SICCIN-6 : THE FINALE (Islamic Horror) Written by : Alper Mestci Translated by : Aaron Malsawmdawngzuala (Based on a true story)

 SICCIN-6 : THE FINALE

(Islamic Horror)

Written by : Alper Mestci

Translated by : Aaron Malsawmdawngzuala

(Based on a true story)

****************

(He thawnthu hi Siccin thawnthu bika a tawpna ber a ni a, he thawnthu Siccin-6 bik hi ahmaa kan lo chhiar/ngaihthlak tawh Siccin-3 zawmna a ni. He thawnthu a Orhana hi hrelo in awm a nih chuan Siccin-3 ka ziah kha inlo va chhiar dawnnia, khami zawm zel kha a ni e.)

Orhan-a chu amah chauh chuan ramhnuaiah kalin ama hriat tham lek hian a phun mawlh mawlh a, "Lalpa, ka thil tihsual te avangin min ngaidam ang che. Vawiin ni thleng hian ka thinlung zawng zawngin ka la inchhir a ni, khawvel danga thlarau chu kan chenna khawvel ah tihluihna hmangin ka hruai lut a, ka ti sual a ni, misual ka ni. Aw Lalpa, ka tisual a ni. Misual ka ni, min ngaidam rawh." a ti mawlh mawlh mai a.

A hma zawnah chuan darthlalang keh them hi a lo awm teuh mai a, a nupui boral ta Kader-i thlalak hlui zet hi a lo awm bawk a. Thlalak chu chhar pah chuan, "Ka duhna te chuan min ti chak lova, a tel lova ka awm theih kha ka ringlo a ni. Khawvel danga thlarau chu he kan chenna khawvel ah hian ka hruai lut lui a, amah angin ka awm luih tir a ni. Lalpa, min ngaidam rawh. An khawvel atang khan ka ru chhuak a ni, min ngaidam rawh." tiin van lam chu a hawi chho a, a mittui a tla zawih zawih mai.

A bula lui kawr ah chuan bawm a chhar a, bawm chhungah chuan amulet pakhat hi a lo awm a, a sir lam ava en chu lui ah chuan lawngleng te tak te hi a lo awm a. Chu lawnglengah chuan mipahnih, ki(horn) pahnih nei, an hmel hmuh theih siloh hi an lo thu dun khur mai bawk a. Orhan-a chuan hlau rilru hle mahse a hlau lo lui tlat a, chu a amulet chhar ah lah chuan samzai hraw tak mai a lah awm nuai lehnghal.

Lehlam a hawi a, "Lalpa, min pui rawh. I chhiahhlawh ka ni e, i tan chuan ka nunna hlan pawh ka huam e. Ka tuar ang, ka sual man chu ka tuar ang." tiin a phun mawlh mawlh a. Kan hriat tak ang khan Orhan-a hi a nupuiin a thihsan a, a tuar thei lovin a nupui ruang chu hai chhuak lehin inah a kawl ta a nih kha.

Ramhuai te fanu kochhuakin a nupui Kader-i angin a awm tir a, mahse Kader-i unaupa Sedat-a puihna hmangin ramhuai ho khan an fanu chu an la let leh ta a nih kha. Khatiang thil a tih avang khan Orhan-a chu ramhuai te chuan an la tibuai reng a, chuvang chuan Orhan-a hi ramhuaite leh thlarau sual te chuan an la zui reng tihna a ni.

Lui bulah chuan mei a chhem alh hluah hluah a, "Ka thilsual tihte hi ka pawm e, ka tuar ang, hrem ka phu a ni." tiin amulet chu meialh ah chuan a vawmlut ta a. Bawm chu a han hawng leh chuan chu a phu nasa kher mai, bawm chhung atang chuan ama nu ngei mai, Hatice-i chu a thu chhuak hlawl mai.

A hmai a chuar em em a, a vun chu a dang var pup bawk. Hatice-i chuan rum zet hian a fapa Orhan-a chu a melh a, "I nupui i hmangaihna avangin dawi thalo tak i hmang a, ka thih phah ta a nih hi. Ka fapa, nang hian min that a ni." a rawn ti ta chhur chhur mai. Chuveleh thing tum lian em em hi a rawn tla thut a, Hatice-i awmna bawm chu a rawn delh bung ta rum rum mai a.

Orhan-a chu a harh zawk mai a, a thuchhuak hlawl mai. "Min ngaidam rawh, min ngaidam rawh.." tiin a phun mawlh mawlh a. A tho chhuak a, pindan pakhatah ava lut a. Bawm lianpui mai hi a lo inhung a, a bulah chuan bati pakhat a inchhi bawk. Bawm hmaah tak chuan ava thingthi a, "Ka inchhir takzet, ka tisual a ni." tiin aphun mawlh mawlh mai.

*****************

Burhan-a te chhungkua chuan zanriah an kil ho mek a, midangin tui ti taka chaw an ei mawlh mawlh lai chuan an fanu Efsun-i erawh chuan ei mang lo hian a chaw chu a thai kual a thai lual ringawt mai a. Chhungkaw pa ber (Efsun-i pu) chu a tho thut a, "Tui deuh khan ei an che u." tiin kalsawn a tum a.

Efsun-i naute pahnih, phir unau Damla-i leh Yagmur-i te chuan Burhan-a chu an lo en hu mai a. Damla-i zawk chuan, "Apu, kan lo kal ve thei angem?" tiin a han zawt a. "Ka la inpeih rih lo, naktukah inlo kal dawnnia." tiin Burhan-a chuan a lo chhang a. Yagmur-i leh Damla-i te unau chu an inhrilh ru a, an nui dun har har a. Canan-i, Efsun-i ni(aunt) chuan, "Enge in inhrilh ruk a?" nui chung chuan a han ti a. "Engmah kan sawi lo." tiin YAgmur-i chuan a lo chhang a.

Burhan-a chuan ama room dawhkanah chuan pawisa a chhiar mawlh mawlh a, a zawh hnu chuan a dah fel a. Banga a nupui boral ta thlalak chu a la thla a, a en vang vang a. A chul hliau hliau a, tichuan khum lam a pan pui a. A bulah chuan a nupui thlalak chu a dah a, a mutpui a. Burhan-a te chhungkua hi a nupui thi ta chhiar tel loh chuan 6 an ni a, amah Burhan-a, a fapa Yasar-a leh Yasar-a nupui Turkan-i, an fanu Efsun-i leh a naute pahnih, phir unau Damla-i leh Yagmur-i leh Efsun-i ni(aunt) Canan-i te an ni.

Efsun-i roomah chuan a nu Turkan-i chu bawnghnute no khat kengin ava lut a, "Ka fanu.." tiin Efsun-i khuma lo thu tum bur mai chu ava pan a. BAwnghnute pek pah chuan, "Kha le, in rawh le." a han ti a. Zawite hian Efsun-i chuan, "Nu...ka damlo em ni?" a ti sap a. "Dam e, tinge min zawh a?" tiin anu chuan a lo zawt let a.

"Nizanah mumang thalo deuh ka nei a." Efsun-i chuan a lo ti a. "Enge i hmuh a?" tiin a zawt leh a. "Nangmah...nangmah hian ka naute pahnih hi i lo khaihlum a, chuan i unaunu i lo khai hlum tel bawk a. NANG ANG A NI LO, DUAT HLE ZAWK TUR I NI ASIN..tiin ilo au vak vak a." tiin a chhang ta mai a.

Turkan-i chu a nui suk a, "I mumang thalo mai mai a nih chu, i naute pahnih hi chu naupang mai an la nia..nangmah hian engkim i zirtir an angai alawm. An u i ni tih hre reng la, puitilng takin awm rawh aw." tiin a fanu chu a kuah a. Chiang tak hian Efsun-i chuan a nu chu a en a, "Ka hmangaih che, nu.." a ti zawi leh sap a. "Aww..ka fanu..keipawn ka hmangaih che lawm, bawnghnute hi a daih hma hian in tawh rawh." a ti a, Efsun-i chuan a in ta a.

*****************

In luah tawhloh tih hriat tak, hlui em em mai leh bal zet maiah chuan nu pakhat hi a lut a. Bur pakhat hi a keng a, bur chu puan dumin a tuam bawk a. In chhunga pindan pakhat ah chuan a luhpui a, a bur tuamna puan chu a phelh a. Lei a hai khuar vak a, tichuan bur chu a dah a. Lei chuan a vur leh a, in chu a chhuahsan leh nghal vat a.

*****************

Efsun-i mutui lai chu a harh zawk mai a, a meng kawk mai. A eu vak a, a ruh te chu a ri tuar tuar mai. Dinglam leh veilam a hawi tawn sek a, a taksa chu thununtu an awm a ni tih a chiang hle. Khum atang chuan a tla tawp mai a, tukverh lam ava en chuan a tukverh zawnah chuan ramhuai dum lian em em hi a lo dak kur mai.

Efsun-i chu a harh leh meuh chuan hmundangah a lo awm daih tawh, puk niawm takah hian amah chauhin a lo ding reng mai. A hawi kual a, hmun eng deuh bik lai chu a hmu fuh ta. A va pan hnai a, chutah a chhungte, anu leh pa, a ni, a naute pahnih leh a pu te chu dawhkan kilin an lo thu thap hlawm a, an lo melh rum em em mai lehnghal.

Chutah a hma zawnah tak chuan ramhuai palian tak chu a rawn lang leh thut a, a rawn insiam chhiat khum ta vak mai. Efsun-i hlau lutuk chu a t(r)e chel chul mai a, a mumang ram atang chuan a harh zawk mai. A awmna lai chu a enkual nghal vat a, ama roomah alo awm leh daih tawh. Khum bulah chuan a lo awm a, a thaw hlawi hlawi mai.

