A HANDSOME CREATURE - 3 (BROKEN OUT OF LOVE) Written by : Aaron Malsawmdawngzuala

 A HANDSOME CREATURE - 3

(BROKEN OUT OF LOVE)

Written by : Aaron Malsawmdawngzuala

****************

A hlawk thawkhat tawh nia a inhriat hnuah chuan Pu Rama lui kal pawh chuan haw zai a rel ve ta a, sangha pawh a man hnem narawh e. Pu Rama hi kum 56 laia upa a ni tawh a, a nupui Pi Liani nen chiah an khawsa a ni. Fa an neih theihloh avangin zawhte pakhat an vulh ve a, an pathum chauh chuan rethei takin an khawsa ve tawk tawk a ni ber mai.

"Tun tum chu rin aiin ka man hnem hle mai, a daih pawh kan daih rei viau ang." tiin hlim tak chuan a faifuk hlarh hlarh mai a, a motor tawng ve tawh tak lam pan chuan a inkhai chho hnup hnup mai a. A indah fel hnu chuan kal mai a han tum a, mahse mihring rum ri tuah tuah niawm tak hi a hre tlat mai.

Kal mai lo chuan thawm lo chhuahna lam chu panin lui lamah bawk chuan a chhuk leh a, a han hawi kual a. Mahse rei fe a enkual hnuah pawh tumah a hmu tlat lo, "Awm in awm em?" tiin a han au ngawt a. Chhangtu tumah an awm tak silovah chuan a bengchhe ri mai mai a nih ringin motor lam pan chuan chhoh leh a tum a, a inher chiah chu na tuara rum ri niawm tak chu a hre leh ta tlat mai.

Rang takin a hawi let a, lui sira mihring niawm tak lo let reng mai chu ava hmu ta a. Muang chang chuan ava pan a, a rin ang ngeiin mihring a lo ni reng mai. A bawkkhup zawng hian a lo mu a, a han kuai let a, mipa a lo ni. A hmel lah chu a tha phian lehnghal a, Pu Rama pawhin mak a ti kher mai.

A han sawi vak vak a, mahse chu tlangval chu a che eih lo. A mar a han dek a, a lo la nung tlat mai. A theih tawp chhuahin Pu Rama chuan chu tlangval nunna chu chhan tum a awmah a nem vak vak a, mahse a che eih silo. Reife a beih hnuah chuan tlangval chu a rawn thaw hrawk a, tui arawn phuh chhuak teuh mai.

Phawk hru hian a rawn meng a, "Hlau suh..hlau suh...i tha em? Thianpa, ka thusawi i hre thei em?" tiin Pu Rama chuan a be nghal chiam chiam a, chu tlangval pawh chu a hawi a hu mai. Thawk hlawp hlawp pah chuan Pu Rama chu a en a, "I tha maw? I tho thei angem?" tiin Pu Rama bawk chuan a be leh a.

A chil a lem dawk dawk a, zawite hian, "A vawt lutuk." a ti sap ringawt a, nikhawhrelo chuan a awm lehnghal der mai. Pu Rama chuan theih leh theilo hian chu tlangval chu a pawm chho a, a motor seat hnung lamah chuan a muttir a. A kawrlum te chu phelhin chu tlangval khawngaihthlak tak mai chu a sin tir a, in lamah chuan a haw pui ta a ni.

******************

"Ala harh lovem ni?" tiin Pu Rama nupui Pi Liani chu roomah chuan a va lut a, "Harh lo..a khua a sik nasa lutuk..hei a sa vek mai." tiin Pu Rama chuan a lo chhang a. "Khawi lam mi nge maw ni reng reng le? Police te hi kan hrilh zawk mai dawn mi?" Pi Liani chuan a han ti leh a.

"Ngawiteh, lo harh phawt se. Chubakah a ril te pawh a tam viau ang, kan khua Police ve ho lah hian engmah an ti ve thei tak tak lo." tiin a han phun deuh nung nung a. "Misual tlan bo te pawh a lo ni thei asin, khawilam mi nge a nih pawh kan hre bawk silo." tiin Pi Liani chu a ngaih a tha teh chiam lo.

 

Chutia an nupa a an inhnial deuh rak rak lai chuan chu tlangval chu a rawn harh hlawl mai, a thaw leh nghal hrawk hrawk mai a. "Tlangval, i tha maw?" tiin Pu Rama chuan a lo be nghal vat a. A hawi kual a, "Khawnge ka awm? Tute nge in nih?" tiin chu tlangval chu a mangan hmel hle mai.

"Hahdam rawh, Tlangval....engmah hlauh tur a awmlo." tiin Pi Liani chuan a lo thlamuan ve bawk a. Chu tlangval chuan Pu Rama te nupa chu a han melh dun vang vang a, "Engthil nge thleng? Hetah hian engtin nge ka awm?" a han ti leh a. "Vawiin ka lui kalna ah nikhawhrelova ilo let reng hi ka hmu a, ka hruai haw ta tawp che a ni." tiin Pu Rama chuan a chhang a.

"Tunge i hming ni reng reng?" Pi Liani chuan a han ti a. A ngawi vang vang a, "Ka...ka hrelo." tih ringawt chuan a chhang a. "Ava mak awm ve...i hming pawh i hrelo amaw? Khawilam mi nge i nih?" tiin Pi Liani bawk chuan a han zawt leh a. Hlauhthawn hmel tak hian chu tlangval chuan, "Ka hrelo tak tak...tunge ka nih...enge ka hming? Engmah ka hrelo." tiin a chhang leh tlat mai.

"Doctor hnenah kan hruai che anga, i tha leh mai ang." Pu Rama chuan a han ti a, mahse tlangval chuan, "Nilo, ka duhlo...khawngaihin, tuma hnenah min hruai suh u." a ti leh tlat mai. "Awle..awle..hlau suh. I ril te a tam em? Chaw ei kan siam ang che aw?" zaidam tak chuan Pu Rama chuan a han zawt leh a.

"Aw..ka ril a tam lutuk." tih ringawt chuan a lo chhang leh a. Pi Liani chuan chaw ei a siam sak a, Pu Rama sangha man te chu a han chhawp sak a, tui ti tak chuan a ei ta a. A chaw eilohna a rei tawh tih hriat tak hian a hap hian a hap buan buan a ni ber mai, "Rama, pindan ah minlo zui lut lawk teh. Inbe lawk teh ang..." Pi Liani chuan a han ti a.

 

Pindan lamah chuan an nupa chuan an inzui lut ta a, "Pa-a, police hnenah hrilh mai chi a ni. Hetianga kan kawl ringawt te chuan a tih chi lovang, sawi tak ang khan khawilam mi nge..tunge a nih pawh kan hre bawk silo." Pi Liani bawk chuan a han ti leh a. "Ngawiteh, chaw te han eikham se. Pangngai takin han awm hahdam se, tha deuhin kan titi pui zawk dawnnia." tiin a pasal chuan a chhang leh a.

***********************

Pu Rama te bual in darthlalang ah chuan Tlangvala chu a han in en vang vang a, engemaw tal hriatchhuah tum chuan a han inngaihtuah vang vang mai a. Mahse engmah a hre chhuak thei lo, tunge a nih a, engtia kha lui sira nikhawhrelova lo let reng nge a nih lah a hre bawk hek lo.

A maimitchhing vang vang a, "Tunge ka nih? Tunge ka ning?" tiin a phun nuah nuah a. A hmai te a phih a, a han inngaihtuah leh a. Mahse ama hming takngial pawh a hrechhuak zo tlat lo, a mangang hle mai. Bual in atang chuan a chhuak a, Pu Rama chuan towel lo pek pah chuan, "Kha inhrufai rawh.." a lo ti a.

A hmai hruk mawlh mawlh pah chuan, "Ka pu, helai hi khawi hmun nge ni reng reng a?" tiin a zawt a. "Sawibuang khua a nih hi..tlangval." tiin a lo chhang a. "Ka nunna min chhan sak a, ka lawm takzet ania." tiin tlangvala chuan lawmthu a hrilh a. "I hming i hre bawk silova, tunge i nih i hre bawk silova...engtin nge kan han tih ang aw..." Pu Rama chuan a han ti nang nang a.

 

"Ka pu, ka hriatna ka hlauh a ni ngei ang. Ka tunhma nun engmah ka hre thei lo, engtia kha lui sira lo let reng nge ka nih pawh ka hre thei lo." a han ti leh a. "Han ngaihtuah let vang vang teh, i chhungte emaw, phone number engemaw tal hriat te i nei em?" tiin a han zawt leh a.

"Engmah ka hrelo, ka pu." tiin a chhang leh a. "Umm..anih chuan engtia awm nge i duh?" tiin Pu Rama chuan a han zawt leh a. "Ka pu, in bulah hian hun engemaw chen chu min awm tir ve mai rawh. Rem i ti anih chuan in bulah hian ka lo awm ve anga, zawi zawiin ka ziaawm mai ang. A tul tul ka thawk anga, engemaw tal ka hriatchhuah leh theih ka ring." tiin an nupa bula awm ve chu a dil ta tawp a.

"A tha e, mahse i hming i hre bawk silova...engtin nge kan koh tak ang che?" tiin Pu Rama chuan a han zawt leh a. "In duh duh danin min ko mai ru..." tiin a chhang zawi sap a. "Atha e, Mama kan ti mai ang che. Kan nu nen hian kan inneihna a rei tawh hle nangin fa kan nei thei lova, tihian Pathianin fapa thar min pe angah i ngai mai ang." tiin Pu Rama chuan a tlangval chhanchhuah, Mama tia a hming a phuahsak chu an ina chen ve a phalsak ta a ni.

******************

Kar 2 vel lai a liam leh ta, Mama chu a taima in Pu Rama te nupa pawh a zah thiam hle a. Apa thar, Pu Rama pawh a hahdam phah hle. Tin, Mama hi tlangval chak tak mai a lo ni lehnghal a, kuthna thawh ah chuan chhawr tlak tak a ni ngei ang. Bungraw rit deuh han put nawlh te hi a awlsam em em a, a nun a nemin a zaidam hle a, Pu Rama te nupa pawh KA NU..KA PA..tiin a ko thin.

An khua, Sawibuang khua hi la thingtlang ve tak mai leh kawng pawh khawkrawk ve tak mai a ni a. Pu Rama te in awmna hi a fal angreng bik phian lehnghal a, an kawmthlangah hian huan te tak te an nei ve bawk. Mama a rawn awm ve atang phei chuan an khawsak a zia sawt hle a, inhlawh in Mama chuan Pu Rama te chhungkua chu a chawm zawk a ni tawh ber mai.

Pu Rama hian Mama hi a fapa ang chiahin a en a, a duat em em a. Kum 30 chuang zet hmel pu tawh mahse fapa a lo awt ve em em thin bawk nen, an kianga damchhunga awm tir ve mai chu a duh rum rum hial a ni. Pi Liani erawh chuan Mama hi fapa angin a la en ve thei chiah lo, hlauhthawnna rilru ala nei tlat.

Pu Rama erawh chuan a fapa ah a ngai nghet deuh tlat tawh thung a, a hriatna a neih let leh a, a chhungte tak tak bula a kalsan daih a hlau hial tawh zawk. Thenawm khawveng te hnenah chuan khaw danga an chhungte angin a sawi a, Mama pawhin engmah a sawi ngai lem lo. An motor tawng ve tawh tak pawh chu Pu Rama chuan Mama chu khalh a zirtir thin a, reiloteah a thiam ve mai bawk.

**********************

Vawikhat chu Pu Rama a damlo tlat mai, damdawi lei tur chuan Mama chu a chhuak nghal a. Motor ah chuan lut in chak takin a tlan a, damdawi dawr lam chu a pan vat a. An in awmna hi a fal angreng kan tih tawh kha, damdawi dawr hnai ber pawh pan vang vang a ngai a ni. Damdawi dawr chu a thleng ve thei ta, damdawi te chu a han lei zung zung a.

A chhuak leh chiah chu nula pakhat nen an insu palh hlauh mai, Mama chuan damdawi te chu a thlauh baw nuai mai a. Inthiamlo tak hian nula chuan, "AWi ka tihpalh lutuk thianpa....ava zialo tak." tiin a inthlahrung em em a. "A pawi love..." tiin zaidam tak hian Mama chuan a lo chhang mai a.

 

Chu nula Mama'n a han en chu chhelo a ti ngang mai, nula a hmuh thin dangte aiin a danglam bik riau lehnghal. A chhan chu chu nula, chhelo leh pian thiam zet mai chu an khua ami a nilo tlat. Aizawl atanga lo kal, a chhungte lo tlawh tura rawn zin a ni. "Ka tihpalh lutuk aw..." a han ti leh a.

Mama chu alai lek lek mai, "Aaa..apawi hleinem, ihh...nangmah zawk i tha maw?" a han ti bah deuh nuai a. "Ka tha alawm, i tha zawk maw?" tiin a lo zawt let a. "Ka tha e, ka van hmu ngailo che ve?" Mama chuan a han ti leh a. "Nia, hemi khua ami hi ka nilova...Aizawl atanga lo kal ka nia." tiin a lo chhang ve leh a.

"Tunge i hming ni a? Mama ka nia..." tiin a han chibai a. "Deborah Lalruatkimi ka nia, i fel hle mai, min hrethiam a.." tiin a chhang a. Deborah-i pawh chuan Mama chu Sawibuang khaw tlangval dangte ai chuan a hmel a lo tha fal bik deuh nge ni, a en ve tlawk tlawk mai. Second 10 vel inbe miahlova an han in en deuh ngar ngar hnu chuan Deborah-i chuan, "Ka kal ange...ka buai deuh va.." a han ti a.

Inthlahrung tak hian Mama chuan, "E..aw...keipawh ka han haw ange.." a han ti ve a. "Damdawi te i lei a, tu ta tur nge? I damlo em ni?" tiin a zawt leh a. "Ka pa a damlo alawm mawle, hei a rang a rangin ka rawn kal a nih hi.." tiin Mama chuan a chhang a. "Anih tak chu...ihh, nia..kan inhmu leh dawnnia...kan la inhmu fuh leh a nih chuan.." tiin Deborah-i chu a khi sak a, Mama chuan a en zui vawng vawng mai.

********************

Mama chuan DEborah-i chu a vei nghal em em a, zan tam a mut theihloh phah ta hial mai. Engtikah nge an inhmuh leh ang..tiin a inngaihtuah a, tul hlei lovah damdawi dawr ah te chuan a kal ziah mai a, mahse a hmu ngai tawh bawk silo. Pu Rama pawh zawi zawiin a tha chho ve zel a, hna pawh a thawk leh thei ta.

Sawibuang khaw nulate chuan Mama chu an melh tai tan ta hlawm hle mai a, an khaw tlangval mai nilo, thalaite ai mah pawhin hmeichhe ho sawi sap tham a tling ta hial mai. Chuti khawpa tlangval hriat hlawh, lo awm thar leh an khaw mi hlun pawh nilo lehnghal. Nula ten a an zar ta sup sup mai chu Sawibuang khaw tlangval thenkhatte ngaihdan a ni ta tlat lo, a bik takin an khaw tlangval te zinga inti engemaw ve tak, Peka ngaihdan chu a nilo lehzual.

********************

Vawikhat chu a thiante nen inthurual a Mama hnathawk bang lo chan a, lo vau deuh hlak chu an tum ta a. Tlai a lo ni a, Mama inhlawh pawh a rawn bang ta. A inhlawhna hmun hi an in atanga a hlat lem loh avang chuan motor a kal lovin ke in a kal mai thin a, a haw kawngah chuan Peka te thian ho pawh chuan an lo chang ta ngei a.

An zawn ava thlen chuan Peka chuan, "Lo ding teh, thianpa." tiin a han ko a. Mama pawh chu ading ve mai, "Nang hi em ni? Mama chu?" tiin a han melh rum vel a. Zaidam tak hian, "Aw ni e, enge ni ta?" tiin a lo zawt a. "Khawi atanga lo kal maw i nih a?" tiin Peka chuan a han zawt leh a.

 

"Aa..khawdang atanga lo kal ka nia...Pu Rama hi ka patea a nia." tiin a han chhang leh a. "MAhse KA PA tiin i ko thin anilawm ni?" a han ti leh a. Mama ngaih chu a thalo tan ta hle mai, "Ni e, ka pa tiin ka ko ve mai thin a." tiin a chhang leh mai a. "Khawi khua atanga lo kal nge i nih reng reng?" tiin a han zawt leh hram a.

Mama chu alungawi ta vak lo, "Engvangin nge ka hrilh vek che anga?" tiin a zawt let ve ta sak mai. Chutah zet zawng, Peka thiante ho pawh chu an rawn kal hnai a. Mama pawh a zam ve deuh, "ZAwhna ka zawt che a, tha tak khan min chhang mai rawh. Engmah min zawt let suh, i hria maw?" tiin Peka chuan a han vin deuh khur khur a.

"Engvanga ka chanchin hre vek duh nge i nih min hrilh phawt rawh." tiin Mama chuan a chhanglet ve leh ta sak mai. Rum zet hian Peka chuan a han melh run a, "Ngaithla teh Hmela, he khuaah hian kan piang a, he khuaah vek hian kan seilian tih hre rawh. Nang rawn awm thar mai mai khan tikhan min chhanglet ve khanglang suh, ka zawhna chu tha takin chhang mai rawh." tiin a han vau leh hlur a.

