SAHAṬAH HUAI

SAHAṬAH HUAI

MIZO FICTION HORROR STORY

Written by : Aaron Malsawmdawngzuala

***********

Kum 2011 a ni a, khaw lum lai tak a ni. Maenga, Lalengmawia leh a nupui Ropuii te chu an inneih honeymoon hmang turin khaw pakhata resort thar lar tak mai awmna hmun panin an nupa chuan an inkhalh chhuak mek a. An honeymoon hmanna tur resort hming hi Chhandam Resort tih a ni a, achhan pawh a resort neitu ber hi a hming chu Chhandama a nih vang teh pawh a ni mahna. Manega te nupa pawh chuan an motor chuan hlim takin chumi hmun chu an pan mek a, resort awmna hmun hi a fal deuh avangin a kalkawng pawh a reh hle a, a hmun pawh a fianrial hle bawk.

Chutia hlim taka an titi dun lai chuan an hma zawn takah chuan sihal niawm tak, lian em em mai hian kawng a rawn kan thut mai a, Maenga phu nasa lutuk chuan a motor chu a tiding nghal chat a. Ropuii pawh chuan a lo hmu ve hman ni ngei tur a ni, "Awii, engthil nge a?" hlauhthawn hmel tak chuan a ti a. Maenga chuan, "Ka hre biklo, ui a ni maithei a ni." a ti a. "Mahse ui chu a anglo ka ti, a len em kha.." Ropuii chuan a lo ti a." Maenga chuan, "A ho lutuk, sihal vel te pawh a ni mahna, kal leh phawt teh ang." tiin an kalna hmun tur lam chu an pan ve leh ta mai a.

************

Resort chu an thleng ta a, a hmun chu fianrial tak a ni. Thingkung a tam em em a, chutia han nuam em em pawh a ni hran lo. Ramhnuai tak mai hi a ni lehnghal a, Maenga nupui Ropuii phei chuan a hmun hma vel chu a han enkual a, a nel lemloh hmel kher mai. In lian ve tak pakhat hi alo awm a, chu chu an riahna hmun tur ber, a neitupa Chhandama in a ni nghal bawk. Chhandama chuan Maenga te nupa a hmuh rual rual chuan a va pan a, "Ehe...inlo thleng tluang amaw? Nangmahni hi em ni Pu Lalengmawia te chu?" tiin a zawt a. Maenga chuan, "Aw ni e, hei hi ka nupui Lalropuii a nih hi." tiin a lo chhang a.

An bungrua vel chu Chhandama chuan a lakluh pui a, chutih lai chuan nu pakhat, kum 40-45 bawr vel, hmelchhe lemlo tak, samkir dum hlarh mai chu a lo kal a. Maenga te nupa chu rawn chibaiin, "In lo thleng tluang maw?" a rawn ti a. Maenga chuan, "Aw..kan tluang khawp mai. Rin aiin a lo hla vaklo a, Pu Chhandama nupui i ni ang maw?" a han ti ringawt a. Chhandama chuan, "Nilove, ka assistant a nih hi, Dawngkimi  anih hi." a ti a. Maenga chuan inthiamloh hmel tak hian, "E..anih chu mawle, min hrethiam hram dawnnia." a ti a.

An room turah chuan an in pu chho a, room chhung vel chu Dawngkimi chuan a han tifai thuak thuak a. Chhandama chuan, "Tikhan nuam ti deuh khan awm ula, zan dar 7 velah chaw ei turin Chokaah in rawn chhuk thla dawnnia." a ti a, Dawngkimi nen chuan an chhuahsan ta a. Ropuui chuan, "Duhtak, a hmun hma vel hi a nuam  chiah lo e, a reh reih ruih si, mi rap tlat in ka hria." a ti a. Maenga chuan nui chungin, "Hlau mahta che, hetiang hmun ngei hi alawm ka lo zawn thin chu. Tuman min tibuai theilo anga, honeymoon nuam tak a ni ngei ang." a lo ti a. Maenga chuan a kawr a phelh a, a awma ser, a piantir atanga a neih (birth-mark), chemte hmanga zaina hliam ni awm taka kil thum (triangle) neia alo kual ruih mai chu a lang chiang kher mai.

**********

Zan a lo ni a, dar 7 a rik chuan Maenga te nupa pawh chuan choka lam chu an pan ta a. Dawhkan chu kil hovin Chhandama, Dawngkimi leh Manega te nupa chuan chaw chu an ei ta a. An titi a, an hlim tlang dar dar hle. Maenga chuan Chhandama bulah chuan, "Pu Chhandam, inzawh chi a ni em chu ka hrelova, mahse i resort hi a dangdai khawp mai. Kan lo beisei dan chuan staff te an awm anga, Dining Hall te awm hranin Lodge angreng deuh turah kan lo ngai a. Mahse a nuamlo e kan tihna a nilo ania, chubakah nangmah leh Pi Dawngkimi chiah hi in awm bawk sia, in pahnih hian in enkawl tihna em ni?" a ti a.

Chhandama chu a han nui suk a, "Nia, resort han siam ve ka duh a, ka siam ve ta a nih hi. Ka la puitlin lo nasa a, nangni hi nupa ang phei chuan ka mikhual hmasa ber te in ni hial ang chu. Tichuan hei ka thiannu Dawngkimi nen hian tihian kan han enkawl ve mai mai hrih a, nakinah sum te kan han khawl zel anga, hnathawk tu turte pawh kan la la ang chu." a ti a. Ropuii chuan, "Anih leh Pu Chhandam, Pi Dawngkimi nen hian enge in inlaichinna ni reng reng a? Nupa kan nilo i ti bawk sia, unau em ni in nih?" tiin a zawt a.

Chhandama'n a chhan hma chuan kawngka bul atang chuan tu emawni hian, "Ehe..ka tellovin chaw inlo ei hman elaw?"  arawn ti a. An va hawi phei a, pa pakhat,  kum 35 bawr vel niawm tak, hmelchhe lemlo tak mai hi a lo ni a. Maenga te nupa bulah chuan Chhandama chuan, "E....Pu Maeng, hei hi Rintea a nih hi..hemi resort ka siam tirh atanga ka mikhual hmasa ber a nih hi." a ti a. Rintea chu a rawn thu a, zu a rawn phawrh a. A han hawi kual vel a, "In ve duh in awm em?" a han ti ham ham a. Maenga lah chuan, "Ee..chutia i phal te chuan lo lem ve sak ila.." a lo ti ve nghal mai a.

Zu chu mipa pathumte chuan an in ho a, an titi nasa ngei mai. Maenga chuan, "Rinte, han inzawt ta tawp ila, enge i tih thin a?" a ti a. Rintea chuan, "Photographer ka nia, thlalak hi nuam ka tia. Hemi resort pawh hi ka hriat veleh a hmunhma nen ka mit a la em em a, chuvang chuan thla la tur leh chawlh hmang turin ka kal ve a ni ber mai. Chubakah hmeichhe hmeltha lutuk hmuh reng tur a lo awm bawk nen, helai hmuna ka kal hi ka inchhir lemlo khawp mai." tih pah chuan Dawngkimi chu a han en deuh kher a.

Dawngkimi chu a tum hmuk a, Rintea chu a eiloh hmel kher mai. Inthlahrun hmel tak hian Dawngkimi chuan, "Min hrethiam ula, ka chau deuh a, ka lo han mu phawt ange." a ti a, a room lamah chuan  a chho ra daih mai a. Chhandama chu a ngawi reng a, zalo deuh hian a nui suk suk reng ringawt a. Tichuan zu chu in chhunzawmin an titi leh ta a. Maenga pawh a titi tui ngei mai, a nupui Ropuii nena an intawn dan te chu a han sawi vel a, sawi nuam a ti ngang mai. Chutia an titi lai chuan Maenga chuan ngaihthat lohna riau a nei tlat mai a, a hnunga choka tukverh atang chuan tu emawni hian a rawn bihthla tlat hian a hria a. Hnunglam chu ava hawi a, mahse tumah a hmu der silo.

************

Tui taka Maenga te nupa an mutthilh bawrh bawrh lai chuan enge mawni hian Maenga chu a tiharh zawk mai a, a meng kawk mai. A bula mu mek a nupui chu a han en a, a lo hnar bawrh bawrh a. Pawn lamah chuan phun ri sep sep ri hi a hre tlat hian a hria a, a ngaih a tha lo kher mai. Han mut leh mai a tum pawh chuan pawn lama thli thaw vuk vuk rite chuan amah chu an ko ang hian a hre tlat mai a, a muhil thei tawh thak lo. A tawpah chuan a tho ta nge nge a, room tukverh lam chu ava pan a. Parda inzar chu a han keu a, a hawi thla chiah chu mak a ti kher mai. Chinghne lian em em mai, dum run mai leh mitmeng eng vek hian Maenga chu a rawn melh chho run mai. Maenga chuan hlau lemlo mahse chuti taka chinghne lian chu ala hmuh ngailoh mai bakah an awm theih pawh a ringlo hial zawk a, a ngaih chu a thalo hle.

Chinghnia chuan a en reng a, Maenga pawh chuan a en ve reng a. Chuveleh chinghnia chu a kal sawn a, in zawn chiah a 'thelret kung' lian tak mai phenah chuan a pil bo ta daih mai. Mak ti em em chuan Maenga chuan a khum lam chu a pan veleh mai a, "Khatiang em ema chinghne lian te chu, ava thlamuan thlak loh ve." a ti bul bul a. Thli thaw vuk vuk rite leh phun ri niawm tak a hriatte pawh chu a hre chhunzawm tawh lemlo aniang e, a muhil ve leh ta mai a.

********

Zing a lo ni a, dar 6 velah chuan Maenga pawh chu a tho a. Pawnah chuan a chhuak a, Chhandama chuan thing a lo ek mek a. Maenga chuan ava pan a, "Khai aw..iva bei hma rem rem ve." ava ti a. Chhandama chuan, "Nia, aloh theihloh a nih hi.." a lo ti a. Maenga chu a han hawi kual vel a, "Pu Chhandam, thingthupui kung em ni heng ho hi, ava tam hlawm ve." a ti a. Chhandama chu a nui suk a, "Nilove, Sahatah kung a nih hlawm hi...a then hi chu chawhmeh ah pawh kan hmeh mai zel." a lo ti a. Maenga chuan, "Anih chu mawle...a thing pawh a that hmel hlawm khawp hi." a ti a. Chhandama chuan, "Nia, insaknan pawh hian kan hmang nasa alawm, ti daih ila nizan i muttui maw?" a ti a.

