SICHANGNEII : THE GUARDIAN ANGEL (Mizo Fiction Story) Written by : Aaron Malsawmdawngzuala Chapter - 5

SICHANGNEII : THE GUARDIAN ANGEL

(Mizo Fiction Story)

Written by : Aaron Malsawmdawngzuala

Chapter - 5

*******************

Lui pakhata lungpui chungah chuan Alice-i leh Lasi chu an thudun a, an ngaw dun kar mai. "Eng ti tura kha laia lo awm reng reng nge i nih a?" tiin Alice-i chuan a han zawt deuh thut a. "Zing lamah hian, tuma thawh hma hian keini lasi ho chu chhuak thawveng turin kan rawn ngampa ve thin a, anih loh chuan kan inlan mai mai lo." tiin Lasi chuan a lo chhang a.

"Anih leh engvanga min bei ringawt nge i nih?"

"Mihring pangngai i ni lo tih ka rawn hre thei nghal a ni."

"Nihleh i thiltihtheihna kha khawi atanga i neih nge ni reng reng?"

"Mihring ka ni bik hleinem, ramhuai chikhat tho alawm ka nih."

"Thil tha lam i ti ngai lovang tiraw?"

"AW...mihringah pawh mipa ho hi..ka zawl thin."

Alice-i chu a ding deuh hluai a, "Engtin nge maw ka tih ang che awww?" a ti vawng vawng mai. LAsi chu a rawn ding ve nghal a, "Khawngaihin min that suh, min tina suh. I duh apiang ka pe ang che, awmdan tura min hrilh apiangin ka awm ang." tiin a hlauh hmel kher mai. Alice-i chu a han ngawi leh vang vang a, "Helai hmunah hian nangmah lo lasi dang an awm em?" tiin a han zawt leh a.

"Aih awm lo hetah chuan..keichu ka mal tlat hrih a..awmkhawmna kan nei ve alawm." tiin Lasi chuan a lo chhang leh a. Alice-i chuan a lu a bu nghauh nghauh va, "Um a tha e, tumah i zawl ka phal lovang. Chuan i puihna ka mamawh dawn bawk, hmelma lian tak pakhat ka nei a, chu chu nang nena kan beih angai ang." a han ti a.

Lasi chuan mak tih hmel tak hian a en hu mai a, "Hmelma a? Chuan..bei turin ka puihna i mamawh bawk amaw?" a ti deuh chiam chiam a. "Aw..a chhan chu ramhuai chak tak a ni a, keimah ang bawkin vanchung nula a lo ni ve tawh thin." tiin Alice-i chuan a lo chhang a. Lasi mitmeng chu a dawih ta tlat mai, "NAngmah pawh ka hneh lo che ania, chutiang khawpa chak te chu ka bei ngam dawn em ni?" a han ti zawi sap a.

"Kan pahnihin kan tang dawn alawm."

"Anih leh khawiah nge chu ramhuai chu a awm?"

"Khawnge a awm ka hre lo tunah chuan...mahse min zawng mek tih erawh ka hria."

"Enge a hming?"

"Onoskelis."

"Enga? Ava mak ve...eng ang hming nge ni ngai?"

"Ka sawi thei mai hrih lo, mahse min puih angai a ni."

Lasi chuan chibai buk meuh hian, "Awle Lailah, i thu ka zawm ange. Mahse engtin nge min mamawh hun tur ka hriat theih ang?" tiin a zawt a. Alice-i chuan a vantirhkoh thla hlai tak chu a han ti parh leh hnuai a, a hmul pakhat chu a pawt thla a. LAsi chu pe in, "Hei hi kawl rawh, ka mamawh hunah che chuan he ka thla hmui pakhat hi a rawn sen vek anga, tichuan ka awmna i hre thei ang." tiin a chhang a.

Lasi chuan a la a, "Awle Lailah, i thu ang zelin le." a lo ti leh a. "Tunah chuan ka kalsan phawt ang che, mahse min phatsan anih vaih chuan i tan a pawi khawp ang." tiin Alice-i chuan a han vau lawk deuh hlek a. Lasi chuan a lo hlau ngang mai, "Aih, ka phatsan lovang che." a lo ti nghal vat a.

