KHUAVANG KALLAI Ziaktu : Aaron Malsawmdawngzuala

 KHUAVANG KALLAI

Ziaktu : Aaron Malsawmdawngzuala

*****************

(He thawnthu a hming ka hman, Khuavang Kallai tih hi Pu CFL-a hla atanga ka lak a ni a. Hla thu hming a ni a, tuma phalna ka la lemlo. Mi pawi ka sawi phah emaw, phalloh thil a lo ni anih chuan ngaihdam ka dil lawk e.)

BA Pol.Sc zirlai ka ni a, 3rd semester lai chu ka ni ve tawh. Kum 21 mi ka ni a, pawl 12 ka zirlaia ka bialnu Rinrini tih loh kha chu ngaihzawng dang ka nei leh ta miah lo. Ani lah khan pawl 12 kan pass chhuak dek dek a, midang min neihsan ta daih kha ania. Kan class hi 30 vel kan ni a, kan inpawhin kan innel hlawm hle.

Kan faculty te zingah hian ngainat fak deuh leh ngam fal deuh hi kan nei a, chu chu kan class teacher Miss Zoremi a ni. Department dangte an picnic deuh reng a, a then outing neiin keini class erawh chutiang intihhlimna engmah kan nei ve ngai lo. Miss Zoremi bulah pawh kan chhuah chak ve thute, picnic kan chak ve thin thute chu kan sawi nasa thin hle.

"Kei zawng ka thu lo emai." tih bawk hian min chhang leh thin. Ani tak reng bawk a, Miss Zoremi hi kan luh kum chiah a thawk ve chauh a nih mai bakah tun thleng hian ala nghet lova, thuneihna a neilo ve bawk em a ni. Thu neitute lam lah hian kan class hi min duhsak lo bik amawni, department dangte hian min hmusit bik riauvin ka hre lehnghal.

********************

Tum khat chu Miss Zoremi class kan neih lai chuan, "Field Trip kan nei dawn a, tutu nge kal theilo tur han sawi teh u." a ti ta hlauh mai. School naupang ang maiin kan YES rual dual mai a, kan phur tlang nghal hle mai. Tumah chu hman lo kan awmlo, kan vai mai chuan kal kan chak thu sawiin tawng kan inchuh nghal nuk mai.

Kan field trip neihna hmun tur pawh a sawi a, khawilai nge a nih ka hriat loh mai bakah lui kal ngailo leh ram riak ngailo ka ni bawk a, ka bo hle mai. Thenkhat chuan a hming chu an hria a, mahse an la kal ngailoh thute an sawi nak nak hlawm bawk a. Miss Zoremi meuh pawhin chulai hmun chu a la kal miahloh thu a sawi nghe nghe bawk a, amah pawh a phur tih a hriat khawp mai.

"Kan kawmthlangah hian Bus Driver a awm a, chu chu kan hmang nghal thei ang. Tumah khan rui nawi khawp in zu in lo ula, buaina siam in awm anih chuan kan haw san hmak ang che u." tiin mipa ho chu min han vau nghal tun tun a, kan nui dar dar hlawm mai. Miss Zoremi hi a zau em em a, kan mimal harsatna thlengin engkim kan hrilh ngamna a ni.

******************

Kan kal ni tur a lo thleng ta, keipawh ka in ak puar kher mai. Zan riak tur kan nih avangin Kelkang harhna chhim tur ang maiin kan mutbu te chu bus chungah chuan kan chherchhuan teuh hlawm mai a, kan class mipa ho pawhin um engemaw zat kan pai bawk. Mahse zan khat chiah riak tur kan nih avang chuan kan pai hnem viau lem lo, kei tak phei hi chuan ka in ngai lemlo zawk.

Kan bus driver hi a hming chu Pekhlua a ni a, U Pek tiin kan ko mai a. A thianpa U Siamtea chu handyman atan a hruai ve dawn bawk a, anni pawh an hmel en reng reng chuan zu heh ve tak an ni tih a hriat hle. Kal hma hauh atangin U Peka te thiandun chuan an han in nghal a, Miss Zoremi ngaihdan chu a ni vak lo.

Kan vai chuan Mi 33 kan ni a, kan riahna hmun tur lam pan chuan kan chhuak ta a. Kal tirh lam chuan nuam kan ti hle a, kan phi cheng hlawm mai. Kan zai a, hla kan play a, kan nui a, nuam kan ti tlang ngei mai. Puan in (tent)-a riak tur kan nih avang chuan tent pawh kan keng nual a, driver U PEka te thiandun erawh chuan, "Bus-ah kan riak mai ang." an ti thung.

*****************

Darkar engemaw zah kan tlan hnu chuan kan zia a zawi hlawm ta hle a, a then chu an muhil a. A then lah motor an rui bawk a, kal lam nen chuan kan inang lo hlawm ta khawp mai. Kei erawh earphone vuahin hla ka ngaithla a, motor ka rui ve ngai lemlo bawk nen hrehawm tihna ka nei hran lo.

Kan thleng har chu ka ti angreng hle a, driver te pahnih lah chu an titi tui dun nasa mai a. An titi pah chuan zu an in dun deuh sek lehnghal a, kan accident phah mai ang tih pawh ka hlau rilru hle mai. Kan class ami hmeichhe pakhat Rosy chuan, "Miss, kan van thleng har tawh..hei chawhnu a ni der tawh ania." tiin ava zawt a.