Maenga chuan, "Umm..enteh thianpa, helai velah hian chinghnia an awm ngai em?" a han ti a. Chhandama chu a nui suk a, "Chinghnia a? Eng chinghnia mah an awmlo." a lo ti a. Maenga chuan, "Nizanah ka hmu a, hemi thingkung lian deuh bulah hian.." tih pah chuan a hma zawna Thelret kung lian zet chu a kawk a. Chhandama chuan ngaihsam zet hian, "A thim em a, i hmusual vel mai mai aniang." a lo ti leh mai a. Mahse Maenga chuan thutak zet hian, "Nilo..nimin kan rawn kal lam pawh khan kalkawngah ka hmu alawm, chinghnia a ni chiang alawm." a ti ve tlat mai a.

A thing eh lai chu a dah a, Maenga bulah chuan ava kal a. "Enteh thiana, i hmusual mai mai a nih chu. Eng ramsa hlauhawm mah an awm hleinem, mahse maw..helai hmunah hi chuan thil engemawni tak chu a awm e an tia. An sawidan chuan helai hmun hi hmanah ramhuaiin a chenchilh e an tia, helai tlang ah hian khaw pakhat a awm thin a. Khaw mipuite chu chu ramhuai chuan a bei chiam thin a, mahse a tawpah pasaltha ten chu ramhuai chu an hneh ta a. Chu ramhuai thiltihtheihna thuruk chi an khaw Lal chuan bawmah a dah a, hemi Thelret Kung hnuaiah hian a phum e an ti bawk a. Mahse thawnthu mai mai angah ka ngai, kum 100 chuang fe aliam tawh an ti bawk."  a ti a.

Maenga chuan ngaihnawm a ti angreng hle mai, "Tichuan engtin zel?" a lo ti vat a. Chhandama chuan, "Helai hmuna thingkungte hi a tam zawk chu Sahatah Kung te an ni a, chi hnih a awm a, pakhat zawk chu thingthupui ang deuh, chawhmeh atan pawha hman theih a ni a, pakhat erawh chu thing pangngai niin hmanrua atan te pawh an hmang thin. Heng Sahatah kungte hi hman atang tawh khan tihian thingkung dang karah an awm zeuh zeuh a, a hmun hi tlang lam deuh alo ni bawk nen, tunah hian hmingdang a neih ka hre lemlo a, hmanah chuan helai hmun hi SAHATAH TLANG an ti thin a ni awm e." a ti a.

Maenga chuan hriat chunzawm chak tak chuan, "A nih leh Bung Kung hnuaia an khawn Lal in a phum chu engchiah maw  anih a?" tiin a zawt leh a. Chhandama chuan, "Rohlu tak mai a ni a, chuvang chuan he Thelret Kung pawh hi an ngai hlu takzet a ni an ti." tih pah chuan sikret a tan a, a zu khu hluah hluah mai a. Maenga chuan ngaihthatloh hmel tak hian, "Anih leh, helai hmunah hian thil mak danglam deuh i hmu tawh em? Thawm mak deuh emaw, hlauhawm deuh lam thil hrim hrim i hmu ngai em?" a ti leh a. Chhandama chuan Maenga dara ben thak pah chuan, "I ho emai, thianpa. Chutiang thil engmah a awmlo, minlo pui lawk teh...thing ka eh sa ho saw dahfel lawk teh ang." a ti a.

********

Dawngkimi chu ama roomah chuan a melh ngai melh reng pah chuan la  a phiar mial mial a. Chutih lai tak chuan Rintea a rawn lut thut mai a, ring zet hian, "GOOD MORNING KA NAUTE.." a rawn ti lut ham ham a. Dawngkimi chu a phu nasa kher mai, vin zet hian, "I mawl em ni? Kik hmasa ve tal ta che!" tiin a lo vin hrep a. Rintea chuan it hmel em em hian Dawngkimi chu a han en a, a bulah chuan ava thu a, "Zing kara i tho hlim hmel pawh a tha hlemai." a va ti vel a. Ngei hmel zet hian Dawngkimi chuan, "Enge i duh a?" a lo ti hmuk a. Rintea chuan Dawngkimi beng bulah chuan, "Chhuak dun ang hmiang?" ava ti su su a.

Dawngkimi chuan a chhang lo, Rintea bawk chuan, "Helai hmun hi a nuam si a, han lengkual dun vel ila, zu ka nei ania, anuam dawn asin." tiin a sawm leh a. Dawngkimi chu zalo tih hriat tak chuan  a khi suk a, "Ka lawm e, mahse ka chak lemlo a ni e." a lo ti leh hmuk mai a. Rintea chu a han nui vel huah huah a, "Engtia rei nge min hlat theih chuan anga, Dawngkim? Chubakah tinge heti taka min huat em em mai le?" tiin a zawt a. Dawngkimi chuan, "Ka haw hleinem che, mahse i mizia hi ka duh loh chi tak ania, ka ngaina lo che a ni." tiin a lo chhang a.

Rintea chuan vin lek lek hian, "Chhandama vang ani tih ka hria ania, hetia i awm nachhan hi.." a han ti deuh khur khur a. Dawngkimi chu a ding a, "Ka awmdan avang hian enge Chhandama chu i sawichhuah kher a?" lungawilo tak chuan a ti a. Rintea chuan hmuhsit hmel tak hian Dawngkimi chu a en a, "Kha i mitmeng mawi tak hmanga Chhandama i endan te kha ka hrethiam vek alawm..i duh a ni. Mahse thil pakhat ka hrilh ang che aw...Chhandama hian engtikah mah a duh chuanglo ang che. Mahse kei erawh chu maw...engtik lai pawha duh theih leh ngaihzawn reng theih ka ni e.." tih pah chuan a han nui leh vel a.

Dawngkimi chuan thinrim tak hian, "Enge i buaina ber ni a, Rinte?" a ti hlur a. Nui chung hian Rintea chuan, "Eng buaina mah ka neilo, bawihte." a lo ti a. Dawngkimi chuan, "Anih ahnu...duhtawk tawh rawh. Ka room atang hian chhuak nghal rawh..chhuak rawh." a ti hrep mai a. Rintea chu a ner sak a, "Awle, ka chhuak ange." a ti a, kawngka lam a pan a. A hawi let a, "Dawngkim, lo hawi leh lawk teh." a ti leh hram a. Rum zet chuan Dawngkimi chuan a va melh a, chuveleh Rintea chuan a camera awrh lai chuan Dawngkimi thla chu a la thut a, a flash a de chuai mai. Thinrim tak hian Dawngkimi chuan, "I mawl em ni a?" a ti vak a. Tlanchhuah pah chuan Rintea chuan, "Kan inhmu leh dawnnia aw, Duat." tiin a kalsan ta daih a.

*******

Ropuii chu pawnah chuan a chhuak a, thelret kung bula a pasal Maenga lo ding reng chu a va hmu a. A va pan hnai a, "Duhtak, chaw ei ila, lo kal rawh." ava ti a. Maenga chu ngawi reng chuan a lo ding reng a, thelret kung ah chuan a kut chu dahin a melh ngai a lo melh reng a. Ropuii chuan, "Ka biak che chu i hrelo em ni?" a va ti leh a. Maenga chuan muangchang chuan Ropuii chu a melh a, zawite hian, "Chu..i hre ve em?" a ti sap a. Hrethiamlo tak chuan Ropuii chuan, "Eng chu maw?" alo ti hu mai. Maenga chuan, "Tawng ring suh....chu.chumi thawm chu i hre velo amaw?" a ti leh a. Ropuii chuan a lu a thing a, "Engmah ka hrelo." a ti a. Maenga chuan, "Khawimaw i kut lo la teh.." tih pah chuan Ropuii kut chu a la lawk a, thingkung chu a kawh tir ve a.

Maenga chuan, "Tikhan i hre ve tawh em?" a ti leh a. Ropuii chu  a ngawi vang vang a, "Engmah ka hrelo, engthil nge i hriat bik a?" a ti a. Maenga chuan mak tih hmel tak hian, "KA hrethiamlo, aw (voice) thum deuh, tawng ri bul bul ri ka hre tlat a ni..thingkung chhungah hian awm an awm a ang zawk." a ti nuah nuah a. Ropuii chu a nui deuh suk a , "I ho emai, lo kal rawh...rawng te va bawl pui ve ila..helai hmun hi a vawt riau lehnghal, khaw lum lum nen.." tih pah chuan inchhung lamah Maenga chu a luh pui a. Maenga chu hawilet in chu thelret kung chu a en ngawih ngawih mai a, a hlauh hmel em em lehnghal. Inchhung lam an pan tur chiah chu an motor park-na bula lo ding mek, Rintea chuan a lo ko ding dun a, "Thianpa...i motor chu a nalh hle mai." a ti a. Maenga chuan nui chung hian, "I ti lawmawm e." a ti a. Rintea chuan, "Min hrethiam ula, thla ka lo laksak thei che u angem?" a ti a. Ropuii chuan, "Tehreng mai." a ti a, Rintea chuan an nupa chuan thla a laksak ta a. Maenga te nupa chu inchhungah chuan an lut a, hnaihnep hmel zet hian Rintea chuan, "Mimawl pahnih.." a ti hmuk a, a lut ve nghal a.

Chumi ni chuan Maenga pawh chu ngaihtha tak chuan a awm chhunzawm veleh mai a, buaina em em a awm hran lo. Zan a lo thleng leh a, zanlai dar 12 a pelh tawh pawh chuan Maenga chu a muhil thei thak lo mai a. A hma zan ang bawk chuan pawn lamah chuan amah kotu niawm tak hi a hre leh ta tlat mai a, a let a let ringawt a. Khum atang chuan a tho a, inhnuaia chuan a chhuk thla a. Pawn lam chu a han en a, tumah a hmu bawk silo. Chutih lai tak chuan TV chu a rawn in on ringawt mai a, a phu chiang kher mai. A ngaih athalo em em a, mahse inti huai luiin TV chu a va off ve leh mai a. A room lama a chho tur chiah chu pawnlamah chuan thawm ri rek hi a hre leh a, ava hawi phei vat a. Tukverh chu amahin a rawn inhawng thuai mai a, pa lian em em, dum vek mai hi Theret Kung bulah a lo ding run mai.

