SUNRISE SWEETS Written by : Aaron Malsawmdawngzuala (A MIZO FICTIONAL FAMILY SAGA STORY) Chapter - 4

 SUNRISE SWEETS

Written by : Aaron Malsawmdawngzuala

(A MIZO FICTIONAL FAMILY SAGA STORY)

Chapter - 4

***********************************

Zanah chuan May-i chuan TV chu a en a, chaw ei dawhkan lamah Sangtei chuan a home-work a ti mek bawk. Lawma erawh room lamah a awm thung a, Ethana pawh bathroom-ah a lut deuh chiah a. Chutia an unau a, an buai buai a an buai lai chuan kawngka a rawn inkik karh karh mai.

May-i chuan ava hawng a, pa pakhat tar ve lam deuh, suit nena rawn inthuam thlap hi a kawngka bulah chuan a lo ding vang mai. May-i chuan a en deuh hu a, "Enge i duh? Tunge ni nih aw?" tiin a lo zawt nghal a. Chupa chu tudang nilovin, an bakery leisak tumtu Pu Jacob-a kha a ni.

Pu JAcob-a chuan May-i chu a han en vang vang a, "Aaa... Ethan-a te in a ni em?" a han ti a. May-i chuan bah nuai hian, "Aww.. aw ni e, enge i duh a?" tiin a lo zawt leh a. Pu Jacob-a chu a khi deuh sak a, "Ka lo leng lut thei angem?" a han ti leh phawt a. Polite tak hian May-i chuan, "Lo lut rawh." tiin a hruai lut ta a.

Thu ta mai lo chuan Pu Jacob-a chu a han hawi kual vel a, "In in nei nuam hle mai, khawnge Ethana chu?" a han ti leh nghal zung zung a. Sangtei pawh chuan a thut hmun atang chuan a lo en reng a, "A inbual lawk a, lo thu rawh." tiin May-i chuan a chhang a. MAhse Pu Jacob-a chuan thutak zet hian, "KA thu rei hman lo, sumdawnna chungchanga biak ka duh a...in lo hrilh mai dawn em ni?" a ti leh zung zung mai.

May-i pawh chuan mak a ti angreng hle a, "Awle, eng lam nge ni ta?" tiin a lo zawt ve mai bawk a. Pu Jacob-a chuan thawk a han la te te a, "Englo ania, hmanni khan i u hi ka hmu tawh a. In bakery hi a location a tha em a, to deuh va lei ka duh a ni. Engzat pawh inchhiar rawh u, ka project neih mek atan hian a pawimawh lutuk a." a han ti chu LAwma pawh a room atang chuan a rawn chhuak a, "Engmaw? KAn bakery lei i tum maw?" a rawn ti chhuak nghal a.

Pu Jacob-a chuan a lo nuih suk a, "NAng hi, Ethana nau ve tho i ni ang maw?" tiin a lo zawt let daih mai. LAwma'n a chhan hma chuan, "Kan bakery hi maw? Enge awmzia?" tiin May-i chuan a lo zawt ve leh a. Pu Jacob-a chu a nui deuh var var a, "A awmzia chu maw.." a tih lai chuan bathroom kawngka chu a rawn inhawng ri rak a.

Ethana chu rawn chhuakin, "A awmzia chu kan phal lo, Pu Jacob. Enge hetah i rawn tih a? Hmanni pawh khan ka hrilh tawh che kha, phal ni ila chu ka rawn be em em ang che." tiin a rawn pan a, a lungawi loh hmel kher mai. Hlauthawng deuh tak chuan Sangtei pawh chu rawn thovin, "U... eng nge awmzia?" tiin a khur deuh dar dar mai.

Mahse Pu Jacob-a chu a nui deuh suk suk ringawt a, "Ka hria alawm, Ethan. KA beisei sa reng alawm, ka rawn kalna chhan ber chu hemi i tawngkam hre tur hian ania...engpawh nise, in inchhung ngeiah ka rawn lut a, i unaute ka hmu tawh bawk a. A tawk e, ka kal ange." tiin a chhuahsan ta a.

Ethana chu a ding ngawi reng a, "U, eng thil nge a?" tiin May-i chuan a u chu a zawt nawn leh a. MAhse a chhang lo, LAWma pawh chuan Pu Jacob-a kal liam chu a en reng a. Ethana chu a en leh a, "Tunge khapa kha, kan dawr hi lei chhawnah min dil tihna em ni?" tiin a lo zawt ve bawk a.