*****************

Efsun-i pa Yasar-a hi bungrua te leh chawhmeh eng ilo vel phur thin ho te phurh tur lo supply tu, lei hnuai lam a hna thawk a ni. A tuk zingah chuan Yasar-a chu a duty leh a, a thianpa Ismet-a nen an lo titi mek a. "Unaupa Ismet, he trial hi chu kum hnih chhung kalpui ani tawh. Ka pa leh ka pa nupui pahnihna hian ka pa ro chu an insem a ni. Mahse ka pa nupui thar hian avaiin a duh bawk si a, case a la file ngat ngat mai mawle." a han ti nuah nuah a.

"Enge a buaina chu ni reng reng a?" tiin Ismet-a chuan a lo zawt a. "A sawi dan chuan kum hei leh chen ka enkawl a, afapa pawh ala hmulo ania...te a tia, qaurter lek a chang hi chu a duhkhawp lo a ni ngei ang." tiin a chhang a. "Tha deuhin inremna siam pui mai la." Ismet-a chuan a lo ti sam leh et a.

"A duh teuhlo mai, hmeichhe luhlul tak a ni. Ka pa pasala a neih nachhan hi chu a sum duhvang bak a nilo, ka ten ania." Yasar-a chuan a han ti leh deuh bul bul a. Ismet-a chuan, "Engzat fakau nge i pa chuan ro a neih a?" tiin a zawt leh a. "Industrial zone ah acre 40 ram a nei a, inhmun 5-6 vel a nei bawk." tiin a chhang a.

"Umm..ka thiante ka lo bia anga, ka tih theih a awm em ka lo enchhin dawnnia." tiin Ismet-a chuan Yasar-a chu a hnem hram hram a, "Ka lawm e...Unaupa Ismet.." tiin an inchibai a, Ismet-a chu a kal ta a. Ismet-a kal hnu chuan Yasar-a chuan a phone a phawrh a, "Hello Chief, khawnge i awm...awle ka lo nghak ang che." tiin phone chu adah leh nghal a.

Chutah a sir atang chuan hmeichhe aw hian, "I pa ro ka chan ve i phal lo amaw..i duham khawp mai." tiin a rawn phun ser ser a. Thawm lo chhuahna lam ava en chuan hmeichhe pakhat hijab khum, amah hnungchhawn zawnga lo ding reng chu a hmu ta thut mai. "Ka pi.." tia a ko dek dek chu light a rawn thim thut a, leihnuai a ni bawk nen engkim chu a thim hian a thim vek mai.

A phone light chu a on a, chunu chu a lo la awm reng a. Kun reng chung chuan a kal phei nul nul a, "Ka pi...tunge i nih? Hetah enge i rawn tih?" tiin Yasar-a chuan a zawt a. "A ro zawng zawng kha ka ta vek tur a ni." tiin chunu chu a nui ta chiam chiam mai a. Chuveleh chunu zawnah tak chuan trolley pakhat, bawm hlira khat chu amah in a rawn innawr kal ta mai a.

Chunu lah chu a ding thut a, bang zawnah chuan dingin a kun reng a. Trolley chuan a rawn su dawn ta mai, "Nilo...ka pi..awmsawn rawh." tiin Yasar-a chu a au vak a. Trolley chuan chunu chu bang nen chuan a sut chilh a, a thal tawp mai. "Nilo..ka pi." tiin Yasar-a chu ava tlan phei nghal vat a.

Trolley chu a nawr sawn a, "Ka pi..i tha em?" tiin Yasar-a chuan a buaipui nghal a. Chunu hmai chu hijab chuan a lo inkhuh a, thisen a kai nuai mai bawk. Hijab chu Yasar-a chuan a han la sawn a, chutah chunu chu a lo meng kur mai. A hmaiah chuan thisen a khat vek bawk, "I nupui vangin i danu hi ka tibuai mek a ni." a rawn ti ta chhur chhur mai a.

A sir atang chuan hmeichhe naupang aw hian, "APA.." a rawn ti thut mai a, rang takin a hawilet a. A fanu Efsun-i chu hmai dang vek leh mit sen rum mai hian a lo then thu mai a, a ha lah chu a dum vek lehnghal. Yasar-a hlau lutuk chu chet pawh a che thei lo, a khur nghal char char ringawt mai.

Motor a rawn tlan a, a chhung atang chuan Yasar-a boss, an chief chu a rawn chhuk a. "Enge i tih a, Yasar?" tiin a rawn zawt nghal a. Yasar-a chu a harh zawk a, abul vel a han enkual chu tumah an lo awm tawh lo. Hrilhhai tak chuan, "Eng..engmah a nilo." tiin a thaw hlawp hlawp a, a ngaih a thalo takzet.

*****************

Zan a lo thleng leh ta, Efsun-i ni Canan-i chu khumah thuin thlalak pakhat hi a en vung vung a, a laiah tak chuan a han thlep vel a. Chutih lai chuan a khum mawng zawna a wardrobe, naute lem a dahkhawmna atang chuan, "Hetah lo kal teh, bawihte." ti ri niawm tak chu a hre tlat mai. Nula uaih tawh e tilo chuan Canan-i hian naute lem ala lawm hle a, naute lem dahna bik wardrobe a nei hial a ni.

Wardrobe lam chu ava pan a, a han hawng a. Engmah thil danglam a hmu lo, naute lem te chu an lo inrem fel thlap mai. A hnuai bera kawr hring(green) pakhat chu a la chhuak a, a khar leh nghal mai a. Chutih lai chuan Efsun-i nu Turkan-i pawh an room darthlalang hmaah thuin a sam a khuih mial mial a, "Ismet-a nen chuan in inbe ta em?" tiin a pasal chu a zawt a.

Mahse Yasar-a chuan a chhang lo, a melh ngai melh reng chuan a thu ngawi reng ringawt. "Yasar?" tiin Turkan-i chuan a han ko nawn leh a. "Aw enge ni ta?" tiin Yasar-a chu a phu deuh zuk mai. A bulah chuan Turkan-i chu ava thu a, "I tha maw, duhtak?" tiin a zawt a. "Ka tha e, ka chau deuh mawle." tiin a lo chhang a.

"Ismet-a nen chuan in inbe ta em?" tiin a zawt nawn leh a. "Aw bia e, lawyer min biak sak dawn a ni awm e." tiin a lo chhang a. "Engkim a fel leh vek ka beisei." Turkan-i chuan a han ti zawi sap a. "Naupangte enge an an?" tia Yasar-a'n a han zawh chuan a nupui chuan, "An tha e, i lo haw tlai dawn si a, ka ti mut hma tir ta anih kha." tiin a lo chhang a. "Anih Efsun-i a tha em?" tiin a zawt leh a. "Umm..vawiin chu a zia deuh e." tiin a lo chhang a.

*****************

Zanlai a ni a, Burhan-a (Efsun-i pu) chu tui takin a muhil bawrh bawrh mai a. Chutah a bula a nupui boral ta thlalak a mutpui chu a rawn che hrut a, khum bula thutthleng buk thei pawh chu thu an awm niawm tak hian a rawn che vak vak a. Chutah a nupui thi ta aw(voice) ngei mai chuan ring zet leh vin zet hian, "Burhan, tho rawh." a rawn ti vak mai.

Burhan-a chu a harh zawk mai a, a khum bula thutthleng lah chu a che luih luih bawk a. A tho thut a, a room dawhkan lam pan chuan a kalphei a. Blade tam tak a la a, tichuan blade chu a laia a ti bung a. Sahbawn tlang pakhat hi a la bawk a, chutah chuan blade them te chu a phun bur fer fur hlawm bawk a.

Chutah le, sahbawn-a blade them bur fer fur mai te chu a en vung vung a. Na tak hian sahbawn chu a beng thuai mai a, a kutphah chu a thi zawih zawih mai. Na a ti lutuk chu a then chawk chawk a, a hmai pawh a sen vek. A kut phah chu ahan en leh a, thisen a lo chhuak zawih zawih mai a.

**************

Thawm a hriat avang chuan Turkan-i chu a tho chhuak a, a fanu te pahnih, phir unau Yagmur-i leh Damla-i te room lam chu ava pan a. A hlauh ang ngei ngeiin an lo awm lo, "Yagmur..Damla..khawnge in awm?" tiin a au nghal chel chul mai a. Inhnuai lam a pan a, chokaah chuan apa (Burhan-a) a lo awm reng mai.

"Ka pa..khawnge Yagmur-i te hi khawnge an awm a? Ilo hmu mial em?" tiin a zawt nghal vat a. Burhan-a chuan zawi sap hian, "Bengchheng suh, pawnah an infiam mek." a lo ti ta mai. Vin zet hian Turkan-i chuan, "I mawl em ni? Tinge i lo chhuah tir..tun ang hunah." a ti hrep a, pawnah chuan a chhuak ve nghal a.

A zawng kual vak vak a, mahse a hmu zo der mai silo. Chutah an kudam atang chuan thawm a hre leh ta tlat mai, kudam chhungah chuan a lut a. Yagmur-i zawk chu sazupui hmaikawr vuahin a lo nui har har a, Turkan-i chuan mak a ti hle mai. "Yagmur, khawnge Damla-i?" tiin a zawt a.

Yagmur-i chuan a chhang lo, nui har har chung chuan ahma zawn chu a kawk ringawt a. Efsun-i leh Dama-i lo inzui hnek hnek chu a hmu ta mai a. Light bulb eng nep tak lah chu a phe zuai zuai a, a ngaih a thalo takzet. Damla-i lah chuan nuam a tih hmel em em lehnghal, an unau chuan an nui dur har har mai a.