"Kan thleng tep ang." tiin Miss chuan a lo chhang mai a. Mahse darkar khat dawn kan tlan leh hnu pawh chuan kan la thlen loh hmel khawp mai, "Peka, kan thleng tep tawh em?" tiin Miss chuan ava zawt a. "Thleng tep e." a lo ti mai a, a meng mang tawh lo a ni ber. An thian dun chuan an nui tiah tiah mai a, Miss Zoremi pawh a hmel atang chuan a lungngawi viau tawh lo tih chu a hriat reng.

****************

REi deuh fang kan tlan leh hnu chuan bus chu a ding a, "A dik em le?" tiin driver ber chu a hawi ta hu hu mai. A thianpa U Siamtea lah chuan, "Ka hre nang, nangman i hria a ni lawm ni?" a lo ti vin hlur a. Keini lahin kan hre der mai silo, "Helam hi ni dawn tak e." tiin kawng veilam pengah chuan a tlan chhunzawm lehnghal a.

Darkar chanve vel hnuah chuan a ding ve ta, "Kan thleng e." tiin U Peka chu a han au deuh vak a. Midang muhil te pawh chu an rawn harh a, bus atang chuan kan chhuk liam liam hlawm a. A hmun chu a nuam viau nang a, a dur deuh khup hian ka hria. Lui lian lemlo tak hi a lo awm bawk a, a boruak a thiang nuam viau nanga a nelawm lemloh khawp mai.

"Hei hi a ni tak tak amaw?" tiin fiamthu titih deuh chuan Miss Zoremi chuan U Peka chu a han zawt a. Ani lah chuan fiah mang hlei lo hian, "Hria e...kan kal fo alawm." tiin a lo chhang mai a. Kan riahna tur puan in te chu kan han siam zung zung hlawm a, sana ka en chuan tlai lam dar 3:30 a ri der tawh.

"Lang a kal ni phei ila chu zanrei ah chauh kan thleng dawn nih hi.." tiin Miss chu a phun deuh nung nung a, mei te chhemin rawng kan bawl tan nghal vat a. Mipa thenkhat ho chu lui bula ramhnuai deuh lam chu an pan nghal sap sap a, kei leh ka thiante erawh chuan hmeichhe ho chu kan pui thung a.

A zual pui kan tih zawh pui hnu chuan keini pawh chuan kan han thli ve tan ta a, motor chuan chhung rei bawk nen, kawng a lo kham tawh bawk nen, no khat naah pawh chuan ka zia sawng sawng hialin ka hria. Kai phelh phawlh a kan in hnu chuan kan va let leh a, khua pawh a thim ve tan ta.

Chaw ei dawnah chuan Miss chuan min han chhiar den den a, driver te pahnih tih loh chu kan kim thap. Chaw chu kan ei ta a, ril a tam bawk nen, lo kai ve deuh chhawlh bawk nen, ka ei hnem ngang mai. Chaw eikham hnu chuan kan titi a, kan hlim tlang dar dar hle mai. Chutih lai chuan kan driver U Peka chu a rawn phei a, "Peka, in ei puar maw?" tiin Miss chuan a lo zawt vat a.

"Puar e, ka va inthiar lawk alawm le...Siamtea kha a lo kal ve amaw ka tia.." tiin kan bulah chuan a rawn thu ve a, "Kal nang...bus ah a awm aniang chu." tiin Miss chuan a lo chhang a. Mahse U Peka chuan, "Bus ah pawh ka rawn en a, a awm lo." a ti ta tlat mai. "Aaa..khawiah emaw a kal lawk aniang, a ngaihtuah awm lovang." Miss chuan a lo ti leh a.

Thianpa Rova chu a han ding deuh thut a, "A hrim hrimin khawiah nge i inthiar a, U Pek? Ramhnuaiah hian kan e tawp dawn tihna mi? Toilet te a awm lo ami?" a han ti deuh hu a, kan nui deuh huk mai. "Saw tah sawn ekin a awm, mahse a hla deuh hlek. Mizo ekin ang kha ania, mawng silna hranpa a awm velo ania." tiin U Peka chuan a chhang a.

"Hawh teh Valte, min va ek pui teh." tih leh ka hnungah chuan a han beng dawt a. Keilah ka la titi tui bawk nen, "Ka peihlo, midang sawm mai rawh." ka lo ti vin hlur a. "Awww...va kal pui rawh Vala...amahin a kal ngamlo a nih kha." nui chung chuan Miss Zoremi chuan a lo ti a. Peihlo tak chung chuan ka tho a, ka va kalpui ta a.

**********************

Kan puan in zar awmna atanga ek in chu a hla ve angreng tak khawp mai, ka va hawilet leh pawhin kan meichhem eng ve ve bak thildang ka hmu thei lo. Rova inthiar chu ka nghak ngat ngat a, "Hey Vala, ilo kal daih ange aw....min nghak char char ang che." a la ti sek zui. Ka nghak pah chuan meizial ka zu a, a la e rei em em lehnghal.

Ka phone ka han phawrh a, signal chu a them pawh a awm lo. A thim em em mai a, a reh hian a reh diak mai bawk. Lehlam kawng zawng tak chuan chu kan riahna tur hmun chu a nelawm loh hle mai, zep lo chuan engemaw taka hlauhna ka nei tlat hian ka inhria. Minute 10 vel hnuah chuan Rova pawh a e kham ta, "Ava han t(r)awp mai mai tak." a rawn ti chhuak nuah nuah a.