Ethana chu a thaw deuh hak a, "Pu Jacob-a a nih kha, kan dawr mai nilovin a hmun hma vel zawng zawng nen sawn hralh turin min ti a, ka phal lo a nih kha." tiin a chhang a. May-i chuan mak tih hmel tak hian, "Tinge chutiang thil lian tham te chu engmah min hrilh ve loh? SAw bakery saw kan chhungkaw tan a pawimawh zia kan hre vek a, tinge engmah i sawi loh va?" tiin a lungawi vak loh hmel kher mai.

Lawma lah chuan, "Engzat nge a offer reng reng che a?" a lo ti hman pek a, Sangtei chuan a lo nghawk sawk mai. Ethana chu a ngawi vang vang a, "Tunah chuan engmah ka sawi peih rih lo, naktuk lamah kan sawi dawnnia." tiin room ah chuan a lut daih mai. A naute pawh chu an in en ang hu hu a, an thiltih lai mek chu an chhunzawm ve leh mai bawk a.

*******************************************************

Pu Jacob-a chu a room ah chuan a ding ngawi reng a, tukverh lam chu a hawi vauh vauh a. Chutih lai chuan a room kawngka chu a rawn inkik a, "Lo lut rawh." tiin a lo chhawn vat a. Tlangval kum 25-30 mi vel, hmel leh incheina en reng reng pawh a mi khawsak harsa zawk zawk nilo tih hriat reng mai hi  a rawn lut a.

Thutthlengah chuan a thu a, "Enge ni ta?" tiin a zawt a. Pu Jacob-a chu a hma zawn takah chuan ava thu ve a, "Ethana chuan a la phal chuang lo." tiin a chhang a. Chu tlangval chu a khi suk a, "Ka sawi reng kha, midang bulah pawh a mizia ka zawt chiang tawh hlawm alawm. A luhlul lutuk, a nu leh paten an boral san atang phei kha chuan a tul te ah lo chuan biak tawng a har lutuk an ti." tiin a chhang a.

Pu Jacob-a chu a ngawi vang vang a, "Ka mamawh dawn che a nia, saw bakery saw kan tih ral ngei ngei a ngai. A location saw, saw bak bak a fuh saw a awm lo. Nizanah pawh chaing deuhvin ka ngaihtuah a, hotel thar kan sawi mek kha, sawtah sawn a fuh ber ang." a han ti leh a.

Chu tlangval chuan meizial a han tan khu luih luih a, "Enge ti tura min duh?" tiin a zawt a. Pu Jacob-a chuan chiang tak hian a en a, "I hmin angai, Ethana saw i hmin angai. Zaninah pawh a unaute mit hmuh lai ngeiin zak takin, saw fahrah ve mai sawn hmusit takin min chhuah tir a. KA ngawi mai mai dawn lo, mahse i puih ka ngai a ni." tiin a hrilh a.

Tlangval chu a nui ta var var mai, "A fel tawh angah ngai tawp rawh, ka kutah i dah dawnnia." tiin a lo chhang a. Kal mai a tum a, "Leh lawk...thil pakhat leh chiah." tiin Pu Jacob-a chuan a lo chelh ding a. Chu tlangval pawh chu a thu leh a, "Awle, sawi rawh." a lo ti ve nghal vat a.

Pu JAcob-a chuan chiang fek fawk hian, "Thil duhawm lem lo emaw, kan tih atana mawi lo khawp a chet ngai pawh nise...ti vek ang che aw, ka fapa." a han ti ban charh charh a. Chu tlangval pawh chuan a lu a lo bu nghut a, "Awle, ka pa. Ka ti beidawng lovang che, min ring tawp rawh." tiin room chu a chhuahsan ta a.

Chu tlangval chu Pu JAcob-a fapa upa zawk, Victor-a a ni. Nau hmeichhia a nei a, mahse pasal neiin inhrangah a awm tawh thung. Victor-a hi tlangval fel leh rilru tha tak chu a ni hauh lo, a pa a chhun em em a, rilru ah leh sum ngainat lamah pawh an inchhun fu hle a ni. An pafa hian eiruk lamah pawh an kawlhrawng hle a, Ethana chungah pawh khawngaihna lan tir an tum loh hmel takzet.

*****************************************************

A tuk chawhma lamah chuan Ethana pawh dawrah a buai leh ngat ngat tawh hle, customer te chhang duh zawng chu a pack sak zung zung a. Dawr tu an arwn thahnem ve deuh bawk nen, hah thin viau mahse a lawm rilru thin hle a ni. A buai a reh deuh hnu, mi an tlem deuh hnu huan hah hmel tak hian thutthlengah chuan a han thu hnawk a.