Chu palian chuan a lo en reng a, chuveleh thingkung phenah chuan a bo leh ta daih mai. Rang tak chuan Maenga chuan tukverh chu a khar a, a room lamah a chho nghal a. A nupui erawh tui takin a lo la mu a, a bulah chuan va mu ve nghal a. Mutthilh hram tumin a maimitchhing a, mahse a thei silo. Maimitchhing chung chuan a mu reng a, mahse ui lian tak thaw ri huam huam ang mai hian a beng bul vel chu a rawn lum leh huk huk zel mai a. A ngaihthalo chu a meng a, a sirlam a han hawi chu a phu chiang kher mai. Khum bul lawkah chuan chinghne lian zet mai, dum vek, mitmeng eng vek leh lei sei tak nei hian a lo melh reng mai a. Maenga hlau lutuk chu auchhuah a tum a, mahse a thei thak lo. A khawng vek a, chet pawh a che theilo. Chinghnia chuan hnai takah hian a en a, Maenga mit ah chuan a en reng a. Maenga thil hmuh chu a fiahlo tual tual a, atawpah chuan nikhawhrelovin a awm der mai.

*********

A tuk zingkarah chuan Rintea pawh chu thla la turin an chhuak a, ramhnuai lamah chuan a kal a. Choak lian tak mai chu a hmu fuh a, tichuan a thla chu a laksak ta a. A la zo chiah tihah chuan chu choak chu a rawn tla tawp mai a, a khawng nghal vek bawk. Mak a ti em em a, choak chu a han enchiang a, a lo thi reng mai. Chuveleh choak tam em em mai chu an rawn thlawk sup sup a, thingkung tam tak zingah chuan Sahatah kung ber kher ah chuan an fu ta thup hlawm a. A mal tete chuan ahma a choak ang bawk khan an rawn hlawm thla tawp tawp hlawm mai a, Rintea pawh chuan angaihna a hrelo kher mai.

Maenga pawh chu chokaah chuan a awm a, tukverh lam hawiin thelret kung bawk chu mit khap miah lo chuan a en reng a. Chutah a nupui Ropuii chu thingkung lam pan chuan a mutkawr pan tak nen chauh a a kal phei lai chu a hmu ta thut mai a. Ropuii chu a sam a thur vek a, a hmel a lang chiang theilo hial a ni. Thelret Kung bulah chuan a ding a, van lam a hawi a, a au vak vak a. Maenga chuan mak a ti kher mai, a en reng ringawt a. Chutah Ropuii chu a thingthi a, a kut pahnih chuan lei chu a hai ta vak vak mai a. Hrilhhai tak chunga Maenga'n a thilr reng lai chuan a hnunglam atang chuan hmeichhe aw hian, "Enge ni i en vung vung a?" a rawn ti thut mai a.

Rang tak chuan a hawilet a, a nupui Ropuii a lo ni a. Ropuii chuan eng mutkawr mah a ha lo, kekawr dum leh kawr ban bul dum hi a lo ha daih bawk si. Pawnlam ava en leh a, tumah an lo awm tawh lo a, lei pawh chu engmah haina hnuhma a awm lo. Maenga chuan Ropuii chu a en vung vung a, "Enge pawnah khan i tih a?" a ti ringawt a. Ropuii lah chuan, "Pawnah ka chhuak lo reng reng." a lo ti bawk si. Maenga chu a ngawi vung vung ringawt a, Ropuii bawk chuan, "Tinge a? Enge ni ta...i chauh hmel bawk si, i nuamsam lo em ni?" a ti a. Maenga chu a thu a, "Nizanah mumang hlauhawm deuh mai ka nei a.." a han ti phawt a.

A bulah chuan Ropuii chu a rawn thu a, "Min han hrilh la.." a ti a. Maenga chuan, "Kan mumang thalo te hi a tuk chawhnu  her hmaa midang kan hrilh emaw, kan sawi chhuak anih chuan kan chungah thil thalo tak a lo thleng dawn tiin kan pi leh pute khan an sawi thin a, a thleng dik maithei asin." a ti leh a. Ropuii chu a ner nung a, "Chutiang awihawmloh lutuk..han sawi mai mai teh." a ti a. Maenga chu a han thaw hak a, muangchang chuan, "Ka khumah ka mu a, tichuan tukverh atang chuan tu emawni hi a lo lut a. Mihring pawh a anglo, engemawni tak chu a ni. Ka che theilo a, ka khawngvek a ni ber mai. Ka thil hmuh chu maw..chinghnia nimai hian ka hria, mahse chinghnia chu a ni silo. Ka bulah a lo kal a, ka bengbulah rawn kun hniamin engemawni hi min hrilh a ni." a ti a.

Ropuii chuan, "Engthu nge a hrilh che a?" a lo ti vat a. Maenga chuan Ropuii chu a en a, "That tur che in min ti.." a ti ta mai a. Ropuii chu a ngawi vang vang a, chuveleh za em em hian a nui ta vak vak mai a. Nui cung chuan, "Chinghnia maw i hmuh a? I maimizial anih chu.." tih pah chuan a nui leh vak vak a. Maenga pawh chu a khi suk a, "Nia, mumang mai mai a ni." a ti a. Ropuii chuan, "Ti daih ila, hei hi ngati nge?" tih pah chuan Maenga kawr var a thisen kai chu a rawn lek kang a. Maenga chuan a khawr hlim pah chuan, "Ka ser kha a rawn thi vak a." tih pah chuan a awma ser chu a hmuh a, a lo thi sung mai a.

Ropuii chuan, "Awii...i hiat vak em ni? Doctor kan pan leh mai dawn mi?" a ti a. Maenga chuan, "A ngailo." a lo ti hmuk a. Ropuii chuan Maenga awma ser chu khawih ava tum a, "A pun vak mai tur asin." a tih lai tak chuan nget tak hian Ropuii kut chu a lo man thut mai a. Rum zet hian Ropuii chu a melh a, "Angailo ka tih chu..." a ti vin khur khur mai a. Ropuii chuan a kut chu a la sawn vat a, "Kan kallo anga nimai lawm, ana lutuk, khatia mi hmer vak kher kha angai lo." a ti a, a lungawilo kher mai. Maenga chuan, "Ka tha e, min ngaihtuah suh." a ti a, a kalsawn daih mai a.

**********

Zan alo thleng leh ta a, Chhandama, Rintea, Dawngkimi leh Maengate chu an thukhawm a. Rintea chuan zing lama a thil hmuhte chu sawiin card an deng pah a. "Sava thla la tura chhuak mai chauh kha ka nia, mahse choak hlir kha an rawn tla sup sup mai a, mak tak a ni. An thi vek lehnghal, an khawng vek bawk a, mi ram tak tak a ni." tiin Ruata chuan a thil tawnte chu a sawi a. Chhandama chuan, "Engvak a nilovang...magnetic storm vangte pawh a ni thei asin." a lo ti a. Rintea chuan, "Magnetic storm vang chu a ni theilo hrim hrim...ka mit ngeiin ka hmu a, thilmak tak a ni. Anmahni kha an intihlum nimaiin ka hria...a ruala intihlum ang mai an ni." a ti a. Chhandama chu  anui huk a, "Savate chu an intihlum anga maw?" a lo ti a. Rintea chuan, "Ka hre biklo...ka hrethiam biklo." a ti ringawt a.

Meizial pak khuh hlarh hlarh pah chuan Chhandama chuan, "Thawnthuah pawh choakte hi chu sual tehkhin nan an hmang tlangpuia, chuvang chuan thil tha lam a nih chu ava rinawmloh ve..." tih pah chuan Rintea chu a han melh deuh kher a. Dawngkimi pawh chu lo tawngchhuak vein, "Chutiang lam deuh chu keipawn ka hre tawh, chhiatna lo thleng tur Pathianin min rawn hriatlawk tir te pawh  ani thei asin." a lo ti a. Rintea chuan vin lek lek hian, "Chutiang sawi suh...chhan engemaw chu a awm ang, mahse chutiang chhiatna thleng tur tih vel chuan tehkhin lo teh." a ti deuh hrep a.

Dawngkimi chuan ngawirenga an bula lo thu mek Maenga chu ava en a, "Nang enge i ngaih ve dan?" a ti a. Maenga chu peihloh hmel tak chuan a rawn hawi chhuak a, zawi muang fan raih hian, "Keichu helai hmunah hian eng thil emaw tak chuan keimahni hi min thunun niin ka hria, a tha lam nge thalo lam erawh ka sawi thei lo." a rawn ti ta daih mai. Rintea chu a nui vak vak a, hmuhsit hmel tak hian Maenga chu a en a, "Anih chuan eng chuan nge min thunun anga? Han sawi ta che...engthil nge kan chungah hian thleng dawn han sawi law law teh..nang zawlneipa?" thamlo tak chuan a han tih khum a. Rum zet hian Maenga chuan Rintea chu a melh a, "THIHNA.." a ti ringawt a.

An ngawi ta thiap mai, an in en hrek hrek hlawm ringawt a. Maenga bawk chuan, "Khatia choak thi-a rawn tla sup sup hmutu ber chu a thi dawn niin ka hria, i hmu chiang tak tak maw?" a han ti leh a. Rintea ngaihdan a ni ta hauh lo mai, a kut a humruh a, "Dawt ka sawi i tihna em ni?" a ti ve ta khur khur mai a. Maenga chuan hlauhloh hmel tak hian a mitah tak chuan a lo enlet ve a, "Ka sawi mai mai ania, keipawh thilmak deuh vawiin khan ka hmu ve alawm." a ti a. Dawngkimi chuan, "Enge i hmuh a?" a lo ti vat a. Maenga chuan, "Ka hmusual pawh ani maithei, ka chiang biklo." a ti leh daih a.

Rintea chuan Maenga chu ala melhrum ngei mai, "Dawt i sawi bak a ni lo ang." a lo ti leh hlur a. Chhandama chu rawn inrawlh vatin, "Khaih khaih, duhtawk ang u...i deng leh tan ang ule." tiin boruak chu a rawn khap dai ta hram a. Rintea'n a deng leh tur chiah, a card ken lai a han en chu jocker card vek hi a lo ni a, a mak ti lutuk leh hlau bawk si chuan dawhkanah chuan card chu a theh thla vat a. Ringzet hian, "Ehee.." a ti vak a, Chhandama leh Dawngkimi chuan mak ti tak hian Rintea chu an lo en hu mai a. Maenga erawh chuan huat hmel tak hian Rintea chu a lo melh khur mai a, Rintea ngaih chu a tha tawh hauh lo. Chhandama chuan, "Enge ni a, Rinte?" tiin a zawt a, mahse Rintea chuan chhanglovin a room lam a pan ta zawk a.