Kan meichhemna lam kan pan leh mek lai chuan Rova chu a ding deuh thut mai a, "Hey, tinge i din a?" tiin ka zawt vat a. Lui ral lehlam ngaw thim khup lam chu a kawk a, "Tah sawn mihring ang deuh, lian pui mai kal phei fua ka hmu." a han ti ringawt a. Ka nui huk ringawt, "Zawnga, min tihthaih tum khanglang lo mai teh." ka han ti a.

Mahse a thutak hmel phian mai, "Ka ti tak tak alawm, thingkung phenah sawn a bo leh daih." a han ti leh a. Ral leh lam chu ka va en a, a thim em avang chuan thingkung buk tak tak bak engmah ka hmu thei lo. "I hmusual aniang...lo kal rawh...Miss in min ngaihtuah ang...kal ang." tiin ka sawm leh a.

Ani pawh chuan a lu a hiat nauh nauh va, "Nia ani maithei, ka hmusual aniang." tiin min zui ve leh mai a. Kan va thleng chu an lo la thu thap hlawm a, "Siamtea chu in lo hmu mial em?" tiin U Peka chuan min lo zawt a. Kan hmuh loh thu ka hrilh chuan, "Ava mak ve..khawnge maw a awm daih ang le?" a ti nuah nuah mai a.

"Bus ah a awm aniang...va en rawh." Miss chuan a han ti leh a, "Nia, a lo let leh tawh anga...bus ah min lo nghaka aniang." tiin a tho va, bus awmna lam chu a pan a. Kan han titi leh deuh luam hlawm a, hmeichhe thenkhatte erawh chu an mu der tawh. Dar 11 a pelh hnu chuan Miss Zoremi pawh chuan, "Khai le...i mu tawh ang u. Naktuk chawhma lamah haw ngei ngei a ngai dawn sia, in chau lutuk ang. Kawng a thui si....Vala, zu kha in hnem su aw.." a han ti a.

*********************

Mut pawh a chhuak ve tan ta, thu awih tak chuan kan mutna lam chu kan pan ta a. Kan class ah hian inngaizawng an awm a, Famkima leh Estheri te an ni. Ka lo rinlawk ang ngeiin dar 1 bawr velah chuan thawm ka hre ta a, keilah mengrei chi ka lo ni bawk nen. Hmeichhe ho riahna lam atanga thawm ri rak rak chu ka hria a, hawkdak tih takah ka han bihthla hram a.

Tent atanga Estheri rawn chhuak ru zal zal chu ka hmu a, Famkima chuan lehlamah a lo nghak ran tawh bawk. Ka nui deuh huk nghe nghe, an pahnih chuan thawm dim takin hmun biru lamah an kal phei ta a. "Mi chance nei lai lo bihthlak tum talh, a luck loh thlak emai." tia mahni hriat tham leka phun nuah nuah chung chuan ka mu veleh ta mai a.

Ka muhil tan dawn tih ah chuan hmeichhe mangang au thawm chuan min ti harh hlawl mai, rang takin ka tho va. Mipa dang ho pawh chu an lo harh ve a, kan puan in atang chuan kan chhuak nghal deuh sup sup a. Miss Zoremi pawh a rawn tho chhuak ve a, "Enge a? Engthil nge?" a rawn ti nghal chiam chiam a.

"Au ri ka hria, hmeichhe au ri.." tiin thianpa Sangtea chu tlai khaw hnuah a rawn ri chhuak ve ang buan buan a. Miss chuan min han enkual hlawm a, "Lo chhuak vek rawh u....tunge kimlo awm che u.." tiin min ko chhuak ta vek hlawm a. Mahse min chhiar hma chuan, "Miss, Famkima leh Estheri an awm velo." ka lo ti nghal vat a.

Miss Zoremi chu a mangang ta hle mai, "Awi ava han buaithlak tak...khawnge maw an lo kal hman daw daw le.." tiin a lung nilo kher mai. "Miss, kan zawng mai dawn mi?" Sangtea chuan a lo ti ve bawk a. "Kan vai chuan kal lovang, Vala..Rova nen khan driver te kha va ko teh u..hetah kan lo nghak ang che u." tiin Miss chuan min tir a, Rova nen chuan bus awmna lam chu kan va pan nghal a.

***************

Bus awmna leh kan riahna hmun pawh hi a inhlat angreng hle a, kea kal kan ni bawk a, phei ve deuh vang vang a ngai a ni. Bus awmna chu kan va thleng ta, "U PEk...U Siamte..." tiin kan thlen hma hauh chuan kan au nghal vak vak a, an muttui deuh nge ni, tuman min chhang lo. Mak tak maiin bus kawngka chu a lo inhawng a, Rova nen chuan kan in enhu ringawt.

Kan va pan hnai zel a, chutah kan ding chat mai. Bus chhung luh chhohna step ah chuan thisen hi a lo luang kawi zun mai a, "Ehe thisen.." tiin Rova chu a t(r)e thawt mai. Kan han ngawi dun vang vang a, bus chhung atang chuan engemaw thawm, ri deuh hrup hrup hi a awm tlat. KA sawithiam dan ber chuan ui riltam takin chaw a hap ri bawrh bawrh hi a ang ber mai, eng tak chu thleng nimaw tiin ka inngaihtuah a.