Muang chang chuan ava pan hnai a, "Bawihte..enge hetah in tih?" tiin khur dar dar chung chuan a pan hnai zel a. Chutah a hma zawnah chuan Efsun-i a lo lang thut mai, anu hrakah chuan rekin a au ta vak vak mai a. A mumang ram atang chuan Turkan-i chu a harh zawk mai a, a thu chhuak hlawl mai.

A tho vat a, a fate pahnih Damla-i leh Yagmur-i te room lam chu ava pan nghal a. An unau chuan tui takin an lo muhil bawrh bawrh a, a thaw huai mai. A fanu upa ber Efsun-i room lam chu ava pan leh a, kawngka a hawng chu Efsun-i chu a lo la meng reng a. Efsun-i'n anu ahmu chu a ding nghal vat a, "Bawihte, ila mu nange?" tiin Turkan-i chuan a zawt a. "Nu, ka awm a nuamlo lutuk." tih ringawt hian a lo chhang a.

***************

Orhan-a chuan Hodja pakhat ava pan a, a harsatna te chu ava thlen a. "Mihring hi sual sa a piang vek kan ni a, tumah sualna neilo kan awm lo. Nausen atanga puitling thlengin, sualna nei vek kan ni. Evi leh Adama thlah te vek kan ni a, anmahni vangin sualna chu kan pianpui vek a ni. Prophet pakhat chuan heti hian a sawi a, MI TUPAWH A THIL ATCHILH LEH DUH TE CHU NEI MAHSE, RANGKACHAK HLANG HLIR MAKTADUAI PAWH NEI MAHSE, ADANG A DUH BELH ZEL THO ANG..a ti a ni. Mihring duhamna chu leilung chauhvin a timit thei, khawthlang lama ni a chhuah hma ngeia an sual simte chu Pathianin a ngaidam thin." Hodja chuan a han ti charh charh mai a.

Orhan-a pawh chuan a lu a lo bu nghat nghat a, Hodja bawk chuan, "I thil duh te, i thil it zawngte avangin thil sual i ti a, mahse i inchhir a. I sualna te i pawm a, tunah chuan i thil tihsual te thungrulh nan midang i pui thin bawk. Mahse khawvel danga mi thlarau sualte iva hmelhriat kha..kha khawvela cheng ramhuaite kha i ngaih ang ngawt an nilo. Nang chuan i va hmu a, iva be thei ringawt a. Mahse an mizia leh an thiltihtheih zia engmah i hre chiang tak tak lo, i hriat chian hunah meuh chuan hlauhna avangin i rilru a buai hial thei ang. I va hmuh a, iva biaktheih avang ringawt khan an mahni kha eng ang ramhuai nge, eng ang thlarau sual nge an nih tih va ngaihruat ngawt chi an nilo. Tikhawp hian an tibuai che a, awlsam taka hneh theih chu inring hauh suh ang che. Tuichhunchhuah thuk tak leh thim tak mai chu i en rei poh leh thim zing atang chuan chu tuichhunchhuah chuan a rawn en let ve ang che. Tin, chu tuichhunchhuah ah chuan li luh ngai ta se, thim chuan a tuam ang che. Chutiang chiah chuan an Lalram chu a thimin a rapthlak em em a, i rinphak bak a ni ngei ang. Kha ramhuaite fanu, i nupui anga he khawvela i hruai luh kha maw, kha ramhuai phei kha chu a hlauhawm ber te zinga mi a ni. An thil tihtheihna an hman nasat poh leh i chak lo tual tual thung ang, ka fapa. Ngun takin ngaithla rawh, i la naupang a, ila chak tha a, i fing em em bawk. Mahse i thiltihtheihna hi a hmanna tur leh a hun leh hmun i hrelo a nih chuan, i thi vat mai ang. Anni ang ramhuaite saw chu e, scholar tam tak pawhin an hmachhawn tawh a, atphah te pawh an awm hial asin. An hmel pangngai tak tak hmu thei chin phei chu mi tlemte chauh an ni, chung zinga a tam zawk chu mi a ah an chhuak bawk." tiin a han hrilh fiah leh a.

Orhan-a chuan mak a tiin a hlau rilru angreng kher mai, "Kan lo ngaihdan chuan he i thiamna hi Pathian thilpek, vanneihna angah kan lo ngai a. Mahse thilpek a ni hauh lo, anchhia zawk a ni. Fimkhur ang che, mihringte thisen zamah hian heng ramhuai hote hi an awm thei ania." Hodja bawk chuan a ti leh a, Orhan-a pawh chu a haw ve ta a.

******************

A tuk zingah chuan Turkan-i chuan rawng a bawl mawlh mawlh a, chutih lai chuan afa te pahnih, Yagmur-i leh Damla-i te chu an lo kal a. "Anu, apu in cheng 50 ve ve min pe a." tiin intithei takin pawisa chu an rawn hmuh a. Nui chung hian, "Aw animaw..lawmthu te in hrilh em?" a lo ti a. Yagmur-i zawk chuan, "Aw hrilh e...mahse au Efsun-i chu cheng 100 a pe bik dawnniang, a dawhkanah cheng 100 tlang kan hmu." a ti a.

Efsun-i chu Burhan-a roomah chuan ava kal a, Burhan-a chuan a kut phah hliam chu a lo tuam bur mai a. "Lo thu rawh, Bawihte." tiin Burhan-a chuan a hma zawn takah chuan a thuttir a. Cheng 100 tlang chu pek pahin, "Kha hei hi ka pe ang che." a ti a. Lawm takin Efsun-i chuan lo dawngin, "Ka lawm e, apu." a lo ti a.

Apu kutphah a hliam chu Efsun-i chuan a han en vang vang a, "Apu, i kut hi i zai em ni?" tiin a zawt a. "Zai love, ana deuh a, ka tuam mai mai a nih hi." tiin a lo chhang a. "Api kha la thi lo se ka ti ngawt mai..ka ngainat tehlul nen. Apu, tinge i kut kha i zai a? Ka hmu reng che alawm, sahbawn tlangah blade them i vit bur teuh a, tichuan i kutphahin i beng vak anih kha, ka hmu vek che alawm." a ti leh ta mai a.

Burhan-a chu a hrilhhai hle mai, chhan pawh a chhang lo. Efsun-i bawk chuan, "Ka la hre reng asin, pu...Api khan a haw em em che a, i khabe hmul i ziah apiangin sahbawnah hmul i ti kai teuh zel a, a sawisel vak vak thin che kha. I hre tawhlo em ni, pu? I la hria tiraw?" a han ti leh a, Burhan-a chuan a chhang lo.

Efsun-i chuan a sawi zawm zel a, "Ihmaw...nizanah thil mak tak mai ka hmu a. Nang, anu leh apa, ani..ka naute pahnih..invaiin ka mumangah inlo thi vek a." a han ti leh a. Chutah dawhkana Burhan-a bengdar atang chuan a nupui (Efsun-i pi) thi tawh aw ngei mai chuan, "Sahbawnah i khabehmul i ti kai leh teuh tawh ania, Burhan." tiin a rawn vin ta hrep mai.

Burhan-a chu a phu zuk a, a thaw nghal hlawih hlawih mai. A damdawi bur chu a la a, a han hawng a. Mahse a kut hliam avang chuan a vuan nghet theilo, chhuatah chuan a thlauh darh vek mai a. A tho a, dawnkan hnuaia a damdawi tla te chu a chhar a. Dawhkan hnuaiah chuan Efsun-i chu a rawn bawkvak lut ve a, "Pu..ka taksa chhungah hian engemawni a awm a ni. Zawite te in, zawi te te in min hrilh ru thin a ni." a ti zawi sap a.

Chutah Efsun-i chu a rawn hawichhuak a, a bulah chuan a pi (Burhan-a nupui) chu a rawn lang thut a. An pitu chuan an hmel chu a dang vek a, "Thil tha lo tak tak min tih tir a tum thin a ni." a ti leh chhur chhur mai a. Burhan-a hlau lutuk chu a meng phar awn awn a, a tawlhhnung dawr mai.

Chuveleh Efsun-i chu a tho vat a, "Pu..i tha em?" tiin a banah a va vuan a, a hmel chu a lo pangngai leh vek tawh. A kai tho a, thutthleng buk thei ah chuan a thut tir a. Chiang tak hian apu mitah chuan enin, "I tha...i tha e...hlau suh. A rei lovang, api chu a lo kal thuai ang." tiin a nuih vur vur a, a chhuahsan ta a.

**************

Turkan-i chuan a chawhmeh chhuan mek chu a chawk mawlh mawlh a, mak tak maiin blade them a hmu tlat mai. Blade them chu a han suak chhuak a, mahse pakhat chauh a nilo. Blade them chu engemaw zat a lo awm a, a suak chhuak zel a. Mak ti tak chuan chung blade them te chu dawhkanah chuan a dah a, a en vung vung lai chuan a kut chu tuemawni hian a rawn vuan thut mai.

A hma zawn takah chuan apa, Burhan-a chu a lo ding run mai a, a thinrim hmel em em lehnghal. Turkan-i phu nasa lutuk chu a au vak a, a kat dawr mai. Mahse Burhan-a chu hmuh tur a awm leh tawh lo, a lo bo leh daih tawh. A thaw hlawp hlawp a, a lu a dawm vawng vawng ringawt a. Dawhkan a han en leh chu mak a ti kher mai, blade them te pawh kha a lo bo vek tawh.