Alice-i chuan kalsan a tum a, "Lawk aw, Lailah..thil pakhat chiah ka lo zawt leh che." lasi chuan a rawn ti leh a. Alice-i chu a ding a, a va hawi phei a. "Enge ni?" tiin a han zawt a. Inthlahrun hmel tak hian Lasi chuan, "Onoskelis chu engvanga angel atanga ramhuai ni ta mai nge a nih ka hre ve thei angem?" tiin a han zawt leh a.

Alice-i chu a nui suk a, "Ngati vak mah, a sual khawp mawle." tih ringawt chuan a chhang a. A thla chu a han ti parh vak a, van sangah chuan a thlawh bo san ta a. LAsi chuan a en zui vawng vawng mai, Alice-i thla hmul pakhat a pek chu a han en vang vang a, a nui sak a. Tichuan lui ah chuan a zuang lut a, a bo ve ta daih mai.

************************

Bena chuan a fapa Tluangtea chu school kal turin a scooter tawng tawh takah chuan a phur phei mek a, kawngsira mi in kawt deuh atang chuan Detective Adama leh Dustin-a te chuan an lo en kar mai. Dustin-a chuan kawh pah hian, "Saw saw ania Bena ka tih chu, sawpa saw ania ka hmelma chu." a han ti a.

Adama chuan a en vang vang a, "Ngawi teh, a hmel en chuan tu pawi mah sawi hmel pawh a pu lo. A fel hmel ka ti, i ti tak tak amaw?" tiin a han khi suk a. "Ti tak tak e, i case chhui lai hi tih tawp vat a, hming that i duh chuan ka thusawi chu awih mai rawh." tiin Dustin-a chuan a lo chhang deuh zek mai.

"Awle awle...a tha alawm. I thu vek alawm boss, nang hi chu i ngeiawm ve khawp mai." tiin Adama chuan a han melh hrawk a. Lo khik suk pah chuan Dustin-a chuan, "Nia, kei ka ngeiawm loh ten SADIST ka ni nang." tiin a lo chhang let ve leh a. Adama chu a nui huah huah a, "A hrim hrimin SADIST tih hi tu phuahsak che nge khah...Pu Chhuma tiraw?" tiin a zawt leh a.

Dustin-a chu a thaw hak a, "Ni e, a phuah fuh khawp mai..ka sawi tam peihlo." a lo ti deuh hmuk a. Chutia an inbiak lai chuan Bena pawh a scooter tawng ve tak hmang chuan a rawn inkhalh let leh bauh bauh mai, "Saw a lo let leh tawh ania." tiin Adama chuan a kawk a. "Umm..zui nghal vat ang." Dustin-a chuan a lo ti ve nghal vat bawk.

Tichuan an motor ah chuan an lut a, Bena chu an zui ru ta a. An zui zel a, vengmawng lam thleng chuan an zui a. An kal hla tulh tulh mai chu Adama chuan mak a ti deuh nge ni, "A va awm mawng awm em em ve, kan kal thui tulh tulh mai ahh.." a han ti deuh nuah nuah a. Dustin-a chu a lo khi suk a, "Ni reng e, nizanah phei chuan ramhnuai lam atangin ka kal mawle." a lo ti ve bawk a.

"I kal tawh amaw?"

"Kal tawh ang chu...ka hmelma a nih saw."

"Hmelma i nei thing emai, an retheih hmel sia..a fel hmel sia, engtia nang ang mi hausa hmelma ni thei nge maw a nih le?"

"Ava mak e aw..i phun peih si, ka ning deuh hlek che ania."

Adama chu a han nui deuh huk a, "I rilru hi a hmeichhe rilru riau, i ang reng mai.." tiin a han thaw deuh huai a. MAhse Dustin-a chuan a chhang lo, "Eheee..ala chhuk ta deuh deuh, in pawh a awm tawh dawn mi?" tiin Adama bawk chu a han phun leh nuah nuah a. Nui chung hian Dustin-a chuan, "An kawmthlangah THE END tih a inziak alawm." tiin a lo fiamthu ve bawk a.