Muang chang chuan kan lut chho dun a, bus chhung chu a eng ut lehnghal a. Chuta kan thil hmuh chuan min va ti hlau chiang tak em, ka hik chhuak vek hialin ka hria. Seat hnung lamah chuan U Peka chu a lo mu meng kuau mai a, thisen tamtak a lo baw nuai bawk. Chu mai ala nilo, a chungah chuan mihring ang tak, lian em em mai si hi a lo bawk run bawk a nih chu.

Hmeichhia a ang em em a, mahse min hnungchhawn avang chuan a hmel kan hmu thei lo. U PEka pum chhung chu a lo inhawng huau a, chu thil mak tak mai, mihring ang tak mai chuan U Peka chu a lo ei mek tihna anih chu. Hmeichhia ang chiahin sam a nei a, saruak vekin a awm a. A hnungzang chu a tle hlurh mai a, a dum ang khup lehnghal.

Rova chuan ring tak hian, "Ekhai...nilo..ani theilo." tiin a mengphar nghal awn awn mai a. Chutah le, chu ramsa mak tak mai chuan kan thawm a hre ta. U PEka pum chhung, a hap rik bawrh bawrh lai chu a tawp chat a. Muangchangin kan lam a rawn hawi ta mai a, ka va han rap tak em. A hmel rapthlak zia kha, kan hma zawn takah chuan thingthi in min rawn melh ta run mai a.

Mak tak a ni, mihring hmel pu tho si hian zawng a ang em em lawi bawk si. Eng thil pawh chu lo nise, anu(female) a ni ngei ang. Mihring ang chiah in kut leh ke a nei ve a, mahse a kuttin te chu a hriam em em thung. Ramsa anih chuan ramsa danglam tak chu a ni ngei ang, enge a nih ka hrelo. Ka vawikhat hmuhna a ni, a ngur chhur chhur lehnghal a.

A lian em em a, a hmelchhiat zia chu sawifiah thiam a har zawk hial. U PEka ril chu a lo la pet uai duai mai lehnghal a, thisen a far tluk tluk mai bawk. Ka rap lutuk chu ka lu a hai dawn hialin ka hria, "Hey....tunge i nih?" tiin ka han vin ngawt a, a lungawi loh hmel kher mai. Rova hlau lutuk chuan, "Chhuk rawh...tlan ang...tlan ang.." tiin min nam chhuak rawk rawk a.

Lei ah chuan ka bawk thla thlawp mai, Rova chuan kawngkhar chu a khar a. Min kai tho a, "Tlan ang.." tih leh tlan a rual a, rang takin ka um nghal a. Mahse kan hma zawn takah chuan bus-a kan hmuh ang tho, kha hmeichhe mak tak mai kha a lo ding leh run mai a nih chu. Au pawh kan au thei lo, khawilam nge kan pan pawh hrelo chuan kan tlanchhe dun ta chiam mai a.

***********************

Thawm a reh deuh hnuah chuan thingkung phenah kan biru a, kan thaw hlawi hlawi mai. Rova chuan hlau tih hriat tak hian, "Eng...eng thil nge? Kha kah eng thil phiangsen nge?" a ti vak vak mai a. A hmuiah ka hup sak vat a, "Bengchheng suh...ka hre biklo..bengchheng lo phawt mai teh, kan awmna an hria ange." tiin ka khap vat a.

Hlauh avanga khur zawih zawih chung chuan Rova bawk chuan, "Val...kha kha enge? Mihring nge ramsa? U Peka...U PEka kha a ei ania.." a ti leh hluam hluam a. "Ka hria, thawm dim rawh...keipawn ka hlau, mahse bengchheng suh. Thawm dim tak zel khan min rawn zui rawh aw, engmah bengchheng siam suh ang che." tiin ka kai tho va.

ZAwi muang chuan kan kal zel a, mahse khawi lai nge kan awmna erawh ka hre ta hauh lo. Kan thiante awmna lam panna kawng pawh kan hre ta hauh lo mai, kan hmazawnah chuan kan kal ta tawp mai a. Midang han au vak dawn ila, kha hmeichhe mak tak mai khan kan awmna a hriat phah ang tih ka hlau bawk si.

********************

Chutia thlapang taka kan kal zel lai chuan thingkung pakhata mi pakhat lo thu kun ngul mai chu kan hmu a, kan ding leh chat mai. Rova chuan, "SAw saw....U Siamtea ava ang ve...han en chiang deuh teh." a ti a. Hreh rilru tak chuan ka phone flashlight chuan ka han en chiang a, U Siamtea ngei a lo ni.

Kan va pan hnai a, "U Siamte...U Siamte.." tiin ka han kova, mahse min chhang miah lo. "U Siamte...i muhil ami?" tiin Rova chuan ava pan hnai a, a han sawi vak vak a. Chutah le, U Siamtea kawr hma ah chuan thisen a lo kai nuai mai. "Ekhai.." tih pah chuan Rova chu a rawn zuang tho rang ngei mai.

