MERSA (A Mizo Dystopian Future Science Fiction Post-Apocalyptic Horror Story) Written by : Aaron Malsawmdawngzuala CHAPTER : 7

 MERSA

(A Mizo Dystopian Future Science Fiction Post-Apocalyptic Horror Story)

Written by : Aaron Malsawmdawngzuala

CHAPTER : 7

************************************************

Inspector Tetea chu mi in bul, kil khawrah chuan a tlan chhe mek a. Hmun tinah chuan hri kai chu an awm bleh zel bawk si, a pistol hmang chuan a kap hlum nual tawh. Mahse hri kai chu an inthlah pung chak lutuk tlat, mi tuikhuah phenah chuan a biru a. Kil tinah chuan hri kai, rum ri hum hum thawm chu a awm reng bawk.

Back-up chu a ko leh mawlh mawlh a, mahse thawm a chhuah vak chuan hri kai hovin an hre dawn bawk si nen. Police dang ho lah chuan, "Kan lo kal mek e, Sir." tih bak chu chhanna dang an rawn pe ngai chuang bawk si lo. Thenkhat lah inchhawng chung atang te chuan an rawn tla thla tawp tawp zel a, khawlai chu hri kai hlirin an khat hi a ni ber tawh.

Hmun biru lai deuh chu Tetea chuan a hmu fuh ta a, rang takin a biru nghal a. A pistol chu a han check a, mu thum chiah a nei tawh. A chek tlawk tlawk a, "Engtin nge ni ta ang? An rawn thleng har si, ka thi ve ngei dawn a nih hi." tiin a phun nuah nuah mai. A bih rukna atang chuan muang chang hian a tho chhuak a, thawm chu a reh angreng phian mai.

A han dak de de a, hri kai ho thawm awm ang a hre ta vak lo. A kal sawn deuh va, rinloh tak hian a awmna lai bik chu a reh diak mai. Colony angreng deuh hi a ni a, a chep angreng hle bawk. A kal zel a, chutah kawi khat a thleng chiah a, hri kai panga vel chu an lo ding tlar thup mai.

Amah pawh chu a ding chat a, thawm nei lo tur ang ber chuan a han reh vang vang a. A pistol chu a han load ri kharh a, mahse hri kai ho chuan an lo hre rang kher mai. Tetea awmna lam chu an rawn hawi thup a, chak tak hian an rawn pan nghal a. Tetea chuan a pistol ken lai chuan an chal darah tak a lo kap siah siah hlawm a, pathum chu a kap thal nghal der mai.

Mahse mu thum chiah a neih tawh avang chuan a silaimu chu a hmang zo ta thak a, pahnih dang an lo la awm bawk si. Chu mai a ni lo, a bul hnai vela hri kai dang awm ho pawh chuan silai puak thawm chu an hria a, an rawn pun belh ta sauh sauh mai a. Tih ngaihna dang awm hek lo le, Tetea chu a tlan chhe leh ta ringawt mai.

A tlan pah chuan kawng sira thing bung chu a la a, amah rawn seh tumtu hri kaite chu a hlap phei siah siah hlawm mai. Mahse chuti maia awlsam chu a ni bik lo, a tlanna kawng lah a chep em em mai bawk si. Thawm a chhuah lo thei silova, kawngpuia awm mek hri kai te pawh chuan thawm awmna lam chu rawn pan zelin an pung tulh tulh mai bawk si.

A theih na apiangah chuan lawn kaiin mi inchungah chuan a pakai phei zel a, hmun tin maiah chuan hri kai ho chu an lo awm amaw tih mai tur a ni. Mahse TEtea chuan theih tawp a chhuah a, a him thei zel mai. Hri kai lah an awm belh zel a, lamlian chu thisen nen a kawi nuai tawh hi a ni ber mai.

Colony pakhat chu a thleng leh hlawl mai a, chutah pawh chuan hri kai eng emaw zat an lo la awm tho mai. TEtea chu an rawn bei zel a, ani pawh chuan theih tawp chuan a lo bei let ve bawk a. Mahse an tam lutuk tlat, an rawn pun belh zel a. Chutia a buai lai tak chuan a sir lawka in pakhat, room ni awm tak chu a rawn inhawng a.

