KA HLAU VE DEUH

 KA HLAU VE DEUH

- Aaron Malsawmdawngzuala

(Hlauhawm tak chu a nilo maithei, mahse amak em avang leh thil thleng tak tak a nih vangin ka rawn tarlang ve a ni e. A tawngtu hi keimah, a ziaktu hi ka nilova, Pu C. Vala min rawn thawn a ni.)

Hlawhfa sawmrual vel nen department hnathawkin hmun pakhatah kan riak a, mi pahnih khat tihloh chu zawnglai vek an ni.  Pa ho lah chu tlem nula chhelo deuh an hmuh tawh chuan a phur phurah an la tang zui hlawm a. Khaw pawnah riak mah ila, khawchhhunga hna hna thawh lawp lawp chang pawh kan nei fo mai.

Kan riahna atang hian khaw daifem lam in hnih thum vel chu ke a minute sawmpanga kal vel hi a ni a, chutah chuan nuthlawi leh tleirawl pahnih thum vel chu an awm ve a. Ka riahpui te lah chuan kuhva leh zial ilo vel  an heh em em a, an mamawh zing angreng fu hlawm mai. Sawitawh angin kan riahna chhehvel ah hian thlam eng emaw zat bakah,  mi khawsa thei deuh te thlam, keini chenna in ai mah a tha tur pawh a awm zeuh zeuh bawk. 

Kawngpui tha ve takin kan riahna hi a paltlang a, kan awmna rawn thleng emlo hian nula tlangval interek hmuh tur hi an awm deuhreng tih theih a ni.  A bikin chawhnu her atang hian an tam zual a, ruihtheih thil tihna remchangah an hmang nasa thin hle.  Hmelhriat han hmuh zeuh chang pawh a awm, a then chuan min hmulo der thin.

 

Kan nau te hi zanriah eikhamah hian nula rimtur hian an kal bo leh diak thin a, hmun khata leng ho annih loh avang hian an haw hun pawh a inrual lo nawk zel.  A bak ho zawn te nen hian kan in card den thin a, dawl inchuh bak chu kan deng ngai meuh lo. Kan bukah hian chawke hi a chengve reng a, a khat tawk hian fiah fai tak hian a rawn hram leh kalh kalh thin.

Kan buk hi a chung  leh a bang  rangva a ni a, a seiin a zau ve angreng hle.  A vel hi thosi leh vaihmite tam loh nan fai takin kan thlo a, bang atanga fit ruk kual vel chu a fai tha hle. Hnung lampang tlema hla deuh ah chuan vang kung zar deuh duai hi a awm a, buk chung atang chuan ava hla deuh hret, chu bak chu thing leh mau min hnaih ah a awmlo. 

Zan khat chu khua a thiang khawp mai a, thla arkai den zan alo ni kher bawk nen.  Kawtlaiah chhuak ta ila, thla eng hnuaiah chuan lehkha ziak lian deuh chu a chhiar theih hial awm e tih tur khawp hian thla chu a engbial pup mai. Zanriah kan eikham chuan kan nau te ho chuan, "Thla eng kan lawm dawn.." tiin nula rim tur bawk chuan an kal fai leh ta vek mai.

Khua a vawh deuh avangin pawnah mei chhemin thingbul ro ka mut a, meilum ka ai peihloh hnuah chuan kan buk chhungah chuan lutin playing card chu ka han rem vel mai mai a.  Pawnlamah chuan tawng ri bul bul hi ka hre ta tlat mai, kan naute lo haw hma zanah ka ngai mai a. 

Mahse rei deuh fe hnuah pawh chuan kawngka an rawn hawng ta mai silova, mak ka ti angreng hle mai. Chakai chhit haw an nih loh pawhin ram kal haw tlai an nih mai ka han ring leh ngawt a, ngaih that lohna pawh nei hran lovin puanthuah chungah card chu ka rem kual leh a.

Kan riahna atanga hla vak lovah hian chhungkaw pakhat an awm a, anni hian an electric chu min pawh tir ve hlauh a. Phone charge nan te kan hman ve theih phah a, an chungah pawh kan lawm hle. Inchhungah hian bulb pahnih kan chhi ve a, kawtzawl leh verandah vel en turin bulb eng tha ve tak pakhat kan chhi tel bawk.

Tawng thawm chu ka la hre reng a, mahse kan naute lah an rawn haw mai bawk silo. Ngaih chu a tha tawh lemlo khawp mai, chutia keimah a ka inngaihtuah neuh neuh lai chuan inchung rangva ri rup rup ri hi ka hre thut mai. Kan awke kawlin rannung a man anga, a meiin bang a hem a nih ringin ka ngaih ka la ti tha lui tlat tho va.