Chuveleh leiah chuan U Siamtea chu a thal tual a, a pum a lo kaw huau mai. Ka rap lutuk chu ka uak thawt mai a, Rova phei chu a tap pur mai. Chu veleh kan hnung lam atang chuan thawm mak tak, sakei thinrim rum chhur chhur ang tak mai chu kan hre leh ta. Muang chang chuan kan han hawi a, KAREI...kha ramsa mak tak, hmelchhe zet mai kha a lo ding leh run mai a nih chu.

Kan ding ngil nghal zawt mai, chu sakawlh rapthlak tak mai chu bus-a kan hmuh ang kha nitho mahse chhete in a sang zawk a, hmul a ngah zawk bawk. Chutah ring em em mai hian a hram vak vak a, sakei baknei hahum ai mahin a ring zawk lehnghal. Kan rap lutuk chu ka t(r)e teng tung mai a, chak mangkheng chuan kan tlanchhe dun ta chiam mai.

Min rawn um ngei  ani tih pawh ka hria, a rawn rum phei nghut nghut mai a. KA hma zawn pawh ka enchiang hman tawh lo, hnim ka su phei deuh pawp pawp hi a ni ber mai. Chuta karah Rova nen chuan kan la inhloh zui a, khawi lamah nge a tlan ka hre ta hauh lo mai. Mahse ngaihtuah hman ka ni tawh lo, ka tlan zel a.

Mak tak maiin kan riahna lam ah ka chhuak hlawl mai a, engtia chhuak hlawl nge ka nih pawh ka hrelo. Mahse ka thil hmuh erawh chuan ka manganna a ti zual mai chauh a ni, kan tent bulah chuan ruang 5 lai ka hmu ta tlat mai. An thi phung hlawm a, a then an ril a chhuak pur hlawm mai. Ka mangang, hlau bawk si chu mipa e tilo chuan ka thingthi a, ka tap ta tawp mai.

Chung ruangte chu tudang nilovin ka thiante, kan class ami te vek an ni. Hruaia, Andrew-a. Sangsangi, Opa leh Zualtei te an ni. Mahse khawnge midang zawng an awm tak erawh ka hre hauh lo, kha ramhuai mak tak tak te thil tih vek kha a ni tih chu sawi nawn a ngai lo. KA rindan chuan Rova nena Bus lam pana kan kal hlan khan khang ramhuai sualte khan kan thiante chu an lo tibuai anga, heng mi 5 te hi an that hman anga, a bak zawng chu an tlanchhe darh a ni ngei ang.

Miss Zoremi ber pawh khawnge a awm ka hre der mai silo, engtin nge ka awm tak ang tiin ka rilru a hah kher mai. Ka awmna lai hi khawi hmun nge a nih ka hre der mai silo, he hmun atang hian damin ka chhuak bik dawn hauh lo tih chu ka ring nghet bur tawh a ni. Phone ka phawrh leh a, signal pakhat mah a awm der mai silo.

******************

"Min pui ruuu....min tanpui ruuu..." tiin ka han au vak vak ringawt a, mahse engmah awmzia a nei hauh silo. Mittui tla phung chuan ka tlan leh ta ngat ngat mai a, mahse khawilam nge ka pan dawn pawh ka hre bik chuang lo. Chutia ka tlan zel lai chuan tu emawni nen hian kan insu pawp mai a, kan thal dun tawp mai.

Rang takin ka tho vat a, ka bula thing tum chu ka la lawk a. Vuak tumin ka han lek kang vut a, Estheri a lo ni reng mai. Ka thing ken lai chu ka thlah nghal a, "Esther..nang maw?" ka ti a. Esther-i chuan min hmuh veleh chuan min kuah nghal a, "Val...ramhuai...ramhuai..Famkima an that." tiin a tap nghal char char a.

"Ka hria alawm, ka hria...keipawn ka hmu alawm." ka lo ti vat a. "I hmu ve maw? Khawnge a awm? Khawnge Miss te? Khawnge midang?" a ti leh nghal chiam chiam a. "Esther, bengchheng suh. Keipawn khawnge an awm ka hre biklo...bengchheng suh. Kan awmna an hriat phah ange...engthil nge thleng han sawi teh." tiin hlau ve tho mah ila, ka thiam ang tawk chuan ka thlamuan hram hram a.

A awm a dawm vawng vawg a, a chil  ahan lem dawk a. "Ih...chance nei tur khan kan chhuak ru a. Ihh..kan..kan inkiss laiin ramsa mak deuh, mihring pian ang tho nisi...dum zet leh hmul ngah zet, sam nei ve tho si, lian em em mai hi a lo kal a. Chuan...chuan, Famkima a rawn seh a..." a sawi zawm thei lo, a tap hawm hawm mai.

Ka kuah a, "Esther, tap tawh suh. Min ngaithla teh..helai hmun atanga nung dama chhuah i duh anih chuan ka thu zawm zel rawh aw...bengchheng lo la, thawm dim takin min zui zel ang che." tiin ka hnem leh a, ani pawh chuan  alu  abu nghat nghat a. Mahse ka han sawi ve ngawt a, dama kan chhuah erawh Esther-i ai pawhin ka inring lo zawk hial ang.

Kan kal tur chiah chu kan hma takah chuan kha sakawlh maksak leh rapawm zet mai, kan sawi zawh chauh chu a rawn lang leh ta. Esther-i chu a au vak a, ka hnungah chuan biru in ka kawr a pawt nghal a. Thing chu ka chhar a, "Hey...lo kal suh. Anih loh chuan ka vaw hlum ang che...thlawk bo rawh.." ka han ti ve ngawt a.