***********

Zanlai dar 12 leh achanve vel a ni a, Maenga mu theilo chu pawnah chuan a vak harh ta ringawt a. Khua a vawt em em a, thli lah chu a thaw vuk vuk mai. Maenga chu Thelret Kung bulah chuan ava kal hnai a, mahse hmeichhe tap ri niawm tak hi a hre ta tlat mai. A hawi kual a, tumah lah an awm si lo. Hnunglam a hawi leh a, an nupa thlenna room verandah chu a han en chho a. Verandah ah chuan lehlam hawi chungin a nupui Ropuii chu a lo tap vak vak hi a lo ni a, mutkawr var pante chauh a ha lehnghal.

Maenga chu a han tlan chho vat a, an room ah chuan lutin Verandah lam chu ava pan ve ta nghal a. Verandah ah chuan Ropuii chu Maenga hnungchhawn zawng chuan a lo ding a, a lo la tap hawm hawm mai. Maenga chuan, "Ropui, ka tihpalh aw..tukin zinga khatia ka tihnat che avang khan...tihnat che ka tum miahlo ania. Keipawh hian engthil nge ka chungah hian thleng ta mai hi ka hrethiam biklo..helai hmun kan thlen tirh atang tawh khan ka awmdan hi a dik tawhlo a ni. Thil mak pui pui ka hmu a, sawi pawh ka sawifiah thiamlo. Helai hmun hi ka hlau takzet a ni, mahse chhuahsan chu sawiloh...chhuahsan ka tumna rilru ringawt pawh hian min ti hlau zual leh lawi si a nih hi." tiin a nupui tap mek chu a be mawlh mawlh a.

Ropuii lah chu a tap ring telh telh mai a, Maenga ngaih chu a tha ta hauhlo mai. Va kal hnaih pah chuan, "Duhtak, min ngaidam rawh..thinrim tawh suh." tiin a darah a va vuan a, a lo vawt thlur mai. Chutah Ropuii chu a rawn hawilet a, Maenga chu a per dawr mai. Ropuii chuan hmel reng a neilo, a hmai chu a lo mam thla pur mai. Maenga hlau lutuk, chiai bawk si chuan Ropuii chu a rek ta vak ringawt mai a, chutia a nupuii a reh vak vak lai chuan a beng bulah a nupui aw ngei mai chuan, "DUHTAK.." a rawn ti thut mai a, a phu zawk mai.

A mumang ram atang chuan a harhchhuak zawk mai a, dawhkan bawhin a lo muhil tlang hi a lo ni a. A bulah chuan Ropuii a lo awm a, "Lo kal rawh roomah han mu ang." tih pah chuan Maenga kutah chuan a vuan a. Maenga chu a han hawi kual a, inhnuai sitting room ah alo la awm reng mai a, "Engthil nge thleng a?" a ti ringawt a. Ropuii chuan, "I lo muhil tlang daih alawm, lo kal rawh...roomah chho nghal ang." a ti a. Mahse Maenga chuan a duh tlat lo, "Aih..ka muhil duhlo." a ti tlat mai a. Ropuii chuan, "I mawl em ni? I chauh hmel si..i mit pawh a bui vek tawh ania."  ati a, a hruaichho lui ta a.

Maenga chuan khum chu bang si chuan a nawr phei a, Ropuii chuan hrethiamlo tak chuan a lo en reng ringawt a. Maenga chuan, "Min en reng lo khan khum mawnglam hi lo nawr ve ta che." a ti a. Ropuii chuan, "Enge khatia i nawr phei kher a?" a ti a. Maenga chuan, "Bang hi sik reng ka duh, ka him zawk ang." a ti ringawt a. Ropuii chuan a pasal chetzia chu mak ti tak chuan a thilr reng a, "Maeng, eng lak atangin maw him i duh a?" tiin a zawt leh a. Maenga chu a ngawi vung vung a, "Ihh..englo, ka tla palh ang tih ka hlau thin a." tiin chhuanlam chu a siam a. Ropuii chuan, "I tlak i hlauh vang chauh chuan em ni?" tiin a zawt leh a. Maenga chuan, "Ava ninawm e, a pawi viau em ni? Bang si a mut ka duh animai lawm." vin lek lek chuan a ti a.

Wardrobe lo inhawng chu a khar a, a kalh nghal bawk a. Ropuii bawk chuan, "Tinge i kalh kher a?" tiin a zawt leh hram a. Maenga chuan, "A tul a nimai, kawngka pawh kha kalh teh." a ti a. Ropuii chuan kawngka chu ava kalh a, "Enge awmzia ni a? Min hrilh ve la?" a ti leh a, maenga chu a thawk hak a, "Aninawm, zawhna min zawt reng suh." a ti hlur mai a. Khumah chuan an mu ta ve ve a, Ropuii chuan, "Duhtak..i pa thilpek pawh chu pawm ve mai la, kan in-dang anga, helai hmun hi chhuahsan vat teh ang." a ti a. Maenga chuan, "A theihloh." a lo ti hmuk a. Ropuii chuan, "Engvangin maw?" tiin a zawt a. Maenga chuan, "Chhandama nen hian kan sawifel vek tawh." a ti leh ringawt a. Ropuii chuan, "Chhandama te chu a fel alawm, a hrethiam vek mai ang, duhleh thlen man hi kan pek belh deuh anga." a ti leh a. Maenga chuan, "Atheihloh, kan sawifel tawh..chu chu nimai." a ti tlat mai a. Ropuii chuan, "Enge hetia i awm a?" tiin a tap lek lek chuan Maenga chu a nam sawk a. Maenga chuan, "Engkim hi i hriat ve zel angailo." tiin lehlam chu a hawi daih mai a.

Zinglam dar 2 vel a ri tawh a, Dawngkimi mulai chu a harh zawk mai. A thu chhuak hlawl mai a, pawn lamah chuan phun sep sep thawm hi a hre ta tlat mai a. Khum atang chuan a tho a, tukverh lam chu ava pan a. Tukverh atang chuan a hawi thla a, thelret kung hnuaiah chuan Maenga chu thelret kung hmaah chuan dingin ban a lo phar a. Dawngkimi ngaihthalo chu ava chhuak a, a torch light nen chuan thelret kung chu ava pan ve a. Amah hnung chhawnin Maenga chu ban phar chungin a lo la ding reng a, Dawngkimi chuan ava pan hnai zel a. Dawngkimi chuan, "Maeng, eng i tih a?" ava ti a. Mahse Maenga chuan a chhanglo, a la ding ngawi reng a. Dawngkimi chuan, "Maeng, nangmah i ni tiraw?" tiin adarah va vawn a tum a. Chutah Maenga chuan lehlam hawi reng chung chuan, "Tibuai suh..awm tir mai mai rawh." a rawn ti thum ta bul bul mai a, Maenga aw ni pawhin a hrelo, palian tak, aw thum tak ang mai a ni. Dawngkimi chu a hlau em em a, inchhung lamah chuan a tlan lut leh nghal vat a.

**********

"Maeng, Maeng..i harh em?" tiin Maenga chu Chhandama chuan a sawi vak vak a. Maenga chu a rawn harh a, a han hawikual chu pawnah a lo mu reng mai. A hma zawn chu a han en a, thelret kung hmaah tak chuan a lo awm a. Maenga chuan zawi sap hian, "Ka tha e." a ti ringawt a. Chhandama chuan, "Hawh teh, lut ila..hei..i vawt vek alawm." a ti a, inchhungah chuan a hruai lut ta a. Thinpui sa tha ver vawr tak mai chu Ropuii chuan a thli chhuak a, Maenga chu a pe a. Maenga hmel chu a chhe tulh tulh mail lehnghal a, a mit a bui vek a, a sen rum bawk a. A chauh hmel em em a, a vun pawh a dang vek tawh. Ropuii chuan, "Maeng, nizan khan tinge pawnah i chhuah daih a?" a ti a. Maenga chuan, "Ka hrilh tawh che kha, ka hre biklo. Ka tho a aniang.." a ti ringawt a. Ngaihthalo tak chuan Ropuii chuan, "Kum 5 chhung teh meuh i bulah hian ka riak ve fo tawh a, mahse i thawh at ka la hre ngailo." a ti a. Maenga chu a nui suk a, "Tunah ka tho a animai lawm." a ti sam et a. Ropuii chuan, "Thil diklo chu a aem a ni tiraw?" tiin a zawt leh a. Maenga chuan, "Enge ni vak a? Ka inawkhlum mai dawn em ni?" a ti ta mai a. Lungawilo tak chuan Ropuii chuan, "Uang suh..nizan khan pawnah khan vawt tiin i khur hlum thei asin. Ka thusawi chu awih la, doctor chu i pan mai teh ang." a ti a. MAenga chuan, "Kan sawifel vek tawh kha..ka tha alawm, ka ngaihtuah awmloh." a ti a. Ropuii chuan, "Nilo, Dawngkimi pawhin a hmu che a, i tih hlauhthawn zia te kha i hria em?" a ti a. Maenga chu a nui ta huah huah mai a, Ropuii chuan, "Uanna hun a nilo ania." tiin  avin hrep mai a. Maenga chuan nui chung chuan, "Nang hi chu i va han lawmawm reuh tak em, Tluangte." a ti ta  daih mai a. Ropuii thinrim hmel pawh chu mak tihna in a inthlak nghal a, "Tluangte a? Tunge Tluangtei chu?" a ti a. Maenga lah chu a la nui reng a, "I hming anilawmni, Tluangte? I hming hi ka duh zawng tak a ni, beiseina hlirin a khatin ka hria." a la ti ta deuh deuh a. Ropuii chuan a pasal mize inthlak thut ta mai chu a mak a tih rual rualin a rap lek lek zawk. Maenga lah chu a la nui huah huah mai a, thinrim tak chuan room lamah a chhoh san ta daih a.