A rin loh tak maiin Dr. Bza a lo ni hlauh mai, "Inspector, rawn lut vat rawh." tiin a rawn ko va. Tetea chu a va tlan phei a, hri kai ho chuan an um nghal. Mahse vanneihthlak takin a tiang ken lai chuan a vai kiang thei ta hlawm a, rang takin inchhungah chuan a tlan lut a. KAwngka chu an khar nghal bawk, Tetea chau lutuk chu a thaw hlawp hlawp mai.

**************************************************

Science building lam pan chuan Emily, security guard Dawnga, Fela leh nurse student Sangsangi te chu an chhuk mek a. Emily chu a ngaih a tha lo hle, a chhan chu a thiante tamtak, Arst bulding ah chuan an awm tih a hriat ve reng vang a ni. Mahse tih theih dang nei hek lo le, a thiante chu a zui thla ve zel a.

A tawp nan ti niawm tak hian a han hawi let chho leh a, chutah tukverh pakhat lo inhawng chu a han hmu a. Tukverh a Joseph-a leh Miss Rosy lo hawi vual vual chu a han hmu a, a ding chat mai. A kawk chho va, "Khi.. dam an la awm. Tukverh khi en teh u, hmeichhia zawk khi kan miss a nih khi." a han ti chiam chiam a.

Midang ho pawh chu an hawi chho rual thap a, Fela chuan Joseph-a a han hmu chu a meng kawk mai. Phawk hru hian, "Ehe... Joseph-a a nih khi. Nichin-a Health Centre-a kan awm laia lo kal te kha an nih khi. An damchhuak thei a nih khi, kan han chhanchhuah ngei a ngai ang." a lo ti ve nghal bawk.

Sangsangi chuan lungawiloh hmel tak hian, "Kan han let leh dawn tihna em ni? In hmuh ve vek kha, pawnah pawh ti khawp khan hri kai an tam ania, building chhungah phei chuan an khat vek dawn. Engtin nge kan chhanchhuah ang, keini pawh kan thih ve phah thei asin." tiin a han phun nang nang a.

Rum fe hia Emily chuan a melh a, "Ka thiante tamtak khi building ah khian an awm, mahse ka chhan thei lo. A tam zawk phei chuan hri an kai ve tawh ngei ang, mahse kan miss ber nung damin ala awm a. Thi ve dawn mah ila pawi ka ti lo, keichu ka theihtawp chhuahin ka bei let dawn." tih pah chuan kal a tum nghal mai a.

Fela chuan a lo dang vat a, "NGawi lawk teh Emily, chutia chet vut vut chi pawh a nih loh hi. Plan mumal tak kan siam angai, ka thianpa Joseph-a pawh a tel ve a, midang pawh an la dam ve ka ring tlat." a lo ti a. Dawnga chu a han ngawi vang vang a, "Mahse engtin nge kan luh ang? Lo lut thei pawh ni ila, engtin nge kan chhuah leh theih ang tih zawk hi a ni." a lo ti ve leh a.

Felah chu a han inngaihtuah vang vang a, "I kal chho leh phawt ang u, thawm dim taka building hnuai lam atanga kan kal thei anih chuan pipe atangin kan lawn chho thei maithei asin. Tumah lahin phone kan nei bawk si lo, building hran, a him lam zawng dawn pawh ni ila kalkawngah hri kai eng emaw zat kan paltlang a ngai dawn bawk si nen. Engpawh nise, tihdan a awm mai ang." a han ti bah deuh nuai a.

Sangsangi erawh chuan a huphurh hmel takzet, "Ni e, i let chho leh phawt ila. Tihdan kan ngaihtuah dawn nia, tun ang hunah chuan intanpui mamawh vek kan nih hi." Security guard Dawnga chuan a lo ti ve bawk a, "Ka kal dawn, min lo zui ru." tiin Emily chuan iron rod pakhat, kawr ami, tui ek vek tawh chu a la lawk a, a chho ta mai.