***************************

Alice-i chu BEna te inah chuan a ve let leh a, mahse tala in a lo inkalh hmak mai. A ding a, tala chu a en vang vang a. Za lo tak hian a khi suk a, "Awle...tunah chuan ka hna diktak ka tan a hun tawh takzet tihna a nimai." tiin a thla chu a han ti parh leh hluai a, ramhnuai lam pan chuan a thlawk phei ta a.

A thlawk bo chiah tih ah chuan  Bena pawh a rawn thleng ve chiah a, an inhmu hman lo chiah chiah. Scooter atang chuan Bena chu a chhuk a, an in kawngka tala a alo la inkalh reng a hmuh chuan Alice-i chu a lo la haw lo tih a hrethiam nghal a, a ngui zual phah hle mai. Tala chu a hawng a, inchhung ah chuan a lut ta a.

Alice-i chu a ngai nghal hle mai, hnathawk tura chhuah pawh a phur chiah lo. "Ka kal lo mai dawn em mawnile.." tiin amah leh amah chu a inzawt a, thutthlengah chuan a thu deuh hnawk a. A inchhung chu a han enkual a, Alice-i chuan ahma aia nuamin a lo siam vek tih a han hmu nawn leh phei chu a rilru ana em em a.

A hma zana a thil sawi te chu a ngaihtuah let leh a, a inchhir takzet. Chutia a rilru a Alice-i ringawt a awm lai chuan kawngka a rawn inkik ta karh karh mai, Alice-i a nih ngei ringin rang lutukin a zuang tho nghal a. Kawngka lam pan chuan ava tlan phei nghal vat, beiseina nen nui sang chung chuan kawngka chu a han hawng a.

Mahse a rinloh tak maiin mipa pahnih an lo ni daih mai, chumite chu tudang nilovin amah lo zuiru char chartu, Dustin-a leh Adama te an ni. Mak ti tak hian BEna chuan a en dun hu mai a, "Enge..enge in duh?" a ti bah nuai mai. Adama chuan thutak hmel zet hian, "Benjamin Lalfakzuala i ni em?" tiin a han zawt a.

"Aw ni e, tute nge in nih a?" tiin Bena chuan a lo zawt let a. "Detective Adam ka nia, chuan hei hi ka thianpa leh ka assistant ni bawk, Malsawmzuala a ni." tiin Adama chuan a chhang a. Bena chuan mak a ti kher mai, "Eng a? De..Detective a? Enge hetah...enge i duh?" tiin a hrethiam lo takzet.

Dustin-a chu rawn tawng ve in, "Khawngaihin kan lo lut thei angem?" a han ti ve a. Bena chhan hma hma chuan an pahnih chuan an lut dun nghal a, BEna chu a hrilhhai tawh kher mai. Adama chuan rum zet hian a melh a, "Lalrinsanga tualthihna thubuaiah rinhlelh i ni a, kan rualin Police Station ah min rawn zui angai ang." a ti ta mai a.

Bena chu a meng kawk mai, "Enga? Tual..Tualthah thubuaiah a? Keimah maw?" a ti hu mai a, a hlauthawng nghal kher mai. Dustin-a chuan a darah ava beng thak thak a, "Umm..min rawn zui angai. Anih loh chuan tharuma kan chinfel a ngai palha nge...thu awih tak khan min lo zui mai rawh." zaidam tak si chuan a han ti vel a.

Bena ngaihdan chu a ni bik chiah lo, "Nilo...chutin min man ngawt thei lo. Chubakah tumah ka that lo, tute nge in nih pawh ka hrelo." a lo ti ve hmak mai. Dustin-a ngaihdan a ni ta lo, BEna chu bangah chuan a rekbet a. Rum zet hian a melh a, "Min rawn zui dawn nge...tunah hian i ngal ruh ka vaw tliak dawn?" tiin a vau ta khur khur mai.

Bena chuan a hlau kher mai, mahse a luhlul a chhuah ve tlat. A lu a thing a, "Ka lo kal lovang, engmah tihsual ka nei lo tih ka chiang." a la ti ve tlat mai. Dustin-a chu a insum thei tawh lo, Bena hmaiah chuan a hnek ta siah siah mai. Bena hnar chu a thi phung tawh mai a, Adama zawk pawh chuan a en hleithei lo.