Card chu ka han rem leh mawlh mawlh a, mahse reilote hnuah chuan bang chu phelsek a hlap ri vak vak ang mai hian a rawn ri leh ta. Tunah zet zawng, awke thil tih mai chauh a nih ka ring ta hauh lo. PAwnah chhuakin ka va en a, awke awm reng ka hmu lo. Boruak lah chu a reh vung vung mai si a, buk lam pan chuan ka lut leh ta a.

Ka thu fel deuh chiah tih ah chuan inchung, ka thutna zawn chiah chu thil rit takin a rawn tlak ang mai hian a rawn ri leh ta dup mai. Ka phu nasa lutuk chu ka tho chhuak zawk nghe nghe, torch light chuh vatin pawnah ka tlanchhuak nghal a. Inchung chu ka han enkual vel a, mahse engmah ka hmu lo.

NGaih tha lo deuh chung chuan ka lut leh a, awm a nuam tawh lo khawp mai. REi vaklo hnuah chuan kan naute leng pawh chu an rawn haw ta sap sap hlawm a, ka thawm hriatte chu engmah ka hrilh hlawm lem lo. Tichuan kan mu a, mak tak mai chu kan naute an rawn haw hnu hian eng thawm danglam mah hriattur a awm tawh miah lo.

 

Kumkhat dawn riak kan nih vangin eng eng emaw sawi neuh neuh tur chu a tam mai a, a tawng velo leh han inla huai deuh tan chuan engvak chu a nilo mathei. MAhse tlema dawih deuh chi leh a tawngtu tan chuan nunphung  tidanglam ve thei thil chu mimal leh a huho pawhin kan tawng nual, chungzinga tlemte chu han sawi lang leh dawn teh ang.

Kan bukah hian hlawhfa pakhat hi eirawngbawl tur atan hun pum hmangin kan dah reng a, kan cook pawh hi kan thlak kual nual tawh. Kan riah chhung hian mi paruk emaw,  pasarih vel laiin rawng an inbawl chhawk hman, an inchhawk kual chhan pawh a inang lo nual. Kan riahna atang hian kan hnathawhna hi km 3 te, km hnih leh a aia hla a thawhchang pawh kan nei thin.  

Kan laklawh tum phei chuan phone light hmang a kan haw hi a awm fo, chawhma atangin kan thawk a, chhun nisat deuh laiin kan chawl leh a. Chawhnu lamah kan chhunzawm leh a, hna a tam deuh chang chuan kan bang tlai thei khawp mai. Tlai lamah hian kan thawk nasa tlangpui a, thim haw palh takin tiin torch light te kan pai lawk thin. 

Tlaikhat chu thim hnu ah kan bang leh a,  kan hna kalkawng hi kawngpui zautha vetak ani a, kan phone light hmangin kawng dungah chuan kawng awh khat deuh vek hian kan kal tham tham hlawm a.  Kan nau pakhat erawh chu a thian ten phone a an rawn biak laklawh vangin a kal fal deuh va, unau hmelhai vel ani ta awm e. 

Kan nauva chu buk kan thlen hnu pawh chuan a lo la thleng ve thei mai tlat lo, kan insil fai vek tawh hnu pawh chuan a lo la lang ve miah lo. Rei fe hnuah pawh a lo la thlen mai loh avang chuan chaw ei san mai kan tum ta a, chaw ei kan siam lai vel chuan a rawn lut hlawl mai. A rawn tlai chhan kan han zawt nghal liam liam hlawm a, tihian min chhang ta a.

"In kal deuh hnu khan ka rawn kal ve leh a, mahse nula pakhat ka tawk a. A inkhai bawr nasa lutuk a, ka khawngaih deuhvin ka han khai pui ta anih kha. Tichuan ka let pui leh a, ka rei deuh ta alawm mawle." a tih chuan mak kan ti hle mai. Kawng khat vekah kan kal ho sia, mahse tu nula mah kan tawk ve miah lo. Khua a thim deuh tawh avangin a hmel a hmuh chianloh thu a sawi a, mahse make-up a hman thu leh perfume rimtui tak a hmang tih erawh a hriatchian hle thu a sawi thung.

Sawi tawh ang khan naute ho hi zan len an ching em em a, mahse an lenna a in anloh thin avangin an haw hun pawh a rual lo thin hle. An haw kawngah hian thawm mak tak tak an hriat thin thu hi an sawi fo mai a, kan buk an rawn thlen dawn hnaih hian thawm chu a reh hmak zel thu an sawi thin bawk.

Thenkhat chuan, "Thawm chu kan han chhui deuh a, kan um deuh vak pawhin kan umpha thei miah lo." te an ti a. Thenkhat chuan, "Mihring niawm tak, mahse hmuhchian theih siloh hi kan hmu thin a. Kan um pawhin kan umpha thei miah lo, hmanrua engmah keng silo hian kawng chep deuh leh hnimbuk karah pawh pangngai deuhin a kal tlang pawp pawp zel." te an ti thung a, tak tak nimaw.