A thaw huai mai, chutih lai chuan a rin loh tak mai hian Jenny a rawn lut thut a. A beisei loh em avang pawh a ni mahna, "Ehe, Jen...Jenny, lo leng rawh." a ti bah nuai mai a. JEnny chu a bulah a rawn thu a, "Engmah rawn lei pawh ka tum lem lo, ka rawn peng lut mai mai." tih pah chuan a nui deuh sang a.

Ethana chu a lai lek lek mai, "I rawn leng lut khat sia, mak ka ti deuh va." tiin za lo tak chuan a han nui lui vel a. Jenny chuan a en vang vang a, "Zanin i awl em?" tiin a zawt thut mai. Ethana pawh chuan mak tih hmel tak hian a en hu a, "AWl...awl lo maithei, ngati nge?" tiin a tawng bah leh nuai mai.

Jenny chuan phur hmel tak hian, "Awl hram la, zanin chu Chanmari a dawr an hawn tharah khan va kal ve ang. MAwh? Please, chhuah harh ve te pawh i mamawh alawm?" tiin a sawm nghal chung chung mai a. Middle school an kal lai atang tawh a, a ruka a lo star ve thin em em, tun hnu thleng pawh a alo duh ruk em emin chutia a sawm chu a chak ve ngang mai.

Mahse a chhan hma chuan a inngaihtuah chiang a, Pu Jacob-a kha lo kal leh ta se, a unaute a lo hmin hmak ang tihte thleng chuan a ngaihtuah a. Chak ru ve viau mahse a hnial leh phawt a ngai ta tlat mai, "Naktuk lamah zawrh tur chhang ur a ngai dawn a, nidangah ni mai rawh se." tiin a hnial leh ta nge nge a.

Jenny chu a lungawi hmel loh khawp mai, "I ti ve ziah, i phakar thei lutuk. i thiante hi min ngai pawimawh tawh lo ka ti emai, keizawng... hetia i mizia i thlak thut mai hi chu kan thian ho hian kan tuar takzet ania aw.. ti hian awm tawh lo teh." tiin a an khum deuh nek mai a. MAhse Ethana chu a ngawi reng a, hnuailam melhin a kun reng ringawt.

Chutah JEnny bawk chuan, "Hetia i nu leh pate sun reng reng a nun i hman reng chuan nupui pawh i nei thei nang, kum 30 lai i nih ve tawh kha. Kan rual u zawkte hunlai ngaihtuah phei chuan tlangval senior i ni tawh, i harh chhuah angai a ni." a han ti leh a. Ethana chu a ngawi vang vang a, "Ni e, ka hria alawm. Mahse tunah chuan a har a nih hi, ka naute hian min la ti buai rih em a ni." tih ringawt chuan a chhang a.

Jenny pawh chuan tih ngaihna a hre lo, "Umm, engpawh nise zandangah nimai rawh se. Mahse ka sawi ang khan, next ah chuan chhuanlam engmah ka hre duh tawh lo ania aw..." fiamthu titih deuh chuan a han vin vel khur khur a. Ethana pawh lo nuiin, "Tehreng mai, kan leng chhuak em em ang." a lo ti ve bawk.

Chutih lai chuan Jenny phone chu a rawn ri a, "Hello, aw... awle, ka lo kal nghal ang." tiin phone chu a dah a. Ethana bulah chuan, "Ka kal angai, kan inbe leh dawnnia." tiin a chhuahsan a, Ethana chuan a en zui vawng vawng mai. A duh thu hrilh chu chak viau mahse, a lo duh veloh a hlauh em avang leh an inthianthatna a tih chhiat a hlauh avang chuan a inzep tang tang thin a ni.

****************************************************

May-i pawh painting school lamah chuan a buai leh hle a, class chawlh lai a nih avang chuan rawng leh brush te chu a dah fai mek a. Zawi te te hian a zai rat rat a, chutah a hnung lam atang chuan thawm a hre ta tlat mai. Rang takin a hawi let vat a, thinrim hmel em em hian David-a chuan kawngka bula dingin a lo melh kur mai.