Mama chu a nui suk a, "Enge ka lakah hian buaina in neih a? Tute nge in nih a?" tiin a han zawt ve leh a. "Puitei hi ka ta a ni, chu chu i hria em? Vawikhat pawh lo be leh teh, i chak lovang." Peka chuan a han ti leh khur khur a. Mama chuan a ngaihna a hrelo hle mai, "Puitei a? Tunge chu chu?" a ti hu mai a.

Puitei hi an khaw nulate zinga hmeltha ber ti ila kan sawi sual awm love, mahse Mama hian tunge a nih a hre hauh lo. Thingtlang sawichhiatna leh an changkang love tihna ni hauh lovin Sawibuang khua nulate chuan an la hmuh ngaih loh, Mama chu an ngaizawng hlawm em em a. Chhuanlam eng eng emaw siamin a hmel hmuh duhvang ringawtin Pu Rama te inah pawh an lenglut fo thin a, chung nulate zingah chuan Puitei hi a tel ve thin a ni.

Mama tak phei chuan tunge a nih a hre hauh lova, DEborah-i lo chu tu hmeichhe dang mah a ngaihtuah ngai lo. Puitei hi Peka hian a ngaizawng em em a, a bem fo thin bawk reng a ni. MAhse Puitei hian a duh ngai lova, Peka erawh chuan a zar buai zui reng tho thin a ni awm e. Chutia a hmeichhe atchilh em em Puitei'n Mama a lo melh tai leh a lo ngaizawng ru viau a ni tih a hria chu Peka hi a thinur em em a, Mama a huatna pawh a zual phah a ni.

"Hrelo der suh, lo inthiar fihlim ang che. Anihloh chuan he khua atang hian kan pet chhuak vang vang ang che, i hria maw?" a han ti leh hlur a. Mama chuan zaidam tak hian, "Ava zialove, i hmeichhe sawi PUitei chu ka hre hauh lo mai. Engpawh chu nise, ka lo fimkhur tawh dawnnia." tiin kal mai a han tum a.

Peka chuan a lo dang a, "Ka zawhna ila chhang zo lo, khawi khua atanga lo kal nge i nih?" a han ti leh a. Mahse Mama chuan a chhang lo, kal leh a han tum a. Peka chuan a nam vak a, MAma chu a thal ta tawp mai. Muangchang chuan a tho chhuak a, a inbeng fai a. "Thiante u, intihbuai ka duhlo...khawngaihin min kal tir ru." a han ti zawi leh sap a.

"Kan zawhna i chhan hma chu khawiah mah i kal lovang." tiin Peka chuan a lo chhang leh a, a hma zawnah chuan an thian 6 chuan an ding tlar ta thap mai. Mahse Mama chuan a la chhang duh chuang lo, kal luih leh a tum chu Peka chuan a hnek ta siah mai. Rum zet hian a rawn hawi chhuak a, "Haha...enteh u, min melhrum ve nia mawle...han che ta che, enge i tih theih lo en ila.." Peka chuan a han ti vei pung pung a.

Mama chu a rawn tho chhuak a, "Min kal tir rawh u..anih loh chuan.." a tih lai chuan Peka thiante zinga mi Tea chuan pawr zet hian, "Anih loh chuan enge...enge i tih anga?" tih pah chuan Mama chu a hnek thal leh siah mai. Chutah zet zawng Mama thin chu a rim ve ta, rum em em hian Peka te thian ho chu a han melh khur hlawm mai a.

A hmel put hmang chu ahmaa tlangval hme pawisawilo tak, Mama hmel awmdan ang kha a ni ta hauh lo. A hmel en reng reng pawh chuan thinrimna hlirin a khat tih a chiang a, Peka chu a han thlek deuh vak a, tlangval hmeltha tak ni mahse a hlauhawm ta lek lek mai. Thinrim nasat em avanga taksa khur dur dur chung chuan, "Amah tibuaitu rannung te chu a mal te te in a ei zo vek thin a, zalenna chu a tem ve dawn ta...a tem ve tan dawn ta." tiin a phun ta bul bul mai.

PEka te thian ho chuan mak tiin an en thap mai a, "Enge maw i sawi le?" tiin Peka chuan ahan vin deuh thawt a. Mama erawh a awmdan pangngai chuan ala awm reng a, "A tir atangin, bul tan tha leh turin a tir atangin a let leh a ni. Beiseina ni eng chu ahmu ve ngai dawnlo, a chhan chu hmangaihna avangin a kehchhia a ni...hmangaihna avangin a kehchhia a ni." tiin a phun chhunzawm leh mawlh mawlh a.

Tea chuan, "Mi a anih hi...i kalsan mai ang u...tihbuai tlak pawh va ni suh." a ti deuh nung nung a. Peka pawh chu a nui suk a, "He khua hi chhuahsan vat rawh, a nih loh chuan damchhunga kebai turin kan siam mai ang che." tih pah chuan ava pan phei a, Mama hmaiah chuan na lo te hian tham lo hmel zetin a han beng thek thek a.

Kal leh mai a tum chu Mama chuan a kutah nghet tak hian a lo man a, Peka pawh a ding chat mai. A hawilet a, Mama chuan alo melhrum nasa mai. "Hey, min thlah rawh....min thlah vat rawh." a ti nghal chel chul mai a. Chutah Mama chuan Peka ban chu a hmer ta vak mai a, ana ti lutuk chu a au ta vak vak mai.

Chu veleh a thiante chu an rawn tlan a, Mama chu pawhsawn an tum a. A thenin an hnek a, a thenin an tlawh bawk a. Mahse Mama chuan na ti hmel pawh apu eih lo, Peka ban chu ahum nghet tulh tulh mai. A kut dinglam chauha hmer a ni a, a kut velam erawh a che lek lo hrim hrim.

Chutah a elh vak a, Peka ban ruh chu a ri ta tuar mai. A na ti lutuk chu a thal tawp a, a tal vak vak mai. Midangte chuan Mama chu beih an han tum leh a, mahse an hneh lo hlawm kher mai. An bei zui rei ngam lo, Mama lah chu sakawlh hliam thinrim ang mai chuan a rum nghut nghut mai a.

Midang ho chuan Peka chu an kai tho a, "Kal ang, kal ang u...mihring pawh a nilo hepa hi.." tiin an kalsan a, Peka phei chuan melh pawh a melh tha ngam tawh lo. Chutah khawpui arawn ri dur dur a, harh chhuak zawk niawm tak hian Mama chu a phu zuk mai. Peka te hlau leh thlabara an tlanchhe lawm lawm mai chu a hmu a, mak a tih hmel kher mai.

******************

Mama chu inah a haw a, a pindan ah a lut tlang nghal a. A kut te chu a han en a, khatia PEkaa te thianho awlsam taka a sawisa hrep hlawm ta mai kha amah pawhin mak a inti kher mai. "Thil diklo chu a awm a ni, engthu nge ka sawi mawlh mawlh kha....enge ka chungah hian thleng ta le?" tiin a phun nuah nuah bawk a.

Chutih lai tak chuan Pu Rama alo lut a, "Bawiha, i lo haw tawh a nimaw? Vawiin i chau em?" tiin a rawn zawt a. "Chau love...vawiin chu kan bang hma deuh hlek a." tiin a lo chhang ve mai a. Mama mit duk deuh chur mai chu Pu Rama chuan ava hmu fuh a, "Ehe...kha..tinge i mit kha?" tiin a zawt a, a ngaih a tha lo nghal hle mai.

"Aaa..ihhh...vawiin kan hnathawh naah ka tlu sual palh a, engmah a nilo." tiin Mama chuan a chhang bah nuai mai. Mahse Pu Rama chuan a awih chiah lo, "Kutthlakna hnuhma ava ang ve, in insual em ni?" tiin a han zawt leh a. "Insual love, ka pa...ka tlusual mai mai alawm." tiin a chhang leh a, ngaihtha chiah lo chuan Pu Rama pawh chuan a chhuahsan ve leh mai a.

****************

Chumi zan chuan Mama chuan mumang mak tak mai a nei ta tlat mai, a mumangah chuan ramhnuai pil ril takah hian a lo awm a. Hlauh nei niawm tak hian a lo tlan vak vak a, rei fe a tlan hnu chuan thlam pakhat, lian lem lo tak mai hi a hmu hlawl mai. A tlan lut a, chutah hmeichhe pakhat leh mipa pakhat ruang , saruak veka lo inkhai chu a hmu ta thut mai.

A phu nasa lutuk chu a tawlh dawr a, a thaw nghal hlawp hlawp mai. Thlam atanga tlanchhuah leh mai a tum chu kawngka bulah chuan putar pakhat, khabe hmul buk zet mai leh palian zet mai hi a lo ding khur mai a. Mama hlau lutuk chu a thu hnawk mai, "Tu..tunge i nih?" a han ti khur dar dar a.

Chu putar chuan chiang fek fawk hian, "Ka fapa, tunge ka nih i hrelo amaw? I pa ka nih hi...min theihnghilh ta em ni?" a rawn ti ta chhur chhur mai. "Nilo, ka hre ngailo che..ka pa i nilo..ka pa chu Rama a ni a, nang hi ka hre ngai lo che." tiin Mama chuan a chhang a. Chu putar chuan, "Nilove, nang hi ka fapa i ni. Kha mihring Rama khan a fapa angin a inah a chen tir ve mai chauh che a ni." tiin a lo chhang leh a. Chutah thlam kil atang chuan pitar pakhat hi a rawn chhuak leh a, a sam a var vek lehnghal.

Chu pitar pawh chuan Mama chu a rawn en a, "Bawiha, lo haw rawh..kan ngai tawh takzet che a ni." a rawn ti ve leh ta mai a, Mama chuan a hrethiam lo kher mai. Putar bawk chuan, "Victor ka fapa, he i mizia hi nangmah i nilo. Kan fapa Victora ngei kha kan duh leh a ni, i nu leh pate thu hi i awih dawn nang nge?" a rawn ti leh ta mai a.

Mama hlau lutuk chu bang kilah a ding a, "Nilo..ka hming chu Mama a ni, tunge Victor-a chu ka hrelo. Min kalsan rawh u..khawngaihin min kalsan rawh u." tiin a mit a hup a, a au chel chul mai. Chutah chu pitar leh putar chuan an rawn pan hnai a, "Lo haw rawh...kan ta i ni..midang tan kan phallo che." tiin an vin ta hrep hrep mai.

******************

Mama chu a harh zawk mai a, a au chhuak nghe nghe. A thu chhuak hlawl mai, "Nilo...." tiin a au vak a. Rang lutukin a pa, Pu Rama chu arawn tlan lut nghal. "Bawiha, enge ni ta?" a rawn ti nghal vat a. Mama chu a thlan a tla bawrh bawrh mai, a hawi kual a. A pa a hmu leh chiah chu a thaw huai mai, "Khai a..ka mumang lek alawm le.." tiin a nui suk a.

"ENg mumang fakau nge maw i neih le, tlangvala pumpa i rawn au chhuah tak mai ni?" tiin Pu Rama chuan a zawt a. "Eng nilove, a ho lutuk.." tiin a mit chu a tuai vut vut a. "Tukin chu i tho tlai hle mai, saw...i nu in chaw ei a siam mek ania." Pu Rama chuan a han ti leh a. "Ehe, dar engzat nge? Ka tlai dawn nih hi a...ava zialo tak." tiin Mama chu a mangang nghal hle mai.

"Tlai love, chaw te ei la, i inbual fai anga...i kal nghal mai dawnnia." tiin apa chuan a lo chhang a. Mama chu inphih fai turin bathroom lam panin a kal nghal a, mahse Pu Rama ngaih erawh a tha lo hle. A chhan pawh engdang nilovin, a fapa anga a en Mama hian a hriatna a neih kir leh a, a chhungte tak tak a zawn hmuh a, a kalsan chu a thil hlauh ber a ni.

********************

Tlai a lo ni a, Mama pawh a hna atang chuan a rawn bang ve leh ta a. An inhnuai kudam bulah chuan apa chuan motor ke chu a lo thlawn mek a. "Puih i ngai em, ka pa?" tiin ava zawt nghal vat a. "Ngai love, a ke hi ka'n thlak lawk mai mai, i chau awmsia han inbual fai la, hahchawl rawh." tiin a lo chhang a.

Mama kal tur chu Pu Rama bawk chuan, "Bawiha, kudamah sawn tuboh sen zawk kha min va lak lawh teh...tuna ka hman hi a chhe emai." tiin a han tir leh rih a. Mama pawh chu a kal ve mai a, kudam chhungah chuan a lut a. Tuboh sen chu chhuar chung berah a lo awm a, a han ban pah chuan hmaikawr niawm tak hi a rawn tla thla tel a.

Mama chuan a en vang vang a, a han chhar a. Chu hmaikawr chu thing atanga siam niin a a mit sawn leh a ka(mouth) zawn chu a bial hian a kaw phawt mai. Mak tak maiin a thisen a rawn lum pup pup mai a, chu hmaikawr chu a vuah chak ta tlat mai. Chutah hmaikawr chu a han vuah a, a thin a rawn phu rang ta tulh tulh mai a.

A thisen a rawn lum pup pup a, a mitthlaah chuan a hma zana a mumanga a hmuh, pitar leh putar te chu an rawn lang chuai chuai mai. Rang lutukin a phelh leh nghal a, a thaw hrawk hrawk mai. Hmaikawr chu a en vang vang a, bang kilah chuan a theh phei ta daih mai a. Tuboh chu apa a va pe a, engmah sawi lo chuan inah a lut ta a.

******************

Mama chuan a chungah thil thalo tak a thleng ngei dawn niin a hre tan ta a, amah ah chuan diklo a awm tlatin a hria a. A han ngaihtuah let a, Peka te thian hovin sawisak rawn an tum lai a, a lo sawisa let hrep te. Peka banruh a kut khing khat chauhva a elhtliah lai te, ahma zana a mumangte, hmaikawr a vuah veleha amah a danglamna rawn awmte chu a ngaihtuah nauh nauh a.

A hriatna chu zawi zawiin a rawn let leh tan tih erawh a ring pha hauh lo thung, hlauhthawnna a nei tan ta. Tin, a rilru ti hah zualtu chu a mumanga a nu leh pate anga insawi te khan VICTOR tia an koh kha a ni. Roomah chuan thu in a rilruin a inbe mual mual a, "Tunge Victor-a chu ni ang le? Mumang mai mai chu ni mahse, a tak ang chiahin ka hmu bawk si? Khamite kha ka nu leh pate tak tak zawk an ni tihna em mawni zawk le? Ka hming tak tak hi Victor-a a ni tihna em ni zawk?" tiin a inngaihtuah nasa mai.

Zan a lo thleng a, dar 10 velah chuan Mama pawh chu a mu ve ta a. Mahse a muhil thei reng reng lo mai, a in let a in let ringawt mai a. Inhnuai kudam lama hmaikawr, bang kila let reng mai chuan a rawn ko nimai hian a hria a. Zu chhuk a, zu vuah chhin chakna hlir chuan a khat leh ta tlat mai.

A mu thei ngang lo, a rukin a chhuak a, a chhuk ta nge nge a. Kudam chu a han hawng a, a lo thim ruih mai. Light a han on eng a, tlaia hmaikawr a paihna lam pan chuan a va kal a. Bangkila lo let reng, hmaikawr chu a la kang a. A han en vang vang a, "Hmaikawr mai mai alawm, engmah hlauhawm a awm lo." tiin a vuah leh ta a, a lu a hai nghal chhawk mai.

********************

Ar khuang ri al al chuan Mama chu ati harh zawk mai a, khua a lo var der tawh mai. A awmna a han en a, kudam ah tho chuan a lo la awm a. A hmai a han khawih a, hmaikawr chu a lo la vuah reng mai. Rang takin a phelh a, "Enge maw awmzia le? Nizan khan engtin nge ka awm zui a?" tiin a inzawt vak vak a.

A sana chu a han en a, zing dar 5:30 a lo ri der tawh mai. Hmaikawr chu a hum reng a, a tho kang a. "A tha dawnlo tawp mai.." tia phun nuah nuah chung chuan kudam sira bawlhhlawh bawmah chuan hmaikawr chu ava paih ta a. Inchhungah chuan a lut a, chuveleh apa pawh chu arawn tho ve nghal a.

"Ehe Bawiha, i va tho hma ve...enge pawnah te i tih a?" tiin Pu Rama chuan a han zawt a. Han chhan mai dan tur a hrelo kher mai, "Aaa..nia englo, ka zung a." a han ti bah nuai a. "Awww...inchhungah zun in kan nei ve renga, pawna han zun kher." tiin apa chu a han phun nuah nuah a.

"Nia, pawn boruak thianghlim ka han dawng pah mawle." tiin Mama chu a khi suk a, a room lamah chuan a lut nghal a. Khumah chuan athu vang vang a, "Enge ka chungah hian thleng? Thil diklo chu a awm a ni." tiin a lu a dawm vawng vawng mai. A kawrlum hak lai chu a han phelh a, a phu nasa kher mai.

A T-shir hmaah chuan thisen a lo kai nuai mai a, rang takin a phelh ve nghal bawk a. Chhuatah chuan a paih vat a, tukverh bulah chuan a tlan phei a. A thaw hrawk hrawk mai, "Enge awmzia? Thisen...thisen, khawia mi nge?" tiin a phun vak vak a, a mangang kher mai. A kut a han en leh a, a kuttin kar velah chuan thisen a lo kai bawk a.