***************

Yasar-a pawh a hnathawhna lamah chuan a duty leh mek a, a hmun a thim reih ruih bawk a, an tawng te pawh a khawk rum rum thin a ni. Chutia ngaihtha taka a duty lai chuan hmeichhe tap ri a hre leh ta tlat mai, thawm lo chhuahna lam chu ava pan vat a. Chumi hmuna hnathawk ve tho, nu ho chuan chawhmeh supply tur te chu an lo rem fel mawlh mawlh a.

Mahse hmeichhe pakhat erawh chu bang lam hawiin a lo kun reng bik a, lungchhe em em hian a tap hawm hawm bawk a. "Tinge henu hi a tah a?" tiin Yasar-a chuan nu ho te chu a zawt a, mahse tumah chuan an chhang lo. Yasar-a chuan chunu darah chuan ava vuan a, chutah a rawn hawi thut mai.

A nupui Turkan-i nau Canan-i a lo ni a, a hmai te chu a lo dang var pup a, a mit a lo eng vek bawk. Chutah tap chung hian, "Naute ka nei ve thei dawnlo, U Turkan-i angin naute ka nei ve thei dawnlo. Nang mah anga tha pasal ka nei ve thei dawnlo a nih hi, ka u Turkan-i hi thi se, kan pahnih hian innei mai ang hmiang." a rawn ti ta chhur chhur mai.

Yasar-a hlau lutuk chu a thal tawp mai a, Canan-i chu a zu kun hniam a. A kawr awma tham pah chuan, "Ka pindan ah i thlalak pawh ka kawl teuh, zantin i thlalak hi ka en thin. Ka ta ni turin ka duh che, Yasar. Naute ka nei ve thei dawnlo, ka thei dawnlo." tiin a vin vak vak mai a. Chutah nu ho chu an rawn kal khawm a, an hmel lah chu a rapawm hlawm em em mai lehnghal.

Nu ho zinga pakhat chuan zawi sap hian, "Nau a nei ve thei dawnlo, ramhuaiten a chhul an laksak a ni." a rawn ti thum bul bul mai bawk a. Chutah le, Canan-i chu a uak vak vak a, a ka chhung atang chuan thisen hlir hi a rawn luak chhuak a, Yasar-a hmai chu thisenin a luah khum ta vak mai. Yasar-a chu a harh zawk mai a, a thianpa in tuiin a hmaiah a lo theh hi a lo ni a. "Yasar, i tha em?" tiin a thianpa chuan a lo sawi vak vak a, a bulah chuan nuho chuan an lo en thup bawk a.

*******************

Turkan-i nau Canan-i (Efsun-i ni) hi nurse a ni a, an veng damdawiinah a thawk mek a ni. Canan-i damlo enkawl mek lai pitar chu a buai deuh an tih avang chuan Canan-i chu nurse dangte chuan an ko a, Canan-i chu ava lut a. Oxygen lo vuah mek pitar chu a lo meng phili buai nasa mai, "Ka pi, engti zia nge?" tiin ava zawt a.

Pitar chu a tawng hleithei bawk silo, a ke lam chu a melh a melh ringawt a. "I ke a na leh tawh em ni?" tih pah chuan pitar puan sin lai chu a han keu a, pitar ke pahnih pan chu a lo pun nasa in a lo hnai nasa mai a. Bandage-a an tuamna te chu a lo inphelh remrum mai a, "Tinge bandage hi ilo phelh a? Adang ka va la leh lawk ange." tiin kalsan mai a han tum a.

Lehlam a hawi chiah chu a damlo enkawl lai pitar chu a hnungah chuan a lo ding run mai, oxygen a lo vuah bawk a, a mit a sen vek lehnghal. Canan-i hlau lutuk chu a au vak a, a thu hnawk mai. Pitar khuma mu mek lah chuan azawna khum ruak chu a kawk a, Canan-i chuan ava en a.

Khum ah chuan a u Turkan-i chu hmai dang vek leh mit sen vek hian a lo thu meng kuau mai a, a malchungah chuan thisen kai nuaiin a fate pahnih Yagmur-i leh Damla-i te an lo awm bawk a, Turkan-i chuan chemte a keng bawk. "Ka..ka u.." tiin Canan-i chu a meng phar awn awn mai a. Chutah Turkan-i chu rawn tawngchhuakin, "Canan, thil thalo tak ka ti a ni." a rawn ti chhur chhur mai.

Canan-i chuan a mit a hup a, a tap zawih zawih mai. Nurse pakhat a lo lut a, Canan-i lo tap zawih zawih mai a hmuh chuan mak a ti hle a. "Canan, enge awmzia? Tinge i tah a?" tiin a va zawt a, mahse Canan-i chuan a chhang lo. Room chu a enkual a, pitar damlo tih loh chu midang tumah an lo awm tawh lo.

********************

"Ka thil tawn ang hi midangin tawng zawk ta se, min hrilh ta se ka awih sak duh ka ringlo a ni, Omer. Ka thi dawn amaw ka ti hman hial a, ka thaw a chham nasa hman lutuk ringawt." tiin Yasar-a chuan a thianpa leh a thawhpuipa nibawk, Omer-a chu a thil tawn te chu a hrilh mawlh mawlh a.

"Engtin nge a thlen theih reng reng a?" tiin Omer-a chuan a zawt a. "Ka hre chiang tawhlo, nu ho khan engemaw tal an sawi em?" tiin a han zawt let a. "An sawi dan chuan an bulah i va kal a, bang i kawk a, HENU HI TINGE A TAH A..i ti ringawt a, chuan i tlu zui nghal an ti. Enteh thianpa, doctor i hmuh ngei angaiin ka hria." Omer-a chuan a han ti a. "A ho lutuk, a thleng leh tawh lovang. Insha Allah..Insha Allah.." tiin Yasar-a chuan a chhang a.

*******************

Zan a lo thleng leh ta a, Turkan-i chuan a pa kut hliam chu ensakin, "Ka pa, engtin nge i tihnat theih zawk a? Damdawi hnawih ila, tuam ang aw.." a han ti a. Mahse Burhan-a chuan, "Angai lo, a na lo emai hetiang.." tiin a duh tlat lo. Turkan-i pawh chuan ngawi rengin a pa room chu a chhuahsan ve leh ta mai a.

Yagmur-i, Damla-i leh Efsun-i te unau thum chu chhuatah an thu hova, clay hmang chuan Yagmur-i te phir unau chuan milem an siam dun mawlh mawlh a. An unau chuan, "Ka thil siam hi a nalh zawk, nang chu a nalh lo." tiin an inhnial dun nasa mai a. Efsun-i erawh chuan ngawi rengin a naute pahnih inhnial chu a en a, a mitmeng chu a fiah lo tual tual lehnghal.

A naute tawng ri chu a hre ruai ruai a, "Au Efsun-i chu a damlo a, kan infiam pui ve thei lo." tia an sawi te chu a mang hriat deuh ruai a. "Au Efsun-i chu a damlo nasa lutuk, hetiang siam pawh hi a thiam velo." tiin an unau chuan an titi melh melh a. Chutah an unau chuan, "Ka ngeina lo, au Efsun-i hi ka ngaina hlawl lo." an tih ri te chu a hre ta. Chutah an unau chuan an rawn hawi phei a, "Au Efsun, tuzawkin nge siam thiam zawk?" tiin Damla-i zawk chuan a rawn zawt thut mai a. Efsun-i pawh chu a harh zawk mai, "Aaa..ih..in thiam ve ve, a nalh ve ve." a han ti bah deuh nuai a.

*******************

Pawn lama hmeichhe tap ri niawm tak a hriat avang chuan Turkan-i chu a va chhuak a, an in kawt thutthleng a a nau Canan-i lo tap zawih zawih mai chu ava hmu a. A bulah chuan va thu in, "Canan, i tha maw?" a va ti a. Tap chung hian, "Aih, ka tha lo." tiin a lo chhang a. "Tinge? Enge i chungah thleng a?" tiin a zawt leh a.

"Thil mak tak tak ka hmu a ni, ka u." tiin a tap zawih zawih mai. "Engthil nge i hmuh a?" Turkan-i chuan a han zawt leh a. "Mi a ang maiin i awm a, Damla-i leh Yagmur-i te unau i that a ni." a ti ta mai a. Hrethiamlo tak chuan, "Enge awmzia?" a ti hu mai. "Ka bulah i lo kal a, i kutah te chuan thisen a kai a. Chemte i keng bawk a, thil thalo tak i tih thu min hrilh bawk." a han ti leh a.

Turkan-i chu a tum ta hmuk mai, "A tawk e, sawi tawh suh." a ti deuh hmak a. "I that a ni..ka u." Canan-i chuan a ti leh vak vak a. "A tawk, sawi tawh suh." tiin a Turkan-i chuan a vin lek lek mai. "Kan damdawiinah ilo kal a, thisen a kawi nei nuai bawk a..ka hlau a ni, ka hmu chiang che a ni." tiin Canan-i chuan a hrilh leh a.

Chutah vin zet hian, "Canan, sawi tawh suh...a tawk ka tih chu." a ti ta hrep mai. Damla-i leh Yagmur-i te unau an lo kal a, "Nu, tunge i biak a?" an rawn ti a. Rang takin Turkan-i chu a va hawi phei vat a, a bul a han en leh chu tumah an lo awm lo. Chutah Damla-i zawk chuan gate lam ava melh a, "Ani(aunt) a lo haw e." a ti ta mai a.

Turkan-i chuan gate lam chu ava melh leh vat a, a nau Canan-i chu a rawn lut ta mai. A hma lawk kha chuan a bulah thuin an inbe reng kha a ni si a, mahse tuna a lo haw chiah a hmuh chuan Turkan-i chu a hawi a vek mai a, mak a ti takzet. Canan-i lah chuan a u chu rawn melhin a lungawiloh hmel em em lehnghal a, be miah lo chuan inchhung lamah chuan a luhsan ta daih a.