May-i chuan engmah a sawi lo, a thil tih lai chu a tih chhunzawm leh char char a. David-a chuan serious hmel tak hian, "Thil sawi dun kan ngai." a han ti vin deuh thak a. Mahse May-i chuan en miah lo hian, "David, ka buai em hi...i hmu lo ami?" a lo ti deuh hmak mai. David-a chu a sa phat mai, "Thantea hi enge kei aia a that viau bikna?" a ti vin ta khur khur mai a.

May-i chuan rum zet hian a en a, "Eng nge ka lakah hian i duh a? Eng nge i buaina chu ni a?" tiin a zawt let ve nghal a. DAvid-a chuan a va pan hnai a, "Vawi tam ka sawm tawh che, ka hmeichhe ngainat zawng tak i ni. Chuvang chuan chhuah pui che ka chak a, mahse min hnial zel a. Thantea tan erawh hun i nei hle si, i taksa pawh kha i phal hial lo maw?" a ti ta mai a.

May-i pawh a sa ve phat mai, "Eng maw i sawi a? David, ka hrilh ang che. Thantea nen sawn thian kan ni, thildang engmah a awm lo. Chuan maw, ka duh zawng i ni lo. Min tibuai tawh suh, a nih loh chuan.." a sawi zawh hma hma chuan DAvid-a chuan a lo pawt chat a, "Anih loh chuan eng nge? Engtin nge min tih ang nga? Thantea bulah i sawi ang maw? Saw mihring ai sawn sum ka ngah zawk, ka hausa zawk...sawpa saw ka hlauh i ring reng reng em mawnile?" tiin a nui vel a.

Mahse May-i chuan a chhang lo, David-a chuan May-i phone hum lai chu a en a. A screen lo keh nual tawh chu hmu in a nui suk a, "Kha.. phone thar te pawh i mamawh ang. Thantea ai chuan keiman a ai tha ka lei sak ang che." tiin a meng deuh phut a, a ruih hmel hle bawk. May-i chuan hnuailam melhin, "Chhuak rawh." a ti chang deuh fak a.

DAvid-a chuan hlauh loh hmel tak hian, "Hmeichhia te te si, ka pawr e, ka luhlul e mi tih khum ve a. Ka ngaihdan a ni tawh bik lo, Thantea chuan a siam nuam thiam hle che aniang maw?" a han ti leh deuh kher a. May-i thinrim lutuk chu rawn hawi chhuakin, "I va han zak lo tak." tih pah chuan David-a hmaiah chuan a beng ri thlawp mai.

DAvid-a chu a thinrim kher mai, May-i tukhum samah chuan a tham a. Fawh a tum ta mai a, nasa tak chuan May-i chu a lo indang a. A au vak vak a, "I zak em? Min thlah rawh, min thlah nghal rawh." tiin a vin nasa mai a. A au thawm hria in teacher dangte chu an rawn kal a, Principal leh Thantea pawh an rawn lut ve bawk.

Principal chuan ring zet hian, "David Zomuanpui, engthil nge i tih a?" a rawn ti vin thak mai a. David-a pawh chuan a thlah nghal a, tap chung hian May-i chu a rawn tlan phei a. A thiante chuan an lo kuah a, Thantea chuan thil awmzia a hrethiam ta. A thinrim lutuk chu va tlan pheiin, "ZAwnga leh.." tiin David-a chu hnek a tum ta mai a.

Mahse mipa awm ve dang ho chuan an lo dang hman hlauh mai, "I va tenawm ve a, hre rawh. David, i chak lo khawp ang." tiin a vin khur khur mai a. David-a erawh a ngawi reng, a ruih pawh a reh tial tial mai. Principal chuan thinrim hmel tak hian, "Vawiin atang hian ban i ni, i hria em? Police ka call hma hian chhuak nghal rawh, chu chu ka ngaihdamna sang ber ni rawh se." a ti ta hmak mai.

DAvid-a chu a chhuak nghal a, a zak kher mai. Thantea rawn pawr ve khanglang pawh chu a haw em em a, "Ava han chak dawn lo tak em." tiin a phun mawlh mawlh a. Garage lamah chuan a chhuk a, Thantea bike chu a en vang vang a, a thinrim insum zo lo chuan a ke hnung chu a han tih thep sak hram a.

********************************************

Tlai lamah chuan DAvid-a chu a motor chhungah chuan thu in zu chu a thli ri karh karh a, "An chak dawn lo, an chak dawn lo hi a ni tawp." tiin a inhrosa khur khur reng a. Chutah a motor tuverh atang chuan a awmna atanga hla vak lova May-i leh Thantea lo awm dun chu ava hmu leh ta, a thinrim chu a so sang leh zual kher mai.