Dawngkimi chuan a khum chu a lo siam mawlh mawlh a, a siam zo chhuak tur chiah chu kawngka bulah chuan Maenga chu a lo ding reng mai a. Dawngkimi chu a phu chiang kher mai, Maenga lah chuan mit bui chur chung chuan a lo en reng a. Room chhunga luh pah chuan, "Nizanah ka tihlau che a ni awm a, ka tihpalh takzet a ni." a ti a. Dawngkimi chuan khur dar dar chu chuan, "A pawilo." tih ringawt chuan a chhang a. MAenga chuan Dawngkimi khum bula thalak chu a en a, "Hei hi i pasal em ni? Khawnge tunah a awm a?" tiin a zawt a. Dawngkimi chuan, "A thi tawh." a ti hmuk a. Maenga chuan, "Ava pawi ve...a thih hmain mi nuna buailo turin a hrilh ngai che em?" a ti leh a, Dawngkimi chuan a hlau kher mai. Dawnhkana Dawngkimi la phiar chu a en a, "Ava mawi ve..." tih pah chuan a la phiar a thil inziak chu a chhiar a, "The light will defeat the darkness..hei hi enge a awmzia ni a?" a ti a. Dawngkimi chuan, "Thim chu engin a hneh ang..tihna." hlauh hmel tak chuan a ti a. Maenga chuan, "I awih em ni?" tih pah chuan a mitmeng senrum mai chuan Dawngkimi chu a melh khur mai a. Dawngkimi chuan chhan pawh a chhang ngam tawh lo, chhuah a tum chiah chu Maenga bawk chuan, "Nizan khan hei hi i theihnghilh a.." tih pah chuan torch light chu ava pe a. Dawngkimi beng bulah chuan zawite hian, "Min zuiru tawh ngai suh ang che....abikin zanlaiah." tih pah chuan a chhuak ta a.

**********

"A mit mengte reng reng kha a rapthlak lutuk, min thah tum ang maiin min melh a ni." tiin Dawngkimi chu Chhandama bulah chuan a vui nasa kher mai. Chhandama chuan thleng hruk fai pah chuan, "I ngaihdan mai mai anih chu...a ho lutuk, nizan vang khan i la hlau em ni?" a lo ti a. Dawngkimi chuan, "Nizan chungchang kha chu sawi tawhlo teh..." a ti hmuk mai a. Chhandama chuan, "A tho a mai mai a nih kha...nang pawh va kal kher loh tur ania." a ti a. Dawngkimi chuan thutak zet hian, "Anilo Chhandam, a tho a lo..thildang a awm a ni. Nizana ka hmuh kha Maenga a nilo, ramhuai zawk niin ka hria." a ti khur dar dar a. Chhandama chu a thaw hak a, "Duhtawk rawh Dawngkim, engmah a nilo." a lo ti sam leh et a. DAwngkimi chuan lungawilo tak hian, "Anih leh torch light ka thlauh kha min pe let si a, tho a nise a hre dawn em ni? Mi nuna buailo tur ten min hrilh a, zanlaia amah enthla tawh lo tur ten min hrilh bawk a." a ti leh deuh pang pang a. Chhandama chuan lehlam hawi reng pah chuan, "Ava mak awm ve.." a lo ti leh ringawt a. Dawngkimi ngaihdan a ni ta hauh lo, "Chhandam, ka thusawi hi i ngaithla miahlo em ni?" a ti vin hlur a, thutthlengah chuan thuin a tap zawih zawih mai. Inthiamloh hmel tak chuan Chhandama chuan a rawn pan hnai a, "I tha em?" a va ti a. Tap chung chuan Dawngkimi chuan, "Ka hlau ani..helai hmunah hian engemaw tak chu a awm a ni." a ti a. Chhandama chuan, "Ka lo titi pui ang..tap tawh suh." tih pah chuan a kuah a. Dawngkimi chuan Chhandama chu a lo kuah let a, inthlahlel tak chuan an in en ngawih ngawih a. DAwngkimi zawk chuan Chhandama chu a fawp ta mai a, Chhandama pawh chuan a lo chhanglet vat a. Mahse an kalthui dawn chauh tih ah chuan Chhandama chuan, "Nilo..thil dik a nilo." tih pah chuan Dawngkimi chu a nam sawn vak a, a kalsan ta daih mai a.

Zan a lo thleng leh ta, ruah chu a sur nasa em em a, khawipui a ri dur dur bawk. Maenga chu an khum bulah chuan a ding a, a nupui muhil lai chu a rumzet chuan a en reng a. A mitmu te chu a hring nghulh mai a, mihring hmel pangngai a pu tawh meuh lo. Pawnah chuan a chhuak a, in sira suahdur chu a la a, thelret kung lam chu ava pan leh ta a. Ruah lah chu a sur nasa tulh tulh mai a, Maenga chuan thelret kung bula lei chu suahdar hmang chuan a lai ta vak vak mai a. Ft 10 dawna thuk vel chu a lai thleng ta vat mai, mihring pangngai tih theih phakbak a ni. Tichuan a lai zel a, a tawpah chuan engthil emawni chu a lai chhuak ta. Kutphah tiat vel lek bawm tereuhte hi  a ni a, rangkachak rawng a ni bawk. Maenga chuan chu bawmte chu a la a, vanlam hawiin rapthlak tak mai hian a nui ta vak vak mai a. A room tuverh atang chuan Chhandama chuan Maenga thil tih zawng zawng chu a lo en reng a, mak a ti kher mai. Maenga chuan a thil laih chu a vur leh vek a, tichuan inah chuan a lut ve leh ta a.

***********

Khua a lo var a, Ropuii pawh chu a harh a. A han hawikual a, abulah chuan Maenga chu lehlam hawiin a lo mu a. Ropuii chu a tho chhuak a, a pasal mutthilh lai chu remchangah la in wardrobe lam chu a pan a, a hawng tur chiah chu ri rek a hria a. Lehlam a hawi let nghal vat a, Maenga chu khumah chuan a lo thu a, rum zet hian Ropuii chu a lo melh khur mai a. Ropuii chu a phu chiang kher mai, "Ihh..ilo tho tawh a nimaw?" a ti bah nuai a. Maenga chuan nelawmloh zet hian, "ZAwn nei iva ang ve, Tluangte?" a ti a. Ropuii chuan, "Engmah ka zawng lo..ihh.." a tih lai chuan MAenga chuan, "Enge i zawn sawi vat rawh...tun atang chuan dan thar kan siam anga, i zawm thlap thlap tur a ni ang. Ka mimal thilte hi ka phalna lo chuan i khawih tawh tur a nilo, i hria em?" a ti khur khur a. Ropuii chuan, "Maeng, enge i buaina ber chu ni a?" a han ti dek dek chu MAenga chuan vinzet hian, "Ka mimal thilte hi khawih tawhlo la a nimai." a ti hlur mai a, Maenga aw pawh a anglo..midang aw daih a ni. Ropuii chuan hlau chung chung hian, "Helai hmun hi chhuahsan vat ang." a ti zawi sap a. Maenga chuan ngaihpawimawhloh hmel zet hian khum atanga chhuk pah chuan, "Ka va sil ve mawle, nizan chu zankhuaain lei ka lai a..." tih pah chuan a nui vel huah huah a. Ropuii chuan, "Ka thusawi chu i ngaithla em? VAwiinah hian haw law law teh ang." a ti leh a.

Maenga chuan a chhang lo, a zi mar vak vak a, a zuang tuk tuk mai bawk a. Ropuii chuan mak titak chuan a en reng a, "Maeng, tinge khatia i awm a? Ka hlau ania.." a ti a. Maenga chuan rumzet hian a rawn melh leh ta khur mai, "Min hlau em ni?" tiin Ropuii chu ava pan a. Ropuii chu a khur der der tawh mai a, "Aw..ka hlau che a ni." a ti ta tawp a. Maenga chu a han nui khi sung a, "Anihte chuan haw la..i thei anih phawt chuan..." a ti leh a. Ropuii chuan, "I tello chuan ka haw lovang." tiin alo chhang a. Maenga chuan, "KA hria alawm." tih pah chuan Ropuii chu a nuih vur vur a. Ropuii chu room atang chuan a chhuak a, choka lamah pheiin a rilru hah leh hlau bawk si chu a va tap ta hawm hawm ringawt mai.

Maenga chuan wradrobe chu a hawng a, a box laih chhuah chu a la chhuak a. Chuveleh choka lama awm mek, Ropuii tap lai chu a tawp ta chat mai. A beng chu a rawn kiu vawng vawng a, na a ti kher mai. A beng chu a hup a, a lu a na ngut ngut bawk a, chhuatah chuan a let tawp mai. Chutih lai chuan Chhandama chu pawnah chhuakin thelret kung lam chu ava pan a, mahse a thil hmuh chuan abarakhaih hle mai. Thelret kung chu a lo lung nuai nuai mai a, mak tiin a en reng ringawt a. Dawngkimi zingtho pawh chu a rawn thuchhuak hlawl mai a, a melh ngai a melh reng a. Dawhkana maimawm pakhat lo vak chu a man lawk a, maimawm ke te chu a mal te te chuan a pawt bung a. A hnar atang chuan thisen a rawn chhuak zawih zawih bawk a, mahse hria ang pawhin a awm chuanglo. Rintea pawh a bang biklo, a mit atang chuan thisen a chhuak zawih zawih mai a, na a ti em em a, a rum vawng vawng mai.

Maenga chu room atang chuan a chhuak a, choka lama a nupui lo let reng chu a hmu a. Ropuii ban chu a la lawk a, a hnuk ta mai a. A hnuh pah chuan Maenga chuan Ropuii chu a be mawlh mawlh a, "Bawihte, i chunga thil thleng mek hi amak i ti tiraw? I lu a na em? Khawnge..a chhan ka'n hrilh ang che." tiin an room lamah chuan a hnuk phei a, khumah chuan a mut a. Ropuii chu a hawi a ruai mai a, tawng tuma a ka a ang zuau chu Maenga chuan a lo hup vat a, "Nilove..engmah sawi rih suh. Ka thusawi hi lo ngaithla rawh aw..hmeichhe sual tak i ni. Chuvang chuan tunah hian an hrem mek che anih hi..tute nge an nih i hre duh em?" tih pah chuan a ipte atang chuan box chu ala chhuak a, "He bawm chhunga huai ho hian an hre che a ni...an tawng chu i hre thei em?" a ti a. Ropuii chuan a chhanglet theilo, engkim mai chu a hmu phe ruai vek mai. Dim lo tak chuan Maenga chuan Ropuii chu a rek a, "I dam veleh kan haw dawnnia...muttui aw, Tluangte." tih pah chuan Ropuii hmaiah chuan a liak a, a kalsan ta a.