*********************

A nupui thlalak chu enin Burhan-a chu a thu ngawi reng a, dawhkana bengdar atang chuan a nupui aw ngei mai chuan, "Vuah rawh Burhan, hlau suh.." a rawn ti leh ta chher chher mai. Burhan-a chuan hlau chung chung chuan a vuah a, chutah dawhkanah chuan bawm pakhat hi a rawn tla ri bur mai a, a phu chiang kher mai.

A bengdar vuah lai atang chuan a nupui aw bawk chuan, "Bawm chhunga mi kha la rawh." a rawn ti leh a. Bawm chhungah chuan chahbi pakhat hi alo awm a, a han la kang a. Chutah a bengdar vuah lai atang bawk chuan, "Lo kal rawh....ka bulah lo kal rawh." a rawn ti leh chhur chhur mai a, Burhan-a chuan a hlau takzet.

A pindan lam ava pan a, khumah chuan a nupui boral tawh ngei mai kha a lo mu reng mai a nih chu. A lo khur hlawk hlawk mai a, a kut chu rawn phar kangin, "TV kha on rawh." a rawn ti leh a. Hlau tak chung chuan Burhan-a chuan TV chu a on a, mahse a var pup ringawt. A nupui lam chu muang changin ava pan a, a hmel a han en chu rapawm tak a ni.

A vun chu a chuar em em a, a dang var pup mai. A ka atang chuan thisen a rawn chhuak bawk a, a sam a thur vek bawk. TV screen ah chuan a nupui hmel chu a rawn lang a, mahse a lang chiang lo. Chutah Burhan-a chu a mitmeng bial var pup mai chuan a melh khur a, "Min thah i tum a ni, ka damloh avangin min reh hlum law law kha i tum a ni tiraw..mahse i thei silo. Thla li chhung tehmeuh min thah mai hlauvin natna khumah ka mu a, ka tuar tlawk tlawk asin. Kha hlauhna nasa tak avang khan ka thi a nim Burhan." a ti khur khur mai a.

Burhan-a chuan a hlau kher mai, a tap pur tawh mai a. Chutah a nupui bawk chuan, "Ka puan sin lai kha han hlim teh.." a ti leh a. Burhan-a chuan a nupui puan sin lai chu a hlim a, chutah le..a nupui ke pahnih inkarah chuan a nupui tho chu a rawn meng var leh ta pup mai, a luah chuan sarang hi a rawn in tuam bawk a, a hmai a khuh vek a. "I hmu em, Burhan?" a rawn ti t(r)ial ta ruai ruai mai a, mahse thawkleh khatah TV chu a in off thut a, a nupui pawh chu a bo daih.

***********************

Efsun-i muhil lai chu aharh zawk a, a chungah chuan ramhuai lian em em mai hi a lo bawk run mai. A hlau lutuk chu au vak vak a, a maimitchhing tawp. A han meng leh chu thlanmual ah a lo awm daih mai, a ke bul lawkah chuan a chhungte chu an lo mu tlar dial mai a. Nunna an nei tawhlo tih hriat tak hian an dang var pup mai bawk a, mak a tiin ahlau kher mai.

Chutah ramhuai lukawlh tam em em mai hi thlan lung kar atang chuan an rawn vak chhuak sup sup a, Efsun-i chhungte ruang mu tlar dial mai awmna lamah chuan an rawn bawkvak phei a. Efsun-i mangang leh hlau bawk si chu a au vak vak a, chutah a harh leh hlawl mai a. A khumah chuan a lo awm leh reng tawh a, inchung lam a han hawi chu kha ramhuai palian bawk khan a lo bih leh kur mai.

A hlau lutuk chu a puan sin lai chuan a in lukhup a, muangchang chuan a han dak leh a. Chutah inchung ceiling ah chuan amah Efsun-i chu a lo thu kur mai, a bulah chuan ramhuai palian bawk kha a lo awm ve bawk a. A en zui ngam tawh lo, a inlukhup leh nghal vat a. Mahse engmah chu a thlen chhunzawm tawh lo, ramhuai pawh chu a bo veleh mai a.

********************

A tawngtaina tlang ah chuan Orhan-a chu amah chauh chuan a thu a, a hmaah chuan bulb eng panga chhi bialin a laiah chuan symbol mak tak mai a awm bawk a. "Min kalsan rawh, thlamuanna ka hmuh theih nan...min hriatthiam tum rawh, thil thleng zawng zawng te pawh i hria e. Rem kan insiam theih nan kawng i hawn a ngai a ni, min kalsan hram rawh, min fiam kual tawh suh." tiin a phun mawlh mawlh a.

Symbol bial chu a han tuai vir ta pup pup a, chutia a vir pup pup lai chuan a mitthlaah a nupui boral ta Kader-i hmel a rawn lang chuai chuai mai a. "Ka tan hian i hlu takzet, min kalsan miah suh aw, Orhan." a tih laite, Kader-i u Sedat-a'n a dawi hman a lo tihchhiat sak lai te leh a nu leh pa ruang te chu a mitthlaah an lo lang zung zung mai.

Chu symbol vir chu a vir tawp a, a han hawichhuak chu a hma zawnah chuan amah hringtu nu ngei mai, HAtice-i chu a lo thu khur mai. Orhan-a chu a phu zawk mai a, "Min kalsan rawh, ka thil tihsual te kha ka hria e, ka inchhir takzet. Min kalsan rawh, mi thar ka ni tawh." tiin a tho a, inchhung lamah chuan a lut ta daih a.

*********************

A tuk zingah chuan Damla-i leh Yagmur-i te unau chu an pindan ah chuan an titi dun melh melh a, "Nizan ka mumangah kan inkawtah hian tuichhunchhuah lian deuh hi a lo awm a, a chhungah chuan Au Efsun-i a lo awm a, min lo ko dun vak vak a." Damla-i zawk chuan a han ti nuah nuah a.

"Keipawn chutiang chiah chuan ka hmu ve asin, ka zuang lut hman tep a." Yagmur-i pawh chuan a lo ti ve bawk a. Chutih lai chuan Efsun-i a rawn lut a, "Au Efsun, kan unau hian mumang inang kan nei a. Tuichhunchhuah chhungah ilo awm a, kan unau hian milo au vak vak a." tiin Yagmur-i chuan a lo hrilh nghal a.

An bulah chuan Efsun-i chu ava thu a, "Anih leh inlo lut ngei ang tiraw?" tiin a han zawt a. "Tehreng mai." tiin an lo chhang a. "Min kalsan lovang tiraw?" tiin a han zawt leh a. Damla-i chuan, "Kan kalsan ngai lovang che, Au Efsun." tiin a lo chhang veleh a. Efsun-i chu a han nui suk a, tichuan a chhuahsan veleh mai a.

*******************

Turkan-i chuan an inkawt ah chuan puan a zar mawlh mawlh a, chutih lai tak chuan a lu a rawn hai thut mai. A khaw hmuh te chu a fiahlo tual tual a, a thal ta tawp mai a. A sir lam ava melh chuan a fanu Efsun-i leh amah (Turkan-i tho) lo thudun chu a hmu a. "Nu, ani Canan-i hi i hmangaih em?" tiin Efsun-i chuan a lo zawt a.

"Umm..ka hmangaih lutuk." tiin anu chuan a chhang a. "A thuruk ka hria a ni." a ti ta mai a, "Eng thuruk maw?" tiin anu chuan a lo zawt vat a. Efsun-i chu chauh hmel em em hian a chhing diar diar a, "Nau a pai thei dawn lo, naute a nei ve thei dawnlo. Anihna takah chuan, ka ni Canan-i hian min hmangaih takzet a ni." a han ti zawi sap a.

"Ni e, a hmangaih lutuk che alawm." tiin anu chuan a lo chhang leh a. "Nu, i la hria em, thil min zawh kha..min hrilh a.." Efsun-i chuan a ti bah deuh nuai mai a. "Engthil maw ka zawh che a?" tiin anu chuan a lo zawt a. Anu beng bulah chuan chiang fekfawk hian, "Hmahruai rawh....i tih kha i hre tawh lo maw?" a han ti leh a.

"Chutiang ka hrelo." tiin ngaihthat loh hmel tak hian a nu chuan alo chhang a. "Nu, ani Canan-i chuan maw, a hmangaih loh thu che a sawi a, keimah nilovin...nu..nu, anu.." tiin a ko a, a sawi vak vak a. Chutah ama lam a rawn hawi a, "Nu...harh rawh..anu.." tiin a au vak vak a. Turkan-i chu a harh chiang ta, a fanu Efsun-i chu a bulah lo awmin a lo sawi vak vak mai a. "I tha em?" tiin Efsun-i chuan a zawt a, "AW..aw ka tha e, ka lu ahai deuh alawm mawle." tiin a chhang mai a.

*******************

"I tha maw, Canan? Enge i an?" tiin Canan-i thawhpuinu, nurse pakhat Aylin-i chuan Canan-i chu a zawt a. "Ka tha tawh e, Aylin. Enge ka chungah hian thleng ta pawh ka hre zozai tawh lo, ka a zo takngial dawnin ka hria." tiin Canan-i chuan a lo chhang a. "Chutin sawi mah ta che, keipawhin kha pitar damlo kha chu ka rap reuh tawp alawm. Ka tawngkam a mawilo a nih chuan PAthianin min ngaidam se, mahse kha pitar kha chu arapawm takzet a ni." Aylin-i chuan a lo ti a.