Thantea chuan a bike ke hnung chu a en a, "Ehe...a thep a nih hi. Ava buaithlak, a spare ka keng bawk si lo." a ti nuah nuah a. May-i chu a hawi kual a, "Workshop hnai deuh a awm mai lo maw...helai hnai velah hian a awm thin kha.." tiin a zawng a. Thantea chu a thaw hluai a, "Workshop hnai ber chu veng thlang lama mi kha a nimai, chhuk lam chu kan inphur thei mai ang." tiin a chhang a.

Tichuan workshop lam pan chuan an chhuk ta a, chuveleh David-a chuan an kalna tur chu a hrethiam ta nghal mai. A lu a bu nghauh  nghauh va, "Vengthlang workshop ah an kal dawn nimaw?" tih leh a motor chu start a rual nghal a, a in-turn a, vengthlang lam pan chuan a inkhalh thla ve nghal a.

Thantea leh MAy-i te pawh chuan kawng zawl lai chu an thleng a, May-i chu a chhuk a. Thantea chuan nui suk chung hian, "Ti hian ka nawr phei mai ang, a hla vak lo. Kawi 4 vel animai, muang changin kan kal anga." tiin a bike chu a nawr a. May-i pawh chuan nui chung hian, "Ka lo nawr chhawk dawn che em ni?" tiin a han fiam vel a.

Chutah an hnung atang chuan David-a motor chu a rawn lang thut mai, May-i chu a au tuar a. DAvid-a rui buai tawh chuan pawisak a nei tawh lo, Thantea chu sut a tum ta mai, mahse Thantea pawh a hun takah chuan a lo zuang sawn hman hlauh mai. A bike erawh a su chhe hnehsawh hle, motor pawh chu a ding nghal.

Chutah David-a chu a rawn chhuk a, Thantea chu rawn panin a hnek thal nghal tawp mai. A chhuih zui a, "Nang hian min khawih i tum ve amaw?" tiin a dim lo kher mai. May-i chuan David-a chu a rawn bei ve a, "Nangnu vang vek hi a nih hi.." tiin DAvid-a chuan na em em hian a lo beng hawi sawk mai.

May-i chu a tlu tawp a, chutah Thantea thinrim chuan David-a chu a rawn zuan thlu ve nghal a. An insual ta chiam mai a, chutih lai chuan mi an rawn pung khawm a. Police lo phone an awm hman hram bawk nen, Thantea leh DAvid-a lah chu insawi fiah ahnekin insual an la tum tang tang bawk a, an thelh hleithei lo chu a ni ber e.

*******************************************

Police Station ah chuan May-i leh Thantea chu an thu ngawi reng a, an Principal chu rawn kalin police ho bulah chuan thil awmzia a lo sawifiah mek bawk. David-a pawh a thiam lo zawk a nih avang chuan lock up ah chuan an khung a, Thantea pawh chuan a hmai vung bur mai chu vurin a dep mek bawk a.

May-i chu a kun ngal a, a zah hmel kher mai. Chutah kawngka chu a rawn ri rak a, Ethana a lo ni. May-i chu a en a, a lungawi loh hmel takzet. Principal chuan a lo ko nghal a, thil awmzia a hrilh hnu chuan a haw san a. Police Inspector pawh chuan Ethana chu a titi pui nual a, May-i chuan a u chu en pawh a en ngam lo.

Ethana chuan lock up chu ava en a, David-a chu a hnar a lo thi phung a. A thinrim chu a inhumruh nasa kher mai, mahse case engmah file a duh loh thu leh theihnghilh hmak a duh thu chuan police chu a hrilh ta daih mai. MAy-i pawh chuan mak tiin a rawn en hu a, "Thantea bike a sut chhiatah hi chuan engmah inrawlh theihna ka nei lo, anmahniin lo inching fel mai rawh se." tiin May-i chu ava pan a.

May-i chu a zam kher mai, "Lo kal rawh, haw ang." Ethana chuan a ti chang deuh fak mai. May-i chu a ding a, "Ethan, a pawi ka ti khawp mai. Englo, keima thiamloh a ni." tiin Thantea chu insawi fiah a lo tum nasa mai a. Ethana chuan zawi te hian, "Theihnghilh rawh." tiin MAy-i chu a kai chhuak deuh dawr dawr mai.