Chuta mangang taka a awm lai chuan a room kawngka chu a rawn inkik dat dat a, a phu nasa kher mai. Pu Rama lo niin, "Bawiha, lo hawng lawk teh." a rawn ti ta mai a. Rang takin a kawr chu a chhar vat a, balbawmah chuan a thawmhnaw bal dangte nen chuan a dah pawlh a, a thukru nghal vat a.

Kawr dang a ha a, tichuan kawngka chu a hawng a. Apa chu lo lutin, "Hei ka thianpain min rawn bia a, a fapa Pekhlua a thi a ni awm e." a rawn ti ta mai a, Mama chuan mak a ti kher mai. "Enga, Peka....Peka maw?" ati hu mai a. "Ee..i hre ve elaw? In lo inhmelhriat hman der em ni a?" tiin Pu Rama chuan ahan zawt hu a.

"Aa..hre chiah lo...engtia thi nge?" tiin Mama chuan a lo zawt leh a. "Thah a nih hmel an ti, a ruang an chhar a, tukin zing dar 4:30 vel khan an chhar a ni awm e. Min lo phone char char zawk a, ka lo tho theilo zawk a nih hi. Ava rapthlak ve mawle, tu misual nge maw nile?" Pu Rama chuan a han ti nuah nuah a.

Mama erawh a ngawi reng a, mak tihna hlirin a khat a ni ber mai. Pu Rama bawk chuan, "Hawh teh, iva phei ve teh ang u. I nu pawh ka'n kai tho ange, lo insiam rawh aw..." tiin a chhuahsan a, Mama chu khumah chuan a thu hnawk a. "Nizan khan...nizan khan kudamah khan ka muthlu tihna em ni? Mahse tinge nizan khan Peka hmu ang tlata inhriatna ka neih le? Engemaw awmzia le?" tiin a phun mawlh mawlh a.

***********************

Peka te inah chuan an va kal ta ngei a, an inbul deuh lawkah Peka ruang chu zing exer la turten an hmu hi a lo ni a. Kawngsir velah pawh chuan thisen khar a lo kawi zun mai a, a ruang pawh a chhe nasa hle niin an sawi. Mahse Pu Rama te an va thlen meuh chuan a ruang chu Police ten postmortem turin an lo phur liam hman tawh a, Peka chhungte chuan an tuar thiamlo hle mai.

Mama pawh chuan Peka te in chu a han singsak pui ve hlawm a, a tul ang ang chu a han ti ve nghal zung zung a. Thutthlengte an han rem fel zawh hnu chuan khaw mipuite pawh an thahnem tawh hle a, an zai tan ta a. Mama erawh inchhunga awm ve lovin pawnah chuan meizial a zu a, a bulah chuan hmeichhe pakhat hi a rawn kal a.

"I va fel ve a.." a rawn ti thur chu Mama a lo phu deuh zuk mai, a va hawi phei vat a. A bula lo ding chu a rinloh lutuk maiin a lo ngaihzawn ruk em em, Deborah-i ngei kha a lo ni. "Ehe..nangmaw? Aizawl lamah ila haw nange?" Mama chuan a han ti ve luam a. "AW...awm deuh char char ka tum a, mahse hei....awm rengna chi pawh a nih dawnloh hi." tiin Deborah-i chuan a lo chhang a.

"Nia..a rapthlak khawp mai." tiin Mama chuan a lo chhang ve mai a. "Nizan ah khawnge i awm?" tia Deborah-i'n a han zawt thut mai chu a phu nasa kher mai. A thin a phu nghal dup dup a, "Tinge min zawh a?" a lo ti nghal vat a. "Aww...ilo chhuak ve ang tih ka hlau mawle. Hei zan chhuah a himloh zia chu, tualthahna a thleng der ania." tiin Deborah-i chuan a lo chhang leh daih mai a, Mama pawh a thaw huai mai.

 

"Chhuak love, thian kawm tur vak ka nei velo. He khuaa ka awmna hi ala rei lova, tumah thian ka nei lo." tiin Mama chuan a chhang a. "AWm reng i tum ami? Khawi khua nge i nih hrim hrim a?" tiin Deborah-i chuan a han zawt leh a. Chhan mai dan tur a hrelo kher mai, "Aaa..ihh..enlo, Aizawl ve tho." a han ti ve ngawt a.

"Animaw? Khawi veng?" tiin a lo zawt leh nghal vat a. "Ihh...Veng...Venglai." a han ti leh tawp a. "A nih chu, keini chu Bawngkawn ania...engtikah nge i haw dawn?" tiin a lo zawt leh a. "Ka Pa Rama hi puih a ngai a, ka la awm deuh rih ang." tiin a chhang a. Deborah-i chu a nui sak a, "Thian i neilo bawk a, reilote ka awmchhung hi chu kan pahnihin kan inkawm thin mai dawnnia." a han ti a, Mama chu a lai lek lek mai.

******************

Kar hnih vel a liam leh a, DEborah-i pawh chu ala haw chuang lo. Mama nen chuan an innel sawt em em a, an inhaw lo tan ta hle mai. Peka tual thihna bak chu thihna dang thleng a awm leh tawh lova, boruak pawh a zia leh deuh tan ta. Mama leh Deborah-i te chu an hman apiangin an inhmu thin a, an lengchhuak dun ta fo mai.

A tawp atawpah chuan an inngaizawng ta nge nge a, duh pawh an induh tawn ngang mai. Mahse Pu Rama te nupa erawh chuan an hrinloh fa Mama'n bialnu a neih thu chu an hre ve hauh lo, Mama pawhin a sawi ngai hek lo. Deborah-i pawh Aizawl lama a haw hun a hnai tial tial a, Mama pawhin a ui lawk kher mai.

*******************

VAwikhat chu Pi Liana leh Mama te nufa chu an bazar a, chawhmeh an lei a. An haw leh lam Mama'n kawng a cross chiah chu chak tak mai hian motor pakhat hi a lo tlan a, "Mama...nilo." tiin Pi Liani chu a t(r)e tuar mai. Motor chuan Mama chu a su leng lawp mai a, a kut ruh chu a ri tuar mai.

Motor atang chuan driver chu a rawn chhuak a, ala pawr em em zui. An khaw tlangval drugs addict, inla pa ve tak. Zing kar atanga rui thin, mi laktlakloh ve tak mai Rintea a lo ni a. "ZAwnga, motor hlauhna chang hre ve ta che." a la rawn ti zawk zui a, a rui tih hriat tak hian a meng si sap mai.

 

Pi Liani chuan thinrim tak hian, "I zak lawm ni? Khati khan ila tawng ngam amaw?" tiin Rintea chu a vin hrep a. Rintea lah chuan, "Ve lutuka che, nang pitar kha..saw ala thih em loh saw, tun atang chuan fimkhur dan a thiam ve tawh mahna." tiin a lo la chhang let hrep zui a. Mama chu a thal reng mai a, puih tum chuan thenkhat chu an va tlan khawm a.

"AWi ana ngawt ang.." tiin thenkhat phei chu an phi chung mai, mahse mak tak maiin Mama chu a rawn dingchhuak leh tlat. A ban ruh chu a diklo tih hriat takin a kawi deuh ngul bawk a, rum em em hian Rintea chu ava melh a. Rintea lah chuan pawr zet hian, "Ehe...minla melh ve ngam khanglang. Sut hlum law law i duh ami? Lo kal teh.." a lo ti khur khur mai.

 

PAtling thenkhat ho chuan lo khapin, "Rinte, ngawi rawh....i zak lawm ni?" tiin an lo khap a. Mama chu ngil at hian a ding a, a kut ruh na lam zawk chu a kut lehlam chuan a han vuan a, a han herh kual a, a ri tuar tuar mai. Chutah a ban chu a han phar kual a, mak tak maiin na ti hmel pawh a pu eih lo.

A ban ruh chu a pangngai ang bawkin a dik leh thlap tawh, Rintea lam chu ava pan ta chher chher mai le. Rintea chuan a lo cho nasa mai, "Alo la kal ngam...zawnga, ka...." a sawi zo hman lo. Motor hma ri dawt khawp chuan Mama chuan Rintea chu a rek bet a, a rum nghut nghut mai. PAtling ho chuan thlelh an tum a, Mama chu an pawt vak vak a.

MAhse an pawt hneh tlat lo, chuta chhapah Mama chuan Rintea chu a kut ruh hliam lam zawk chuan ala rek zui. Pi Liani chuan che chang lo hian Mama chu a en reng ringawt a, mak a ti takzet. Hnai set sawtah chuan Mama chua Rintea chu a en a, "A dawt leh chu.....nangmah i ni ngei ang." a ti khur khur a.

Rintea hmai chu a dang vek tawh, a thelh tum tute lah chuan an thelh hnehlo nasa mai si. A rekhlum takngial dawna a hriat avang chuan Pi Liani pawh chu ava inrawlh ve ta vat a, "Mama thlah rawh...thlah vat rawh." tiin a banah chuan ava beng vak vak a. Mahse Mama chuan a thlah duh tlat lo, thenkhat chu an mangang hial tawh.

Chutah ring lenglawng hian Pi Liani chuan, "Mama...i nu ka nih hi, thlah rawh ka tih chu...thlah rawh." a ti vin tuar mai a. Mama chu a phu deuh zawk a, anu chu ava melh a. Mak tih hmel deuh hian a en hu a, Rintea chu a en leh a. A thlah nghal vat a, midang chuan Rintea chu an buaipui nghal vat a.

********************

In lam pan chuan an haw a, Pi Liani chuan Mama chu a zilh phei mawlh mawlh a. Inchhungah an lut a, "Khawilai nge na ber?" tiin Pi Liani chuan a han zawt a. "Engmah a na lo." tih ringawt chuan a lo chhang a. "Inla pa viau suh, i banruh ri tuar pawh kha ka hria alawm...khawimaw, ka lo en." a han ti leh a.

"Nu, engmah a na lo. Ka tha alawm, hei min en la...ka tha vek alawm." tiin Mama chuan a chhang leh a. Pi Liani chuan mak a ti hle mai, "Khati khawp khan a su na che ania, engtin nge engtin mah i awmloh theih?" a ti nuah nuah mai a. Chutih lai chuan Pu Rama a lo lut a, "Engmaw in sawi a? Bawiha, motor-in a su che em ni?" a rawn ti lut nghal bawrh bawrh a.

"Aw...mahse min su na lo." tiin Mama chuan a lo chhang a. "Daw suh..i thal tawp kha..ka hmu reng che alawm. Khawimaw ka lo enchiang teh ang che, a hrim hrimah Pu Engmawia fapa rui pawr lutuk saw chu ka hne ngawt mai." tiin Pi Liani chu a ang zui bawrh bawrh a. "KArei, saw nau Rintea bawk saw maw lo ni leh a? An khawsa theih avang hian a chapo ve em em a, ben nek ania ka chak ni." tiin Pu Rama pawh a lo ang ve bawrh bawrh mai.

"Nu, ka tha alawm. Ngaihtuah ka ngailo, engmah na ka neilo." tiin Mama chu a roomah a lut a. "Amak kher mai, tikhawp khan a su na a...engmah a na lo a ti leh thei ania." Pi Liani chuan a han ti leh nuah nuah a. "Awww...tlangval ah pawh senior lam a ni ve tawh a, khatia naupang ang maia tih duai duai kha a tlawmngai ve aniang chu. Chubakah a nu leh pa tak tak kan lo nilo bawk nen, i chei naute em a nih kha." tiin Pu Rama chuan a lo chhang a.

"Chulam a nilo, amak lutuk. A su leng lawp a, a kut ruh pawh a ri tuar alawm. A uai deuh hnawp a, ka hmu vek alawm. Mahse a rawn tho kang leh mai a, khate kha thil mak chu ani tawh hrim hrim. Mahse chumai ala nilo, a ban ruh kha eng tin tin emaw a hmet kual a, a rawn pangngai leh vek. A kut na lam khan Rintea kha a rekbet leh thei bawk ania, thil pangngai chu anilo alawm." Pi Liani chuan a han ti leh hlur a.

"Ekhai..ka fapa chuan Rintea chu a lo khawih ve deuh hlak amaw...haha, a tha nih chu...keipawh hian han piai ve hlak ka chak ania." tiin Pu Rama chu a lo khi suk a. "Rama, ka uang lo ania. Engtin mah a awmlo hi amak ka ti, a banruh kha chu a tliak chiang alawm." tiin Pi Liani chuan a han vin leh hlur a.

"Awww...atliak lo anih kha. I ho lutuk, a su na lo tihna animai. I mangangin i hmusual mai mai a nih chu, i ngaihtuah lutuk anih kha. Nakinah ka va bia ange, rawng bawl mai mai teh." tiin Pu Rama chuan a lo chhang awlsam leh et mai. Pi Liani ngaihdan a ni vaklo kher mai, chumai nilovin Mama chu an ina awm ve reng atan pawh a duh vak ta hauh lo.

******************

Tlai a lo ni a, Pu Rama te chhungkua chuan zanriah an kil ho mek a. An ngawihthap lai chuan Pu Rama chuan, "Taka...ka hmaikawr siam tir kha bawlhhlawh bawmah a lo awm a, tunge paih a?" a rawn ti thut mai chu Mama pawh a phu zawk mai. Apa chu a en hu mai a, "Mama, i paih em ni?" tiin Pu Rama bawk chuan a han zawt nghal a.

"Aih, eng hmaikawr maw? Ka hrelo reng reng....ka nilo." a ti nghal vak vak a. Ngaihthat loh hmel tak hian Pi Liani chuan Mama chu a en reng a, "Nangmah em ni, Duhtak?" tiin Pu Rama chuan an nu chu a han zawt veleh a. "Nilo...a hrim hrimin, eng atan nge khu hmaikawr khu i kawl reng a? A rapawm si...mi pe daih teh." Pi Liani chuan a lo ti hlur a.

"Khai..mai mai a, ka damloh laia ka kut awl lutuk, hna thawk thei bawk silovin ka siam ve liau liau a nih khu, ka ui teh ania." tiin Pu Rama chuan a chhang a. "Pa, hmaikawr khu nangma siam maw?" tiin Mama chuan a lo zawt vat a. "Ni ang chu...ka thiam ve zawng tak alawm...hmaikawr siam mai mai." tiin apa chuan alo chhang leh a.

Pi Liani chuan Mama melh vang vang pah chuan, "Nichin lawk khan eng hmaikawr maw i ti bawk sia, i hmu tawh em ni hmaikawr chu?" tiin rinhlelh hmel tak chuan a han zawt leh a. Mama chu a buai hman teuh hle mai, "Aaa..nia, la hmu love...ka zawt mai mai a nih kha." a ti bah nuai mai.

*******************

Zanah chuan Mama pawh Deborah-i nena inhmu turin nalh takin a han inchei a, Pu Rama erawh chaw eikham veleh a leng chhuak nghal daih a. Pi Liani chuan Mama insiam mawlh mawlh chu a en reng a, "Khawnge i kal dawn a?" tiin a zawt a. "Ka thiante inah.." tih ringawt chuan Mama chuan a lo chhang a.

"Thian te a? Tu i thian te? Thian i kawm vak ngai awm pawh ka hre hleinem." tiin a han zawt leh a. Mama chu a nui suk a, "Pakhat chu ka nei ve alawm, a fel lutuk." a han ti a. Pi Liani chuan chutia zantin deuhthaw MAma lengchhuak ta ziah mai chu engthil nge a tih thin hriat chian a duh ta tlat mai a, a ngaih a tha tawh hlawl lo a ni.

Mama chuan a kawr a phelh a, kawr dang haktur a dap lai chuan a hnung zanga hliam niawm tak, duk tluk mai chu Pi Liani chuan a en vang vang a. "Mama, i hnungzanga hliam kha ava reh har ve?" a han ti leh a. Mama chuan hriatthiamloh hmel tak hian, "Eng hliam maw?" a lo ti hu mai. Pi Liani chuan Mama hliam chu ava khawih chhin a, "Hei hi mawle.." tih pah chuan a han hmet vak a.

"Ana..khawih suh." tiin Mama chu a lo ner deuh sak a. "Ana maw? Ava na rei em em...damdawiinah kalpui chi anilo maw?" Pi Liani chuan a han ti leh a. "Angai lo, engtia hliam nge pawh ka lo hre hleinem." Mama chuan a lo ti sam et mai. "Kan ina kan hruai luh ni che khan he hliam hi chu ka hmu tawh a, damdawi te pawh kan hnawih a. A sawhna duh vel a nih kan ring a, mahse a dam har e..amak kher mai." tiin anu chuan a chhang a.

 

"Adam leh mai ang." tiin Mama chuan kawr a ha a, a chhuak ta daih mai. Mama chhuah veleh chuan Pi Liani chuan Mama room chu a enkual ta a, engemaw tal hmuhchhuah a neih a inring tlat a ni. Mahse a han enkual chiam hnu pawh chuan engmah rinhlelh tur thil a hmu tlat lo, "Ni e, ka hlauthawn vel mai mai a ni...engmah thil thalo a awm lo." tiin a in be mawlh mawlh a.