Sangsangi chuan a melh rum tak zet, midang chuan an zui ve nghal a. Sangsangi pawhin duhthlan tur dang nei bik chuang hek lo le, tum bur chung chuan a zui ve ta mai bawk a. "Pu Saia pawh kha engtin tak awm zel ang maw? Ka phone a keng daih mai bawk si a, rilru chu a ti hah khawp mai." tiin Dawnga chu a phun chho nuah nuah mai.

*****************************************************

Inspector Tetea chuan a awmna hmun chu a han en kual a, damdawi leh spirit rim a nam rum rum mai. Clinic ni awm tak a ni, "Khawiah nge kan awm?" tiin a hawi hu hu a. Dawhkan a damdawi vel remthat pah chuan, "Ka private CLinic a nih hi, ka hmu hman che a i vannei hle mai. Ni lo se chuan anni ang khan hri i kai ve tawh ngei ang, i chhuah hnu deuh lawk khan keipawh ka haw alawm." tiin Dr. Bza chuan a lo chhang a.

Tetea chuan a thlan chu hruk fai pahin, "KA lawm e, mahse ka kap hlum nual mai." tiin thawk chu a han la leh kawk a. Dr. Bza chu za lo tak hian a lo khi suk a, "A nih ka ring, silaimu pawh i hmang zo vek alawm kha.." a lo ti deuh kher a. TEtea chu a rawn tho chhuak a, "Kha kha eng nge?" tiin dawhkana blood sample ni awm tak chu kawkin a zawt a.

DAwhkana transparent plastic bag chu Dr. Bza chuan a la kang a, a chhungah chuan Ruata hliam tumana puan them, thisen kai nuai chu a en vang vang a. Tetea hma zawnah chuan a lek kang a, "Hei hi Ruata ke hliam tuamna puan kha a ni a, thisen hi ka test a ni." tiin a lo chhang a.

"Chuang engtin zel?" tiin Tetea chuan a lo zawt leh vat a. Dr. Bza chuan a bula paper chu a han la kang leh a, "Ruata thisen chauh a ni lo, midang thisen nen a inpawlh a ni." a ti ta mai a. Tetea chu a meng phawk nasa ngei mai, "Tu? Tu thisen?" tiin a lo zawt leh nghal vat a. Dr. Bza chuan TEtea chu a en vang vang a, "Pi Lalrinpuii?" a ti chang fak mai.

Tetea chu a meng kawk a, "Tu Pi Rinpuii maw? Dr. Lalthazuala nupui kha maw? A ni em?" tiin a zawt leh a. Dr. Bza chuan a lu a lo bu nghat mai, "Mahse, ani te kha chu.... thla nga liam ta khan a bo a ni lawm ni?" tiin a han zawt leh a. Dr. Bza chuan a lu a lo bu nghat nghat a, "Ka hria alawm, keipawn mak ka ti. Mahse Pi Rinpuii hi a medical record ka nei nual a, ka patient hlui a ni hrim hrim bawk nen. A blood sasmple pawh ka nei bawk a, a thisen ngei a ni tih ka chiang." tiin a chhang leh a.

Tetea chu a inngaihtuah nasa kher mai, "Mahse, engtin nge Pi Rinpuii thisen chu he puan them ah hian a awm theih? Ruata hliam tuamna ah hian a awm daih theih, thla nga lai a bo tawh bawk si nen?" a han ti leh deuh hu a. Dr. Bza chuan muang deuh raih hian a lu chu thingin, "Ka hre bik lo le. Mahse thildang ala awm, Inspector. He thisen ka test lai hian, ka then hran lai hian thildang hmuh chhuah ka nei bawk a, chu chu Pi Rinpui thisen ah hian virus hi a awm hmasa a ni, a awmzia chu virus kai hmasa ber chu Pi Rinpuii hi a nih hmel." a lo ti ve leh a.