Thantea chuan a umzui a, "Khawngaihin Ethan, min ngaithla teh. May-i hian thiam lohna a nei lo, khawngaihin a chungah thinrim suh." tiin a ngen mawlh mawlh a. KAwngpui thleng chuan a zui a, mahse Ethana chuan a chhang lo. MAy-i lah a tawng ngam tawh bawk si lo, a mittui a tla zawih zawih ringawt.

Thantea bawk chuan, "Ethan, May-i rilru tur hi i hriatthiam pui lo a ni. A thiam loh a ni lo ania, i hrethiam lo a ni." a tih chiah chu Ethana chu a ding a. Vin em em hian Thantea chu melhin, "Anih leh enge i hriat ve a? Mawh... sawi ta che. KA unaunu hi ka hrechiang, nang khan enge i hriat ve?" a ti khur khur mai.

Thantea pawh chu a ngawi chiang hle, kawng laia lo kal te chuan an la en thup zui. Boruak chu a reh thiap mai a, Ethana chuan taxi a phar a, May-i chu luh tir deuh nawk nawkin an tlan liam ta a. Thantea chu a zak angreng kher mai, hmutu lah chu an tam em em lehnghal a. Zak ru tak chung chuan ani pawh chuan taxi a phar a, a haw ve ta a.

**********************************************

An haw meuh chuan khua pawh a lo thim vek tawh a, May-i chu ngawi rengin a roomah a lut tlang nghal a. Ethana chuan a zui lut ve nghal bawk, "U... ngati nge? Ngati nge case i file loh? I nau min khawih chhiat a tum a, kut min thlak bawk asin. Tinge, tinge case i file loh?" tiin a zawt a.

Ethana chu a ngawi vang vang a, "Hremna chu a hmu em em ang, police te hian engmah an ti tak tak dawn lo. Chuan...painting school ah pawh sawn thawk tawh lo mai rawh." a ti ta hmak mai. May-i chu a lungawi bik lo kher mai, "Eng a? Engvangin maw? Saw school lo saw chu khawiah mah thawhna tur ka nei lo, ka sum hmuh ve na ber a nih saw?" tiin a hnial let a.

Ethana chuan vin lek lek hian, "Aww... ka bulah i thawk mai ang. Bakery kan nei alawm, dawr min nghahpui ve mai rawh. May-i chu a lungawi thei lo, "Heti khawp hian kan khawsak a harsa tawh a, chutih lai kara ka hna leh zel lo bansan te chu. Kha mihring David-a vang mai mai khan ka chawl lovang, ka duh lo." a ti ve hmak mai.

Ethana chu za lo tak chuan a nui lui sak a, "Anih Thantea vang ami? Khapa khan a venhim zel che i ring ami?" tiin a zawt let ve a. May-i chuan a u chu chiang takin a en a, "Thantea kha awm lo se vawiin tlai khan hei ai hian hliam ka tuar nasa ang, ani khan min chhanhim zawk asin." tiin a lo chhang let ve leh a.

Ethana chu a thinrim takzet, "A chhanhim zo lo che a nih kha, vawiin khan a bula haw lovin taxi te pawn rawn haw ta mai la chu i hmaiah khan kutthlakna hnu hma a awm lovang. Ka mit hmuh phakah i awm lo va, hetiang hi kan thleng ta a nih hi." tiin a vin hrep mai. May-i chu a ngawi reng a, Ethana pawh chuan room chu a chhuahsan ve a.

**************************************

Zan dar 8 vel a ni a, Ethana chuan chaw ei dawhkanah chuan pawisa a chhiar mawlh mawlh a. Sitting room ah chuan Sangtei chu a mu a, phone a khawih mek bawk a. Chutih lai chuan inchei zet hian Lawma chu a room atang chuan a rawn chhuak a, "U, ka chhuak dawnnia." a rawn ti nghal deuh thawr a.

Ethana chuan a lo melh zeuh va, chhang lo chuan pawisa chu a chhiar chhunzawm leh malh malh a. LAwma chu ava kal hnai a, "Zanin chiah a nimai, kan inkawm khawm mai mai dawn a. Khawngaihin, naktukah engmah assignment tihtur pawh kan nei lo." tiin a dil leh a. MAhse Ethana chuan a chhang chuang lo, a thil tih lai chu a tih zawm mial mial a.

LAwma lah a hmanhmawh tawh si, "Naktuk chu function kan nei dawn a, class a awm dawn lo. Mawh, tun chiah animai." tiin a ngen leh a. SAngtei chuan sitting room atang chuan, "Au Lawm, dar 8 a pelh tawh hi. Chhuak tawh lo mai la, a tlai tawh em hi." a lo ti a. Lawma lah chuan, "Lo ngawi rawh, ka be lo che." a lo ti hmak mai.