Chhuah a tum chiah chu bang kil a Almirah sira kawr niawm tak, a hmawr lo lawr chu ava hmu a. Ava pan hnai a, a va phawrh chhuak a. A rin ang ngeiin kawr a lo ni a, a hrinloh fa Mama kawr, Pu Rama'n a pek ngei a lo ni. Mahse mak tak maiin chu kawrah chuan thisen a lo kai nuai mai a, Pi Liani chuan a ngaihna a hrelo hle mai.

****************

"Deborah, kal lo mai la."

"Keipawn kalsan che ka duh biklo, mahse ka chhungten lo haw turin min tur nasa tawh lutuk a."

"Min hmangaih lo mi? I tello te chuan a nuam lo dawn emai."

"Keipawn nuam ka tih bik i ring em ni? Mama, Pathian zarah kan dam anga, kan inhmu leh em em ang."

"Nia, beisei phawt ang."

Inngheng riala thu dunin Mama leh Deborah-i te chu an titi mawlh mawlh a, reife an awmdun hnu chuan haw zai an rel ve ta a. Mama chuan Deborah-i chu an in thleng a thlah a, "Muttui le, ka hmangaih che." tia an in thlah fel hnu chuan Mama pawh chuan an inlam a pan ve leh ta a, reilo teah chuan a thleng vat a.

Inchhung a lut tur chiah chu an inhnuai kudam atang chuan 'aw' a hre tlat mai, "VICTOR...KA FAPA...LO LET LEH RAWH.." ti ri niawm tak hi a hria a. Mak a ti kher mai, muang chang chuan kudam lam pan chuan a chhuk thla a. Kawngkhar bulah chuan a ding a, a han ngaithla chiang leh deuh a.

 

Patling aw thum tak hian, "VICTOR...VICTOR..KA FAPA.." a rawn ti leh chhur chhur mai a, mahse fiah tak si, zawi te si a ni. Kawngka chu a han kik dat dat a, "Tunge awm? A chhungah khan awm in awm em?" a han ti ngawt a, mahse thawm chu a reh hmak mai. A nui suk a, "KA bengchhe ri bak va ni suh." tih pah chuan kalsawn mai a han tum a.

A inher let leh chiah chu hmeichhe aw hian, "VICTOR...KA FAPA...KHAWNGAIHIN LO LET LEH RAWH...." a rawn ti ve leh ta mai a, tun tum zet zawng, a bengchhe ri a ni hauh lo tih a hre chiang ta. A huaisenna zawng zawng sawm khawmin kudam kawngka chu a hawng ta a, a bula thirtiang chu chuh vatin a hum ta ran mai.

Kudam chhung chu a thim vek mai a, "Tunge? Tunge awm?" tiin a vin vak vak mai, a sira plug chu a han on a. Light dim em em mai chu a rawn eng sen phut mai a, abak eng dang a awm lo. Thingzaina dawhkan hluia Pu Rama hmaikawr siam lo let reng mai chu ava hmu leh ta, ava pan hnai leh a.

A han lek kang a, chiang takin hmaikawr chu a en a. "Tunge i nih? Nang nen hian enge inzawmna kan neih?" tiin hmaikawr chu a be ta vak vak mai. Mahse a thil biak chu hmaikawr mai chauh a ni a, chhanglet thei turin nunna a nei ve hek lo. Chutah Mama thisen chu a rawn lum leh ta pup pup mai, a thla a tla zawih zawih a.

Hmaikawr chu a vuah leh ta a, a lu chu namen lovin a rawn hai ta chiam mai. Chhuatah chuan a thingthi hnawk a, a mitthla ah chuan a mumanga a hmuh, pitar leh putar te kha an lo lang leh ta chuai chuai mai a. A mit chu a rawn thip vak bawk a, "Ana lutuk....ana lutuk...khawngaihin tawp rawh." tiin a t(r)e vak vak mai.

 

A thawm chu a ring deuh a ni mahna, Pu Rama te nupa pawh an harh ta hial a. Rang takin kudam lamah chuan an chhuk ve ta nghal a, an fapa Mama chhuata lo vial ngawih ngawih an va hmuh chuan an hrilhhai hle mai. "Bawiha, Mama...engti zia nge?" tiin Pu Rama chu ava tlan phei nghal a, Pi Liani pawh chuan a zui ve nghal bawk a.

Mama chuan hmaikawr chu a vuah leh tawh miah lo, abula chhuatah chuan a khup zawngin a lo awm a. "Mama, Mama...i harh em?" tiin Pu Rama chuan a sawi vak vak a, "Pa..ana lutuk..ana lutuk.." tiin Mama chu a tawng tha hleithei lo. Pi Liani erawh chuan chhuata lo let reng hmaikawr zawk chu a en reng a, a ngaih a tha lo hle mai.

"Liani, motor chahbi han la rawh." tiin Pu Rama chu a mangang hle mai, mahse Pi Liani erawh a ding khawng reng thung. Vin zet hian, "Liani, motor chahbi han la rawh ka tih chu..." a han ti leh vak a, Pi Liani pawh a harh zawk mai. Rang takin a chho a, chahbi chu a han la a. Thei leh theilo chuan Mama chu an zawn chhuak a, damdawiin lam an panpui ta nghal a ni.

*****************

Doctor chuan a office ah chuan Pu Rama te nupa chu a ko lut a, "Thil mak tak a ni, damlohna leh rilru buaina lam chu engmah a awmlo. Mahse X-Ray result kan en hian a hnungzangah hian silaimu hmuh a ni a, zaichhuak a ngaih ang." a ti ta mai a. Pu Rama te nupa chuan mak an ti dun kher mai, an inen hu ringawt a.

"Silaimu a? Enge awmzia?"

"A awmzia chu maw...a awlsam thei ang bera sawi dawn chuan in fapa hi silai a kah a ni."

"Engtin nge a nih theih? Thisen engmah a awm silova."

"Awm lo reng ang chu....thla engemaw zat he silaimu hi a taksa chhungah a awm tawh a ni."

"Mahse engtin nge silaimu chu a pai char char theih, hna pawh tha takin a thawk a. Engmah na a sawi ngai lo, hmanni lawk pawh khan motorin a su a, engmah na a nei chuang bawk silo."

"Chu chu alawm keini pawhin mak kan tih chu, thla khat mai nilo, thla engemaw zat fe chu silaimu a pai reng tihna ania. Zai nghal angai dawn a, chu chu in remtihna kan lak phawt angai."

Pi Liani chuan a lu a dawm vawng vawng a, "Engzat nge a zai man ni ang?" a ti chuai raih mai. Doctor-i'n a chhan hma chuan Pu Rama chuan, "Doctor, he a silaimu pai hian amah ah, rilru lam velah nghawng a nei thei em?" tiin ahan zawt deuh tawp a. "Rilru lam ah kher chuan nghawng chu a nei lovang, mahse hetia zai chhuah lohva a awm reng chuan a taksa tan a thalo thei a, a chet velna lamah pawh a taksa chhungah hliam a siam thei a, thihna hial pawh a thlen thei a ni." tiin a chhang a.

 

Pu Rama chu a ngawi vang vang a, "Umm..engzat pawh ni rawh se. Khawngaihin zai chhuahsak ngei ngei ang che u, chuan tunah abiak theih tawh em?" a han ti a. "Aih, kan chiu muhil a. Kan zai nghal vat loh chuan a pawi thui thei a, chuvang chuan kan zai nghal anga. Kan zai zawh hnu darkar 1 velah chuan a harh ve tawh mahna, chutah chuan inbe thei chauh ang." tiin Doctor chuan a chhang a.

**********************

Operation theatre bulah chuan Pu Rama chu a tei kual a tei kual a, Mama chu zai mek a ni. Pi Liani erawh a thu ngawi reng thung a, Mama chu ngaihtuah ve tho mahse engemaw diklo a awm ngei a nih a ring tlat a ni. "Duhtak, hetah lo thu teh." tiin Pu Rama chu a ko va. Pu Rama pawh chu ava thu ve mai a, "Kan fapa chungah hian thil thalo a thlen ka hlau takzet a ni." tiin a phun nuah nuah a.

ZAwite hian Pi Liani chuan, "A thleng mek chu a nih hi.." a ti sap a. "Engmaw? Enge a thleng mek i tih chu awmzia?" tiin Pu Rama chuan a zawt vat a. "A taksa chhungah silaimu a lo awm reng a, mahse damloh leh taksa nawmloh pawh engmah a sawi ngai lo. Chumai ala nilo, hmanni khan motorin a su a, a kutruh tliak hnawp ri pawh ka hria, mahse engtin mah a awmlo. Engmah hliam a neilo mai pawh nilovin, motro khalhtu Rintea kha a ban na lam khan ava rek thei lehnghala.."

A sawi zawh hma chuan Pu Rama chuan, "Aww..kha thil kha sawi chhen tawh suh. A vannei animai, tuna ka hlauhthawn ber leh ka hriat duh ber zawk chu engtin nge silaimu kha a taksa chhungah a awm theih tih kha a ni." a lo ti hlur mai. "Chu tak chu alawm ka sawi reng ni, silai a kah a ni a, chu chu a tunhma nun thil a ni ngei bawk anga. Misual tak a ni tihna pawh a lo ni thei asin, Mama hi tunge a nih a, eng ang mi nge a nih kan la hre chiang reng reng hleinem." Pi Liani chuan a han ti leh a.

Chutia an inhnial lai chuan doctor a lo chhuak a, rang takin Pu Rama chuan a lo be vat a. "Doctor, enge ka fapa chu a an?" tiin a zawt nghal a. "A tha e, silaimu pawh zaichhuah a ni e. Thisen a chhuak hnem deuh a, oxygen kan pe a. Ka pu, thil pakhat in tih angai tlat mai." Doctor chuan a lo ti a.

"Engthil maw?"

"Hei, ka sawi tawh ang khan in fapa Mama hi a taksa chhungah silaimu hmuh ani a. Chupawh a dawlh palh emaw, tihpalh thil thua a taksa chhunga awm nilovin, silaia kah ngei a ni tih pawh a chiang em em a. A hliam kha a rei tawh avangin a vun pawp kha a ping leh tawh mai mai chauh a, a ser ta ringawt a ni. A lu a nat chhan leh a tluk nachhan erawh kha chu kan hre mai lova, dehydration vang pawh a ni thei. Engpawh chu nise, hetiang case ah hi chuan police hnena hriattir a ngai a ni." a ti ta mai a.

"Enga? Police a? Engvangin?" tiin Pu Rama chu a au nghal chel chul mai a, Pi Liani chuan a lo khap vat a. Doctor chuan, "Ka pu, ka sawi tawh ang khan tihpalh thilthu a silaimu dawlh palh chu nise thudang a ni ka tih tawh kha. Mahse kah ngei a ni a, chupawh revolver changkang tak hmanga kah ni ngeiin a lang lehnghal. Police hnena hriat tir ngei angai ang, FIR theh lut ula, in fapa hian hmelma a nei pawh a ni maithei asin." a han ti leh a.

 

Pu Rama thin chu a rim lek lek mai, "Police nge i nih a Doctor zawk? Hnuchhui thin ang maiin tinge i tawng vel a, operation in tihna man hi chu engzat pawh nise kan pe em em ang che. Mahse Police koh tih vel leh thildang engmah kan ti dawn lo, chubakah operation pawh in ti zo vek tawh a, tuna taka FIR i sawi leh vel le?" a ti ta khur khur mai.

"Kan patient a ni a, in remtihna thlapin kan zai a ni. Hei hi damdawiin a ni a, khawngaihin i aw key kha san suh." tiin Doctor chuan a chhanglet ve sak mai. Pu Rama chu a sa tawh kher mai, "Police inrawlhna tur awmin ka hrelo, kan sawi rem hma khan chungte chu sawi ta che.." tiin a vin leh khur khur a.

Pi Liani mangang chuan a pasal chu pawn lamah a chhuah pui a, "Insum rawh, ti khan vin vak vak suh." tiin a khap a. Doctor chu va pan lehin ava titi pui a, "Ka tihpalh takzet a ni, ka pu. Ni e, police te pawh chu kan lo bia ange." a ti a, an sawifel thei ta a. Mama pawh chu a rawn harh ve ta, mahse damdawiina ala awm rih angai tlat mai.

*****************

Damdawiinah chuan amahin a riah theih thu te leh riah pui a ngaih loh thute a sawi zawh hnu chuan Mama chu a nu leh pate chuan an haw san ta a, amahin a riak dawn ta a. In lamah chuan Pu Rama te nupa chu an haw a, an inhau zui nghal bawrh bawrh mai. Pi Liani chuan lungawilo tak hian, "Tinge khatia doctor te i vin vak vak a, zahthlak lutuk." a han ti hlur a.

"I hrethiam lo a ni, kan fapa hi kan chan mai ang tih ka hlau alawm." tiin Pu Rama chuan a lo chhanglet a. "Doctor pawhin a tha a tih kha, khatia police te leh FIR chungchang a sawi avanga thinrim a rak chiam kher kha a ngai hleinem." Pi Liani chuan a lo ti let leh hlur a. "Ni reng e, police te an rawn inrawlh anih chuan keini hi min man thei a ni." Pu Rama chuan a ti ta mai a.

"Enge min man ve ngawt ang?"

"Mama hi tuma hriatpui lohvin kan enkawl a, kan fapa angin mi bulah pawh kan sawi a. Police te kan hriat tir lova, kan khuaah kan thuin kan awm tir ve ringawt bawk a. Pem lehkha te, birth certificate te leh thildang engmah a nei hleinem. A hming tak tak pawh kan hrelo, police te bulah enge kan sawi tak ang?" tiin Pu Rama chu a mangang hle mai.

"A tirah pawh ka sawi reng kha, i thu i duh lutuk a nih kha." tiin Pi Liani chu a tap lek lek tawh mai. "Kan dinhmun kan sawt zia hi i hria em? Amah vanga kan eizawnna te leh kan inchhung dinhmun inthlak nasat zia te hi, min chhawk tu ber a ni a, kan tan a tangkai takzet a sin."

"Ka hre ve tho, mahse thil dik a ni hleinem. Kan fapa tak tak pawh a nilova, a mizia leh a awmdan te lah hi a mak si. Ka ngaih a that lohna a rei tawh, awmpui reng chi ah pawh ka ngai lo."

"Ka fapa a ni a, ka chan phallo a ni. A hriatna a neih let leh hi ka hlau hial zawk asin, ka bula awm reng turin ka duh a ni."

Pi Liani chu a ding hluai a, "Lo kal teh, thil ka hmuh tir ang che." tiin roomah chuan a lut a, Pu Rama chuan a zui lut a. Pi Liani chuan Mama kawr, thisen kai nuai mai chu a phawrh a. A pasal hmuh tir pah chuan, "Hei hi han en teh, hei hi Mama kawr ngei a ni. Enge awmzia ni ta ang? Hei hi tu thisen nge ni ang?" tiin a lek kang ta vu mai.

Pu Rama chuan mak tih hmel tak hian kawr chu a la a, a han enchiang a. A ngawi vang vang a, "Chuan enge ni vak? A kawra thisen a kai avang hian ka fapa chuan tual a that i tihna em ni?" ala ti hram a. Pi Liani chu a sa tawh kher mai, "I la hrethiam chuang nange? I fapa Mama hi mi tha a nih ka ring lo."

"Enga? Enge sawi i tum ber chu ni a?"

"A kawrah tiang khawpa nasa hi thisen a kai a, he kawr hi Peka thih zana a hak kha a ni, ka la hre vek. Khami bak kha chu he kawr hi a ha leh tawh lo hrim hrim, nizan khan bang kilah sawn ka chhar a ni. Chuan nizana kudama a lo let reng kan hmuh pawh khan abulah khan i hmaikawr siam khu a awm ve bawk a, nizan zanriah kan ei laia hmaikawr chungchang i sawi laia a hmel awmdan te kha ilo hmu ve em?" tiin Pi Liani chu a ang ta bawrh bawrh mai.

"Enge hmaikawr chu i rawn sawi chhuah daih a? Enge inzawmna a neih?" tiin Pu Rama chuan a zawt a. "A nei em chu ka hrelo, mahse hmaikawr chungchang i sawi lai khan a mitah khan hlauhthawnna a awm a ni. Tichuan nizanah kudamah a lo let reng a, a bulah hmaikawr kha a awm bawk a. Thil diklo chu a awm a ni, a taksa chhungah silaimu a awm bawk a, Mama hi misual tlanbo te pawh a lo ni thei asin." a ti ta siah siah mai.

"I mawl em ni? Khawiah ani hi misual a nilovang. Misual ni ta se kan pawisa te la in a tlanbo anga, anih loh pawhin min that ve daih tawh ang. Peka tual thih chungchangah khan Mama hi i ringhlel em ni? Eng ang nu nge maw i nih le?" tiin Pu Rama chuan a vin let ta hrep mai a. "Nu a? Kei hian fapa ka nei lo, Mama hi ka fapa angin ka la en ngai hauh lo." a ti let ve sak mai.

"Ni e, hetiang khawpa kan nupa min tanpuitu hi nang chuan misual ah i ngai ania tiraw? I mak hle mai, misual chu nise min rawk chhe zo vek tawh ang. Mahse kan nupa tan tiin hah takin a inhlawh a, a pawisa hlawhchhuah pawh a pek thlap thlap che kha. Tichung chuan misual ila ti amaw? Cheng khat pawh ala dilloh che kha.." a han ti leh pung pung a.

