CHRISTIAN A NI VE SILO

CHRISTIAN A NI VE SILO

- Aaron Malsawmdawngzuala

"Min ngaidam rawh, min kaltir tawh mai rawh."

"Nilo...kum 3 zet kan inngaizawng ve a, ka hmangaihna che hi thi mai tur chuan ka phallo."

"Nilo Brandon, min kaltir rawh, midang duh ka nei a ni."

Ka va na em, min thawng takzet, ka hmangaih thin em em, amah pawhina min hmangaih ve em em a ka hriat chuan kei nilova, midang duh a neih thu a sawi chu ka tan chuan a ri a va mawilo in ava runthlak em.

"Enga? Tunge?"

"Awle i hriat duh chuan ka hrilh ang che, a hming chu Daniel-a a ni, min ngaidam rawh aw Brandon, atawp nan duhtak, min ngaidam rawh, inthen ang ka tih tawh kha, midang ka tawng tawh a, ka tihpalh."

"Khawia mi nge...ka lo kal dawn nia."

"Lo kal duh suh, hei alo leng a, kan inphur chhuak dawn."

"Marina, khawngaihin vawikhat tal kan inhmu leh thei lawm ni?"

Reply-na ka dawng tawh lo, min van tina in min va han tizak tak em. A chhungte leh ka chhungte pawn innei turin min ring ve vek tawh a, mahse a tan ka lo tling si lo a maw? Engtin nge ka tih tak ang? Lungngai em em chuan kan in bula tlang, hmun reh ve tak, ka rilru hah chang leh ka lungngaih changa ka kal ziah thinna ah chuan ka vei kual char char ringawt a, keimah leh keimah inbia in, engthil nge ka tihsual a, enge a lungawilohna tur thil ka tih ka hre silo. Ahma kha chuan nula innocent leh duhawm tak a ni thin, school kan kal lai atang tawh a inngaizawng kan ni a, midang te pawn min thik a, kan hlimdun em em a, kan inthen ngailo, inngaizawng dangte ang bawkin inhauh chang te chu kan nei ve bawk a, mahse mipa dang vang te, hmeichhe dang vang te in kan inhau ngai lo, thikthu chu kan pe chhe ve dun ve thin khawp mai. Ama thiannu ngei pawh ka biakthat deuh chuan a thik nghal zel kha a nia, ani tluka bialnu rinawm hi khatih hunlai kha chuan he khawvelah hian an awm tawh kher lo ang. Duhdang anneih theih hi ka ringlo, college a kal atang khan a mizia a danglam tih cu ka hre tho a, mahse nitin zantin kan inhmangaih thu kan inhrilh dun thin a, duhdang a nei mai hi a mak ka ti. Marina Lalrempuii hian min lo bum in min lo kawp a, a thiante leh ka thiante an college-a lut ho te pawn mipa dang nen an awmdun thu, an inphurh chhuah thu min hrilh fo a, mahse ka rin em avangin ka awih ngailo. Ka thinrim a, tah vak ka tum a, ka tap theilo, ka tawt vek, vawitam ka call a, mahse min chhang lo, a tawpah phei chuan ka call a block hmak anih chu mawle...he khawvel lo tenawm zia hi chu awwww. Engtin nge ka chhungte bulah ka sawi tak ang? Ka thiante bulah engtin nge ka sawi tak ang, ka nupui hual tia ka lo koh ve thin khan midang min neihsan dawn chu a ni sia, ka hmangaih takzet asin le? "Brandon, ka tan chuan Pathian ang mai i ni..." tia min hirlh lai te kha, "Ka then theilo che, mipa dang duhna rilru chhete mah ka pulo." a tih lai te leh ,"Ka tiam ache, ka pasal tur i ni." tia min hrilh lai te kha, dawt vek maw lo ni a? Ka lo ring ve hman asin le. Engtin nge ka awm tak ang?