TEtea chu a inngaihtuah vang vang a, "Anih chuan kan zawhna chhanna tur chu mi pakhat chauhvin a hria, Dr. Lalthazuala ngei hi a ni." a han ti chang deuh fak a. "MRSA natna do mek tute zinga mizo ten kan chhuanvawr ber a ni a, virologist kan neih zinga thiam ber a ni. Mahse a nupui bo hmak hnu atang khan amah hi a reh vang vang a, a hna a chawlhsan daih bawk. Khawlai velah hmuh tur a awm tawh ngai lova, a chanchin ka hriat hnuhnun ber chu police te khan zawhna an zawt a, mahse evidence mumal awm loh vang khan case kha tih tawp a ni ta a, a bak chu engmah ka hre bik lo." Dr. Bza chuan a lo ti ve leh a.

Tetea chuan a lu a bu nghat nghat a, "An in ka hria alawm, tlang lamah khan a ni. Eng emaw chu a hre ngei ang, ka han kal mai angai dawn a nih hi." a ti ta mai a. "A tih chi dawn em ni, Inspector? Pawn lamah hri kai hlir an awm a, inkawichhawn awlsam zia pawh i hria. An seh vaih che chuan anmahni ang bawkin i awm ve ang, chu chu i duh em ni?" tiin Dr. Bza chuan a lo vin lek lek mai.

Tetea chuan chhuar lam chu ava pan a, duck tape chu la in a banah chuan a vet teuh a. "Duhthlan tur dang ka nei lo, police ka nih angin mipuite hi ka venhim a ngai. Dr. Thazuala hian virus hi ama siamchhuah ngei a nih pawh ka ring, chuvang chuan a damdawi, a tihrehna pawh a hre ngei ang." tiin a chhang a.

Dr. Bza chuan Tetea chu a en vang vang a, damdawi pakhat leh syringe chu a la chhuak a. Tetea chu a pe a, "Awle, ka dang buai lo mai ang che. Mahse i kal dawn anih chuan he damdawi hi la rawh, a thawk angem chu ka hre lo. An seh ve che a nih chuan, he damdawi hmang hia i inchiu nghal dawn nia. Awmzai a awm lo maithei, mahse a damdawi hi a thaw anih chuan hri i kai ve dawn a nih pawhin, virus kha a thawk muang deuh ang." a ti a.

Tetea chuan a la a, "Police dang an lo thleng vat dawn a, an theih tawp an rawn chhuah ang. HE room hi chhuahsan lola, kawngka kalh tlat ang che." tiin dawhkana chemte chu a la a, "Ka lo let tawh lo a nih pawhin he room hi chhuahsan suh ang che, ka kal ang e." tiin a chhuahsan ta a.

**********************************************************

Pu Muanpuia pawh chu an in lam pan chuan a tlan zel a, mahse amah tawk zawnga rawn tlan motor te an awmna lai traffic a jam tlat mai. Amah pawh chu a tan ve phah a, loh theih lohvin a motor chu a tih din ve a ngai tlat mai. MAhse in lam a ngaihtuah tawh bawk si nen, motor atang chuan a chhuk a.

Rang takin ke in an in lam pan chuan a tlan ta hnak hnak a, a kum a lo upa ve tawh nen, a hah ngei mai. Minute 10 dawn velah chuan a thleng ve ta a, kawngka chu a kik mai pawh a ni lo, a chum hian a chum dawt dawt mai. A nupui Pi Hlimi chuan thawm chu a lo hria a, kawngka lam pan chuan ava tlan phei nghal a.

Mahse a hawng mai lo, "Tunge.. tunge i nih?" tiin a han zawt phawt a. Pu Muana chuan vin zet hian, "Keimah, keimah... lo hawng vat rawh." a lo ti vin hlur mai. Pi Hlimi pawh chuan a hawng nghal a, Pu Muana chu rang taka rawn lutin a khar leh nghal a, chhunglamah chuan a kalh hmak mai.

Hlau ru deuh chung si hian, "An seh che em?" tiin Pi Hlimi chuan a han zawt a. Pu Muana chuan mak tih hmel tak hian a en hu a, "Eng maw? I hre ve em ni?" tiin a lo zawt let nghal vat a. Pi Hlimi chuan TV lo in on mek chu a kawk a, rang takin Pu Muana chu a va phei a. TV ah chuan Aizawl khawchhunga MERSA hri kai ho pun chak zia chu an lo sawi mek a, live telecast mek a ni nghe nghe.