"I sawi dik alawm, engpawha nise naktukah Police kan biak angaih dawn kha....engtin nge kan chhan ang tih lo ngaihtuah rawh. Keichu ka kut ka sil e, engmah sawi ve tur ka nei tawh lo." tiin roomah chuan a lut hmak mai. Pu Rama pawh a mangang takzet, a tei kual a tei kual ringawt mai a ni.

********************

Zan dar 10 vel a ni a, Mama pawh tui takin amuhil bawrh bawrh mai. Chutia thi ang dera a mut reng lai chuan a beng chuan thawm a hre leh ta tan tlat mai, "SILAI-A KAH I NI." tia doctor-in a hrilh laite chu a rawn ri nawn mawlh mawlh a, a mumangah chuan tuiah a lo tla a. A lo inham buai nasa mai a, tui chhungah chuan tu emawni hmaikawr vuah hian a lo melh kur reng bawk.

A harh chhuak hlawl mai a, a thlanin a bual huh vek mai. Mahse a mumang chuan a la kiansan duh mai lo a ni chek ang chu, a lu chu a rawn na leh vak mai a. A mitthla ah chuan thil hrang hrang a lo lang zut zut mai, a chang leh ramhnuaiah te a lo awm a, hmaikawr mak leh hlauhawm tak mai hi a vuah reng bawk.

A chang leh mi a that a, a chang leh a tlan chhe bawk a. A rilru mangang leh buai lutuk chuan a lu chu dawm vawng vawngin, "ANA...ANA LUTUK..MIN PUI RU." tiin a au ta chel chul mai. A au thawm chu hria in Doctor leh Nurse te pawh an lo lut vat a, Mama chu a khumah chuan a lo tal vak vak mai.

An man bet a, Doctor chuan mutna damdawi chu syringe ah chuan a han hip lut a. A chiu tur chiah chu Doctor chu rum em em hian a lo melh a, "Mama, hahdam rawh...ka chiu muhil ringawt dawn che alawm." tiin Doctor chuan a han hnem a. Chutah Mama mit chu a sen ta rum mai, "MAMA KA NILO....VICTOR-A ZAWK.." tih pah chuan a tal phut a.

Khum atang chuan a zuangthla a, nurse te chuan chelhbeh an tum nghal vat a. Mahse Mama chu a chak lutuk tlat, tuman an hneh lo. A paih thal tawp tawp hlawm mai a, thawm pawh a ring hle. Security guard te hial an lo lut ta a, mahse Mama chuan bang deng dawt dawt khawpin an lo sawisa hrep mai. A tawpah doctor chu a han melh vang vang a, "Tluang takin le." tiin a hnek thal tawp a, tukverh atang chuan a zuang chhuak ta daih mai.

*******************

Zinglam dar 1 a ri tawh a, Pu Rama te landline telephone hlui ve tawh tak mai chu a rawn ri ral ral mai a. "Tun ang hunah tunge maw min rawn phone le?" tih nuah nuah pah chuan Pi Liani chu a tho a. Phone chu la in, "Hello?" a han ti a, chuta phone atanga a thu hriat chuan a ti hrilhhaiin a ti mangang hle mai, engmah pawh sawi theilo chuan a ding ngawi reng a.

Pu Rama pawh a lo harh a, "Enge ni a? Tunge ni?" a rawn ti ve bawk a. Mahse Pi Liani chuan a chhang lo, a melh ngai a melh ngawr ngawr ringawt mai. Pu Rama ngaih tha lo chu a tho ve ta a, a nupui bulah chuan va kalin, "Liani, enge ni ka tih chu?" tiin a va zawt leh a. Mahse a ngai te ang bawkin Pi Liani chuan a lo la chhang chuang lo.

Phone chu a han la kang a, "Hello, tunge ni?" a han tih chuan phone ami chuan, "Pu Ram, damdawiin atangin a ni a. Hei in fapa Mama khan buaina a siam a, damdawiin atangin a tlanchhuak daih mai. Police kan call tawh a, an zawng mek e. Khawngaihin damdawiin lamah inlo phei ve dawn amawni le kan tia, hei buaina a nasa angreng khawp mai." a rawn ti ta mai a.

********************

Zing khua a lo var a, Mama tlan bo thu leh buaina a siam thute chu a darh chak leh ngang mai. Police te pawh chuan Pu Rama te nupa chu thu an zawt fiah a, tumah hriattir lo leh anmahni thua Mama, lui sira nikhawhrelova let reng, an hruai haw thute, an fapa anga an enkawl chhoh thute chu Pu Rama chuan a sawichhuak ta vek a.

Sawibuang khua ah chuan Mama bo thu chu titi ber a ni ta hial a, Pu Rama te nupa chuan dem an hlawh hle bawk. Mama erawh hmuh tur a awm tawh lo, police te chuan an zawng mek zel a. Inspector pakhat, case chhuitu tur bera an ruat, Awmpuia chuan Mama ward awmna zawn tukverh chu hnuailam atang chuan a han thlir chho vang vang a, "Mihring tan chuan tlak hlumna tham a ni." a ti zawi sap a.

Pu Rama te nupa inpuanna chu a record a, a ngaithla nawn reng a. Station lamah let lehin a office ah chuan a thu a, a inngaihtuah vang vang a. "A zuangthla tiin an sawi a, mahse a zuanthlakna kha a sang lutuk mah mah. CCTV engmah vuah a ni ve bawk silo, a zuangthla anih chuan a thi ngei ang. Mahse thisen far khat tak ngial pawh a awm bawk silo, thil mak tak chu a ni." a han ti nuah nuah a.

*********************

Pu Sanghluna, kum 57 a upa, ramvah hrat em em mai chu a thangkam en turin silai nen a inpu thla hnak hnak mai a. A thleng tep tawh tih ah chuan tlangval pakhat, hmeltha tak leh fel hmel zet mai lo let reng chu a hmu ta thut mai. Rang takin ava pan vat a, "Tlangal..tlangval..i tha em?" tiin a sawi vak vak a.

Chu tlangval chu tudang nilovin, Pu Rama leh Pi Liani te nupa hrinloh fa, Mama ngei kha a ni. Mama chu a harh eih lo, Pu Sanghluna chuan a mar te a han dek a. "Ehe, ala dam tlat mai." tih pah chuan thei leh thei lo hian a pawm tho a, a paw ta a. An thlam chhe ve tawh tak lam chu a panpui nghal a, chhuatah chuan a mut a.

Tih harh tumin a han bei leh ngial a, mahse Mama chu ala harh thei tlat lo. A silai ah te chu a han dah fel a, tichuan tui te chu a han intir a. Mahse Mama chu ala harh chuang lo, a la mu zawi reng mai a. Pu Sanghluna chuan puan te a sin tir a, tichuan thuk ah chuan thingpui a lum a. Meizial zuk khuk hluah hluah pah chuan mei te chu a chhawm tha mual mual a, chutih lai tak chuan a hnung lama silai in kau ri a hre ta tlat mai.

A ding vat a, lehlam a hawi let chiah chu a phu nasa kher mai. Mama chuan Pu Sanghluna silai chuan Pu Sanghluna chu a lo tin reng mai a, "Tunge i nih?" a ti khur khur a. Pu Sanghluna chuan zaidam tak hian, "Hahdam rawh, i hmelma ka nilo. Nikhaw hrelovin ilo let reng a, hetah hian ka hruai ta che a ni." tiin a hrilhfiah a.

Mama chu ahawikual zek zek a, "Tunge i nih min hrilh rawh." a han ti vin leh hlur a. "Sanghluna ka nia, ka thangkam en turin ka chhuk mek a. Tichuan ka...." a tih lai chuan Mama chuan vin zet hian, "A tawk...min chhui ru a ni tiraw? Police i ni em?" a han ti leh vak vak a. "Nilove, police ka nilo. Mi pangngai ve mai chauh ka ni, khawngaihin min kap suh." tiin Pu Sanghluna chu a hlauthawng tan ta khawp mai.

Silaia tin reng pah chuan Mama chuan kawngka lam a pan a, "Min rawn zui suh, anihloh chuan ka kap ang che." a ti leh khur khur a. "Ka silai kha.." a han ti dek dek chu Mama chuan, "Ka hria, mahse ka hlatah i awm angai a ni. Anih loh chuan i thi animai, min rawn umzui hlek suh ang che." tiin a chhuahsan ta a.

*****************

Inspector Awmpuia phone chu a lo ri a, Mama zawngtute zinga mi Police constable pakhat a lo ni. "Sir, Hospital piah a ramngaw lamah khan kan kal ve zel a. Hospital atanga km 20 vel ah thisen kan hmu a, Mama thisen a nih leh nihloh hriatna turin a sample kan la a, kan rawn thawn mek e." a rawn ti a.

"A that hlauh chu, result a chhuah hun thleng ka lo nghal phawt anga. Mama thisen a ni emaw, nilo emaw...SI Mawitea nen kan lo kal ve nghal ang." a ti a. "Ka va han man dawn chiang che em, Hmela...kan khuaah dan lo angin i rawn awm a, chutah damdawiinah staff te kut i thlak leh bawk a, i chaklo khawp ang." tiin a inhrosa nasa mai.

******************

Tlai lampang a ni a, ni pawh a hniam leh tawh khawp mai. Nula pakhat leh tlangval pakhat, inngaizawng te chuan chance an nei mek a. Thingkung phenah chuan an lo in kaih nasa ngang mai, chutia nuam ti taka an khawsak dun mek lai chuan a hmeichhia zawk chuan engemawni hnimbuk kara phe zeuh chu a hmu a, a phu zawk mai.

"Enge ni a? Tinge i phut zuk a?" tiin a bialpa chuan a zawt a. "Tah sawn...engemawni a phe zeuh mai." tiin hnimbuk chu a kawk a. A bialpa chu anui suk a, "I dawih lutuk, thehlei te pawh a ni mahna...hawh teh, i chhunzawm leh teh ang." tiin ala phur ngang mai. An han che dun leh dawn chauh a, thawm a rawn awm leh ta tlat mai.

"Awii...duat, haw teh ang. Tu emawni chu an awm chiang alawm." tiin ahmeichhia zawk chu a in ha tha nghal sawk sawk a. A bialpa chu a lung nilo hle mai, "A tha lawm, anih chuan kal ila." tiin a tum bur mai. An in hak fel hnu chuan kal mai an han tum a, a hmeichhia zawk chu a au vak a, a bialpa hnungah chuan a biru nghal a.

An hma zawn an han en chiah chu mipakhat, ft 6 chuang daiha sang, puan vara hmaituam, amit chiah lang thei chu a lo ding khur mai. A mipa zawk chuan, "Tunge i nih? Enge i duh?" a han ti tuar a. Mahse chupa chuan a chhang lo, an pahnih chuan a thlek ngawih ngawih ringawt mai. A mitmeng lah chu a sen hian a sen rum mai a, hmeichhia chuan a hlau kher mai.

A bialpa thinrim chuan, "Kal bo rawh, ZAwnga.." tih pah chuan ava hnek pawp mai a, mahse chupa chuan na ti awm ang pawhin a awm eih lo. A rek kang thut a, thingkung deng dawt khawp chuan a rek bet a. A hmeichhe hlau lutuk chu a tlanchhe ta daih mai, "Nilo..min chhuah rawh." tiin a bialpa chu a au vak vak a.

Chutah chupa rapawm zet mai chuan dim baksak lo leh lainatna tel hauh lo chuan chu tlangval hmaiah chuan a t(r)um ta siah siah mai a, a chhuih bawk a. Thisen pawh a per chhawk chhawk mai, chu tlangval chu a thi ta nge nge a. A hmaituamna chu a phelh a, tudang nilovin Mama bawk kha a lo ni.

Chu tlangval chu a phelh ruak vek a, a thawmhnaw te, a jacket te chu a hak sak a. A maimitchhing vang vang a, van lam hawiin a nui suk a. Zawite hian, "Ka nu, ka pa//ka lo haw e. In fapa Victor-a ka lo haw e. In thu ang zelin ka awm leh tawh ang, ka hna chu ka tan leh thei tawh e." tiin chu tlangval ruang let reng chu a kalsan ta a.

*****************

Sample result a lo chhuak a, an rin ang ngeiin Mama thisen ngei a lo ni. Inspector Awmpuia pawh a phur ta hle mai, "A nuam dawn e, a tlanchhe rei hauh lovang." a han ti vel a. Constable chuan, "Sir, a lan dan chuan hling emaw, thing hmawr zum vel a tai palh anga, a thisen a chhuak a nih a rinawm ber." a lo ti a.

"Engpawh chu ni rawh se, khulai ramngaw velah khuan ala awm reng tih a chiang. Khaw thenawm te pawh kan be tawh a, an police te nen kan inbe pawp vek tawh a. Kil tinah an chang ve vek tawh bawk, chumai bakah kan kahw tlangval tlawmngaite an duty bawk a, a tlanchhuak hauh lovang. SI Mawitea va ko la, i zu zawng ve teh ang u." tiin Awmpuia chuan a chhang a.

*******************

AWmpuia leh MAwitea te pawh chu an zu thleng ve a, khua a thim lek lek tawh. Ni a tla tawh a, unau hmel hai hun vel a ni. Torch light nen chuan Mama sulhnu chu an chhui zel a, an zawng ngawrh kher mai. Mahse Mama hmel chu sawi loh, a thawm tak ngial pawh hriat tur a awm der bawk silo.

Hmun hran hran ah an inthen darh a, mahse an mahni leh mahni bawk te chu an intawk leh thin a. Chutia an zawn mek lai chuan Awmpuia chuan hmeichhe tap thawm niawm tak, inhnit feih feih ri hi a hre ta tlat mai. Bengchheng lo tur chuan zaizirin midangte chu a hrilh a, thawm lo awmna lam chu an va pan a.

 

Chu hmeichhe thawm pawh chu a ring ve telh telh a, a thaw ri hrawk hrawk hi a ni ber mai. An thleng tep tihah chuan thing lian tak phen atang chuan hmeichhe pakhat hi a rawn chhuak hlawl mai a, thingtum lian em em mai hi a lo lek kang a. AWmpuia chu a vaw fuh hman teuh hle mai, an au rual thawt a.

"Tunge i nih?" tiin Awmpuia chuan pistol chuan a tin a. Chunu chuan a thing tum ken chu a dah thla a, "Ka pu, khawngaihin min pui ru." tiin a tap lek lek mai. Awmpuia chuan zaidam tak hian, "Hlau suh, police kan nih hi. Enge i chungah thleng a? Enge hetah i tih?" tiin a zawt a. "Ka hming chu Rosy ania, ka bialpa nen hetah hian tlaiah inhmu turin kan kal a. Mahse...mipakhat a lo kal a, ka bialpa Rova chu a sawisa hrep a." tiin a hmai a hup a, a tap vak vak mai.

AWmpuia chu a phu zawk mai, "Tumaw? Tumaw lo kal?" a ti nghal chiam chiam a. Rosy chuan, "Ka hrelo, tunge a nih kha hrelo. Palian lam ania, a sang lutuk." tih ringawt chuan a chhang a. Awmpuia chuan Mama thlalak chu a han hmuh tir a, "Hepa hi a ni em?" tiin a han zawt a. Mahse Rosy chuan, "KA hrelo, a hmai atuam tlat a....a hmel ka hmu lo." tiin a lo chhang ta tlat mai.

 

"Khawi lamah nge a kal? Khawnge i bialpa chu?" tiin a zawt leh a. Tap chung hian Rosy chuan, "Ka hrelo, Rova kha a rawn sawisa ringawt a. Ka hlau a, ka tlanchhe ta a ni." tiin a chhang leh a. "Khawilai hmunah nge chupa chu i hmuh a, min hruai thei angem?" a han ti leh a. "Helai hmun hi ka hriat ngai loh vang alawm tunah pawh kawng ka bo reng ni, khawilai tak nge pawh ka hre leh tawh lo." tiin Rosy chuan a lo chhang leh a.

Chutih lai chuan Awmpuia phone chu a rawn ri a, "Hello Sir, kawngpui hnaih deuh lamah bike, Gixer pawl(blue) kan hmu a, a number chu MZ01 J 9036 a ni e." a rawn ti a. AWmpuia chuan Rosy chu a han melh leh a, "MZ01 J 9036...i hre ngai em?" a han ti a. Rosy chuan, "Aw...ka bialpa bike a nih chu...Rova bike a nih chu." a lo ti nghal vat a.

 

"A tha e, Station lamah athen khan lo va dah phei ula....kan hna erawh chhunzawm zel a ni ang." tiin phone chu a dah a. Rosy chuan Awmpuia te chu Mama a hmuhna ni a ahriatna lam pan chuan a hruai ta a, khua chu a thim hian a thim vek tawh. Rei fe an kal hnu chuan mipa pakhat, saruak veka lo let reng chu an hmu ta thut mai.

An ding chat hlawm a, an han enchiang a. Chuveleh ring zet hian Rosy chuan, "Nilo, Rova..." tiin a tap nghal vak vak a. A bialpa, Rova ruang ngei a lo ni. Rosy chuan a kuah a, a tap vak vak a. Awmpuia chuan alu a dawm vawng vawng a, "Mai mai chuan aw...." tiin a inseh ruh nasa mai. Rosy chu a bawihsawm nghal a, "Insum rawh...tap ring vak suh. Helai hnaiah hian kan mizawn mek hi a awm ve reng thei ania, i chhungte i phone tawh em?" tiin a han zawt a.