Hemi ni hian ka nu kha ka van ngai em! Ka nu hian Marina-i nena kan intawn hma kum 17 ka nih lai khan min thihsan a, ka ngai ani. A malchunga mut a, tah hawm hawm ka van chak tak em. Vanram atang chuan min lo hmu ve ngei anga, min khawngaih ve tho ang tiraw ka nu? He tiang hunah hian alawm midang pawn an nu te an mamawh thin, tinge ka neih veloh, tinge min thihsan bik? Ka lung avan leng tak em, thih ve daih ka van chak em. Ka rilru a nat em avang chuan a zia deuh nan tiin ka nu thlan lam pan chuan ka kal a, zing dar 7 vel a ni, zing thawh veleh atanga inhau a, inthen kha kan ni a, dam chakna pawh ka nei lo.Thlanmual lam ka pan a, ka nu thlan ka hmuh rual rual chuan ka hnuk a ulh a, tap chungin a thlan chu ka va kuah nghal chawt a, ka nu hmu ang maiin ka inhria a, a thlanlunga a hming lo inziak ka hmuh kha chuan ka insum zo thlawt lo a ni. A thlan hmaah chuan ka thingthi a..."Nu, i fapa hian ka ngai em che a, ka lo kal a ni. Ka nu, vawiin hian vawi tamtak ka lo kalpui thin, i monu tura ka sawi, ka hmangaih leh duh em em chuan midang duh a neih thu min hrilh a, min then a, engtin nge ka tih ang? Ka nu, nu..tinge min chhang ta che, ngawi reng suh, nu khawngaih takin min chhang rawh, min hruai ve mai rawh, he khawvel tenawm lutuk ah hian ka awm peih tawh lo." ka mittui chu ka dang thei lo, tlangval palian pui chu ka nu thlan kuah in, chhuak em em in ka tap ta hawm hawm mai a. Minute 10 vel lai ka tap anih chu mawle, chaw ei a hun tawh dawn avangin ka tho a, haw ka tum a, ka bike bul ka pan chiah chu, ka thil hmuh chuan min va ti hrilhhai em. Daniel-a leh Marina-i chu an rawn kal phei a, min hmu chiah chu min hlauh hmel takin Daniel-a chu a banah a kai nghal a, Daniel-a lah chuan min melhrum em em lehnghal. Va hnek nghal pawp mai ka duh a, mahse ka zak lutuk chu ka hmui ka hup a, ka bike chu ka ti nung a, ka kal nghal daih a. Ka haw pah chuan ka rilru a va insual nasa em, a lungngaihin ka awmah a tap a, ka hnem thin. Mahse mipa dang tanga a bei tawh tur chu ka ngaingam thlawt lo a ni. In ka thleng chu chaw pawh ka ei thei lo, ka khumah ka bawk a, ka tap vak vak a, ka tap ring ngam si lo. Ka thaw te a hah dawnin ka hria. Eng ang pawhin va be mah ila, min chhang dawn chuanglo. Va call in awmzia a nei dawn chuang lo. Ni e...chuti khawpa min then duh te chu, engvangin nge ka kaltir mai loh ang, mipa ka nia, ka tuar ve thei awm emai. Ka room kawngkhar chu ka kalh a, ka thingthi a, ka tawngtai a, "Lalpa, nangmah hre lek lovin Marina-i nen hian kan lo induh em em a, ka tawngtai khatin ka be khat em em che a, hei hi i mi hremna a ni tiraw? Ka lawm e aw Lalpa, ka tuar ang, mahse hei chiah hi ka dil a che, hlimtakin awmdun se, keichu ka tling lo a ni. Hlim reng se chuzawng chu ka duh, tunah chuan nu ka nei tawh lo a, ka neihchhun tak meuh meuh i ni, min pui la min awmpui zel ang che aw?" ka mit ka meng a, ka phone ka la chhuak a, Marina-i nena kan message zawng zawng chu ka delete vek a, whatsapp status ka thlak a, "Goodbye my lover, goodbye my friend...you have been the one for me." a thlalak chu a tawpna atan tiin ka bialnu duhlai, ka bialnu hlui ni ta mai tur chu a thlalak zinga ka duh ber chu ka en a, ka fawp a, "Duhtak, i duh ang ngei chuan i kal dawn nia, ka kaltir a che, i chhungte, i pi leh pute leh i naute kha ka hmangaih vek a nia, min lo biak hlawm dawnnia aw, ka venhim zawhloh che avangin min ngaidam dawnnia, i hmaah hian vawikhat mah ka lo inlan leh tawh ngailo ang, ka hmel hi i hmu tawh ngailo ang. Mangtha le." A thlalak ho zawng zawng leh kan lakdunna te chu ka delete vek a, khumah chuan ka mu a, hla ka ngaithla a, ka tap zawih zawih a, ka kehchhia a ni ber mai, atawpah chuan ka intap muhil ve ta hram a.