"Ka thin tih rim i tum ve khanglang em ni? Zawnga, nang ang mi rethei lutuk lehnghal." tiin Dustin-a chuan a chhuih zui nghek mai a. Adama chuan a rawn dang hial mai, "Dustin..Dustin..duhtawk rawh, kha..chet pawh a chet that theih loh kha." tiin Dustin-a chu a pawt sawn a.

Dustin-a chuan a duhtawk ve thei hram a, "Adam, hetiang chuan kan inhruai chhuak lovang. Thildang ka tih angai a ni...lo inrawlh suh ang che." a la ti ta deuh deuh va. "Enge ila tih dawn?" tiin Adama chuan a lo zawt nghal vat. Dustin-a chuan a ipte atang chuan syringe damdawi inhip lut sa hi a rawn phawrh ta mai a, "Kha kha enge?" tiin Adama chuan a lo zawt vat a.

Mahse Dustin-a chuan a chhang lo, dimna tel hauh lo chuan Bena nghawngah chuan a vit lut pawk mai. Bena pawh a au tuar a, damdawi chu a kap lut ta vek mai. Hruai a phawi chiah chu BEna chuan a nghawng chu a dawm nghal vawng vawng a, zawi zawiin a zal riai riai mai. "Dustin, engthil nge kha kha?" tiin Adama chuan a lo zawt leh a.

"Engtin mah a awm lovang, a muhil ringawt ang." tiin Dustin-a chuan a lo chhang leh a. Bena nikhawhrelova awm chu a pu nawlh a, "Dustin, miin min hmu ange?" tiin Adama chu a lo hlauthawng kher mai. Bena put vu pah chuan rum tak hian Dustin-a chuan a han melh hru a, "Detective dawihzep pa, i hmingthatna tur a nih hi...min lo zui rawh." a ti vin deuh hlur a.

Pawnah chuan a chhuah pui a, Bena chu motor seat hnung lamah chuan a mut tir a. "Tihian Station ah chuan kan  hruai dawn em ni?" tiin Adama chuan a han zawt leh a. Thawk deuh halh pah chuan Dustin-a chuan, "Aih...dawn lo. Tihian Jenet-i bulah kan hruai ang, ka sawi awmzia chu, Onoskelis bulah." tiin a chhang a.

"Onos...Onoskelis....kha ramhuai kha maw?"

"Tinge i hlau ami?"

"Aih..ka sawi awmzia chu...tinge, engatan?"

"Khawiah nge kan hruai chuan anga?"

"Ele Station ah..ani lawm ni?"

Dustin-a chuan chal dawm meuh hian, "Huiham, jail tang tlanchhuak ka nih hi, MAwla. Ka thu i awih phawt angai, pawisa i duh chuan....ka thu zawm phawt rawh." a ti vin deuh hlur mai. "Mahse...engkim ka buapui vek ang i tih kha...i chetdan hi ka hrethiam hauh lo ania, Dustin..." tiin Adama chu a mangang kher mai.

"Mangang suh, Adam...DEtective hmingtha takah ka chhuah dawn che alawm. Engpawh nise, kal phawt ang...chuan nangchuan Bena hming hi a hmingpum zawng zawng nen Station ah i report ang. Chuan tih tur ka rawn hrilh leh dawn che nia." tiin motor ah chuan a luh san ta dauh mai.

A lu thak lo pui chu Adama chuan  ahiat nauh nauh va, mahse a hnial ngam tawh bik lo. Motor chhungah chuan a lut ve a, "Engtia rei nge nikhawhrelovin a awm dawn?" tiin a han zawt leh hram a. "Zawhna i ngah lutuk, helai hmun atang hian kal vat ang." tih ringawt chuan Dustin-a chuan a lo chhang a, an tlan ta a.

***********************

BEna muhil chu a rawn harh zawk mai, thutthlengah nghet taka phuar beh a lo ni a. A hmui chu tape hmanga tuam a lo ni bawk. A hma zawn chu a va en a, hmeichhe pakhat hi amah hnungchhawn zawng hian a lo ding reng mai a. A tal nghal vak vak mai, chu hmeichhia chu muang chang chuan a rawn hawi a.