"Tumah hrilh suh aw, Aylin." tiin Canan-i chuan a ngen a, "Tehreng mai, chawlh la rawh aw..ni engemaw zat tal chawlh i mamawh, ka lo cover sak vek ang che." tiin Aylin-i nen chuan an inkalsan ta a. Lift ah chuan Canan-i chu a chuang a, a chhungah chuan wheel-chair ruak hi a lo awm a.

Chhuatah chuan thlalak hi a lo awm bawk a, a han la kang a. Thlalak a han en chu an chhungkaw thlalak, amah, Yasar-a, Turkan-i leh Efsun-i te thalak a lo ni reng mai. Chutah thlalak chu kut vawt thlur mai hian a rawn la thut a, a hma zawn a han en chiah chu a vahnu Efsun-i a lo ni reng mai.

A mit a eng pup a, a mai chu a ser nasa em em bawk. Canan-i chu aphu nasa kher mai, mahse lift kawngka a rawn inhawng a, staff dang pakhat a lo lut a. Efsun-i pawh chu a bo lehnghal daih, lift atang chuan hmanhmawh tak chuan a chhuak nghal vat a. A bula thutthlengah chuan thuin a lu a dawm vawng vawng a, a mangang kher mai.

********************

Burhan-a chu a khumah chuan thuin a inngaihtuah nasat hmel hle a, chutih lai chuan dawhkana a bengdar atang chuan a nupui aw bawk chu rawn tawng chhuak leh in, "Min thah i tum a ni, Burhan." a rawn ti leh ta chhur chhur mai. Chutih lai tak chuan Turkan-i a lo lut a, "Ka pa, chaw kan ei dawn." a rawn ti a.

*******************

Yasar-a pawh chu a duty na hmun thim reih ruih ah chuan hna athawk leh mek a, titi thawm a hre leh ta tlat mai. A va pan hnai a, "Thudik a hre chhuak tawh, he thil hi chu a thlen ka ring reng a ni. A rilru ahah bawk si, enge a tih theih chuan ang? A thik thu a chhia a ni tih a hrilh a, a nupui ka khawngaih ngawt mai. A hriatchhuah loh ngei ka beisei...a thiamloh pawh a ni hleinem." tia mi pahnih titi melh melh thawm chu a hre tlat mai.

A hawi kual vak vak a, tumah an awm der silo. "Pu Burhan-a hnenah a sawi vek a, Yasar-a pawhin thudik a hre tawh. Helai hmunah hian a that alawm, Yasar-a thlalak pawh a nupuia nau khan kawl teuh mai. A rilru a hah takzet, enge a tih theih awm chuang?" tia phun sep sep ri te chu a ri ring tulh tulh mai a.

BAwm ruak an dahkhawmna lamah chuan ava kal leh a, mahse tumah an awm chuang lo. Phun ri lah chu a ri ring tulh tulh mai bawk si, a hlau lutuk chu a thlan a tla zawih zawih mai a. Chutah bak(bats) an rawn thlawk sup sup a, Yasar-a chu a tawlh hnung vat a. A phu nasa lutuk chu a au vak vak a, bawm ruak an dahkhawm chu nek tlu rem rumin nikhawhrelovin a thal der mai.

*******************

Zan a lo thleng leh ta, Yasar-a chu chhun lama a thil tawn te avang chuan a rilru a nuam lo hle mai a. Pawnah chuan tei kualin meizial a zu a, chutih lai chuan Canan-i pawh a rawn haw a. Inbe miah lo chuan Canan-i chuan inchhungah a luhsan a, Yasar-a pawh chuan en pawh a en lemlo.

Turkan-i chuan thawmhnaw a nawh mawlh mawlh lai chuan a phone a rawn ri a, a thiannu Reyhan-i a lo ni. "Hello, Rehan..enge ni ta?" a han ti a. "Tukin zing khan tinge mawni, ka ngaihtuah riau che a. I tha em tih ka rawn zawt mai mai che, enge i an?" a rawn ti a. "A nih chu, ka tha vak lo, Reyhan.." tiin a chhang a.

"Enga ti nge, enge thleng a?" tiin Reyhan-i chuan a rawn zawt vat a. "Engvak mah chu thleng love..mahse, ngaihtuahna thalo tak ka nei a ni, ka hlauthawng a ni. Ka hrethiam biklo, thil engemaw tha lo tak a thleng ngei dawn hian ka hre tlat a ni." a han ti a. Chutih lai chuan a fanu Efsun-i chu a hnungah chuan a lo ding reng a, anu chu rum zet hian a melh khur mai a.

"Lungawilohna i nei em ni?" tiin a rawn zawt leh a. "Nei love, ka awm hi anuam thei thlawt lo a ni." tiin a chhang leh a. "I fate nen lo riak phei daih ula, i zia deuh maithei asin." tiin a rawn sawm a. "Nia, mahse ka pa hi ka chhuahsan thei lo a ni." tiin alo chhang leh a. Chu veleh Efsun-i chu ainher vut a, hmanhmawh hmel em em chuan a kalsawn ta daih a.

Efsun-i chu pawnah a chhuak a, an inhnuai basement lamah chuan a lut thla a. Chu basement hlui zet leh hnawk tak mai chhungah chuan Efsun-i chu a lut a, pindan hlui pakhat ah ava kal a. Lei chu a kut chuan a haikhuar vak a, chutah bur pakhat chu a hai chhuak ta. Chu bur chu a han enchiang a, chutah a mit a rawn eng bial ta pup mai.

Chu bur chu ahmaa kan sawi nu pakhatin a dah kha a ni a, chunu pasal chu a thi tawh a ni. Chu nu chenna inah chuan Efsun-i leh chunu pasal thi ta thlarau chu an va inlar a. Chunu hma zawnah chuan hnungchhawn zawngin an ding dun a, "I ro khawm tur hian i nupui hian dikna a neilo, mi duham tak a ni. Misual, i nupui hi misual tak a ni, rukru a nih hi. I thih chiah khan in fanu pawh thi ve turin a duh em em a, a chhan chu i ro zawng zawng a khawm duh vang a ni. Mahse a duh angin thil a kal ta silova, a tuar ve dawn a ni tih a hriat khan a inchhir leh si a. I thlarau a hmuh chang phei hi chuan hlauhna hlirin a khat thin, ti rawh le..i nupui bulah chuan va kal ang le." Efsun-i chuan a han ti thum bul bul mai a. Chunu hlau lutuk chu a thingthi a, a tap zawih zawih mai. Efsun-i leh a pasal thlarau te chu an rawn hawi let a, ama lam chu an rawn pan ta chhet chhet mai.

*****************

Canan-i muhil lai chu a harh zawk a, a thu chhuak a. A hma zawna nautelem a dahkhawmna wardrobe chu a che luih luih a, amahin a rawn inhawng thut mai. Nautelem te chu a rawn tla ta sup sup mai a, thisen an lo kai nuai lehnghal. Chutah naute lemte chu an rawn bawkvak a, "Canan, naute i nei ve thei dawn lo." tiin an rawn tawng chhuak ta mai a.

Canan-i hlau lutuk chu a t(r)e chel chul mai a, naute lem te chu khumah chuan an rawn vak chho a. Chutah hnau set sawt ah Efsun-i a lo lang thut mai, naute lem pakhat thi hnuang mai hi rawn lek kangin, "Enteh Ani Canan, hei naute i nei ania." tiin a rawn melh khur mai a. Canan-i chu a harh zawk a, a mumang vek a lo ni.

****************

"Hodja? Hodja...i awm em?" tiin chu nu pakhat, mangang em em mai chuan Hodja pakhat chenna in chu a kik vak vak a. "Hodja, kawngka hawng teh. Mut pawh ka mu theilo, an rawn inlar reng mai." tiin a ngen lawm lawm a. Mahse Hodja chuan, "Kal bo rawh, ka hrilh lawk che kha. Thil hlauhawm tak a ni ka tih kha, i duhthlanna a ni. Tih theih ka neilo, mi chungah dawih i hmanga anchhia i lawh a nih chuan i chungah pawh a let ve ang ka tih mawlh mawlh kha." tiin a lo hau hrep mai.

"Nilo Hodja, min tihthaih nasa lutuk, min chhan hram rawh." tiin tap chungin a ngen a. "I tihtheih awmchhun chu tawngtai a ni tawh mai, ka pui theilo che, kalbo rawh." a lo ti leh hrep mai a. Chunu chu a tap zawih zawih a, hreh tak chung chuan an in lam pan chuan muangchangin a haw ve leh ta a.

Chunu chuan a bur phumna lam basement hlui tawh tak mai chu ava pan leh a, a chhungah chuan a lut a. Lei chu a hai leh vak vak a, mahse a bur phum ruk kha a hmu zo ta hauh lo mai. Chutah a bul lawkah chuan Efsun-i a rawn lang thut a, "Hei hi em ni i zawn?" tiin bur chu arawn lek kang a.

A phu nasa lutuk chu a kat dawr a, "Hei hi i damdawi chu a ni maw...min tihchhiat i tum a ni..i him chuang lovang." a ti khur khur mai a, a la nui var var leh ta nghal a. Chunu hlau lutuk chu a tap vak vak a, rang takin a tlan chhuak nghal a. Efsun-i erawh chu a awmna hmunah chuan ala awm reng a, bur chu uluk em em hian a en ngut ngut mai a.

********************

Burhan-a chu a muhil mek a, dawhkana a bengdar atang chuan a nupui aw bawk chuan, "Burhan..Burhan." tiin a rawn ko leh ta vak vak mai. A harh a, a khum bula thutthleng buk thei chu ava en a, a nupui ngei mai chu amah hnungchhawn zawngin a lo thu khur mai a. A rawn tho a, "Burhan.." tia ko vak vak chung chuan a rawn pan hnai zel a.