Mahse min rawn pan hnai zel a, a chilthli a uai duah duah mai. Chutah a hnute kar atang chuan rod a rawn lawr zawk mai a, a au ring ngei mai. Ramhnuai khawk rum rum khawp chuan a au t(r)e ruai ruai mai a, a rapawm chiang a ni. Lehlam khamah chuan a  awm zawna rod bur va chung chuan a zuangthla daih mai, min chhantu chu tudnag nilovin Miss Zoremi a lo ni reng mai.

"Miss.." tiin Esther-i chu a tap a, Miss Zoremi chu ava kuah nghal a. "In tha em? Vala...i tha maw?" a ti a, Miss Zoremi alo la dam tih ka hriat chuan ka thaw huai mai. "Ka tha e..Miss...i tha zawk maw?" tiin ka zawt ve a. "Ka tha e, kha ramsa kha engthil nge? Khawnge Rova a awm?" tiin min zawt leh a.

"Ka hrelo, Miss...engthil nge a nih ka hrelo. Tun lawk khan Esther-i nen hian kan inhmu a, khawnge Rova a awm pawh ka hrelo. Miss, khawnge midang?" tiin ka zawt veleh a. "Khawnge an awm ka hrelo, kha ramsa kha a lo kal a, kan tlan darh vek a. Rod bung ka chhar a, in thawm ka hria a...ka rawn hmu ta che u a nih kha...enge thil thleng hi awmzia ka hrelo. Esther, khawnge Famkima?" tiin Es-i chu a zawt a.

Tap chung hian Esther-i chuan, "A thi...ani pawh.." a ti hluam hluam mai. "Aww...avan pawi tak. Helai hmun hi kan kal tumna hmun kha  anilo aniang, driver te khan kawng an hai a ni ngei ang." tiin Miss chuan a lu a dawm vawng vawng mai. "Miss, engtin nge kan awm dawn? Enge kan tih ang?" tiin ka zawt ta tawp a.

"Ka hre biklo, signal engmah a awm bawk silo. Hawh teh u, i kal zel phawt mai ang u." tiin kan pathum chuan kan inzui ta a, a hmasa berah ka kal a, a hnuhnung berah Miss Zoremi chu kalin Esther-i chu a laiah kan kal tir thung a. "Miss, a thi tawh ang tiraw? Kha ramhuai kha.." a han ti leh a.

"Pakhat chauh a nilo, pakhat aiin an tam." ka lo ti vat a. "Engmah sawi tawh suh u, thawm neilo thei ang bera kan kal angai ania." tiin Miss chuan min lo khap vat a. Kan kal zel a, a thim bawk nen. A reh em em mai lehnghal a, thereng hram ri a awm leh zauh zauh chauh a ni. Midang ho zawn hmuh ai mah chuan engtin nge helai hmun atang hian nung dama kan chhuah ang tih chu ka ngaihtuah zawk mah a, rilru a hah duh kher mai.

*********************

REi fe kan kal hnu chuan bus kan dahna hmunah kan chhuak ta hlawl mai, "Ehe, saw bus...a chhungah sawn kan him ang. Hawh u, kal vat ang u." tiin Miss chuan Esi nen chuan min pawt dun nghal dawr dawr a. "Lawk aw Miss, U PEka a that...bus chhungah sawn.....ala awm maithei asin." ka lo ti nghal vat a.

"Peka a that maw?" a ti hu mai. "AW...kha thil khan U PEka a that a, chu chu Rova nen kan va hmu alawm. Kan tlanchhia a, khawilamah nge a tlanchhiat ka hrelo." tiin ka chhang leh a. Miss Zoremi chu a han ngawi vang vang a, "Umm....a awm tawhlo maithei asin. Hawh u, va pan leh phawt ang." a ti a, hreh tak chung chuan bus lam pan chuan kan kal leh ta a.

A bul kan va thleng a, bus kawngka chu a hma ang bawk chuan a lo inhawng leh huau mai. Ka thing ken chu a han hum nghet zual sauh a, bus chhung chu ka han bih leh dek dek a. Vanneihthlak takin U PEka ruang tih loh chu tumah an lo awm lo hlauh, "Miss, lo lut ru...tumah an awm lo." ka ti a.

Esi leh Miss Zoremi chu an lo lut a, U PEka ruang, ril chhuak pur mai Esi'n a hmu chu a au vak mai a. "En suh u, Miss...ruang hi pawnah ka'n dah ange." ka ti a, hreh tak chung chuan U Peka ruang chu bus hnunglam kawngka atang chuan ka dah chhuak a, kawngkhar chu ka khar lehnghal a.

***************

Khua ava han var har tak em, sana ka en a, dar 3:12 chiah chiah a ni. "Hetah hian khawvar kan nghak mai dawnnia, khua a var anga, tanpuitu chu kan hmu mai ang." tiin Miss chuan min hnem dun mawlh mawlh a, mahse ka thla erawh a muang hlawl lo a ni. Chutia ngawi renga kan awm lai chuan kan chuanna bus chu a rawn ri dawt mai a, ka va han phu chiang teh kher em.