Tudang nilovin Jenet-i a lo ni reng mai, a rawn la nuih sang zui. Bena chuan a hrethiamlovin a hlauthawng em em a, a theih tawp chuan tal chhuah a tum a. Mahse a phuarna hrui chu a hrawlin a lian em em a, chubakah a nghet lutuk tlat. Jenet-i chuan ava pan hnai a, a hmui tumana chhanah chuan a va fawp kher bawk a.

Rum zet hian Bena chuan a lo melh a, Jenet-i lah chu ala nui huah huah zui. A hmui tumana chu a phelh sak ta a, chuveleh Bena chuan ring zet hian, "Hey, tunge i nih? Hmeli, min chhuah vat rawh." tiin a vin nghal vak vak a. Jenet-i chuan a hlauh loh hmel kher mai, "Khaih khaih khaih, insum teh insum teh." tiin a lu ah chuan a han chul vel a.

Bena chu a thinrim kher mai, "Min chhuah rawh..tunge i nih? Engvanga min man nge i nih? Enge i pawi ka sawi?" tiin a han zawt leh chiam chiam a. Jenet-i chu a han thaw deuh hak a, "Nia...thu pehhel vel hi ka peih lo. Ka zawhna che tha takin min chhang la, tichuan i him a ni mai." zaidam tak chuan a han ti a.

"Enge...enge i duh? Sawi ta che...sawi rawh, Hmeli.." tiin Bena chuan a lo vin leh hrep mai. Jenet-i chu a nui sak a, "Khawnge Lailah a awm? Zep suh...ka hre lo ti reng reng suh." a han ti chiah mai chu Bena chu a meng phawk nasa kher mai. Chhan mai ngaihna a hre lo, "Tinge mak iva ti awm ve?" tiin Jenet-i chuan a lo nuih leh suk a.

Bena chuan hnuai lam a melh a, a ngawi vang vang mai. Chutah Jenet-i bawk chuan, "Le..sawi rawh le..khawiah nge Lailah-i a awm?" tiin a han zawt leh a. Muangchang chuan BEna chuan a han melh chho va, "Tunge Lailah-i chu ka hre lo, hria pawh ni ila ka hrilh lovang che." a lo ti ve ngat a.

Jenet-i chu a nui hmel pawh a inthlak chiang ngei mai, thinrimna mitmeng nen chuan BEna chu a melh ta khur mai a. "Lailah-i kha i ngaizawng...chuan a mihring hming pawh Alice-i a ni tih ka hre bawk. Nizana in inbiakna zawng zawng pawh ka hre vek, sawi rawh....khawnge a awm? Khawnge Lailah-i a awm? Khawnge Alice-i chu a awm?" tiin a vau ta khur khur mai.

Mahse Bena chu a la tlawm duh bik lo, a luhlul a chhuah ve tlat. A nui lui sak a, "Ka hre lo, hria pawh ni ila ka hrilh lovang che. I duh duh chu tirawh, i duh leh min that rawh...ka chhanna che chu a ngai reng ang, Zawngi." a lo ti ve leh hmak mai. Jenet-i chu a thinrim ta, "Tunge ka nih i hre lo a ni, thianpa.." tiin a melh khur tawh mai.

Bena lah chuan hlauh lo hmel tak hian, "I insawi phawt loh te chuan engtin nge ka hriat ang che?" a lo ti ve leh hlak mai a. Jenet-i chu a insum zo ta lo, "Tunge ka nih i hre duh amaw?" tih pah chuan a tawlh hnung a. Bena hma takah chuan a nihna diktak chu a tilang ta, Onoskelis...ramhuai rapthlak tak maiah chuan a intichang ta mai.

Bena chuan chutiang khawpa ramhuai lian leh rapthlak chu a mumangah pawh a la mang pha lo, a rap takzet. A chil a lem dawk a, Onoskelis lah chu a rum ang dur dur lehnghal. Ft 9 vel laia sang a la ni zui bawk nen, a hlau takzet. Chutah Onoskelis chuan ala rawn pan hnai zui, "Tikhan tunge ka nih chu i hre tawh em?" a rawn ti chhur chhur mai.