Marina-i nena kan inthenna pawh thla 4 lai alo ni ve ta reng mai, ka la na reng a, mahse ahma ang em em kha chu ka nilo. Tu hmeichhe dang mah ka be ngai lo a, tu mudang mah ka ck pui ngai lo bawk a, Marina-i theihnghilh nana hmeichhe dang awmpui chu ka duh chuanglo. Ka chhungte leh ka thiante pawn an hre vek tawh a, athenin min chhaih phah a, athenin min hnem a, mahse awmzia awmlo, ka nat tur angin ka na vek tawh. FB ah min block a, whatsapp ah ka block thung a, khawlaiah pawh kan inhmu lemlo, ka chhuak ngai lo hrim hrim bawk a. Engtin nge a awm ve thin angle, an la ni angem le? tih te chu ka ngaihtuah ve zeuh zeuh thin a, nitin chuan ka rilru ah ala awm a, mahse ka zia ve deuh tawh a, inzirna tha tak pawh a ni tho mai. College tan a lo hun leh ta a, 5th semester ka lo ni ve tawh dawn a, ka van peihlo tak em. College tan tirh ni chuan kan thiante kan classmate te nen kan han inhmu ho leh chu, kan lunglen zia te kan han inhrilh tawn a, kan hlim dar dar hlawm khawp mai. Kan inthen thu vel te an lo hria a, achhan te min han zawt sap2 hlawm a, anuam lo duh khawp mai. Kum dang anglo takin ka cool em em a, engtik lai khan nge mi thawveng tak leh tawngduh tak ni thin kha mi ngawichawi leh tawng tlem taka ka inleh pawh ka hrelo, ee..ka hre leh si, Marina-i min then atangin a ni. Zeplo chuan tun thleng pawh hian ka la hmangaih em em a ni. Kar 3-4 vel kan han lut a, kan teacher te pawn mak min ti, semester dangah homework ti ngailo leh test na a fail ziah thin leh class bunk hrat em em kha, testna apiangah ka pass a, ka attendance a tha em em bawk a, ka bunk ngai tawh lo. Achhan chu ho te ani, semester dang te kha chuan, class tlanbovin Marina-i nen kan indate a, lehkha zir lovin an inah ka leng a, mahse tunah chuan a awmtawh miau silo a, tihtur dang ka nei miau hleinem. Ka thiante pawh in dine out, lenchhuah ho, ride ho...tih vela min sawm pawh in ka tel peih lo, ka mizia a inthlak hlak a a ni mai, ka ngawichawi em em a, lehkha ka zir that phah a, a tihchi phian, mahse ka ngai a ni. Ramdanga hna neih a, mahni a inluah a, awmbo vang vang ka chak thin a ni. Ka nunah hian hlimna ka hmu lo, zu ka in a, ka taksa pawh a chhe tial tial a, mahse lehkhazir chu ka tihtur awmchhun a ni miau a, chhungte lakah pawh ka mark chu a tha thei khawp mai. Kan college hmeichhe ho te pawh hi ka en thin a, tumah hi ka ring lo, awmhmunah hian zawi te te in mahni hriat tham lek hian ka lo phun a, "Engmah innilo, hmeichhe ho hi in tenawm lutuk, mitha reng in awm lo." tiin ka lo ang ve vak vak zel a, Marina Lalrempui, nangmah vang vek anih hi!!!

Thla 1 dawn chu aliam leh ta, hun a va kal chak reuh si em, mahse a hrehawm ber chu zan hi a ni. Zu chu awmlo se, zanah hian ka mu thei ngai lo ang, mahse zantina zu in reng erawh ka chhiatphah dawn si a, avan hrehawm em. Nikhat college ka kal chu ka nu ka ngaizual em em a, class-ah pawh awm peihlovin college kawt velah chuan ka thu mai mai a, paper ka phawrhchhuak a, ka tihtur hrelo lutuk chu, ka hmaa thinkung chu a lem ka ziak mai mai a, ka ngaihtuahnaah chuan a lut chuang miah lo. Ka bulah chuan hmeichhe pakhat a lo thu ve tih chu ka hria a, mahse a hmel ka en lemlo. Ka thil ziah lai chu ka ziak mawlh mawlh a, AWI AWI AWI...KHAWVELA THINGKUNG LEM ZIAH AH CHUAN A ANGLO BER ANG...ka pawtthler a, ka bulah chuan bawlhhlawh bawm a awm a, a chhunga paih ta chuanglovin, abulah ka la paih hram a...ka chhar peih vel lo. Ka phone ka phawrh a, ka nu thlalak ka en a, ka ngai em a ni. Ka bula hmeichhe thu chu a rawn tho a, ka paper paih chu a chhar a, dustbin ah chuan a rawn paih vel deuh thlap a, athutna ngai, ka bulah bawk chuan a rawn thu leh a. Ka va ngei reuh e, inla fel vel lutuk, hmeichhia hi mifel reng in awm lo, mipa tihnat bak in thiam lo. Ka va melh a, a va han hmeltha reuh si ve, nilo..mizo chu a nilo, vai a ang ka ti, a simple lutuk, a fel hmel si, mahse ka duat Marina-i chu tluk lo tak a ni, aww..nula i tluk hlawl lo. Ka va thut hnaih a, "Hey.." ka va ti a, min chhanglet lo, min hmu ang pawn a lang lo, "Thiannu.." ka han ti leh a, min chhang chuang lo, lehkhabu chu ala en char char a. A tho thut a, min en miahlo chuan a kal daih a. Ava inla class reuh ve mawle...atha lawm, kal daih rawh, inla ve khanglang. Chumi zan chuan ka muhil thei miah lo, zu no 3 vel ka in a, ka kai hle mai, mut ka tum, ka theilo, ka mitthla ah kha vainu ringawt kha a awma, mizo tawng athiam lo em mawni le? Ka duhzawng a nilo, mahse tinge ka ngaihtuah tlat le...

