********************

ZAn a lo ni a, Dustin-a chu a harh zawk mai. Puk thim tak chhungah chuan a lo la awm reng a, "Ehe..khawnge ka awm?" tiin a phone chu a dap nghal a. Mahse a la hmu mai lo zui, a hlauthawng kher mai. Mahse a hma zawnah chuan mei alh hi a hmu a, bak an la thlawk nuai nuai zui.

Chutah hmeichhia ni awm tak hi a rawn kal phei a, mei alh zawn a thlen chuan hmeichhia ngei a ni tih a chiang ta. Bang kil lehlam lehlam ah chuan meichher hi a lo intung dur a, chunu chuan a ban a phar a, meichher chu a rawn alh vek mai. Dustin-a chuan chunu chu a en vang vang a, "Tunah..tunah khan...nangma tih ami, mei alh kha.." a ti hu mai.

Chunu chuan  a chhang lo, a en reng ringawt. Chunu chuan puan var hi a bih a, a mal thleng a thui a ni a, a chhing ve pangngai. A ngo em em a, a hmel lah a tha takzet bawk. MAhse a nelawm lem loh bawk, a sam lah a sei tha hnap hnap kher mai. Chutah rul lian em em mai hi chu nula hnung atang chuan a rawn tleng a,  rum dum lian leh rapawm zet mai a ni.

Dustin-a hlau lutuk chu a tawlh hnung nghal dawr a, "Ru..rul..rul..i hnunga kha.." tiin a rak nghal vak vak a, a thlan a tla zawih zawih mai. Chu rul lian zet, tur ngah hmel tak chuan chu nula chu a rawn zial a, mahse a tina miah lo, nula pawh chuan engah mah a ngai lo, a lo zut vel mai mai a. Dustin-a chu rul nen chuan rum zet hian an melh a, "Tunge i nih?" tiin nula chuan a han zawt a.

Mahse Dustin-a chuan a chhang lo, chutah thum chher chhur hian rul chu a rawn tawng chhuak ve ta, "Tunge i nih..enge kan pukah i rawn tih?" a rawn ti thum chhur chhur mai. Dustin-a chuan mak a ti takzet, "Rul..rul kha a tawng em ni?" a ti hu a. Nula chuan ava pan hnai leh a, "Tunge i hming?" tiin a zawt leh a.

Hlau tak chung chuan, "Du..Dustin..Dustin Malsawmzuala." tiin a chhang khur dar dar mai. "Enge hetah i tih?" tiin nula chuan a zawt let veleh a. "Ihh..ramhuai...ramhuaiin min man a, hetah hian min paih lut a. Tu...tunge i nih ve?" tiin a zawt ve leh a. Nula chuan Dustin-a mitah tak en chung chuan chiang fek fawk hian, "Ka hming chu CHAWNGCHILHI a ni." tiin a chhang a.

***************************

THE END