"Virus hriat ngai loh, mak tak mai chu tun mai khan Aizawl khawchhungah a pung vak mai a. Dawrpui bazar atanga intan niin tun dinhmunah phei hi chuan veng chhung hrang hrang ah an inkai darh nasa tawh hle ni a hriat a ni. Police Force chu veng hrang hrang atanga chah chhuah mek an ni a, silai kah puah phalna an dawng hial a ni." tiin news reporter chuan a rawn puang a.

Chutah chief minister Pu Lalfamkima chu a rawn lang a, "Ka mizopui duhtak te u, kan khawpui chu rin phak bakin tunah hian a buai hle mai a. He hri mak tak hi inseh atanga inkaichhawn a nih hmel a, heng hri kai tawh ho hian mihring tumah an dim lo. Eng atanga lo chhuak nge, khawi lam natna nge kan hre rih lova. Tunah kan inchah theih zawng chu i in chhuahsan lo la, kawngka tha takin kalh ang che." tiin a han chawl vang vang a.

Hrehawm tih hmel tak hian, "Military force pawh thawn chhuah mek an ni a, chumi chhung chu i inah lo tawm him la, tumah kawngka i hawn tur a ni lo. A hlauhawm tih ka hria, in hlau ngei bawk ang. Mahse tun dinhmunah chuan sawrkar thu chhuak lo ngaichang leh phawt ula, chhangchhuaktu an lo kal mek e." tiin a sawi chhunzawm leh a.

Pu Muanpuia chuan TV chu a off hmak a, "Khawnge Mama leh BAwihi an awm?" tiin a fate awmna chu a han zawt a. Tap lek lek hian Pi Hlimi chuan, "Mama chu zingah khan Office ah kal lawk angai, M pass pawh ka la vek tawh tiin a chhuak a, Mami erawh dawr ka zawng lawk dawn tiin a chhuak a, an lo la let lo ve ve." tiin a chhang a.

Pu Muanpuia chuan pawi tih hmel tak hian a lu a dawm vawng vawng mai, "Hei hi ania ka hlauh thin chu, campus lamah lah nitin ka kal a ngai thin bawk si. Nangpawh lo ven thawn ve thin tur che alawm, i call tawh em?" tiin a han vin deuh bawrh bawrh a. Pi Hlimi chu a inhnit feih feih tawh mai, "An la thei lo ve ve, vawi tam ka try tawh." tiin a lo chhang leh a.

Chutih lai chuan pawn lam atang chuan motor insu ri bur bur ri chu an hre thut mai, Pu Muana chuan rang takin tukverh lam chu ava pan a. Pawn lam chu a han thlir a, a thil hmuh chuan a ti hlauthawng takzet. Hri kai ho chu an lo inkaichhawng nasa tawh hle ni tur a ni, kawnglaiah chuan hri la kai ve lo te chu an lo bei chiam chiam hlawm a.

*********************************************************

Arts bulding luh pheina ah chuan Fela, Security Guard Dawnga, Sangsangi leh Emily te chu an biru mek a. Building kawta hri kai ho tei kual chhen te chu an en thap a. Dawnga chuan a tiang ken lai chu a hum nghet sauh sauh va, "Sintex phenah hian lo biru ula, tichuan thawm ka chhuah vak ang a. Kawng chung lamah ka han in um chhoh tir ang, chumi chhung chuan building chhunglam luh in lo tum dawn nia." a han ti a.

Fela chuan a en hu a, "Anih leh nang, engtin nge i awm zel ang?" tiin a lo zawt a. DAwnga chu a han thaw deuh hak a, "Kei chu ka tha mai ang, min ngaihtuah suh u." tiin a lo chhang a. Sangsangi chu a ner nung mai, "Pawn lam ami ho hi lo hnawt kiang thei pawh ni ila, building chhunglamah tam tak an la awm dawn tho va. Engtin nge kan hmachhawn ang nga?" a lo ti bui bui mai.