Rang takin ka zuang tho nghal a, mahse kan thian dangte, mi 5 vel an lo ni hlauh mai. Bus kawngka chu hawn tumin an lo pawt vak vak a, a thenin an rawn beng bawk a. Miss chuan, "Vala, hawnsak vat rawh." a han ti a, ka hawnsak ta a. Francis-a, Kimkimi, Fela, Nancy leh Mamuani te an ni.

Francis-a chuan, "Lut ru lut ru....hmanhmawhin.." tiin midang ho chu a luh tir hlawm a. A rawn lut ve tur chiah chu kha sakawlh bawk kha lo kal leh in Francis-a chu a rawn zuan thut mai a, mau hmun lamah chuan a pu lut leh ta daih mai. "Nilo...Francis.." tiin Miss chu chhuah ve a tum a, mahse kan lo dang a.

Hmeichhe ho chu an au tuar tuar hlawm a, kawngka chu ka kalh nghal vat a. An chiai hlawm ngei mai, hmeichhe thenkhatte chu an inkuah a, an tap hawm hawm bawk a. "Engthil nge kha kha...a rapthlak lutuk...ka hlau emai.." tiin an rak nawk nawk hlawm a, engmah sawi ve theih pawh a nilo, an au chel chul hlawm mai.

****************

Boruak a reh leh deuh hnu chuan kan ngawi thiap hlawm a, "Rova in hmu em? Tu emaw tal khan Rova in hmu em?" ka han ti a. An inmelh hrek hrek hlawm ringawt a, "Kan hmu miah lo." tiin Fela chuan min rawn chhang a. "Engthil chiah nge thleng hi?" tiin Nancy chu a mittui a tla phung mai.

Miss chu a ding a, "Ngaithla rawh u, tuman bus hi chhuahsan loh tur. Zun chhuak in awm a nih pawhin bus chhungah hian in zung mai tur a ni, tumah chhuak suh ang che u." a ti a. Kimkimi chuan bus steering lam chu ava en a, "Miss, saw chahbi a awm." tiin a kawk a. Chuveleh Miss chuan, "Bus khalh thiam in awm em?" tiin mipa ho chu min zawt a.

Mahse tumah bus khalh thiam reng reng kan lo awm hauh lo mai, kan beidawng tlang a ni e. Chutia kan reh thiap lai chuan mangang au thawm ri kan hre leh ta, tukverh ah chuan kan dak nghal thap hlawm a. Rova, ka thianpa...ka best friend ngawih ngawih chu kha thil bawk khan a lo veh mek a nih chu.

"Rova...Rova...nilo.." tiin ka au vak vak a, chhuah nghal ka tum a. Mahse Miss chuan min dang a, "Nilo, chhuak suh....tumah chhuah loh tur ka tih kha..." tiin min man bet tlat mai. Midang pawh chuan chhuak lo turin min ti hlawm bawk a, mahse ka thianpa mangang taka a awm lai leh a thi mai tur chu ka en mai mai thei thlawt lo a ni.

"Nilo Miss, chhan tum miah lova ka thianpa thi tur hi ka hmu theilo a ni. Min ngaidam rawh, Miss." tiin ka nam vak a, kawngka chu hawngin ka chhuak ta a. Chu sakawlh sual chu pakhat mai a lo ni awzawng lo, pathum lai an lo ni. Ka ding leh chat mai, ka khur chhe lehnghal der mai a, ka thlan a tla zawih zawih mai.

Pakhat chuan Rova chu a han zuan thlu tawp a, a chungah chuan  abawk vang mai. Pahnih dang chuan a sirah an lo dinchilh a, a chilthli a tla duah duah bawk a. Hmanrua lah chu engmah ka keng der mai silo, "Thianpa, ka lo kal e." tiin thih leh thih tiin ka va pan ve ta tawp a. Rova banah chuan a seh ta, "Ana...ana lutuk." tiin a rak tuar tuar a.

Hmanrawn dang nei hek lo le, lung ka chhar a, ka va pan hnai zel a. Ka vawm tak vak vak ringawt a, an pathum chuan an rawn hawi rual thap mai. Chutah Rova chu an thawh san a, an pathum chuan ka lam an rawn pan ta mai a nih chu. Duhthlan tur dang ka nei lo, ka tlan let leh ta ringawt a.

Mahse rei pawh min um lo, pakhat chuan min rawn zuan thlu tawp a. Mahse engtin mah min ti zui lo, min kal kan leh daih a. An pathum chuan bus lam chu an pan ta a, bus hma takah chuan pakhat chu a han thu vang mai a. DArthlalang chu a chum ta vak vak mai, a dang pahnih te chu bus chung lamah chuan an lawn chho bawk a.

Ring taka auvin, "Lo chhuak rawh u, lo tlanchhuak vat rawh u..." tiin a rak hian ka rak vak vak a ni ber mai. KAWngka lah chu an la hawng thei lawk lo zui, chutah bus hma darthlalang chu pakhat chuan a chum keh ta nge nge a, rang takin a zuang lut nghal. KAwngka pawh chu an hawng ve thei nghal hlauh a, mahse an tlai mah mah a ni.

Miss Zoremi, Kimkimi leh Fela te chiah an rawn tlanchhuak hman. Midang zawng chu chung sakawlh rapthlak tak te chuan an luhchilh a, bus chu a nghing luih luih mai a. Tukverh darthlalangah te chuan thisen a per chuai chuai a, ava han pawi zozai tak em. Miss Zoremi leh Kimkimi te chu Fela chuan a rawn kai phei dawr dawr a.