Tap chung chuan, "Ka phone ka thlauh daih, khawnge a awm pawh ka hrelo...ka pu, min hruai haw rawh u. Ka haw duh..khawngaihin." tiin a mangang kher mai. "Kan hruai haw dawn che alawm, lungngai reng reng suh." tiin Awmpuia chuan a hnem a. Midang an phone a, ruang chu an buaipui nghal a.

******************

"Ava han pawi tak em....ka thiamloh vek a ni." tiin Pu Rama chuan a lu a dawm vawng vawng mai a, a mittui chu a hru a hru a. Pi Liani erawh a thinrim kher mai, "Lo enkawl lo tawp ila tha tur...ka rin ang ngeiin misual tlanbo chu a ni ta ngei a nih hi." ati deuh khur khur a. Chutih lai tak chuan kawngka a rawn inkik kauh kauh mai, "Va hawng teh, police bawk an ni ang." Pi Liani bawk chuan a han ti leh hlur a.

Pu Rama chuan kawngka chu ava hawng a, mahse a rin lo lutuk mai a ni tlat. A fapa, an zawn mek, MAma ngei mai chu a lo ding khur mai a. Pu Rama mak ti lutuk chu a tlawh hnung dawr mai, "Mama..Mama nang maw?" a ti hu mai a. Pi Liani pawh chu a lo phei ve nghal a, "Mama, khawnge i kal daih a? I tha em?" a rawn ti ve nghal bawk a.

Mahse Mama chuan rum zet hian a melh dun a, "Mama ka nilo...in fapa pawh ka ni hek lo. Ka hming chu Victor-a a ni, Victor Lalthanmawia." tih pah chuan Pu Rama chu a rek nghal a. Pi Liani mangang au a tum chu Mama, Victor-a ni ta chuan a lo melh vat a. "T(r)e reng reng suh...anihloh chuan i pasal hi ka rek hlum ang." a ti nghal khur khur mai.

Pu Rama chu a han melh leh a, "Khawiah nge hmaikawr kha a awm?" a han ti leh chhur chhur mai a. Thei leh theilo hian Pu Rama chuan, "Min..min thlah la, ka pe ang che.." a ti tawk tawk a. Victor-a chuan a thlah a, Pi Liani chu ading khur zawih zawih tawh mai. Pu Rama chuan an chhuar hnuai bera hmaikawr chu ava la ta a, Victor-a chu a pe a.

 

Victor-a chuan hmaikawr chu a han en vang vang a, a nui ta var var mai. Pu Rama chuan, "Mama...khawngaihin heti hian awm suh. Ka fapa ang chiah in ka en che kha, nangpawn ka pa tiin min koh thin kha." tiin a tap lek lek mai a. Victor-a chuan en miahlo hian, "Chuvang chuan alawm lawmthu hrilh tur che u a ka lo kal reng ni, ka lawm takzet a ni. Awmlo ula chu ka thi daih tawh awm si a, ka lawm e." tiin hmaikawr chu a vuah a.

Chuveleh Pi Liani chuan chem a chuh thut a, Victor-a hnungah chuan a vit tlum ta pawk mai. Pu Rama mangang chuan, "Liani, enge maw i tih le?" tiin a nupui chu a vin vak a. Victor-a chu a thingthi hnawk a, a thawk ta hrawk hrawk mai. "Mama, mama...i tha em?" tiin Pu Rama chuan a bawihsawm nghal vat a.

Pi Liani chuan vin zet hian, "Engtin nge khatia i la ngaihtuah theih zawk, police phone vat ila...rawn man rawh se. Misual a nih kha, Peka thattu pawh kha amah a ni." a ti chiam chiam a. An landline telephone lam pan chuan ava kal a, Police chu a phone ta a. "Hello Police...kan inah Mama chu a awm e..." a tih lai chuan Pu Rama chuan phone chu a va paih thlak sak a.

"I mawl em ni? Engthil nge i tih hi?" tiin a vin hrep a. Pi Liani chuan, "Min that mai ang...saw pa saw misual a nih saw...kan fapa a nilo.." a tih lai chuan engemawni hi a rawn thlawk ri fua a, Pi Liani tawnglai chu a tawp chat mai. Pu Rama chuan a nupui awmzawn a chemte lo bur vu mai chu a en a, "Nilo..Liani..nilo." tiin a tap nghal a.

Victor-a chu choka lamah chuan a lo ding leh khur tawh mai a, a hmaikawr vuah nen zawng zawng chuan a rapawm takzet. A rawn kal phei leh a, "MAwla...engthil nge i tih hi?" tiin tap chung hian Pu Rama chuan a lo vin vak vak a. Ngawi reng chuan Victor-a chuan Pu Rama chu a en reng a, Pu Rama erawh an nu ruang kuah chuan a tap hawm hawm mai.

ZAwi muang hian Victor-a chuan, "KA tihpalh...ka duh vanga ti ka nilo. Ka nu leh pate thlarauvin min tih tir a ni, min ngaidam theilo mah la, ka tihpalh takzet a ni tih hi min hriatsak hram ang che." a ti sap a. Chutah Police te chu an lo thleng hnai ta, siren a rawn ri ta ruih ruih mai. Pu Rama chuan a mittui a hru a, "Mama...Victor...i hming chu engpawh nise. Hman atang khan fapa neih hi ka chak thei em em a, a tawpah nang ka tawng che a. Mahse kei zawng, fa neilova boral tur mai chauh ka lo ni a nih dawn hi. Ka fapa, tlanchhe rawh...an man hma che hian tlanchhe rawh." a ti ta daih mai.

Victor-a pawh chuan mak ti tak hian Pu Rama chu a en a, "Ka lawm e." a ti zawi leh sap a, a tlanchhe ta a. Pu Rama chuan a thlir zui vawng vawng a, "Aww..ka va han vanduai bik tak em." tiin a tap hawm hawm a. Tichuan an nu awma chemte bur vu mai chu a phawi a, chutah Police te chu an lo lut ta.

Pi Liani, thisen nena lo let reng bula Pu Rama'n chemte a lo hum reng an va hmuh chuan Pu Rama chu silai chuan an tin nghal thup a. SI chuan, "I chemte kha dahthla la, banphar rawh.." a han ti a. Pu Rama chuan chemte chu paih lovin a hum reng a, a ding a. "I chemte kha paih rawh...chuan khawnge i fapa MAma a awm?" tiin a han zawt leh a.

Pu Rama chu a nui suk a, "MAma a nilo, ka fapa pawh a ni hek lo. A hming chu Victor-a a ni, Victor Lalthanmawia....in thei anih chuan va man ang che u, mahse in man hauh lovang. A nung chungin, a nungchungin a eizo vek dawn che u." tih pah chuan chemte chu a han lek kang vak a, amah chu a in vit ta siah mai. A tlu hnawk a, ka pawh chhawn lovin a boral ve ta nghal a ni.

*****************

Inspector AWmpuia te lam erawh ramhnuai lamah chuan Victor-a zawngin an la awm reng a, Rosy bialpa Rova ruang erawh police dang te chuan postmortem turin an phur liam tawh thung. Rosy pawh a chhungte an phone sak a, hruai haw tur chuan an inbuatsaih mek a. Zan a rei thuai dawn avang chuan Awmpuia pawh chuan Victor-a zawn hna chu tihtawp rih mai tha in a hria a, engtia hmalak zel nge tha ang tia a inngaihtuah mek lai chuan a phone chu a rawn ri leh a.

"Hello, Sir...Pu Rama leh a nupui Pi Liani te an thi." tiin an rawn hrilh ta mai a. "Enga? Engtin?" a ti hu mai a, phone ami chuan Pu Rama te ina thil thleng an hriat ang ang chu a rawn hrilh a, Awmpuia chu a thin a rim kher mai. Phone dah pah chuan, "Pu Rama te nupa an thi anih chu, he nula tan pawh hian helaia awm reng chu a him lovang. I haw phawt teh ang u, in lamah duty dan tur kan rel fel dawnnia." tiin haw chu an tum ta a.

*******************

An kal mek lai chuan putar pakhat an tawk thut mai, "Tunge i nih?" tiin AWmpuia chuan pistol chuan a tin nghal a. Chu putar chuan a ban pharin, "Min kap suh, misual ka nilo." a ti nghal chiam chiam a. "Hetah enge i tih?" tiin a zawt leh a. Chu putar chuan, "Sanghluna ka nia, khulai thlang deuh ah khuan arbai kan nei a. Ka feh lawk alawm le, ka haw dawn chiah a, enge ni ta?" tiin a lo zawt let a.

Awmpuia chuan a pistol chu a dah thla a, "Ka pu, min hrethiam la...hei police kan ni a. Misual kan um mek a, ilo hmu mial lo maw? Tlangval kum 25-30 bawr vel, hmelchhe lemlo tak...e, ngawiteh..athlalak ka kawl reng alawm mawle." tih pah chuan a phone a phawrh a, Pu Sanghluna chu a hmuh tir a.

Pu Sanghluna chuan thlalak chu a han en vang vang a, "Eheee..hepa hi ka hmu...ka hmu alawm.” a ti ta mai a. Awmpuia pawh a phu zuk mai, “Animaw? Khawiah, khawnge a awm?” a ti nghal chiam chiam a. Pu Sanghluna chuan, “Vawiin chhun ah khan nikhawhrelovin a lo let reng a, kan thlam lamah ka pawm thla a. MAhse a rawn harh a, ka silai chu chuhin min tin a...umzui lo turin min hrilh a, tichuan min kalsan ta a ni.” tiin a hrilh a.

Awmpuia chuan Pu Sanghluna chu a han en vang vang a, “I silai a chhuahpui i ti bawk sia, mahse kha silai chu i ak tho bawk sia.” a han ti a. “Nia, ka haw kawngah ka silai hi ka chhar leh alawm.” tiin a chhang a. AWmpuia chu a han thaw deuh hak a, “Umm, engpawh nise kan rualin lo haw rawh. Tumah hi kal hran a chiloh, he kan mi zawn mek hi mi hlauhawm tak a nih hi.” a han ti a.

An kal leh tur chiah chu Rosy chu a t(r)e tuar mai, “Ana lutuk..” tiin a thu nghal hnawk a. An han enchiang chu a ke a lo thi zawih zawih mai, darthlalang kehthem zum em em mai hi a kephah ah chuan a lo bur vu mai a, a slipper ah a tlang chho vek a nih chu. Rosy na ti lutuk chu a tap vak vak a, an buaipui nghal a.

Police zinga pakhat chuan, “Sir AWmpui, hei..han enteh.” tih pah chuan an hma zawn chu light chuan a han chhun a. An kal leh na turah chuan darthlalang kehthem tamtak hi a lo inphun teuh mai a, chung zinga pakhat chu Rosy chuan a rap fuh tihna a ni. AWmpuia chu a nui suk a, “Hmela mai mai chuh, thang ka kam e a ti ve animaw...a chak lovang.” a han ti khur khur a.

**********************

A tuk zing mai a Aizawl lam a pan dawn avang chuan Deborah-i pawh chu a insiam mawlh mawlh a, a thawmhnaw te chu a pack fel a. “Ka nute, ka van ngai dawn tak che u em. Mahse in khua ve hi chu, awmreng na chi pawh a nih loh hi..” tiin a ner deuh nung a. A nutei chuan, “AWi, keipawh Aizawl lama lo pen ve mai ka duh...kan khua hi ka hlau zo vek tawh.” a lo ti ve bawk a.

A nutei pasal pawh chu room atang chuan a rawn chhuak ve a, “Deborah-i chu kan inchhungah i tangkai asin le, i haw mai te chuan a nuam awm lo emai.” a rawn ti ve bawk a. “Nia keipawh ka la awm chak a, mahse inkhua hi zawng...a den emai. Ka nu leh paten min ngaihtuah tawh lutuk ang, ka ngai dawn khawp mai che u.” tiin Deborah-i chuan a chhang a.

A nutei chuan kuhva thial sawk sawk pah chuan, “A hrim hrimin, Mama an tih hi tunge a hmingpum ni reng reng a? Keichu ka hlau teh ania, kan khuaah hian a rawn awmna pawh ala reilo ropui lehnghal." a han ti nuah nuah a. Deborah-i pawh chuan, "Ka hre biklo, Mama tih baka an sawi ka hrelo." tiin a lo chhang a.

Chutah ring zet hian a nutei pasal, Pu Dawnga chuan, "Ehe....ava zialo ve..ekhai aw.." tiin a phone chu a en reng ringawt a. "Enge ni a? Engthil nge?" tiin a nupui, Pi Siami chuan a zawt vat a. Pu Dawnga chuan hlauhthawn hmel leh pawi tih hmel tak hian, "Pu Rama te nupa an thi anih hi, thah an ni...zanin dar 7 vel khan..hei group ah an rawn sawi." a ti ta mai a.

Deborah-i chuan a hlau hle mai, "Enga? Tuin nge that anga...awi ka duhlo keichu...ka hlau emai." tiin a khur titih nghal der mai. "An fapa, tuna an zawn mek..Mama hi a nih ngei an rin thu an sawi nual bawk. Chuan hei...Mama hming dik tak hi Victor Lalthanmawia tiin police ten an sawi bawk." Pu DAwnga chuan a han ti leh a.

"Kan va kal ve dawn nge....inah kan tawm zawk mai dawn?" Pi Siami chuan a han ti a, "Va kal ve ang u...an khawngaihthlak awm ve alawm. Ruang hlawmtu tur tak ngial pawh an nei dawnlo ania, police te pawh an awm nual ang chu..insiam ang u." tiin Pu DAwnga chuan kal ve chu a rawt ta tlat a, Deborah-i leh a nutei te chu phur fahran lo chuan an insiam a.

*****************

Darthlalang kehthem te chu an then fai zawh hnu chuan AWmpuia te pawh chuan kawngpui an thleng ve thei ta a, Rosy chu damdawiinah kalpui nghal niin AWmpuia leh SI Mawitea te erawh Pu Rama te in lam panin an inkhalh phei nghal a. Reiloteah an thleng a, ruang pawh khawihsawn lohvin puan in an lo khuh ringawt a.

Mipui chu an pungkhawm teuh tawh, AWmpuia chuan mipuite chu a han hnawtkiang hlawm a. Ruang chu a han en vang vang a, "Pu Rama chuan engmaw a invihhlum hmaa a sawi?" tiin constable pakhat chu a zawt a. Constable chuan, "Mama nilovin Victor LAlthanmawia zawk a ni tiin a sawi a, a fapa a nihloh thu a sawi bawk. Chuan...a invihhlum hma chiah khan thil a sawi leh bawk a..." a han ti chu AWmpuia beng a verh zar mai.

"Enge? Enge a sawi?" a lo ti vat a. "Ihh...in thei a nih chuan va man rawh u, mahse a nung chungin a eizo vek ang che u.. a ti a, tichuan a invit ta a ni." tiin a chhang a. AWmpuia chuan a lu a bu nghat nghat mai, "Animaw? Pu Rama pawh a dawi a zo vek tihna a nih ber chu...aa..enge maw thil awmzia nei nuai hi...ka man tho tho vang." a ti khur khur a.

******************

Deborah-i te pawh chu Pu Rama te in lam pan chuan an kal ve mek a, an in leh Pu Rama te in hi a inhlat ve angreng em avangin ke a kal phei chuan kal ve deuh vang vang angai a ni. Kawng chanve vel an thleng chiah tihah chuan kawngsir atang chuan tu emawni hi a lo lang thut mai, a kut lehlamah chuan hmaikawr a keng leh nghal a.

An han enchiang chu Victor-a a lo ni reng mai, Deborah-i chu a en ngawih ngawih mai a. Pu Dawnga phenah chuan Deborah-i leh a nutei te chu an biru nghal a, "Kal bo rawh...enge i duh?" tiin Pu DAwnga chuan a han vin khur khur a. Victor-a chuan zaidam tak hian, "Ka pu, DEborah-i kha ka be duh a ni." a han ti a.

"Engatan nge i tih? Kal bo rawh..anih loh chuan police kan ko ang." Pu Dawnga chuan a lo ti leh a, "Police te chuan min um reng alawm, tunah pawh..." tih pah chuan Deborah-i chu ava melh leh a, "Deborah, khawngaihin min inbe lawk ang. Min hlau suh, engkim ka sawi fiah thei. Ka hmangaih tak tak che asin, khawngaihin.." a han ti chu Deborah-i chuan a hrethiam lo kher mai.

"Enga? Tunge i nih a? Ka hre ngailo che.." tiin Deborah-i chuan a chhang ta daih mai. Victor-a pawh a hrilhhai hle mai, "ENga? Deborah...min hmangaih thu i sawi kha, tinge tiang hian i awm? Keimah alawm, keimah...Mama kha..ka sawifiah vek ang, ka duh vang renga hetiang thil hi ti ka ni biklo asin." a han ti leh a.

Mahse Deborah-i chuan a hrethiam lo tulh tulh thung, "Eng a? Nangnen hian inlaichinna engmah kan neilo, tunge i nih ka hre ngai heklo che..." a ti leh ta daih mai, Victor-a chuan mak a ti hle mai. Chutah a lu a rawn na leh vak a, a mitthla chuan thil tam tak a hmu indawt leh ta zut zut mai.