An thil tawn mak hrang hrang te chu bukah hian an sawi khawm fo thin a, kei erawh chuan engmah ka sawi ve ngai lem lo. Thian hova kal an nih vang hian an hlau ngai lemlo va, chubakah mi tina zawng emaw, mi rikrap zawnga an chet ngailoh vang te pawh a ni mahna. Kan eirawngbawltu te pawh an inthlak fo nachhan pawh engdang nilovin, kan haw tlai chang te, zingkar kan hnathawk, kan haw khawm leh hma si a, buk bul vela thawm mak tak, ngaihthlak nuam lemlo tak an hriat thin vang alo ni tih te ka hre hnuhnawh leh a.

A chhan mumal saw duh silo hian, "Midangin bawl ve tawh se, a hah ngai kan hah reng bik a, a fairlo." tih ten chhuanlam an siam mai thin a, rawngbawltu ngai hi chuan an bawl zawm duh biklo fo thin. Mahse an thil tawn te chu an sawi duh ngailova, midangin rawng bawltu nih an duhloh phah an hlauh vang lek a lo ni. 

An rawngbawl lai te hian thli thaw miah silo hi kawngkhar a lo in vaw ri leh thuai thin hi a ni awm a, kan buk a up that nen, an meichhem chu na taka thliin a chhem len chiam tumte pawh a awm ani awm e. Buk chhung a an awm laia, pawn lama thawm an hriat te, pawn a an chhuah lai a buk chhunglam niawm taka thawm awm thin te chuan  an awm a ti nuamlo thin hle niin an sawi.

Kan nau pakhat ( a hming sawilo mai ila) in buk anghah lai in tlai khat chu a eirawng bawl zo, a a inbual laiin, tlai dang aiin tui chu vawt danglam riauvin a hria a. Keini lah hnathawk haw kan la thleng mai silo, alu suk lai, a mita sahbawn phuan a luh buai vel lai chuan a bul ah chuan mi lokal awm tlat in a hria a. 

Khua a thim deuh tawh vangin a hmuchiang thei lo bawk nen, a inbual zo towel a bul mai a dah chu a ban phakah alo awm ta reng renglo mai a. Kekawrte han hak mai a tum a, a banphak maia a dahkha, a towel nen a piah daih ah chuan alo awm daih mai. Ama sawi dan chuan tlai dangah pawh,  a inbual laiin a sahbawn hmanlai amahin a awmna  alo insawn daih zel thu a sawi. A tawpah phei chuan hnathawhna lama kal ve zawk a duhthu a sawita nge nge a, midangin an chhawk ta a ni.

 

Kei ngei pawh hian kan naute nula rimbo hlan a  midang thawm niawm tak tak leh, buk chung rawn vawm ri leh thin, a vawmtu hmuh theih siloh hi ka tawng ve fo mai. Kawt lampang rangva bang thing buka hrut niawm tak, va en a engmah awm silo te, thawm ka hriat ka finfiah tum, ka kal lohna lam apiang a rizel pawh ka tawng nual. Mahni a, buk nghah chu nuam tihloh chang nei mahila, an hotupa ber hlauh nei niawm tak a ka awmchuan, ka naute ka ti ralkhel zo vang tih ka hlau a, nuam tivaklo chung a buk ka nghah chang a awm fo. 

Chhuah loh zan pawh an nei fo va, playing card kan kawl a, pawisa chuh lovin kan indawlchuh thin a, kan hlimin nuam kan ti ve dar dar thin hle. Kan awmkim thepthawp lai pawhin,  kan buk chung hi  lunga vawm niawm taka rik bur chang a awmfo mai, a rei hnu phei chuan ngaiah kan nei a,  va en peih Pawh kan awm tawh lo. 

Ahnuah kan hriat leh dan chuan kan riahna atanga hla vaklo ah hian inawkhlum te, inthat te an lo awm tawh thin niin an sawi a, chulai hmun hrechiangtute nia kan hriat ho hnena kan zawh lah chuan, "Ngaiah inla nei ve mai ang, mi tina zawng leh a rikrap zawngin an che ngailo. Thawm ngaihthlak nuam vaklo, hmeichhe tap thawm te, inhnit feih fei ri te in hre fo lawm ni? In ruahna velah khan ruang pawh pathum vel an chhar tawh alawm. Khalai hmun velah khan ram kal an awm fo va, anni pawhin ngaiah an nei tawh." an ti sam et ringawt lehnghal.

ENGPAWH NISE A HRING A HRANIN TAWNG VELO MAH ILA, HETIANG THAWM HAN HRIAT VE MEUH CHUAN KEI PATLING PAWH HI...KA HLAU VE DEUH THIN.

A TAWP TA.