Emily chu a han ding ngil deuh thut a, "Ka hnungah i awm dawn nia, khawiah mah kal sawn lo la a tha a nimai." tiin a iron rod ken lai chu a han hum nghet sauh va. Tichuan DAwnga chu a va kal phei a, "Hey hmelchhe ho, helamah lo kal ru.." tiin ring tak chuan a han au lauh lauh va.

Chuveleh building pawn lama hri kai ho chu an rawn hawi thup mai, DAWnga chu an va hmu ta a. An zavai mai chuan an va tlan ta huk mai le, DAwnga pawh chu chak takin a tlan chhe ve ta nghal a. An tlan rem ta maw tih ah chuan Fela, Emily leh Sangsangi te pawh chu an bihrukna atang chuan an arwn chhuak a, building lam chu an va pan ta a.

Sangsangi chuan Emily kawrhnung chu vuanin a zui det det a, FEla erawh chuan eng hmanrua mah a keng lo thung. Building main gate chu an thleng a, Fela chu a han dak de de a. Kawngka bul hnaih lamah chuan hri kai tumah an lo awm lo hlauh mai, mahse floor chunglam vela hri kai vei kual nuai nuai te chu a han hmu thei a.

Emily bulah chuan, "Kan thiante tukverh-a rawn dak chhuak te kha, khawi floor ah nge an awm i hre thei angem?" tiin Fela chuan a zawt a. "2nd floor, hemi chung chiah hi...  Political Science ho class room a ni in ka hria." tiin a lo chhang a. Fela chuan engtia han pawh mai tur nge a hrethiam tlat lo, "PAwn lam atang sawn step chhohna chu a awm." Emily bawk chuan a han ti leh a, tichuan chumi step lam pan chuan building hnung lam atang chuan an inzui leht a hlawm a.

**************************************************

Inspector Tetea chuan tlang lam, Dr. Thazuala te in lam chu a pan chho zel a. Mahse a hlat ve em avang chuan colony hrang hrang chu a la paltlang a ngai, vanneihthlak takin hmun reh deuh lai, in pakhat bula bicycle lo let reng chu a hmu a. A chuang vat a, tichuan kawng chho lam chu a pan ta a.

Mahse a tlan mek lai chuan kawng chung lama in kawm kar atang chuan hri kai pahnih thum vel chu an lo awm hram a, a thawm chu hria in an rawn chhuak ta. Tetea chu an um zui ta chiam mai a, kawng chho a ni bawk nen Tetea pawh chu a tlan chak hleithei lo. A ke chu a kham hle mai a, hri kai ho chuan an rawn um pha dawn ta mai.

Pakhat chu a zuang vak a, Tetea darah chuan a ban fuh hlauh mai. Tete pawh a bicycle khalh mek lai nen chuan a thal tawp a, lamlian awih tak maiah chuan a lum tup tup mai. Chuveleh hri kai pathum te chuan an rawn beih chhunzawm a, pakhat chuan a banah tak mai chuan a seh sak ta.

Vanneihthlak takin tape hmanga a tuamna lai a ni hlauh va, a seh tlan lo hlauh. A theih tawp a na chuan a hnarah a hnek sak siah a, hri kai pa pawh chu a thal ve tawp mai. A sira thingfak lo inrem khawm chu a hmu a, pakhat chu la in hri kai dang pahnihte pawh chu a han hlap thal tawp tawp a.

An lum thla tup tup hlawm mai, mahse mak tak maiin an rawn tho leh nghal a. An rawn pan leh ta, Tetea pawh chuan tihngaihna a hre tawh lo, a tlanchhe ve leh ta ringawt mai a. Rei fe an inum hnu chuan Dr. Thazuala te in chu a thleng ta a, a falin thenawm tak ngial pawh nei lo hi a lo ni.

Hri kai pathumte pawh chu an rawn thleng chawpchilh ve nghal a, pakhat chuan TEtea chu a rawn zuan thlu leh tawp mai. Seh a tum ngial a, mahse Tetea chu a lo indang hram hram a. Midang pahnih rawn thlen hma chuan a bei mektu dulah chuan a tlawh siah a, a thal tawp mai.