***********

Inhnuai sitting room ah chuan Chhandama chuan zu a lo in a, Maenga chu rawn chhukthla in Chhandama bulah chuan ava phei a. Dawhkana zu chu ava ban a, "Ka lo in ve ange..inkawm mai mai teh ang." tih pah chuan zu chu tui pawh lo chuan a in khawlh khawlh a. Chhandama chuan chiang fek fawk hian, "Nizan khan tinge lei kha i laih vak vak a?" tiin rum zet chuan a melh a. Maenga chu  anui vur vur a, "Nangmah i ni maw minlo enthlatu kha...ka hre reng alawm. Tinge ilo kal a, min rawn zawh mai loh a?" tiin a lo zawt let a. Chhandama chuan, "Enge laih chhuah i tum reng reng a?" tiin a zawt leh a. Maenga chuan, "thawnthu min hrilh kha ila hria em? A dik tak tak a nih hmel..ro phumruk chu ka laichhuak tawh...i sawi ang khan, ramhuai ho thiltihtheihna an phumruk kha..ka lai chhuak tawh." tih pah chuan a nui thaw mai a. Chhandama chuan, "Thu awmze neilo sawi suh....i tho a emaw, zun cheh thin pawh ni la a pawi ka tilo, buaina engmah ka neilo. Mahse i mizia hian ka mikhual dangte hi a tibuai anih chuan..nang nen hian buaina kan nei animai." a ti chang fak mai a.

Maenga chuan ngaihnep hmel tak hian, "Hmhh..Dawngkimi chungchang animaw i sawi chu...i bulah min rel ani ngei ang." a lo ti a. Chhandama chuan, "Tuman an rel lo che, ka hrilh zawk che a ni. Ka mikhualte hi ka ngaihsak a, buaina an neih ka duh lo. Abik takin Dawngkimi phei hi chu ka ngaina a, ka thiantha tak a ni." a ti a. Maenga chuan nui chung chuan, "I mutpui tawh em?" a ti ta mai a. Chhandama chu a thinrim kher mai, "I tawngkam kha fimkhur rawh aw.." a ti vin tuar a. Maenga lah chuan nui reng chung chuan, "Awhaww..ka tihpalh. I la ti lo animaw? Ava nuihzatthlak ve...zanah i mutnaah ti ngam mang silovin i suahtuah ziah awm tho sia." a la ti ta deuh deuh a.

Chhandama thinrim chu a insum zo tawh lo, a tho thut a, Maenga kawrawmah chuan ava tham a, "Vawikhat pawh han sawi leh teh...ka that ang che." a ti khur khur mai a. Maenga chuan a hlaulo kher mai, "A pasal bulah khan a thihhma khan i tiam tawh tlat sia lawm tiraw..ahming pawh ka hria, Mawitea a ni a, i thiantha ber a ni bawk...KA UNAUNU ANGIN KA LO ENKAWL ANG..tiin damdawiinah a kut vuanin i tiam tawh kha, in indawm hlum ta a  nih kha. A accident thu i hriat tirh pawh khan i rilru a thil awm lhe i ngaihtuahna pawh ka hre vek, Dawngkimi kha i beisei nghal a ni, a dik em?" a ti ta phiar phiar mai a. Chhandama mak ti lutuk chuan Maenga kawrawm chu a thlah a, thutthlengah chuan a thu hnawk a. "Chu..chutiang thil...engmah...a awihawmloh..engtin..engtin nge?" a ti bah nuai mai a, Maenga chuan la duhtawk mai lo chuan, "Zawhna tamtak i dawng ngei ang tiraw? I ngaihtuahna tenawm takte pawh kha ka hre vek alawm..mahse ilo tiam tawh si a. Dawngkimi hi i duh tih pawh ka hria, mahse i thutiam avangin i hnar zel a ni. Nangmah leh nangmah i inhrem a ni, Chhandam. Mawitea a boral khan i hlim zia leh i lawm ziate kha Dawngkimi hnenah hian i sawi tawh em?" tiin a zawt leh a. Chhandama chuan, "Ngawi rawh." tih bakin a chhang theilo. Maenga nuihmel chu mihring pawh a ang lo, a hmai lah chu a dang vek mai. Chhandama pawh chuan a hlau ve ta, "Tunge i nih?" a ti ta tawp a. Maenga nui hmel chu a tawp hmak a, thinrimna hlirin a khat a, "Tunge ka nih tih hi i hriat a pawimawh lo, enge ka nih tih hi a pawimawh ber zawk. Tun atan chuan Maeng, tiin min ko hrih mai rawh." a ti a, a chhuahsan ta daih a.

***********

Dawngkimi chuan a hnar thi chu a tuai pherh luai mai a, a la phiar te chu a chep chhe vek bawk a. Chutih lai chuan inchung lam panin Rintea chu a rawn chho a, a mit chu na a ti kher mai. A thilhmuhte chu a fiahlo vek a, a kalna turte chu a dap chawp hial a ngai a. Dawngkimi room zawna hmeichhe pakhat lo ding, DAwngkimi niawm tak mai chu chianglo deuh chuan ava hmu a. Zawimuanga va pan phei pah chuan, "Dawngkim...nangmah i ni em? Ka mit hi ana lutuk..damdawi engemaw tal min han hnawihsak teh." ava ti ringawt a. Chu hmeichhia chu Dawngkimi ngei chu a lo ni a, Rintea chu a pawt hnai a, a kiss ta bawrh bawrh mai a. Rintea chuan mak a tih rual rualin nuam a ti hle a, a lo ngaihzawn ruk em em leh a lo it ruk em em maiin chutia a rawn fawp ta mai chu a mitnate pawh chu a reh nghal vek hian a hria a. DAwngkimi chuan a beng bulah chuan, "Min duh ani lawm ni? I sawi thin anilawm ni?" tih pah chuan khumah chuan a namthlu a, an thawmhnawte pawh chu an hlip nghal a.

Chhandama chu Dawngkimi room lam pan chuan ahan chho a, room atanga thawm lo chhuak chuan a ti hrilhhai kher mai. Room kawngka chu alo inkalh lova, a va hawng a, a thil hmuh chuan a ti thinrim kher mai. Dawngkimi leh Rintea chuan sex an lo hmang mek tih chu chiang tak chuan ava hmu a, DAwngkimi lah chuan alo la nuih zui. Thinrim tak chuan inhnuai lamah a chhuk leh a, a silai puakruk chu la chhuakin a mu a thun nghal malh malh a. Chutih lai chuan Rintea a lo kal thut a, Chhandama chuan a silai chuan a lo tin nghal a. Rintea chuan a ban phar nghalin, "Nilo..Chhandam..min kap suh." a ti nghal vak vak a. Thinrim tak hian Chhandama chuan, "Nang phiangsen khan Dawngkimi..." a tih lai chuan Rintea chuan, "Nilo Chhandam, engtin nge a thlen theih ka hre biklo. Thil diklo chu a awm a ni..silai kha dahthla la, inbe lawk ang." a ti a. Chhandama chuan a la tin reng a, "Lo kal hnai suh, a nihloh chuan i thluak kha ka kap darh vek ang." tiin a vau khur khur mai a. Rintea chuan zaidam tak hian, "Awle awle..ka lo kal hnai tawh lovang. Mahse min ngaithla rawh..helai hmunah hian engemawni tak chu  a awm a ni...kan thluak leh kan taksate hi a thunun a ni. Kan vai hian kan danglam vek a ni, tukin zing khan ka mit a rawn na vak a, ka mit a del dawn amaw ka ti hman hial asin. Dawngkimi'n khatia minlo tih nachhan pawh kha min duh vang anilo, engthil emaw takin a tih tir a ni. Lo nilo tase, kan chetsual avang khan min that tak tak dawn em ni?" a ti a.

Chhandama rilru hah bawk si chuan silai chu a kap puak dur a, dawhkanah chuan a theh thla nghal a. Rintea chuan vin zet hian, "I mawl em ni? Min kahfuh teuh zia kha.." a ti vin vak a. Chhandama chuan zawi sap hian, "Ka tihpalh, enge ka chungah hian thleng ta hi ka hre biklo a ni." a ti thawp sat a. Rintea chuan ava pan hnai a, "A pawilove..enteh thianpa, tu emawni tak chuan min hrai rui a ni." a ti a. Chhandama chuan, "Anihleh i mit chu enge a an a?" tiin a zawt a. Rintea chuan, "A dam tawh e." tiin a lo chhang a. Chhandama chuan, "Min lo zui rawh..thil ka hmuhtir ang che." a ti a, pawnah chuan an inzui chhuak ta a.

Thelret Kung bulah chuan an ding dun a, Chhandama chuan, "Ka mikhualte zinga mi Maenga hian nizan khan helai hi a lai vak mai a, thuk deuh a laih hnuah a vur leh a. Ro phumruk ka chhar e atia, a mizia pawh a mak khawp mai." a ti a. Rintea chuan, "KA hmuhtir atang khan ka ring hlawl lo a ni Maenga hi chu......a saptawng lamdante kha a nalh a, mi changkang tak a ni. Mahse Honeymoon atan helai ramhnuaia resort la siam that zawh loh kher a rawn thlang a, thilmak tak a ni." a ti a. Chhandama chuan, "Enge i sawi awmzia?" hrethiamlo tak chuan a lo ti a. Rintea chuan, "LEhkhathiam tak a ni a, keini hi min rawk a tum a, kan chanchin theuhte hi a lo chhuichiang tihna a ni. Khawi aw...ahma khan tinge maw ka lo hriatthiam mai loh le..ani khan min hrai rui a, kan pawisate hi ruk a tum a ni." a ti a. Chhandama chuan, "Mahse tinge zanrei ah helai hmun hi a laih chiam si a?" a ti leh a, Rintea pawh chuan, "Ka hre tawh biklo." a ti ringawt a.

Chhandama chuan a motor lam chu ava pan a, Rintea chuan, "Khawnge i kal dawn?" a lo ti vat a. Chhandama chuan, "Police ka ko dawn." a ti ringawt a. Rintea chu a  nui suk a, "Enge i hrilh anga...i mikhual pakhatin lei a lai a, i thurukte a hria a, chu chu i va hrilh dawn em ni?" a lo ti a. Chhandama chuan, "Engtin nge kan tih vak chuan anga?" tiin a zawt a. Rintea chuan, "Ka hria alawm, a lo let leh hunah he zawngsenpa hi kan lo man anga, kan sawisa hrep dawnnia." a ti a, Chhandama nen chuan inchhungah chuan an inzui lut a, an thil tihtur vel chu an sawidun ta a.