Burhan-a chuan a hlau takzet, a nupui lah chuan a rawn panhnai zel mai si. Chutah a bengdar atang bawk chuan, "Burhan, i hnungah ka awm." a rawn ti leh thut a, a hnung atang chuan a nupui chuan sarang hian a lu chu a rawn tuam thut mai. Nghet takin a tuam a, Burhan-a chu a thaw a chham a, reiloteah chuan a thi ta der mai.

****************

A tuk zingah chuan thlanmualah Burhan-a chu vui a ni a, Turkan-i leh Canan-i chu an tap nasa ngei mai. Chutih lai chuan Orhan-a pawh anu thlanah chuan kalin a lo tawngtai ve mek a, "Lalpa, ka nu kha ngaidam ang che." tiin a dil a. Burhan-a thlan atanga hla vak lovah chuan Efsun-i chu a ding ngawi reng a, Orhan-a chu ava melh a.

Chuveleh Orhan-a chu a meng a, Efsun-i chu ava melh ve vat a. Thinrim hmel tak chuan ama hriattham lek hian, "Enge hetah i tih? Kha hmeichhe naupang pawisawilo kha chhuah vat rawh." Efsun-i melh reng pah chuan a han ti khur khur a. Mahse Efsun-i chuan a hlauh loh hmel kher mai, nui vur vur chung chuan a kalsawn ta daih a.

****************

Chhunah chuan an inkawtah chuan Yasar-a chu a thu ngawi reng a, Efsun-i a lo kal a. A bulah chuan rawn thuin, "Pa, mi zawng zawng hi kan la thi vek dawn tiraw?" tiin a rawn zawt ringawt mai a. Mahse Yasar-a chuan a chhang mai lo, "Apu ang khan kan la thi vek dawn a ni tiraw? Pa, i thih ve ka phallo." Efsun-i bawk chuang a han ti leh a.

Yasar-a chuan a kutah lo vawn sakin, "Bawihte, tupawh hi kan la thi vek dawn alawm, mahse engtik hunah nge kan thih dawn tuman kan hrelo. Chutiang ngaihtuah suh, tinge i nu bulah i kal veloh a?" tiin a han zawt a. "Ka naute bula mahni chauha awm ka hlau a ni." tiin a lo chhang a.

"Tinge i hlauh a?" tiin a zawt leh a. "Apu kha keimah vanga thi em ni?" Efsun-i chuan a han ti leh a. "Enge maw i sawi le? Tinge nangmah vang a nih ngawt anga?" tiin apa chuan a lo zawt let a. Chutah Efsun-i chuan chiang kekkawk hian apa chu a han melh a, "A chhan chu athi dawn tih kha ka hre lawk a ni, ka hmu lawk a ni." a ti ta mai a. "I pu lakah khan lungawilohna i nei deuh a nilo maw...chuvang mai mai chu aniang." tiin a lo chhang leh mai a.

Zanah chuan Turkan-i thiannu Reyhan-i te inah chuan Turkan-i chu afate hruaiin riak turin an vak kal a, a inthlahrung hle mai. "A inthlahrunawm khawp mai, mahse kan dinhmun hian a zir ngang silo. I pasal ngaihdan a ni lovang tih pawh ka hlau khawp mai, thiannu." a ti a. "Chutin ngai mah ta che, hetiang hunah te chuan a pawi hleinem." Reyhan-i chuan a lo ti a.

"Engtin nge saw inah sawn ka awm theih tawh ang..engtin nge ka awm tak ang?" tiin Turkan-i chu a mittui a tla zawih zawih a. "Ka in te chu i in ang chiah ah ngai rawh, i duh chen chen i awm dawnnia." tiin a thiannu chuan a lo hnem a. Tap chung hian, "Engtin nge ka pa khan kha tiang thil kha a tih theih le? Tinge a intih hlum tak mai le?" tiin a inhnit hlawp hlawp mai a.

*****************

Yasar-a chu a nupui unaunu Canan-i roomah chuan a lut ru a, a dawhkan hnuai pawhdawh chu hawngin thlalak pakhat hi a la chhuak a. Chu thlalak chu an chhungkaw thlalak, amah leh a nupui Turkan-i, a nupuia nau Canan-i leh a fanu Efsun-i te thlalak a ni. Chu thlalak chu a lai takak inthlehna hnuhma hi a lo awm a, chu chu a han thlep nawn leh a.

Chutah amah leh Canan-i chiah chu an lang ta, chu thlalak thlep thin tu pawh chu tudang nilovin Canan-i a ni tih chu hrilh ngai lovin a hre nghal mai a. Canan-i, hmel rapawm taka a hmuh thin te, a hmangaih thu leh a u Trukan-i a thik thin zia a sawi te avang khan Yasar-a hian Canan-i chu a ringhlel tlat tawh a ni.

*******************

Orhan-a chu Efsun-i te in hmaah chuan a ding reng a, "Enge hetah hian ka tih? Engthil in nge helai hmun ah hian min hruai?" tiin a inzawt mawlh mawlh a. Basement chu a en vang vang a, tichuan ava lut ta a. Pindan hlui pakhat lam chu ava pan a, parda a han keu chiah chu a nu Hatice-i a lo thuvung mai.

A sam a lo khuih mial mial a, "I la hria em, Orhan...i nupui Kader-i vangin ka thi a nih kha. Min that a ni, kal bo rawh, Orhan." a lo ti khur khur mai a. Parda chu a khar vat a, "Enge i duh? Ka lakah hian enge i duh?" tiin Orhan-a chuan a vin vak vak a. Chutah  abulah chuan Efsun-i chu hmai rang nuai leh rapawm em em hian a lo lang thut a, "Orhan, i nupui ka ni hi ka lawm takzet. Min kalsan suh aw, Orhan." a rawn ti ta mai a.

Orhan-a chuan mak a ti kher mai, chubakah Efsun-i aw chu a nupui boral ta Kader-i aw ang chiah chiah a ni lehnghal. Hnuailam a melh a, "Nilo, min tibuai suh u. Kal bo rawh u." tiin Orhan-a chu basement atang chuan a chhuak a. Ahma a ramhnuaia a chhar, bawm lian tak mai kha a hrechhuak zawk a, a inlam pan chuan a haw lehnghal a.

*****************

Hospital-a damdawi dahna room ah chuan Canan-i chu bang nghengin a thu a, a tap zawih zawih mai a. A mit a thip em em a, engkim mai chu a hmu phe ruai vek mai a. Damdawi zinga mit thlawr ni ngeia a hriat chu lain a mitah chuan a thlawr a, chutah a han meng chiah chu a hma zawnah chuan anu (Burhan-a nupui) leh a u Turkan-i an lo lang thut mai a, an hmel lah chu a rapawm em em lehnghal.

"Engvangin nge i unaunu kha i tanpui a, Canan? I thik vang a ni tiraw? Misual tak i ni, ka fanu." tiin anu chuan a rawn pan chhet chhet a, Canan-i hlau lutuk chu a tlu tawp mai a. Chutah Efsun-i a rawn lang ve leh thut mai, "Anu kha i pui a ni, Ani Canan.." a rawn ti ve leh a. Chutah an pathum chuan Canan-i hmai zawnah chuan an au vak vak a, Canan-i hmai chu a chuar vek a, a hmui a sawi bawi bawi a, a thi der mai.

******************

Orhan-a chuan Hodja bawk chu a va pan leh a, "Thlarau sualte hian mi dawihzep leh taksa chaklo te hi an thlang ber thin a, chung michaklote kawchhunga an luh hian an thiltihtheihna pawh a chak zawk fo thin. An awmna taksa neitute chu nasa takin an sawisa thin a, an taksa pumpui chu a thih hma chuan an nghaisa ta thin a ni. VAwiina thlanmual a i hmuh pawh kha thil thleng palh a nilo, kha ramhuai kha i hmu ngei a ni. Fimkhur hle ang che, ka fapa." tiin Hodja chuan a lo hrilh a.

Orhan-a pawh chu a haw veleh ta, a tawngtaina tlangah chuan a bawm lian chhar chu kengin a chho a, mei a chhem bawk a. A tap zawih zawih a, "Ka tih angai a ni, ka tih ngei a ngai a ni." tiin a phun sap a. Bawm chu a hawng a, a  nupui Kader-i thlalak chu mittui tla zawih zawih chuan a la chhuak a, a hal ral ta a ni.

*****************

Zanlaiah chuan Yagmur-i leh Damla-i te unau chu tuichhunchhuah lam pan chuan an ka phei a, an zu dak a. Chu tuichhunchhuah khur mawng thim ruih mai atang chuan Efsun-i aw ngei mai chuan, "Yagmur, Damla..a chhungah hian ka awm ania, lo chhuk ve rawh u." a rawn ti lauh lauh mai a. Chutah an unau chuan an inkai a, an zuangthla ta mai a.

Turkan-i muhil lai chu a harh zawk mai a, Damla-i leh Yagmur-i te chu an lo awm lo tak tak a. Pawnah chuan rang takin a chhuak a, tuichhunchhuah bulah chuan an unau chuan an lo awm tak tak a. Turkan-i chu va tlan pheiin, "Bawihi, enge in tih?" tiin a zawt a. Chuveleh an unau chuan an tlan chhe ta daih a, Turkan-i chuan a um nghal a.