Midang pahnih chu an rawn thleng a, Tetea chuan a lo bei let ve leh a. Theih patawpa a  beih hnuah chuan bum thei hramin, a sira kham sang takah chuan hri kai pahnihte chu a nam liam thei ta hram a. Mahse pakhat ala awm, a rawn tho leh tual tual a. Tete thinrim tawh leh ning tawh lutuk chuan, "Ka hne ta khawp mai." tih pah chuan ava tlan phei a.

A dulah tak chuan a darin ava su pawp a, bangah chuan a sut chilh siah mai. Hrikai pa pawh chuan a seh hman meuh lo, chutah Tetea chuan a han hnek siah siah a. A thal leh ta tual mai, Tetea lah chuan ala duh tawk lo, dim lo baksak hian a hmaiah chuan a t(r)um hian a t(r)um ta nghek nghek mai a, hmai thler duai khawp a a sawisak hnuah chuan chu hri kai pa pawh chu a thi ve thei ta.

*********************************************

Dawnga chu a tlan chho zel a, hrikaite chuan an um ve zel bawk a. Tawngtaina tlang pan chhohna lamah hruai chhoh va, khama tlak liam tir a tum hlawm a nih hmel. Tawngtaina tlang panna chu a thleng ta a, a mah rawn hnaih deuh ho chu a lo vaw thal tawp tawp hlawm a.

Mahse a rin loh lutuk maiin a awmna bul lawk, Commerce building atang chuan zirlai eng emaw zat hi an rawn chhuak a, thawm an hriat vang pawh a ni mahna. Hri kai thenkhat chuan an va hmu ta, DAwnga chu a mangang hle mai. Ring tak hian, "Nilo, inchhungah let leh vat rawh u... an hlauhawm ania, kal vat rawh u." tiin a au vak vak a.

Mahse a tlai tawh lutuk tlat, pawn lama commerce zirlaite chu hri kai ho chuan an va pan a. An seh ta nghal buan buan mai, thenkhat chu hlauvin tlan let leh an tum a. Mahse hri kai ho chuan an man hman a, an zuan thlu tawp tawp hlawm mai. Inchhunga lut hman ho pawh chu hri kai ho chuan an um lut ve zel a, midang thawm hria lah an rawn chhuah belh zel a.

DAwnga chuan pawi tih hmel tak hian, "Ni lo, a va chi loh tak. Mawl hlawm lutuk mai, tinge maw in rawn chhuah sup sup kher ni?" tiin a lu a dawm vawng vawng mai a. Building chhungah chuan hri la kai ve lo te chu hri kai thar ho chuan an seh chhawng ve zel a, an pung tam leh ta khawp mai.

DAwnga chuan tih ngaihna a hre lo, chutia a inngaihtuah buai lai tak chuan hnunglam atang chuan a vuak thluk tawh ho, hri kai ho chu an rawn tho leh a. An rawn bei ta thut mai, a nghawng ah chuan pakhat chuan a seh a, a vun chu a pet fan dawr dawr mai. A thler hial a, thisen a chik zawr zawr mai.

Tichuan Commerce building pawh chu hri kai hlir mai chuan an khat ve leh ta thup mai a, DAWnga pawh chu a thi a, hri kai dangte ang bawk chuan a rawn tho chhuak ve leh a. Then khat chu hmundang dangah an kal kual a, thenkhat tawngtaina tlang lam pan chuan an kal bawk.

******************************************************

Tetea chuan thisen a kai hnuang tawh mai a, inchhung lam chu pan a tum a. Mahse kham lam a hawi thla chu a ding chat mai, a mit la thei thil a awm tlat. A va kal hnai a, a han hawi thla vang vang a. Chutah chuan chiang tak hian NORTH EAST VISION UNIVERSITY tih chiang taka lo inziak chu a zu hmu a, campus zau tak mai chu a hmu fuh ta.

A mitthla ah chuan Dr. Bza'n, "Ruata ke tuamna puan them ah khan virus chu a awm ngei a, mahse Ruata thisen leh Pi Rinpuii thisen kan hmu a ni. A awmzia chu, Pi RInpuii hi hri kai hmasa ber chu a ni." tia a sawi lai chu a rawn lang chuai chuai a. Phawk hru hian a hawi kual a, "Kha puanthem kha hemi kham atang hian a tla tihna a ni maw, tichuan campus hnaih ah a tla tlang a, tichuan Ruata chuan a lo chhar tihna a ni thei mai em?" tiin a phun nuah nuah mai.