A aw lah chu a rapthlak em em a, patling 10 rual vel a ruala tawng ang mai hi a ni a, a thum em em bawk. Bena chuan a chhang lo, chhan ngaihna a hre lo mai nilovin a hlau lutuk chu a tawng thei mai lo a ni mah zawk. A khur zawih zawih mai a, zun a cheh lo chauh. "Kei hi ONOSKELIS ka ni, hrehmun lalfanu ONOSKELIS ka nih hi." a ti thum chhur chhur mai.

BEna chuan ala chhang chuang lo, thlan tla zawih zawih leh khur zawih zawih chuan a en reng ringawt. A mitthla ah chuan Alice-i'n a hmelma chu Onoskelis chu a hmelma  a a nih thute, ramhuai chak tak a nih thu a hrilh lai te leh amah aia a let a a chak zia a hrilh lai te chu a rawn lang chuai chuai mai.

Chutah Alice-i'n a hrilh ngei, ramhuai hlauhawm leh tihbaiawm tak, nunrawng em em mai Onoskelis chu ahmaah ngei a awm khur mai si. Alice-i chu a mamawh takzet, mahse a tawngkam fimkhur loh avangin Alice-i lah chuan a thlawh bo san daih tawh mai si, a rilru  ahah in a hlauthawng takzet.

****************************

Khawlaiah chuan Alice-i chu a kal zel a, Daniel-a hmel awm ang reng reng a hmu chuang lo. Kawnglaia mipui vei nuai nuai mai chu a en uluk hlawm hle mai a, mahse Daniel-a hmel reng reng a hmu lo. A mangang tan der tawh, chutia a vei a vei lai chu a ruka lo en reng tu an awm tih lah a hre der mai si lo.

Chutia a ruka lo en reng tu chu tudang nilovin, SADIST bawk, Dustin Malsawmzuala bawk a ni. Alice-i chu thingpui dawr pakhatah chuan a lut a, a thu hahchawl a. Engtia han zawn zel tur nge a hre mai lo, a chhan chu a rilru ah chuan DAneil-a leh Pu Vana kawrkilh chauh nilovin Bena pawh a awm tel tawh vang a ni.

A ruk tak chuan duhna a lo nei ve reng a ni tih pawh a inhrethiam reng a, mahse  chu chu a tihtur a nih loh mai bakah khawvela a kal chhan a ni lova, thil dik a ni lo tih pawh a hria. Thingpui dawr chhungah chuan Dustin-a chu a rawn lut ve a, Alice-i bulah tak chuan a rawn thu ve nghal chat mai.

Alice-i chuan mak tih hmel tak hian a lo en a, a hriat tawh hnu a ni tih a hre nghal bawk. Dustin-a lah chuan a lo la nuih sang lehnghal, "Tunge i nih?" tiin Alice-i chuan a zawt a. Dustin-a chuan a chhang mai lo, a en deuh vang vang ringawt. "Enge i duh? Min hria em ni? Tunge i nih ka tih chu?" tiin a han zawt leh a.

Dustin-a chu harhchhuak zawk niawm tak hian a han phu deuh zuk a, "E aw...tihpalh lutuk. I hmeltha em a, ka lo en uluk deuh che a ni." a han ti deuh kher a. ALice-i chuan a melhrum tawh kher mai, "Tunge i nih ka tih chu? Chuan enge i duh?" tiin a han zawt nawn leh a. Dustin-a chu a khi suk a, "Daniel Lalhriathlua...ka hria...tunge a nih ka hria." a ti ta mai a.

Chuveleh Alice-i chu a meng phawk nasa kher mai, "Engmaw? DA..DAniel Lalhriathlua...i hria maw?" a ti ta hu mai. Nuih suk pah hian Dustin-a chuan, "Hria e, sakei leh mihring inchawpawlh ka ti mai..engtin nge an koh khah...khatiang kha, e aw..KEIMI..KEIMI ni tak e." thawven hmel zet chuan a han ti leh a.

"Tunge i hming?" tiin Alice-i chuan a han zawt leh a. A kut va dah chhuah pah chuan Dustin-a chuan, "Sorry, ka lo la introduce myself lo tak e...Dustin, Dustin Malsawmzuala." a han ti leh deuh ham ham a. Hreh hmel tak hian Alice-i chuan a lo chibai a, "Alice Lalrintluangi." a han ti zawi sap a.