Atukah chuan 1st period atanga 3rd period thleng class ka neilo a, ka off a. Nimina ka thutna bawkah chuan thut leh ka tum a, mahse nimina vainu bawk kha a lo awm leh a, a bulah chuan ka va thu a, "Thiannu?" tiin ka va be leh ngat a, min la chhang chuanglo, nimin ang bawk kha a ni, arilovin lehkhabu achhiar leh char char tawh. Atawpah chuan a dar ah ka va vuan a, min lo melh a, a nui suk a, a bag ah chuan paper a la chhuak a, thil a ziak a, min rawn pe a, ka chhiar a, "Hi...Anya ka nia." tih hi alo inziak a, mak ka ti lutuk chu ka thlir vung vung a. "Ihh...tinge i ziah kher a?' ka ti a, a hmui senno chek mai chu a kawk a, chuan a kut a thing leh a, a tawng thei lo tih chu a chiang ta reng mai. New commer a ni tih chu a chiang reng, avan khawngaihthlak em aw, a hmelthat reuh tehreng nen. Paper chu ka la chhuak ve a, "Hi Anya, Brandon Remruatpuia ka nia, chuan enge awmzia?" tih ka ziaka ka pe a, "Ka tawngthei vaklo a, tawng hi ka harsat lutuk a, ka tawngthei lo ang tluk vel a ni. Chuan ka beng hi a tha lo bawk a, mi hmuiphun atang hian tlem tlem chu ka hre thei." tih hi a ziak leh a. Ka nui suk a, paper ah bawk chuan, "Avan pawi ve, hetah hian enge i tih ve ziah a?" tiin ka ziak leh a, "Tumah ka kawm peihlo a, chubakah papera ziak chawp ngai zel chu tuman min kawm tha peih tak tak lo." tiiin paper ah chuan a ziak veleh a. Ka khawngaih reuh hle mai, "Zialo ve aw, keimah ka awm alawm, kan inkawm ziah dawnnia, ihh..i number min lo pe la, chuan kan intext ziah dawnnia.." tiin ka ziak veleh a, "Phone ka neilo.." tiin a ziak leh a, dar a rawn ri a, kut zaizirin class a neih thu chu a sawi a, a kal ta daih a. Nileng chuan Anya-i chu ka rilru ah a awm ta reng mai a, ka khawngaih takzet. Ni e, ka mal em em a, ka khua a har em em a, thian kawm chu ka duh ve tawh alawm. Inah ka haw a, enge ka hriat pawh ka hre lo, ka pa bulah ka ATM card ka dil a, "Ka hmang lawk duh." ka ti a, ka pa hian ka ATM card min kawl sak ziah a, ka duh hunah ka dil mai thin. Cheng 8000 ka la chhuak a, hmanhmawh em em in ka bike ka start a, Phone dawrah ka lut a, Android phone cheng 6750 man vel a ni ta in ka hria, ka chiang chiah tawh lo, ka leia, inah ka haw pui a. He ka phone lei hi Anya-i ka pe dawn a ni, duhlo mahse a pawm tho tur a ni. Naktuk ka van nghakhlel tawh tak, Anya-i ka hmu chak zek zek, enge awmzia pawh ka hrelo, ka za cheng mai.

Atukah chuan hma tawkah ka kal a, Anya-i nena kan spot ah khan ka va kal nghal a, mahse a lo awm lo, alo kal dawnlo amawni le? Umm...a ho emai, alo kal ang, ka kal hma ve bawk em a ni. Chawhma chhung zawng chuan classah phur lo takin ka awm a, lunch break ava nghahhlelh awm si em. Anya-i hian History a la a, kei chu BA English ka ni. Lunch break alo thleng a, hmanhmawh em em in kan thutna thin ah khan ka phei nghal a, Anya-i chu alo thu vang tawh mai. Ka phone leisak chu ka pe a, a tirah chuan a pawm duh lo a, mahse ka nawrluih nasat em avang chuan atawpah chuan a pawm ta a, a mittui a tla hial a. Chumi chawhnu zawng chu kan pahnih chuan class pawh la lovin kan inkawm dun a, kawm chu a nuam, mahse, paper a hek deuh tih mai loh chu. Zan alo thleng a, whatsapp message a lo thleng, rang takin ka open a..

"Hey."

"Hi..tunge aw?"

"Ka lawm e aw...Brandon."

"Awle, Anya..nangmah mi?"

"Umm...ka type muang lutuk a, min hrethiam rawh aw."

"Haha...a ho emai, naktuk chu i kal dawn em?"

"Dawn chiang e...inhmu ang aw."

"Tehreng mai."