Chutia Victor chetdan mak tak chu Deborah-i te chuan an en reng ringawt a, mak an ti ngang mai. Chutah Victor-a chuan a hrechhuak ta, Mama zawk a nih lai khan a vawikhat hmuhna atang khan Deborah-i kha a ngaizawng em em a. Khami ni, an inhmuh hmasak ber ni pawh khan an insu palh ngei bawk.

Mahse Deborah-i chuan a be hauh lo, TIHPALH pawh ti lovin a kal tlang daih a ni. Mahse Victor-a erawh chuan Deborah-i chu a duh em avangin a bul hnaiah awm ve ang tlatin a hre thin a, Pi Liani bula leng tura a insawi te pawh khan Deborah-i nen an inhmu tak tak lo tihna a ni. A ngaihtuahna kawmin Deborah-i chu  a bula awm angin a ngai a, Peka thih tuk pawh khan DEborah-i chu kal ve ngei mahse Victor-a nen khan an inbe hauh lo.

A ngaihtuahna leh a suangtuahna vek a ni tih a hriatchhuah meuh chuan Victor-a chu a harh ta kawk mai, Deborah-i chu rum zet hian a en tlawk tlawk a. Chutah tlangval thenkhat lo kalin, "Ehe..saw Mama..sawta saw.." an rawn ti ta chiam chiam mai a, chuveleh Victor-a chuan a hmaikawr chu a vuah vat a, a tlanchhe leh ta daih mai.

***********************

Pu Sanghluna pawh chu tui takin a muhil bawrh bawrh a, a hnar suk suk mai. Pu Sanghluna hi SAwibuang khaw bul deuh lawk, Sialngo khua a awm a ni. Chutia a mutthilh mek lai chuan pawn lama thawm ri a hriat avang chuan a harh hlawl mai a, mahse thawm chu a ri zui leh chuang miah lo.

ZAwhte emaw, sazu thawm vel mai mai a nih ringin mutthilh leh mai chu a han tum a. Mahse a room tukverh zawna mihring thla niawm tak, dum run mai lo ding chu a hmu ta thut mai. Khum atang chuan a zuang tho nghal a, "Tunge..tunge i nih?" a han ti nghal vak vak a. Mahse chu thla chu a che sawn eih lo,  a din ngai chuan a ding reng a.

Pu SAnghluna hian fanu kum 23 mi a nei a, a hming chu Angel-i Lalremruati a ni. A fanu Angel-i nen chauh chuan an khawsa a, a nupui erawh a zin mek thung. Tukverh lam chu Pu Sanghluna chuan ava pan a, "Tunge i nih sawi rawh.." a han ti vin leh deuh thak a, mahse chhanna ala dawng chuang lo.

Parda chu a han hlim thut a, mahse mak tak maiin tumah an lo awm hauh lo mai. "Tunge maw ni dawn le...ngawiteh, vawiina ka tlangval hmuh, an zawn mek kha a ni hial lo mawle." a han ti rilru nauh nauh a, chutih lai tak chuan a fanu Angel-i room atanga Angel-i au tuar ri chu a hre ta. Rang takin a chhuak a, Angel-i room lam chu ava pan a.

Room a han lut chu Angel-i hmel hmuh tur reng reng a lo awm lo, tukverh chu a bar chawpin a lo inthlawn vek a, a lo inhawng huau mai. "Bawihte...KA fanu, khawnge i awm?" tiin a au chel chul mai a, mahse boruak chu a reh hian a reh diak mai si. Chutia mangang taka a din khawng reng lai chuan pawn lam atanga ui beleuh tuar ri a hre leh ta a, rang takin room atang chuan a chhuak a.

Kawngka chu hawn a han tum a, mahse a thei ta hauh lo mai. A sawi vak vak a, mahse pawnlam atangin a inkalh tlat mai. Kawngka dang atanga chhuah leh a han tum a, mahse kawngka dang zawng zawngte pawh chu pawnlam atangin a lo inkalh vek mai anih chu. A fanu room tukverh atang chuan chhuah ve mai a han tum a, mahse a sang lutuk tlat. Han zuanthlak mai ngam na chi zia zang a nilo, ft 30 dawna sang a ni. A mangang lutuk chuan a silai a la chhuak a, kawngka chu a silai hmang chuan a chhu hawng thei ta hram a.

Pawnah chuan a chhuak nghal vat a, mahse tumah a hmu lo. A fanu Angel-i chu auvin a zawng kual a, chutah ui pakhat ruang, a kawchhung kaw huau leh a ril te nena lo let phung mai chu ava hmu ta. A uak thawt nghe nghe a, a rap takzet. Light a phawrh a, an in bul vel chu a han enkual leh vak vak a.

Chutah le, an inbangah chuan thisen hian thil a lo inziak rang nuai mai. A han chhiar chiang chiah chu a thinphu a rang ngei mai, "I FANU HI TUN ATANG CHUAN KEIMAN KA ENKAWL TAWH ANG, RAWN ZAWN TUM BUAI DUH SUH ANG CHE. TUN ATANG CHUAN KA TA, KA NUPUI A NI TAWH ANG. MIN HRETHIAM HRAM DAWNNIA, KA KEHCHHIA A NI...HMANGAIHNA AVANGIN KA KEHCHHIA A NI." tih hi fiahlo nuai hian a lo inziak a.

******************

A tuk zingah chuan Inspector AWmpuia chuan a junior te chu a hau nasa ngang mai,

"Nizanah khan chiang em em in kan khaw tlangval ten an hmu a, a tlanna lam pawh min hrilh vek. Rang takin in um ve nghal amaw tia, mahse kut ruak bawkin inlo haw leh a. Ti chung kha police ka ni e inla inti ve amaw? In va nep hlawm ve." a ti khur khur mai.

Chutih lai chuan a phone a rawn ri a, "Hello, Inspector Lalawmpuia a ni em?" tiin phone ami chuan a rawn zawt a. "Aw ni e." tiin a lo chhang vat a, "Hetah Sialngo khaw Police Station atangin a ni a, Sub-Inspector Sawmtea ka nia...hei, complain pakhat a lo lut a. Kan khua ami Pu Sanghluna hian a fanu bo thu a rawn report a, a sawi dan hmang chuan a fanu ru bo tu hi in mi zawn mek kha a nih duh hmel riau mai." a rawn ti a.

Awmpuia chu a phur kher mai, "Enga? Pu Sanghluna a?" a ti nghal chiam chiam mai a. "Aw ni e, in khua ah misual in zawn mek thu ka lo hria a, a in kaihhnawih tlata ka hriat vangin ka rawn hrilh ta tawp che a nih hi." tiin SI Sawmtea chuan a lo chhang a. "A tha e, in Station lamah chuan vawiin ah ka rawn kal dawn nia, Pu Sanghluna pawh chu thu zawhfiah ka duh ve ang." tiin phone chu a dah a.

*******************

Angel-i chu khumah chuan a muhil mek a, a hma zawn takah chuan Victor-a chuan a en reng a. A bul hnai set ah chuan ava kun hniam a, "Tihpalh aw thiannu, mahse ka mamawh che a ni. Ka nu leh pate thu ka awih a ngai miau si a, khawngaih takin min ngaidam dawnnia." tiin a phun mawlh mawlh a.

Mahse Angel-i erawh chuan a chhang lo, a la muhil reng tho a. Victor-a chuan chu room thim tak chu a han enkual a, parda te chu hui kiangin tukverh te chu a hawng a. Chutah ni eng a rawn lut ut mai, a kawr a phelh a, thisen a kai nuai mai. A hnungzanga hliam, Pi Liani chemtea a vihna kak atang chuan thisen a rawn luang chhuak zawih zawih mai.

*********************

Chhun dar 1 a ri a, Inspector Awmpuia leh SI Sawmtea te chu an inhmu ta. Pu Sanghluna pawh chu an ko ve leh nghal a, a hmel en ringawt pawh chuan Pu Sanghluna chu a mangang hle tih a hriat khawp mai. AWmpuia chuan zawhna te a han zawt ve a, "Ka pu, khapa ngei kha a nih ka ring tlat. Kei hi min zui ru zel a ni ngei ang, kan in banga a thil ziah te kha..." a sawi zawm thei lo, a tah a chhuak em em a.

SI Sawmtea chuan, "In mi zawn kha tunge a hming i tih kha?" tiin Awmpuia chu a zawt a. "Mama tih chauh in kan hre thin a, mahse a hming diktak chu Victor Lalthanmawia a ni awm e." tiin a chhang a. Chu veleh Constable zinga mi, Rindika chu a rawn phei vat a. Phawk hru hian a rawn meng a, "Victor Lalthanmawia a?" a rawn ti hu mai.

 

"Aw ni e, hei a thlalak pawh a kawl alawm." tiin a thlalak chu a han hmuh a, chutah Rindika chu a meng bial kawk kawk mai. "Tinge? Engemaw hriat i nei em ni?" tiin SI Sawmtea chuan a lo zawt vat a. "Aw nei e, hepa hi Aizawl ami...tualthah hmang kha a nih hi. A thi tawh angin an ngai vek a, mahse a lo la thi miahlo a nih dawn chu.." a ti ta mai a.

Awmpuia pawh a ding nghal awt mai, "Enga? Tualthah hmang a?" a ti vak a. "Ni e, Aizawla min post lai khan....kumin kumtir lam khan hepa, Victor-a hi kan Senior Inspector Ramzauva'n a chhui hrep tawh alawm. Sir Ramzauva pawh a that nghe nghe asin, Aizawla ka thawh laia kan SI William-a khan a kap a. Khamah a tla a, mahse a ruang kan hmu zo talo kha ania. A lo la dam reng vang anih hi..." a ti leh ta mai a.

***********************

Angel-i pawh chu a rawn harh a, a han meng chiang chu a bula tlangval hmeltha tak, Victor-a lo thu reng chu a hmu a. "Tunge i nih? Helai hi kawilai hmun nge?" tiin a zawt nghal a. "Hlau suh, i him tawh e." tiin Victor-a chuan zaidam tak hian a chhang a. "Khawiah nge ka awm? Khawnge ka pa?" tiin Angel-i chu a mangang hle mai.

"Nizan khan in inah misual a lo lut a, ipa in chhan che a tumna lamah hliam a tuar a. I pa chu damdawiinah kan hruai a, nang chu hetah kan riah tir ta mai che anih hi." tiin Victor-a chuan a chhang leh a. Hlauhthawn hmel tak hian Angel-i chuan, "Ka pa chu a tha ang tiraw? A tha angem?" a ti nghal chiam chiam a.

"Aw tha e, i hmu vat thei ang. Hahdam rih rawh, engmah hlauh tur a awm lo ania." tiin Victor-a chuan ahnem leh a, chu tlangval hmeltha tak leh hmel pawisawi lo tak mai chu Angel-i chuan a thlir vang vang a, hmeltha a ti kher mai. A hahdam suai thei hial a, "KA lawm e, tunge i nih a?" tiin Angel-i chuan a zawt leh a.

 

"Victor-a ka nia, Victor Lalthanmawia..nang tunge i hming?" tiin a zawt ve leh a, "Angel-i ka nia, Angel Lalremruati." tiin a chhang a. "Tikhan lo awm rawh aw, thingpui ka va siam ange....ka thiannu te in anih hi, hlau miah suh aw.." tiin a nuih suk a, a kalsan ta a. Angel-i pawh chuan ngaih that lohna a nei lemlo, Victor-a chu a ring tawk nghal em em tawp.

Victor-a chu room pakhatah a lut leh a, hmeichhe pakhat hi thutthlengah phuar beh in alo awm a, a hmui chu tuam a ni bawk. Victor-a a hmuh chuan a hlauh hmel hle mai, a mittui a tla zawih zawih mai a. Victor-a chu azu kun hniam a, "Au hlek suh ang che..." tiin a vau khur khur a, a hmui tuamna chu a phelh sak a.

Chu nula chuan rum taka Victor-a melh pah chuan, "I nihna diktak chu hria ila hmanah khan police te ka man tir daih tawh ang che, mi tha tak angin ka lo ngai che asin. Tinge tun thleng thlenga min la rawn tihbuai a, i pawi sawi ka nei em ni?" a ti khur dar dar a. Victor-a chu a nuisuk a, "Ni e, a pawi khawp mai. Mahse ka mamawh awmchhun i ni tlat, khi nula, i guest room-a khuma mu mek khi ka nupui tur a ni, ani nen khian hun engemaw chen chu hetah hian kan awm angai ang." tiin a chhang a.

"Ahma pawh khan i unaupa angin Jeffrey-a kha i sawi a, ka enkawl dam sak hial che a. Mahse tualthah hmang ilo ni reng a, tinge khatih lai khan keipawh hi min thah ve law law mai loh?" tiin nula chuan a zawt leh a. "Ka mihring hmuh apiangte hi ka that ngawt bik hleinem, ka nu leh paten that tura min tih te chauh ka that thin." tiin Victor-a chuan a chhang leh a.

Nula chuan vin lek lek hian, "Eng ang nu leh pa nge maw i neih le..hrep tak hian." a ti khur khur a. Rang takin Victor-a chuan a hmui chu a hup sak a, "Bengchheng suh, Angel-i khian a hrepha hlauh ange...ka sawi ang apiangin awm la, police call tum eih lo bawk la. Na i tuar lo anga, i nunna i chan bawk hek lovang." tiin a vau leh ta khur khur mai.

 

Nula chuan a hlau hle a, "Hna nei ka ni tih i hria, nurse ka ni a...hna a ka kal angai alawm. Chuan tlaiah ka pasal a lo haw dawn bawk, engtin nge awm se min tih a?" tiin a zawt khur leh dar dar a. Victor-a chu a tho thut a, chu nula hmui chu a tuam leh a. Nui suk pah chuan, "Chu chu ka buaina a nilo, i buaina zawk a ni." tiin a chhuahsan ta a.

He nula hi a hming chu Nancy a ni a, Victor-a'n Jeffrey-a a kawl laia Jeffrey-a enkawltu nurse kha a ni. Victor-a chanchin hi engmah a hrelova, Victor-a hian a mi thahte pawisa ruk hmang hian in ruak pakhat, fal deuh hlek a awm chu a luah a. Chutah chuan Jeffrey-a kha awmpuiin, hlawh neiin Nancy hi a personal nurse atan a chhawr thin a lo ni.

******************

AWmpuia pawh SI Sawmtea puihna hmangin Victor-a chu an chhui zui zel a, an khua ve ve ah pawh hmun hran hran ah duty an dah ta nuk mai. "Chutiang khawpa Mizorama news rapthlak lutuk te chu engtin nge maw ka hriat loh theih zawk le? Mizoram hi a zim hle amaw ka tia, a lo zau ve ta deuh pawh aniang nge.." tiin Awmpuia chu a han khi suk a.

"Lungngai suh, Sir. Kan man em em ang, Aizawl Police Department lam pawh chanchin kan hriattir tawh e. An ni pawhin an criminal hlui a lo nih vang nge, hma min lak pui turin an inhuam thu min hrilh nghal alawm." tiin Sawmtea chuan a lo chhang a. Hmun hrang hrang ah an zawng kual a, ramngaw lamah pawh an la zawng ngawrh hle.

*******************

Tlai a lo ni a, Nancy pasal Tetea hna bang pawh a lo haw ta. Hemi ni hi Nancy day-off ni a lo ni hlauh lehnghal a, Victor-a hian ava luhchilh ta a ni. A fapa te pahnih, kum 9 mi leh kum 12 lek mi te school bang pawh chu an lo haw ve ta a. NAncy chu a zam hle mai, a pasal fanaute min hmuh a rinhlelhawma awmloh chu a tum hram hram a.

NAncy te awmna veng hi Victor-a hian a hre chiang hle bawk a, a chhan chu a hmaa Jeffrey-a a enkawl sak lai atang tawha inkawm ngeih tak an nih vang a ni. Angel-i erawh Victor-a chuan nachhawkna tiin muthilhna damdawi a pe a, a muhil mek a. Nancy te guest room ah chuan an pahnih chuan an awm reng a, Nancy pasal Tetea leh a fate chuan an hre ve hauh silo.

Zanriah an ei a, Nancy hmel ah chuan Tetea chuan diklo a awm tlat hian a hria a. Engmah chu sawi lemlo chuan chaw chu an chhungkua chuan an ei mial mial a, "Tinge, i mood a fu vak nange?" tiin Nancy chu a zawt ta nge nge a. Nancy chu a phu deuh zuk mai, "Aaa..eng nilove, in ka khawih ka chau deuh mawle." tiin a chhang a.

"Vawiinah ka thianpa Delhi atangin a lo haw a, kan inhmuh lohna a rei tawh sia. Zanin chu riak turin ka sawm dawn mawni le ka tia, kan inkawmlohna a rei tawh bawk nen. Guest room ah khian mu mai se, a pawi em lovang chu maw?" Tetea chuan a han ti leh a. Chutah rang zet hian, "A chiloh.." tiin Nancy chu a vin hlur mai.

Hriatthiamloh hmel tak hian Tetea chuan, "Ngati maw?" a ti deuh hu mai. "Ihh...a tullo. Thiante nena riak dun rual pawh i ni tawhlo, chubakah guest room khi a bal lutuk. Zanin hian han khawih fel ka tum hrim hrim lehnghal a, lo riak lo mai rawh se." tiin chhuanlam chu a han siam leh vat a.