***********

Maenga chu ramhnuai lam pan chuan a kal zel a, a kal thui tulh tulh a, khua chu a rawn thim ta mup mup mai. A hma zawn takah chuan chinghne lian zet mai, dum vek leh mitmeng eng vek mai hi a lo kal a, Maenga chuan a lo en reng a. Maenga chuan, "Ka mumang em ni?" a ti ringawt a. Chu chinghnia chuan a kal hual a, chutah aw thum tak mai hian, "Nilo, i mumang a nilo." a ti a. Maenga chuan chinghnia chu a en reng a, "Tunge i nih?" tiin a zawt leh a. Aw chuan, "Helai hmun hi ka ram a ni a, he Sahatah tlang hi ka ta a ni. Ka rama lo lut mihringte hi ka ngaithei lova, ka that mai thin. Eng(light) hnehtu ka ni a, thim Lal ka ni..Ramhuaite Pathian ka ni." a ti leh ta chhur chhur mai a. Maenga chuan hlau tak chung chuan, "Enge ti tura min duh?" a ti leh a. Chinghnia chu a ding a, Maenga chu a en reng a. Chutah aw thum tak mai chuan, "Zan alo thlen hunah ka hruai haw leh ang che." a ti leh ringawt a. Maenga chuan mittui tla teuh chung chuan, "Tunah min hruai haw rawh." tiin a ngen a. Aw chuan, "Ka zawng hmu ang che anga, engkim hi zanin hian a tawp vek tawh tur a ni. That ang che, an vai sawn that ang che. Ka thu i zawm anih chuan i him ang, mihring pangngai ah i let leh thei bawk ang." a ti a. Maenga chuan, "Anih leh i thu chu zawmlo ta ila?" a ti a. Aw chuan, "I remti vek tawh." a ti ta mai a.

Maenga chuan a laichhuah bawmte takte chu a la chhuak a, "Nilo..ka theilo." a ti a, bawm chu a vawm bo ta daih a. A tap vak vak a, "Nilo..ka mumang vek a ni. A tak i nilo, ka mumang mai i ni." tiin a hmaa chinghne lian tak lo bawk vung mai chu a vin vak vak a. Chu aw bawk chuan, "Ka thusawi hi ngaithla rawh..hei hi ka aw(voice) tak tak chu a ni e." a ti thum bul bul a. Chuveleh Maenga beng chu a kiu ta vawng vawng mai a, na tuara rak vak vak ri te chu chiang takin a hria a. Maenga chuan a beng a hup a, na a ti kher mai. A thingthi hnawk a, "Min kalsan rawh.." tiin a ngen lawm lawm a. A tawpah chuan nikhawhrelovin a let der mai, chinghnia pawh chuan a kalsan ve mai a.

***********

Zan a lo ni a, Dawngkimi leh Chhandamate chuan Maengate nupa room atanga Ropuii tap thawm chu an hria a. Rang tak chuan an tlan chho nghal a, kawngka chu an va hawng a. Ropuii chu bang nghengin a lo ding a, "Box kha kan paih bo sak a ngai ani." a ti ringawt a. Chhandama chuan, "Eng box maw?" a lo ti hu mai a. Ropuii chuan, "Enge a nih ka hre biklo, kha box atang khan thawm mak tak tak a lo chhuak bawk a. Chuan..chuan ka hmu bawk a ni." a ti a. Dawngkimi chuan, "Engmaw i hmuh?" a lo ti vat a. Ropuii chuan hlauh hmel tak hian, "Thla ka hmu a ni.. hlimthla dum vek a ni. Min rawn pan hnai a, ka thi dawn emaw ka ti hman hial a." tiin a tap hawm hawm mai a. Dawngkimi chuan ava kuah a, "I mumang mai mai anih chu...engkim a tha leh vek mai ang." a ti a. Chhandama chuan, "Khawnge Maenga?" tiin a zawt a. Ropuii chuan, "Ka hrelo, a lo kir leh ngei ka beisei." a ti a. Chhandama chuan thinrim tak hian, "Lungngai suh..lo let leh rawh se, engkim ka buaipui lawk vek tawh." tih pah chuan a chhuak a, kawngka a khar ri bur mai. Ropuii chuan, "Khawngaihin ti na suh aw.." tiin a au zui lawm lawm a, Dawngkimi paw chu chhuak ve nghalin, "Ropui, ka lo let leh ang." a ti a, a kalsan ta a.

"Lo ding teh, khawngaihin." Dawngkimi'n a tih takah chuan Chhandama pawh chu a ding a, Dawngkimi chuan, "Ka tina che a, ka tihpalh. Rintea nena kan chetdan kha...achhan ka hre biklo. Khawngaihin Chhandam, min haw suh." a ti a. Chhandama chuan, "Ka haw lo che, i laka ka rilru put dan chu ala ngai reng." a ti a, kalsan a tum a. Dawngkimi chuan, "Chhandam, helai hmunah hian thil mak tak a thleng a ni, nangpawhin i hriatthiamlo thil a thleng mek a ni. I ti tawp theilo, tuman kan titawp theilo." a ti a. Chhandama chuan, "Enge ti tura min duh?" a ti a. Dawngkimi chuan, "Tlanbo ang, helai hmun hi chhuahsan mai ang." a ti a. Chhandama chuan a lu a thing a, "Mi dawihzep ka nilo, ka hmelma chu ka tlanchhiatsan lovang. Ani aia sual tamtak pawh ka tuk zal hnem tawh lutuk, min tihbuai man chu a hmu khawp ang." a ti a. Kalsawn a tum chiah chu Dawngkimi chuan, "Ka hmangaih che." a ti ta mai a. Mahse Chhandama chuan a chhanglo, inhnuai lamah chuan a chhuksan ta thova.

Inhnuai lamah chuan Rintea pawh Chhandama silai puakruk keng chung chuan a lo thu reng a, Chhandama chuan, "Rinte, tumah kan kap tur a nilo." tih pah chuan hruihrual a la a, tuboh chu a la leh bawk a. Rintea chu ava melh leh a, "I hria maw?" a ti leh a. Rintea chu a rawn tho a, "Kan hria ang chu." a ti ringawt a. Maenga chu a harh hlawl mai a, a awmna lai chu a han enkual a, ramhnuaiah chuan a lo la awm reng a. Khua  a lo thim vek tawh a, rang takin a tlan haw nghal a. Inchhung chu a lut a, alo reh thiap mai. A room lamah chuan a chho a, a nupui chu tui takin a lo muhil bawrh bawrh a. Maenga chuan Ropuii chu a en reng a, Ropuii pawh chu rawn harhin MAenga chu a rawn en a. Chuveleh hnunglam atang chuan Chhandama a lo lang thut mai a, tuboh chuan Maenga lu ah chuan  a chhu pawp a, Maenga chu nikhawhrelovin a thal nghal tawp mai.

*********

"Zawnga, harh rawh." tiin Chhandama chuan Maenga hmaiah chuan tuiin a theh a, MAenga chu a rawn harh kawk mai a. Thutthlengah phuar behin a lo awm a, a bulah chuan Ropuii chu tap chungin a lo thu reng bawk a. Maenga chuan hrilhhai tak hian, "Eng...enge awmzia? Engthil nge thleng a, min fiam em ni? A nuihzawtthlak loh khawp mai." tiin Chhandama chu a en a. Midang ho chuan ngawi rengin an thlir thap ringawt a, MAenga chuan a nupui chu ava en a, "Ropui, enge awmzia?" a ti leh a, mahse Ropuii pawh chuan a chhanglo. Chhandama chuan Maenga samah chuan a kek a, "Khu khu engthil nge?" tiin dawhkana Maenga box tereuhte chu a kawk a. MAenga chuan mak ti takin, "Khawi atangin nge hei hi i neih theih?" a ti hu mai a. Chhandama chuan, "I jacket ipte atangin." a lo ti a. Maenga chuan, "Nilo, ka paih bo daih tawh sia, thiltheih a nilo." a ti a. Chhandama chuan a aia na chuan a samah chuan a kek leh vak a, Maenga chuan, "Min thlah rawh...min chhuak rawh..khawngaihin." tiin a ngen a. Chhandama chuan, "Hei hi engthil nge ka tih chu?" tiin a zawt leh a. Maenga chuan, "Ka hre lo, ka hrelo tak tak." a ti leh a. Chhandama chuan a hnek siah mai a, Maenga chu a hawi sawk mai. Thinrim tak hian MAenga chuan, "In a zo ta em ni a? Ropui..Duhtak..enge awmzia?" a ti vak vak a. Chhandama chuan, "Min bum a, min thah vek i tum tih kan hria a ni. Tunge i nih chiang takin sawi rawh, anihloh chuan kan chhuah dawn chuanglo che." a ti a.

Rintea pawh chu lo tawngchhuak vein, "Tu tana thawk nge i nih?" a lo ti ve bawk a. Ropuii pawh chuan tap chungin, "Maeng, tinge room ah khan min kalhkhum a?" tiin alo zawt ve bawk a. Maenga chu a tap pur mai, "In thil sawi hi awmzia engmah ka hrelo, ka lu hi a hai muai muai reng a, abak engmah ka hrelo." a ti hluam hluam a. Chhandama chuan, "I hriatna a that em kha...han ngaihtuah chiang teh." a lo ti a. Thaw hluam hluam chung chuan Maenga chuan, "Ka harh chiah kha ramhnuaiah ka lo awm a, ka bulah chuan sava thi tam tak anlo awm bawk a..." a tih lai chuan Rintea chu thinrim zet hian a rawn kal a, Maenga samah chuan a tham a, a khabe ah chuan silai chuan a tin a, "Zawnga, tunge ka nih hi i hria em?" a ti vin tuar a. Maenga chuan, "Aw hria e, Lalrinsanga, Upper Republic a khawsa i ni." tiin a lo chhang a. Rintea chu a thinrim zual kher mai, "Kei hi min chhui ru a ni tiraw?" a ti leh vak vak a. Maenga chuan, "Ka chhuilo che...tumah ka chhui ru lo che u." a ti tawk tawk a.