Hemi zan hian dar 12 thleng kan inbia, ka la khamlo, mahse lerh min ti ang tih ka hlau a ka insum hram hram a. Anya-i nen chuan kan inkawm chho zel a, single ve ve kan in bawk a, kan innel khawp mai. Thenkhat chuan inngaizawng amaw te min lo ti a, thenkhatin vainu ngaihzawng nei tih ten min chhaih a. Mahse Anya-i hi duhna chhe te mah ka neilo a, ka thian chauh a ni. Marina-i ka duhna hi a la ngai reng a, ka tan chuan a la hlu em em a ni. Achang chuan ka ngai em em thin a, lo let leh ta se chu ka hmangaih em avangin ka la pawm thei hial ang. Kum tawp a lo hnai a, October kan lo chuang kai ta reng mai. Nikhat chu Anya-i hmuh tuma kan spot a ka va kal chu kan college-a mi lerh lalpa kan tih mai, kan SU phakar zet Liana chuan alo thutpui a. An inhnaih em em a, an nuidun vel a, ka tawp hmak a, lehlam ka hawi nghal a. Enge ka hriat pawh ka hre lo, Anya-i mipa dang nena an awmdun a, an inkawm kha ka hmu thei thlawt lo, enga tinge le? Ka thik a mi? Nilo ka bialnu pawh a ni lo, engvangin nge ka thik ngawt anga? Mahse ka titau deuhreuh tlat a nih chu mawle. Ka rilru a na tlat, ka awmdan hi ka hrethiamlo. Inah ka haw a, ka mood a fuhlo vek, a hrehawm ngawih ngawih. Zanah chuan ka phone ka charge a, ka lengchhuak daih a, ka thianpa Rinnunga te inah zu kan in a, ka haw chiah chu whatsapp message a lo tam hle mai. Anya-i vek alo la ni zui...

"HEY."
"Induhpa."
"Khawnge i awm daih a?"
"Mawh vawiin khan khawnge i awm?"

Ka reply a. "Ka lu ana lutuka, ka haw daih."

"Ka ngai che.."

A message ka hmu chiah chu ka thin a phu zawk thei nia mawle, ka lawm rilru khawp mai. Ngaihdam te ka dil a, hlim tak chuan kan inbe leh thei ta a. Hun alo kal zel a, Anya-i nen chuan kan inpawh tawlh tawlh a, kan innel tial tial a, kan leng dun a, kan inphur haw ziah bawk a, ka thian tha tak chu a va ni chiang em. Inbe lovin kan awm thei ta lo, zan rei tak tak thleng kan in video call a, tawng miahlovin kan in en reng zela, inngaizawng ang mai kan ni. Mahse ngaihzawng dang nei tur chuan ka la inpeih lo a ni. Hmeichhia zawng zawng hi ka ringlo vek, Marina-i pawh kha, ani kha chu a danglam bik thin khan ka lo hria a, mahse hmeichhe dang ang thoa lerh leh mi kawp ching a ni tih ka lo hre lo a, ka thiamloh vek a ni. Nitin mai hian Anya-i chuan message in thil hrilh duh che ka nei a ti ziah mai a, mahse a sawi duh mai ngai thin silo a, ka zawtlui lem lo bawk. Nikhat chu college chawlh a ni a, Anya-i chuan chhuahpui turin min sawm a, angai te ang bawkin thil hrilhtur che ka nei a ti leh a, engtak ni ang maw? Nilengin kan lengkual a, Millenium Centre ah te kan kal a, restaurant ah te kan chawl a, hlim takin hun kan hmang dun a. Tlai a lo ni a, an in thleng ka va thlah a, an inkawt chu a reh hle mai, vawikhat mah ka la leng ngailo hrim hrim. Bike atang chuan kan chhuk dun a, "Anih leh phawt aw.." ka ti a, kal ka tum a, ka kutah a vuan a, uluk em em in ka mitah tak chuan min en a, a ipte atang chuan paper hi a rawn phawrh a, ka hma zawnah chuan ka chhiar thei turin a rawn ti lang a, I LOVE YOU tih hi lian leh chiang kekkawk chuan a lo inziak a. Ka thin a phu dut dut a, ka lu a hai muai muai theiin ka hria. Nilo, Anya-i hi ka ngaina a, ka thian a ni, hmangaihna a ni lo. Ka hmangaih ve lo, Marina-i kha ka la theihnghilh lo, ka la duh reng, ngaihzawng dang nei turin ka la inpeih lo. Engmah sawilo chuan bike-a ah ka chuang a, ka tlansan daih a, side glass atang chuan hrilhhai hmel takin min thlir zui vawng vawng a. Ka khawngaih lutuk, mahse ka tihsual leh ka hlau a ni. Zanah pawh chuan zu ka in a , ka rui leh hle a, ka mittui a tla hnem leh ta hle mai. Marina-i vang chuan ka thinrim thar leh a, ka chau a ni. Tinge min kalsan, tinge min then a, midang duh leh mai mai tur si min nihpui? A va han hrehawm em, enge ka tih ang pawh ka hre lo. Vawi tam tak Anya chuan min rawn call a, ka chhang lo, message pawh tam tak ka dawng...

"Tinge?"
"Enge awmzia?"
"Tinge i kal daih a?"
"Min ngaidam rawh, khatia ka tih avang khan."
"Min reply ve la."