"Ava nalh ve...i hmeltha bawk a, i hming pawh a nalh e."

"Min hria em ni?"

"Hria e...hei tunah ka hre chiah che."

"Engtin nge Daniel Lalhriathlua chu ka zawng tih i hriat?"

"Ka hria che alawm, Alice...i hming hi Alice-i pawh a ni tak tak lo."

"Enga? Anih enge ka hming diktak chu?"

Chiang kelh kawlh hian Dustin-a chuan Alice-i chu a melh kar a, "Lailah...vantirhkoh Lailah i ni." a ti ta mai a, Alice-i chu a meng phawk nasa kher mai. Chiang tak hian Dustin-a chu a en a, "Nang hi tunge i nih?" tiin a han zawt nawn leh a. Dustin-a chu a han thu tha sauh sauh va, "Ka sawi thei rih lo, mahse min rin ngam angai." tiin a lo chhang daih mai.

"Engtin nge ka rin ngam ang che?"

"Min rin angai, a chhan chu kan hmelma a in ang a ni."

"ENga? Kan hmelma a in ang e a? Enge awmzia?"

"ONOSKELIS...kan hmelma a ni ve ve, Onoskelis.."

Alice-i chuan mak a ti tulh tulh mai, "Engtin nge i hria ve?" tiin a zawt vat a. Mashe Dustin-a chuan a lu a thing a, "Thawnthu thui tak a ni, Alice..avaia sawi dawn chuan hunin min daih lo. MAhse tunah hian Onoskelis hian BEna a kawl mek a ni, i thianpa Benjamin Lalfakzuala." a han ti leh a.

Alice-i chu a ding nghal, "ENgmaw? BEna..Bena chu Onoskelis bulah a awm maw? Khawnge tunah an awm?" a ti nghal chel chul mai. "Nilo Alice, khatin chiai nghal ringawt suh. Fimkhur taka kan chet angai, thu leh phawt teh." tiin a hnem a. Alice-i pawh chu zawi muangin a thu ve leh mai bawk.

Hawi kual zeuh zeuh pah chuan, "Bena chungah hian engmah a thleng tur a ni lo, Dustin...ka thlen tir ngai lo bawk ang. Khawngaihin thil awmzia min hrilh rawh, tunah chuan Daniel-a zawn ai pawhin ka ngaipawimawh zawk." fiah tak si, zawi tak si chuan Alice-i chuan a han ti a. "Ka hria alawm, mahse min rin angai. Min lo zui rawh, tunah kan kal vat angai." tiin Dustin-a chuan a lo chhang a.

"Khawiah maw?"

"An awmna ka hria, kan kal angai."

"Engtin nge ka rin ngam ang che, chuan engtin nge an awmna chu i hriat?"

"Onoskelis hi tunah hian mihring angin a insiam a, a hming pawh angmah ang chiahin a thlak a ni. Mihring hming a nei, a hming lem chu Jenet-i a ni."

"Chu chu engtin nge i hriat?"

"Thil tam tak experience ka nei tawh...min rin angai.,.Alicem kal phawt teh ang."

"Min bum i tum anih chuan i chak lovang, Dustin."

"Ka bum dawn lo che, engvangin nge nang hi ka bum ngam tehlul ang che ni? Keichu mihring satliah ve mai ka ni a, nangchu vantirhkoh i ni. Onoskelis hian tunah hian ka chhunget a man mek a, chu chu chhanchhuah ka duh. Mahse mihring mai chauh ka nih avangin keimah chauh chuan ka ti thei dawn lo, chuvang chuan nang hi ka rawn pan che a ni." Dustin-a chuan a han ti vel luam a.

Alice-i chu a ngawi vang vang a, "Awle..anih chuan i kal ang hmiang." tiin a tho va, Dustin-a pawh chu a tho ve nghal. Pawnah chuan an inzui chhuak a, "Hei hi ka motor ania, ka phur dawn che nia." Dustin-a bawk chuan a han ti leh a. Alice-i pawh chu a lut ve mai bawk, tichuan car chhungah chuan an lut dun a.