 

"AWle...a tha alawm. I vin thei lutuk, tha deuha sawi ve mai tur alawm." tiin Tetea chu a ner deuh nung mai. "Ka kham e." tih pah chuan a tho a, a phei pah chuan chaw bel (cooker) chu a han en a. A ding chat mai, "Ehee..ivan chhum hnem ve?" tih pah chuan a nupui chu a melh deuh hu a.

"Nia..ihh...naktuk zinga chhum ngai lovin ka ti anih kha.." tiin a chhang ta ringawt a. "Zing chaw atana chaw thing han ei chuh..." tih nuah nuah pah chuan Tetea chuan a thleng chu silhmun lamah chuan ava dah a. "Dawrah ka kal lawk dawnnia.." tiin a chhuak nghal a, Nancy chu a thaw huai mai.

A fate pahnih chu roomah a tir lut nghal a, tichuan thleng pahnih la in Victor-a leh Angel-i te eitur chu a buatsaih sak nghal zung zung a. A siam zawh hnu chuan guest room lamah chuan a chawi chho va, Victor-a chu Angel-i bulah chuan a lo thu a. Angel-i pawh chu a rawn harh ve leh chiah a, "I harh tawh maw kha.." tiin Nancy chu anui lui hram hram a.

"Khawnge ka pa chu a awm a? Tinge hetah hian ka la awm?" tiin Angel-i chuan a zawt a. Victor-a chuan nui sang hian, "Angel, hei hi Nancy ania...ka thiannu anih hi. Amah hi nurse a ni bawk a, nizan atang khan amah char char hian a buaipui che alawm." a han ti dam diai a. "Angel, i pa chu ngaihtuahawm lutuk chu a nilova. Mahse a lu ah hliam a tuar a, an zai nghal a. Mahse a tha tawh e, a harh ve tep tawh ang." Nancy chuan a lo ti ve bawk a.

"Hei, chaw hi ei ila..keipawh ka la ei bik lo." tih pah chuan thleng chu a pe a, hrilhhai deuh tak chung chuan Angel-i chuan a ei ve mai a. Inthlahrun hmel tak hian Nancy chuan, "Angel, ka inthlahrung viau nanga....ka nu a damlova, inhnuaiah khuan a mu a. Tawng rin emaw, thawm neih hlek chuan a buai vek zel a..." a tih lai chuan Angel-i chuan, "A ho lutuk, ka hrethiam alawm." a lo ti vat a.

*****************

Zan dar 9 a ri a, Angel-i leh Victor-a te chu zawi te te hian an titi sep sep a. An inkawm nasa hle mai, Angel-i phei chuan Victor-a tawng lai chu hmun dang a hawi san phal lo a ni ber mai. Thildang engmah a ngaihtuah thei lo, Victor-a chu kawm nuam a ti em em a. "Tikhan lo awm lawk rawh aw, ka'n chhuak lawk ange." tiin Victor-a chuan a chhuahsan a.

Nancy fate chuan TV an lo en a, an hmuh loh tur chuan Victor-a chu bang phenah a biru a. Room atang chuan Nancy chu a rawn chhuak a, Victor-a a hmu thut chu a phu chiang kher mai. Choka lam atanga chhuahna kawngka chu Nancy chuan a kawk zeuh a, Victor-a chu a chhuak nghal vat a.

Nancy pawh chuan a zui chhuak nghal a, "Enge i duh?" a ti hmuk a. "PAwisa...pawisa ka mamawh. He in atang hian kan chhuak vat ang, mahse pawisa ka mamawh a ni." tiin Victor-a chuan a chhang a. "Tunah pawisa eng tham mah ka kawl lo.." tiin Nancy chuan a chhang a. Victor-a chuan rum taka melh pah hian, "Chu chu ka buaina a nilo, i buaina a ni. Pawisa ka mamawh, chu chu ani mai." a ti khur khur a.

 

Nancy rilru chu a hah hle mai, "Ka account ah sing 6 vel chu a awm ang." tiin a chhang ta nge nge a. "A vaiin ka duh, tunah ATM ah emaw va la chhuak nghal rawh. Hetah hian ka lo nghak ang che, mahse police han pun vaih teh. I fate pahnih hi police te lo thlen rual rualin an thi nghal a, i phone pawh keng suh ang che. I pasal leng pawh a lo la haw lova, i fate nunna hi ka kutah a awm tih hria ang che." a han ti leh khur khur mai a.

Nancy chuan tap chung hian, "Ka fate hi engtin mah ti suh, police ka ko lovang. Ka kal ang, engtin mah ti suh.." tiin a purse chu a la a, a chhuak ta nghal a. Victor-a a hlauh em avang leh a fate an thi mai ang tih a hlauh em avang chuan Nancy chuan tuma tanpuina mah a dil ngam lo, Victor-a thu ang chuan ATM lam chu a pan phei a.

**************

Dar 9:30 a rik meuh chuan Tetea leng pawh a rawn haw ta, an in lam a rawn pan phei lai chu Victor-a chuan alo hmu a. Rang takin a biru nghal a, Tetea erawh inchhungah chuan a lut a. "Nancy...Nancy.." tiin a ko vak vak a, roomah chuan a lut a. A fate chuan lekha an lo chhiar melh melh a, "Khawnge i nu a awm?" tiin a fapa upa zawk chu a zawt a.

"A chhuak a, ka rei lovang a tia." tiin a lo chhang a. Tetea chuan zawi te hian, "Engemaw a hriat le, vawiin tlai atang khan a awmdan a dik tawhlo tlat." a ti nuah nuah a. Guest room chungchang a sawi laia a vin vak te kha a han ngaihtuah let a, "Thil diklo chu a awm a ni." tiin Guest room lam pan chuan a chho ta mai a.

KAWngka chu a hawng a, Angel-i khuma lo thu mek chu ava hmu a. Mak a tiin a phu nasa hle mai, "Tunge i nih?" a ti vin nghal tuar a. Mak ti tak hian Angel-i chuan, "Tunge i nih zawk a?" tiin a lo zawt let a. Thinrim tak hian Tetea chuan, "He in neitu hi ka nih hi....enge hetah i tih?" tiin a vin leh hrep a.

Angel-i chu a hlauthawng ngei mai, "Khawnge U Victor-a a awm...U VICTOR..." tiin a au nghal chiam chiam a. "Hey ngawi hmak rawh, he inah hian tumah Victor-a tih hmingpu kan awm lo. Tunge i nih sawi rawh, anih loh chuan police ka ko dawn ania.." tiin Tetea chuan a han vau leh a, chutah a awm(chest) zawnah chuan chemte hmawr zum tak mai hi a rawn lawr thut mai a.

Thisen a luang nghal zawih zawih a, Angel-i pawh a phu nasa kher mai. Tetea chu a thingthi hnawk a, a hnungah chuan chemte hum chung hian Victor-a chu a lo ding reng mai. Mahse Angel-i erawh chuan tunge a nih a hrelo, a chhan chu Victor-a chuan hmaikawr a vuah avang leh a thawmhnaw a danglam tawh vang a ni.

Angeli hlau chu a au vak a, tlanchhiat a tum a. Mahse Victor-a chuan a man bet hman a, a hnek thal tawp mai. Nikhawhrelovin a awm der mai a, Victor-a chuan a pu nawlh a. Inhnuai lamah a chhuk pui a, chutah Nancy fate pahnih chu an lo ding reng mai a. Victor-a chu an lo melh kar mai a, Victor-a lah chuan Angel-i apu vu mai bawk nen, chemte thisen kai nuai mai chu ala hum reng mai bawk si.

********************

DAr 10 dawnah chuan Nancy pawh chu a rawn haw ve ta a, pawnah chuan Victor-a chu a lo ding run mai a. A bulah chuan Angel-i chu nikhawhrelovin a lo let reng bawk a, Nancy chuan a hlau ngei mai. "Iva rei ve a..." tiin Victor-a chuan a lo vin nghal khur khur a, "ATM a lo chhe zel a, a aia hla ka pan zel alawm." Nancy chuan a ti khur dar dar a.

"Khawi pawisa chu.." tiin a han vin leh hlur a, Nancy chuan a pe vat a. "Ka fate chu engtin mah i tilo tiraw?" tiin Nancy chuan a zawt a. Victor-a chu a khi var var a, "An muhil tawh, inpa pawh a lo haw tawh a, ani pawh a mu hil tawh e." tiin a han thaw huai a. Nancy chu a melh vang vang a, "Ka tihpalh Nancy, nangpawh muhil ve tawh mai rawh." tih pah chuan chemte a phawrh thut a, a vit ta siah siah mai.

Nancy chu a t(r)e hman eih lo, a thi chiang hle mai. Angel-i chu a pawm tho lawp a, Tetea car chabi chu phawrhin car chhungah chuan Angel-i chu a han mut fel te te a. A number palte, a hma leh a hnung ami chu a han pawt thlawn hlawk bawk a. Tichuan motor chhungah chuan a lut ve a, chak takin a tlan ta a.

*****************

AFTER THREE MONTHS

Victor-a chu a bo hlen tak vang vang avang chuan case chu tih tawp a ni ta a, Inspector Awmpuia pawh a sa kher mai. Mahse a ruk tak chuan a zawng ru reng thova, man ngei a la tum ruh fan a ni. Nikhat chu a day-off ni a ni a, a thianpa Vena nen chuan an khua atanga hla lutuk lo, khaw dangah chuan an leng thawveng dun a.

Park pakhat, zau nuam ve takah chuan an thu chawl a. Zu te phawrhin an indun a, park ah chuan mi tlemte an lo awm ve bawk a. An titi dun melh melh lai chuan Vena zawk chuan, "Awmpui, enteh...sawpa saw hmana in misual zawn Victor-a kha ava ang ve." tiin a hma zawna tlangval pakhat, meizial lo zu mek chu a kawk a.

 

Awmpuia chuan a han en chiang a, "Ehee...saw saw Victor-a a nih saw.." tiin a ding nghal a. A va tlan nghal a, Vena pawh chuan a umzui ve nghal bawk a. Victor-a pawh chuan a meizial zuk chu a paih a, a kal tur chiah chu Awmpuia leh Vena chu a hmu ve ta. Victor-a chuan Awmpuia chu a hre ngai hauh lo, mahse Awmpuia chuan chiang takin a hre si.

Chutia amah man tum niawm fahrana an rawn pan chu Victor-a chuan a ringhlel a, misual zawn mek a ni tih a inhre bawk nen. A tlan ta thut mai a, rang lutukin Awmpuia te thiandun pawh chuan an um ve nghal a. MAhse an umpha lo kher mai, kawngsir kham awih vakloah chuan Victor-a chu a zuang thla daih mai a.

Vena chu a zuang thla ve ngam talo, mahse Awmpuia erawh chuan man a tum em vang pawh a ni mahna, a zuangthla ve nghal a. Ramhnuai lamah chuan an inum ta chiam mai, reife an in um hnu chuan Victor-a thawm chu a reh leh ta hmak mai a. Awmpuia chuan a zawng zel a, engtik lai pawha a pai reng thin, a pistol chu a phawrh nghal a.

Victor-a chu a zawng kual a, mahse Victor-a hmel reng hmuh tur a awm lo. Chutia a zawn kual lai chuan a hnung lam atang chuan tu emawni hial a rawn tlawh thal tawp mai a, a pistol chu a thlauh bo daih mai. Awmpuia chu a tho leh nghal vat a, Victor-a nen chuan an inhmachhawn ta ran mai.

"Tunge i nih? Engvanga min um nge i nih?" tiin Victor-a chuan a zawt a. Awmpuia chu a nui suk a, "Nangpawh engvangin nge i tlanchhiat ngawt a?" tiin a lo zawt let ve sak a. Thinrim tak hian, "Min fiam kual i tum em ni?" a ti vin vak a. "Tunge ka nih i hre duh amaw? Kei hi Police Inspector ka ni, nangmah..Victor Lalthanmawia, tualthah hmang chhuitu ber kha ka ni. Thla thum chhung ka zawng tawh che, i hria em?" a ti let vesak sak mai a.

Victor-a chu a han nui huah huah a, "Animaw? A tha alawm, thla thum chhung i zawn tawh chu tunah i hmaah hian a ding mek e. Enge i tih theih han en ila, engtin nge min tih dawn le?" tiin a cho nasa mai. "Ka man dawn che...ka man khawp ang che." tih leh Awmpuia chuan tlan phei a rual a, Victor-a chu a va bawh thlu tawp mai.

Mahse rang takin Victor-a chuan a lo leh thal vat a, an insual ta buan buan mai. Awmpuia chuan hneh lo tak a ni ringawt, a duh tawk chuan Victor-a chuan a sawisa hrep mai a. A tawpah chuan Awmpuia chu a tho hleithei tawh lo, a hnar te chu a thi phung tawh mai a. Victor-a chuan thingtum lian tak mai chu a chhar a, "Duhtawk ang aw...mangtha le." tih pah chuan Awmpuia chu vuak a tum ta mai.

Awmpuia chuan a sira a pistol thlauh, lo let reng mai chu a hmu fuh ta hlauh a. A chhar vat a, Victor-a hnute ah chuan a kap ta siah mai a. A thal tawp mai a, thisen a luang nghal zawih zawih mai. Thei leh theilo hian Awmpuia chu a in beng tho a, Victor-a lam chu ava pan phei leh a.

"Ka man ang che ka tih kha....Police ka nih hi..mawla.." tiin a nui a, mahse Victor-a chu a rawn meng leh thut mai. AWmpuia keah chuan a man bet a, a theh thal leh lawp mai. A tho a, pistol chu ala a. "Tuman Mawla min la ti ngailo...ka hming chu Victor-a a ni...Victor Lalthanmawi a. Thenkhat chuan Hmaikawr-a tih ten min hre bawk.." tiin a nui vak vak a.

"Silaimu pakhat lek vang khan ka thih i ring em ni? Haha...nang ve aw...silaimu pakhat lek hi i tuar zo ve angem en ve chhin ang aw.." tih pah chuan AWmpuia chu a tin ta vung mai, mahse asilai a puak leh dur mai a, a thingthu hnawk mai. A ke atang chuan thisen a lo chhuak zawih zawih a, AWmpuia pawhin mak a ti hle mai.

Victor-a chuan pistol chu a thlauh a, thei leh theilo hian hnunglam chu ava en a. Police 3 leh tlangval 5 vel hi an lo awm a, VEna pawh a lo tel a. Vena chuan police a lo phone chu niin, Awmpuia chu an kai tho nghal vat a. Victor-a chu an man bet a, handcuff an bun tir a. Awmpuia chuan a nuih var var a, "Ka man ta che...a tawp atawpah chuan." a han ti a, Victor-a chuan a melh rum kher mai.

************************

Sawibuang khua police Station ah chuan Victor-a chu hruai a ni a, jail pangngai ah dah hrih lovin Thana ah chuan an khung rih a. ZAn dar 10 a ri a, Awmpuia chu Victor-a cell bulah chuan ava kal a. Victor-a erawh bang lam hawiin amaimitchhing a, a phun sep sep mai a. Hmuhsit hmel tak hian Awmpuia chuan, "Haha, i tawngtai em ni? Nang ang tualthah ching kha Pathianin i tawngtaina a chhan ve i ring em ni? Naktuk ah court ah kalpui i ni anga, i damchhungin jail ah i tang tawh ang." a ti pang pang mai.

Chutah Victor-a chu a rawn meng a, Awmpuia chu rum deuh hian a va melh a. Hnai takah va din chilhin, "Ka chhuak dawn...zanin hian ka chhuak dawn." ati fak fak mai. Awmpuia chu anui suk a, "Kan hria ang chu.." tih pah chuan a kalsan ta a. Havildar 5..tlaivara duty turte bulah chuan Awmpuia chuan, "A awm tha duhlo anih chuan lo vaw hre ang che u, tha tak khan veng ru aw.." tiin a haw san ta a.

***********************

ZAnlai dar 12 a pel hret tawh a, Station kawtah chuan hmeichhe pakhat, mask dum a hmui tuam hi a rawn kal a. Kawngka bula lo duty Havildar chuan lo ti dingin, "Tunge i nih? Enge i rawn tih dawn?" tiin a zawt a. Chunu chuan chhang lo chuan a bag atang chuan chemte a phawrh chhuak a, havildar chu a vit nghal siah siah mai a, a thi chiang kher mai.

A chhungah chuan a lut a, duty dang pali te chu an lo muhil a. Chu nu chuan amal te te chuan a vit hlum leh ta vek mai a, hemi zan lah hian Victor-a chian hi Thana a dah, an man awmchhun a lo ni lehnghal a. Chahbi chu chu nu chuan a la a, Victor-a awmna lam chu ava pan a. Victor-a chuan a lo nuih sak a, "I va tlai ve a.." a han ti a.

Chu nula chuan a mask chu a han phelh a, "Ka tihpalh." a ti zawi sap a. Chu nula chu tudang nilovin Angel Lalremruati ngei kha a lo ni a, a purse atang bawk chuan hmaikawr hi a rawn phawrh chhuak a. "Kha le..." tiin Victor-a chu a pe a. Cell kawhngka chu a hawng a, Victor-a pawh a lo chhuak a. An pahnih chuan an han in fawp vawng vawng a, tichuan Police Station chu an chhuahsan ta a ni.

**********************

A TAWP TA