Mahse ka chhang thei lo, a hrehawm em atin ni. Atawpah chuan pen leh notebook ka la chhuak a, Marina-i nena school kan kallai atang tawha kan intawndan te leh kan inthen dan te, min bum dan te leh ka natna engkim chu ka ziak chhuak a, ka thianpa ka phone a, naktuka Anya-i lo pe tur leh naktuk ka kal dawnloh tur thu lo hrilh turin ka ti a. Chumi ni chuan nilengin ka mu a, ka chau takzet. Zan alo ni a, Anya-i message ka dawng a..

"Brandon, ka tihpalh aw, ka lo hre lo a ni, ka zak khawp mai, min ngaidam ang che."

"Nilove, apawilo, ka tihpalh zawk, ihh...Marina-i nena kan chanchin hi sawi ka duh tawh lo ania. Ka lungngaihna te zawng zawng ka phumbo tawh a, mahse min hmangaih thu min hrilh khan a lo chhuak leh ni mai hian ka hria, ngaihzawng nei turin ka la inpeihlo."

"Awle atha alawm, ka thiamloh a ni, tunge tawngthei lo leh bengngawng te chu duh tehlul ang tiraw?"

"Chutiang sawi suh.."

"Ka tihpalh."

"Anya, vawikhat tal tawng ve chhin i tum tawh em?"

"Um ka thiante bulah ka tawng ve chhin a, mahse min nuih thin. Mi anglo tawng a ang min tihsak a, ka tawng leh tawh ngailo."

"Keichuan ka nuih ve ngailo ang che."

"Brandon khawngaihin..min tilui suh."

"Awle, tihpalh"

Ka ngaihtuahna a buai hle mai, ka thiante pawh ka hrilh a, an ni chuan pawm mai rawh a khawngaih thlak te an tia, mahse ka khawngaih avangin ka nihpui duhlo. Duh chu ka duh takzet, mahse ka bialnu ni tur atan chuan ka thei hlawl lo a ni. Tihtur ka hre hlawl lo, a hrehawm ka ti takzet. Thuthlukna siama a va han har thin tak em...ka tihsual nawn leh ka hlau bawk si, umm mu phawt ang. Zan nuamlo tak ava ni em..ka muhil a, mumang mak tak mai ka nei a. Ka mumangah chuan hmun fianrial nuam takah hian ka lo awm a, Marina-i ka lo nghak mek a, a rei tawh khawp mai. Reilote hnuah chuan alo thleng a, mahse...school form a rawn ha tlat, kan school luh dun na a kan form ngei mai kha. Khai aw, alo va inhmeh em em, ava han hmeltha tak. Mak ti tak chuan ka en a...

"Duat, tinge khatia i inchei a?"

"Tinge, ka inhmeh lo mi?"

"Nilo tinge form i hak a?"

"Duhtak, min hre tawh nange a? Tuna Marina-i lerhsan tu che leh mipa dang kawp san a, duhdang nei ta kha ka ni hlei nem. Kei te chu nangmah hmangaih em em tu, hmana school naupang kum 18 mi, i bialnu diktak Marina-i zawk kha alawm ka nih."

(Nasa takin ka tap a, ka kuah a.)

"Duat, ka ngai thei lutuk che sin, khawnge i awm daih a, lo kir leh rawh a, tuna mi hi chu a sual lutuk, midang duh anei a, min lenbo san a, zan rei tak tak min awmbo san a, ngatan mah min ti tawh lo...khawnge i awmbo daih?"

"Tihpalh aw duhtak, Keite chu ka thi daih tawh lawm, College ka luh a, Daniel-a ka tawn atang khan ka thitawh a, tuna mi hi chu midang a ni tawh."

"Tinge ilo kir leh mai loh a?"

"Engtin nge ka theih ang, mi nung ka ni tawh hleinem, mahse ka tan thil pakhat tal ti rawh aw?"

"Awle enge?"

"Marina-i hming hi sawi tawh suh, theihnghilh la, Anya-i hian a nghak reng che, a hmangaih che a, engtikah mah a then ve ngailo ang che."