Rova lo let reng chu kan va buapui a, "Rova...Rova..thianpa, i tha em?" tiin ka sawi vak vak a. Rova chu a then chawk chawk mai, "Ka ban...ka banah a seh...ana lutuk." tiin a ban chu a dawm vawng vawng a. A ban kan han ensak chu a lo hek huam mai, thisen chu a chik hian a chik zawr zawr bawk.

Harsa tak chuan kan kai tho va, bus lam kan va en leh chu a lo reh leh ta diak mai. "Ehe, khawnge an awm?" tiin ka hawi kual a, thawm chu a reh leh ta diak mai. Chutah sakawlh rum ri chher chher ri ang mai chu kan hre leh ta, kil khat atang chuan pakhat chu a rawn lang leh ta thut mai a, Fela chu a rawn zuan thlu nghal tawp mai.

Kimkimi leh Miss Zoremi te chu an t(r)e tuar a, Fela chu a bawh run mai bawk a. Thing bung ka han zawngkual leh te te a, a tawpah chuan lian lemlo tak pakhat chu ka hmu fuh hlauh mai. Ka vaw ta chiam chiam mai a, mahse na ti awm ang pawhin a lang lo. FEla chu a seh vak vak a, a ei leh ta mial mial mai.

Fela chu a thi chiang hle mai, ka vuak lai pawh ka tawp nghal hmak a. Chutah ka lam a rawn hawi a, min rek a. Leiah chuan min thehthla thum dawt mai, ka dar ah chuan a rawn seh a. Ava na chiang kher em. "Min chhan ru.." tiin a au vak vak a, ka thing ken lai hmang chuan ka indang hram hram a.

Midang pahnihte pawh chu an rawn lang leh a, ahmaa Rova an chan ang bawk khan ka sirah chuan chilthli tla duah duahin min lo chang ve leh ta ran mai. Miss Zoremi leh Nancy te erawh khawnge an awm ka hrelo. Chutih lai chuan Rova chu a rawn au vak a, "Hey...nangni sakawlh hmelchhe ho..." a rawn ti vak a.

Min beih lai pawh an tawp chat hlawm mai, Rova chu an va en thap mai. Rova chu tent bulah chuan a lo ding a, khawnvar tui bur, meichhemna tura kan pai chu a lo keng ran bawk. Kan puan in chu  a han thehkual thawt thawt hlawm a, "Lo kal ta che u, min rawn ei ta che u." a ti ta mai a.

"Rova...enge maw i tih le?" tiin ka au vak vak a. Rova chuan min rawn en a, "Ka tihpalh thianpa, kawng dang a awm lo a ni. Miss Zoremi leh Kimkimi te kha hruai haw ang che, mangtha aw thianpa.." tiin amah pawh chu khawnvartui chuan a inleih a. "Mawla, ti suh..." tiin thawh ka tum a, mahse ka ban leh ka ke a hliam avang chuan ka tho thei silo.

An pathum chuan Rova awmna lam chu an va pan a, Rova chu zawimuang chuan tent chhungah chuan  a lut a. Lighter a phawrh a, "Rova..nilo..ti suh." tiin ka au lawm lawm a. Miss Zoremi leh Kimkimi te pawh lo tlanin min rawn kai thova, "Miss Rova saw....inthah a tum ania..va dang rawh u." tiin ka tap pur tawh mai.

Mahse dan a hnekin keimah zawk chu min dang zawk a, ka mangang kher mai. Chutah an pathum chuan Rova chu an luhchilh ta a, "ZAwng ho...thi rawh u." tih chu Rova thil sawi ka hriat hnuhnung ber a ni. Tent chu a alh ta hluah hluah mai a, chung sakawlh ramhuai ho chu an rak nasa kher mai.

***************

Khua a var meuh chuan zing dar 5:15 vel a ni tawh a, kei leh Miss Zoremi leh Kimkimi te chuan kawngpui kan thleng chho thei ta. Ka ke na bawk si leh ban na bawk si chu ka hah in ka chau kher mai, Rova ngaihtuahin ka la tap bang hlei thei lo a ni. Reiloteah chuan pick-up pakhat hi a lo tlan a, kan lo phar ding a. Pa pakhat kum upa lam tawh leh tlangval niawm tak pakhat hi an lo ni a, mak min tih hmel kher mai.

Kan thil tawn te, kan thiante ruang zawng zawng pawh lui bul lamah an la awm thute chu kan hrilh a. An awih hmel loh loh viau nangin thisen kan kai deuh nuai avang chuan mak chu an tih hmel kher mai, "Awle, midang kan han ko hlawm anga....nangni chu hetah motorah hian lo awm hahdam rawh u." an ti a.

Pick up hnungah chuan kan chuang a, kei phei chu ka mu thlawp mai. Thlifim thaw heuh heuh chuan min chhem harh sawng sawng a, ka hahdam huai thei hialin ka hria. Min pui tute chuan midang an phone kual a, chutih lai chuan an motora radio ah chuan Pu CFL-a hla, KHUAVANG KALLAI tih chu a lo inplay ri rat rat a, ka muhil ta siai siai mai.

*****************

A TAWP TA.