Ropuii chuan chutia a pasal Rintea'n silaia tin reng chunga a vau khur khur chu a ngaihdan a ni bik talo, a tho lawk a, Rintea chu ava zuan ta vak mai a. Rintea chuan Ropuii chu chhuatah chuan a theh tlu thuai a, ringzet hian Maenga chuan, "Nilo Duhtak...Rinte..kap suh." tiin a au vak vak a. Rintea chuan siali chuan Ropuii chu a tin a, "Min rawn tibuai ve ngam amaw?" a ti a. Chhandama chuan, "Rinte insum rawh." a lo ti a. Rintea lah thinrim laklawh bawk si chuan Chhandama pawh chi a tin ve a, "Nangpawh kha lo kal hnai suh." tiin a lo vin hrep mai. "DUHTAWK RAWH U." tiin Dawngkimi chu a au vak a, an reh ta thiap mai.

Dawngkimi chuan, "In mawl em ni a? Inla hrethiam chuang nange? Hetia kan awm chhan hi he box vang hi a ni..keimahni leh keimahni inthat turin min duh a ni. Dawi lam thil engemawni tak chu a ni, kan inthurual vek a ngai." a ti a. Silai chu Chhandama chuan ava chhuhsak vat a, Rintea chu a thaw hak a, "Nilove DAwngkim...Maenga chauh hi alawm thah ka tum. Khawi teh Chhandam, minlo pui teh. He misual hi hmun dangah i dah daih teh ang." a ti a, Chhandama nen chuan Maenga chu an phuarna hrui leh thutthleng nen chuan an zawn a, inhnuaiah an chhuk pui a, Ropuii pawh chuan a zui ve a. Dawngkimi pawh chu chhuah ve a tum a, mahse dawhkana bawmte chu a rawn ri rek rek a, Dawngkimi chu a ding chat mai. Chu bawmte chu a va pan hnai a, chutah a beng a rawn kiu ta vawng vawng mai. A beng chu a hup a, a maimitchhing a, engemawni hi a chham nghal char char bawk a. Chutah a rawn meng kuau a, bawmte chu a la a. A nui var var a, inhnuai lamah chuan a chhuk ve ta a.

*********

"In mawl em ni? Min chhuah vat rawh u." tiin Maenga chu a rak chel chul mai a. Kudam lamah chuan an zawn thla a, chutah Rintea mit chu a rawn na leh ta vak mai. "Ana lutuk, ka mit hi.." tiin Rintea chu a rak chel chul mai a, Chhandama chuan Rintea chu a buaipui nghal vat a. Chutih lai chuan Ropuii chuan, "Ka pasal saw chhuah ru.." a lo ti ve chhen bawk a. Chhandama rilru hah buai tawh bawk si chuan Ropuii chu bangah a nam bet a, "Lo rak lo rak suh..thih ve i duh em ni?" a ti khur khur a. Maenga chuan, "Ropui...tlanchhe rawh." a lo ti ve vak vak bawk a. Rintea chuan Maenga chu a han hnek hawi leh siah mai a, "Lo bengchheng suh." tiin a vin nghal vak vak bawk a. Maenga chu a thi phung tawh mai, Rintea chuan, "Chhandam, silai kha minlo pe teh, ka'n that law law ange." a ti a, Chhandama chuan silai chu a pe a.

Chutih lai chuan Dawngkimi chu bawmte keng chuan choka lam a pan a, mei a chhem alh sauh sauh a, bawm chu a hal ta a. Bawm chu a kang a, mahse a kang reilo. Meialh chu a thi ta daih mai a, chumi rual chuan current zawng zawng pawh chu a thim ve nghal vek bawk a. Inchhung chu a thim ta vek mai, chutak inchhungah chuan tukverh engmah hawng silo chuan thli a rawn thaw lut ta vak vak mai a. Dawngkimi chu a hawi a vek mai a, zau tak hian a meng hru mai bawk a. Dawhkana hrui hrual chu ala a, pawnlam a pan nghal a. Chhandama leh Rintea te pawh chuan kudam chu chhuahsanin eng chhit dan tur an ngaihtuah nghal a. Thim zingah chuan Ropuii chu a indap kual a, ventilation atanga thla eng lo lut chuan a pasal, thi phunga lo thu chu a rawn chhun a. 

Rang takin ava pan a, "Maeng, engthil nge thleng hi?" tap chung chuan ava ti a. Maenga chuan chauh hmel tak hian, "Ka hrelo, helai hmuna kan awm reng chuan kan thi ngei ngei ang. Chutih lai chuan Chhandama pawh light zawngin a indap kual nasa kher mai, chutia a kal kual vak vak lai chuan pawnlam pana Dawngkimi hruihrual keng chunga a lo kal mek chu ava hmu a. a ding chat mai. Dawngkimi chu pawnah a chhuak a, a rawn hawilet a. Chutih lai chuan Rintea pawh chu a mit a rawn na leh ta, a mit atang chuan thisen a rawn chhuak leh a, chhuatah chuan a tal avk vak mai a. Chhandama chu va tlan pheiin, "Nilo, Dawngkim..ti suh." tiin a au nghal vak vak a. Dawngkimi chu a kal zel a, Chhandama chuanva umzui a tum a, mahse kawngka chu a inkhar thut mai. Kawngkhar chu a beng vak vak a, mahse a hawng theilo. Tukverh lam a pan a, mahse pawnlam atanga inkalh ang maiin a lo hawn theih miah loh mai a.

***********

"Duhthlan tur pahnih chiah kan nei...kan pahnihin kan tlanbo duh thei a, nangmahin i tlanbo thei bawk. A phahnihna zawk i thlang a nih chuan hmanhmawh la, chhuak vat rawh." Maenga chuan Ropuii bulah chuan a ti a. Ropuii chuan, "I tello chuan khawiah mah ka kal lovang." tiin Maenga an phuarna chu ava phelh a. An inkuah a, Ropuii chu a tap zawih zawih mai. Chutah Maenga hmel chu rawn danglamin a mit chu chinghne mit ang maiin a eng leh ta pup mai. Ropuii chu a rek vak a, a rekhlum der mai.

Dawngkimi chu thelret kungah chuan lawnin a zarah chuan hrui chu a bang liam a. Hrui hmawr lehlam chu a suih mual mual a, a nghawngah a vet ta mai. Tukverh chu Chhandama chuan a chum vak vak a, "Nilo, Dawngkim..ti lul suh." a ti lawm lawm a. Dawngkimi chu a rawn hawi a, Chhandama chu a en vawng vawng a, a zuangthla ta thut mai. Dawngkimi chu a inawkhlum ta a, Chhandama chu a thinthi hnawk mai.

Maenga chu kudam atang chuan a chhuak a, meichhemna bula bawmte chu ava la a. Chhandamate awmna lamah chuan ava phei a, Chhandama chu bawk khupin a lo tap zawih zawih mai. Maenga chuan Chhandama bulah chuan, "Tikhan i thawnthu min hrilh kha a tak ngei a ni tih i awih tawh em?" a ti a, Chhandama chuan a chhang lo. Rintea chu rawn bawkvak pheiin Maenga chu silai chuan a tin a, Maenga chu a va hawi a, "A mu a awmlo." a ti zawi sap a. Rintea chuan slai chu a han hmet a, a mu chu a lo awmlo tak tak a. Maenga chuan, "I mit chu enge a an a?" a ti leh a. Thinrim tak hian Rintea chuan, "Ahma khan lo kap hlum law law che ila tha tur a nia." a ti khur dar dar a. MAenga chuan, "Thu tlemte hnuchhiah tur che u in huai ho hian min phalsak a, in damkhaw chhuak dawn silova, chuvang chuan lehkha ka hnutchhiah che u a ngai a ni." tih pah chuan chokaa chemte chu ava la a, a lo let leh a.

Chemte chu Rintea pek pah chuan, "Nangmah ngeiin han ti ta che." a ti a. A duh vang reng ni miahlo hian Rintea chuan chemte chu a lo ban ve mai a, a hrawk zawnah chuan a chuktuah a. Hlau tak hian Rintea chuan, "Enge awmzia..nilo ka duhlo." tiin a rak chel chu mai a. Chutah Rintea chuan ama hrawk chu a zai ta siah siah mai a, thisen a baw hawk hawk mai. Chhandama chuan MAenga bulah chuan, "Nilo..tawp tir rawh..khawngin.." tiin a lo ngen ve bawk a. Rintea chu a inzai hlum ta a, thisawn a kawi ta nuai mai. Chhandama chu thawh a tum a, mahse amah khawihtu awm miah silo chuan a tlu hnawk a, a khur nghal char char mai. Thei leh theilo hian Maenga chu a han melh a, "ENg..engthil chiah nge maw i nih le?" a ti tawk tawk a. Maenga chu a nui suk a, "SAHATAH HUAI KA NIH HI." a ti a, Chhandama chu a thi ve nghal a. Maenga chuan pawnlam chu a va en a, kawngka chu a nam hawng rawk a, ramhnuai thimzingah chuan a kal liam ta a.

************

Kar khat a liam hnu chuan Chanchin Thar ah chuan News reader chuan chanchin thar a puang a, "Resort pakhat, Chhandama Resort ah chuan ruang pali chhar a ni a, he Resort awmna hmun hi Sahatah Tlang a ni. Ruangte hi tute chiah nge an nih hriat a ni mai lova, mahse register pakhatah ruangte hi Lalchhandama kum 40, Lalrinsanga kum 38, Laldawngkimi kum 31 leh Lalropuii kum 29 te an ni. Register ah hian Lalengmawia tih hming a inziak ve a, ani erawh a ruang emaw, amah hmuhtur a awmlo thung. Tin, Lalengmawia hi mitthi zinga mi Lalropuii nen hian nupa an ni nghe nghe a ni. Inchhung vel chu a hnawk hle a, dawhkan leh thutthleng a tlu remrum a. Mitthi zinga ruang pathumte hi inchhungah an awm a, sitting room lamah mipa ruangte pahnih hi hmuh a ni a. Inhnuai kudam lamah pakhat hmuh ni lehin pawn a thingkung ah ruang pakhat chu hruia inkhai a hmuh a ni bawk. Ruangte hi an lo chhe nasa tawh hle a, police-te chuan an boral hnu atang hian kar 3 vel a liam lai a liam tawh an rin thu an sawi." tiin.

(He thawnthu hi atak tak a nilova, phuahchawp a ni e.)

THE END