Ethana chu a en leh a, "KA kal dawn nia, engmah i sawi bawk si lova. A hahthlak emai, i phal nge phal lo?" tiin a zawt nawn leh a. Mahse Ethana chuan a la chhang duh chuang lo, hre lo ang hmak chuan a awm a. LAwma ngaihdan chu a ni ta bik lo, "Ka kal tawp dawn, ninawm." tiin a chhuak nghal daih a.

Sangtei chu a u Ethana bulah chuan a rawn thu a, "U...ngati nge Au Lawma kha i chhan duh miah loh va?" tiin a zawt a. Ethana chuan a pawisa chhiar lai chu a dah a, "Nizana ka sawi kha i la hria em?" tiin a lo zawt let daih mai. SAngtei chuan hriatthiam loh hmel tak hian, "Eng chu maw?" a lo ti hu mai.

Ethana chu a khi suk a, "Pu Jacob-a a lo kal kha, kan bakery lei chungchangah..i hre tawh lo maw?" tiin a zawt nawn leh a. Sangtei pawh chuan, "E ni tak e, ka hre leh si." tiin a lo chhang a. Ethana chu a han thaw hak a, "Nizan khan chiang deuhvin naktuk zanah kan sawi ho dawn nia ka ti vek a, mahse kha.. i u chuan a theihnghilh leh daih tawh a nih kha. Kan chhungkaw dinhmun hi a hrethiam tak tak lo, chuvang chuan ka chhang peih vel lo a nih kha." tiin a chhang a.

May-i chuan an thusawi chu a room bul atang chuan a lo ngaithla vek a, a rilru a nuam lo kher mai. Hman zan lawkah a u bulah puitling a nih ve tawh thute, ngaihtuah a ngaih loh thu te a sawi ve vak vak kha a ni si a. Vawiinah police station hial a rawn kal ve a ngai a, amah vang vek lehnghal.

A inthiam chiah lo kher mai, a roomah chuan a let leh a. Pu JAcob-a chungchang an sawi khawm turte chu ani pawh chuan a hrechhuak ve chiah a, LAwma lah a lo titau chhuak ve leh hmanhmawh tawh bawk si nen. A u rilru an ti hah em em mai chu a inthiam lo takzet, a hnuk te chu a ulh hial a.

***************************************

Dar 11 a ri a, Ethana chu register ah ba leh thildang buai puiin a la buai ngei mai. Sangtei leh MAy-i te erawh an mu tawh thung a, Ethana chuan sana a han en a. A meng kawk mai, "Ehe, a lo va tlai tawh ve. Lawma lah a lo la haw bawk si lo, ava buaithlak thin tak." tiin a phun mawlh mawlh a, a ngaihtuah takzet.

PAwnah chuan a chhuak a, a tei a tei ringawt a. Minute 10 vel hnuah chuan an in lam pana LAwma lo haw mek chu a hmu ta a, a thaw huai mai. MAhse Lawma chu zu a rui tih hriat tak hian a rawn kal pai nasa mai a, Ethana chu a lungawi lo kher mai. Mahse hau engang mahse a ruih lai a ni bawk nen, engmah a sawt dawn chuang lo tih a hria a.

A rilru chu thlakin engtin mah lo tih loh chu tha zawkin a hria a, inchhungah chuan a lut leh ta daih a. Chutih lai chuan May-i chu room atang chuan a rawn chhuak a, "Ehe U, iva mengrei ve... Lawma hi a lo la haw na nge?" a ti chiah chu Lawma chu a rawn lut a, Ethana chuan en pawh a lo en lo.

Lawma chu a meng sen rum a, a ruih hmel hle bawk. May-i chuan rum zet hian a melh a, "Lallawmzual, i rui elaw?" tiin a lo zawt nghal a. Lawma lah chu a lo khi ang suk ringawt a, "Ni e, kan han lem ve anih hi. Tlangval alawm ka nih, ka u Ethana vang hian min la chhaih nasa em em zui." a ti deuh ham ham a.

May-i chu a thinrim kher mai, "I va zak lo ve a, enge i hriat a? I la rawn rui haw ngam chu ania, chhungkua in buaina kan tawh lai laiin.." a ti chu Lawma chuan vin zet hian, "Eng buaina maw kan neih a? Min hrilh ve ula, min ngai pawimawh ve tak tak hleinem, tiraw?" a lo ti leh zung zung a.