An tlan ta a, "Ka tui a hal hle mai.." tih nuah nuah pah chuan dash board-a mineral water bur hnih chu a la chhuak a, pakhat zawk chu hawngin Dustin-a chuan a in khawlh khawlh a. Pakaht zawk chu Alice-i a pe a, "Kha in ve rawh." a han ti a. Alice-i pawh chuan a lo la ve mai bawk, a rilru ah chuan Bena bak a awm tawh lo, a ngaihtuah takzet.

Tui chu Alice-i chuan a in ve a, a in khawlh khawlh mai. Mahse reiloteah chuan a zawi telh telh a, a meng tha thei ta hauh lo. Chutah a hrethiam ta, tui pangngai a nilo, mutduhna damdawi chak tak a tel ngei a ni tih a hrethiam nghal. Rum zet hian Dustin-a chu a en a, "Nang...nang hi.." a ti thei tawk.

"Shhh....muhil rawh Sichangnei...mut tam i mamawh..i thlawk nasa thei si." tiin Dustin-a chuan a lo nuih suk ringawt. Alice-i chu a zawi telh telh a, a tawp a tawpah chuan nikhawhrelovin a awm ta der mai. Dustin-a chuan Alice-i muhil mek chu enin a nuih suk a, "Keimah leh keimah pawh ka inring zo lo ania, tinge min rin duh awww.." a han ti deuh vawng vawng a.

****************************

Ramhnuai mawng hla tak maiah chuan zinga Alice-i nena inbei chiam, Lasi chu thingkung pakhatah chuan mihring mipa zawl tur zawngin a lo hawi vauh vauh mai. ZAwl lai mek a nei a, chumi nghah pah chuan zawl tur dang a zawng mek a ni. He Lasi hi mizo thawnthu a LAsi kan tih nen khan an inang chiah lova, lasi satliah aiin thiltihtheihna a ngah zawk mai bakah mihring pian chiah chiah a ni a, danglamna a awm lo.

Ramhnuaiah pawh ramhnuai pilril, ram kal te leh feh thinte, ramvak te pawh an kal zen zen lohna khawpa ramhnuai pilril ah an awm tlangpui a, lasi ho zingah chuan he lasi hi a chungnung deuh ber a, a upa ber bawk. Ramhuai chikhat a nih avangin a nunrawng angreng hle a, mahse a ngam loh a tawn tawh erawh chuan tlawm a hreh hauh lo thung.

A vun a nalh em em a, a ngo vur mai. A pian leh a landanah chuan mihring nen danglamna an nei lo, mahse a hmelthat em avangin amah ang em em a hmeltha chu mihringah an awm lo hial a ni. A duhawmin a nuimawi em em a, mitamtak a zawl tawh bawk. A zawl apiangte hi a hne deuh hnuah chuan a that mai zel a, ramhuai lalfanu tih hialin a lasi puite chuan an sawi thin.

A nun a rawng em em a, mihring lakah a sualin khawngaihna a nei ngai lo. Mahse mihring tan chuan hmeichhe itawm tawp a ni a, a pian a nalh mai bakah a sam te chu a dum sei hnap a, a mawng a thleng lek lek bawk. En mai pawhin amah chu a thianghlim sar mai a, mipa mai nilovin hmeichhia thlengin a zawl thei bik a ni.

Chutia a zawl mek a nghah lai chuan a hnute zawn chu a rawn sa deuh vet vet mai a, a phu zuk mai. Rang lutukin a kawr chu a zen nghal a, Alice-i thla hmul pakhat chu a la chhuak nghal vat a. A hmaa hmul var ni si kha, a rawn sen ta vek mai. Chutah Alice-i thil sawi, "Ka mamawh che a nih chuan, he ka thla hmul hi a rawn sen vet vet mai ang." a tih chu a hre chhuak zawk mai.

A en vang vang a, "Ka lalnu, vanchung nula..Lailah-i..Lailah-i'n buaina a tawk, Lailah-i'n buaina  a tawk." a ti chel chul mai. Rang lutukin thingkung atang chuan a zuang thla nghal a, a hlauhthawn hmel kher mai. A maimtichhing vang vang a, choak dum zet maiah a chang a, a thlawk bo ta daih mai a.

**************************

TO BE CONTINUE