Marina-i chu a hla tial tial a, ka ban tawk tawk a, mahse a hla tial tial a, a bo ta daih a, ka mumang atang chuan ka harh zawk a. Ni e, a sawi dik a ni, kan hmangaih te ai chuan min hmangaih tu te hi an pawimawh zawk. Ka chhang dawn, ka hmangaih ve a ni tih hi vawiin hian ka hrilh dawn a ni. College ka thleng a, lunch break ka nghak leh nghal char char a. Lunch break a nih veleh chuan Anya-i chu ka zawng kual nghal a, kan spotah khan ka va kal a, mahse ka thil hmu chuan min va barakhaih em! Kan SU phakar Liana chuan a banah a lo pawt a, Anya-i chuan a lo hnungchhawn a. Inngaihzawng inhau an ang ber...Liana chuan a kuai her sawk a, Anya-i chu a fawp ta mai a, lehlam ka hawi nghal. Ka na zawk mai, ka rilru ah Marina-i hlir alo lang nghal a, Anya-i pawh hian min bum ta em ni? Nilo..ngaihzawng neih loh hi a tha ber. Haw ka tum a, bike lam panin ka kal a, ka hnung lamah chuan min zui tu an awm tlat hian ka hria a, ka hawi let a, Anya-i alo ni a, a lo tap pur mai a..."Enge? Enge i duh a? " ka lo ti vin hlur a, min rawn pan hnai a, a tial ruai leh puam tulh hian.."Ka..ka.." a ti a, mak ka ti hle mai. A mamitchhing vang vang a, harsa a tih hmel hle mai, a ka a ang leh vak vak a, mi anglo tawng tum ang mai hian, "Ka..Ka..ka beng hrep, kha..kh..khapa kha. Brandon, ka..ka hmangaih che." a rawn ti a, midang tan chuan a tawng ri kha a nalh lo lutuk kha a hlawuhawm hial thei awm e, mahse ka tan chuan a aw kha a va mawi si em. Ka va pan hnai a, "Anya, min ngaidam rawh ka hmangaih che." ka ti a, ka kuah a, dim te in a hmui no em em maiah chuan ka fawp a, a zeilo hle mai, athiam ang tawkin zawi muang chuan min chhanglet a, a va han nuam chiang em. Brandon Remruatpuia hian min hmangaihtu diktak chu ka tawng ve ta, ka tisual tawh ngai lovang. Marina-i ai chuan a let sing sang sawmsarih in atha zawk. A va han famkimin ka tan hian avan tha tehreng em, Anya..ka hmangaih che.

Anya-i nen chuan kan inkawp chho zel a, Christmas leh Kumthar pawh reilo te ah a lo thleng thuai a, kan hmang dun a, ava han nuam tak em. Hunrei ve tak chhung mal takin leh lungngai takin ka awm a, tunah chuan hei hi ka hria a ni, Pathian hian kan thatna tur vekin thil alo ruat a ni tih hi. Kan inah te ka lenpui a, an inah te ka leng bawk a, inngaizawng dang te pawn inhmeh min ti bik thei em em a, ka thiante pawn min lawmpui, min lo hmusit tawk lah bo lo, mahse kan inhmangaih ve tawk ani. Kan awmdun reng lai pawn phone-a inbiak zel angai a, a engemaw nawm mai bakah a romantic phian. Kumthar kan lo chuang kai a, nikhat chu ka pa chuan titi lawk a ngaih thu sawiin a roomah min hruai a..

"Bawiha, Anya-i hi i bialnu tak tak a ni em?"

"Aw ni e, ka pa."

"Engtiang chiahin nge i duh?"

"Ka hmangaih ka pa, nupui atan ka duh."

"Anih leh Marina-i.."

"Atawk ka pa, khanu hming kha ka beng hriatah lam ri tawh suh."

"Awle, mahse Anya-i hi i kalsan angai."

(Ka thin a phu nghal dup dup a.)

"Tinge? Engvangin maw?"

"Bawiha, i hria a ni lawm ni, mizo a nilo vai a nih hi, chumai bakah, vai an nihna kha chu thuhranah dah ta ila, Christian pawh an ni lo, a mawilo em mai..Muslim an nih hi aw, i kalsan angai. Apa nen pawh nizanah kan inbia a, ani pawn a duhlo che."

Chhan ngaihna ka hre tawh lo, ka hlim ve tan dawn chauh asin le, tinge hetia ka awm zel bik? Ka pa room chu rang takin ka chhuahsan nghal a, ka bike ka ti nung a, chak takin ka tlan a, hmun fianrial deuh ah ka kal a, nasa takin ka au a, ka thinrim a ni. Ngati nge ka vanduai bik em em le? Tinge sakhuana te hi alo awm? Muslim tih vel mai mai, hei vang hian kan inthen anga maw? Ka tap leh ta...tinge mipa si hi ka tah reng bik mai le, tinge hetia ka awm bik? Rang takin Anya-i chu ka text a, inhmu turin ka sawm a, tichuan kan inhmu ta a. Ding dun reng chung si chuan phone kan phawrh ve ve a, message hmang chuan kan inbe leh ta a.

"Anya, ka pa-in thil min hrilh a."

"Ka hria..keipawh ka pa-in thil min hrilh."

"Engtin nge niang?"

"Duat, chuti mai chuan ka then dawnlo che...i pa bulah chuan va dil leh la, keipawn ka lo dil ang."

"Awle duat."

Ka dil mai ngam lo, chutih lai karin ka pa te leh ka pi te chuan then turin min ti sek lehnghal a, a va han hrehawm em. Dam chakna pawh ka neilo chu a ni ber e, nitin in Anya-i nen chuan kan inhmu tho a, mahse kan hlim ngailo, ala reilo asin. Zankhat ka haw chu ka pa tlawn nan thil ka lei haw sak a, tichuan roomah ka ko lut a..