Mahse Ethana erawh ala ngawi reng, a thil ziah lai chu a ziah chhunzawm zel a. Lawma lah ala ang tui, "Ka pa pawh ni hlei lo, unau zinga upa ber nih vang maiin inla thu em em a. Tha deuhva dil lahin mi chhang duh mang si lo, ka thiante pawhin min chhaih phah nasat zia chu." tiin ala phun nasa mai.

An thawm a rin em avang chuan Sangtei pawh chu a rawn chhuak a, "Lawma, i puitlin loh zia hi i hria em? Nizanah pawh ka u in a sawi vek, naktuk zanah kan sawikhawm dawn nia a tia. I leng lui a, i la rawn rui haw zui." tiin May-i chuan a han hau leh a. Mahse LAwma chuan ngawih mai mai a tum lo, "Ka leng lui maw? Min chhang duh lo a nih kha, lungpui biak ang chauh alawm." tih pah chuan Ethana chu ava en rum vel a.

Mahse Ethana chuan a lo en ve lo, a thil ziah lai chu ala ziah chhunzawm zel a. Chu ringawt pawh chuan Lawma chu a ti thinrim zual a, "Kha putar nizana lo leng chungchang pawh kha enge sawi vak tur awm a? KAn rethei a, kan harsa anilawm ni? Nitin in sawi a ni lawm ni? Anih te chuan hralh mai ila, pawisa pawh induh zah zah animai a tih kha? Tinge tun atakah kan buai dei dei dei in tih leh vel?" tiin a ang leh buan buan a.

May-i chuan vin zet hian, "Mi nep tak i ni, Lallawmzual. Mipa pawh i ni lo, nep lutuk. Engkimah ka u Ethana i puh a, nang hian eng thil tha nge kan chhungkaw tan hian i tih ve tawh? Mi nep tak i nih kha, kan unau zinga i tel ve pawh hi a mak ka ti zawk." a ti ve ta siah siah mai a.

Lawma thinrim insum zo lo chuan, "I tawnghnem khawp mai." tih pah chuan a u May-i hmaiah chuan a beng ta siah mai a. Ethana chu a ding a, "I duhtawk thei tawh em, Lallawmzual?" a rawn ti vin thak mai. Thinrim avanga khur dar dar chung chuan Lawma chuan Ethana chu ava melh a, "Lo inrawlh suh, kei leh May-i chungchang a nih hi." pawr zet chuan a lo ti a.

Ethana chu ava kal hnai a, "Engtin maw min chhan a? I u kha kut i thlak ngam amaw? Ngaihdam dil rawh, tunah khan ngaihdam dil nghal rawh." tiin a vin hlur mai. LAwma lah lo rui pawr ve tawh nen, "KA dil lovang, i thu thu a awm tur ka ni bik lo. Ka rilru hi a na ve tawk tawh, min tihdan zozai hi." tiin a lo la chhang let zui.

Ethana chu a maimitchhing vang vang a, "Lawma, ngaihdam dil rawh. I u hi ngaihdam dil rawh, a nih loh chuan.." a sawi zawh hma hma chuan LAwma chuan, "A nih loh chuan eng nge? Engtin nge min tih ang nga? Min hnek dawn mi? Min beng ve ang maw? Ti ta che, naute bula inlak pa em em kha maw ka ngaisang lo." tih pah chuan a room ah a lut hmak mai.

Sangtei chuan kil khat atang chuan a en reng a, a thin a lo phu dep dep mai. May-i chu a tap zawih zawih a, David-a'n a benna ah chiah chiah ala ni zui bawk nen. Na a ti tak zet, mahse chu ai chuan a rilru chu na a ti zawk, a nau ngeiin a beng ta mai chu a ni si a. Ethana chuan LAwma chu a en zui vawng vawng a, a thinrim insum nasa lutuk chu a thlan a tla zawih zawih thei hial.

May-i chu a kuah a, "Tihpalh aw, Bawihi... ana em?" tiin a zawt a. May-i chuan a chhang lo, a tap zawih zawih ringawt. Sangtei pawh chuan a u May-i chu a lo kuah ve a, roomah chuan a hruai lut a. Ethana erawh pawnah a chhuak a, Lawma chu ava khawih duh mai ang tih a hlauh avang chuan a thinrim chu a insum hram hram a.

**************************************

TO BE CONTINUE