In lam pan chuan ava kal hnai a, kawngka chu a han kik karh karh a, mahse a reh diak mai. Na deuh tak chuan a han kik leh karh karh a, "Pu Thazual, police kan ni e. Kawngka lo hawng rawh, tih nat che kan tum lo ania." a han ti lauh lauh a. Mahse ala reh diak mai, chhanna engmah ala awm chuang lo.

VAwi thum vel a han auh leh hnu pawh chuan a la reh diak mai a, kawngka hawn a tum lahin chhunglam atangin a inkalh tlat bawk si. VAwi thum vel chu a han tlawh pawp pawp a, a tlawh hawng thei ta. Inchhungah chuan a lut a, kawngka bula hockey stick lo intung chu a ban nghal a.

Inchhung chu a han enkual a, tumah an lo awm lo. Pindan zawng zawng te chu a han hawng kual a, mahse tumah ala hmu chuang lo. Bathroom thleng te chuan a en a, mahse amah lo midang tumah an awm lo amaw tih mai tur a ni. A kal kual fe hnuah chuan room pakhat, ala luh ve lohna chuan a mit a la ta tlat mai.

Kawngka chu thir hmanga siam bik hi a ni a, rang takin ava pan a. Kawngka chu a han hawng a, a lo inkalh lo hlauh mai. A chhungah chuan a lut a, Dr. Thazuala lab ngei mai, MERSA virus a siamchhuahna hmun ngei mai kha a lo ni. Mahse hman lohna a rei tawh tih a hriat hle a, engkim mai chu a chul rup mai.

A en kual zel a, dawhkana lehkhabu sen lo awm chu ava hmu a. A va pan nghal a, a kawmah chuan chiang tak hian MERSA tih a lo inziak kuau mai. Tetea chuan a hockey stick ken lai dah thla meuh chuan a han en chiang deuh va, a chhiar ta. Chutah le, Dr. Thazuala'n MRSA damdawi siamchhuah a tumna lama MERSA virus a siam chhuah tak thu a ziahna chu a chhiar ta vek mai le.

Mak a ti em em a, a meng bial kawk kawk mai. A nupui, Pi Rinpuii chu mihring zinga MERSA virus kai hmasa ber a nih thu leh loh theih lohva a thah a ngaih thu te, a thawmhnaw hak lai pawh khama a theh thlak thu te leh in bul hnai maia a phum thute chu a hriat ve phah ta vek mai a.

Tetea chu a inngaihtuah nasa hle mai, chutia a ngawih vung vung lai chuan a hma zawna glass bur chu ava en a. A hnunglamah chuan mi tu emaw a awm tih a thla atang chuan a hmu thei a, lehlam a hawi nghal vat. Dr. Thazuala chu hockey stick hum ran chung chuan a lo ding reng mai a, Tetea chu rawn vuak a tum a.

Vanneihthlak takin Tetea chu a lo awm sawn hman hlauh mai, dawhkan chu a hlap ri pawp a. "Doctor, eng thil nge maw i tih le? Duhtawk rawh, tihnat tum che a lo kal ka ni lo." tiin Tetea chu a insawi fiah mawlh mawlh a. Mahse Dr. Thazuala chuan vuak tum zui zelin, "Eng vangin nge i lo kal? Heta awm tur i ni lo, kal bo rawh." tiin a veh den den a.

Tetea chuan a la bum thei zel, chutah a han bei let ve ta a. A stick chu laksakin bangah a nam bet a, handcuff chu a bun tir a. Tap lek lek hian Dr. Thazuala chuan, "Ka tih luih a ni lo, hetiang thil hi a thlen ka ring ngai bik lo." tiin a au vak vak a. Tetea chuan a samah thamin nghet tak hian a nam bet leh a, "Awle, a bul atangin i sawifiah dawn nia." tiin a chhang a.

**************************************************************

TO BE CONTINUE