"Ihmaw ka pa..ihh.chiang deuhin ka ngaihtuah amaw, ihh..Anya-i hi ka then theilo, ihh..nupui atan ka duh a ni."

(A ngawi vang vang a.)
"A theih loh ka tih tawh kha."

"Ka pa, khawngaihin...ka ngen ngawih ngawih ache. Kan vengah pawh mi in pa tha leh fel tak an ti che a, i fel reng bawk a, ka tan, i fapa tan tal hi chuan Anya-i hi pawm ve mai rawh."

"Brandon Lalremruatpui, i zak em? Vai anih saw, Christian pawh nilo Muslim nula saw nupuiah i duh a maw? Tiang tur hian ka enkawl che ami? I nu thihna chhan pawh hi nang ang mi tenawm kan lo hrin vang che a nih hi"

(Ka insum zo ta biklo, ka ding a, vin tawkin..)
"Ka pa nang hi, pawnlamah chiah i tha a ni, i chhungril chu a lo tenawm hlemai, mi hmuhsit ching tak i ni."

Ka sawi zawh hma hma chuan min beng hrep a, ka mittui a per sawk mai. Rang takin ka pi leh ka nau anlo tlan lut a, ka pi chuan, "Mama, mahni fate ben kher angai ami? Kutthlak zawngin tinge i chet a?" a rawn ti chel chul a. Ka piantirh ata kut min la thlak ngai miah lo tu ka pa chuan a vawikhat na atan kut min thlak a, ka tuar theilo, a hrehawm ka ti lutuk chu room atang chuan ka chhuak nghal a, ka pi chuan min au zui lawm lawm a. Ka bike ka ti nung a, hmun hla takah ka kal a, ka tap leh ta vak vak a, ka va han nep si em. Anya-i hi heti mai mai a ka then leh a nih chuan a nun ka tichhe vek dawn si a. Awmdan tur hriatthiam a va han har thin tak em, ka nu kha chu la dam se, Anya-i hi a pawm ngei ka ring, mahse a awm tawh silo. Rilru siam fel tur pawn chakna reng ka nei lo, Anya-i khan zu in tawh lo turin min ti a, mahse ka rilru a na em a ni, ka thianpa ka call a, zu kan indun leh ta nge nge a.

In atanga ka chhuah pawh an phal tawh lo a, ka chhuak a nih chuan Anya-i nen bawk kan inhmu leh dawn sia, chu chu ka chhungte chuan an hlau a ni. Nikhat chu ka pa hnenah chhuanlam siamin ka chhuak thei hram a, Anya-i nen chuan kan inhmu leh ta a. Kan inhmu chiah chu min lo kuah nghal a, keipawn ka kuah let a. A ngaite bawkin phone phawrh leh a tum a, mahse a kutah chuan ka man sak a. "Angailo duat, thil hote ania hrilh che ka tum." ka ti a, mak tih hmel deuhin min en a.."Duhtak Anya, Mizo chu mizo, hnamdang chu hnamdang, Christian chu Christian, Muslim chu Muslim. Hei hi thil nihdan tur a ni. Ka tihpalh, min ngaidam la, kan inthen angai.." ka ti a, a mittui a rawn sur nghal zung zung a, tawng ve tumin a ka a ang zuau zuau a, mahse ka tawng khalh leh a, "Tihpalh aw, ka hmangaih lutuk che, mahse kan sakhuana avanga kan inthen a ngai a ni. Engtikah mah i hmel hi hmuh leh ka duh tawh lo, ka chhungte duhdan anga ka awm angai a ni..min ngaidam rawh aw, bawite ka hmangaih che." tih pahin kal ka tum a, ka banah a vuan a, a ang zuau zuau a, tawng chu ava tum nasa em, mahse a thei silo, a mittui a tla a, a ka a ang vak vak a, a inhnit feih feih a, hmuh ava han hrehawm tak em...zawi maungin a kut min vawna chu ka lakthlak sak a, tichuan ka kalsan a, hreh chung chunga ka kalsan a ngai ta a ni. Awww...hmangaihna hi chu alo va nunrawng em, hringnun hi chu a fairlo thin a ni.

Tlai ka haw chu ka chhungte chu mangan hmel deuh in anlo awm a, min hmu chiah chu mak tih hmel deuhin min melh thup a. Keichu za lo deuhin nui lui tih hriat takin ka khi suk a, "Enge a..min ngaihtuah su, engmah a awm tawh lo, Anya-i nen chuan kan inthen tawh lawm, lungngai suh u..chuan chaw ka ei peihlo, ka chau deuha, ka mu zal lawk dawn aw." tih pahin roomah chuan ka lut a, ka khumah chuan ka bawk thlawp a, ka chau takzet, chhuak em em in ka tap a, ka mittui a tla nasa hle a, ava han vanduai thlak em. Khawvel ah hian ka hmangaih ber te pahnih, Marina-i leh Anya-i chu ka chan ta ve ve a, ka tan chuan dam hian awmzia a awm tawh lo.

(A tawp ta.)