An unau chuan an in bul lawka an farm house hlui tawh takah chuan an tlan lut daih a, Turkan-i chuan a umzui ve zel a. A han lut ve chiah chu a lo rimchhe em em a, pindan pakhatah chuan a lut leh a. Naute lem lu ringawt te a lo inkhai fer fur hlawm a, TV a lo in on bawk. Turkan-i chuan a hlau hle a, chutah nui thawm a hre ta.

Thawm lo chhuahna lam chu ava pan a, khum pakhatah chuan blanket-a inlukhup niawm tak hian Yagmur-i te unau lo nui ri her her mai chu ava hmu a. "Bawihi?" tiin a han ko leh am "Anu hetah kan awm lo, tuichhunchhuah chhungah kan awm daih." tiin an lo chhang a. Blanket a han hlip chu Efsun-i a lo ni reng mai, a hmai chu a lo thi sung lehnghal a.

Turkan-i chu a phu nasa kher mai, a thaw hlawi hlawi mai bawk a. "I fanu, Efsun-i ka nih hi. I tan chuan thilpek tha ber ka ni i tih thin kha, tiin a insiamchhiat khum vak vak mai a. Chutah a dak awrh a, a thal nghal tawp mai. A khur cher cher a, a vun te chu a rawn dum tial tial bawk a. A ka atang chuan thisen a rawn chhuak a,  Turkan-i pawh chu a thi ve ta der mai.

******************

Orhan-a chu BAsement-ah chuan ava kal leh a, Efsun-i chu a lo la awm reng a. A hma zawnah chuan a thu a, "He hmeichhe naupang lak atang hian enge i duh?" tiin a vin khur khur mai a. Mahse a chhang lo, "Tunge i nih, kha hmeichhe naupang damlo lakah khan enge i duh?" Orhan-a bawk chuan a han ti leh vak a.

"He taksa hmang hian thil thalo tak ka ti zel dawn, a chhan chu anchhia a awm a ni. Chumi anchhia vang chuan he kawchhunga awm ka ni, he kawchhungah hian ka awm a ngai a ni. He ramhuai hi, he thlarau sual hi tunge a nih i hre duh em?" a han ti a, hnuailam a melh a, tichuan a rawn hawichhuak leh a.

Mak tak maiin Efsun-i hmel pangngai tak chu a rawn lang a, ama aw ngei chuan, "Ka nuin kum 3 mi lek ka nih laiin min thihsan a, ka pian hmain ka pa in min thihsan bawk. Ka nuin min thihsan hnu khan Home ah min dah a, engthil nge thleng tih chiang taka hre turin naupang mai ka la ni bawk si. Chu Home chu kan in emaw ka ti a, chuta hnathawktute chu ka nu awmna te ka zawt thin. Ka nu chu vanramah a awm thu min hrilh thin a, hei hi ka in thar a nih tawh tur thu min hrilh bawk thin. Tichuan nikhat chu hmeichhe pakhat a lo kal a, ani chuan min hruai haw a. A pasal nen chuan min enkawl a, an in chu ka in thar a nih thu leh anmahni chu ka nu leh pa thar an nih thute min hrilh bawk. A tir chuan ka hrethiam lova, mahse hun a kal zel a, ka nu leh pate tak tak an niah ka ngai ta a. Min hmangaih em em a, keipawhin ka hmangaih ve bawk. Ka nu thar chuan EFSUN BAWIHTE, KA TANA THILPEK THA BER I NI..tiin min hrilh fo thin. Chutiang thu ka hriat chuan nuam ka tiin ka hlim thei em em a, KEI PAWHIN KA HMANGAIH CHE, ANU tiin ka chhang let thin. Nikhat chu ka nu chuan unaunu thar ka neih tur thu min hrilh a, ka lawm takzet. Ka nu bulah chuan ka nau lo piang turte chu ka duat viau ang tiin ka sawi thin a, ka nu pawh a hlim takzet. Tichuan ka naute chu an lo piang ta a, ka duat em em a." tiin a mittui chu a rawn tla a.

Inhnit feih feih pah chuan, "Ka nu chuan min ngaihsaklo sawt hle a, min hmangaih tawh lo ni berin ka hria. Ka roomah in kalh khumin tuma hriat lohvin ka tap fo thin, ka nu khan min ngaihthah takzet a ni. A tan chuan ka hnawksak takzet a, min ning takzet a ni. Tichuan ka ni Canan-i chuan a tanpui ta a, tur a min hrai hlum an tum ta a ni. Tichuan ka eiturah chuan tur chu tlem tlem in an pawlh thin ta a, chuvang chuan ka damloh phah a, mumang rapthlak tak tak te ka nei ta thin a ni. A ni telin ka thalo telh telh a, ka ngaihtuahna te pawh a fim thei tawh lo." tiin a tap zawih zawih a.

Chutah a rawn hawichhuak leh thut a, a hmel pawh a rawn dang var leh ta pup mai. AW thum tak mai hian, "Khatia hmeichhe naupang pawisawi lo tak aw ka hman meuh chuan min khawngaih a ni tiraw?" tiin a vin leh khur khur a, a nui vur vur a. Mahse a hmel a rawn pangngai leh vat a, a aw pangngai bawk chuan, "Khanu khan ka pa pawh saw tihhlum a tum a. A ro zawng zawng khawm sak vek a tum a ni, kha pitar khan." a ti ta mai a.

Orhan-a chuan mak ti tak hian a en vung vung ringawt a, "Ka pa chu dawi hmanga anchhe lawh a tum a, mahse chu anchhia chu ka pa chungah nilovin ka chungah a thleng ta zawk a ni. Mi zawng zawng thah vek an tum a, ka pu leh ka ni Canan-i leh ka nu thar pawh chu chu ramhuai chuan a that ta vek a ni. Ka taksa chaklohna chu remchangah la in ka taksa chu an hmang nasa em em a, nuam an ti a ni. Mahse keimah chauhvin ka tuar lo, kha mihring anu anga a en, a hmangaih em em khan thah a tum tih a hre hauh silo. Chuan ka ni Canan-i lah chuan a thik avangin ka nu chu a pui ta a, kha nu zaidam tak, min venghim thin tu khan min thah a tum ta mai chu ania." tiin a nui huah huah a.

Chutah a hmelh chu a rawn dang var leh pup pup a, "Kha kha em ni i hriat duh chu?" tiin a vin leh ta khur khur mai. "He hmeichhe naupang taksa hian a tuar hnem tawk tawh e, i thil tih hi sual a ni, kalsan vat rawh." tiin Orhan-a chuan a vin vak vak a. Mahse Efsun-i kawchhunga ramhuai chuan chhuah a tum hauh lo, "I hriat duh i hre tawh, kal bo rawh." tiin a lo vin let hrep mai.

Orhan-a chuan a ban a phar chhuak a, "Kal bo rawh, he naupang taksa hi chhuahsan rawh." a ti a, Efsun-i chu a kun reng mai. "Min en rawh, tunge i nih?" tiin Orhan-a chuan a zawt leh a. A rawn hawi chhuak a, "Ramhuai Yezidrah ka ni." a rawn ti t(r)ial ruai mai. "He taksa thunun tur hian dikna i neilo, kal bo rawh. He khawvel ah hian i tel ve lo, khawvel dang ami i ni." tiin Orhan-a chuan hnawhchhuah a tum a.

Mahse chu ramhau Yezidrah chuan, "I la hria em? Ka tih ang chiah hian ahmain i ti ve tawh..i nupui Kader-i thih hnua i thil tih kha ila hria em? Ramhuaite fanu i laksak a, i nupui angin i chenpui a ni lawm ni? I duhna te avangin bual at in i awm a, dikna i nei bik em ni? Tunah nang hian ka thil tih hi a diklo, dikna ka neilo min ti ngam amaw? I Pathian i hlau lo em ni?" a lo ti let hrep mai.

Orhan-a chu a ngawi vang vang a, "KAder-i thil zawng zawng chu hal ral vek a ni tawh a, Pathian tan ka inpe tawh a ni. Chuvang chuan kei chu chhandam ka ni tawh, he naupang hi kaltir rawh. Tihsual a nei lo, keimah hi misual chu a ka ni e. Ani kha chhuah la, kei hi min la mai rawh." a ti a.

Chutah Efsun-i chu a eu vak a, a t(r)e ruai ruai a. Chuveleh chu ramhuai Yezidrah chu rawn chhuak in Orhan-a kawchhungah chuan a rawn lut ve ta, mahse Orhan-a chuan a theihtawp chhuahin a sual let a. "Ka Lalpa hian min kalsan lovang." tiin a phun mawlh mawlh a, ramhuaite chuan, "A kalsan tawh che, i Pathian chuan a kalsan tawh che." tiin an lo chhang a.

Mahse Orhan-a chuan beilet lui zelin, "In thiltihtheihna ai chuan ka Pathian a ropui zawk, ani chuan min kalsan ve ngai lo." tiin a chhang let a, rei fe chu an inbei ta mai a. A maimitchhing a, atawp atawpah chuan boruak chu a reh diak a. Orhan-a rinna chuan chu ramhuai chu a hneh ta a, Efsun-i pawh naupang hmel pangngai tak ang chuan a rawn lang leh thei ta.

****************

(A HNUAH ENGE THLENG?)

Khami zan khan Yagmur-i leh Damla-i te unau chuu tuichhunchhuah bulah chuan an lo la ding reng a, mahse dawi sut a nih takah chuan an zuangthla ta hman lo hlauh a, Reyhan-i'n a rawn hmu hman a, a chhanhim hman hlauh a ni. Yasar-a leh a fate pathum, Efsun-i, Yagmur-i leh Damla-i te pawh chu an chhungkua chuan indang an luah a, hlim takin an awm leh ta a ni.

A TAWP TA